1 ⴷⴻⴳ ⵓⵙⴻⴳⴳⵯⴰⵙ ⵏ ⵍⵎⴻⵡⵜ ⵏ ⵓⵊⴻⴵⵉⴷ ⵄⵓⵥⵥⵉⵢⴰ ⵥⵔⵉⵖ ⵙⵉⴷⵉ ⵉⵇⵇⵉⵎ ⵅ ⵍⵄⴰⵔⵛ ⵢⵓⵄⵍⴰⵏ ⵉⵜⵜⵡⴰⵙⴳⴻⵄⵄⴷⴻⵏ ⵓⵛⴰ ⴰⴼⵔⴰⵢ ⵏ ⵡⴰⵔⵔⵓⴹ ⵏⵏⴻⵙ ⵉⵜⵜⵛⵓⵔ ⵣⵥⴰⵡⴻⵛⵜ ⵜⴰⵎⴻⵇⵇⵔⴰⵏⵜ. ^■   2 ⵜⵉⵡⴰ ⵏⵏⴻⵙ ⴱⴻⴷⴷⴻⵏ ⵉⵙⴰⵔⴰⴼⵉⵢⵢⴻⵏ, ⵍⵎⴰⵍⴰⴽⴰⵜ ⵏⵏⵉ ⵉⵜⵜⴱⴰⵏⴻⵏ ⴰⵎ ⴷⴰⵢⵙⴻⵏ ⵜⵉⵎⴻⵙⵙⵉ, ⵖⴰⵔⵙⴻⵏ ⵙⴻⵜⵜⴰ ⵏ ⵡⴰⴼⵔⵉⵡⴻⵏ. ⵇⴰⵄ ⵉⵊⵊ ⵖⴰⵔⴻⵙ ⵙⴻⵜⵜⴰ ⵏ ⵡⴰⴼⵔⵉⵡⴻⵏ. ⵙ ⵜⵏⴰⵢⴻⵏ ⵏ ⵡⴰⴼⵔⵉⵡⴻⵏ ⵉⵍⴻⵃⵃⴻⴼ ⴰⵖⴻⵎⴱⵓⴱ ⵏⵏⴻⵙ, ⵙ ⵜⵏⴰⵢⴻⵏ ⵉⵍⴻⵃⵃⴻⴼ ⵉⴹⴰⵔⴻⵏ ⵏⵏⴻⵙ ⵓ ⵙ ⵜⵏⴰⵢⴻⵏ ⵜⵓⵖⴰ ⵉⵟⵟⴰⵡ. ^□  ■   3 ⵉⵍⴰⵖⴰ ⵉⵊⵊ ⵅ ⵡⴻⵏⵏⴻⵖⵏⵉ, ⵉⵏⵏⴰ: “ⴰⵎⵇⴻⴷⴷⴰⵙ, ⴰⵎⵇⴻⴷⴷⴰⵙ, ⴰⵎⵇⴻⴷⴷⴰⵙ ⴷ ⵙⵉⴷⵉ ⵏ ⵍⵄⴻⵙⴽⴰⵔⴰⵜ. ⵎⴰⵔⵔⴰ ⵜⴰⵎⵎⵓⵔⵜ ⵜⴻⵛⵛⵓⵔ ⵙ ⵓⵄⵓⴵⵉ ⵏⵏⴻⵙ!”, ^■   4 ⴰⵍⴰⵎⵉ ⵏⵀⴻⵥⵥⴻⵏ ⴷⵙⵓⵙⴰ ⵏ ⵜⵏⴻⴱⴷⴰⵜⵉⵏ ⵏ ⵜⴻⵡⵡⴰⵔⵜ ⵙ ⵜⵎⵉⵊⵊⴰ ⵏ ⵡⴻⵏⵏⵉ ⵉⵍⴰⵖⴰⵏ ⵓⵛⴰ ⵜⴰⴷⴷⴰⵔⵜ ⵜⴻⵛⵛⵓⵔ ⵙ ⴷⴷⴻⵅⵅⴰⵏ.

5 ⵅⴻⵏⵏⵉ ⵏⵏⵉⵖ ⵏⴻⵛⵛ: ‘”ⴰⵅⴻⵢⵢⴻⴱ ⵉ ⵏⴻⵛⵛ, ⴰⴷ ⵀⴻⵍⵍⴽⴻⵖ, ⵎⴰⵖⴰⵔ ⵏⴻⵛⵛ ⴷ ⴰⵔⵢⴰⵥ ⴱⵓ-ⵉⵢⴻⵏⵛⵉⵛⴻⵏ ⵅⴻⵎⵊⴻⵏ ⵓ ⵥⴻⴷⴷⵖⴻⵖ ⵊⴰⵔ ⵍⴳⴻⵏⵙ ⵏ ⴰⵢⵜ ⵏ ⴱⵓ-ⵉⵢⴻⵏⵛⵉⵛⴻⵏ ⵅⴻⵎⵊⴻⵏ, ⵓ ⵡⴰⵅⵅⴰ ⴰⵎⴻⵏⵏⵉ ⵜⵉⵟⵟⴰⵡⵉⵏ ⵉⵏⵓ ⵥⵔⵉⵏⵜ ⴰⵊⴻⴵⵉⴷ, ⵙⵉⴷⵉ ⵏ ⵍⵄⴻⵙⴽⴰⵔⴰⵜ.” 6 ⵉⴹⵡⴰ-ⴷⴷ ⵉⵊⵊ ⵥⴻⴳ ⵉⵙⴰⵔⴰⴼⵉⵢⵢⴻⵏ ⵖⴰⵔⵉ. ⵢⴰⵔⴱⵓ ⵍⴻⴼⵃⴻⵎ ⵉⵜⵜⴻⵃⴷⵓⴷⵓⵇⴻⵏ ⴷⴻⴳ ⵓⴼⵓⵙ ⵏⵏⴻⵙ ⵏⵏⵉ ⵜⵓⵖⴰ ⵉⴽⵙⵉ ⵙ ⵜⵊⴻⵇⵇⴰⴹⵜ ⵥⴻⴳ ⵓⵄⴰⵍⵟⴰⵔ. 7 ⵏⴻⵜⵜⴰ ⵉⵃⴰⴷⴰ ⵥⵥⴰⵢⴻⵙ ⴰⵇⴻⵎⵎⵓⵎ ⵉⵏⵓ, ⵉⵏⵏⴰ: “ⵅⵥⴰⵔ, ⵉⵃⴰⴷⴰ ⵍⴻⴼⵀⴻⵎ ⵉⵜⵜⴻⵃⴷⵓⴷⵓⵇⴻⵏ ⵡⴰⵏⵉⵜⴰ ⵉⵢⴻⵏⵛⵉⵛⴻⵏ ⵏⵏⴻⴽ. ⵜⴻⵎⵎⴻⴽⵙⵉ ⵍⵎⵓⵄⵚⵉⵢⵢⴻⵜ ⵏⵏⴻⴽ ⵓ ⴷⴷⴻⵏⴱ ⵏⵏⴻⴽ ⵉⵜⵜⵡⴰⵙⵙⴻⵚⵍⴻⵃ.” ^■  

8 ⴰⵡⴰⵔⵏⵉ ⵉ ⵓⵢⴰ ⵙⵍⵉⵖ ⵉ ⵜⵎⵉⵊⵊⴰ ⵏ ⵙⵉⴷⵉ ⵉⵏⵓ, ⵜⴻⵇⵇⴰⵔ: “ⵎⴰⵏ ⵡⴻⵏ ⵉ ⵖⴰ ⵙⵙⴻⴽⴽⴻⵖ ⵓ ⵡⵉ ⵉ ⵖⴰ ⵢⵓⵢⵓⵔⴻⵏ ⵎⴰⵃⴻⵏⴷ ⴰⴷ ⵉⵥⵡⴰⵔ ⵉ ⵏⴻⵛⵛⵉⵏ?” ⵅⴰⵙ ⵓⵛⴰ ⵏⵏⵉⵖ: “ⵅⵥⴰⵔ, ⴰⵇⴰ ⴰⵢⵉ ⴷⴰ, ⵙⴻⴽⴽ ⴰⵢⵉ!” 9 ⵅⴻⵏⵏⵉ ⵉⵏⵏⴰ: “ⵓⵢⵓⵔ ⵓⵛⴰ ⵜⵉⵏⵉⴷ ⵉ ⵍⴳⴻⵏⵙ-ⴰ: ‘ⵡⴰⵅⵅⴰ ⴰⴷ ⵜⴻⵙⵍⴻⵎ ⵙ ⵜⴻⵢⵏⵉⵜ, ⵡⴰⵔ ⵜ ⵜⴼⴻⵀⵀⵎⴻⵎ!’, ⵓⵛⴰ: ‘ⵡⴰⵅⵅⴰ ⵜⴻⵥⵔⵉⵎ ⵎⵍⵉⵃ, ⵡⴰⵔ ⵜ ⵜⴻⵙⵙⵉⵏⴻⵎ!’ ^■  

10 ⵙⴻⵇⵙⴻⵃ ⵓⵍ ⵏ ⵍⴳⴻⵏⵙ-ⴰ, ⵓⵛⴰ ⴱⴻⵍⵍⴻⵄ ⴰⵙ ⵉⵎⴻⵥⵥⵓⵖⴻⵏ, ⵙⴻⵍⵙⴻⵇ ⴰⵙ ⵜⵉⵟⵟⴰⵡⵉⵏ ⵎⴰⵃⴻⵏⴷ ⵙ ⵜⵉⵟⵟⴰⵡⵉⵏ ⵏⵏⴻⵙ ⵡⴰⵔ ⵉⵜⵜⵡⵉⵍⵉ ⵓ ⵙ ⵉⵎⴻⵥⵥⵓⵖⴻⵏ ⵏⵏⴻⵙ ⵡⴰⵔ ⵉⵜⵜⴻⵙⵍⵉ ⵓ ⵙ ⵡⵓⵍ ⵏⵏⴻⵙ ⵡⴰⵔ ⵉⵜⵜⴻⵙⵙⴻⵏ, ⴰⵍⴰⵎⵉ ⵡⴰⵔ ⵉⴷⴷⵉⴽⴽⵡⵉⵍ ⵓⵛⴰ ⴰⴷ ⵉⵜⵜⵡⴰⵙⴳⴻⵏⴼⴰ.’ ” ^■  

11 ⵅⴻⵏⵏⵉ ⵏⵏⵉⵖ: “ⴰⵍ ⵎⴻⵍⵎⵉ, ⴰ ⵙⵉⴷⵉ ⵉⵏⵓ?” ⵏⴻⵜⵜⴰ ⵢⴰⵔⵔⴰ-ⴷⴷ: “ⴰⵍ ⵉ ⵖⴰ ⵜⵜⵡⴰⵅⴰⵔⵔⴱⴻⵏⵜ ⵜⵏⴻⴷⴷⴰⵎ, ⵡⴰⵔ ⴷⴰⵢⵙⴻⵏⵜ ⵉⵜⵜⵖⵉⵎⵉ ⵄⴰⴷ ⵓⵎⴻⵥⴷⵓⵖ, ⵓⵍⴰ ⴷ ⵜⵓⴷⵔⵉⵏ, ⵡⴰⵔ ⴷⴰⵢⵙⴻⵏⵜ ⵉⵜⵜⵖⵉⵎⵉ ⵄⴰⴷ ⴱⵏⴰⴷⴻⵎ, ⵓⵛⴰ ⴰⴷ ⵜⵉⵍⵉ ⵜⴻⵎⵎⵓⵔⵜ ⵜⴰⵔⴻⴷⴷⴻⴵ, ⴰⴷ ⵜⴻⴷⵡⴻⵍ ⴷ ⵍⵅⵉⵔⴱⴻⵜ.

12 ⵎⴰⵖⴰⵔ ⵙⵉⴷⵉ ⴰⴷ ⵉⵙⵙⴱⴻⵄⵄⴻⴷ ⵉⵡⴷⴰⵏ ⵖⴰⵔ ⵍⴰⴳⴳⵯⴰⵊ, ⵓⵛⴰ ⴰⴷ ⵜⵉⵍⵉ ⵜⴻⵎⵎⵓⵔⵜ ⵜⴻⵅⵡⴰ ⴰⵟⵟⴰⵙ.

13 ⵎⴰⵛⴰ ⴰⴷ ⴷⴰⵢⴻⵙ ⵜⴻⵇⵇⵉⵎ ⵄⴰⴷ ⵉⵛⵜ ⵏ ⵜⴻⵄⵛⴰⵔⵜ, ⵎⴰⵛⴰ ⵓⵍⴰ ⴷ ⵎⴰⵏ ⴰⵢⴰ ⴰⴷ ⵜᵉⵜⵜⵡⴰⵛⵛ, ⵎⴰⵛⴰ ⴰⵎ ⵎⴰⵎⵎⴻⵛ ⵖⴰⵔ ⵜⵛⴻⵊⵊⴰⵔⵜ ⵏ ⵢⵉⴳⴳ ⵓ ⵖⴰⵔ ⵜⵛⴻⵊⵊⴰⵔⵜ ⵏ ⵍⴱⴻⴵⵓⴹ ⴰⵡⴰⵔⵏⵉ ⵍⴰⵎⵉ ⵜⴻⵏⵜ ⵉ ⵖⴰ ⵥⴻⴷⵎⴻⵏ, ⴰⴷ ⵉⵇⵇⵉⵎ ⵄⴰⴷ ⵊⵊⴷⴻⵄ, ⴰⵎⵎⵓ ⵉ ⵖⴰ ⵢⵉⵍⵉ ⵊⵊⴷⴻⵄ ⵏⵏⴻⵙ ⴷ ⵥⵥⴰⵔⵉⵄⴻⵜ ⵜⴰⵎⵇⴻⴷⴷⴻⵙⵜ.”