1 ⵢⵓⵙⴰ-ⴷⴷ ⵖⴰⵔⵉ ⵡⴰⵡⴰⵍ ⵏ ⵙⵉⴷⵉ, ⵉⵏⵏⴰ:

2 “ⴰ ⵎⵎⵉⵙ ⵏ ⴱⵏⴰⴷⴻⵎ, ⴰⵔⵔ ⵓⴷⴻⵎ ⵏⵏⴻⴽ ⵖⴰⵔ ⵡⴻⴷⵔⴰⵔ ⵏ ⵙⴰⵄⵉⵔ ⵓ ⵏⴰⴱⴱ ⵅⴰⵙ. 3 ⵉⵏⵉ ⴰⵙ: ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ! ⵅⵥⴰⵔ, ⵏⴻⵛⵛ ⴰⴷ ⵖⴰⵔⴻⴽ ⴷⴷ-ⴰⵙⴻⵖ, ⴰ, ⴰⴷⵔⴰⵔ ⵏ ⵙⴰⵄⵉⵔ ⵓⵛⴰ ⴰⴷ ⵙⵙⵡⵉⵥⵥⴹⴻⵖ ⴰⴼⵓⵙ ⵉⵏⵓ ⴹⵉⴷⴷ ⵏⵏⴻⴽ ⵓⵛⴰ ⴰⴷ ⵛⴻⴽ ⴰⵔⵔⴻⵖ ⴷ ⵜⴰⵔⴻⴷⴷⴻⴵⵜ ⴷ ⵍⵅⴰⵔⴱⴻⵜ. 4 ⵏⴻⵛⵛ ⴰⴷ ⴰⵔⵔⴻⵖ ⵜⵉⵏⴻⴷⴷⴰⵎ ⵏⵏⴻⴽ ⴷ ⵍⵅⴰⵔⴱⴻⵜ ⵓ ⵛⴻⴽ ⴰⴷ ⵜⴷⴻⵡⵍⴻⴷ ⴷ ⵜⴰⵔⴻⴷⴷⴻⴵⵜ ⵓ ⵛⴻⴽ ⴰⴷ ⵜⴻⵙⵙⵏⴻⴷ ⴱⴻⵍⵍⵉ ⵏⴻⵛⵛ ⴷ ⵙⵉⴷⵉ, 5 ⵎⵉⵏⵥⵉ ⵖⴰⵔⴻⴽ ⵍⴻⵄⴷⴰⵡⴰⵜ ⵉⵜⵜⴷⵓⵎⴰⵏ ⵓ ⵎⵉⵏⵥⵉ ⵜⵙⴻⵍⵍⵎⴻⴷ ⴰⵢⵜ ⵏ ⵉⵙⵔⴰⵉⵍ ⵉ ⵜⵥⴻⵎⵎⴰⵔ ⵏ ⵙⵙⵉⴼ, ⴷⵉ ⵍⵡⴻⵇⵜ ⵏ ⵓⴹⴻⵢⵢⴻⵄ ⵏⵙⴻⵏ, ⴷⵉ ⵍⵡⴻⵇⵜ ⵏ ⵍⵎⵓⵄⵚⵉⵢⵢⴻⵜ ⵉⵇⴻⵙⵃⴻⵏ ⴰⵍ ⵟⵟⴰⵔⴼ.” ^■  

6 “ⵙ ⵓⵢⴰ, ⵙ ⵜⵉⴷⴻⵜⵜ ⴰⵎ ⴷⴷⴰⵔⴻⵖ ⵏⴻⵛⵛ, ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ: ⵏⴻⵛⵛ ⴰⴷ ⵛⴻⴽ ⴰⵔⵔⴻⵖ ⴷ ⵉⴷⴰⵎⵎⴻⵏ ⵇⴰⵄ ⵓ ⵉⴷⴰⵎⵎⴻⵏ ⴰⴷ ⵛⴻⴽ ⴹⴼⴰⵔⴻⵏ. ⵡⴰⵀ ⵓⵎⵉ ⵡⴰⵔ ⵜⵛⴰⵔⵀⴻⴷ ⵛⴰ ⴰⵙⵉⵥⵥⴻⵍ ⵏ ⵉⴷⴰⵎⵎⴻⵏ, ⴰⴷ ⵛⴻⴽ ⴹⴼⴰⵔⴻⵏ ⵉⴷⴰⵎⵎⴻⵏ. 7 ⵏⴻⵛⵛ ⴰⴷ ⴰⵔⵔⴻⵖ ⴰⴷⵔⴰⵔ ⵏ ⵙⴰⵄⵉⵔ ⴷ ⵜⴰⵔⴻⴷⴷⴻⴵⵜ ⴷ ⵍⵅⴰⵔⴱⴻⵜ ⵓ ⵏⴻⵛⵛ ⴰⴷ ⵥⵥⴰⵢⴻⵙ ⵇⴻⵙⵙⴻⵖ ⵡⵉ ⵉⵄⴻⴷⴷⵓⵏ ⴷ ⵡⵉ ⴷⴷ-ⵉⴷⴻⴽⴽⵡⴰⵍⴻⵏ. 8 ⵏⴻⵛⵛ ⴰⴷ ⵛⵛⵓⵔⴻⵖ ⵉⴷⵓⵔⴰⵔ ⵏⵏⴻⵙ ⵙ ⵢⴻⵏⵏⵉ ⵉⵜⵜⵡⴰⵏⵖⴻⵏ, ⵜⵉⵡⵔⵉⵔⵉⵏ ⵏⵏⴻⴽ ⴷ ⵜⴻⵖⵥⵓⵔⵜⵉⵏ ⵏⵏⴻⴽ, ⵓ ⵉⵏⵏⵉ ⵉⵜⵜⵡⴰⵏⵖⴻⵏ ⵙ ⵙⵙⵉⴼ ⴰⴷ ⵡⴹⴰⵏ ⴷⵉ ⵎⴰⵔⵔⴰ ⵜⵉⵖⴻⵥⵔⴰⵜⵉⵏ ⵏⵏⴻⴽ. 9 ⵏⴻⵛⵛ ⴰⴷ ⵛⴻⴽ ⴳⴳⴻⵖ ⴷ ⵜⵉⵔⴻⴷⴷⴻⴵⵉⵏ ⵉ ⵍⴻⴱⴷⴰ ⵓ ⵜⵉⵏⴻⴷⴷⴰⵎ ⵏⵏⴻⴽ ⵄⴻⵎⵎⴰⵔⵚ ⵡⴰⵔ ⴷⴰⵢⵙⴻⵏⵜ ⵜⵜⵡⵉⴼⴻⵏ ⵄⴰⴷ ⵉⵎⴻⵥⴷⴰⵖ, ⵓ ⴽⴻⵏⵏⵉⵡ ⴰⴷ ⵜⴻⵙⵙⵏⴻⵎ ⴱⴻⵍⵍⵉ ⵏⴻⵛⵛ ⴷ ⵙⵉⴷⵉ,

10 ⵎⵉⵏⵥⵉ ⵜⴻⵏⵏⵉⴷ: ‘ⵜⵏⴰⵢⴻⵏ ⵏ ⵍⴻⴳⵏⵓⵙ ⵏⵏⵉ ⴷ ⵜⵏⴰⵢⴻⵏ ⵏ ⵜⴻⵎⵎⵓⵔⴰ ⵏⵏⵉ ⴰⴷ ⵉⵍⵉⵏⵜ ⵉⵏⵓ ⵓ ⵏⴻⵛⵛⵉⵏ ⴰⴷ ⵜⴻⵏⵜ ⵟⵟⴼⴻⵏ ⴷ ⵍⵡⴰⵔⵜ!’, ⴰⵎ ⵙⵉⴷⵉ ⴰⵇⴰ-ⵜ ⴷⵉⵏ.” ^■  

11 “ⵙ ⵓⵢⴰ, ⵙ ⵜⵉⴷⴻⵜⵜ ⴰⵎ ⴷⴷⴰⵔⴻⵖ ⵏⴻⵛⵛ, ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ: ⵏⴻⵛⵛ ⴰⴷ ⴰⵛ ⴳⴳⴻⵖ ⴰⵏⴻⵛⵜ ⵏ ⵡⴻⵖⴹⴰⴱ ⵏⵏⴻⴽ ⵓ ⴰⵏⴻⵛⵜ ⵏ ⵜⵓⵙⵎⵉ ⵏⵏⴻⴽ ⵏⵏⵉ ⵜⵓⵖⴰ ⵖⴰⵔⴻⴽ ⴷⴻⴳ ⵡⴻⵛⵔⴰⵀ ⵏⵏⴻⴽ ⵥⵥⴰⵢⵙⴻⵏ, ⵎⴰⵛⴰ ⵏⵉⵜⵏⵉ ⴰⴷ ⴰⵢⵉ ⵙⵙⵏⴻⵏ ⵅⵎⵉ ⵅⴰⴽ ⵖⴰ ⵃⴻⴽⵎⴻⵖ.

12 ⴰⴷ ⵜⴻⵙⵙⵏⴻⴷ, ⴱⴻⵍⵍⵉ ⵏⴻⵛⵛ, ⵙⵉⴷⵉ, ⵙⵍⵉⵖ ⵉ ⵎⴰⵔⵔⴰ ⴰⵛⴻⵇⵇⴰⴼ ⵏⵏⴻⴽ ⵏⵏⵉ ⵜⴻⵙⵙⵉⵡⵍⴻⴷ ⴹⵉⴷⴷ ⵉ ⵉⴷⵓⵔⴰⵔ ⵏ ⵉⵙⵔⴰⵉⵍ, ⵜⴻⵏⵏⵉⴷ: ⴰⵇⴰ ⴰⵔⴻⴷⴷⴵⴻⵏ, ⵎⵎⴻⵡⵛⴻⵏ ⴰⵏⴻⵖ ⴷ ⵎⴰⵛⵛⴰ.

13 ⴰⵎⵎⵓ ⵉ ⵅⴰⴼⵉ ⵜⵇⴻⵍⴱⴻⵎ ⵙ ⵓⵇⴻⵎⵎⵓⵎ ⵏⵡⴻⵎ ⵉⵛⵛⵓⵔ ⵙ ⵓⴽⴻⴱⴱⴰⵔ ⵓⵛⴰ ⵜⴰⵔⵏⵉⵎ ⵜⴼⴰⵔⵔⵖⴻⵎ ⴰⵡⴰⵍⴻⵏ ⵏⵡⴻⵎ ⵅⴰⴼⵉ ⴰⵟⵟⴰⵙ. ⵏⴻⵛⵛ ⵙⵍⵉⵖ ⵜ.

14 ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ: ⴰⵎ ⵜⴼⴰⵔⵔⴻⵃ ⵎⴰⵔⵔⴰ ⵜⴰⵎⵎⵓⵔⵜ, ⵏⴻⵛⵛ ⴰⴷ ⵛⴻⴽ ⴰⵔⵔⴻⵖ ⴷ ⵉⵛⵜ ⵏ ⵍⴻⵖⵔⵓⴱⵉⵢⵢⴻⵜ.

15 ⴰⵎ ⵎⴰⵎⵎⴻⵛ ⵜⴼⴰⵔⵃⴻⴷ ⵙ ⵜⴻⵙⵖⴰⵔⵜ ⵏ ⵜⴰⴷⴷⴰⵔⵜ ⵏ ⵉⵙⵔⴰⵉⵍ, ⵎⵉⵏⵥⵉ ⴰⵇⴰ ⵜᵉⵜⵜⵡⴰⵔⴻⴷⴷⴻⴵ, ⵏⴻⵛⵛ ⴰⴷ ⴽⵉⴽ ⴳⴳⴻⵖ ⴰⵎⵎⵓ, ⴰ ⵛⴻⴽ, ⴰⴷⵔⴰⵔ ⵏ ⵙⴰⵄⵉⵔ, ⵛⴻⵎ ⵎⴰⵔⵔⴰ ⵜⴰⵎⵎⵓⵔⵜ ⵏ ⵉⴷⵓⵎ, ⴰⴷ ⵜⵉⵍⵉⴷ ⴷ ⵜⴰⵔⴻⴷⴷⴻⴵⵜ! ⵓⵛⴰ ⵅⴻⵏⵏⵉ ⵏⵉⵜⵏⵉ ⴰⴷ ⵙⵙⵏⴻⵏ, ⴱⴻⵍⵍⵉ ⵏⴻⵛⵛ ⴷ ⵙⵉⴷⵉ.”