1 ⵅⴻⵏⵏⵉ ⵉⵙⵙⵓⴼⴼⴻⵖ ⵓⵊⴻⴵⵉⴷ ⴷⴰⵔⵉⵢⵓⵙ ⵍⵓⵎⵓⵔ ⵓⵛⴰ ⴰⵔⵥⵓⵏ ⴷⵉ ⵜⴰⴷⴷⴰⵔⵜ ⵏ ⵉⴷⵍⵉⵙⴻⵏ ⵉⵜⵜⵡⴰⵏⵏⴹⴻⵏ ⵎⴰⵏⵉ ⵜⵜⵡⴰⵅⴻⵎⵎⵍⴻⵏⵜ ⵜⵅⵓⴱⴰⵢ ⴷⵉⵏ ⴷⵉ ⴱⴰⴱⵉⵍ. 2 ⵅⴻⵏⵏⵉ ⵉⵜⵜⵡⴰⴼ ⴷⵉ ⴰⵃⵎⴰⵜⴰ ⵉⵊⵊ ⵏ ⵡⴻⴷⵍⵉⵙ ⵉⵜⵜⵡⴰⵏⵏⴹⴻⵏ ⴷⵉ ⵍⵇⴻⵍⵄⴰ ⵜⴻⵏⵏⵉ ⵉⴵⴰⵏ ⴷⵉ ⵍⵄⴰⵎⴰⵍⴰ ⵏ ⵎⵉⴷⵢⴰ ⵓ ⴷⴰⵢⴻⵙ ⵜⵓⵖⴰ ⵜⵉⵔⴰ ⴰⵢⴰ ⵏ ⵍⵉⴷⴰⵔⴻⵜ:

3 “ⴷⴻⴳ ⵓⵙⴻⴳⴳⵯⴰⵙ ⴰⵎⴻⵥⵡⴰⵔⵓ ⵏ ⵓⵊⴻⴵⵉⴷ ⴽⵓⵔⴰⵛ, ⵉⵙⵙⵓⴼⴼⴻⵖ ⴽⵓⵔⴰⵛ ⵍⵓⵎⵓⵔ-ⴰ: ‘ⵅ ⵜⴰⴷⴷⴰⵔⵜ ⵏ ⴰⵔⴻⴱⴱⵉ ⴷⵉ ⵓⵔⵛⴰⵍⵉⵎ. ⴰⵇⴰ ⵉⵜⵜⵅⴻⵚⵚⴰ ⴰⴷ ⵜᵉⵜⵜⵡⴰⴱⵏⴰ ⵜⴰⴷⴷⴰⵔⵜ ⵏⵏⵉ ⵜⵡⴰⵍⴰ ⵏⵏⴻⵖⵏⵉⵜ ⴷⴻⴳ ⵡⴻⵎⵛⴰⵏ ⵎⴰⵏⵉ ⵇⴻⴷⴷⵎⴻⵏ ⵜⵉⵖⴰⵔⵚⴰ ⵓ ⵉⵜⵜⵅⴻⵚⵚⴰ ⴰⴷ ⵜⵜⵡⴰⵙⴳⴻⵄⵄⴷⴻⵏ ⴷⵙⵓⵙⴰ ⵏⵏⴻⵙ. ⵍⵓⵄⵍⴰ ⵏⵏⴻⵙ ⴰⴷ ⵜⵉⵍⵉ ⵙⴻⵜⵜⵉⵏ ⵏ ⵉⵖⴰⴵⴻⵏ, ⵜⵉⵔⵓ ⵏⵏⴻⵙ ⵙⴻⵜⵜⵉⵏ ⵏ ⵉⵖⴰⴵⴻⵏ, 4 ⵙ ⵜⵍⴰⵜⴰ ⵏ ⵍⴻⵙⴷⵓⴷ ⵏ ⵜⵚⵓⴹⴰⵔ ⵜⵉⵎⴻⵇⵇⵔⴰⵏⵉⵏ ⴷ ⵉⵊⵊ ⵏ ⵙⵙⴻⴷⴷ ⵏ ⵜⴻⴼⵍⴻⵡⵜ ⴷ ⵊⴷⵉⴷ, ⵓ ⵎⵉⵏ ⴷⵉⵏ ⵉⵅⴻⵚⵚⴻⵏ ⴰⴷ ⵥⵥⴰⵢⴻⵙ ⵜᵉⵜⵜⵡⴰⴽⴻⵍⵍⴻⴼ ⵥⵉ ⵜⴰⴷⴷⴰⵔⵜ ⵏ ⵓⵊⴻⴵⵉⴷ. 5 ⵓⵍⴰ ⴷ ⵍⴻⵇⵛⵓⵄ ⵏ ⵡⵓⵔⴻⵖ ⴷ ⵏⵏⵓⵇⴰⵔⵜ ⵏ ⵜⴰⴷⴷⴰⵔⵜ ⵏ ⴰⵔⴻⴱⴱⵉ, ⵉⵏⵏⵉ ⵉⴽⴽⴻⵙ ⵏⴰⴱⵓⵅⴰⴷⵏⴰⵚⵚⴰⵔ ⵥⵉ ⵣⵥⴰⵡⴻⵛⵜ ⵜⴰⵎⴻⵇⵇⵔⴰⵏⵜ ⵏⵏⵉ ⵉⴵⴰⵏ ⴷⵉ ⵓⵔⵛⴰⵍⵉⵎ ⵓ ⵉⵡⵢⵉ ⵜⴻⵏ ⵖⴰⵔ ⴱⴰⴱⵉⵍ, ⴰⴷ ⵜⵜⵡⴰⵔⵔⴻⵏ ⵓ ⵎⴰⵏ ⴰⵢⴰ ⴰⴷ ⴷⴷ-ⵉⴷⵡⴻⵍ ⵖⴰⵔ ⵣⵥⴰⵡⴻⵛⵜ ⵜⴰⵎⴻⵇⵇⵔⴰⵏⵜ ⵏⵏⵉ ⵉⴵⴰⵏ ⴷⵉ ⵓⵔⵛⴰⵍⵉⵎ, ⵖⴰⵔ ⵡⴻⵎⵛⴰⵏ ⵏⵏⴻⵙ ⵓⵛⴰ ⵛⴻⴽ ⴰⴷ ⵜⴻⵎⵎⴰⵔⵙⴻⴷ ⴰⵢⴰ ⴷⵉ ⵜⴰⴷⴷⴰⵔⵜ ⵏ ⴰⵔⴻⴱⴱⵉ.’

6 ⵙ ⵎⴰⵏ ⴰⵢⴰ, ⵜⴰⵜⵏⴰⵢ, ⵍⵡⴰⵍⵉ ⵏ ⵜⴻⵎⵎⵓⵔⵜ ⴰⵖⵉⵔⵉⵏ ⵉ ⵢⴻⵖⵥⴰⵔ, ⵛⴰⵜⴰⵔ-ⴱⵓⵥⵏⴰⵢ ⴷ ⵉⵇⵇⵔⵉⵏⴻⵏ ⵏⵏⴻⵙ ⴷⵉ ⵍⵅⴻⴷⵎⴻⵜ, ⵉⵇⵇⵔⵉⵏⴻⵏ ⵏⵏⵉ ⵉⴵⴰⵏ ⴰⵖⵉⵔⵉⵏ ⵉ ⵢⴻⵖⵥⴰⵔ, ⴰⴳⴳⵯⴻⵊⴻⵎ ⵙⵙⴻⵏⵏⵉ! 7 ⵊⵊⴻⵎ ⵍⵅⴻⴷⵎⴻⵜ ⴷⵉ ⵟⵟⵡⴻⵄ ⵏ ⵜⴰⴷⴷⴰⵔⵜ-ⴰ ⵏ ⴰⵔⴻⴱⴱⵉ, ⵃⵉⵎⴰ ⵍⵡⴰⵍⵉ ⵏ ⵡⵓⴷⴰⵢⴻⵏ ⴰⴽ-ⴷ ⵉⵎⵖⴰⵔⴻⵏ ⵏ ⵡⵓⴷⴰⵢⴻⵏ ⴰⴷ ⴱⵏⴰⵏ ⵜⴰⴷⴷⴰⵔⵜ-ⴰ ⵏ ⴰⵔⴻⴱⴱⵉ ⵜⵡⴰⵍⴰ ⵏⵏⴻⵖⵏⵉⵜ ⴷⴻⴳ ⵡⴻⵎⵛⴰⵏ ⵏⵏⴻⵙ.

8 ⵄⴰⵡⴻⴷ ⵉⵜⵜⵡⴰⵙⵙⵓⴼⴼⴻⵖ-ⴷⴷ ⵥⵥⴰⵢⵉ ⵍⵓⵎⵓⵔ ⵅ ⵎⵉⵏ ⵉⵜⵜⵅⴻⵚⵚⴰ ⴰⴷ ⵜⴻⴳⴳⴻⵎ ⵉ ⵉⵎⵖⴰⵔⴻⵏ ⵏ ⵡⵓⴷⴰⵢⴻⵏ-ⴰ ⵎⴰⵃⴻⵏⴷ ⴰⴷ ⵜᵉⵜⵜⵡⴰⴱⵏⴰ ⵜⴰⴷⴷⴰⵔⵜ-ⴰ ⵏ ⴰⵔⴻⴱⴱⵉ ⵜⵡⴰⵍⴰⵜ ⵏⵏⴻⵖⵏⵉ. ⵣⴻⴳ ⵡⴰⴳⵍⴰ ⵏ ⵓⵊⴻⴵⵉⴷ, ⵥⵉ ⵍⵊⵉⵥⵢⴰ ⵏ ⵜⴻⵎⵎⵓⵔⵜ ⴰⵖⵉⵔⵉⵏ ⵉ ⵉⵖⵥⴰⵔ, ⴰⴷ ⵉⵜⵜⵡⴰⵅⴻⴵⴻⵚ ⵙ ⵛⴹⴰⵔⴻⵜ ⵎⵉⵏ ⵉⵜⵜⵅⴻⵚⵚⴻⵏ ⵉⵔⵢⴰⵥⴻⵏ-ⴰ ⵎⴰⵃⴻⵏⴷ ⵡⴰⵔ ⵜᵉⵜⵜⴱⴻⴷⴷⵉ ⵛⴰ ⵍⵅⴻⴷⵎⴻⵜ. 9 ⵓ ⵎⵉⵏ ⵉⵜⵜⵅⴻⵚⵚⴻⵏ ⵥⴻⴳ ⵉⵢⴻⵏⴷⵓⵥⴻⵏ ⴷ ⵉⵛⴰⵔⵔⵉⵢⵢⴻⵏ ⴷ ⵉⵥⵎⴰⵔⴻⵏ ⴷ ⵜⵖⴰⵔⵚⵉ ⵏ ⵡⴻⵛⵎⴰⴹ ⵉ ⴰⵔⴻⴱⴱⵉ ⵏ ⵉⵊⴻⵏⵡⴰⵏ, ⵓ ⵥⴻⴳ ⵉⵔⴷⴻⵏ ⴷ ⵜⵎⴻⴵⴰⵃⵜ ⴷ ⴱⵉⵏⵓ ⴷ ⵥⵥⴻⵛⵜ, ⵄⵍⴰⵃⵙⴰⴱ ⴰⵡⴰⵍ ⵏ ⵉⴽⴻⵀⵀⴰⵏⴻⵏ ⵉ ⵉⴵⴰⵏ ⴷⵉ ⵓⵔⵛⴰⵍⵉⵎ, ⴰⴷ ⴰⵙⴻⵏ ⵉⵎⵎⴻⵡⵛ ⵥⴻⴳ ⵡⴰⵙⵙ ⵖⴰⵔ ⵡⴰⵙⵙ, ⵃⵉⵎⴰ ⵡⴰⵔ ⵉⵜⵜⵅⵉⵚⵚⴰ ⵓⵍⴰ ⴷ ⵡⴰⵍⵓ,

10 ⵃⵉⵎⴰ ⴰⴷ ⵇⴻⴷⴷⵎⴻⵏ ⵉⵛⵜ ⵏ ⵍⴻⴼⵡⴰⵃⴻⵜ ⵉⵜⵜⴼⵓⵃⴻⵏ ⵉ ⴰⵔⴻⴱⴱⵉ ⵏ ⵉⵊⴻⵏⵡⴰⵏ ⵓⵛⴰ ⴰⴷ ⵥⵥⴰⴵⴻⵏ ⴷⵉ ⵟⵟⵡⴻⵄ ⵏ ⵜⵓⴷⴰⵔⵜ ⵏ ⵓⵊⴻⴵⵉⴷ ⴷ ⵉⵃⴻⵏⵊⵉⵔⴻⵏ ⵏⵏⴻⵙ.

11 ⵉⵜⵜⵡⴰⵙⵙⵓⴼⴼⴻⵖ-ⴷⴷ ⵥⵥⴰⵢⵉ ⵍⵓⵎⵓⵔ ⵃⵉⵎⴰ ⴽⵓⵍ ⵉⵊⵊⴻⵏ ⵡⴻⵏⵏⵉ ⵉ ⵖⴰ ⵉⴱⴻⴷⴷⵍⴻⵏ ⵜⴰⵡⵚⴻⵢⵢⴻⵜ-ⴰ, ⴰⴷ ⵉⵜⵜⵡⴰⴽⴽⴻⵙ ⵉⵊⵊ ⵏ ⵡⴻⵄⵎⵓⴷ ⵥⵉ ⵜⴰⴷⴷⴰⵔⵜ ⵏⵏⴻⵙ ⴰⴷ ⵜ ⵙⵙⴱⴻⴷⴷⴻⵏ, ⴰⴷ ⵅⴰⵙ ⵉⵜⵜⵡⴰⵢⴻⵍ ⵏⴻⵜⵜⴰ ⵓⵛⴰ ⴷⵉ ⵙⵙⵉⴱⴱⴻⵜ-ⴰ ⴰⴷ ⵜⴻⴷⵡⴻⵍ ⵜⴰⴷⴷⴰⵔⵜ ⵏⵏⴻⵙ ⴷ ⵉⵛⵜ ⵏ ⵜⵥⵓⴱⴰⵛⵜ ⵏ ⵍⴻⵖⴱⴰⵔ.

12 ⴻⵊⵊ ⴰⴷ ⵉⵀⴷⴻⵎ ⴰⵔⴻⴱⴱⵉ, ⵡⴻⵏⵏⵉ ⴷⵉⵏ ⵉⵙⵙⴻⵥⴷⵖⴻⵏ ⵉⵙⴻⵎ ⵏⵏⴻⵙ, ⵎⴰⵔⵔⴰ ⵉⵊⴻⴵⵉⴷⴻⵏ ⴷ ⵍⴻⴳⵏⵓⵙ ⵏⵏⵉ ⵉ ⵖⴰ ⵉⵙⵙⵡⵉⵥⵥⴹⴻⵏ ⴰⴼⵓⵙ ⵏⵙⴻⵏ ⵎⴰⵃⴻⵏⴷ ⴰⴷ ⴱⴻⴷⴷⵍⴻⵏ ⵏⵉⵖ ⴰⴷ ⴰⵔⴻⴷⴷⴵⴻⵏ ⵜⴰⴷⴷⴰⵔⵜ ⵏ ⴰⵔⴻⴱⴱⵉ ⵏⵏⵉ ⵉⴵⴰⵏ ⴷⵉ ⵓⵔⵛⴰⵍⵉⵎ. ⵏⴻⵛⵛ ⴷⴰⵔⵉⵢⵓⵙ, ⴷ ⵡⴻⵏⵏⵉ ⵉⵡⵛⵉⵏ ⵍⵓⵎⵓⵔ. ⴻⵊⵊ ⴰⴷ ⵉⵜⵜⵡⴰⴳⴳ ⵎⴰⵏ ⴰⵢⴰ ⵙ ⵛⴹⴰⵔⴻⵜ.”

13 ⵅⴻⵏⵏⵉ ⵜⴰⵜⵏⴰⵢ, ⵍⵡⴰⵍⵉ ⵏ ⵜⴻⵎⵎⵓⵔⵜ ⴰⵖⵉⵔⵉⵏ ⵉ ⵉⵖⵥⴰⵔ ⴰⴽ-ⴷ ⵛⴰⵜⴰⵔ-ⴱⵓⵥⵏⴰⵢ ⴷ ⵉⵇⵔⵉⵏⴻⵏ ⵏⵏⴻⵙ ⴷⵉ ⵍⵅⴻⴷⵎⴻⵜ ⴳⴳⵉⵏ ⵙ ⵛⴹⴰⵔⴻⵜ ⵄⵍⴰⵃⵙⴰⴱ ⵍⵓⵎⵓⵔ ⵉ ⵜⵓⵖⴰ ⴷⴷ-ⵉⵙⵙⴻⴽⴽ ⵓⵊⴻⴵⵉⴷ ⴷⴰⵔⵉⵢⵓⵙ.

14 ⴱⵏⴰⵏ ⵉⵎⵖⴰⵔⴻⵏ ⵏ ⵡⵓⴷⴰⵢⴻⵏ, ⵓ ⵏⵉⵜⵏⵉ ⴰⵔⵏⵉⵏ ⵎⵍⵉⵃ ⴷⵉ ⵍⴻⴱⵏⵉ ⵓⵎⵉ ⵜⵓⵖⴰ ⵉⵜⵜⵏⴻⴱⴱⴰ ⵃⴰⴳⴳⴰⵢ ⴷ ⵣⴰⴽⴰⵔⵉⵢⵢⴰ, ⵎⵎⵉⵙ ⵏ ⵄⵉⴷⴷⵓ. ⵏⵉⵜⵏⵉ ⴱⵏⴰⵏ ⵓ ⴽⴻⵎⵎⵍⴻⵏ ⵜⵜ ⵄⵍⴰⵃⵙⴰⴱ ⵍⵓⵎⵓⵔ ⵏ ⴰⵔⴻⴱⴱⵉ ⵏ ⵉⵙⵔⴰⵉⵍ ⵓ ⵄⵍⴰⵃⵙⴰⴱ ⵍⵓⵎⵓⵔ ⵏ ⴽⵓⵔⴰⵛ ⴷ ⴷⴰⵔⵉⵢⵓⵙ ⴷ ⴰⵔⵜⴰⵃⵛⴰⵙⵜⴰ, ⴰⵊⴻⴵⵉⴷ ⵏ ⵍⴼⵓⵔⵙ.

15 ⵜⴻⵜⵜⵡⴰⴽⴻⵎⵎⴻⵍ ⵜⴰⴷⴷⴰⵔⵜ ⴷⴻⴳ ⵡⴰⵙⵙ ⵡⵉⵙⵙ ⵜⵍⴰⵜⴰ ⵏ ⵓⵢⵓⵔ ⴰⴷⴰⵔ, ⴰⵇⴰ-ⵜ ⴷ ⴰⵙⴻⴳⴳⵯⴰⵙ ⵡⵉⵙⵙ ⵙⴻⵜⵜⴰ ⵏ ⵜⴳⴻⵍⴷⴰ ⵏ ⵓⵊⴻⴵⵉⴷ ⴷⴰⵔⵉⵢⵓⵙ.

16 ⴰⵢⵜ ⵏ ⵉⵙⵔⴰⵉⵍ, ⵉⴽⴻⵀⵀⴰⵏⴻⵏ ⴷ ⵉⵍⴰⵡⵉⵢⵢⴻⵏ ⴷ ⴰⵢⵜ ⵏ ⵍⵎⴻⵏⴼⴰ ⵉ ⵉⵇⵇⵉⵎⴻⵏ, ⴷⴻⵛⵛⵏⴻⵏ ⵜⴰⴷⴷⴰⵔⵜ-ⴰ ⵏ ⴰⵔⴻⴱⴱⵉ ⵙ ⵍⴻⴼⵔⴰⵃⴻⵜ.

17 ⵉ ⵓⴷⴻⵛⵛⴻⵏ ⵏ ⵜⴰⴷⴷⴰⵔⵜ ⵏ ⴰⵔⴻⴱⴱⵉ ⵉⵡⵢⴻⵏ ⵏⵉⵜⵏⵉ ⵎⵢⴰ ⵏ ⵉⴼⵓⵏⴰⵙⴻⵏ, ⵎⵉⵜⴰⵢⴻⵏ ⵏ ⵉⵛⴰⵔⵔⵉⵢⵢⴻⵏ ⴷ ⴰⵔⴻⴱⵄⴰ-ⵎⵢⴰ ⵏ ⵉⵥⵎⴰⵔⴻⵏ ⴷ ⵜⴰⵖⴰⵔⵚⵜ ⵓⵍⴰ ⴷ ⵜⴻⵏⵄⴰⵛ ⵏ ⵉⵎⵓⵢⴰⵏ ⵉ ⵜⴰⵖⴰⵔⵚⵜ ⵏ ⴷⴷⴻⵏⴱ ⵉ ⵎⴰⵔⵔⴰ ⵉⵙⵔⴰⵉⵍ ⵄⵍⴰⵃⵙⴰⴱ ⵍⵇⴻⴷⴷ ⵏ ⵜⵇⴻⴱⴱⴰⵍ ⵏ ⵉⵙⵔⴰⵉⵍ.

18 ⵏⵉⵜⵏⵉ ⵙⵙⴱⴻⴷⴷⴻⵏ ⵉⴽⴻⵀⵀⴰⵏⴻⵏ ⵙ ⵜⴻⵔⴱⵉⵄⵉⵏ ⵏⵙⴻⵏ ⵓ ⵉⵍⴰⵡⵉⵢⵢⴻⵏ ⴷⵉ ⵜⴻⵔⴱⵉⵄⵉⵏ ⵏⵙⴻⵏ ⵉ ⵜⵙⴻⵅⵅⴰⵔⵜ ⵉ ⴰⵔⴻⴱⴱⵉ ⵡⴻⵏⵏⵉ ⵉⴵⴰⵏ ⴷⵉ ⵓⵔⵛⴰⵍⵉⵎ, ⵄⵍⴰⵃⵙⴰⴱ ⵜⴰⵡⵚⴻⵢⵢⴻⵜ ⵏ ⵡⴻⴷⵍⵉⵙ ⵏ ⵎⵓⵙⴰ. ^■  

19 ⴷⴻⴳ ⵡⴰⵙⵙ ⵡⵉⵙⵙ ⴰⵔⴱⴻⵄⵟⴰⵛ ⵏ ⵓⵢⵓⵔ ⴰⵎⴻⵥⵡⴰⵔⵓ ⵙⵙⵡⴻⵊⴷⴻⵏ ⴰⵢⵜ ⵏ ⵍⵎⴻⵏⴼⴰ ⵓⵍⴰ ⴷ ⵜⴰⵖⴰⵔⵚⵜ ⵏ ⵓⵙⴻⵄⴷⵓ. ^■   20 ⵎⵉⵏⵥⵉ ⵉⴽⴻⵀⵀⴰⵏⴻⵏ ⴷ ⵉⵍⴰⵡⵉⵢⵢⴻⵏ ⴳⴳⵉⵏ ⴰⴷ ⵙⵙⵉⵥⴷⴳⴻⵏ ⵉⵅⴻⴼ ⵏⵙⴻⵏ ⴰⵎ ⵉⵊⵊ ⵏ ⵡⴻⵔⵢⴰⵥ. ⵜⵓⵖⴰ-ⵜⴻⵏ ⵎⴰⵔⵔⴰ ⴷ ⵉⵎⴻⵥⴷⴰⴳⴻⵏ ⵓ ⵏⵉⵜⵏⵉ ⵖⴰⵔⵚⴻⵏ ⵜⴰⵖⴰⵔⵚⵜ ⵏ ⵓⵙⴻⵄⴷⵓ ⵉ ⵎⴰⵔⵔⴰ ⴰⵢⵜ ⵏ ⵍⵎⴻⵏⴼⴰ ⵓ ⵉ ⴰⵢⵜⵎⴰⵜⵙⴻⵏ ⵉⴽⴻⵀⵀⴰⵏⴻⵏ ⵓ ⵉ ⵢⵉⵅⴻⴼ ⵏⵙⴻⵏ. 21 ⴰⵢⵜ ⵏ ⵉⵙⵔⴰⵉⵍ, ⵉⵏⵏⵉ ⵉⴷⴻⵡⵍⴻⵏ ⵥⵉ ⵍⵎⴻⵏⴼⴰ, ⵛⵛⵉⵏ ⵥⵥⴰⵢⴻⵙ ⵓⵍⴰ ⴷ ⴽⵓⵍ ⵉⵊⵊⴻⵏ ⵡⴻⵏⵏⵉ ⵜⵓⵖⴰ ⵉⵙⵙⴰⵔⵅⵓⵏ ⵉⵅⴻⴼ ⵏⵏⴻⵙ ⵥⵉ ⵍⴻⵅⵎⴻⵊ ⵏ ⵍⴻⴳⵏⵓⵙ ⵏ ⵜⴻⵎⵎⵓⵔⵜ ⴰⵎ ⵖⴰⵔⵙⴻⵏ ⵉⴳⴳⵓⵔ ⵃⵉⵎⴰ ⴰⴷ ⵢⴰⵔⵥⵓ ⵙⵉⴷⵉ, ⴰⵔⴻⴱⴱⵉ ⵏ ⵉⵙⵔⴰⵉⵍ. 22 ⵙⴻⴱⵄⴰ ⵏ ⵡⵓⵙⵙⴰⵏ ⵄⴻⵢⵢⴷⴻⵏ ⵏⵉⵜⵏⵉ ⵍⵄⵉⴷ ⵏ ⵡⴻⵖⵔⵓⵎ ⴱⵍⴰ ⴰⵏⵜⵓⵏ, ⵎⵉⵏⵥⵉ ⵙⵉⴷⵉ ⵜⵓⵖⴰ ⵉⵙⵙⴻⴼⵔⴰⵃ ⵉ-ⵜⴻⵏ ⵓⵛⴰ ⵉⵙⵙⵎⴻⵢⵢⴻⵍ ⵓⵍ ⵏ ⵓⵊⴻⴵⵉⴷ ⵏ ⴰⵛⵛⵓⵔ ⵖⴰⵔⵙⴻⵏ ⵎⴰⵃⴻⵏⴷ ⴰⴷ ⵉⵙⵙⴻⵊⵀⴻⴷ ⵉⴼⴰⵙⵙⴻⵏ ⵏⵙⴻⵏ ⵖⴰⵔ ⵍⵅⴻⴷⵎⴻⵜ ⵏ ⵜⴰⴷⴷⴰⵔⵜ ⵏ ⴰⵔⴻⴱⴱⵉ, ⴰⵔⴻⴱⴱⵉ ⵏ ⵉⵙⵔⴰⵉⵍ.