1 “ⵍⴰⵖⴰ ⵙ ⵊⵊⴻⵀⴷ, ⵡⴰⵔ ⵜⵜⵛⴻⵟⵟⴰⵔ, ⴻⵊⵊ ⵜⵎⵉⵊⵊⴰ ⵏⵏⴻⴽ ⴰⴷ ⵜⴳⴻⵄⵄⴻⴷ ⴰⵎ ⵓⵢⵉⵛⵛ ⵏ ⵉⵛⴰⵔⵔⵉ ⵓⵛⴰ ⴱⴰⵔⵔⴻⵃ ⵉ ⵍⴳⴻⵏⵙ ⵉⵏⵓ ⵉⵄⴻⴷⴷⵉⵢⴻⵏ ⵏⵙⴻⵏ ⵓ ⵉ ⵜⴰⴷⴷⴰⵔⵜ ⵏ ⵢⴰⵄⵇⵓⴱ ⴷⴷⵏⵓⴱ ⵏⵙⴻⵏ! 2 ⵏⵉⵜⵏⵉ ⴰⵔⴻⵥⵥⵓⵏ ⵅⴰⴼⵉ ⴰⵙⵙ ⵅ ⵡⴰⵙⵙ ⵓⵛⴰ ⵉⵄⵊⴻⴱ ⴰⵙⴻⵏ ⵜⵓⵙⵙⵏⴰ ⵏ ⵉⴱⵔⵉⴷⴻⵏ ⵉⵏⵓ, ⴰⵎⴻⵛⵏⴰⵡ ⵎⴰⵎⵎⴻⵛ ⴵⴰⵏ ⴷ ⵍⴳⴻⵏⵙ ⵏⵏⵉ ⵉⵜⵜⴻⴳⴳⴻⵏ ⵜⴰⵙⴻⴳⴷⴰ ⵓ ⵡⴰⵔ ⵉⵜⵜⴻⵊⵊⵉ ⵍⵃⴻⵇⵇ ⵏ ⴰⵔⴻⴱⴱⵉ ⵏⵏⴻⵙ. ⵏⵉⵜⵏⵉ ⵜⵜⴰⵔⴻⵏ ⵥⵥⴰⵢⵉ ⵍⴻⵃⴽⴰⵎⴰⵜ ⵉⵙⴻⴳⴳⴷⴻⵏ, ⵉⵄⵊⴻⴱ ⴰⵙⴻⵏ ⴰⴷ ⴷⴷ-ⵇⴰⵔⵔⴱⴻⵏ ⵖⴰⵔ ⴰⵔⴻⴱⴱⵉ, 3 ⵇⵇⴰⵔⴻⵏ ⵎⴰⵛⴰ: ‘ⵎⴰⵢⴻⵎⵎⵉ ⵏⵥⵓⵎⵎ, ⵓⵛ ⵛⴻⴽ ⵡⴰⵔ ⵜ ⵜⴻⵥⵔⵉⴷ? ⵎⴰⵢⴻⵎⵎⵉ ⵏⴻⵙⵙⴻⵛⴹⴰⵏ ⴱⵓⵃⴱⴻⵍ ⵏⵏⴻⵖ ⴰⵎ ⵛⴻⴽ ⵡⴰⵔ ⴷ ⴰⵙ ⵜⵃⴻⴽⴽⴰⵔⴻⴷ?’ ⵅⵥⴰⵔ, ⴷⴻⴳ ⵡⴰⵙⵙ ⵏ ⵓⵥⵓⵎⵎⵉ ⵏⵡⴻⵎ, ⵜⴰⵔⵔⵉⵎ ⵎⴻⵥⵔⵉ ⵓⵛⴰ ⵜⵥⴻⵢⵢⴰⵔⴻⵎ ⴰⵟⵟⴰⵙ ⵎⴰⵔⵔⴰ ⵉⵅⴻⴷⴷⴰⵎⴻⵏ ⵏⵡⴻⵎ.

4 ⵅⵥⴰⵔ, ⴰⵥⵓⵎⵎⵉ ⵏⵡⴻⵎ ⵢⵉⵡⵉ ⴽⴻⵏⵏⵉⵡ ⵖⴰⵔ ⵓⵎⵛⵓⴱⴱⴻⵛ ⴷ ⵓⵎⴻⵏⵖⵉ ⵓ ⵖⴰⵔ ⵜⵉⵢⵢⵉⵜⴰ ⵙ ⵍⴱⵓⵏⵉⵢⵢⴻⵜ. ⵡⴰⵔ ⵜⵜⵥⵓⵎⵎⴻⵎ ⴰⵎⴻⵛⵏⴰⵡ ⴰⵙⵙ-ⴰ ⵎⴰⵃⴻⵏⴷ ⴰⴷ ⵜⴻⵙⵙⵃⴻⵙⵙⴻⵎ ⵖⴰⵔ ⵜⵎⵉⵊⵊⴰ ⵏⵡⴻⵎ ⴷⵉ ⵍⵓⵄⵍⴰ! 5 ⵎⴰ ⵡⴰ ⴷ ⴰⵥⵓⵎⵎⵉ ⵏⵏⵉ ⵉⵅⴹⴰⵔⴻⵖ ⵏⴻⵛⵛ: ⵉⵊⵊ ⵏ ⵡⴰⵙⵙ ⵏⵏⵉ ⴷⵉ ⵖⴰ ⵉⵄⴻⴷⴷⴻⴱ ⴱⵏⴰⴷⴻⵎ ⵍⴻⵄⵎⴰⵔ ⵏⵏⴻⵙ, ⵡⴻⵏⵏⵉ ⵅ ⵉ ⵖⴰ ⵉⵎⴻⵢⵢⴻⵍ ⴱⵏⴰⴷⴻⵎ ⴰⵥⴻⴵⵉⴼ ⵏⵏⴻⵙ ⴰⵎ ⵓⵖⴰⵏⵉⵎ, ⵓ ⴰⴷ ⵉⵙⵙⴰⵔⵙ ⵜⴰⵅⴰⵏⵛⴻⵜ ⴷ ⵉⵖⵖⴻⴹ ⴰⵎ ⵇⴰⵎⴰ ⵏⵏⴻⵙ? ⵎⴰ ⵜⴻⵇⵇⴰⵔⴻⴷ ⵉ ⵓⵢⴰ ⴰⵥⵓⵎⵎⵉ, ⵎⴰ ⴰⵢⴰ ⴷ ⴰⵙⵙ ⵏⵏⵉ ⵢⵓⵙⴰ-ⴷⴷ ⵅ ⵍⵅⴰⴹⴰⵔ ⵏ ⵙⵉⴷⵉ? ^■  

6 ⵎⴰ ⵡⴰⵔ ⵉⴵⵉ ⵡⴰ ⴷ ⴰⵥⵓⵎⵎⵉ ⵏⵏⵉ ⵉⵅⴹⴰⵔⴻⵖ: ⴰⴼⴻⴽⴽⵉ ⵏ ⵉⵛⴻⴷⴷⵉⵢⵢⴻⵏ ⵏ ⵍⵖⴰⵔ, ⴰⵥⴻⵄⵡⴰⴹ ⵏ ⵜⴻⵙⵖⵓⵏⵉⵏ ⵏ ⵥⵥⴰⵢⵍⴻⵜ, ⴰⵏⵓⴼⵙⴻⵍ ⵉ ⵢⴻⵏⵏⵉ ⵉⵜⵜⵡⴰⵃⵚⴰⵔⴻⵏ, ⴰⵇⴰ ⴰⴷ ⵜⴻⴽⴽⵙⴻⵎ ⵇⴰⵄ ⵥⵥⴰⵢⵍⴻⵜ? 7 ⵎⴰ ⵡⴰⵔ ⵉⴵⵉ ⵡⴰ ⴷ ⴰⵥⵓⵎⵎⵉ ⵏⵏⵉ ⵉⵅⴹⴰⵔⴻⵖ, ⴰⵇⴰ ⴰⴷ ⵜⴻⴱⴹⵉⴷ ⴰⵖⵔⵓⵎ ⵏⵏⴻⴽ ⴰⴽ-ⴷ ⵡⴻⵏⵏⵉ ⵉⴵⵓⵥⴻⵏ ⵓⵛⴰ ⴰⴷ ⵜⴻⵙⵙⵉⴷⴼⴻⴷ ⵍⵎⵓⵙⴰⴽⵉⵏ ⵏⵏⵉ ⵉⵜⵜⵡⴰⴷⴰⵔⵔⵛⴻⵏ ⵖⴰⵔ ⵜⴰⴷⴷⴰⵔⵜ? ⵎⴰⵍⴰ ⵛⴻⴽ ⵜⴻⵥⵔⵉⴷ ⴰⵄⴰⵔⵢⴰⵏ, ⴰⴷ ⵜ ⵜⴻⵙⵙⵢⴰⵔⴹⴻⴷ ⵓ ⵡⴰⵔ ⵜⴻⵙⵙⵏⵓⴼⴰⵔⴻⴷ ⵉⵅⴻⴼ ⵏⵏⴻⴽ ⵥⴻⴳ ⵡⴻⵏⵏⵉ ⵉⴵⴰⵏ ⵥⴻⴳ ⵡⴻⵢⵙⵓⵎ ⴷ ⵉⴷⴰⵎⵎⴻⵏ ⵏⵏⴻⴽ? ^■   8 ⵅⴻⵏⵏⵉ ⵜⴰⴼⴰⵡⵜ ⵏⵏⴻⴽ ⴰⴷ ⴷⴷ-ⵜⴻⵏⵇⴰⵔ ⴰⵎ ⵜⵓⴼⴼⵓⵜ ⵏ ⵍⵃⴰⵍ ⵓⵛⴰ ⴰⵙⴳⴻⵏⴼⵉ ⵏⵏⴻⴽ ⴰⴷ ⴷⴷ-ⵢⴰⵡⴻⴹ ⴷⴻⵖⵢⴰ, ⵜⴰⵙⴻⴳⴷⴰ ⵏⵏⴻⴽ ⴰⴷ ⴰⵛ ⵜⵉⵥⵡⴰⵔ ⵓⵛⴰ ⴰⵄⵓⴵⵉ ⵏ ⵙⵉⴷⵉ ⴰⴷ ⵢⵉⵍⵉ ⴷ ⴰⵖⴻⵥⴷⵉⵙ ⵏⵏⴻⴽ ⴰⵏⴻⴳⴳⴰⵔⵓ.

9 ⵅⴻⵏⵏⵉ ⴰⴷ ⵜⵍⴰⵖⵉⴷ ⵓⵛⴰ ⵙⵉⴷⵉ ⴰⴷ ⵅⴰⴽ ⴷⴷ-ⵢⴰⵔⵔ. ⴰⴷ ⵜⴻⵙⵖⵓⵢⵢⴻⴷ ⵖⴰⵔ ⵜⵡⵉⵥⴰ, ⵓⵛⴰ ⵅⴻⵏⵏⵉ ⴰⴷ ⵢⵉⵏⵉ ⵏⴻⵜⵜⴰ: ‘ⵅⵥⴰⵔ, ⴰⵇⴰ ⴰⵢⵉ ⴷⴰ!’ ⵎⴰⵍⴰ ⵏⵉⵛⴰⵏ ⵜⴻⴽⴽⵙⴻⴷ ⵥⵥⴰⵢⵔⴻⵜ ⵥⵉ ⵍⵡⴻⵙⵜ ⵏⵏⴻⴽ, ⵓⵍⴰ ⴷ ⴰⵛⴻⵢⵢⴰⵔ ⵙ ⵓⴹⴰⴹ ⴷ ⵡⴰⵡⴰⵍ ⴰⵄⴻⴼⴼⴰⵏ,

10 ⵓⵛⴰ ⴰⴷ ⵜⴰⵔⵥⵎⴻⴷ ⵍⴻⵄⵎⴰⵔ ⵏⵏⴻⴽ ⵉ ⵡⴻⵏⵏⵉ ⵉⴵⵓⵥⴻⵏ ⵓ ⴰⴷ ⵜⴻⵙⵙⵊⵊⵉⵡⵏⴻⴷ ⵍⴻⵄⵎⴰⵔ ⵉⵛⴻⴹⵏⴻⵏ! ⵅⴻⵏⵏⵉ ⴰⴷ ⴷⴷ-ⵜⴻⵏⵇⴰⵔ ⵜⴼⴰⵡⵜ ⵏⵏⴻⴽ ⴷⵉ ⵜⴰⴵⴻⵙⵜ ⵓⵛⴰ ⵜⵓⴱⴱⴰⵔⵛⴻⵏⵜ ⵏⵏⴻⴽ ⴰⴷ ⵜⵉⵍⵉ ⴰⵎ ⵟⵟⵢⴰ ⵏ ⵓⵥⵉⵍ.

11 ⵙⵉⴷⵉ ⴰⴷ ⵛⴻⴽ ⵉⵜⵜⴳⴻⵡⵡⴰⴷ ⵍⴻⴱⴷⴰ ⵓ ⵏⴻⵜⵜⴰ ⴰⴷ ⵉⵙⵙⵊⵊⵉⵡⴻⵏ ⵍⴻⵄⵎⴰⵔ ⵏⵏⴻⴽ ⴷⵉ ⵊⵊⵡⴰⵢⴻⵀ ⵢⵓⵥⵖⴻⵏ ⵓⵛⴰ ⴰⴷ ⵉⵙⵙⴻⵊⵀⴻⴷ ⵉⵅⵙⴰⵏ ⵏⵏⴻⴽ. ⴰⴷ ⵜⴷⴻⵡⵍⴻⴷ ⴰⵎ ⵡⴻⵃⵡⵉⵛ ⵉⵜⵜⵡⴰⵙⵙⵓⵏ ⵓ ⴰⵎ ⵍⵄⵓⵏⵚⴰⵔ ⵉⵜⵜⴰⵥⵥⵍⴻⵏ ⵏ ⵡⴰⵎⴰⵏ ⵉ ⵡⴰⵔ ⵜⵜⵖⴰⵔⵔⴰⵏ ⴰⵎⴰⵏ ⵏⵏⴻⵙ ⵄⴻⵎⵎⴰⵔⵚ.

12 ⵉⵏⵏⵉ ⵥⵥⴰⵢⴻⴽ ⴷⴷ-ⵉⴼⴼⵖⴻⵏ ⴰⴷ ⵄⴰⵡⴷⴻⵏ ⴰⵙⴱⴻⴷⴷⵉ ⵉ ⵍⵅⵉⵔⴱⴰⵜ ⵏ ⵡⴻⵛⵃⴰⵍ ⵓⵢⴰ, ⴰⴷ ⵄⴻⴷⵍⴻⵏ ⴷⵙⵓⵙⴰ ⵏ ⵊⵊⵉⵍⴰⵜ ⵉⵄⴷⵓⵏ ⵓⵛⴰ ⴰⴷ ⴰⵛ ⵇⵇⴰⵔⴻⵏ: ‘ⵡⴻⵏⵏⵉ ⵉⵄⴻⴷⴷⵍⴻⵏ ⵜⴰⵔⴻⵥⵥⵉⵜⵉⵏ, ⴷ ⵡⴻⵏⵏⵉ ⵉⵜⵜⴰⵔⵔⴰⵏ ⵉⵥⵓⴱⴰⵇ ⴰⴷ ⴷⴰⵢⵙⴻⵏ ⵓⵢⵓⵔⴻⵏ!’

13 ⵎⴰⵍⴰ ⵅⴻⵏⵏⵉ ⵜⵇⴻⵍⴱⴻⴷ ⴰⴹⴰⵔ ⵏⵏⴻⴽ ⵅ ⵡⴰⵙⵙ ⵏ ⵙⵙⴻⴱⵜ, ⵅ ⵜⴰⴳⴳⵉⵜ ⵎⵉⵏ ⴷ ⴰⵛ ⵉⵜⵜⴻⵄⵊⵉⴱⴻⵏ ⴷⴻⴳ ⵡⴰⵙⵙ ⵉⵏⵓ ⵉⵇⴻⴷⴷⵙⴻⵏ, ⵓⵛⴰ ⴰⴷ ⵜⵍⴰⵖⵉⴷ ⵉ ⵡⴰⵙⵙ ⵏ ⵙⵙⴻⴱⵜ: ‘ⵟⵟⵉⴱⴻⵜ!’, ⵉ ⵎⵉⵏ ⵉⴵⴰⵏ ⵉⵇⴻⴷⴷⵙⴻⵏ ⵉ ⵙⵉⴷⵉ: ‘ⴰⵄⵓⴵⵉ!’, ⵓⵛⴰ ⴰⴷ ⵜⵡⴻⵇⵇⴰⵔⴻⴷ ⴰⵙⵙ ⵏ ⵙⵙⴻⴱⵜ ⴰⵎ ⵡⴰⵔ ⵜⴹⴻⴼⴼⴰⵔⴻⴹ ⵉⴱⵔⵉⴷⴻⵏ ⵏⵏⴻⴽ, ⵡⴰⵔ ⵜᵉⵜⵜⴻⴳⴳⵉⴷ ⵎⵉⵏ ⴷ ⴰⵛ ⵉⵜⵜⴻⵄⵊⵉⴱⴻⵏ ⵓ ⵡⴰⵔ ⵜⴻⵙⵙⵉⵡⵉⵍⵉⴷ ⵖⴰⵔ ⵜⵉⵥⵉ ⵏⵏⴻⴽ,

14 ⵅⴻⵏⵏⵉ ⴰⴷ ⵜⴰⴼⴻⴷ ⵍⴻⴼⵔⴰⵃⴻⵜ ⵏⵏⴻⴽ ⴷⵉ ⵙⵉⴷⵉ ⵓ ⵏⴻⵛⵛ ⴰⴷ ⵛⴻⴽ ⵊⵊⴻⵖ ⴰⴷ ⵜⵏⴻⴷⵀⴻⴷ ⵜⵉⵡⴰ ⵉ ⵍⴻⴳⵄⵓⴷⵉ ⵏ ⵜⴻⵎⵎⵓⵔⵜ. ⴰⴷ ⵛⴻⴽ ⵙⵙⴻⵛⵛⴻⵖ ⵥⵉ ⵜⴻⵙⵖⴰⵔⵜ ⵏ ⴱⴰⴱⴰⵛ ⵢⴰⵄⵇⵓⴱ, ⵎⵉⵏⵥⵉ ⴰⵇⴻⵎⵎⵓⵎ ⵏ ⵙⵉⴷⵉ ⵉⵙⵙⵉⵡⴻⵍ.”