46
1 “ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ: ⵜⴰⵡⵡⴰⵔⵜ ⵏ ⵍⴻⵎⵔⴰⵃ ⵏ ⴷⴰⵅⴻⵍ ⵏⵏⵉ ⵉⵅⴻⵥⵥⴰⵔⴻⵏ ⵖⴰⵔ ⵛⵛⴰⵔⵇ, ⴰⴷ ⵜⵉⵍⵉ ⵜⴱⴻⵍⵍⴻⵄ ⴷⵉ ⵙⴻⵜⵜⴰ ⵏ ⵡⵓⵙⵙⴰⵏ ⵏ ⵍⵅⴻⴷⵎⴻⵜ. ⴷⴻⴳ ⵡⴰⵙⵙ ⵏ ⵙⵙⴻⴱⵜ ⴰⴷ ⵜⴻⵏⵏⵓⵔⵥⴻⵎ ⵓⵍⴰ ⵅ ⵡⴰⵙⵙ ⵏ ⵓⵢⵓⵔ ⵏ ⵊⴷⵉⴷ ⴰⴷ ⵜⴻⵏⵏⵓⵔⵥⴻⵎ. 2 ⴰⴷ ⴷⴷ-ⵢⴰⴷⴻⴼ ⵍⵃⴰⴽⴻⵎ ⵙ ⵓⴽⵓⵍⵡⴰⵔ ⵏ ⵡⴻⵙⵇⵉⴼ ⵏ ⵍⴻⴱⵏⵉ ⵏ ⵜⴻⵡⵡⴰⵔⵜ ⵓⵛⴰ ⴰⴷ ⵉⴱⴻⴷⴷ ⵖⴰⵔ ⵟⵟⴰⵔⴼ ⵏ ⵍⴻⴱⵏⵉ ⵏ ⵜⴻⵡⵡⴰⵔⵜ. ⵉⴽⴻⵀⵀⴰⵏⴻⵏ ⴰⴷ ⵙⵙⵡⴻⵊⴷⴻⵏ ⵜⵉⵖⴰⵔⵚⴰ ⵏⵏⴻⵙ ⵏ ⵡⴻⵛⵎⴰⴹ ⴷ ⵜⵖⴰⵔⵚⴰ ⵏⵏⴻⵙ ⵏ ⵜⵎⴻⵙⵙⵉ ⵓ ⵏⴻⵜⵜⴰ ⴰⴷ ⵉⵙⵊⴻⴷ ⵅ ⵜⵏⴻⴱⴷⴰⵜ ⵏ ⵜⴻⵡⵡⴰⵔⵜ ⵓⵛⴰ ⴰⴷ ⵥⵥⴰⵢⴻⵙ ⵉⴼⴼⴻⵖ ⵄⴰⵡⴻⴷ. ⵡⴰⵔ ⵜⵜⴱⴻⵍⵍⵉⵄⴻⵏ ⵜⴰⵡⵡⴰⵔⵜ ⴰⵍ ⵜⴰⵎⴻⴷⴷⵉⵜ. 3 ⵍⴳⴻⵏⵙ ⵏ ⵜⴻⵎⵎⵓⵔⵜ ⴰⴷ ⵉⵙⵊⴻⴷ ⵥⵥⴰⵜ ⵉ ⵡⴰⴷⴰⴼ ⵏ ⵍⴻⴱⵏⵉ ⵏ ⵜⴻⵡⵡⴰⵔⵜ, ⵅ ⵡⵓⵙⵙⴰⵏ ⵏ ⵙⵙⴻⴱⵜ ⵓ ⵅ ⵡⵓⵙⵙⴰⵏ ⵏ ⵓⵢⵓⵔ ⵏ ⵊⴷⵉⴷ, ⵥⵥⴰⵜ ⵉ ⵡⵓⴷⴻⵎ ⵏ ⵙⵉⴷⵉ. 4 ⵜⴰⵖⴰⵔⵚⵜ ⵏ ⵡⴻⵛⵎⴰⴹ ⵏⵏⵉ ⵉ ⵖⴰ ⴷⴷ-ⵉⵙⵙⵇⴰⵔⵔⴻⴱ ⵍⵃⴰⴽⴻⵎ ⵏ ⵙⵉⴷⵉ ⴷⴻⴳ ⵡⴰⵙⵙ ⵏ ⵙⵙⴻⴱⵜ, ⴰⴷ ⵜⵉⵍⵉ ⵙⴻⵜⵜⴰ ⵏ ⵉⵥⵎⴰⵔⴻⵏ ⵉⵛⵏⴰⵏ ⴷ ⵉⵊⵊ ⵏ ⵉⵛⴰⵔⵔⵉ ⵉⵛⵏⴰ. 5 ⵜⴰⵡⵀⵉⴱⵜ ⵏ ⵍⵖⵉⴵⴻⵜ ⴰⴷ ⵜⵉⵍⵉ ⵉⵊⵊ ⵏ ⵉⴼⴰ ⵉ ⵢⵉⵊⵊ ⵏ ⵉⵛⴰⵔⵔⵉ, ⵓ ⵉ ⵉⵥⵎⴰⵔⴻⵏ ⴰⴷ ⵜⵉⵍⵉ ⵜⴻⵡⵀⵉⴱⵜ ⵏ ⵔⵖⵉⴵⴻⵜ ⵎⵉⵏ ⵉⵥⴻⵎⵎⴰⵔ ⵓⴼⵓⵙ ⵏⵏⴻⵙ ⴰⴷ ⵜ ⵢⴰⵡⵉ, ⵓⵛⴰ ⵅⴻⵏⵏⵉ ⴰⵔⵏⵉ ⵉⵊⵊ ⵏ ⵓⵀⵉⵏⵓ ⵏ ⵥⵥⴻⵛⵜ ⵉ ⴽⵓⵍ ⵉⴼⴰ. 6 ⴷⴻⴳ ⵡⴰⵙⵙ ⵏ ⵓⵢⵓⵔ ⵏ ⵊⴷⵉⴷ: ⵉⵊⵊ ⵏ ⵓⵢⴻⵏⴷⵓⵥ, ⴰⵎⴻⵥⵢⴰⵏ ⵏ ⵓⴼⵓⵏⴰⵙ, ⵉⵛⵏⴰⵏ ⴰⵟⵟⴰⵙ, ⵓ ⵙⴻⵜⵜⴰ ⵏ ⵉⵥⵎⴰⵔⴻⵏ ⴷ ⵉⵊⵊ ⵏ ⵉⵛⴰⵔⵔⵉ. ⵉⵜⵜⵅⴻⵚⵚⴰ ⴰⴷ ⵉⵍⵉⵏ ⵛⵏⴰⵏ ⴰⵟⵟⴰⵙ. 7 ⴰⵎ ⵜⴻⵡⵀⵉⴱⵜ ⵏ ⵍⵖⵉⴵⴻⵜ ⴰⴷ ⵉⵙⵙⴻⵡⵊⴻⴷ ⵉⵊⵊ ⵏ ⵉⴼⴰ ⵉ ⴽⵓⵍ ⴰⵢⴻⵏⴷⵓⵥ ⵓ ⵉⵊⵊ ⵏ ⵉⴼⴰ ⵉ ⴽⵓⵍ ⵉⵛⴰⵔⵔⵉ ⵓ ⵉ ⵉⵥⵎⴰⵔⴻⵏ ⴰⵏⴻⵛⵜ ⵉⵥⴻⵎⵎⴰⵔ ⵓⴼⵓⵙ ⵏⵏⴻⵙ ⴰⴷ ⵜ ⵢⴰⵡⵉ, ⵓ ⵥⵉ ⵥⵥⴻⵛⵜ ⵉⵜⵜⵅⴻⵚⵚⴰ ⴰⴷ ⵉⵙⵙⴻⵡⵊⴻⴷ ⵉⵊⵊ ⵏ ⵓⵀⵉⵏⵓ ⵉ ⴽⵓⵍ ⵉⴼⴰ. 8 ⵅⵎⵉ ⵉ ⵖⴰ ⵢⴰⴷⴻⴼ ⵍⵃⴰⴽⴻⵎ, ⴰⴷ ⵢⴰⴷⴻⴼ ⵥⴻⴳ ⵓⴽⵓⵍⵡⴰⵔ ⵏ ⵡⴻⵙⵇⵉⴼ ⵏ ⵍⴻⴱⵏⵉ ⵏ ⵜⴻⵡⵡⴰⵔⵜ ⵓⵛⴰ ⴰⴷ ⵉⴼⴼⴻⵖ ⵥⴻⴳ ⵓⴽⵓⵍⵡⴰⵔ ⵏⵏⴻⵙ ⵄⴰⵡⴻⴷ. 9 ⵅⵎⵉ ⴷⴷ ⵖⴰ ⵢⴰⵙ ⵍⴳⴻⵏⵙ ⵏ ⵜⴻⵎⵎⵓⵔⵜ ⵥⵥⴰⵜ ⵉ ⵡⵓⴷⴻⵎ ⵏ ⵙⵉⴷⵉ ⴷⴻⴳ ⵡⵓⵙⵙⴰⵏ ⵉⵜⵜⵡⴰⴳⴳⴻⵏ ⵏ ⵍⴻⵄⵢⵓⴷⴰⵜ, ⵉⵜⵜⵅⴻⵚⵚⴰ ⵡⵉ ⵉ ⵖⴰ ⵢⴰⴷⴼⴻⵏ ⵥⴻⴳ ⵓⴽⵓⵍⵡⴰⵔ ⵏ ⵍⴻⴱⵏⵉ ⵏ ⵜⴻⵡⵡⴰⵔⵜ ⵏ ⵛⵛⴰⵎⴰⵍ ⴰⴷ ⵉⵙⵊⴻⴷ, ⴰⴷ ⵉⴼⴼⴻⵖ ⵙ ⵓⴽⵓⵍⵡⴰⵔ ⵏ ⵍⴻⴱⵏⵉ ⵏ ⵜⴻⵡⵡⴰⵔⵜ ⵏ ⵍⵊⴰⵏⵓⴱ, ⵓ ⵡⵉ ⵉ ⵖⴰ ⵢⵓⴷⴼⴻⵏ ⵙ ⵓⴽⵓⵍⵡⴰⵔ ⵏ ⵍⴻⴱⵏⵉ ⵏ ⵜⴻⵡⵡⴰⵔⵜ ⵏ ⵍⵊⴰⵏⵓⴱ, ⴰⴷ ⵉⴼⴼⴻⵖ ⵙ ⵓⴽⵓⵍⵡⴰⵔ ⵏ ⵍⴻⴱⵏⵉ ⵏ ⵜⴻⵡⵡⴰⵔⵜ ⵏ ⵛⵛⴰⵎⴰⵍ. ⵡⴰⵔ ⵉⴷⴷⵉⴽⴽⵡⵉⵍ ⵥⵉ ⵍⴻⴱⵏⵉ ⵏ ⵜⴻⵡⵡⴰⵔⵜ ⵎⴰⵏⵉ ⴷⴷ-ⵢⵓⴷⴻⴼ, ⵎⴰⵛⴰ ⴰⴷ ⴷⴷ-ⵉⴼⴼⴻⵖ ⵥⵉ ⵜⴻⵏⵏⵉ ⵢⴻⴵⴰⵏ ⴰⵔⴻⵏⴷⴰⴷ ⵏⵏⴻⵙ.
10 ⵍⵃⴰⴽⴻⵎ ⴰⴷ ⵢⴰⴷⴻⴼ ⴷⵉ ⵍⵡⴻⵙⵜ ⵏⵙⴻⵏ ⵅⵎⵉ ⵉ ⵖⴰ ⵢⴰⴷⴼⴻⵏ ⵓ ⵅⵎⵉ ⴷⴷ ⵖⴰ ⴼⴼⵖⴻⵏ, ⴰⴷ ⴷⴷ-ⴼⴼⵖⴻⵏ ⵊⵎⵉⵄ.
11 ⴷⵉ ⵍⴻⵄⵢⵓⴷⴰⵜ ⵓ ⴷⴻⴳ ⵡⵓⵙⵙⴰⵏ ⵉⵜⵜⵡⴰⴳⴳⴻⵏ ⵏ ⵍⵄⵉⴷ ⴰⴷ ⵜⵉⵍⵉ ⵜⴻⵡⵀⵉⴱⵜ ⵏ ⵍⵖⵉⴵⴻⵜ ⴷ ⵉⵊⵊ ⵏ ⵉⴼⴰ ⵉ ⴽⵓⵍ ⴰⵢⴻⵏⴷⵓⵥ ⵓ ⵉⵊⵊ ⵏ ⵉⴼⴰ ⵉ ⴽⵓⵍ ⵉⵛⴰⵔⵔⵉ ⵓ ⵉ ⵉⵥⵎⴰⵔⴻⵏ ⴰⵏⴻⵛⵜ ⵉⵥⴻⵎⵎⴰⵔ ⵓⴼⵓⵙ ⵏⵏⴻⵙ ⴰⴷ ⵜ ⵢⴰⵡⵉ, ⵓⵛⴰ ⵅⴻⵏⵏⵉ ⴰⵔⵏⵉ ⵉⵊⵊ ⵏ ⵓⵀⵉⵏⵓ ⵏ ⵥⵥⴻⵛⵜ ⵉ ⴽⵓⵍ ⵉⴼⴰ.
12 ⵅⵎⵉ ⵉ ⵖⴰ ⵉⵙⵙⴻⵡⵊⴻⴷ ⵍⵃⴰⴽⴻⵎ ⵉⵛⵜ ⵏ ⵜⴻⵡⵀⵉⴱⵜ ⵏ ⵍⵅⴰⴹⴰⵔ, ⵉⵛⵜ ⵏ ⵜⵖⴰⵔⵚⵜ ⵏ ⵡⴻⵛⵎⴰⴹ ⵏⵉⵖ ⵜⵉⵡⵀⵉⴱⵉⵏ ⵏ ⵍⴻⵀⵏⴰ ⴰⵎ ⵜⴻⵡⵀⵉⴱⵜ ⵏ ⵍⵅⴰⴹⴰⵔ ⵉ ⵙⵉⴷⵉ, ⵅⴻⵏⵏⵉ ⴰⴷ ⴰⵙ ⴰⵔⵥⵎⴻⵏ ⵜⴰⵡⵡⴰⵔⵜ ⵏⵏⵉ ⵉⵅⴻⵥⵥⴰⵔⴻⵏ ⵖⴰⵔ ⵛⵛⴰⵔⵇ. ⵏⴻⵜⵜⴰ ⴰⴷ ⵉⵙⵙⴻⵡⵊⴻⴷ ⵜⴰⵖⴰⵔⵚⵜ ⵏⵏⴻⵙ ⵏ ⵡⴻⵛⵎⴰⴹ ⴷ ⵜⴻⵡⵀⵉⴱⵉⵏ ⵏⵏⴻⵙ ⵏ ⵍⴻⵀⵏⴰ, ⴰⵎ ⵎⴰⵎⵎⴻⵛ ⵜⴻⵏⵜ ⵉⵙⵙⴻⵡⵊⴻⴷ ⴷⴻⴳ ⵡⴰⵙⵙ ⵏ ⵙⵙⴻⴱⵜ, ⵓ ⵅⵎⵉ ⵉ ⵖⴰ ⵉⴼⴼⴻⵖ ⴰⴷ ⴱⴻⵍⵍⵄⴻⵏ ⵜⴰⵡⵡⴰⵔⵜ ⴰⵡⴰⵔⵏⵉ ⵍⴰⵎⵉ ⵉⴼⴼⴻⵖ ⵏⴻⵜⵜⴰ.
13 ⴽⵓⵍ ⵚⵚⴱⴻⵃ ⴰⴷ ⵜⴻⵙⵙⵡⴻⵊⴷⴻⴷ ⵉⵊⵊ ⵏ ⵉⵥⵎⴰⵔ ⵏ ⵉⵊⵊ ⵏ ⵓⵙⴻⴳⴳⵯⴰⵙ, ⵉⵛⵏⴰⵏ ⵇⴰⵄ, ⴰⵎ ⵜⴻⵡⵀⵉⴱⵜ ⵏ ⵡⴻⵛⵎⴰⴹ ⵉ ⵙⵉⴷⵉ.
14 ⵉⵜⵜⵅⴻⵚⵚⴰ ⴰⴷ ⴽⵉⴷⴻⵙ ⵜⴻⵙⵙⵡⴻⵊⴷⴻⴷ ⴷⵉ ⴽⵓⵍ ⵚⵚⴱⴻⵃ ⵉⵛⵜ ⵏ ⵜⵙⵉⵜⵜⵓⵜ ⵏ ⵉⵊⵊ ⵏ ⵉⴼⴰ ⴷ ⵉⵛⵜ ⵏ ⵜⵜⵓⵍⵓⵜ ⵏ ⵉⵊⵊ ⵏ ⵓⵀⵉⵏⵓ ⵏ ⵥⵥⴻⵛⵜ ⵎⴰⵃⴻⵏⴷ ⴰⴷ ⵥⵥⴰⵢⴻⵙ ⵜⴻⵙⵙⵓⴼⴼⴻⴷ ⴰⵔⴻⵏ, ⴰⵎ ⵜⴻⵡⵀⵉⴱⵜ ⵏ ⵍⵖⵉⴵⴻⵜ ⵉ ⵙⵉⴷⵉ. ⴰⵇⴰ ⴷ ⵜⵉⵡⴻⵚⵚⴰ ⵉⵜⵜⴷⵓⵎⴰⵏ ⵉ ⵍⴻⴱⴷⴰ, ⵉ ⵎⴰⵔⵔⴰ ⵉⴽⵓⴷⴻⵏ.
15 ⵏⵉⵜⵏⵉ ⴰⴷ ⵙⵙⵡⴻⵊⴷⴻⵏ ⵉⵥⵎⴰⵔ ⴷ ⵜⴻⵡⵀⵉⴱⵜ ⵏ ⵍⵖⵉⴵⴻⵜ ⴷ ⵥⵥⴻⵛⵜ ⴷⵉ ⴽⵓⵍ ⵜⵉⵡⴻⵛⵛⴰ ⴰⵎ ⵜⵖⴰⵔⵚⵜ ⵏ ⵜⵎⴻⵙⵙⵉ ⵏ ⵍⴻⴱⴷⴰ.”
16 “ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ: ⵅⵎⵉ ⵉ ⵖⴰ ⵉⵡⵛ ⵍⵃⴰⴽⴻⵎ ⵉⵛⵜ ⵏ ⵜⴰⵔⵥⴻⴼⵜ ⵉ ⵢⵉⵊⵊ ⵥⴻⴳ ⵉⵃⴻⵏⵊⵉⵔⴻⵏ ⵏⵏⴻⵙ, ⵅⴻⵏⵏⵉ ⵎⴰⵏ ⴰⵢⴰ ⴰⴷ ⵜⵉⵍⵉ ⴷ ⵍⵡⴰⵔⵜ ⵏⵏⴻⵙ. ⴰⴷ ⵜⵉⵍⵉ ⵉ ⵉⵃⴻⵏⵊⵉⵔⴻⵏ ⵏⵏⴻⵙ, ⵙ ⵡⴻⴱⵔⵉⴷ ⵏ ⵍⵡⴰⵔⵜ.
17 ⵎⴰⵛⴰ ⵎⴰⵍⴰ ⵉⵡⵛⴰ ⵥⵉ ⵍⵡⴰⵔⵜ ⵏⵏⴻⵙ ⵉⵛⵜ ⵏ ⵜⴰⵔⵥⴻⴼⵜ ⵉ ⵢⵉⵊⵊⴻⵏ ⵥⴻⴳ ⵉⵎⵙⴻⵅⵅⴰⵔⴻⵏ ⵏⵏⴻⵙ, ⵅⴻⵏⵏⵉ ⴰⴷ ⵜⵉⵍⵉ ⵏⵏⴻⵙ ⴰⵍ ⴰⵙⴻⴳⴳⵯⴰⵙ ⵏ ⵜⵍⴻⵍⵍⵉ. ⵅⴻⵏⵏⵉ ⴰⴷ ⴷⴷ-ⵜⴻⴷⵡⴻⵍ ⵜⴻⵙⵖⴰⵔⵜ ⵖⴰⵔ ⵍⵃⴰⴽⴻⵎ, ⵎⵉⵏⵥⵉ ⴰⵇⴰ-ⵜⵜ ⴷ ⵍⵡⴰⵔⵜ ⵏⵏⴻⵙ, ⴰⴷ ⵜⵉⵍⵉ ⵉ ⵉⵃⴻⵏⵊⵉⵔⴻⵏ ⵏⵏⴻⵙ. □
18 ⵡⴰⵔ ⵉⵄⴻⴷⴷⴻⵍ ⵉ ⵍⵃⴰⴽⴻⵎ ⴰⴷ ⵉⴽⴽⴻⵙ ⵛⴰ ⵥⵉ ⵜⴻⵙⵖⴰⵔⵜ ⵏ ⵍⴳⴻⵏⵙ ⴰⵍⴰⵎⵉ ⵉ ⵖⴰ ⵉⴽⴻⵛⵛⴻⴹ ⴰⴳⵍⴰ ⵏⵙⴻⵏ. ⵏⴻⵜⵜⴰ ⴰⴷ ⵉⵙⵙⵡⴰⵔⵜ ⵜⴰⵙⵖⴰⵔⵜ ⵉ ⵉⵃⴻⵏⵊⵉⵔⴻⵏ ⵏⵏⴻⵙ ⵥⴻⴳ ⵡⴰⴳⵍⴰ ⵏⵏⴻⵙ, ⵃⵉⵎⴰ ⵡⴰⵔ ⵉⵜⵜⵡⴰⵥⵓⵥⵥⴰⵔ ⵍⴳⴻⵏⵙ ⵉⵏⵓ, ⵓⵎⵉ ⵉ ⵖⴰ ⵉⵜⵜⵡⴰⵇⵍⴻⵄ ⴽⵓⵍ ⵉⵊⵊ ⵥⴻⴳ ⵡⴰⴳⵍⴰ ⵏⵏⴻⵙ.”
19 ⵅⴻⵏⵏⵉ ⵉⵏⴷⴻⵀ ⴰⵢⵉ ⴰⵎ ⴷⴷ-ⵉⴽⴽⴰ ⵅ ⵜⴻⴱⵔⵉⴷⵜ ⵏⵏⵉ ⵖⴰⵔ ⵓⵖⴻⵥⴷⵉⵙ ⵏ ⵍⴻⴱⵏⵉ ⵏ ⵜⴻⵡⵡⴰⵔⵜ ⴰⵍ ⵉⵅⵅⴰⵎⴻⵏ ⵉⵇⴻⴷⴷⵙⴻⵏ ⵏ ⵉⴽⴻⵀⵀⴰⵏⴻⵏ ⵏⵏⵉ ⵜⵓⵖⴰ ⵉⵡⴰⵍⴰⵏ ⵛⵛⴰⵎⴰⵍ. ⵓ ⵅⵥⴰⵔ, ⴰⵇⴰ ⴷⵉⵏ ⵉⵊⵊ ⵏ ⵡⴻⵎⵛⴰⵏ ⵖⴰⵔ ⴹⴻⴼⴼⴰⵔ ⵏ ⵜⵏⴰⵢⴻⵏ ⵏ ⵉⵖⴻⵥⴷⵉⵙⴻⵏ ⵏⵏⴻⵙ, ⵖⴰⵔ ⵍⵖⴰⵔⴱ. 20 ⵏⴻⵜⵜⴰ ⵉⵏⵏⴰ ⴰⵢⵉ: “ⵡⴰ ⴷ ⴰⵎⵛⴰⵏ ⵎⴰⵏⵉ ⵉ ⵖⴰ ⵙⵙⵏⴻⵏⵏⴰⵏ ⵉⴽⴻⵀⵀⴰⵏⴻⵏ ⵜⴰⵖⴰⵔⵚⵜ ⵏ ⵜⵉⴽⴽⴻⵙⵜ ⵏ ⵓⵎⴰⵔⵡⴰⵙ ⴷ ⵜⵖⴰⵔⵚⵜ ⵏ ⴷⴷⴻⵏⴱ ⵓ ⵎⴰⵏⵉ ⵉ ⵖⴰ ⴳⴳⵡⴻⵏ ⵜⴰⵡⵀⵉⴱⵜ ⵏ ⵍⵖⵉⴵⴻⵜ, ⵃⵉⵎⴰ ⵡⴰⵔ ⵜⵜ ⵙⵙⵓⴼⴼⵖⴻⵏ ⵛⴰ ⴱⴰⵔⵔⴰ ⵖⴰⵔ ⵍⴻⵎⵔⴰⵃ ⵏ ⴱⴰⵔⵔⴰ ⵎⴰⵃⴻⵏⴷ ⴰⴷ ⵙⵙⵇⴻⴷⴷⵙⴻⵏ ⵍⴳⴻⵏⵙ ⴰⵎⵎⵓ.” 21 ⵅⴻⵏⵏⵉ ⵏⴻⵜⵜⴰ ⵉⵙⵙⵓⴼⴼⴻⵖ ⴰⵢⵉ ⴱⴰⵔⵔⴰ ⵖⴰⵔ ⵍⴻⵎⵔⴰⵃ ⵏ ⴱⴰⵔⵔⴰ ⵓⵛⴰ ⵉⵏⴷⴻⵀ ⴰⵢⵉ ⵖⴰⵔ ⴰⵔⴻⴱⵄⴰ ⵏ ⵜⵖⴻⵎⵎⵓⵔⴰ ⵏ ⵍⴻⵎⵔⴰⵃ. ⵓ ⵅⵥⴰⵔ, ⴷⵉ ⴽⵓⵍ ⵜⴰⵖⵎⴰⵔⵜ ⵏ ⵍⴻⵎⵔⴰⵃ ⴰⵇⴰ ⴷⵉⵏ ⵉⵊⵊ ⵏ ⵍⴻⵎⵔⴰⵃ ⵏⵏⴻⵖⵏⵉ, ⵉⵊⵊ ⵏ ⵡⴻⵎⵛⴰⵏ ⵉⴼⴰⵔⵥⴻⵏ ⴷⵉ ⵍⴻⵎⵔⴰⵃ ⴷⵉ ⴽⵓⵍ ⵜⴰⵖⵎⴰⵔⵜ ⵏ ⵍⴻⵎⵔⴰⵃ. 22 ⴷⵉ ⴰⵔⴻⴱⵄⴰ ⵏ ⵜⵖⴻⵎⵎⵓⵔⴰ ⵏ ⵍⴻⵎⵔⴰⵃ ⵏ ⵥⵥⴰⵜ ⵜⵓⵖⴰ ⴷⵉⵏ ⵉⵅⵅⴰⵎⴻⵏ ⴰⵎ ⵍⴻⵎⵔⴰⵀⴰⵜ ⵉⵙⴻⵇⵇⴼⴻⵏ, ⵙ ⵜⵓⵥⵥⴻⴳⴳⴰⵔⵜ ⵏ ⴰⵔⴻⴱⵄⵉⵏ ⵏ ⵉⵖⴰⴵⴻⵏ ⴷ ⵜⵉⵔⵓ ⵏ ⵜⵍⴰⵜⵉⵏ ⵏ ⵉⵖⴰⴵⴻⵏ. ⵉⵅⵅⴰⵎⴻⵏ ⴷⴻⴳ ⴰⵔⴻⴱⵄⴰ ⵏ ⵜⵖⴻⵎⵎⵓⵔⴰ ⵖⴰⵔⵙⴻⵏ ⵍⴻⵄⴱⴰⵔ ⴷ ⵉⵊⵊ. 23 ⴷⴻⴳ ⵡⴻⵏⵏⴻⴹ ⵏ ⴰⵔⴻⴱⵄⴰ ⵏ ⵉⵅⴰⵎⵎⴻⵏ ⵏⵏⵉ ⵜⵓⵖⴰ ⴷⵉⵏ ⵉⵛⵜ ⵏ ⵜⵙⴻⴷⴷⵉⵢⵜ ⵉ ⴷ ⴰⵙⴻⵏ-ⴷⴷ ⵉⵏⵏⴹⴻⵏ. ⴰⵇⴰ ⴳⴳⵉⵏ ⵍⵎⴻⵊⵎⴰⵔⴰⵜ ⵙⴰⴷⵓ ⵉ ⵜⵙⴻⴷⴷⵢⵉⵏ ⵉ ⴷ ⴰⵙ ⴷⴷ-ⵉⵏⵏⴹⴻⵏ. 24 ⵏⴻⵜⵜⴰ ⵉⵏⵏⴰ ⴰⵢⵉ: “ⵜⵉⵏⴰ ⴷ ⴽⵓⵥⵉⵏⴰⵜ ⵎⴰⵏⵉ ⵉ ⵖⴰ ⵜⵜⵙⴻⵏⵡⴻⵏ ⵉⵎⵙⴻⵅⵅⴰⵔⴻⵏ ⵏ ⵜⴰⴷⴷⴰⵔⵜ ⵜⴰⵖⴰⵔⵚⵜ ⵏ ⵍⴳⴻⵏⵙ.”