1 ⵢⴰⵀⵓⵛⴰⴼⴰⵟ ⵉⵜⵜⵡⴰⵙⵙⴰⵔⵙ ⴷⴻⴳ ⵡⴻⵏⴹⴻⵍ ⵊⴰⵔ ⵍⴻⵊⴷⵓⴷ ⵏⵏⴻⵙ. ⵏⴻⵜⵜⴰ ⵉⵜⵜⵡⴰⵏⴹⴻⵍ ⵊⴰⵔ ⵍⴻⵊⴷⵓⴷ ⵏⵏⴻⵙ ⴷⵉ ⵜⴻⵏⴷⵉⵏⵜ ⵏ ⴷⴰⵡⵓⴷ. ⵎⵎⵉⵙ ⵢⴰⵀⵓⵔⴰⵎ ⵉⴷⵡⴻⵍ ⴷ ⴰⵊⴻⴵⵉⴷ ⴷⴻⴳ ⵡⴻⵎⵛⴰⵏ ⵏⵏⴻⵙ. 2 ⴰⵢⵜⵎⴰⵙ, ⵉⵃⴻⵏⵊⵉⵔⴻⵏ ⵏ ⵢⴰⵀⵓⵛⴰⴼⴰⵟ ⵜⵓⵖⴰ ⴰⵜⴻⵏ ⴷ ⵄⴰⵥⴰⵔⵢⴰ, ⵢⴰⵃⵉⵢⵉⵍ, ⵣⴰⴽⴰⵔⵉⵢⵢⴰ, ⵄⴰⵥⴰⵔⵢⴰⵀⵓ, ⵎⵉⵅⴰⵢⵉⵍ ⴷ ⵛⴰⴼⴰⵟⵢⴰ. ⵉⵏⴰ ⵎⴰⵔⵔⴰ ⵜⵓⵖⴰ ⴰⵜⴻⵏ ⴷ ⵉⵃⴻⵏⵊⵉⵔⴻⵏ ⵏ ⵢⴰⵀⵓⵛⴰⴼⴰⵟ, ⴰⵊⴻⴵⵉⴷ ⵏ ⵉⵙⵔⴰⵉⵍ. 3 ⴱⴰⴱⴰⵜⵙⴻⵏ ⵉⵡⵛⴰ ⴰⵙⴻⵏ ⴰⵟⵟⴰⵙ ⵏ ⵜⴻⵔⵥⵉⴼⵉⵏ ⵏ ⵏⵏⵓⵇⴰⵔⵜ ⴷ ⵡⵓⵔⴻⵖ ⴷ ⵍⴻⵇⵛⵓⵄ ⵉⵖⵍⴰⵏ ⵓⵍⴰ ⴷ ⵜⵉⵏⴻⴷⴷⴰⵎ ⵉⴼⴰⵔⵢⴻⵏ ⴷⵉ ⵢⴰⵀⵓⴷⴰ, ⵎⴰⵛⴰ ⵜⴰⴳⴻⵍⴷⵉⵜ ⵉⵡⵛⴰ ⵉ-ⵜⵜ ⵉ ⵢⴰⵀⵓⵔⴰⵎ, ⵎⴰⵖⴰⵔ ⵡⴰⵏⵉⵜⴰ ⵜⵓⵖⴰ ⴷ ⴰⵎⴻⵏⵥⵓ.

4 ⵓⵎⵉ ⵉⴽⴽⴰⵔ-ⴷⴷ ⵢⴰⵀⵓⵔⴰⵎ ⵅ ⵜⴳⴻⵍⴷⵉⵜ ⵏ ⴱⴰⴱⴰⵙ ⵓⵛⴰ ⵉⵎⵏⴻⵄ ⴷⵉ ⵜⵉⵥⴻⵎⵎⴰⵔ ⵏⵏⴻⵙ, ⵉⵏⵖⴰ ⵎⴰⵔⵔⴰ ⴰⵢⵜⵎⴰⵙ ⵙ ⵙⵙⵉⴼ, ⵓⵍⴰ ⴷ ⵛⴰ ⵏ ⵍⵃⵓⴽⴽⴰⵎ ⵏ ⵉⵙⵔⴰⵉⵍ. 5 ⵢⴰⵀⵓⵔⴰⵎ ⵜⵓⵖⴰ ⵖⴰⵔⴻⵙ ⵜⵏⴰⵢⴻⵏ ⵓ-ⵜⵍⴰⵜⵉⵏ ⵏ ⵉⵙⴻⴳⴳⵯⵓⵙⴰ ⵓⵎⵉ ⵉⴷⵡⴻⵍ ⴷ ⴰⵊⴻⴵⵉⴷ. ⵏⴻⵜⵜⴰ ⵉⵃⴽⴻⵎ ⵜⵎⴻⵏⵢⴰ ⵏ ⵉⵙⴻⴳⴳⵯⵓⵙⴰ ⴷⵉ ⵓⵔⵛⴰⵍⵉⵎ. 6 ⵏⴻⵜⵜⴰ ⵢⵓⵢⵓⵔ ⴷⴻⴳ ⵡⴻⴱⵔⵉⴷ ⵏ ⵉⵊⴻⴵⵉⴷⴻⵏ ⵏ ⵉⵙⵔⴰⵉⵍ, ⴰⵎ ⵎⴰⵎⵎⴻⵛ ⵜⵓⵖⴰ ⵜⴻⴳⴳⴰ ⵜⴰⴷⴷⴰⵔⵜ ⵏ ⴰⵅⴰⴱ, ⵎⴰⵖⴰⵔ ⵢⴻⴵⵉⵙ ⵏ ⴰⵅⴰⴱ ⵜⴻⴷⵡⴻⵍ ⴷ ⵜⴰⵎⵖⴰⵔⵜ ⵏⵏⴻⵙ. ⵏⴻⵜⵜⴰ ⵉⴳⴳⴰ ⵎⵉⵏ ⵉⴵⴰⵏ ⴷ ⴰⵄⴻⴼⴼⴰⵏ ⴷⵉ ⵜⵉⵟⵟⴰⵡⵉⵏ ⵏ ⵙⵉⴷⵉ. 7 ⵎⴰⵛⴰ ⵙⵉⴷⵉ ⵡⴰⵔ ⵉⵅⵙ ⴰⴷ ⵢⴰⵔⴻⴷⴷⴻⴵ ⴷⴰⵡⵓⴷ ⴷⵉ ⵟⵟⵡⴻⵄ ⵏ ⵍⵄⴰⵀⴷ ⵉ ⵉⴳⴳ ⴰⴽ-ⴷ ⴷⴰⵡⵓⴷ ⵓⵍⴰ ⵓⵎⵉ ⴷ ⴰⵙ ⵜⵓⵖⴰ ⵉⵏⵏⴰ, ⴰⴷ ⴰⵙ ⵉⵡⵛ ⵍⴻⴱⴷⴰ ⵉⵊⵊ ⵏ ⵍⴻⴼⵏⴰⵔ ⵥⵥⴰⵜ ⵉ ⵜⵉⵟⵟⴰⵡⵉⵏ ⵏⵏⴻⵙ, ⵉ ⵏⴻⵜⵜⴰ ⵓ ⵉ ⵉⵃⴻⵏⵊⵉⵔⴻⵏ ⵏⵏⴻⵙ.

8 ⴷⴻⴳ ⵡⵓⵙⵙⴰⵏ ⵏⵏⴻⵙ ⵉⵅⵜⵓⵜⵜⴻⵍ ⵉⴷⵓⵎ ⵙ ⵓⵖⴻⵡⵡⴻⵖ ⵥⵉ ⵙⴰⴷⵓ ⵉⴼⴰⵙⵙⴻⵏ ⵏ ⵢⴰⵀⵓⴷⴰ, ⵓⵛⴰ ⴳⴳⵉⵏ ⵉⵊⵊ ⵏ ⵓⵊⴻⴵⵉⴷ ⵅ ⵢⵉⵅⴻⴼ ⵏⵙⴻⵏ. 9 ⵉⵄⴷⵓ ⵢⴰⵀⵓⵔⴰⵎ ⴰⴽ-ⴷ ⵎⴰⵔⵔⴰ ⵉⵎⴻⵇⵇⵔⴰⵏⴻⵏ ⵏⵏⴻⵙ ⴷ ⵎⴰⵔⵔⴰ ⵉⴽⴰⵔⵔⵓⵜⴻⵏ ⵏⵏⴻⵙ ⵏ ⵓⵎⴻⵏⵖⵉ. ⴰⵇⴰ ⵉⴽⴽⴰⵔ ⵙ ⴵⵉⵍⴻⵜ ⵓ ⵉⵖⵍⴻⴱ ⵅ ⴰⵢⵜ ⵏ ⵉⴷⵓⵎ ⵉⵏⵏⵉ ⵉ ⵜⵓⵖⴰ ⵉ ⴷ ⴰⵙ ⴷⴷ-ⵉⵏⵏⴹⴻⵏ, ⵉ ⵏⴻⵜⵜⴰ ⵓ ⵉ ⵉⵎⴻⵇⵇⵔⴰⵏⴻⵏ ⵏ ⵉⴽⴰⵔⵔⵓⵜⴻⵏ ⵏ ⵓⵎⴻⵏⵖⵉ.

10 ⵡⴰⵅⵅⴰ ⴰⵎⴻⵏⵏⵉ ⵅⵜⵓⵜⵜⵍⴻⵏ ⴰⵢⵜ ⵏ ⵉⴷⵓⵎ ⵙ ⵓⵖⴻⵡⵡⴻⵖ ⵥⵉ ⵊⴰⵔ ⵉⴼⴰⵙⵙⴻⵏ ⵏ ⵢⴰⵀⵓⴷⴰ, ⴰⵍ ⴰⵙⵙ-ⴰ. ⴷⵉ ⵍⵡⴻⵇⵜ ⵏⵏⵉ ⴱⴻⵄⴷⴰ ⵉⵖⴻⵡⵡⴻⵖ ⵓⵍⴰ ⴷ ⵍⵉⴱⵏⴰ, ⵎⴰⵖⴰⵔ ⵜⵓⵖⴰ ⵢⴰⵀⵓⴷⴰ ⵉⵃⴻⵢⵢⴻⴷ ⵅ ⵙⵉⴷⵉ, ⴰⵔⴻⴱⴱⵉ ⵏ ⵉⴱⴰⴱⴰⵜⴻⵏ ⵏⵏⴻⵙ.

11 ⵏⴻⵜⵜⴰ ⵉⵙⵙⴱⴻⴷⴷ ⵓⵍⴰ ⴷ ⵍⴻⴳⵄⵓⴷⵉ ⵅ ⵉⴷⵓⵔⴰⵔ ⵏ ⵢⴰⵀⵓⴷⴰ ⵓ ⵢⴰⵔⵔⴰ ⵉⵎⴻⵥⴷⴰⵖ ⵏ ⵓⵔⵛⴰⵍⵉⵎ ⴰⴷ ⵙⵙⴼⴻⵙⴷⴻⵏ ⵉⵅⴻⴼ ⵏⵙⴻⵏ ⵙ ⵉⵔⴻⴱⴱⵉⵜⴻⵏ ⵏⵏⴻⵖⵏⵉ, ⵡⴰⵀ ⵜⵓⵖⴰ ⵉⵄⴰⵔⵏ ⵢⴰⵀⵓⴷⴰ ⵖⴰⵔ ⵎⴰⵏ ⴰⵢⴰ.

12 ⵜⵉⵡⴻⴹ-ⴷⴷ ⵖⴰⵔⴻⵙ ⵉⵛⵜ ⵏ ⵜⴻⴱⵔⴰⵜ ⵏ ⵓⵏⴰⴱⵉ ⵉⵍⵉⵢⴰ, ⵜⴻⵇⵇⴰⵔ: “ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ, ⴰⵔⴻⴱⴱⵉ ⵏ ⴱⴰⴱⴰⵛ ⴷⴰⵡⵓⴷ: ‘ⵎⴰⵖⴰⵔ ⵡⴰⵔ ⵜⵓⵢⵓⵔⴻⴷ ⵅ ⵉⴱⵔⵉⴷⴻⵏ ⵏ ⴱⴰⴱⴰⵛ ⵢⴰⵀⵓⵛⴰⴼⴰⵟ ⵓ ⵅ ⵉⴱⵔⵉⴷⴻⵏ ⵏ ⴰⵙⴰ, ⴰⵊⴻⴵⵉⴷ ⵏ ⵢⴰⵀⵓⴷⴰ,

13 ⵎⴰⵛⴰ ⵜⵓⵢⵓⵔⴻⴷ ⵅ ⵉⴱⵔⵉⴷⴻⵏ ⵏ ⵉⵊⴻⴵⵉⴷⴻⵏ ⵏ ⵉⵙⵔⴰⵉⵍ ⵓⵛⴰ ⵜⴰⵔⵔⵉⴷ ⵢⴰⵀⵓⴷⴰ ⴷ ⵉⵎⴻⵥⴷⴰⵖ ⵏ ⵓⵔⵛⴰⵍⵉⵎ ⴰⴷ ⵙⵙⴼⴻⵙⴷⴻⵏ ⵉⵅⴻⴼ ⵏⵙⴻⵏ ⵙ ⵉⵔⴻⴱⴱⵉⵜⴻⵏ ⵉⵏⵏⴻⵖⵏⵉ, ⴰⵎ ⵎⴰⵎⵎⴻⵛ ⵉ ⵜ ⵜⴻⴳⴳⴰ ⵜⴰⴷⴷⴰⵔⵜ ⵏ ⴰⵅⴰⴱ, ⵓ ⵎⵉⵏⵥⵉ ⵛⴻⴽ ⵜⴻⵏⵖⵉⴷ ⵓⵍⴰ ⴷ ⴰⵢⵜⵎⴰⵛ ⵥⵉ ⵜⴰⴷⴷⴰⵔⵜ ⵏ ⴱⴰⴱⴰⵛ, ⵉⵏⵏⵉ ⵉ ⵜⵓⵖⴰ ⵉ ⵅⴰⴽ ⵉⵛⵏⴰⵏ,

14 ⵅⵥⴰⵔ, ⵅ ⵓⵢⴻⵏⵏⵉ ⵙⵉⴷⵉ ⴰⴷ ⵛⴻⴽ ⵉⵍⵇⴻⴼ ⵙ ⵉⵛⵜ ⵏ ⵜⴻⵛⵜⵉ ⴷ ⵜⴰⵎⴻⵇⵇⵔⴰⵏⵜ ⵊⴰⵔ ⵍⴳⴻⵏⵙ ⵏⵏⴻⴽ ⴷ ⵉⵃⴻⵏⵊⵉⵔⴻⵏ ⵏⵏⴻⴽ ⴷ ⵜⴻⵎⵖⴰⵔⵉⵏ ⵏⵏⴻⴽ ⴷ ⵎⴰⵔⵔⴰ ⴰⴳⵍⴰ ⵏⵏⴻⴽ.

15 ⵛⴻⴽ ⵙⵉⵎⴰⵏⵜ ⵏⵏⴻⴽ ⴰⴷ ⵜⴻⵡⴹⵉⴷ ⴷⴻⴳ ⵉⵊⵊ ⵏ ⵍⴻⵀⵍⴰⵛ ⵏ ⵜⴻⴽⵔⵉⵛⵜ ⵉⵇⴻⵙⵃⴻⵏ, ⴰⵍ ⴷⴷ ⵖⴰ ⵜⴻⴼⴼⴻⵖ ⵄⴰⴷ ⵜⴻⴽⵔⵉⵛⵜ ⵏⵏⴻⴽ ⵖⴰⵔ ⴱⴰⵔⵔⴰ ⵥⵉ ⵙⵙⵉⴱⴱⴻⵜ ⵏ ⵍⴻⵀⵍⴰⵛ, ⴰⵙⵙ ⵉⴹⴼⴰⵔ ⵓⵎⴰⵙ.”

16 ⵙⵉⴷⵉ ⵉⵙⵙⴻⵀⵡⴻⵍ ⵅ ⵢⴰⵀⵓⵔⴰⵎ ⴰⵔⵔⵓⵃ ⵏ ⵉⴼⵉⵍⵉⵙⵜⵉⵏⵉⵢⵢⴻⵏ ⴷ ⵡⴻⵄⵔⴰⴱⴻⵏ, ⵉⵏⵏⵉ ⵉⵥⴻⴷⵖⴻⵏ ⵅ ⵓⵖⴻⵥⴷⵉⵙ ⵏ ⴰⵢⵜ ⵏ ⴽⵓⵛ.

17 ⵏⵉⵜⵏⵉ ⴳⴻⵄⵄⴷⴻⵏ ⵖⴰⵔ ⵢⴰⵀⵓⴷⴰ, ⵓⴷⴼⴻⵏ ⵖⴰⵔ ⵜⴰⵎⵎⵓⵔⵜ ⵓ ⴽⵙⵉⵏ ⵎⴰⵔⵔⴰ ⴰⴳⵍⴰ ⵏⵏⵉ ⵉⴵⴰⵏ ⴷⵉ ⵜⴰⴷⴷⴰⵔⵜ ⵏ ⵓⵊⴻⴵⵉⴷ ⵓⵍⴰ ⴷ ⵉⵃⴻⵏⵊⵉⵔⴻⵏ ⴷ ⵜⴻⵎⵖⴰⵔⵉⵏ, ⴰⵍⴰⵎⵉ ⵡⴰⵔ ⴷ ⴰⵙ ⵉⵇⵇⵉⵎ ⵎⵖⵉⵔ ⵢⴰⵀⵓⵢⴰⵃⴰⵥ, ⴰⵎⴰⵥⵓⵥ ⵏ ⵉⵃⴻⵏⵊⵉⵔⴻⵏ ⵏⵏⴻⵙ.

18 ⴰⵡⴰⵔⵏⵉ ⴰⵢⴰ ⵉⵡⵜⴰ ⵉ-ⵜ ⵙⵉⴷⵉ ⵙ ⵢⵉⵊⵊ ⵏ ⵍⴻⵀⵍⴰⵛ ⵡⴰⵔ ⵉⵥⴻⵎⵎⴰⵔ ⴰⴷ ⵥⵥⴰⵢⴻⵙ ⵉⴳⴳⴻⵏⴼⴰ.

19 ⵓⵎⵉ ⵜⵓⵖⴰ ⵏⴻⵜⵜⴰ ⵉⵀⵍⴻⵛ ⴰⵎⵎⵓ ⴰⵙⵙ ⵉⴹⴼⴰⵔ ⵓⵎⴰⵙ ⵓⵛⴰ ⵉⵄⴷⵓ ⵍⵡⴻⵇⵜ ⴰⵍⴰⵎⵉ ⵄⴷⵓⵏ ⵜⵏⴰⵢⴻⵏ ⵏ ⵉⵙⴻⴳⴳⵯⵓⵙⴰ, ⵉⵎⵙⴰⵔ, ⴰⵇⴰ ⵜⴰⴽⵔⵉⵛⵜ ⵏⵏⴻⵙ ⵜⴻⴼⴼⴻⵖ-ⴷⴷ ⵖⴰⵔ ⴱⴰⵔⵔⴰ ⵓ ⵏⴻⵜⵜⴰ ⵉⵎⵎⵓⵜ ⵙ ⵍⴻⵃⵍⵉⵇ ⴷ ⴰⵎⴻⵇⵇⵔⴰⵏ. ⵍⴳⴻⵏⵙ ⵏⵏⴻⵙ ⵡⴰⵔ ⴷ ⴰⵙ ⵉⵙⵙⴰⵔⵖ ⵛⴰ ⵜⵎⴻⵙⵙⵉ ⴰⵎ ⴳⴳⵉⵏ ⵜⵉⵎⴻⵙⵙⵉ ⵉ ⵉⴱⴰⴱⴰⵜⴻⵏ ⵏⵏⴻⵙ. 20 ⵏⴻⵜⵜⴰ ⵜⵓⵖⴰ ⵖⴰⵔⴻⵙ ⵜⵏⴰⵢⴻⵏ ⵓ-ⵜⵍⴰⵜⵉⵏ ⵏ ⵉⵙⴻⴳⴳⵯⵓⵙⴰ ⵓⵎⵉ ⵉⴷⵡⴻⵍ ⴷ ⴰⵊⴻⴵⵉⴷ. ⵏⴻⵜⵜⴰ ⵉⵃⴽⴻⵎ ⵜⵎⴻⵏⵢⴰ ⵏ ⵉⵙⴻⴳⴳⵯⵓⵙⴰ ⴷⵉ ⵓⵔⵛⴰⵍⵉⵎ. ⵏⴻⵜⵜⴰ ⵉⴼⵏⴰ, ⵡⴰⵔ ⵅⴰⵙ ⵉⵏⴷⴻⴱ ⵃⴻⴷ. ⵏⴻⴹⵍⴻⵏ ⵜ ⴷⵉ ⵜⴻⵏⴷⵉⵏⵜ ⵏ ⴷⴰⵡⵓⴷ, ⵎⴰⵛⴰ ⵡⴰⵔ ⵉⴵⵉ ⴷⴻⴳ ⵉⵎⴻⴹⵍⴰⵏ ⵏ ⵉⵊⴻⴵⵉⴷⴻⵏ.