1 ⴰⵡⴰⵔⵏⵉ ⵍⴰⵎⵉ ⵉⵜⵜⵡⴰⴽⴻⵎⵎⴻⵍ ⵎⴰⵏ ⴰⵢⴰ ⵎⴰⵔⵔⴰ, ⵓⵙⵉⵏ-ⴷⴷ ⵖⴰⵔⵉ ⵍⵃⵓⴽⴽⴰⵎ, ⵏⵏⴰⵏ: “ⵍⴳⴻⵏⵙ ⵏ ⵉⵙⵔⴰⵉⵍ ⴷ ⵉⴽⴻⵀⵀⴰⵏⴻⵏ ⴷ ⵉⵍⴰⵡⵉⵢⵢⴻⵏ ⵡⴰⵔ ⵇⵇⵉⵎⴻⵏ ⵜⵜⵡⴰⵎⵙⴻⴱⴹⴰⵏ ⵅ ⵍⴻⴳⵏⵓⵙ ⵏ ⵜⴻⵎⵎⵓⵔⴰ-ⵢⴰ, ⵎⴰⵖⴰⵔ ⵊⵊⵄⴰⵢⴻⴼ ⵏⵙⴻⵏ ⴰⵎ ⵜⵉⵏⵏⵉ ⵏ ⵉⴽⴻⵏⵄⴰⵏⵉⵢⵢⴻⵏ ⴷ ⵉⵃⵉⵜⵜⵉⵢⵢⴻⵏ ⴷ ⵉⴼⵉⵔⵉⵥⵉⵢⵢⴻⵏ ⴷ ⵉⵢⴰⴱⵓⵙⵉⵢⵢⴻⵏ ⴷ ⴰⵢⵜ ⵏ ⵄⴰⵎⵎⵓⵏ ⴷ ⴰⵢⵜ ⵏ ⵎⵓ’ⴰⴱ ⴷ ⵉⵎⵉⵚⵔⵉⵢⵢⴻⵏ ⴷ ⵉⵎⵓⵔⵉⵢⵢⴻⵏ. 2 ⵏⵉⵜⵏⵉ ⵉⵡⵢⴻⵏ ⵥⴻⴳ ⵢⴻⵙⵙⵉⵜⵙⴻⵏ ⵜⵉⵎⵖⴰⵔⵉⵏ ⵉ ⵢⵉⵅⴻⴼ ⵏⵙⴻⵏ ⵓ ⵉ ⵉⵃⴻⵏⵊⵉⵔⴻⵏ ⵏⵙⴻⵏ ⴰⵍⴰⵎⵉ ⵚⵓⵔⴻⵏ ⵥⵥⴰⵔⵉⵄⴻⵜ ⴷ ⵜⴰⵎⵇⴻⴷⴷⴰⵙⵜ ⵙ ⵍⴻⴳⵏⵓⵙ ⵏ ⵜⴻⵎⵎⵓⵔⴰ-ⵢⴰ, ⵡⴰⵀ, ⴰⴼⵓⵙ ⵏ ⵍⵃⵓⴽⴽⴰⵎ ⴷ ⵉⵎⴹⴻⴱⴱⴰⵔⴻⵏ ⵜⵓⵖⴰ-ⵜ ⴷ ⴰⵎⴻⵥⵡⴰⵔⵓ ⴷⵉ ⵍⴻⵖⴷⴰⵔ-ⴰ.”

3 ⵓⵎⵉ ⵙⵍⵉⵖ ⴰⵢⴰ, ⵛⴰⵔⵔⴳⴻⵖ ⴰⵔⵔⵓⴹ ⵉⵏⵓ ⴷ ⵓⵙⴻⵍⵀⴰⵎ ⵉⵏⵓ, ⵇⴻⵍⵄⴻⵖ-ⴷⴷ ⴰⵛⴻⵡⵡⴰⴼ ⵏ ⵓⵥⴻⴵⵉⴼ ⵓ ⵏ ⵜⵎⴰⵔⵜ ⵓⵛⴰ ⵇⵇⵉⵎⴻⵖ ⵊⴻⵄⵄⴰⵔⴻⵖ. 4 ⵅⴻⵏⵏⵉ ⵎⵓⵏⴻⵏ-ⴷⴷ ⵅⴰⴼⵉ ⵎⴰⵔⵔⴰ, ⵉⵏⵏⵉ ⵉⵜⵜⴰⵔⵊⵉⵊⴻⵏ ⵥⵉ ⴰⵔⴻⴱⴱⵉ ⵏ ⵉⵙⵔⴰⵉⵍ, ⴷⵉ ⵙⵙⵉⴱⴱⴻⵜ ⵏ ⵍⴻⵖⴷⴰⵔ ⵏ ⵉⵎⴻⵏⴼⵉⵢⵢⴻⵏ, ⵎⴰⵛⴰ ⵏⴻⵛⵛ ⵇⵇⵉⵎⴻⵖ ⵊⴻⵄⵄⴰⵔⴻⵖ ⴰⵍ ⵍⵡⴻⵇⵜ ⵏ ⵜⵖⴰⵔⵚⵜ ⵏ ⵜⵎⴻⴷⴷⵉⵜ. 5 ⵖⴰⵔ ⵜⵖⴰⵔⵚⵜ ⵏ ⵜⵎⴻⴷⴷⵉⵜ ⴼⴰⵇⴻⵖ-ⴷⴷ ⵥⴻⴳ ⵡⴻⵊⵄⴰⵔ ⵉⵏⵓ ⵙ ⵡⴰⵔⵔⵓⴹ ⵉⵏⵓ ⴷ ⵓⵙⴻⵍⵀⴰⵎ ⵉⵏⵓ ⵉⵛⴰⵔⵔⴳⴻⵏ ⵓⵛⴰ ⵓⴹⴰⵔⴻⵖ ⵅ ⵉⴼⴰⴷⴷⴻⵏ ⵓ ⵙⵙⵡⵉⵥⵥⴹⴻⵖ ⵉⴼⴰⵙⵙⴻⵏ ⵉⵏⵓ ⵖⴰⵔ ⵙⵉⴷⵉ, ⴰⵔⴻⴱⴱⵉ ⵉⵏⵓ.

6 ⵏⵏⵉⵖ: “ⴰⵔⴻⴱⴱⵉ ⵉⵏⵓ, ⵏⴻⵛⵛ ⵙⴻⴷⵃⵉⵖ ⵓ ⵜⵜⵡⴰⵙⴱⴻⵀⴷⵍⴻⵖ ⴰⵍ ⵡⴰⵔ ⵥⵄⵉⵎⴻⵖ ⴰⴷ ⵖⴰⵔⴻⴽ ⴷⴷ-ⵙⵙⴳⴻⵄⵄⴷⴻⵖ ⵓⴷⴻⵎ ⵉⵏⵓ, ⴰ ⴰⵔⴻⴱⴱⵉ ⵉⵏⵓ, ⵎⵉⵏⵥⵉ ⵍⵎⵓⵄⵚⵉⵢⵢⴻⵜ ⵏⵏⴻⵖ ⵜⴻⵎⵖⴰⵔ ⴰⵏⴻⵖ ⵅ ⵓⵥⴻⴵⵉⴼ ⵓ ⴰⵎⴰⵔⵡⴰⵙ ⵏⵏⴻⵖ ⵉⵎⵖⴰⵔ ⴰⵍ ⴰⵊⴻⵏⵏⴰ. ^■   7 ⵣⴻⴳ ⵡⵓⵙⵙⴰⵏ ⵏ ⵉⴱⴰⴱⴰⵜⴻⵏ ⵏⵏⴻⵖ ⵖⴰⵔⴻⵙ ⴰⵍ ⴰⵙⵙ-ⴰ ⴰⵇⴰ ⴰⵏⴻⵖ ⴷⴻⴳ ⵓⵎⴰⵔⵡⴰⵙ ⴷ ⴰⵎⴻⵇⵇⵔⴰⵏ ⵓ ⵅ ⵍⵎⵓⵄⵚⵉⵢⵢⴻⵜ ⵏⵏⴻⵖ ⵏⴻⵎⵎⴻⵡⵛ ⵏⴻⵛⵛⵉⵏ ⴷ ⵉⵊⴻⴵⵉⴷⴻⵏ ⵏⵏⴻⵖ ⴷ ⵉⴽⴻⵀⵀⴰⵏⴻⵏ ⵏⵏⴻⵖ ⴷⴻⴳ ⵉⴼⴰⵙⵙⴻⵏ ⵏ ⵉⵊⴻⴵⵉⴷⴻⵏ ⵏ ⵜⴻⵎⵎⵓⵔⴰ, ⴰⵇⴰ ⵏⴻⵎⵎⴻⵡⵛ ⵉ ⵙⵙⵉⴼ, ⵉ ⵜⵎⴻⵃⴱⴰⵙⵜ, ⵉ ⵓⴽⴻⵛⵛⴻⴹ ⵓ ⵉ ⵍⴻⴼⴹⵉⵃⴻⵜ ⵅ ⵡⵓⴷⵎⴰⵡⴻⵏ ⵏⵏⴻⵖ, ⴰⵎ ⵎⴰⵎⵎⴻⵛ ⵉ ⵜⴻⴵⴰ ⴰⵙⵙ-ⴰ. 8 ⵍⴻⵅⵅⵓ ⵜⵓⵖⴰ ⴷⵉⵏ ⵉⵛⵜ ⵏ ⵜⵥⴻⵃⵥⵉⵃⵜ ⴷ ⵜⴰⵎⴻⵥⵢⴰⵏⵜ ⵏ ⴰⵔⴹⴰ ⵏ ⵙⵉⴷⵉ, ⴰⵔⴻⴱⴱⵉ ⵏⵏⴻⵖ, ⵃⵉⵎⴰ ⴰⴷ ⴰⵏⴻⵖ ⵢⴻⵊⵊ ⵛⴰ ⵏ ⵢⵉⵏⵏⵉ ⵉⵏⵏⴻⵊⵎⴻⵏ ⵓ ⵃⵉⵎⴰ ⴰⴷ ⴰⵏⴻⵖ ⵉⵡⵛ ⵉⵊⵊ ⵏ ⵍⴻⵡⵜⴻⴷ ⴷⵉ ⵣⵥⴰⵡⴻⵛⵜ ⵜⴰⵎⴻⵇⵇⵔⴰⵏⵜ ⵏⵏⴻⵙ ⵉⵇⴻⴷⴷⵙⴻⵏ ⵓ ⵜⴼⴰⵡⵜ ⵉ ⵜⵉⵟⵟⴰⵡⵉⵏ ⵏⵏⴻⵖ, ⴰ ⴰⵔⴻⴱⴱⵉ ⵏⵏⴻⵖ, ⵓ ⵃⵉⵎⴰ ⴰⴷ ⴰⵏⴻⵖ ⴷⴷ-ⵢⴰⵔⵔ ⵏⵏⴻⴼⵙ ⵛⵡⴰⵢⵜ ⴷⵉ ⵜⴻⵙⵎⵓⵖⵉ ⵏⵏⴻⵖ. 9 ⴰⵇⴰ ⵏⴻⵛⵛⵉⵏ ⴷ ⵉⵙⴻⵎⵖⴰⵏ, ⵎⴰⵛⴰ ⴷⵉ ⵜⴻⵙⵎⵓⵖⵉ ⵏⵏⴻⵖ ⵡⴰⵔ ⴷⴰⵢⵏⴻⵖ ⵉⵙⵎⵉⵃ ⴰⵔⴻⴱⴱⵉ ⵏⵏⴻⵖ, ⵎⴰⵛⴰ ⵏⴻⵜⵜⴰ ⵉⴷⵍⴰ ⴰⵏⴻⵖ ⵙ ⵜⵎⴻⵅⵙⵉⵡⵜ ⵏⵏⴻⵙ ⵉⵛⴻⵡⵡⴰⵔⴻⵏ ⵥⵥⴰⵜ ⵉ ⵡⵓⴷⴻⵎ ⵏ ⵉⵊⴻⴵⵉⴷⴻⵏ ⵏ ⵍⴼⵓⵔⵙ ⵎⴰⵃⴻⵏⴷ ⴰⴷ ⴰⵏⴻⵖ ⴷⴷ-ⵢⴰⵔⵔ ⵏⵏⴻⴼⵙ ⵉ ⵓⵙⴱⴻⴷⴷⵉ ⵏ ⵜⴰⴷⴷⴰⵔⵜ ⵏ ⴰⵔⴻⴱⴱⵉ ⵜⵡⴰⵍⴰⵜ ⵏⵏⴻⵖⵏⵉ ⵓ ⵉ ⵡⴻⵄⴷⴰⵍ ⵏ ⵍⵅⵉⵔⴱⴰⵜ ⵓ ⵃⵉⵎⴰ ⴰⴷ ⴰⵏⴻⵖ ⵉⵡⵛ ⵉⵊⵊ ⵏ ⵡⴻⵎⵛⴰⵏ ⵉⵜⵜⵡⴰⵏⵏⴹⴻⵏ ⵙ ⵍⴻⵃⵢⵓⴹ ⴷⵉ ⵢⴰⵀⵓⴷⴰ ⵓ ⴷⵉ ⵓⵔⵛⴰⵍⵉⵎ.

10 ⵓⵛⴰ ⵍⴻⵅⵅⵓ, ⵎⵉⵏ ⵖⴰ ⵏⵉⵏⵉ ⴰⵡⴰⵔⵏⵉ ⵓⵢⴰ ⵄⴰⴷ, ⴰ ⴰⵔⴻⴱⴱⵉ ⵏⵏⴻⵖ, ⵎⵉⵏⵥⵉ ⵏⴻⵙⵎⴻⵃ ⴷⵉ ⵍⵓⵎⵓⵔⴰⵜ ⵏⵏⴻⴽ,

11 ⵜⵉⵏⵏⵉ ⵜⵓⵎⵓⵔⴻⴷ ⵙ ⵜⵙⴻⵅⵅⴰⵔⵜ ⵏ ⵉⵎⵙⴻⵅⵅⴰⵔⴻⵏ ⵏⵏⴻⴽ, ⵉⵏⴰⴱⵉⵢⵢⴻⵏ, ⵉⵏⵏⵉ ⵉⵏⵏⴰⵏ: ‘ⵜⴰⵎⵎⵓⵔⵜ ⵜⴻⵏⵏⵉ ⵉ ⵖⴰ ⵜⴰⴷⴼⴻⵎ ⵎⴰⵃⴻⵏⴷ ⴰⴷ ⵜⵜ ⵜᵉⵟⵟⴼⴻⵎ ⴷ ⵍⵡⴰⵔⵜ, ⴷ ⵉⵛⵜ ⵏ ⵜⴻⵎⵎⵓⵔⵜ ⵜᵉⵜⵜⵡⴰⵙⴻⵅⵎⴻⵊ ⵙ ⵍⴻⵅⵎⴻⵊ ⵏ ⵍⴻⴳⵏⵓⵙ ⵏ ⵜⴻⵎⵎⵓⵔⴰ, ⵙ ⵊⵊⵄⴰⵢⴻⴼ ⵏⵙⴻⵏ ⵉ ⵥⵉ ⵜⵜ ⵛⵛⵓⵔⴻⵏ ⵥⵉ ⵟⵟⴰⵔⴼ ⴰⵍ ⵟⵟⴰⵔⴼ ⵏⵏⴻⵖⵏⵉ ⵙ ⵜⴻⵅⵎⵓⵊⵉ ⵏⵙⴻⵏ. ^■  

12 ⵅⴻⵏⵏⵉ ⵍⴻⵅⵅⵓ, ⵡⴰⵔ ⵜⵜⵉⵛⴻⵎ ⵜⵉⵃⴻⵏⵊⵉⵔⵉⵏ ⵏⵡⴻⵎ ⴷ ⵜⵉⵎⵖⴰⵔⵉⵏ ⵉ ⵉⵃⴻⵏⵊⵉⵔⴻⵏ ⵏⵙⴻⵏ, ⵓⵍⴰ ⴷ ⵜⵉⵃⴻⵏⵊⵉⵔⵉⵏ ⵏⵙⴻⵏ ⵡⴰⵔ ⵜⴻⵏⵜ ⵜⵜⵉⵡⵢⴻⵎ ⵉ ⵉⵃⴻⵏⵊⵉⵔⴻⵏ ⵏⵡⴻⵎ ⵓⵛⴰ ⵡⴰⵔ ⴰⵔⴻⵥⵥⵓⵎ ⵅ ⵍⴰⵎⴰⵏ ⵏⵙⴻⵏ ⵏⵉⵖ ⵍⵅⴰⵔ ⵏⵙⴻⵏ ⵉ ⵍⴻⴱⴷⴰ, ⵃⵉⵎⴰ ⴰⴷ ⵜⴷⴻⵡⵍⴻⵎ ⵜⵊⴻⵀⴷⴻⵎ ⵓ ⴰⴷ ⵜⴻⵛⵛⴻⵎ ⵎⵓⵎⵎⵓ ⵏ ⵍⵖⵉⴵⴻⵜ ⵏ ⵜⴻⵎⵎⵓⵔⵜ ⵓ ⴰⴷ ⵜⵜ ⵜⴻⵡⵛⴻⵎ ⴷ ⵍⵡⴰⵔⵜ ⵉ ⵍⴻⴱⴷⴰ ⵉ ⵉⵃⴻⵏⵊⵉⵔⴻⵏ ⵏⵡⴻⵎ.’

13 ⵓⵛⴰ ⴰⵡⴰⵔⵏⵉ ⵎⴰⵔⵔⴰ ⵎⵉⵏ ⵉ ⴷ ⴰⵏⴻⵖ ⵉⵎⵙⴰⵔⴻⵏ ⴷⵉ ⵙⵙⵉⴱⴱⴻⵜ ⵏ ⵜⵎⴻⴳⴳⴰ ⵏⵏⴻⵖ ⵜⵉⵄⴻⴼⴼⴰⵏⵉⵏ ⴷ ⵓⵎⴰⵔⵡⴰⵙ ⵏⵏⴻⵖ ⴰⵎⴻⵇⵇⵔⴰⵏ, ⴰ ⴰⵔⴻⴱⴱⵉ ⵏⵏⴻⵖ, ⴰⵇⴰ ⵛⴻⴽ ⵡⴰⵔ ⴷ ⴰⵏⴻⵖ ⵜⵅⴻⴵⵚⴻⴷ ⵛⴰ ⵎⵖⵉⵔ ⴷⵔⵓⵙ ⵡⴰⵀⴰ ⴰⵍⴰⵎⵉ ⵡⴰⵔ ⵏⴻⵜⵜⵡⴰⵀⴻⵍⵍⴻⴽ ⵛⴰ ⵙ ⵍⵎⵓⵄⵚⵉⵢⵢⴻⵜ ⵏⵏⴻⵖ ⵓ ⵜⴻⵡⵛⵉⴷ ⴰⵏⴻⵖ ⵉⵏⴰ ⵉⵏⵏⵉ ⵉⵏⵏⴻⵊⵎⴻⵏ.

14 ⵎⴰ ⵏⵥⴻⵎⵎⴰⵔ ⵍⴻⵅⵅⵓ ⴰⴷ ⴷⴷ-ⵏⴻⴷⵡⴻⵍ ⵃⵉⵎⴰ ⴰⴷ ⵏⴰⵔⵥ ⵜⵡⴰⵍⴰ ⵏⵏⴻⵖⵏⵉⵜ ⵜⵉⵡⴻⵚⵚⴰ ⵏⵏⴻⴽ ⵓ ⴰⴷ ⵏⴻⴳⴳ ⴰⴷ ⵏⴻⴷⵡⴻⵍ ⴷ ⵉⴹⴻⴳⴳⵯⴰⵍⴻⵏ ⴰⴽ-ⴷ ⵍⴻⴳⵏⵓⵙ ⵏⵏⵉ ⵉⴳⴳⵉⵏ ⵊⵊⵄⴰⵢⴻⴼ-ⴰ? ⵎⴰ ⵅⴻⵏⵏⵉ ⵛⴻⴽ ⵡⴰⵔ ⵅⴰⵏⴻⵖ ⵜⴻⵙⵄⴰⵔⴻⴷ ⴰⵍⴰⵎⵉ ⵅⴰⵏⴻⵖ ⵉ ⵖⴰ ⵜⴻⵇⴹⵉⴷ ⴰⵍ ⵎⴰⵏⵉ ⵡⴰⵔ ⵉⵜⵜⵖⵉⵎⵉ ⵉⵊⵊ ⵏ ⵍⴱⴰⵇⵉ ⵓⵍⴰ ⴷ ⵡⴻⵏⵏⵉ ⵉⵏⵏⴻⵊⵎⴻⵏ?

15 ⴰ ⵙⵉⴷⵉ, ⴰⵔⴻⴱⴱⵉ ⵏ ⵉⵙⵔⴰⵉⵍ, ⵛⴻⴽ ⴷ ⴰⵎⵙⴻⴳⴳⴻⴷ, ⵎⵉⵏⵥⵉ ⵏⴻⵛⵛⵉⵏ ⴷ ⵉⵏⵏⵉ ⵉⵇⵇⵉⵎⴻⵏ ⵏⵏⴻⵊⵎⴻⵏ ⴰⵎ ⵜⴻⴵⴰ ⴰⵙⵙ-ⴰ. ⴰⵇⴰ ⵏⴻⵛⵛⵉⵏ ⵙ ⵓⵎⴰⵔⵡⴰⵙ ⵉ ⵏⴻⴵⴰ ⵥⵥⴰⵜ ⵉ ⵡⵓⴷⴻⵎ ⵏⵏⴻⴽ, ⵎⵉⵏⵥⵉ ⵓⵍⴰ ⴷ ⵉⵊⵊⴻⵏ ⵡⴰⵔ ⵉⵥⴻⵎⵎⴰⵔ ⴰⴷ ⵉⴱⴻⴷⴷ ⵥⵥⴰⵜ ⵉ ⵡⵓⴷⴻⵎ ⵏⵏⴻⴽ ⴷⵉ ⵙⵙⵉⴱⴱⴻⵜ-ⴰ.”