1 ⵅⴻⵏⵏⵉ ⵉⵍⴰⵖⴰ ⴷⴻⴳ ⵉⵎⴻⵥⵥⵓⵖⴻⵏ ⵉⵏⵓ ⵙ ⵜⵎⵉⵊⵊⴰ ⵜⴻⵊⵀⴻⴷ, ⵉⵏⵏⴰ: “ⴻⵊⵊ ⵉⵎⴻⵃⴹⴰⵢⴻⵏ ⵏ ⵜⴻⵏⴷⵉⵏⵜ ⴰⴷ ⴷⴷ-ⵇⴰⵔⵔⴱⴻⵏ, ⴽⵓⵍ ⵉⵊⵊ ⵙ ⵍⴻⵙⵏⴰⵃ ⵏⵏⴻⵙ ⵏ ⵓⵔⴻⴷⴷⴻⴵ ⴷⴻⴳ ⵓⴼⵓⵙ ⵏⵏⴻⵙ.” 2 ⵓⵛⴰ ⵅⵥⴰⵔ, ⵙⴻⵜⵜⴰ ⵏ ⵢⴻⵔⵢⴰⵥⴻⵏ ⵓⵙⵉⵏ-ⴷⴷ ⵥⴻⴳ ⵡⴻⴱⵔⵉⴷ ⵥⵉ ⵜⴻⵡⵡⴰⵔⵜ ⵢⵓⵄⵍⴰⵏ ⵏⵏⵉ ⵉⵅⴻⵥⵥⴰⵔⴻⵏ ⵖⴰⵔ ⵛⵛⴰⵎⴰⵍ ⵓ ⴽⵓⵍ ⵉⵊⵊ ⵖⴰⵔⴻⵙ ⵍⴻⵙⵏⴰⵃ ⵏⵏⴻⵙ ⵉ ⵓⵜⴻⵃⵃⵉ ⴷⴻⴳ ⵓⴼⵓⵙ ⵏⵏⴻⵙ. ⴷⵉ ⵍⵡⴻⵙⵜ ⵏⵙⴻⵏ ⵜⵓⵖⴰ ⴷⵉⵏ ⵉⵊⵊ ⵏ ⵡⴻⵔⵢⴰⵥ, ⵜⵓⵖⴰ ⵢⴰⵔⴹ ⵍⴻⵇⵟⴻⵏ, ⵢⵉⵡⵉ ⵜⴰⴷⵡⴰⵜ ⵏ ⵓⵎⴰⵔⵉⵔ ⵖⴰⵔ ⵡⴻⴱⵢⴰⵙ ⵏⵏⴻⵙ. ⵓⴷⴼⴻⵏ ⵏⵉⵜⵏⵉ ⵓⵛⴰ ⴳⴳⵉⵏ ⴰⴷ ⴱⴻⴷⴷⴻⵏ ⵖⴰⵔ ⵓⵄⴰⵍⵟⴰⵔ ⵏ ⵏⵏⵃⴰⵙ. 3 ⴰⵄⵓⴵⵉ ⵏ ⴰⵔⴻⴱⴱⵉ ⵏ ⵉⵙⵔⴰⵉⵍ ⵉⵙⵙⴳⴻⵄⵄⴻⴷ ⵉⵅⴻⴼ ⵏⵏⴻⵙ ⵥⵉ ⵙⴻⵏⵏⴻⵊ ⵏ ⵓⴽⵉⵔⵓⴱ ⵏⵏⵉ ⵅ ⵉⴵⴰⵏ, ⵢⵓⵢⵓⵔ ⵖⴰⵔ ⵜⵏⴻⴱⴷⴰⵜ ⵏ ⵜⴰⴷⴷⴰⵔⵜ ⵓⵛⴰ ⵏⴻⵜⵜⴰ ⵉⵍⴰⵖⴰ-ⴷⴷ ⵉ ⵡⴻⵔⵢⴰⵥ ⵏⵏⵉ ⵢⴰⵔⴹⴻⵏ ⵍⴻⵇⵟⴻⵏ ⴷ ⵡⴻⵏⵏⵉ ⵢⵉⵡⵢⴻⵏ ⵜⴰⴷⵡⴰⵜ ⵏ ⵓⵎⴰⵔⵉⵔ ⵖⴰⵔ ⵡⴻⴱⵢⴰⵙ ⵏⵏⴻⵙ. ^□  

4 ⵉⵏⵏⴰ ⴰⵙ ⵙⵉⴷⵉ: “ⵛⵓⵇⵇ ⴷⵉ ⵍⵡⴻⵙⵜ ⵏ ⵜⴻⵏⴷⵉⵏⵜ, ⴷⵉ ⵍⵡⴻⵙⵜ ⵏ ⵓⵔⵛⴰⵍⵉⵎ, ⵓⵛⴰ ⴻⴳⴳ ⵉⵛⵜ ⵏ ⵍⴻⵄⵍⴰⵎⴻⵜ ⵅ ⵜⴻⵏⵢⴰⵔⵉⵏ ⵏ ⵢⴻⵔⵢⴰⵥⴻⵏ ⵏⵏⵉ ⵉⵜⵜⵏⵉⵅⵙⵉⵙⴻⵏ ⵅ ⵙⵙⵉⴱⴱⴻⵜ ⵏ ⵎⴰⵔⵔⴰ ⵊⵊⵄⴰⵢⴻⴼ ⵏⵏⵉ ⵉⵜⵜⵡⴰⴳⴳⴻⵏ ⴷⵉ ⵍⵡⴻⵙⵜ ⵏⵏⴻⵙ.” 5 ⵓⵎⵉ ⵙⵍⵉⵖ, ⵉⵏⵏⴰ ⵉ ⵉⵏⵏⴻⵖⵏⵉ: “ⵛⵓⵇⵇⴻⵎ ⴷⵉ ⵜⴻⵏⴷⵉⵏⵜ ⴰⵡⴰⵔⵏⵉ ⴰⵙ ⵓⵛⴰ ⵏⵖⴻⵎ, ⵡⴰⵔ ⵥⵥⵉⴵⵉⵥⴻⵎ ⵓ ⵡⴰⵔ ⴰⵔⴻⵃⵃⵎⴻⵎ! 6 ⵏⵖⴻⵎ ⵉⵡⴻⵙⵙⵓⵔⴰ, ⵉⵃⵓⴹⵔⵉⵢⵢⴻⵏ, ⵜⵉⵄⴻⵥⵔⵉⵢⵉⵏ, ⵉⵃⴻⵏⵊⵉⵔⴻⵏ ⴷ ⵜⴻⵎⵖⴰⵔⵉⵏ ⴰⵍ ⵖⴰ ⵜⵜⵡⴰⵀⴻⵍⵍⴽⴻⵏ ⵇⴰⵄ, ⵎⴰⵛⴰ ⵡⴰⵔ ⵜⵜⵀⴰⴷⴰⵎ ⵓⵍⴰ ⴷ ⵉⵊⵊ ⵅⴰⵙ ⵍⴻⵄⵍⴰⵎⴻⵜ. ⴱⴷⴰⵎ ⵥⵉ ⵣⵥⴰⵡⴻⵛⵜ ⵉⵏⵓ ⵉⵇⴻⴷⴷⵙⴻⵏ.” ⵓⵛⴰ ⵏⵉⵜⵏⵉ ⴱⴷⴰⵏ ⵥⴻⴳ ⵉⵡⴻⵙⵙⵓⵔⴰ ⵏⵏⵉ ⵉⴵⴰⵏ ⵥⵥⴰⵜ ⵉ ⵜⴰⴷⴷⴰⵔⵜ. 7 ⵓⵛⴰ ⵏⴻⵜⵜⴰ ⵉⵏⵏⴰ ⴰⵙⴻⵏ: “ⵙⵅⴻⵎⵊⴻⵎ ⵜⴰⴷⴷⴰⵔⵜ ⵓⵛⴰ ⵛⵛⵓⵔⴻⵎ ⵍⴻⵎⵔⴰⵃⴰⵜ ⵙ ⵍⵅⴻⵛⴱⴰⵜ ⵏ ⵢⴻⵏⵏⵉ ⵉⵜⵜⵡⴰⵏⵖⴻⵏ. ⴼⴼⵖⴻⵎ!” ⴼⴼⵖⴻⵏ ⵏⵉⵜⵏⵉ, ⵓⵛⴰ ⵏⵖⵉⵏ ⵉⵡⴷⴰⵏ ⴷⵉ ⵜⴻⵏⴷⵉⵏⵜ.

8 ⵍⴰⵎⵉ ⵜⴻⵏ ⵏⵖⵉⵏ ⵓⵛⴰ ⵇⵇⵉⵎⴻⵖ ⵏⴻⵛⵛ, ⵉⵎⵙⴰⵔ ⴰⵇⴰ ⵏⴻⵛⵛ ⵡⴹⵉⵖ ⵅ ⵓⵖⴻⵎⴱⵓⴱ ⵉⵏⵓ ⵖⴰⵔ ⵜⴻⵎⵎⵓⵔⵜ ⵓⵛⴰ ⵏⵏⵉⵖ: “ⴰⵅ, ⵙⵉⴷⵉ ⵉⵏⵓ, ⵙⵉⴷⵉ, ⵎⴰ ⴰⴷ ⵜⴰⵔⴻⴷⴷⴵⴻⴷ ⵍⴻⵅⵅⵓ ⵎⵉⵏ ⵉⵇⵇⵉⵎⴻⵏ ⵏ ⵉⵙⵔⴰⵉⵍ ⵓⵎⵉ ⵖⴰ ⵜⵥⴻⴵⵄⴻⴷ ⴰⵙⵄⴰⵔ ⵏⵏⴻⴽ ⵅ ⵓⵔⵛⴰⵍⵉⵎ?” 9 ⵅⴻⵏⵏⵉ ⵉⵏⵏⴰ ⴰⵢⵉ: “ⵍⵎⵓⵄⵚⵉⵢⵢⴻⵜ ⵏ ⵜⴰⴷⴷⴰⵔⵜ ⵏ ⵉⵙⵔⴰⵉⵍ ⴷ ⵢⴰⵀⵓⴷⴰ ⵜⴻⵎⵖⴰⵔ ⴰⵟⵟⴰⵙ ⵓⵛⴰ ⵜⴰⵎⵎⵓⵔⵜ ⵜⴻⵛⵛⵓⵔ ⵙ ⵉⴷⴰⵎⵎⴻⵏ, ⵓ ⵜⴻⵏⴷⵉⵏⵜ ⵜⴻⵛⵛⵓⵔ ⵙ ⵜⵎⴻⴳⴳⴰ ⵉ ⴷⴷ-ⵉⴼⴼⵖⴻⵏ ⵥⴻⴳ ⵡⴻⴱⵔⵉⴷ, ⵎⵉⵏⵥⵉ ⵏⵉⵜⵏⵉ ⵇⵇⴰⵔⴻⵏ: ‘ⵙⵉⴷⵉ ⵉⵙⵎⴻⵃ ⴷⵉ ⵜⴻⵎⵎⵓⵔⵜ ⵓⵛⴰ ⵙⵉⴷⵉ ⵡⴰⵔ ⵉⵥⴰⵔⵔ!’

10 ⵎⴰⵛⴰ ⴰⵎⵎⵓ ⵉ ⵖⴰ ⴳⴳⴻⵖ ⵓⵍⴰ ⴷ ⵏⴻⵛⵛ: ⵜⵉⵟⵟ ⵉⵏⵓ ⵡⴰⵔ ⵜⵙⴻⵎⵎⴻⵃ ⵓ ⵏⴻⵛⵛ ⵡⴰⵔ ⵜⵜⵃⵉⵏⵏⵉⵖ. ⵏⴻⵛⵛ ⴰⴷ ⵙⵙⴻⵏⵇⴻⵍⴱⴻⵖ ⴰⴱⵔⵉⴷ ⵏⵙⴻⵏ ⵅ ⵓⵥⴻⴵⵉⴼ ⵏⵙⴻⵏ.” ^■  

11 ⵓⵛⴰ ⵅⵥⴰⵔ, ⴰⵔⵢⴰⵥ ⵏⵏⵉ ⵢⴰⵔⴹⴻⵏ ⵍⴻⵇⵟⴻⵏ, ⵡⴻⵏⵏⵉ ⴷⴷ-ⵢⵉⵡⵢⴻⵏ ⵖⴰⵔ ⵡⴻⴱⵢⴰⵙ ⵏⵏⴻⵙ ⵜⴰⴷⵡⴰⵜ ⵏ ⵓⵎⴰⵔⵉⵔ, ⴰⵇⴰ ⵢⴰⵔⵔⴰ-ⴷⴷ ⵍⴻⵅⴱⴰⵔ, ⵉⵏⵏⴰ: “ⴳⴳⵉⵖ ⴰⵎ ⵎⴰⵎⵎⴻⵛ ⵉ ⴷ ⴰⵢⵉ ⵜⵓⵎⵓⵔⴻⴷ.”