ⴰⵏⴻⴳⴳⴰⵔⵓ ⴰⴷ ⴷⴷ-ⵢⴰⵙ!
7
1 ⵢⵓⵙⴰ-ⴷⴷ ⵖⴰⵔⵉ ⵡⴰⵡⴰⵍ ⵏ ⵙⵉⴷⵉ, ⵉⵏⵏⴰ: 2 “ⵛⴻⴽ, ⴰ ⵎⵎⵉⵙ ⵏ ⴱⵏⴰⴷⴻⵎ, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ, ⵉ ⵜⴻⵎⵎⵓⵔⵜ ⵏ ⵉⵙⵔⴰⵉⵍ:
ⴰⵏⴻⴳⴳⴰⵔ,
ⵢⵓⵙⴰ-ⴷⴷ ⵓⵏⴻⴳⴳⴰⵔ
ⵅ ⴰⵔⴻⴱⵄⴰ ⵏ ⵉⵖⴻⵥⴷⵉⵙⴻⵏ ⵏ ⵜⴻⵎⵎⵓⵔⵜ.
3 ⵍⴻⵅⵅⵓ ⵢⵓⵙⴰ-ⴷⴷ ⵅⴰⵎ ⵓⵏⴻⴳⴳⴰⵔ ⵏⵏⴻⵎ,
ⵎⵉⵏⵥⵉ ⴰⴷ ⵖⴰⵔⴻⵎ ⴷⴷ-ⵙⴻⴽⴽⴻⵖ ⴰⵖⴹⴰⴱ ⵉⵏⵓ
ⵓ ⴰⴷ ⵅⴰⵎ ⵃⴻⴽⵎⴻⵖ ⴰⵎ ⵉⴱⵔⵉⴷⴻⵏ ⵏⵏⴻⵎ
ⵓⵛⴰ ⴰⴷ ⵅⴰⵎ ⴳⴳⴻⵖ ⵎⴰⵔⵔⴰ ⵊⵊⵄⴰⵢⴻⴼ ⵏⵏⴻⵎ.
4 ⵡⴰⵔ ⴷ ⴰⵎ ⵥⵥⵉⴵⵉⵥⴻⵏⵜ ⵜⵉⵟⵟⴰⵡⵉⵏ ⵉⵏⵓ ⵓ ⵡⴰⵔ ⴰⵔⴻⵃⵃⵎⴻⵖ,
ⵎⵉⵏⵥⵉ ⴰⴷ ⴰⵔⵔⴻⵖ ⵉⴱⵔⵉⴷⴻⵏ ⵏⵏⴻⵎ ⵅ ⵓⵥⴻⴵⵉⴼ ⵏⵏⴻⵎ,
ⵓ ⵊⵊⵄⴰⵢⴻⴼ ⵏⵏⴻⵎ ⴰⴷ ⵛⴻⵎ ⵍⴻⵇⴼⴻⵏⵜ ⴷⵉ ⵍⵡⴻⵙⵜ ⵏⵏⴻⵎ.
ⴰⵎⵎⵓ ⵉ ⵖⴰ ⵜⴻⵙⵙⵏⴻⵎ ⴱⴻⵍⵍⵉ ⵏⴻⵛⵛ ⴷ ⵙⵉⴷⵉ.” ■
5 “ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ:
ⵉⵊⵊ ⵏ ⵍⵖⴰⵔ, ⵉⵊⵊ ⵏ ⵍⵖⴰⵔ ⵉⴼⴰⵔⵥⴻⵏ,
ⴰⵇⴰ ⴰⴷ ⴷⴷ-ⵢⴰⵙ.
6 ⵢⵓⵙⴰ-ⴷⴷ ⵓⵏⴻⴳⴳⴰⵔ,
ⴰⵏⴻⴳⴳⴰⵔ ⵢⵓⵙⴰ-ⴷⴷ,
ⵉⴼⴰⵇ-ⴷⴷ ⴹⵉⴷⴷ ⵏⵏⴻⵎ,
ⴰⵇⴰ ⴰⴷ ⴷⴷ-ⵢⴰⵙ!
7 ⵜⵓⵙⴰ-ⴷⴷ ⵖⴰⵔⴻⴽ ⵜⵇⴻⴷⴷⵓⵃⵜ,
ⴰ ⴰⵎⴻⵥⴷⵓⵖ ⵏ ⵜⴻⵎⵎⵓⵔⵜ,
ⵜⴰⵙⴰⵄⵄⴻⵜ ⵜⵓⵙⴰ-ⴷⴷ,
ⴰⵙⵙ ⵏ ⵓⵅⴰⵔⵡⴻⴹ ⵉⵇⴰⵔⵔⴻⴱ-ⴷⴷ
ⵓ ⵡⴰⵔ ⴷⵉⵏ ⴰⵙⵍⵉⵡⵍⴻⵡ ⵥⴻⴳ ⵉⴷⵓⵔⴰⵔ. □
8 ⵍⴻⵅⵅⵓ ⴷⴻⵖⵢⴰ ⴰⴷ ⵅⴰⵎ ⵥⴻⴵⵄⴻⵖ ⴰⵙⵄⴰⵔ ⵉⵏⵓ
ⵓⵛⴰ ⴰⴷ ⴷⴰⵢⴻⵎ ⴽⴻⵎⵎⵍⴻⵖ ⴰⵖⴹⴰⴱ ⵉⵏⵓ.
ⴰⴷ ⵅⴰⵎ ⵃⴻⴽⵎⴻⵖ ⴰⵏⴻⵛⵜ ⵏ ⵉⴱⵔⵉⴷⴻⵏ ⵏⵏⴻⵎ
ⵓⵛⴰ ⴰⴷ ⵅⴰⵎ ⵙⵙⵉⵡⴹⴻⵖ ⵎⴰⵔⵔⴰ ⵊⵊⵄⴰⵢⴻⴼ ⵏⵏⴻⵎ.
9 ⵡⴰⵔ ⵥⵥⵉⴵⵉⵥⴻⵖ ⵓ ⵡⴰⵔ ⴰⵔⴻⵃⵃⵎⴻⵖ.
ⴰⴷ ⵖⴰⵔⴻⵎ ⴷⴷ-ⴰⵔⵔⴻⵖ ⵎⵉⵏ ⵜⴻⵙⵙⴷⴰⵀⴻⴵⴻⴷ,
ⵓ ⵊⵊⵄⴰⵢⴻⴼ ⵏⵏⴻⵎ ⴰⴷ ⵉⵍⵉⵏⵜ ⴷⵉ ⵍⵡⴻⵙⵜ ⵏⵏⴻⵎ
ⵓ ⴽⴻⵏⵏⵉⵡ ⴰⴷ ⵜⴻⵙⵙⵏⴻⵎ ⴱⴻⵍⵍⵉ ⴰⵇⴰ ⵏⴻⵛⵛ ⴷ ⵙⵉⴷⵉ
ⵡⴻⵏⵏⵉ ⴽⴻⵏⵏⵉⵡ ⵉⵛⵛⴰⵜⴻⵏ.”
10 “ⵅⵥⴰⵔ, ⴰⵙⵙ, ⵅⵥⴰⵔ, ⴰⵇⴰ ⴷⴰ ⵢⵉⵡⴻⴹ-ⴷⴷ,
ⵜⴻⵇⴹⴰ ⵜⵇⴻⴷⴷⵓⵃⵜ,
ⵜⴻⵏⴻⵡⵡⴰⵔ ⵜⴰⵖⵖⴰⵔⵛⵜ,
ⵜⴻⵙⵙⴻⵏⴷⵉ ⵏⵏⴼⴰⵅⴻⵜ.
11 ⵉⴳⴻⵄⵄⴻⴷ ⵍⵄⵓⵏⴼ ⴰⵎ ⵉⵛⵜ ⵏ ⵜⴻⵖⵖⴰⵔⵛⵜ ⵏ ⵍⵖⴰⵔ.
ⵡⴰⵔ ⵥⵥⴰⵢⵙⴻⵏ ⵉⵇⵇⵉⵎ ⵓⵍⴰ ⴷ ⵉⵊⵊ,
ⵡⴰⵍⵓ ⵏ ⵍⵖⴰⵛⵉ ⵏⵙⴻⵏ ⵉⵏⵀⴻⵡⵍⴻⵏ, ⵡⴰⵍⵓ ⵏ ⴷⴷⵔⵉⵥ ⵏⵙⴻⵏ,
ⵓ ⵡⴰⵍⵓ ⵏ ⵓⵙⴻⵎⵖⴰⵔ ⴰⴷ ⵖⴰⵔⵙⴻⵏ ⵉⵇⵇⵉⵎ ⵄⴰⴷ.
12 ⵜⵓⵙⴰ-ⴷⴷ ⵜⵙⴰⵄⵄⴻⵜ, ⵉⵅⴻⵛⵛⴻⴷ ⵡⴰⵙⵙ.
ⴻⵊⵊ ⵡⴻⵏⵏⵉ ⵉⵙⵖⵉⵏ ⵡⴰⵔ ⵉⴼⴰⵔⵔⴻⵃ
ⵓ ⴻⵊⵊ ⵡⴻⵏⵏⵉ ⵉⵥⵥⵏⵓⵥⴰⵏ ⵡⴰⵔ ⵉⵜⵜⴻⵛⴹⵉⵏ,
ⵎⵉⵏⵥⵉ ⵍⵃⴰⴷⵓⵇ ⵏ ⵡⴻⵖⴹⴰⴱ ⴰⵇⴰ-ⵜ ⵅ ⵎⴰⵔⵔⴰ ⵍⵖⴰⵛⵉ ⵏⵏⴻⵙ ⵉⵏⵀⴻⵡⵍⴻⵏ.
13 ⵎⵉⵏⵥⵉ ⵡⴻⵏⵏⵉ ⵉⵥⵏⵓⵥⴰⵏ ⵡⴰⵔ ⴷⴷ-ⵉⴷⴷⵉⴽⴽⵡⵉⵍ ⵖⴰⵔ ⵎⵉⵏ ⵉⵎⵎⴻⵏⵥⴻⵏ,
ⵡⴰⵅⵅⴰ ⵏⵉⵜⵏⵉ ⵇⵇⵉⵎⴻⵏ ⴷⴷⴰⵔⴻⵏ,
ⵎⵉⵏⵥⵉ ⵜⴰⵎⴻⵥⵔⵉⵡⵜ ⵅ ⵎⴰⵔⵔⴰ ⵍⵖⴰⵛⵉ ⵉⵏⵀⴻⵡⵍⴻⵏ ⵏ ⵜⴻⵎⵎⵓⵔⵜ ⵡⴰⵔ ⵜⴱⴻⵟⵟⵉⵍ,
ⵓⵛⴰ ⵓⵍⴰ ⴷ ⵉⵊⵊ ⵡⴰⵔ ⵉⵥⴻⵎⵎⴰⵔ ⵙ ⵍⵎⵓⵄⵚⵉⵢⵢⴻⵜ ⵏⵏⴻⵙ ⴰⴷ ⵉⵙⵓⵔⴰⵔ ⵜⵓⴷⴰⵔⵜ ⵏⵏⴻⵙ.
14 ⵏⵉⵜⵏⵉ ⵚⵓⴹⴻⵏ ⴷⵉ ⵍⴱⵓⵇ ⵓⵛⴰ ⵙⵙⵡⴻⵊⴷⴻⵏ ⵎⴰⵔⵔⴰ ⵍⴻⵃⵡⴰⵢⴻⵊ,
ⵎⴰⵛⴰ ⵓⵍⴰ ⴷ ⵉⵊⵊ ⵡⴰⵔ ⵉⵜⵜⴻⴼⴼⴻⵖ ⵖⴰⵔ ⵓⵎⴻⵏⵖⵉ,
ⵎⵉⵏⵥⵉ ⵍⵃⴰⴷⵓⵇ ⵏ ⵡⴻⵖⴹⴰⴱ ⵉⵏⵓ ⴰⵇⴰ-ⵜ ⵅ ⵎⴰⵔⵔⴰ ⵍⵖⴰⵛⵉ ⵉⵏⵀⴻⵡⵍⴻⵏ ⵏ ⵜⴻⵎⵎⵓⵔⵜ.”
15 “ⵣⵉ ⴱⴰⵔⵔⴰ ⵙⵙⵉⴼ
ⵓ ⵥⵉ ⴷⴰⵅⴻⵍ ⵟⵟⴰⵄⵓⵏ ⴷ ⵍⴰⵥ.
ⵡⵉ ⵉⴵⴰⵏ ⴷⴻⴳ ⵉⵢⵢⴰⵔ, ⴰⴷ ⵉⵎⵎⴻⵜ ⵙ ⵙⵙⵉⴼ,
ⵡⵉ ⵉⴵⴰⵏ ⴷⵉ ⵜⴻⵏⴷⵉⵏⵜ ⴰⴷ ⵜ ⵢⴻⵛⵛ ⵍⴰⵥ ⴷ ⵟⵟⴰⵄⵓⵏ.
16 ⵡⵉ ⵥⵥⴰⵢⵙⴻⵏ ⵢⴰⵔⴻⵡⵍⴻⵏ, ⴰⴷ ⵏⴻⵊⵎⴻⵏ,
ⵓⵛⴰ ⴰⴷ ⵉⵍⵉⵏ ⵅ ⵉⴷⵓⵔⴰⵔ ⴰⵎⴻⵛⵏⴰⵡ ⵉⴷⴱⵉⵔⴻⵏ ⵥⵉ ⵜⴻⵖⵥⵓⵔⵉⵏ,
ⴰⴷ ⵏⵏⴻⵥⴱⴰⵔⴻⵏ ⵎⴰⵔⵔⴰ,
ⴽⵓⵍ ⵉⵊⵊ ⵅ ⵍⵎⵓⵄⵚⵉⵢⵢⴻⵜ ⵏⵏⴻⵙ.
17 ⵎⴰⵔⵔⴰ ⵉⴼⴰⵙⵙⴻⵏ ⴰⴷ ⵀⴻⵢⵢⴼⴻⵏ,
ⵓ ⵎⴰⵔⵔⴰ ⵉⴼⴰⴷⴷⴻⵏ ⴰⴷ ⴷⴻⵡⵍⴻⵏ ⴷ ⴰⵎⴰⵏ.” ■
18 “ⴰⴷ ⴱⴻⵢⵙⴻⵏ ⵙ ⵜⵅⵓⵏⵛⴰ ⵏ ⵡⴻⵛⴹⴰⵏ,
ⴰⵔⵊⴻⴼ ⴰⴷ ⵜⴻⵏ ⵉⵙⵙⴷⵓⵍⵉ
ⵓ ⵅ ⵎⴰⵔⵔⴰ ⵓⴷⵎⴰⵡⴻⵏ ⴰⴷ ⵢⵉⵍⵉ ⵍⴻⵃⵢⴰ
ⵓ ⵅ ⵎⴰⵔⵔⴰ ⵉⵥⴻⴵⵉⴼⴻⵏ ⵏⵙⴻⵏ ⵜⵓⵇⴻⵛⵛⴰⵔⵜ. ■
19 ⴰⴷ ⵏⴹⴰⵔⴻⵏ ⵏⵏⵓⵇⴰⵔⵜ ⵏⵙⴻⵏ ⴷⴻⴳ ⵉⴱⵔⵉⴷⴻⵏ,
ⵓ ⵓⵔⴻⵖ ⵏⵙⴻⵏ ⴰⴷ ⵢⵉⵍⵉ ⴰⵎ ⵛⴰ ⵏ ⵍⵃⴰⵊⵊⴻⵜ ⵜⴻⵅⵎⴻⵊ.
ⵏⵏⵓⵇⴰⵔⵜ ⵏⵙⴻⵏ ⴷ ⵡⵓⵔⴻⵖ ⵏⵙⴻⵏ ⵡⴰⵔ ⵥⴻⵎⵎⴰⵔⴻⵏ ⴰⴷ ⵜⴻⵏ ⴼⴻⴽⴽⴻⵏ
ⴷⴻⴳ ⵡⴰⵙⵙ ⵏ ⵓⴷⵓⵇⵇⴻⵥ ⵏ ⵡⴻⵖⴹⴰⴱ ⵏ ⵙⵉⴷⵉ.
ⵡⴰⵔ ⵥⴻⵎⵎⴰⵔⴻⵏ ⴰⴷ ⵥⵥⴰⵢⵙⴻⵏ ⵙⵙⵊⵉⵡⵏⴻⵏ ⵍⴻⵄⵎⴰⵔ ⵏⵙⴻⵏ
ⵏⵉⵖ ⴰⴷ ⵥⵥⴰⵢⵙⴻⵏ ⵛⵛⵓⵔⴻⵏ ⵜⴰⴽⵔⵉⵛⵜ ⵏⵙⴻⵏ,
ⵎⵉⵏⵥⵉ ⴰⵢⴰ ⵜⵓⵖⴰ ⴷ ⵙⵙⵉⴱⴱⴻⵜ ⵏ ⵓⵏⴻⵇⵔⴰⴹ ⵉ ⴷⴷ-ⵢⵉⵡⵢⴻⵏ ⵍⵎⵓⵄⵚⵉⵢⵢⴻⵜ ⵏⵙⴻⵏ. ■
20 ⴰⵥⵔⵉ ⵏ ⵜⴻⵍⵡⵉⵥⵜ ⵉⴳⴳⴰ ⵉ-ⵜ ⴷ ⵍⵄⴰⴹⴰⵎⴰ ⵢⵓⵄⵍⴰⵏ,
ⵎⴰⵛⴰ ⵏⵉⵜⵏⵉ ⴳⴳⵉⵏ ⴷⴰⵢⴻⵙ ⵍⴻⵅⵢⴰⵍⴰⵜ ⵏ ⵏⵏⵄⴰⵡⴰⵜ ⵏⵙⴻⵏ ⵏ ⵚⵚⴰⵏⴰⵎ
ⵓ ⵍⴻⵅⵢⴰⵍⴰⵜ ⵏ ⵊⵊⵄⴰⵢⴻⴼ ⵏⵙⴻⵏ.
ⵙ ⵓⵢⴰ ⴰⵔⵔⵉⵖ ⵜⴰⵍⵡⵉⵥⵜ ⴷ ⵜⴰⵅⵎⵓⵊⵉ ⵉ ⵏⵉⵜⵏⵉ.
21 ⵏⴻⵛⵛ ⴰⴷ ⵜⵜ ⵡⵛⴻⵖ ⴰⵎ ⵜⵓⵛⵛⴻⴼⴼⵔⴰ ⴷⴻⴳ ⵓⴼⵓⵙ ⵏ ⵉⴱⴰⵔⵔⴰⵏⵉⵢⵢⴻⵏ
ⵓⵛⴰ ⴰⴷ ⵜⵜ ⵡⵛⴻⵖ ⴷ ⵜⴰⴽⴻⵛⵛⴰⴹⵜ ⵉ ⵉⵄⴻⴼⴼⴰⵏⴻⵏ ⵏ ⵜⴻⵎⵎⵓⵔⵜ,
ⵓⵛⴰ ⵏⵉⵜⵏⵉ ⴰⴷ ⵜⵜ ⵙⵙⵄⵉⴵⵜⴻⵏ.
22 ⵏⴻⵛⵛ ⴰⴷ ⵅⴰⵙ ⵙⵙⴻⵏⵇⴻⵍⴱⴻⵖ ⵓⴷⴻⵎ ⵉⵏⵓ
ⵓ ⵏⵉⵜⵏⵉ ⴰⴷ ⵙⵙⵄⵉⴵⵜⴻⵏ ⴰⵎⵛⴰⵏ ⵉⵏⵓ ⵉⵏⵏⵓⴼⴰⵔⴻⵏ,
ⵎⴰⵖⴰⵔ ⵉⵛⴻⴼⴼⴰⵔⴻⵏ ⴰⴷ ⴷⴰⵢⴻⵙ ⴰⴷⴼⴻⵏ
ⵓⵛⴰ ⴰⴷ ⵜ ⵙⵙⵄⵉⴵⵜⴻⵏ.”
23 “ⵙⴻⵡⵊⴻⴷ ⵙⵙⵏⴻⵙⵍⴻⵜ,
ⵎⵉⵏⵥⵉ ⵜⴰⵎⵎⵓⵔⵜ ⵜⴻⵛⵛⵓⵔ ⵙ ⵓⵙⵉⵥⵥⴻⵍ ⵏ ⵉⴷⴰⵎⵎⴻⵏ
ⵓ ⵜⴰⵏⴷⵉⵏⵜ ⵜⴻⵛⵛⵓⵔ ⵙ ⵍⵄⵓⵏⴼ.
24 ⵏⴻⵛⵛ ⴰⴷ ⴰⵡⵢⴻⵖ ⵍⴻⴳⵏⵓⵙ ⵉⵄⴻⴼⴼⴰⵏⴻⵏ ⵇⴰⵄ,
ⵓ ⵏⵉⵜⵏⵉ ⴰⴷ ⵟⵟⴼⴻⵏ ⵜⵓⴷⵔⵉⵏ ⵏⵙⴻⵏ,
ⵓ ⴰⴷ ⵙⵙⴱⴻⴷⴷⴻⵏ ⵏⵏⴼⴰⵅⴻⵜ ⵏ ⴰⵢⵜ ⵏ ⵊⵊⴻⵀⴷ,
ⵓⵛⴰ ⴰⴷ ⵜⵜⵡⴰⵙⵄⵉⴵⵜⴻⵏⵜ ⵜⵥⴰⵡⵉⵢⵢⵉⵏ ⵏⵙⴻⵏ ⵉⵇⴻⴷⴷⵙⴻⵏ.
25 ⴰⴷ ⴷⴷ-ⵢⴰⵙ ⵓⵏⴻⵅⵍⵉⵄ ⴷ ⴰⵎⴻⵇⵇⵔⴰⵏ,
ⵓ ⵏⵉⵜⵏⵉ ⴰⴷ ⴰⵔⵥⵓⵏ ⵍⴻⵀⵏⴰ,
ⵎⴰⵛⴰ ⵡⴰⵔ ⵉⵜⵜⵉⵍⵉ.
26 ⴰⵇⴰ ⴰⴷ ⴷⴷ-ⵢⴰⵙ ⵓⵛⴻⵍⵡⴰⵡ ⴰⵡⴰⵔⵏⵉ ⵉ ⵓⵛⴻⵍⵡⴰⵡ,
ⴰⴷ ⵢⵉⵍⵉ ⵍⵀⴰⵔⴷ ⴰⵡⴰⵔⵏⵉ ⵉ ⵍⵀⴰⵔⴷ.
ⵏⵉⵜⵏⵉ ⴰⴷ ⴰⵔⵥⵓⵏ ⵜⴰⵎⴻⵥⵔⵉⵡⵜ ⵏ ⵓⵏⴰⴱⵉ,
ⵎⴰⵛⴰ ⵛⵛⴰⵔⵉⵄⴰ ⵏ ⵓⴽⴻⵀⵀⴰⵏ ⴷ ⵛⵛⵡⴰⵔ ⵏ ⵉⵎⵖⴰⵔⴻⵏ
ⴰⴷ ⵇⴹⴰⵏ.
27 ⴰⵊⴻⴵⵉⴷ ⴰⴷ ⵉⵛⴹⴻⵏ
ⵓ ⵍⵃⴰⴽⴻⵎ ⴰⴷ ⵢⴰⵔⴹ ⴰⵏⴻⵅⵍⵉⵄ
ⵓ ⵉⴼⴰⵙⵙⴻⵏ ⵏ ⵍⴳⴻⵏⵙ ⴰⴷ ⵇⴰⵔⵔⵎⴻⵏ ⵙ ⵜⵉⴳⴳⵯⵓⴷⵉ.
ⵏⴻⵛⵛ ⴰⴷ ⵥⵥⴰⵢⵙⴻⵏ ⴳⴳⴻⵖ ⴰⵎ ⵡⴻⴱⵔⵉⴷ ⵏⵙⴻⵏ,
ⵓ ⵏⴻⵛⵛ ⴰⴷ ⵅⴰⵙⴻⵏ ⵃⴻⴽⵎⴻⵖ ⴰⵎ ⵍⴼⴰⵔⴰⵢⵉⴹ ⵏⵙⴻⵏ,
ⵓ ⵏⵉⵜⵏⵉ ⴰⴷ ⵙⵙⵏⴻⵏ ⴱⴻⵍⵍⵉ ⵏⴻⵛⵛ ⴷ ⵙⵉⴷⵉ.”