1 “ⴰⴷ ⴷⴷ-ⵜⴻⴼⴼⴻⵖ ⵜⵙⴻⵟⵟⴰ ⵥⵉ ⵊⵊⴷⴻⵄ ⵏ ⵢⴰⵙⵙⴰ ⵓ ⵜⴰⵖⴻⴷⴷⵓⵜ ⵥⴻⴳ ⵉⵥⴻⵡⵔⴰⵏ ⵏⵏⴻⵙ ⴰⴷ ⴷⴷ-ⵜⴰⵡⵉ ⵍⵖⵉⴵⴻⵜ. ^■   2 ⴰⴷ ⵅⴰⵙ ⵢⴰⵔⵙⴰ ⴰⵔⵔⵓⵃ ⵏ ⵙⵉⴷⵉ, ⴰⵔⵔⵓⵃ ⵏ ⵜⵉⵖⵉⵜ ⴷ ⵍⴻⵄⵇⴻⵍ, ⴰⵔⵔⵓⵃ ⵏ ⵛⵛⵡⴰⵔ ⴷ ⵊⵊⴻⵀⴷ, ⴰⵔⵔⵓⵃ ⵏ ⵜⵓⵙⵙⵏⴰ ⴷ ⵜⵉⴳⴳⵯⵓⴷⵉ ⵥⵉ ⵙⵉⴷⵉ. ^■   3 ⴰⵔⴹⴰ ⵏⵏⴻⵙ ⴳⴳⵓⵔ ⴰⴷ ⵢⵉⵍⵉ ⴷⵉ ⵜⵉⴳⴳⵯⵓⴷⵉ ⵏ ⵙⵉⴷⵉ. ⵡⴰⵔ ⵉⵛⴰⵔⵔⴻⵄ ⵄⵍⴰⵃⵙⴰⴱ ⵎⵉⵏ ⵜⵜⵡⴰⵍⴰⵏⵜ ⵜⵉⵟⵟⴰⵡⵉⵏ ⵏⵏⴻⵙ, ⵡⴰⵔ ⵉⵃⴻⴽⴽⴻⵎ ⵄⵍⴰⵃⵙⴰⴱ ⵎⵉⵏ ⵜⵜⴻⵙⵍⴰⵏ ⵉⵎⴻⵥⵥⵓⵖⴻⵏ ⵏⵏⴻⵙ. 4 ⴰⴷ ⵉⵛⴰⵔⵔⴻⵄ ⵉⵎⵓⵇⵍⵉⵍⴻⵏ ⵙ ⵜⵙⴻⴳⴷⴰ ⵓ ⴰⴷ ⵉⵃⴽⴻⵎ ⵉⵎⵡⴰⴹⵄⴻⵏ ⵏ ⵜⴻⵎⵎⵓⵔⵜ ⵙ ⵍⵃⴻⵇⵇ, ⵎⴰⵛⴰ ⵜⴰⵎⵎⵓⵔⵜ ⴰⴷ ⵜⵜ ⵉⵡⵡⴻⵜ ⵙ ⵓⵥⴻⴵⴰⴹ ⵏ ⵓⵇⴻⵎⵎⵓⵎ ⵏⵏⴻⵙ ⵓ ⵙ ⵓⵚⵓⴹⵉ ⵏ ⵓⵇⴻⵎⵎⵓⵎ ⵏⵏⴻⵙ ⴰⴷ ⵉⵏⴻⵖ ⴰⵄⴻⴼⴼⴰⵏ. 5 ⵜⴰⵙⴻⴳⴷⴰ ⴰⴷ ⵜⵉⵍⵉ ⴷ ⴰⴱⵢⴰⵙ ⵏ ⵜⴻⵊⵄⵉⵏⵏⴰⵜⵉⵏ ⵏⵏⴻⵙ ⵓ ⵜⵉⴷⴻⵜⵜ ⴷ ⴰⴱⵢⴰⵙ ⵅ ⵜⵎⴻⵚⵚⴰⴹⵉⵏ ⵏⵏⴻⵙ.

6 ⴰⴷ ⵉⵥⴷⴻⵖ ⵡⵓⵛⵛⴻⵏ ⵖⴰⵔ ⵉⵥⵎⴰⵔ, ⴰⵖⵉⵔⴰⵙ ⴰⴷ ⵉⵊⴻⵏ ⵖⴰⵔ ⵉⵖⴰⵢⴹ ⴰⵎⴻⵥⵢⴰⵏ. ⴰⵢⴻⵏⴷⵓⵥ ⴷ ⵡⴰⵢⵔⴰⴷ ⴰⵎⴻⵥⵢⴰⵏ ⴷ ⵍⵎⴰⵍ ⵉⵚⴻⵃⵃⴻⵏ ⴰⴷ ⵉⵍⵉⵏ ⵎⵓⵏⴻⵏ ⵓⵛⴰ ⴰⵃⴻⵏⵊⵉⵔ ⴰⵎⴻⵥⵢⴰⵏ ⴰⴷ ⵜⴻⵏ ⵉⵏⴷⴻⵀ. ^□  ■   7 ⵜⴰⵢⴻⵏⴷⵓⵥⵜ ⴷ ⴷⴷⵓⴱ ⴰⴷ ⵀⴷⴰⵏ ⵊⵎⵉⵄ, ⵓⵛⴰ ⵉⵎⴻⵥⵢⴰⵏⴻⵏ ⵏⵙⴻⵏ ⴰⴷ ⵊⵏⴻⵏ ⵖⴰⵔ ⵡⴰⵢⴰⵡⵢⴰ ⵓⵛⴰ ⴰⵢⵔⴰⴷ ⴰⴷ ⵢⴻⵛⵛ ⵍⵓⵎ ⴰⵎ ⵓⴼⵓⵏⴰⵙ. 8 ⴰⵃⴹⵉⴹ ⴰⴷ ⵉⵔⴰⵔ ⵥⵥⴰⵜ ⵉ ⵡⴻⵅⴱⵓⵛ ⵏ ⵜⵍⴻⴼⵙⴰ ⵓ ⴰⵏⵉⴱⵓ ⴰⴷ ⵉⴳⴳ ⴰⴼⵓⵙ ⵏⵏⴻⵙ ⴷⴻⴳ ⵡⴻⵃⴼⵓⵔ ⵏ ⵓⴼⵉⵖⴰⵔ.

9 ⵡⴰⵔ ⵜⵜⴻⴳⴳⴻⵏ ⵍⵖⴰⵔ ⵓ ⵡⴰⵔ ⵜⵜⴻⴳⴳⴻⵏ ⴰⵔⴻⴷⴷⴻⴵ ⵅ ⵡⴻⴷⵔⴰⵔ ⴰⵎⵇⴻⴷⴷⴻⵙ ⵉⵏⵓ ⵎⴰⵔⵔⴰ, ⵎⴰⵖⴰⵔ ⵜⴰⵎⵎⵓⵔⵜ ⵜⴻⵛⵛⵓⵔ ⵙ ⵜⵓⵙⵙⵏⴰ ⵏ ⵙⵉⴷⵉ ⴰⵎ ⵎⴰⵎⵎⴻⵛ ⴷⵍⴻⵏ ⵡⴰⵎⴰⵏ ⵜⵉⵙⵉ ⵏ ⵍⴻⴱⵃⴰⵔ.

10 ⴷⴻⴳ ⵡⴰⵙⵙ ⵏⵏⵉ ⴰⴷ ⵉⴱⴻⴷⴷ ⵡⴻⵥⵡⴰⵔ ⵏ ⵢⴰⵙⵙⴰ ⴰⵎ ⵜⵄⴻⴵⴰⵏⵜ ⵉ ⵡⴻⵢⴷⵓⴷⴻⵏ. ⵖⴰⵔⴻⵙ ⴰⴷ ⵙⵙⴻⵇⵙⴰⵏ ⵍⴻⴳⵏⵓⵙ ⵓⵛⴰ ⴰⵔⵔⴰⵃⴻⵜ ⵏⵏⴻⵙ ⴰⴷ ⵜⵉⵍⵉ ⵜⵛⴻⵡⵡⴰⵔ.” ^■  

11 “ⴷⴻⴳ ⵡⴰⵙⵙ ⵏⵏⵉ ⴰⴷ ⵉⵙⵙⴳⴻⵄⵄⴻⴷ ⵙⵉⴷⵉ ⵉⵏⵓ ⴰⴼⵓⵙ ⵏⵏⴻⵙ ⵉⵛⵜ ⵏ ⵜⵡⴰⵍⴰ ⵏⵏⴻⵖⵏⵉⵜ, ⵃⵉⵎⴰ ⴰⴷ ⵉⵙⴻⵍⵍⴻⴽ ⵎⵉⵏ ⵉⵇⵇⵉⵎⴻⵏ ⵏ ⵍⴳⴻⵏⵙ ⵏⵏⴻⵙ ⵥⵉ ⴰⵛⵛⵓⵔ, ⵎⵉⵚⵔⴰ, ⴼⴰⵜⵔⵓⵙ, ⴽⵓⵛ, ⵄⵉⵍⴰⵎ, ⵛⵉⵏⵄⴰⵔ ⴷ ⵃⴰⵎⴰⵜ ⵓ ⵥⵉ ⵜⴻⴳⵥⵉⵔⵉⵏ ⵏ ⵍⴻⴱⵃⴰⵔ. ^□  

12 ⵏⴻⵜⵜⴰ ⴰⴷ ⵉⵙⵙⴱⴻⴷⴷ ⵜⴰⵄⴻⴵⴰⵏⵜ ⵉ ⵍⴻⴳⵏⵓⵙ ⵓ ⴰⴷ ⵉⵊⴰⵔⵡ ⵄⴰⵡⴻⴷ ⵉⵎⴻⵏⵏⴻⵄⵔⴰⵇ ⵏ ⵉⵙⵔⴰⵉⵍ, ⵃⵉⵎⴰ ⴰⴷ ⵉⵙⵙⵎⵓⵏ ⵉⵏⵏⵉ ⵉⵜⵜⵡⴰⵥⴻⴵⵄⴻⵏ ⵥⵉ ⵢⴰⵀⵓⴷⴰ ⵥⵉ ⴰⵔⴻⴱⵄⴰ ⵏ ⵜⵖⴻⵎⵎⵓⵔⴰ ⵏ ⵜⴻⵎⵎⵓⵔⵜ.

13 ⵅⴻⵏⵏⵉ ⴰⴷ ⵉⴳⴳⵯⴻⵊ ⵡⴰⵙⴰⵎ ⵏ ⵉⴼⵔⴰⵢⵉⵎ ⵓ ⵉⵏⵏⵉ ⵉⵃⴻⵚⵚⴰⵔⴻⵏ ⵢⴰⵀⵓⴷⴰ ⴰⴷ ⵜⵜⵡⴰⵇⴻⴹⵄⴻⵏ. ⵉⴼⵔⴰⵢⵉⵎ ⵡⴰⵔ ⵉⵜⵜⵉⵙⴻⵎ ⵄⴰⴷ ⵥⵉ ⵢⴰⵀⵓⴷⴰ ⵓ ⵢⴰⵀⵓⴷⴰ ⵡⴰⵔ ⵉⵃⴻⵚⵚⴰⵔ ⵄⴰⴷ ⵉⴼⵔⴰⵢⵉⵎ.

14 ⴰⴷ ⴼⴼⵖⴻⵏ ⵖⴰⵔ ⵍⵖⴰⵔⴱ ⴰⵅⵎⵉ ⵟⵟⴰⵡⴻⵏ ⵅ ⵜⵖⴰⵔⴹⵉⵏ ⵏ ⵉⴼⵉⵍⵉⵙⵟⵉⵏⵉⵢⵢⴻⵏ ⵓⵛⴰ ⵎⵓⵏⴻⵏ ⴰⴷ ⴽⴻⵛⵛⴹⴻⵏ ⴰⵢⵜ ⵏ ⵛⵛⴰⵔⵇ. ⴰⴷ ⵙⵙⵡⵉⵥⵥⴹⴻⵏ ⵉⴼⴰⵙⵙⴻⵏ ⵏⵙⴻⵏ ⵖⴰⵔ ⵉⴷⵓⵎ ⴷ ⵎⵓ’ⴰⴱ ⵓⵛⴰ ⴰⵢⵜ ⵏ ⵄⴰⵎⵎⵓⵏ ⴰⴷ ⴰⵙⴻⵏ ⵟⵟⴰⵄⴻⵏ.

15 ⴰⴷ ⵉⵃⴰⵔⵔⴻⵎ ⵙⵉⴷⵉ ⵉⵍⴻⵙ ⵏ ⵍⴻⴱⵃⴰⵔ ⵏ ⵎⵉⵚⵔⴰ ⵓⵛⴰ ⵏⴻⵜⵜⴰ ⴰⴷ ⵉⵙⵙⴳⴻⵄⵄⴻⴷ ⴰⴼⵓⵙ ⵏⵏⴻⵙ ⵅ ⵢⴻⵖⵥⴰⵔ ⵏ ⵍⴼⵓⵔⴰⵟ ⵙ ⵓⵃⴰⴷⵓⵇ ⵏ ⴰⵔⵔⵓⵃ ⵏⵏⴻⵙ ⵓ ⴰⴷ ⵜ ⵉⵡⴻⵜ ⴰⵍ ⵖⴰ ⵉⴷⵡⴻⵍ ⵙⴻⴱⵄⴰ ⵏ ⵜⵖⴻⵥⵔⴰⵜⵉⵏ ⵓⵛⴰ ⴰⴷ ⵢⴰⵔⵔ ⴰⵇⴰ ⵥⴻⵎⵎⴰⵔⴻⵏ ⴰⴷ ⴽⴽⴻⵏ ⵅ ⵡⴻⴱⵔⵉⴷ ⵙ ⵙⴰⵏⴷⴰⵍⵉⵢⴰⵜ.

16 ⴰⴷ ⴷⵉⵏ ⵢⵉⵍⵉ ⵡⴻⴱⵔⵉⴷ ⵉⵙⴻⴳⴳⵎⴻⵏ ⵉ ⵎⵉⵏ ⵉⵇⵇⵉⵎⴻⵏ ⵏ ⵍⴳⴻⵏⵙ ⵏⵏⴻⵙ ⵏⵏⵉ ⵉ ⵖⴰ ⵉⵛⴻⵟⵟⴻⵏ ⵥⵉ ⴰⵛⵛⵓⵔ, ⴰⵎ ⵎⴰⵎⵎⴻⵛ ⵜⵓⵖⴰ ⵉⴵⴰ ⵡⴻⴱⵔⵉⴷ ⵉ ⵉⵙⵔⴰⵉⵍ ⵓⵎⵉ ⴷⴷ-ⵉⴳⴻⵄⵄⴻⴷ ⵥⵉ ⵎⵉⵚⵔⴰ.” ^■