1 ⴷⴻⴳ ⵓⵙⴻⴳⴳⵯⴰⵙ ⴰⵎⴻⵥⵡⴰⵔⵓ ⵏ ⴱⴰⵍⵛⴰⵚⵚⴰⵔ, ⴰⵊⴻⴵⵉⴷ ⵏ ⴱⴰⴱⵉⵍ, ⵉⵥⵔⴰ ⴷⴰⵏⵉⵢⴰⵍ ⵉⵛⵜ ⵏ ⵜⴰⵔⵊⵉⵜ ⴷ ⵜⵎⴻⵥⵔⴰ ⴷⴻⴳ ⵓⵥⴻⴵⵉⴼ ⵏⵏⴻⵙ ⵓⵎⵉ ⵜ ⵜⵓⵖⴰ ⴷⵉ ⵜⴰⵙⵙⵓⵜ. ⵅⴻⵏⵏⵉ ⵢⵓⵔⴰ ⵜⴰⵔⵊⵉⵜ ⵏⵏⵉ ⵓⵛⴰ ⵉⵃⴰⵊⴰ ⵥⵥⴰⵢⴻⵙ ⵜⵉⵎⴻⵙⵍⴰⵢⵉⵏ ⵜⵉⵎⴻⵥⵡⵓⵔⴰ.

2 ⵉⵙⵙⵉⵡⴻⵍ ⴷⴰⵏⵉⵢⴰⵍ, ⵉⵏⵏⴰ: “ⵜⵡⴰⵍⵉⵖ ⵙ ⴵⵉⵍⴻⵜ ⵉⵛⵜ ⵏ ⵜⵎⴻⵥⵔⵉⵡⵜ, ⵓ ⵅⵥⴰⵔ, ⴰⵇⴰ ⴷⵉⵏ ⴰⵔⴻⴱⵄⴰ ⵏ ⵉⵙⴻⵎⵎⵉⴹⴻⵏ ⵏ ⵓⵊⴻⵏⵏⴰ ⵙⵙⵀⴻⵡⵍⴻⵏ ⵍⴻⴱⵃⴰⵔ ⴰⵎⴻⵇⵇⵔⴰⵏ, 3 ⵓⵛⴰ ⴰⵔⴻⴱⵄⴰ ⵏ ⵉⵎⵓⴷⴷⴰⵔⴻⵏ ⵉⵎⴻⵇⵇⵔⴰⵏⴻⵏ, ⵉⵏⵏⵉ ⵡⴰⵔ ⵢⴰⵔⴻⵡⵙⴻⵏ ⵛⴰ ⴷⴻⴳ ⵡⴰⵢⴰⵡⵢⴰ, ⴳⴻⵄⵄⴷⴻⵏ-ⴷⴷ ⵥⵉ ⵍⴻⴱⵃⴰⵔ.

4 ⵜⵓⵖⴰ ⴰⵎⴻⵥⵡⴰⵔⵓ ⴰⵎ ⵡⴻⵢⵔⴰⴷ, ⵖⴰⵔⴻⵙ ⴰⴼⵔⵉⵡⴻⵏ ⴰⵎ ⵓⴳⵉⴷⴻⵔ. ⵏⴻⵛⵛ ⵇⵇⵉⵎⴻⵖ ⵅⴻⵥⵥⴰⵔⴻⵖ ⴰⵍⴰⵎⵉ ⵜⵜⵡⴰⵇⴻⵍⵄⴻⵏ ⵡⴰⴼⵔⵉⵡⴻⵏ ⵏⵏⴻⵙ. ⵉⵜⵜⵡⴰⵙⴳⴻⵄⵄⴻⴷ-ⴷⴷ ⵥⵉ ⵜⴻⵎⵎⵓⵔⵜ ⵓⵛⴰ ⵉⵜⵜⵡⴰⵙⵙⴰⵔⵙ ⵅ ⵉⴹⴰⵔⴻⵏ ⵏⵏⴻⵙ ⴰⵎ ⵢⵉⵊⵊ ⵏ ⴱⵏⴰⴷⴻⵎ ⵓⵛⴰ ⵉⵎⵎⴻⵡⵛ ⴰⵙ ⵉⵊⵊ ⵏ ⵡⵓⵍ ⵏ ⴱⵏⴰⴷⴻⵎ.

5 ⵓ ⵅⵥⴰⵔ, ⵉⵊⵊⴻⵏ ⵏⵏⴻⵖⵏⵉ, ⵡⵉⵙⵙ ⵜⵏⴰⵢⴻⵏ, ⵢⴰⵔⵡⴻⵙ ⴷⵉ ⴷⴷⵓⴱ ⵓ ⵉⵙⵙⴳⴻⵄⵄⴻⴷ ⵉⵅⴻⴼ ⵏⵏⴻⵙ ⵖⴰⵔ ⵉⵊⵊ ⵏ ⵓⵖⴻⵥⴷⵉⵙ ⵓ ⴷⴻⴳ ⵓⵇⴻⵎⵎⵓⵎ ⵏⵏⴻⵙ ⵊⴰⵔ ⵜⴻⵖⵎⴰⵙ ⵏⵏⴻⵙ ⴰⵇⴰ ⴷⵉⵏ ⵜⵍⴰⵜⴰ ⵏ ⵢⴻⵅⵙⴰⵏ ⵏ ⵜⵖⴻⵥⴷⵉⵙⵜ ⵥⴻⴳ ⵉⴷⵎⴰⵔⴻⵏ ⵓⵛⴰ ⵏⵏⴰⵏ ⴰⵙ: ‘ⴽⴽⴰⵔ, ⴻⵛⵛ ⴰⵟⵟⴰⵙ ⵏ ⵡⴻⵢⵙⵓⵎ!’

6 ⴰⵡⴰⵔⵏⵉ ⴰⵙ ⵥⵔⵉⵖ, ⵓ ⵅⵥⴰⵔ, ⵉⵊⵊ ⵏⵏⴻⵖⵏⵉ ⴰⵎ ⵓⵖⵉⵍⴰⵙ. ⵖⴰⵔⴻⵙ ⵅ ⵡⴻⵄⵔⵓⵔ ⵏⵏⴻⵙ ⴰⵔⴻⴱⵄⴰ ⵏ ⵡⴰⴼⵔⵉⵡⴻⵏ ⵏ ⵉⵊⵊ ⵏ ⵡⴻⵊⴹⵉⴹ ⵓ ⴰⵎⵓⴷⴷⴰⵔ ⵏⵏⵉ ⵜⵓⵖⴰ ⵖⴰⵔⴻⵙ ⴰⵔⴻⴱⵄⴰ ⵏ ⵉⵥⴻⴵⵉⴼⴻⵏ ⵓⵛⴰ ⵜⴻⵎⵎⴻⵡⵛ ⴰⵙ ⵚⵚⵓⵍⵟⴰ.

7 ⴰⵡⴰⵔⵏⵉ ⴰⵙ ⵅⵥⴰⵔⴻⵖ ⴷⵉ ⵜⵎⴻⵥⵔⴰ ⴷⵉ ⴵⵉⵍⴻⵜ, ⵓ ⵅⵥⴰⵔ, ⴰⵎⵓⴷⴷⴰⵔ ⵡⵉⵙⵙ ⴰⵔⴻⴱⵄⴰ ⵉⵙⵙⴰⴳⴳⵯⴰⴷ ⵓ ⵉⵙⵙⵏⴻⵅⵍⴰⵄ ⵓ ⵖⴰⵔⴻⵙ ⴰⵟⵟⴰⵙ ⵏ ⵊⵊⴻⵀⴷ. ⵖⴰⵔⴻⵙ ⵜⵉⵖⵎⴰⵙ ⵏ ⵡⵓⵥⵥⴰⵍ, ⵉⵛⵛⴰ, ⵉⵍⴱⴻⵥ ⵓ ⵎⵉⵏ ⵉⵇⵇⵉⵎⴻⵏ ⵉⵄⴼⴻⵙ ⵅⴰⵙ ⵙ ⵉⴹⴰⵔⴻⵏ ⵏⵏⴻⵙ. ⵜⵓⵖⴰ ⵉⵎⵎⵙⴻⴱⴹⴰ ⵅ ⵉⵎⵓⴷⴷⴰⵔⴻⵏ ⵏⵏⴻⵖⵏⵉ ⵏⵏⵉ ⵜⵓⵖⴰ ⵇⴱⴻⵍ ⵏⵏⴻⵙ ⵓ ⵖⴰⵔⴻⵙ ⵄⴻⵛⵔⴰ ⵏ ⵡⴰⵛⵛⴰⵡⴻⵏ. 8 ⵏⴻⵛⵛ ⵃⴹⵉⵖ ⵅ ⵡⴰⵛⵛⴰⵡⴻⵏ, ⵓ ⵅⵥⴰⵔ, ⵉⵊⵊ ⵏ ⵡⴰⵛⵛⴰⵡ ⴷ ⴰⵎⴻⵥⵢⴰⵏ ⵉⴳⴻⵄⵄⴻⴷ ⵊⴰⵔ ⴰⵙⴻⵏ ⵓ ⵜⵜⵡⴰⵇⴻⵍⵄⴻⵏ-ⴷⴷ ⵜⵍⴰⵜⴰ ⵏ ⵡⴰⵛⵛⴰⵡⴻⵏ ⵉⵎⴻⵥⵡⵓⵔⴰ ⵓⵛⴰ ⵜⵜⵡⴰⴽⴽⵙⴻⵏ-ⴷⴷ ⵥⴻⴳ ⵡⴻⵎⵛⴰⵏ ⵏⵙⴻⵏ. ⵓ ⵅⵥⴰⵔ, ⴷⴻⴳ ⵡⴰⵛⵛⴰⵡ ⵏⵏⵉ ⵜⵓⵖⴰ ⴰⵅⵎⵉ ⴷⴰⵢⴻⵙ ⵜⵉⵟⵟⴰⵡⵉⵏ ⵏ ⴱⵏⴰⴷⴻⵎ ⴷ ⵢⵉⵊⵊ ⵏ ⵓⵇⴻⵎⵎⵓⵎ ⵉⵛⵛⵓⵔ ⵙ ⵍⴻⴼⴹⴰⵢⴻⵃ ⵜⵉⵎⴻⵇⵇⵔⴰⵏⵉⵏ.

9 ⵏⴻⵛⵛ ⵇⵇⵉⵎⴻⵖ ⵜⵜⵡⴰⵍⵉⵖ ⴰⵍⴰⵎⵉ ⵎⵎⴰⵔⵙⴻⵏ ⵍⴻⴽⵔⴰⵙⵉ ⵉⴳⴻⵍⵍⴷⴻⵏ ⵓⵛⴰ ⵉⵇⵇⵉⵎ ⵓⵡⴻⵙⵙⴰⵔ ⵏ ⵡⵓⵙⵙⴰⵏ. ⴰⵔⵔⵓⴹ ⵏⵏⴻⵙ ⴷ ⴰⵛⴻⵎⵍⴰⵍ ⴰⵎ ⵡⴻⴷⴼⴻⵍ ⵓ ⴰⵛⴻⵡⵡⴰⴼ ⵏⵏⴻⵙ ⴰⵎ ⵜⴰⴹⵓⴼⵜ ⵜⴻⵚⴼⴰ. ⵍⴽⵓⵔⵙⵉ ⵉⴳⴻⵍⵍⴷⴻⵏ ⵏⵏⴻⵙ ⴷ ⵉⵃⵓⴷⴰⵇ ⵏ ⵜⵎⴻⵙⵙⵉ ⴷ ⵜⵊⴰⵔⵔⴰⵔⵉⵏ ⵏⵏⴻⵙ ⴷ ⵜⵎⴻⵙⵙⵉ ⵉⵜⵜⴻⵃⴷⵓⴷⵓⵇⴻⵏ.

10 ⵉⴼⴼⴻⵖ-ⴷⴷ ⵥⵥⴰⵢⴻⵙ ⵉⵊⵊ ⵏ ⵢⴻⵖⵥⴰⵔ ⵏ ⵜⵎⴻⵙⵙⵉ. ⴰⵍⴻⴼ ⵅ ⵍⵓⵍⵓⴼ ⵜⵓⵖⴰ ⵜⵜⵙⴻⵅⵅⴰⵔⴰⵏ ⴰⵙ ⵓ ⵄⴻⵛⵔⴰ ⵏ ⵍⵓⵍⵓⴼ ⵅ ⵄⴻⵛⵔⴰ ⵏ ⵍⵓⵍⵓⴼ ⴱⴻⴷⴷⴻⵏ ⵥⵥⴰⵜⴻⵙ. ⴰⴳⵔⴰⵡ ⵏ ⵛⵛⵔⴻⵄ ⵉⵟⵟⴻⴼ ⴷⴻⴳ ⵓⵖⵉⵎⵉ ⵓⵛⴰ ⵏⵏⵓⵔⵥⵎⴻⵏ ⵉⴷⵍⵉⵙⴻⵏ. ^■  

11 ⵏⴻⵛⵛ ⵇⵇⵉⵎⴻⵖ ⵅⴻⵥⵥⴰⵔⴻⵖ ⵥⵉ ⵙⵙⵉⴱⴱⴻⵜ ⵏ ⵍⵃⴻⵙⵙ ⵏ ⵡⴰⵡⴰⵍⴻⵏ ⵉⵎⴻⵇⵇⵔⴰⵏⴻⵏ ⵏⵏⵉ ⵉⵙⵙⵉⵡⴻⵍ ⵢⵉⵛⵛ ⵏⵏⵉ. ⵏⴻⵛⵛ ⵇⵇⵉⵎⴻⵖ ⵅⴻⵥⵥⴰⵔⴻⵖ ⴰⵍⴰⵎⵉ ⵉⵜⵜⵡⴰⵏⴻⵖ ⵓⵎⵓⴷⴷⴰⵔ ⵓ ⵜᵉⵜⵜⵡⴰⵀⴻⵍⵍⴻⴽ ⴰⵔⵔⵉⵎⴻⵜ ⵏⵏⴻⵙ ⵓ ⵉⵜⵜⵡⴰⵙⴻⵍⵍⴻⵎ ⵉ ⵜⵎⴻⵙⵙⵉ ⵉⵜⵜⴻⵃⴷⵓⴷⵓⵇⴻⵏ.

12 ⵓⵍⴰ ⴷ ⵉⵎⵓⴷⴷⴰⵔⴻⵏ ⵉⵏⵏⴻⵖⵏⵉ ⵜᵉⵜⵜⵡⴰⴽⴽⴻⵙ ⴰⵙⴻⵏ ⵚⵚⵓⵍⵟⴰ ⵏⵙⴻⵏ ⵓ ⵉⵎⵎⴻⵡⵛ ⴰⵙⴻⵏ ⵜⴰⵥⵥⵓⴳⴳⴰⵔⵜ ⵏ ⵜⵓⴷⴰⵔⵜ ⴰⵍ ⵉⵛⵜ ⵏ ⵜⵙⴰⵄⵄⴻⵜ ⵓ ⴰⵍ ⵉⵊⵊ ⵏ ⵍⵎⵉⵊⴰⵍ ⵉⵜⵜⵡⴰⴳⴳⴻⵏ.

13 ⵏⴻⵛⵛ ⵇⵇⵉⵎⴻⵖ ⵜⵜⵡⴰⵍⵉⵖ ⴷⵉ ⵜⵎⴻⵥⵔⴰ ⵏ ⴵⵉⵍⴻⵜ, ⵓ ⵅⵥⴰⵔ, ⵉⵊⵊⴻⵏ ⵉⴳⴳⴰ ⴰⵎ ⵢⵉⵊⵊ ⵏ ⵎⵎⵉⵙ ⵏ ⴱⵏⴰⴷⴻⵎ ⵢⵓⵙⴰ-ⴷⴷ ⵓ ⵏⴻⵜⵜⴰ ⵢⵓⵢⵓⵔ ⵖⴰⵔ ⵓⵡⴻⵙⵙⴰⵔ ⵏ ⵡⵓⵙⵙⴰⵏ ⵓⵛⴰ ⵙⵙⵇⴰⵔⵔⴱⴻⵏ ⵜ ⵥⵥⴰⵜⴻⵙ.

14 ⵜⴻⵎⵎⴻⵡⵛ ⴰⵙ ⵚⵚⵓⵍⵟⴰ ⴷ ⵛⵛⴰⵏ ⴷ ⵜⴳⴻⵍⴷⴰ, ⵓ ⵎⴰⵔⵔⴰ ⵛⵛⵓⵄⵓⴱ ⴷ ⵍⴻⴳⵏⵓⵙ ⴷ ⵉⵍⵙⴰⵡⴻⵏ ⵜⵓⵖⴰ ⵜⵜⵙⴻⵅⵅⴰⵔⴻⵏ ⴰⵙ. ⵚⵚⵓⵍⵟⴰ ⵏⵏⴻⵙ ⴷ ⵉⵛⵜ ⵏ ⵚⵚⵓⵍⵟⴰ ⵉ ⵍⴻⴱⴷⴰ ⵉ ⵡⴰⵔ ⵉⴼⴻⵏⵏⵉⵏ ⵓ ⵜⴰⴳⴻⵍⴷⴰ ⵏⵏⴻⵙ ⵡⴰⵔ ⵉⵥⴻⵎⵎⴰⵔ ⴰⴷ ⵜⵜ ⴹⴰⵔⵔⴻⵏ. ^■  

15 ⵏⴻⵛⵛ, ⴷⴰⵏⵉⵢⴰⵍ, ⴰⵇⴰ ⵉⵜⵜⵡⴰⵙⵃⵉⵙⵙⴻⴼ ⴱⵓⵃⴱⴻⵍ ⵉⵏⵓ ⴷⴰⵅⴻⵍ ⴷⵉ ⴰⵔⵔⵉⵎⴻⵜ ⵉⵏⵓ ⵓ ⵜⵉⵎⴻⵥⵔⴰ ⴷⴻⴳ ⵓⵥⴻⴵⵉⴼ ⵉⵏⵓ ⵙⵙⴻⵏⵅⴻⵍⵄⴻⵏⵜ ⴰⵢⵉ.

16 ⵏⴻⵛⵛ ⵓⵢⵓⵔⴻⵖ ⵖⴰⵔ ⵢⵉⵊⵊⴻⵏ ⵥⴻⴳ ⵢⴻⵏⵏⵉ ⴷⵉⵏ ⵉⴱⴻⴷⴷⴻⵏ ⵓ ⵙⵙⴻⵇⵙⵉⵖ ⵜ ⵅ ⵎⵉⵏ ⵉⵅⵙ ⴰⴷ ⵢⵉⵏⵉ ⵎⴰⵏ ⴰⵢⴰ ⵎⴰⵔⵔⴰ ⵓ ⵏⴻⵜⵜⴰ ⵉⵙⵙⵉⵡⴻⵍ-ⴷⴷ ⴰⴽⵉⴷⵉ, ⵉⵛⴰⵔⵔⴻⵃ ⴰⵢⵉ ⵜⵉⵎⴻⵙⵍⴰⵢⵉⵏ-ⴰ.

17 ⵉⵎⵓⴷⴷⴰⵔⴻⵏ-ⴰ ⵉⵎⴻⵇⵇⵔⴰⵏⴻⵏ, ⴰⵔⴻⴱⵄⴰ ⵏⵏⵉ, ⴰⵇⴰ ⴰⵜⴻⵏ ⴰⵔⴻⴱⵄⴰ ⵏ ⵉⵊⴻⴵⵉⴷⴻⵏ ⵏⵏⵉ ⴷⴷ ⵖⴰ ⵉⴳⴻⵄⵄⴷⴻⵏ ⵥⵉ ⵜⴻⵎⵎⵓⵔⵜ.

18 ⴰⵡⴰⵔⵏⵉ ⴰⵢⴰ ⵉⵎⵇⴻⴷⴷⴰⵙⴻⵏ ⵏ ⵓⵎⵄⵓⴵⵉ ⵅ ⴽⵓⵍⵛⵉ ⴰⴷ ⵟⵟⴼⴻⵏ ⵜⴰⴳⴻⵍⴷⴰ ⵓ ⵜⴰⴳⴻⵍⴷⴰ ⴰⴷ ⵖⴰⵔⵙⴻⵏ ⵜⵉⵍⵉ ⵉ ⵍⴻⴱⴷⴰ, ⵡⴰⵀ ⵉ ⵍⴻⴱⴷⴰ ⵏ ⵍⴻⴱⴷⴰⵢⴰⵜ.

19 ⵅⴻⵏⵏⵉ ⵅⵙⴻⵖ ⴰⴷ ⵙⵙⵏⴻⵖ ⵍⵎⴻⵄⵏⴰ ⴷ ⵜⵉⴷⴻⵜⵜ ⵏ ⵓⵎⵓⴷⴷⴰⵔ ⵡⵉⵙⵙ ⴰⵔⴻⴱⵄⴰ, ⵡⴻⵏⵏⵉ ⵜⵓⵖⴰ ⵉⵎⵎⵙⴻⴱⴹⴰ ⴰⵟⵟⴰⵙ ⵅ ⵎⴰⵔⵔⴰ ⵉⵏⵏⴻⵖⵏⵉ, ⵉⵙⵙⴰⴳⴳⵯⴰⴷ ⴱⵍⴰ ⵍⵃⴻⴷ, ⵖⴰⵔⴻⵙ ⵜⵉⵖⵎⴰⵙ ⵏ ⵡⵓⵥⵥⴰⵍ ⴷ ⵡⴰⵛⵛⴰⵔⴻⵏ ⵏ ⵏⵏⵃⴰⵙ, ⵓⵛⴰ ⵉⵛⵛⴰ, ⵉⵍⴱⴻⵥ ⵓ ⵎⵉⵏ ⵉⵇⵇⵉⵎⴻⵏ ⵉⵄⴼⴻⵙ ⵅⴰⵙ ⵙ ⵉⴹⴰⵔⴻⵏ ⵏⵏⴻⵙ. 20 ⵓ ⵅ ⵄⴻⵛⵔⴰ ⵏⵏⵉ ⵏ ⵡⴰⵛⵛⴰⵡⴻⵏ ⵅ ⵓⵥⴻⴵⵉⴼ ⵏⵏⴻⵙ, ⵓ ⵅ ⵡⴻⵏⵏⴻⵖⵏⵉ ⵉ ⴷⴷ-ⵉⴳⴻⵄⵄⴷⴻⵏ ⵓ ⵉ ⵓⵎⵉ ⴷⴷ-ⵡⴹⴰⵏ ⵜⵍⴰⵜⴰ ⵥⵥⴰⵜⴻⵙ, ⵉⵛⵛ ⵏⵏⵉ ⵖⴰⵔⴻⵙ ⵜⵉⵟⵟⴰⵡⵉⵏ ⴷ ⵉⵊⵊ ⵏ ⵓⵇⴻⵎⵎⵓⵎ ⵉⵛⵛⵓⵔ ⵙ ⵡⴰⵡⴰⵍⴻⵏ ⵉⵎⵖⴰⵔⴻⵏ, ⴷ ⵡⴻⵏⵏⵉ ⵉⴱⴰⵏ-ⴷⴷ ⴷ ⴰⵎⴻⵇⵇⵔⴰⵏ ⵅ ⵡⴰⵛⵛⴰⵡⴻⵏ ⵏⵏⴻⵖⵏⵉ, 21 ⵏⴻⵛⵛ ⵥⵔⵉⵖ ⴰⵇⴰ ⵉⵛⵛ ⵏⵏⵉ ⵉⵜⵜⵎⴻⵏⵖⴰ ⴰⴽ-ⴷ ⵉⵎⵇⴻⴷⴷⴰⵙⴻⵏ ⵓ ⵉⵖⴻⵍⵍⴻⴱ ⵅⴰⵙⴻⵏ, 22 ⵖⴰⵔⴻⵙ ⴰⵍⴰⵎⵉ ⴷⴷ-ⵢⵓⵙⴰ ⵓⵎⵖⴰⵔ ⵏ ⵡⵓⵙⵙⴰⵏ ⵓ ⵢⵓⵖⴰ ⵜⴰⵙⵖⴰⵔⵜ ⵉ ⵉⵎⵇⴻⴷⴷⴰⵙⴻⵏ ⵏ ⵓⵎⵄⵓⴵⵉ ⵅ ⴽⵓⵍⵛⵉ ⵓⵛⴰ ⵜⵓⵙⴰ-ⴷⴷ ⵜⵙⴰⵄⵄⴻⵜ ⵉⵜⵜⵡⴰⴳⴳⴻⵏ ⵓⵛⴰ ⵟⵟⴼⴻⵏ ⵉⵎⵇⴻⴷⴷⴰⵙⴻⵏ ⵜⴰⴳⴻⵍⴷⴰ.

23 ⵏⴻⵜⵜⴰ ⵉⵏⵏⴰ ⴰⵎⵎⵓ: “ⴰⵎⵓⴷⴷⴰⵔ ⵡⵉⵙⵙ ⴰⵔⴻⴱⵄⴰ ⴰⴷ ⵢⵉⵍⵉ ⴷ ⵜⴰⴳⴻⵍⴷⵉⵜ ⵡⵉⵙⵙ ⴰⵔⴻⴱⵄⴰ ⵅ ⵜⴻⵎⵎⵓⵔⵜ ⵏⵏⵉ ⵉ ⵖⴰ ⵜⵉⵍⵉ ⵜⴻⵎⵙⴻⴱⴹⴰ ⵅ ⵎⴰⵔⵔⴰ ⵜⵉⴳⴻⵍⴷⵉⵡⵉⵏ ⵏⵏⵉ. ⴰⴷ ⵢⴻⵛⵛ ⵜⴰⵎⵎⵓⵔⵜ ⵎⴰⵔⵔⴰ, ⴰⴷ ⵅⴰⵙ ⵉⵄⴼⴻⵙ ⵓ ⴰⴷ ⵜⵜ ⵉⵍⴱⴻⵥ. 24 ⵓ ⵅ ⵄⴻⵛⵔⴰ ⵏ ⵡⴰⵛⵛⴰⵡⴻⵏ, ⴰⵇⴰ ⵥⵉ ⵜⴳⴻⵍⴷⵉⵜ ⵏⵏⵉ ⴰⴷ ⴽⴽⴰⵔⴻⵏ ⵄⴻⵛⵔⴰ ⵏ ⵉⵊⴻⴵⵉⴷⴻⵏ ⵓ ⴰⵡⴰⵔⵏⵉ ⴰⵙⴻⵏ ⴰⴷ ⵉⴽⴽⴰⵔ ⵡⴻⵏⵏⴻⵖⵏⵉ ⵓ ⵡⴰⵏⵉⵜⴰ ⴰⴷ ⵢⵉⵍⵉ ⵉⵎⵎⵙⴻⴱⴹⴰ ⵅ ⵉⵎⴻⵥⵡⵓⵔⴰ ⵓ ⵏⴻⵜⵜⴰ ⴰⴷ ⵉⴷⴻⴵ ⵜⵍⴰⵜⴰ ⵏ ⵉⵊⴻⴵⵉⴷⴻⵏ. 25 ⵏⴻⵜⵜⴰ ⴰⴷ ⵉⵜⵜⵄⴻⴼⴼⴰⵔ ⵙ ⵡⴰⵡⴰⵍⴻⵏ ⵏⵏⴻⵙ ⵅ ⵓⵎⵄⵓⴵⵉ ⵏ ⴽⵓⵍⵛⵉ ⵓ ⴰⴷ ⵢⴰⵔⴻⴷⴷⴻⴵ ⵉⵎⵇⴻⴷⴷⴰⵙⴻⵏ ⵏ ⵓⵎⵄⵓⴵⵉ ⵅ ⴽⵓⵍⵛⵉ ⵓ ⴰⴷ ⵢⴰⵔⵥⵓ ⵎⴰⵃⴻⵏⴷ ⴰⴷ ⵉⴱⴻⴷⴷⴻⵍ ⵉⴽⵓⴷⴻⵏ ⵉⵜⵜⵡⴰⴳⴳⴻⵏ ⴷ ⵛⵛⴰⵔⵉⵄⴰ ⵓ ⵏⵉⵜⵏⵉ ⴰⴷ ⵎⵎⴻⵡⵛⴻⵏ ⴷⴻⴳ ⵓⴼⵓⵙ ⵏⵏⴻⵙ ⵖⴰⵔⴻⵙ ⴰⵍ ⵉⵊⵊ ⵏ ⵓⴽⵓⴷ ⴷ ⵉⴽⵓⴷⴻⵏ ⴷ ⵡⴻⵥⵢⴻⵏ ⵏ ⵓⴽⵓⴷ. ^■   26 ⵅⴻⵏⵏⵉ ⴰⴷ ⵉⵟⵟⴻⴼ ⵡⴻⴳⵔⴰⵡ ⵏ ⵛⵛⵔⴻⵄ ⴷⴻⴳ ⵓⵖⵉⵎⵉ, ⵓⵛⴰ ⴰⴷ ⵥⵥⴰⵢⴻⵙ ⵜⵜⵡⴰⴽⴽⵙⴻⵏ ⵚⵚⵓⵍⵟⴰ ⵏⵏⴻⵙ ⵎⴰⵃⴻⵏⴷ ⴰⴷ ⵉⵜⵜⵡⴰⵔⴻⴷⴷⴻⴵ ⵓ ⴰⴷ ⵉⵜⵜⵡⴰⵜⴻⵃⵃⴰ ⴰⵍ ⴰⵏⴻⴳⴳⴰⵔⵓ. 27 ⵎⴰⵛⴰ ⵜⴰⴳⴻⵍⴷⴰ ⴷ ⵚⵚⵓⵍⵟⴰ ⴷ ⵍⴻⵎⵖⴰⵔⴻⵜ ⵏ ⵎⴰⵔⵔⴰ ⵜⵉⴳⴻⵍⴷⵉⵡⵉⵏ ⵙⴰⴷⵓ ⵓⵊⴻⵏⵏⴰ ⴰⴷ ⵎⵎⴻⵡⵛⴻⵏⵜ ⵉ ⵍⴳⴻⵏⵙ ⵏ ⵉⵎⵇⴻⴷⴷⴰⵙⴻⵏ ⵏ ⵓⵎⵄⵓⴵⵉ ⵅ ⴽⵓⵍⵛⵉ. ⵜⴰⴳⴻⵍⴷⵉⵜ ⵏⵏⴻⵙ ⴷ ⵉⵛⵜ ⵏ ⵜⴳⴻⵍⴷⵉⵜ ⵉ ⵍⴻⴱⴷⴰ ⵓ ⵎⴰⵔⵔⴰ ⵜⵉⴳⴻⵍⴷⵉⵡⵉⵏ ⴰⴷ ⵜ ⵡⴻⵇⵇⴰⵔⴻⵏ ⵓ ⴰⴷ ⴰⵙ ⵟⴰⵄⴻⵏ ⵉ ⵏⴻⵜⵜⴰ.”

28 ⵡⴰⵏⵉⵜⴰ ⴷ ⴰⵡⴰⵍ ⴰⵏⴻⴳⴳⴰⵔⵓ. ⵅⴰⴼⵉ ⵏⴻⵛⵛ, ⴷⴰⵏⵉⵢⴰⵍ, ⴰⵇⴰ ⵉⵅⴰⵔⵔⵉⵚⴻⵏ ⵉⵏⵓ ⵙⵙⴻⵏⵅⴻⵍⵄⴻⵏ ⴰⵢⵉ ⵓ ⵜⵉⵙⵙⵉⵇⵜ ⵜⵔⵓⵃ ⵥⴻⴳ ⵡⵓⴷⴻⵎ ⵉⵏⵓ, ⵎⴰⵛⴰ ⵏⴻⵛⵛ ⵃⴹⵉⵖ ⴰⵡⴰⵍ ⵏⵏⵉ ⴷⴻⴳ ⵡⵓⵍ ⵉⵏⵓ.

ⴰⵍ ⴷⴰⵏⵉⵜⴰ ⵉ ⵜⵉⵡⴻⴹ ⵜⵉⵔⴰ ⵙ ⵢⵉⵍⴻⵙ ⵏ ⵜⵔⴰⵎⵉⵜ.