ⵉⵄⵍⴰⵎⴻⵏ ⵉ ⵉⵙⵔⴰⵉⵍ ⵓ ⵉ ⵍⵃⵓⴽⴽⴰⵎ ⵏⵏⴻⵙ
2
1 “ⵓⵛⵜ ⵅ ⵢⴻⵏⵏⵉ ⵉⵜⵜⵅⴻⵎⵎⴰⵎⴻⵏ ⴷⵉ ⵍⵎⵓⵄⵚⵉⵢⵢⴻⵜ ⵓ ⵅ ⵢⴻⵏⵏⵉ ⵉⵜⵜⵅⴻⵎⵎⴰⵎⴻⵏ ⴷⵉ ⵍⵖⴰⵔ ⴷⵉ ⵇⴰⵎⴰⵜ ⵏⵙⴻⵏ.
ⵖⴰⵔ ⵜⴻⴼⴼⵓⵜ ⴰⴷ ⵜ ⴳⴳⴻⵏ,
ⵎⴰⵖⴰⵔ ⴰⴼⵓⵙ ⵏⵙⴻⵏ ⴷⴰⵢⴻⵙ ⴰⵟⵟⴰⵙ ⵏ ⵜⵥⴻⵎⵎⴰⵔ.
2 ⵏⵉⵜⵏⵉ ⵎⵎⴻⵥⵍⴻⵏ ⴷⴻⴳ ⵉⵢⵢⴰⵔⴻⵏ
ⵓⵛⴰ ⵜⵜⴽⴻⵛⵛⴹⴻⵏ ⵜⴻⵏ ⵄⴰⵡⴻⴷ,
ⵓⵍⴰ ⴷ ⵜⵓⴷⵔⵉⵏ, ⵓⵛⴰ ⵜⵜᵉⵟⵟⴼⴻⵏ ⵜⴻⵏⵜ.
ⴰⵎⵎⵓ ⵉ ⴳⴳⵉⵏ ⵏⵉⵜⵏⵉ ⵙ ⵍⴻⵅⵛⵓⵏⴻⵛⵜ ⵉ ⵡⴻⵔⵢⴰⵥ ⵓ ⵉ ⵜⴰⴷⴷⴰⵔⵜ ⵏⵏⴻⵙ,
ⵡⴰⵀ, ⵉ ⴽⵓⵍ ⴰⵔⵢⴰⵥ ⵓ ⵉ ⵜⴻⵙⵖⴰⵔⵜ ⵏⵏⴻⵙ.” ■
3 “ⵙ ⵓⵢⴻⵏⵏⵉ, ⵉⵏⵏⴰ ⵙⵉⴷⵉ:
ⵅⵥⴰⵔ, ⵏⴻⵛⵛ ⵜⵡⴻⵏⵏⵉⵖ ⵉⵊⵊ ⵏ ⵍⵖⴰⵔ ⵅ ⵍⴰⴵ-ⴰ,
ⵉ ⵥⵉ ⵡⴰⵔ ⵜⵥⴻⵎⵎⴰⵔⴻⵎ ⴰⴷ ⵜⵊⴻⴱⴷⴻⵎ ⵉⵔⴰⵡⴻⵏ ⵏⵡⴻⵎ,
ⵓ ⵉ ⵥⵉ ⵡⴰⵔ ⵜⵥⴻⵎⵎⴰⵔⴻⵏ ⴰⴷ ⵜⵓⵢⵓⵔⴻⵎ ⵄⴰⴷ ⵙ ⵓⵄⴻⴼⴼⴰⵔ,
ⵎⴰⵖⴰⵔ ⴰⴷ ⵜⵉⵍⵉ ⴷ ⵉⵛⵜ ⵏ ⵍⵡⴻⵇⵜ ⵜⴰⵄⴻⴼⴼⴰⵏⵜ.■
4 ⴷⴻⴳ ⵡⴰⵙⵙ ⵏⵏⵉ ⴰⴷ ⵅⴰⵡⴻⵎ ⵙⵙⴳⴻⵄⵄⴷⴻⵏ ⵉⵊⵊ ⵏ ⵍⵎⴰⵜⴰⵍ
ⵓ ⴰⴷ ⵖⴻⵏⵏⵊⴻⵏ ⵉⵊⵊ ⵏ ⵢⴻⵥⵔⵉ ⵏ ⵡⴻⵛⴹⴰⵏ ⴰⵎ ⵜⵜⵛⴻⵜⵛⴰⵏ,
ⵓ ⴰⴷ ⵉⵏⵉⵏ: ⵏⴻⵛⵛⵉⵏ ⵏⴻⵜⵜⵡⴰⵔⴻⴷⴷⴻⴵ ⵇⴰⵄ!
ⵏⴻⵜⵜⴰ ⵢⴰⵔⵔⴰ ⵜⴰⵙⵖⴰⵔⵜ ⵏ ⵍⴳⴻⵏⵙ ⵉⵏⵓ ⵖⴰⵔ ⵡⴻⵏⵏⴻⵖⵏⵉ.
ⵎⴰⵎⵎⴻⵛ ⵜⵜ ⵉⴽⵙⵉ ⵥⵥⴰⵢⵉ.
ⵏⴻⵜⵜⴰ ⵉⵡⵛⴰ ⵉⵢⵢⴰⵔⴻⵏ ⵏⵏⴻⵖ ⵉ ⵡⴻⵏⵏⵉ ⴷⴷ-ⵉⴼⴼⵖⴻⵏ ⵥⴻⴳ ⵡⴻⴱⵔⵉⴷ!
5 ⵙ ⵓⵢⴻⵏⵏⵉ ⵡⴰⵔ ⵖⴰⵔⴻⴽ ⵉⵜⵜⵉⵍⵉ ⵓⵍⴰ ⴷ ⵉⵊⵊⴻⵏ
ⵡⴻⵏⵏⵉ ⵉ ⵖⴰ ⵉⵏⴹⴰⵔⴻⵏ ⴰⴼⵉⵍⵓ ⵏ ⵍⴻⵇⵢⴰⵙ ⵄⵍⴰⵃⵙⴰⴱ ⵜⴰⵇⴻⴷⴷⵓⵃⵜ
ⴷⴻⴳ ⵡⴻⴳⵔⴰⵡ ⵏ ⵍⴳⴻⵏⵙ ⵏ ⵙⵉⴷⵉ.” ■
6 “ ‘ⵡⴰⵔ ⵙⵙⵓⴼⴼⵓⵖⴻⵎ ⴰⵡⴰⵍ ⴰⵎⵎⵓ ⵙ ⵓⴽⵓⴼⴼⵓ!’,
ⴰⵎⵎⵓ ⵉ ⵙⵙⴰⵡⴰⵍⴻⵏ ⵏⵉⵜⵏⵉ ⴰⵎ ⵙⵙⵓⴼⴼⵓⵖⴻⵏ ⴽⵓⴼⴼⵓ.
‘ⵅ ⵎⴰⵏ ⴰⵢⴰ ⵡⴰⵔ ⵥⴻⵎⵎⴰⵔⴻⵏ ⵏⵉⵜⵏⵉ ⴰⴷ ⵙⵙⵓⴼⴼⵖⴻⵏ ⴰⵡⴰⵍ ⵙ ⵓⴽⵓⴼⴼⵓ!’
ⴰⵎⵎⵓ ⵉ ⵖⴰ ⵜⵉⵍⵉ ⵍⴻⴼⴹⵉⵃⴻⵜ ⵡⴰⵔ ⵜᵉⵜⵜⵡⴰⴽⴽⴻⵙⵙ! ■
7 ⴰ ⴽⴻⵏⵏⵉⵡ, ⵜⴰⴷⴷⴰⵔⵜ ⵏ ⵢⴰⵄⵇⵓⴱ, ⵎⴰ ⵉⵥⴻⵎⵎⴰⵔ ⴰⴷ ⵉⵜⵜⵡⴰⵏⵏⴰ ⴰⵢⴰ?
‘ⵎⴰ ⵉⵊⵊⴰ ⵛⴰ ⴰⵔⵔⵓⵀ ⵏ ⵙⵉⴷⵉ ⵡⴰⵔ ⵜ ⵉⴳⴳⵉ?’
ⵏⵉⵖ: ‘ⵎⴰ ⵜⵉⵏⴰ ⴷ ⵜⵉⵎⴻⴳⴳⴰ ⵏⵏⴻⵙ?’
ⵎⴰ ⵡⴰⵔ ⵜⵜⴻⴳⴳⴻⵏ ⵡⴰⵡⴰⵍⴻⵏ ⵉⵏⵓ ⵍⵅⴰⵔ
ⵉ ⵢⴻⵏⵏⵉ ⵉⴳⴳⵓⵔⴻⵏ ⵙ ⵜⵙⴻⴳⴷⴰ?
8 ⵎⴰⵛⴰ ⵄⴰⴷ ⵉⴷⴻⵏⵏⴰⴹ ⵉⴽⴽⴰⵔ ⵍⴳⴻⵏⵙ ⵉⵏⵓ ⴰⵎ ⵢⵉⵊⵊ ⵏ ⵍⴻⵄⴷⵓ.
ⵜⴻⴽⵙⵉⵎ ⴰⵔⵔⵓⴹ ⴷ ⵓⴱⴰⵔⵜⴻⵙⵙⵓ
ⵥⴻⴳ ⵉⵎⵙⴻⴱⵔⵉⴷⴻⵏ ⵉⵇⴻⴼⵍⴻⵏ,
ⵉⵏⵏⵉ ⵉⵜⵜⵄⵉⴼⴼⴻⵏ ⵓⵎⴻⵏⵖⵉ.
9 ⴽⴻⵏⵏⵉⵡ ⵜⴻⵙⵙⵓⴼⴼⵓⵖⴻⵎ ⵜⵉⵎⵖⴰⵔⵉⵏ ⵏ ⵍⴳⴻⵏⵙ ⵉⵏⵓ
ⵥⵉ ⵜⴰⴷⴷⴰⵔⵜ ⵏⵙⴻⵏⵜ ⵉⵄⵉⵥⵥⴻⵏ.
ⵉⵃⴻⵏⵊⵉⵔⴻⵏ ⵏⵏⴻⵙ ⵜⴻⴽⴽⵙⴻⵎ ⴰⵙⴻⵏ ⴽⴻⵏⵏⵉⵡ ⵜⴰⵍⵡⵉⵥⵜ ⵉⵏⵓ ⵉ ⵍⴻⴱⴷⴰ.
10 ⴽⴽⴰⵔⴻⵎ ⵓ ⴰⴳⴳⵯⴻⵊⴻⵎ,
ⵎⵉⵏⵥⵉ ⵡⴰ ⵡⴰⵔ ⵉⴵⵉ ⴷ ⴰⵎⵛⴰⵏ ⵏ ⴰⵔⵔⴰⵃⴻⵜ!
ⵎⴰⵖⴰⵔ ⴰⵇⴰ ⵜⴰⵎⵎⵓⵔⵜ ⵜᵉⵜⵜⵡⴰⵙⴻⵅⵎⴻⵊ, ⴰⴷ ⵜⴰⵡⵉ ⴰⵔⴻⴷⴷⴻⴵ,
ⵡⴰⵀ ⵉⵊⵊ ⵏ ⵓⵎⴻⴷⴷⵓⵔ ⵡⴰⵔ ⵉⵛⵏⵉⵏ.
11 ⵎⴰⵍⴰ ⵛⴰ ⵏ ⵉⵊⵊ ⵉⴹⴻⴼⴼⴰⵔ ⴰⵙⴻⵎⵎⵉⴹ ⵓ ⵉⵇⵇⴰⵔ ⵉⵅⴰⵔⵔⵉⵇⴻⵏ, ⵓⵛⴰ ⵉⵇⵇⴰⵔ:
‘ⵏⴻⵛⵛ ⴰⴷ ⴰⵛ ⵙⵙⵓⴼⴼⵖⴻⵖ ⴰⵡⴰⵍⴻⵏ ⵙ ⵓⴽⵓⴼⴼⵓ ⴷⵉ ⵟⵟⵡⴻⵄ ⵏ ⴱⵉⵏⵓ ⴷ ⵛⵛⵔⴰⴱ!’
ⴰⵇⴰ ⵏⴻⵜⵜⴰ ⵅⴻⵏⵏⵉ ⴷ ⵓⵏⴰⴱⵉ ⵏ ⵍⴳⴻⵏⵙ ⵏⵏⵉ ⵉⵙⵙⵓⴼⴼⵓⵖⴻⵏ ⴰⵡⴰⵍⴻⵏ ⵙ ⵓⴽⵓⴼⴼⵓ.”
12 “ⵙ ⵜⵉⴷⴻⵜⵜ, ⴰ ⵢⴰⵄⵇⵓⴱ, ⵏⴻⵛⵛ ⴰⴷ ⵛⴻⴽ ⴽⵙⵉⵖ ⵖⴰⵔⵉ ⵇⴰⵄ,
ⵏⵉⵛⴰⵏ ⵏⴻⵛⵛ ⴰⴷ ⵙⵙⵎⵓⵏⴻⵖ ⵎⵉⵏ ⵉⵇⵇⵉⵎⴻⵏ ⵥⵉ ⵉⵙⵔⴰⵉⵍ.
ⴰⴷ ⵜⴻⵏ ⵙⵙⵎⵓⵏⴻⵖ ⴰⵎ ⵡⵓⴵⵉ ⵏ ⴱⵓⵛⵔⴰ,
ⴰⵎ ⵉⵛⵜ ⵏ ⵜⵃⵉⵎⴰⵔⵜ ⴷⵉ ⵍⵡⴻⵙⵜ ⵏ ⵜⵔⴻⴽⴽⵡⴰⵙⵜ.
ⴰⴷ ⴷⵉⵏ ⵢⵉⵍⵉ ⵉⵊⵊ ⵏ ⵓⵄⵓⵔⵔⵉⵛ ⵏ ⵉⵡⴷⴰⵏ.
13 ⴰⵎⴼⴻⴵⴻⵇ ⴰⴷ ⵉⵥⵡⴰⵔ ⵥⵥⴰⵜ ⵉ ⵡⵓⴷⴻⵎ ⵏⵙⴻⵏ,
ⵏⵉⵜⵏⵉ ⴰⴷ ⴼⴻⴵⵇⴻⵏ ⵓ ⴰⴷ ⵄⴷⵓⵏ ⵅ ⵜⴻⵡⵡⴰⵔⵜ,
ⵓ ⴰⴷ ⵥⵥⴰⵢⴻⵙ ⴷⴷ-ⴼⴼⵖⴻⵏ.
ⴰⵊⴻⴵⵉⴷ ⵏⵙⴻⵏ ⴰⴷ ⵉⵥⵡⴰⵔ ⵥⵥⴰⵜ ⵉ ⵓⵖⴻⵎⴱⵓⴱ ⵏⵙⴻⵏ,
ⵓ ⵙⵉⴷⵉ ⵖⴰⵔ ⵓⵥⴻⴵⵉⴼ ⵏⵙⴻⵏ.”