1 “ⵙⵍⴻⵎ ⴰⵢⴰ, ⴰ ⴽⴻⵏⵏⵉⵡ ⵜⴰⴷⴷⴰⵔⵜ ⵏ ⵢⴰⵄⵇⵓⴱ, ⵉⵏⵏⵉ ⵓⵎⵉ ⵜⵜⵍⴰⵖⴰⵏ ⵙ ⵢⵉⵙⴻⵎ ⵏ ⵉⵙⵔⴰⵉⵍ, ⵉⵏⵏⵉ ⵉⴼⴼⵖⴻⵏ ⵥⴻⴳ ⵡⴰⵎⴰⵏ ⵏ ⵢⴰⵀⵓⴷⴰ, ⵉⵏⵏⵉ ⵉⵜⵜⵊⴰⴵⴰⵏ ⵖⴰⵔ ⵢⵉⵙⴻⵎ ⵏ ⵙⵉⴷⵉ ⵓ ⵜⵜⵉⴷⴰⵔⴻⵏ ⴰⵔⴻⴱⴱⵉ ⵏ ⵉⵙⵔⴰⵉⵍ, ⵎⴰⵛⴰ ⵡⴰⵔ ⵉⴵⵉ ⴷⵉ ⵜⵉⴷⴻⵜⵜ, ⵓ ⵡⴰⵔ ⵉⴵⵉ ⴷⵉ ⵜⵙⴻⴳⴷⴰ. 2 ⵏⵉⵜⵏⵉ ⵜⵜⵍⴰⵖⴰⵏ ⵉⵅⴻⴼ ⵏⵙⴻⵏ ‘ⵍⴳⴻⵏⵙ ⵥⵉ ⵜⴻⵏⴷⵉⵏⵜ ⵜⴰⵎⵇⴻⴷⴷⴰⵙⵜ!’ ⵓ ⵜⵜⵛⴰⵍⴻⵏ ⵅ ⴰⵔⴻⴱⴱⵉ ⵏ ⵉⵙⵔⴰⵉⵍ, ⴰⵇⴰ ⵙⵉⴷⵉ ⵏ ⵍⵄⴻⵙⴽⴰⵔⴰⵜ ⴷ ⵉⵙⴻⵎ ⵏⵏⴻⵙ.”

3 “ⵜⵉⵎⴻⵙⵍⴰⵢⵉⵏ ⵜⵉⵎⴻⵥⵡⵓⵔⴰ ⵙⵙⴰⵔⴳⴱⴻⵖ ⵅⴰⵙⴻⵏⵜ ⵄⴰⴷ ⴰⵟⵟⴰⵙ ⵥⴻⴳ ⵡⴰⵎⵉ, ⴰⵇⴰ ⴼⴼⵖⴻⵏⵜ-ⵉ-ⴷⴷ ⵥⴻⴳ ⵓⵇⴻⵎⵎⵓⵎ ⵉⵏⵓ ⵓⵛⴰ ⴱⴰⵔⵔⵃⴻⵖ ⵥⵥⴰⵢⵙⴻⵏⵜ. ⴷⴻⵖⵢⴰ ⴳⴳⵉⵖ ⵜⴻⵏⵜ ⵓⵛⴰ ⵅⴻⵏⵏⵉ ⵓⵙⵉⵏⵜ-ⵉ-ⴷⴷ. 4 ⵎⵉⵏⵥⵉ ⵏⴻⵛⵛ ⵙⵙⵏⴻⵖ, ⴰⵇⴰ ⵛⴻⴽ ⵜⴻⵙⵙⵇⴻⵙⵃⴻⴷ ⵉⵅⴻⴼ ⵏⵏⴻⴽ, ⴰⵇⴰ ⵉⵊⵉⵎⴰⵏ ⵏⵏⴻⴽ ⴰⵎ ⵜⴱⴰⵔⵔⴰⵜ ⵏ ⵡⵓⵥⵥⴰⵍ ⵓ ⵜⴰⵏⵢⴰⵔⵜ ⵏⵏⴻⴽ ⴰⵅⵎⵉ ⴷⴷ-ⵜⴻⴽⴽⴰ ⵥⵉ ⵏⵏⵃⴰⵙ, 5 ⵙⵙⴰⵔⴳⴱⴻⵖ ⴰⵛ ⵜⴻⵏⵜ ⵄⴰⴷ ⴰⵟⵟⴰⵙ ⵥⴻⴳ ⵡⴰⵎⵉ. ⵇⴱⴻⵍ ⵎⴰ ⵉⵎⵙⴰⵔ, ⴱⴰⵔⵔⵃⴻⵖ ⵥⵥⴰⵢⵙⴻⵏⵜ ⵎⴰⵃⴻⵏⴷ ⵛⴻⴽ ⵡⴰⵔ ⵜⴻⵇⵇⴰⵔⴻⴷ: ‘ⵚⵚⴰⵏⴰⵎ ⵉⵏⵓ ⵉⴳⴳⴰ ⵉ-ⵜⴻⵏⵜ!’, ⵏⵉⵖ ‘ⵍⴻⵅⵢⴰⵔⴰⵜ ⵉⵏⵓ ⵉⵏⴻⵇⵛⴻⵏ!’ ⵏⵉⵖ: ‘ⵍⴻⵅⵢⴰⵍ ⵉⵏⵓ ⵉⴼⴻⵙⵢⴻⵏ ⵢⵓⵎⵓⵔ ⵉ-ⵜⴻⵏⵜ!’ 6 ⵛⴻⴽ ⵜⴻⵙⵍⵉⴷ ⵅⴰⵙⴻⵏⵜ, ⵅⵥⴰⵔ ⵎⵍⵉⵃ ⵖⴰⵔ ⵎⴰⵔⵔⴰ ⴰⵢⴰ. ⵎⴰ ⵡⴰⵔ ⵜⴻⵅⵙⴻⵎ ⴰⴷ ⵥⵥⴰⵢⵙⴻⵏⵜ ⵜⴱⴰⵔⵔⵃⴻⵎ? ⵣⵉ ⵍⴻⵅⵅⵓ ⴰⴷ ⴰⵛ ⴱⴰⵔⵔⵃⴻⵖ ⵜⵉⵎⴻⵙⵍⴰⵢⵉⵏ ⵏ ⵊⴷⵉⴷ, ⵜⵉⵎⴻⵙⵍⴰⵢⵉⵏ ⵉⵏⵏⵓⴼⴼⴰⵔⴻⵏ ⵏⵏⵉ ⵡⴰⵔ ⵜⴻⵙⵙⵉⵏⴻⴷ.

7 ⵍⴻⵅⵅⵓ ⵜⵜⵡⴰⵅⴻⵍⵇⴻⵏⵜ-ⴷⴷ, ⵡⴰⵔ ⵉⴵⵉ ⴰⵟⵟⴰⵙ ⵥⴻⴳ ⵡⴰⵎⵉ. ⵇⴱⴻⵍ ⴰⵙⵙ-ⴰ ⵡⴰⵔ ⵅⴰⵙⴻⵏⵜ ⵜⴻⵙⵍⵉⴷ ⵎⴰⵃⴻⵏⴷ ⵡⴰⵔ ⵜⴻⵇⵇⴰⵔⴻⴷ: ‘ⵅⵥⴰⵔ, ⵙⵙⵏⴻⵖ ⵜⵜ ⵎⴻⵍⵎⵉ!’ 8 ⵡⴰⵀ, ⵡⴰⵔ ⵅⴰⵙⴻⵏⵜ ⵜⴻⵙⵍⵉⴷ ⵓ ⵄⴰⵡⴻⴷ ⵡⴰⵔ ⵜⴻⵏⵜ ⵜⴻⵙⵙⵉⵏⴻⴷ ⵓ ⵄⴰⵡⴻⴷ ⴰⵎⴻⵥⵥⵓⵖ ⵏⵏⴻⴽ ⵜⵓⵖⴰ ⵡⴰⵔ ⵢⴰⵔⵥⵉⵎ, ⵎⴰⵖⴰⵔ ⵏⴻⵛⵛ ⵙⵙⵏⴻⵖ, ⴰⵇⴰ ⵛⴻⴽ ⴰⴷ ⵜⴻⴳⴳⴻⴷ ⵙ ⵍⴻⵖⴷⴰⵔⴻⵜ ⴰⵟⵟⴰⵙ ⵓⵛⴰ ⴰⴷ ⴰⵛ ⵉⵏⵉⵏ ‘ⵡⴻⵏⵏⵉ ⵉⵜⵜⵄⴻⴷⴷⴰⵏ!’ ⵄⴰⴷ ⵥⴻⴳ ⵓⵄⴻⴷⴷⵉⵙ ⵏ ⵢⴻⵎⵎⴰⵛ.”

9 “ⴷⵉ ⵟⵟⵡⴻⵄ ⵏ ⵢⵉⵙⴻⵎ ⵉⵏⵓ ⴰⴷ ⵙⵙⵄⴻⴹⵍⴻⵖ ⴰⵖⴹⴰⴱ ⵉⵏⵓ, ⵓ ⴷⵉ ⵟⵟⵡⴻⵄ ⵏ ⵛⵛⴰⵏ ⵉⵏⵓ ⴰⴷ ⵜⴻⴱⴱⵜⴻⵖ ⵉⵅⴻⴼ ⵉⵏⵓ ⵉ ⵍⵅⴰⵔ ⵏⵏⴻⴽ ⵎⴰⵃⴻⵏⴷ ⵡⴰⵔ ⵛⴻⴽ ⵎⴻⵃⵃⵉⵖ ⵇⴰⵄ. ^■  

10 ⵅⵥⴰⵔ, ⵏⴻⵛⵛ ⵙⵙⴻⵚⴼⵉⵖ ⵛⴻⴽ, ⵎⴰⵛⴰ ⵡⴰⵔ ⵉⴵⵉ ⴰⵎ ⵏⵏⵓⵇⴰⵔⵜ, ⵇⴻⴵⴱⴻⵖ ⵛⴻⴽ ⴷⵉ ⵜⴻⴼⵇⵓⵏⵜ ⵏ ⵓⵙⴻⴼⵚⵉ ⵏ ⵍⴻⵖⴱⴻⵏ.

11 ⴷⵉ ⵟⵟⵡⴻⵄ ⵉⵏⵓ, ⴷⵉ ⵟⵟⵡⴻⵄ ⵉⵏⵓ ⴰⴷ ⵜ ⴳⴳⴻⵖ, ⵎⴰⵖⴰⵔ ⵎⴰⵎⵎⴻⵛ ⵉ ⵖⴰ ⵉⵜⵜⵡⴰⵄⴰⵔⵔⴰ ⵅⴻⵏⵏⵉ ⵉⵙⴻⵎ ⵉⵏⵓ? ⴰⵄⵓⴵⵉ ⵉⵏⵓ ⵡⴰⵔ ⵜ ⵜⵜⵉⵛⴻⵖ ⵉ ⵓⵍⴰ ⴷ ⵉⵊⵊⴻⵏ ⵏⵏⴻⵖⵏⵉ.” ^■  

12 “ⵙⴻⵍ-ⴷⴷ ⵖⴰⵔⵉ, ⴰ ⵢⴰⵄⵇⵓⴱ, ⵛⴻⴽ ⴰ ⵉⵙⵔⴰⵉⵍ, ⵡⴻⵏⵏⵉ ⵓⵎⵉ ⵍⴰⵖⵉⵖ! ⵏⴻⵛⵛ ⴷ ⵡⴻⵏⵏⵉ, ⵏⴻⵛⵛ ⴷ ⴰⵎⴻⵥⵡⴰⵔⵓ ⵓⵍⴰ ⴷ ⴰⵏⴻⴳⴳⴰⵔⵓ. ^■  

13 ⴰⴼⵓⵙ ⵉⵏⵓ ⵉⵙⵙⴰⵔⵙ ⵄⴰⵡⴻⴷ ⴷⵙⵓⵙⴰ ⵏ ⵜⴻⵎⵎⵓⵔⵜ, ⵓⵛⴰ ⴰⴼⵓⵙⵉ ⵉⵏⵓ ⵉⴱⴻⵥⵥⴻⵄ ⵉⵊⴻⵏⵡⴰⵏ. ⵎⴰⵍⴰ ⵍⴰⵖⵉⵖ ⴰⵙⴻⵏ, ⵜⵜⴱⴻⴷⴷⴰⵏ ⵏⵉⵜⵏⵉ ⴷⵉⵏⵏⵉ ⵊⵎⵉⵄ.

14 ⵎⵓⵏⴻⵎ ⵎⴰⵔⵔⴰ ⴽⴻⵏⵏⵉⵡ ⵓ ⵙⵍⴻⵎ: ‘ⵎⴰⵏ ⵡⴻⵏ ⵊⴰⵔ ⴰⵙⴻⵏ ⵉⴱⴰⵔⵔⴻⵃ ⵥⵉ ⵎⴰⵔⵔⴰ ⵎⴰⵏ ⴰⵢⴰ? ⵙⵉⴷⵉ ⵉⵜⵜⴻⵅⵙ ⵉ-ⵜ, ⵓ ⵡⴰⵏⵉⵜⴰ ⴰⴷ ⵢⴻⴳⴳ ⵎⵉⵏ ⵉⴵⴰⵏ ⵉ ⵍⵅⴰⴹⴰⵔ ⵏⵏⴻⵙ ⴹⵉⴷⴷ ⵉ ⴱⴰⴱⵉⵍ, ⴰⵖⵉⵍ ⵏⵏⴻⵙ ⴰⴷ ⵢⵉⵍⵉ ⴹⵉⴷⴷ ⵉ ⵉⴽⴰⵍⴷⴰⵏⵉⵢⵢⴻⵏ. ^■  

15 ⴰⵇⴰ ⵏⴻⵛⵛ ⵏⵏⵉⵖ ⵜ, ⵡⴰⵀ, ⵍⴰⵖⵉⵖ ⴰⵙ. ⴰⴷ ⴳⴳⴻⵖ ⴰⴷ ⴷⴷ-ⵢⴰⵙ ⵓⵛⴰ ⵏⴻⵜⵜⴰ ⴰⴷ ⵉⴼⵍⴻⵃ ⴷⴻⴳ ⵡⴻⴱⵔⵉⴷ ⵏⵏⴻⵙ.

16 ⵇⴰⵔⵔⴱⴻⵎ-ⴷⴷ ⵖⴰⵔⵉ, ⵙⵍⴻⵎ ⴰⵢⴰ: ‘ⵣⴻⴳ ⵓⵎⴻⵥⵡⴰⵔⵓ ⵏⴻⵛⵛ ⵡⴰⵔ ⵙⵙⵉⵡⵍⴻⵖ ⴷⵉ ⵜⵏⵓⴼⴼⵔⴰ. ⵣⴻⴳ ⵡⴰⵎⵉ ⴰⵢⴰ ⵎⴰⵔⵔⴰ ⵉⵎⵙⴰⵔ, ⴰⵇⴰ ⴰⵢⵉ ⵏⴻⵛⵛ ⴷⵉⵏ!’. ‘ⵓ ⵍⴻⵅⵅⵓ ⵙⵉⴷⵉ ⵉⵏⵓ, ⵙⵉⴷⵉ, ⵉⵙⵙⴻⴽⴽ ⴰⵢⵉ-ⴷⴷ, ⴰⴽ-ⴷ ⴰⵔⵔⵓⵃ ⵏⵏⴻⵙ.’ ”

17 “ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ, ⴰⵎⴻⴼⴷⵉ ⵏⵏⴻⴽ, ⴰⵎⵇⴻⴷⴷⴰⵙ ⵏ ⵉⵙⵔⴰⵉⵍ: ‘ⵏⴻⵛⵛ ⴷ ⵙⵉⴷⵉ, ⴰⵔⴻⴱⴱⵉ ⵏⵏⴻⴽ, ⵡⴻⵏⵏⵉ ⵛⴻⴽ ⵉⵙⵙⵍⴻⵎⴷⴻⵏ ⵎⵉⵏ ⵉⵏⴻⴼⴼⵄⴻⵏ, ⴷ ⵡⴻⵏⵏⵉ ⵛⴻⴽ ⵉⵏⴻⴷⴷⵀⴻⵏ ⴷⴻⴳ ⵡⴻⴱⵔⵉⴷ ⵏⵏⵉ ⵅ ⵉ ⵖⴰ ⵜⵓⵢⵓⵔⴻⴷ.

18 ⴰⵅ, ⵎⵍⵉ ⵜⴻⵅⵥⴰⵔⴻⴷ ⵎⴰⵛⴰ ⵖⴰⵔ ⵜⵡⴻⵚⵚⴰ ⵉⵏⵓ, ⵅⴻⵏⵏⵉ ⴰⴷ ⵢⴰⴼ ⵍⴻⵀⵏⴰ ⵏⵏⴻⴽ ⴰⴷ ⵢⵉⵍⵉ ⴰⵎ ⵢⴻⵖⵥⴰⵔ ⵓ ⴰⵙⴻⵏⵊⴻⵎ ⵏⵏⴻⴽ ⴰⵎ ⵍⴻⵎⵡⴰⵊ ⵏ ⵍⴻⴱⵃⴰⵔ, ^■  

19 ⵥⵥⴰⵔⵉⵄⴻⵜ ⵏⵏⴻⴽ ⵜⵓⵖⴰ-ⵜⵜ ⴰⵎ ⵉⵊⴷⵉ, ⵓ ⵉⵃⴻⵏⵊⵉⵔⴻⵏ ⵏⵏⴻⴽ ⵏⵏⵉ ⴷⴷ-ⵉⵜⵜⴻⴼⴼⵖⴻⵏ ⵥⵉ ⵜⴻⵊⵄⵉⵏⵏⴰ ⵏⵏⴻⴽ ⴰⵎ ⵍⵃⴻⴱⴱ ⵉ ⴷⴷ-ⵢⵓⵙⵉⵏ ⵥⵥⴰⵢⴻⵙ. ⵉⵙⴻⵎ ⵏⵏⴻⵙ ⵡⴰⵔ ⵉⵜⵜⵏⴻⵇⴹⵉⵄ ⵓ ⵡⴰⵔ ⵉⵜⵜⵡⴰⵜⴻⵃⵃⵉ ⵥⵥⴰⵜ ⵉ ⵡⵓⴷⴻⵎ ⵉⵏⵓ.’ ”

20 “ⴼⴼⵖⴻⵎ ⵥⵉ ⴱⴰⴱⵉⵍ, ⴰⵔⴻⵡⵍⴻⵎ ⵥⴻⴳ ⵉⴽⴰⵍⴷⴰⵏⵉⵢⵢⴻⵏ, ⴱⴰⵔⵔⵃⴻⵎ ⴰⵙ ⵙ ⵉⵖⵓⵢⵢⴰⵏ ⵏ ⵓⵙⵍⵉⵡⵍⴻⵡ, ⵎⴰⵃⴻⵏⴷ ⴰⴷ ⵙⵍⴻⵏ ⴰⵢⴰ, ⵙⵓⴼⴼⵖⴻⵎ ⵍⴻⵅⴱⴰⵔ ⴰⵍ ⴰⵏⴻⴳⴳⴰⵔ ⵏ ⴷⴷⵓⵏⴻⵛⵜ, ⵉⵏⵉⵎ: ‘ⵙⵉⴷⵉ ⵉⴼⴻⴽⴽ ⴰⵎⵙⴻⵅⵅⴰⵔ ⵏⵏⴻⵙ ⵢⴰⵄⵇⵓⴱ!’ ^□  ■   21 ⵡⴰⵔ ⵅⴰⵙⴻⵏ ⵉⴽⴽⵉ ⵓⴼⴰⴷⵉ ⵓⵎⵉ ⵜⴻⵏ ⴷⴷ-ⵉⴳⴻⵡⵡⴻⴷ ⵖⴰⵔ ⵉⵎⵓⵛⴰⵏ ⵉⵜⵜⵡⴰⵅⴰⵔⵔⴱⴻⵏ. ⵏⴻⵜⵜⴰ ⵉⵙⵙⵓⴼⴼⴻⵖ ⴰⵙⴻⵏ-ⴷⴷ ⴰⵎⴰⵏ ⵥⵉ ⵜⴻⵚⴹⴰⵔⵜ. ⵓⵎⵉ ⵏⴻⵜⵜⴰ ⵉⴼⴻⴵⴻⵇ ⵊⵊⴰⵔⴼ, ⴷⴷⵓⵇⵇⵥⴻⵏ-ⴷⴷ ⵥⵥⴰⵢⴻⵙ ⵡⴰⵎⴰⵏ.”

22 “ⵉⵄⴻⴼⴼⴰⵏⴻⵏ ⵡⴰⵔ ⵜⵜⵉⴼⴻⵏ ⵍⴻⵀⵏⴰ!, ⵉⵇⵇⴰⵔ ⵙⵉⴷⵉ.^■