1 ⴰⵎⵎⵓ ⵉ ⵜᵉⵜⵜⵡⴰⴽⴻⵎⵎⴻⵍ ⵎⴰⵔⵔⴰ ⵍⵅⴻⴷⵎⴻⵜ ⵉ ⵉⴳⴳⴰ ⵙⵓⵍⵉⵎⴰⵏ ⵉ ⵜⴰⴷⴷⴰⵔⵜ ⵏ ⵙⵉⴷⵉ. ⵓⵛⴰ ⵉⵙⵙⵉⴷⴻⴼ ⵙⵓⵍⵉⵎⴰⵏ ⵎⴰⵔⵔⴰ ⵍⴻⵇⵛⵓⵄ ⵉⵇⴻⴷⴷⵙⴻⵏ ⵏ ⴱⴰⴱⴰⵙ ⴷⴰⵡⵓⴷ: ⵏⵏⵓⵇⴰⵔⵜ ⴷ ⵡⵓⵔⴻⵖ ⴷ ⵍⴻⵇⵛⵓⵄ, ⵓⵛⴰ ⵉⵙⵙⴰⵔⵙ ⵎⴰⵏ ⴰⵢⴰ ⵎⴰⵔⵔⴰ ⴷⴻⴳ ⵉⵅⵅⴰⵎⴻⵏ ⵏ ⵜⵅⵓⴱⴰⵢ ⵏ ⵜⴰⴷⴷⴰⵔⵜ ⵏ ⴰⵔⴻⴱⴱⵉ. 2 ⵅⴻⵏⵏⵉ ⵉⵙⵙⵎⵓⵏ ⵙⵓⵍⵉⵎⴰⵏ ⵉⵎⴻⵇⵇⵔⴰⵏⴻⵏ ⵏ ⵉⵙⵔⴰⵉⵍ ⴷ ⵎⴰⵔⵔⴰ ⵉⵥⴻⴵⵉⴼⴻⵏ ⵏ ⵜⵇⴻⴱⴱⴰⵍ, ⵉⵎⴻⵇⵇⵔⴰⵏⴻⵏ ⵏ ⵉⴱⴰⴱⴰⵜⴻⵏ ⵏ ⴰⵢⵜ ⵏ ⵉⵙⵔⴰⵉⵍ, ⴷⵉ ⵓⵔⵛⴰⵍⵉⵎ ⵃⵉⵎⴰ ⴰⴷ ⵙⵙⴳⴻⵄⵄⴷⴻⵏ ⵜⵜⴰⴱⵓⵜ ⵏ ⵍⵄⴰⵀⴷ ⵏ ⵙⵉⴷⵉ ⵥⵉ ⵜⴻⵏⴷⵉⵏⵜ ⵏ ⴷⴰⵡⵓⴷ, ⵜⴻⵏⵏⵉ ⴷ ⵚⵉⵀⵢⵓⵏ. 3 ⵎⴰⵔⵔⴰ ⵉⵔⵢⴰⵥⴻⵏ ⵏ ⵉⵙⵔⴰⵉⵍ ⵎⵓⵏⴻⵏ-ⴷⴷ ⵖⴰⵔ ⵓⵊⴻⴵⵉⴷ ⵖⴰⵔ ⵍⵄⵉⴷ. ⵜⵓⵖⴰ-ⵜⵜ ⴷⴻⴳ ⵓⵢⵓⵔ ⵡⵉⵙⵙ ⵙⴻⴱⵄⴰ.

4 ⵎⴰⵔⵔⴰ ⵉⵎⴻⵇⵇⵔⴰⵏⴻⵏ ⵏ ⵉⵙⵔⴰⵉⵍ ⵓⵙⵉⵏ-ⴷⴷ ⵓⵛⴰ ⵙⵙⴳⴻⵄⵄⴷⴻⵏ ⵉⵍⴰⵡⵉⵢⵢⴻⵏ ⵜⵜⴰⴱⵓⵜ. 5 ⵙⵙⴳⴻⵄⵄⴷⴻⵏ ⵜⵜⴰⴱⵓⵜ ⵏ ⵙⵉⴷⵉ ⴰⴽ-ⴷ ⵓⵇⵉⴹⵓⵏ ⵏ ⵓⵎⵙⴰⴳⴰⵔ ⵓⵍⴰ ⴷ ⵎⴰⵔⵔⴰ ⵍⴻⵇⵛⵓⵄ ⵉⵇⴻⴷⴷⵙⴻⵏ ⵉ ⵜⵓⵖⴰ ⴷⵉⵏ ⵉⴵⴰⵏ ⴷⴻⴳ ⵓⵇⵉⴹⵓⵏ. ⵙⵙⴳⴻⵄⵄⴷⴻⵏ ⴰⵢⴰ ⵉⴽⴻⵀⵀⴰⵏⴻⵏ ⴷ ⵉⵍⴰⵡⵉⵢⵢⴻⵏ. 6 ⵎⴰⵔⵔⴰ ⵜⴰⵎⴻⵙⵎⵓⵏⵜ ⵏ ⵉⵙⵔⴰⵉⵍ, ⵜⴻⵏⵏⵉ ⵉ ⵜⵓⵖⴰ ⵖⴰⵔⴻⵙ ⴷⴷ-ⵉⵎⵓⵏⴻⵏ, ⵜⵓⵖⴰ-ⵜⵜ ⴰⴽ-ⴷ ⵓⵊⴻⴵⵉⴷ ⵙⵓⵍⵉⵎⴰⵏ ⵥⵥⴰⵜ ⵉ ⵜⵜⴰⴱⵓⵜ. ⵏⵉⵜⵏⵉ ⵡⴻⵀⵀⴱⴻⵏ ⵓⴵⵉ ⴷ ⵉⴼⵓⵏⴰⵙⴻⵏ ⴷ ⵜⴼⵓⵏⴰⵙⵉⵏ ⵏⵏⵉ ⴱⵍⴰ ⵍⴻⵃⵙⴰⴱ ⴷⵉ ⵙⵙⵉⴱⴱⴻⵜ ⵏ ⵓⴱⴰⵔⵔⵓ ⵉ ⴷⵉ ⵉⴵⴰⵏ. 7 ⵉⵡⵢⴻⵏ ⵉⴽⴻⵀⵀⴰⵏⴻⵏ ⵜⵜⴰⴱⵓⵜ ⵏ ⵍⵄⴰⵀⴷ ⵏ ⵙⵉⴷⵉ ⵖⴰⵔ ⵡⴻⵎⵛⴰⵏ ⵏⵏⴻⵙ, ⵖⴰⵔ ⵡⴻⵅⵅⴰⵎ ⵏ ⴷⴰⵅⴻⵍ ⵏ ⵣⵥⴰⵡⴻⵛⵜ ⵏ ⵜⴰⴷⴷⴰⵔⵜ, ⴷⴻⴳ ⵡⴻⵇⴷⴰⵙ ⵏ ⵓⵇⴻⴷⴷⴰⵙ, ⴰⵍ ⵙⴰⴷⵓ ⵡⴰⴼⵔⵉⵡⴻⵏ ⵏ ⵉⴽⵉⵔⵓⴱⴻⵏ, ^□   8 ⵎⴰⵖⴰⵔ ⵉⴽⵉⵔⵓⴱⴻⵏ ⴱⴻⵥⵥⵄⴻⵏ ⵜⵏⴰⵢⴻⵏ ⵏ ⵡⴰⴼⵔⵉⵡⴻⵏ ⵏⵙⴻⵏ ⵅ ⵡⴻⵎⵛⴰⵏ ⵏ ⵜⵜⴰⴱⵓⵜ ⵓⵛⴰ ⴰⵎⵎⵓ ⵉ ⴷⵍⵉⵏ ⵉⴽⵉⵔⵓⴱⴻⵏ ⵜⵜⴰⴱⵓⵜ ⴷ ⵉⵄⵓⵎⴰⴷ ⵏⵏⴻⵙ ⵉ ⵜⴰⵔⴻⴱⴱⵓⵜ ⵥⵉ ⵙⴻⵏⵏⴻⵊ. 9 ⵙⵙⴻⵏⵏⵉ ⵙⵙⵍⴻⵃⵎⴻⵏ ⵉⵄⵓⵎⴰⴷ ⵏ ⵜⴰⵔⴻⴱⴱⵓⵜ ⵎⴰⵃⴻⵏⴷ ⴰⴷ ⴱⴰⵏⴻⵏⵜ ⵜⴻⵅⴼⴰⵡⵉⵏ ⵏ ⵉⵄⵓⵎⴰⴷ ⵉ ⴷⴷ-ⵉⴼⴼⵖⴻⵏ ⵥⵉ ⵜⵜⴰⴱⵓⵜ ⵖⴰⵔ ⵥⵥⴰⵜ ⵏ ⵡⴻⵅⵅⴰⵎ ⵏ ⴷⴰⵅⴻⵍ ⵏ ⵣⵥⴰⵡⴻⵛⵜ, ⵎⴰⵛⴰ ⵡⴰⵔ ⴷⴷ-ⵜⵜⴱⵉⵏⵉⵏⵜ ⵥⵉ ⴱⴰⵔⵔⴰ. ⵜⵜⴰⴱⵓⵜ ⴰⵇⴰ-ⵜⵜ ⴷⵉⵏ ⴰⵍ ⴰⵙⵙ-ⴰ.

10 ⵜⵓⵖⴰ ⵡⴰⵔ ⵉⴵⵉ ⵛⴰ ⴷⵉ ⵜⵜⴰⴱⵓⵜ, ⵎⵖⵉⵔ ⵜⵏⴰⵢⴻⵏ ⵏ ⵜⴻⵍⵡⵉⵃⵉⵏ ⵉ ⴷⴰⵢⴻⵙ ⵉⵙⵙⴰⵔⵙ ⵎⵓⵙⴰ ⵖⴰⵔ ⵀⵓⵔⵉⴱ, ⵍⴰⵎⵉ ⵉⴳⴳⴰ ⵙⵉⴷⵉ ⵉⵊⵊ ⵏ ⵍⵄⴰⵀⴷ ⴰⴽ-ⴷ ⴰⵢⵜ ⵏ ⵉⵙⵔⴰⵉⵍ ⵓⵎⵉ ⴷⴷ-ⴼⴼⵖⴻⵏ ⵥⵉ ⵎⵉⵚⵔⴰ.

11 ⵓⵛⴰ ⵉⵎⵙⴰⵔ ⴰⵍⴰⵎⵉ ⴷⴷ-ⴼⴼⵖⴻⵏ ⵉⴽⴻⵀⵀⴰⵏⴻⵏ ⵥⴻⴳ ⵓⵇⴻⴷⴷⴰⵙ, — ⵎⴰⵖⴰⵔ ⵎⴰⵔⵔⴰ ⵉⴽⴻⵀⵀⴰⵏⴻⵏ ⵏⵏⵉ ⵜⵓⵖⴰ ⵥⴻⵎⵎⴰⵔⴻⵏ ⴰⴷ ⴰⴼⴻⵏ, ⵜⵓⵖⴰ ⵙⵙⵇⴻⴷⴷⵙⴻⵏ ⵉⵅⴻⴼ ⵏⵙⴻⵏ ⴱⵍⴰ ⵎⴰ ⴰⴷ ⵡⵛⴻⵏ ⵜⴰⵢⵏⵉⵜ ⵉ ⵜⴻⵔⴱⵉⵄⵉⵏ ⵏⵙⴻⵏ — ,

12 ⵓⵛⴰ ⵓⵍⴰ ⴷ ⵉⵍⴰⵡⵉⵢⵢⴻⵏ ⴷ ⵉⵎⴻⴷⵢⴰⵥⴻⵏ, ⵎⴰⵔⵔⴰ ⵉⵏⵏⵉ ⵜⴻⵏ ⵜⵓⵖⴰ ⵖⴰⵔ ⴰⵙⴰⴼ, ⵀⴰⵢⵎⴰⵏ ⴷ ⵢⴰⴷⵓⵜⵓⵏ, ⵉⵃⴻⵏⵊⵉⵔⴻⵏ ⵏⵙⴻⵏ ⴷ ⴰⵢⵜⵎⴰⵜⵙⴻⵏ, ⵢⴰⵔⴹⴻⵏ ⵍⴻⵇⵟⴻⵏ ⴰⵥⴷⴰⴷ, ⵓ ⴱⴻⴷⴷⴻⵏ ⵙ ⵜⴰⴵⵓⵏⵉⵏ ⵏ ⵡⵓⵥⵥⴰⵍ ⴷ ⵍⵀⴰⵔⴱⴰⵜ ⴷ ⵍⴳⴰⵎⴱⵔⵉⵢⴰⵜ ⵖⴰⵔ ⵓⵖⴻⵥⴷⵉⵙ ⵏ ⵛⵛⴰⵔⵇ ⵏ ⵓⵄⴰⵍⵟⴰⵔ ⵓ ⵜⵓⵖⴰ ⴰⴽⵉⴷⵙⴻⵏ ⵄⵍⴰⵃⴰⵍ ⵎⵢⴰ ⵓ-ⵄⵉⵛⵔⵉⵏ ⵏ ⵉⴽⴻⵀⵀⴰⵏⴻⵏ ⵏⵏⵉ ⵉⵜⵜⵚⵓⴹⴻⵏ ⴷⵉ ⵍⵖⴰⵢⵟⴰⵜ,

13 ⵉⵡⴰ, ⵓⵎⵉ ⵚⵓⴹⴻⵏ ⴰⵎ ⵉⵊⵊ ⵏ ⵡⴻⵔⵢⴰⵥ ⴷⵉ ⵍⵖⴰⵢⵟⴰ, ⵖⴻⵏⵏⵊⴻⵏ ⵓ ⴳⴳⵉⵏ ⴰⴷ ⵉⵜⵜⵡⴰⵙⴻⵍ ⵍⵃⴻⵙⵙ ⴷ ⵉⵊⵊⴻⵏ ⴰⵎ ⵙⵙⴻⵎⵖⴰⵔⴰⵏ ⵓ ⵜⵜⵇⴰⴷⴰⵏ ⵙⵉⴷⵉ, ⴰⵍⴰⵎⵉ ⵙⵙⴳⴻⵄⵄⴷⴻⵏ ⵙ ⵍⵖⴰⵢⵜⴰⵜ ⴷ ⵜⴰⴵⵓⵏⵉⵏ ⵏ ⵡⵓⵥⵥⴰⵍ ⴷ ⴷⴷⵓⵥⴰⵏⴰⵜ ⵏ ⵍⵍⵖⴰ ⵏⵏⴻⵖⵏⵉ ⴵⵡⴰⵔⵓ ⵏⵙⴻⵏ ⵖⴰⵔ ⵓⵊⴻⵏⵏⴰ ⴰⵎ ⵙⵙⴻⵎⵖⴰⵔⴰⵏ ⵙⵉⴷⵉ ⴰⵇⴰ ⵏⴻⵜⵜⴰ ⵉⵚⴱⴻⵃ ⵓ ⵜⴰⵎⴻⵅⵙⵉⵡⵜ ⵏⵏⴻⵙ ⵉⵛⴻⵡⵡⴰⵔⴻⵏ ⵉ ⵍⴻⴱⴷⴰ ⵉ ⵜⴻⴵⴰ, ⵉⵡⴰ ⵅⴻⵏⵏⵉ ⵉⵎⵙⴰⵔ ⴰⵇⴰ ⵜⴰⴷⴷⴰⵔⵜ, ⵜⴰⴷⴷⴰⵔⵜ ⵏ ⵙⵉⴷⵉ, ⵜᵉⵜⵜⵡⴰⵛⵛⵓⵔ ⵙ ⵓⵙⴻⵢⵏⵓ.

14 ⵡⴰⵔ ⵥⴻⵎⵎⴰⵔⴻⵏ ⵉⴽⴻⵀⵀⴰⵏⴻⵏ ⴰⴷ ⵇⵇⵉⵎⴻⵏ ⴱⴻⴷⴷⴻⵏ ⵃⵉⵎⴰ ⴰⴷ ⵙⴻⵅⵅⴰⵔⴻⵏ ⴷⵉ ⵙⵙⵉⴱⴱⴻⵜ ⵏ ⵓⵙⴻⵢⵏⵓ, ⵎⵉⵏⵥⵉ ⴰⵄⵓⴵⵉ ⵏ ⵙⵉⴷⵉ ⵜⵓⵖⴰ ⵉⵛⵛⵓⵔ ⵜⴰⴷⴷⴰⵔⵜ ⵏ ⴰⵔⴻⴱⴱⵉ.