1 ⵓⵎⵉ ⵜⵓⵖⴰ ⴷⴰⵡⵓⴷ ⵉⵡⵙⴰⵔ ⵓ ⵉⵊⵊⵉⵡⴻⵏ ⵓⵙⵙⴰⵏ, ⵉⴳⴳⴰ ⵏⴻⵜⵜⴰ ⵎⵎⵉⵙ ⵙⵓⵍⵉⵎⴰⵏ ⴷ ⴰⵊⴻⴵⵉⴷ ⵅ ⵉⵙⵔⴰⵉⵍ. 2 ⵏⴻⵜⵜⴰ ⵉⵙⵙⵎⵓⵏ-ⴷⴷ ⵎⴰⵔⵔⴰ ⵉⵎⴳⴻⵡⵡⴰⴷⴻⵏ ⵏ ⵉⵙⵔⴰⵉⵍ ⵓⵍⴰ ⴷ ⵉⴽⴻⵀⵀⴰⵏⴻⵏ ⴷ ⵉⵍⴰⵡⵉⵢⵢⴻⵏ. 3 ⵜⵜⵡⴰⵃⴻⵙⴱⴻⵏ ⵉⵍⴰⵡⵉⵢⵢⴻⵏ ⵥⵉ ⵜⵍⴰⵜⵉⵏ ⵏ ⵉⵙⴻⴳⴳⵯⵓⵙⴰ ⴷ ⵙⴻⵏⵏⴻⵊ. ⵜⵓⵖⴰ ⵍⵇⴻⴷⴷ ⵏⵙⴻⵏ ⴰⵥⴻⴵⵉⴼ ⴰⵥⴻⴵⵉⴼ ⵜⵎⴻⵏⵢⴰ ⵓ-ⵜⵍⴰⵜⵉⵏ-ⴰⵍⴻⴼ ⵏ ⵢⴻⵔⵢⴰⵥⴻⵏ. 4 ⵣⵥⴰⵢⵙⴻⵏ ⵜⵓⵖⴰ ⴷⵉⵏ ⴰⵔⴻⴱⵄⴰ ⵓ-ⵄⵉⵛⵔⵉⵏ-ⴰⵍⴻⴼ ⵏ ⵢⵉⵏⵏⵉ ⵉⵜⵜⵡⴰⴳⴳⴻⵏ ⴷ ⵉⵎⵙⴻⵢⵢⴰⵔⴻⵏ ⵅ ⵍⵅⴻⴷⵎⴻⵜ ⴷⵉ ⵜⴰⴷⴷⴰⵔⵜ ⵏ ⵙⵉⴷⵉ ⵓⵛⴰ ⴰⵇⴰ ⴷⵉⵏ ⵄⴰⴷ ⵙⴻⵜⵜⴰ-ⴰⵍⴰⴼ ⵏ ⵉⵡⴻⵇⵇⴰⴼⴻⵏ ⴷ ⵍⵇⵓⴹⴰⵜ, 5 ⴰⵔⴱⴻⵄⴰ-ⴰⵍⴰⴼ ⵏ ⵉⵄⴻⵙⵙⴰⵙⴻⵏ ⵏ ⵜⴻⵡⵡⴰⵔⵜ ⴷ ⴰⵔⴻⴱⵄⴰ-ⴰⵍⴰⴼ ⵏ ⵉⵎⴻⴷⵢⴰⵥⴻⵏ ⵉ ⵉⵥⵔⴰⵏ ⵏ ⵓⵚⴻⴱⴱⴰⵃ ⵉ ⵙⵉⴷⵉ, ⴰⴽ-ⴷ ⴷⴷⵓⵥⴰⵏⴰⵜ ⵏ ⵍⵎⵓⵙⵉⵇⴰ ⵏⵏⵉ ⴳⴳⵉⵖ, ⵉⵏⵏⴰ ⴷⴰⵡⵓⴷ, ⵃⵉⵎⴰ ⴰⴷ ⵙⵙⴻⵎⵖⴰⵔⴻⵏ ⵙⵉⴷⵉ ⵙ ⵢⴻⵥⵍⴰⵏ ⵏ ⵓⵚⴻⴱⴱⴰⵃ.

6 ⴷⴰⵡⵓⴷ ⵉⴱⴹⴰ ⵜⴻⵏ ⴷⵉ ⵜⴻⵔⴱⵉⵄⵉⵏ, ⵜⵜⵡⴰⵙⴻⵜⵜⴼⴻⵏ ⵄⵍⴰⵃⵙⴰⴱ ⵉⵃⴻⵏⵊⵉⵔⴻⵏ ⵏ ⵍⴰⵡⵉ: ⵊⴰⵔⵛⵓⵏ, ⵇⴰⵀⴰⵜ ⴷ ⵎⴰⵔⴰⵔⵉ.

7 ⵣⴻⴳ ⵉⵊⴰⵔⵛⵓⵏⵉⵢⵢⴻⵏ ⵜⵓⵖⴰ ⴰⵜⴻⵏ ⴷ ⵍⴰⵄⴷⴰⵏ ⴷ ⵛⵉⵎⵄⵉ.

8 ⵜⴰⵔⵡⴰ ⵏ ⵍⴰⵄⴷⴰⵏ ⵜⵓⵖⴰ ⴰⵜⴻⵏ ⴷ ⴰⵥⴻⴵⵉⴼ ⵢⴰⵃⵉⵢⵉⵍ, ⵣⵉⵜⴰⵎ ⴷ ⵢⵓⵡⵉⵍ, ⵜⵍⴰⵜⴰ ⵏ ⵢⴻⵔⵢⴰⵥⴻⵏ.

9 ⵜⴰⵔⵡⴰ ⵏ ⵛⵉⵎⵄⵉ ⵜⵓⵖⴰ ⴰⵜⴻⵏ ⴷ ⵛⴰⵍⵓⵎⵉⵜ, ⵃⴰⵥⵉⵢⵉⵍ ⴷ ⵀⴰⵔⴰⵏ, ⵜⵍⴰⵜⴰ ⵏ ⵢⴻⵔⵢⴰⵥⴻⵏ. ⵉⵏⴰ ⵜⵓⵖⴰ ⴰⵜⴻⵏ ⴷ ⵉⵥⴻⴵⵉⴼⴻⵏ ⵊⴰⵔ ⵉⴱⴰⴱⴰⵜⴻⵏ ⵏ ⵍⴰⴵⴰⵜ ⵏ ⵍⴰⵄⴷⴰⵏ.

10 ⵉⵃⴻⵏⵊⵉⵔⴻⵏ ⵏ ⵛⵉⵎⵄⵉ ⵜⵓⵖⴰ ⴰⵜⴻⵏ ⴷ ⵢⴰⵃⴰⵜ, ⵣⴰⵢⵏⴰ, ⵢⴰⵄⵓⵛ ⴷ ⴱⴰⵔⵉⵄⴰ. ⵉⵏⴰ ⵜⵓⵖⴰ ⴰⵜⴻⵏ ⴷ ⵉⵃⴻⵏⵊⵉⵔⴻⵏ ⵏ ⵛⵉⵎⵄⵉ.

11 ⵢⴰⵃⴰⵜ ⵜⵓⵖⴰ-ⵜ ⴷ ⴰⵥⴻⴵⵉⴼ ⵓ ⵣⵉⵥⴰ ⵡⵉⵙⵙ ⵜⵏⴰⵢⴻⵏ, ⵎⴰⵛⴰ ⵢⴰⵄⵓⵛ ⴷ ⴱⴰⵔⵉⵄⴰ ⵡⴰⵔ ⵜⵓⵖⵉ ⵖⴰⵔⵙⴻⵏ ⵉⵃⴻⵏⵊⵉⵔⴻⵏ ⴰⵟⵟⴰⵙ. ⵖⴰⵔ ⵍⴻⵃⵙⴰⴱ ⵜⵜⵡⴰⵃⴻⵙⴱⴻⵏ ⵏⵉⵜⵏⵉ ⴷ ⵉⵊⵊ ⵏ ⵍⴰⴵ.

12 ⵜⴰⵔⵡⴰ ⵏ ⵇⴰⵀⴰⵜ ⵜⵓⵖⴰ ⴰⵜⴻⵏ ⴷ ⵄⴰⵎⵔⴰⵎ, ⵢⵉⵚⵀⴰⵔ, ⵃⴰⴱⵔⵓⵏ ⴷ ⵄⵓⵥⵥⵉⵢⵉⵍ, ⴰⵔⴻⴱⵄⴰ ⵏ ⵢⴻⵔⵢⴰⵥⴻⵏ.

13 ⵉⵃⴻⵏⵊⵉⵔⴻⵏ ⵏ ⵄⴰⵎⵔⴰⵎ ⵜⵓⵖⴰ ⴰⵜⴻⵏ ⴷ ⵀⴰⵔⵓⵏ ⴷ ⵎⵓⵙⴰ.

ⵉⵜⵜⵡⴰⵄⵥⴻⵍ ⵀⴰⵔⵓⵏ ⵃⵉⵎⴰ ⴰⴷ ⵜ ⵉⵜⵜⵡⴰⵇⴻⴷⴷⴻⵙ ⴷ ⴰⵎⵇⴻⴷⴷⴻⵙ ⵇⴰⵄ, ⵏⴻⵜⵜⴰ ⴷ ⵉⵃⴻⵏⵊⵉⵔⴻⵏ ⵏⵏⴻⵙ, ⵉ ⵍⴻⴱⴷⴰ, ⵃⵉⵎⴰ ⴰⴷ ⵉⵙⵙⴱⴻⵅⵅⴰⵔ ⵊⵊⴰⵡⵉ ⵥⵥⴰⵜ ⵉ ⵡⵓⴷⴻⵎ ⵏ ⵙⵉⴷⵉ, ⵃⵉⵎⴰ ⴰⴷ ⴰⵙ ⵉⵙⴻⵅⵅⴰⵔ ⵓ ⵃⵉⵎⴰ ⴰⴷ ⵉⴱⴰⵔⴻⴽ ⵙ ⵢⵉⵙⴻⵎ ⵏⵏⴻⵙ ⵉ ⵍⴻⴱⴷⴰ.

14 ⵜⴰⵔⵡⴰ ⵏ ⵎⵓⵙⴰ, ⴰⵔⵢⴰⵥ ⵏ ⴰⵔⴻⴱⴱⵉ, ⵜⵜⵡⴰⵍⴰⵖⴰⵏ ⵊⴰⵔ ⵜⴻⵇⴱⵉⵞ ⵏ ⵍⴰⵡⵉ.

15 ⵜⴰⵔⵡⴰ ⵏ ⵎⵓⵙⴰ ⵜⵓⵖⴰ ⴰⵜⴻⵏ ⴷ ⵊⴰⵔⵛⵓⵎ ⴷ ⵉⵍⵉⵄⴰⵥⴰⵔ.

16 ⵣⴻⴳ ⵉⵃⴻⵏⵊⵉⵔⴻⵏ ⵏ ⵊⴰⵔⵛⵓⵏ ⵜⵓⵖⴰ ⵛⴰⴱⵓⵡⵉⵍ ⴷ ⴰⵥⴻⴵⵉⴼ.

17 ⵎⵎⵉⵙ ⵏ ⵉⵍⵉⵄⴰⵥⴰⵔ ⵜⵓⵖⴰ ⴷ ⴰⵥⴻⴵⵉⴼ ⵔⴰⵃⴰⴱⵢⴰ. ⵡⴰⵔ ⵜⵓⵖⵉ ⵖⴰⵔⴻⵙ ⵖⴰⵔ ⵉⵍⵉⵄⴰⵥⴰⵔ ⵉⵃⴻⵏⵊⵉⵔⴻⵏ ⵏⵏⴻⵖⵏⵉ. ⵉⵃⴻⵏⵊⵉⵔⴻⵏ ⵏ ⵔⴰⵃⴰⴱⵢⴰ ⵎⴰⵛⴰ ⵜⵓⵖⴰ ⴰⵜⴻⵏ ⴷⴻⴳ ⵡⴰⵟⵟⴰⵙ.

18 ⵣⴻⴳ ⵉⵃⴻⵏⵊⵉⵔⴻⵏ ⵏ ⵢⵉⵚⵀⴰⵔ ⵜⵓⵖⴰ ⵛⴰⵍⵓⵎⵉⵜ ⴷ ⴰⵥⴻⴵⵉⴼ.

19 ⵣⴻⴳ ⵉⵃⴻⵏⵊⵉⵔⴻⵏ ⵏ ⵃⴰⴱⵔⵓⵏ ⵜⵓⵖⴰ ⵢⴰⵔⵉⵢⴰ ⴷ ⴰⵥⴻⴵⵉⴼ, ⴰⵎⴰⵔⵢⴰ ⵡⵉⵙⵙ ⵜⵏⴰⵢⴻⵏ, ⵢⴰⵃⵥⵉⵢⵉⵍ ⵡⵉⵙⵙ ⵟⵔⴰⵜⴰ ⴷ ⵢⴰⵇⵎⴰⵄⴰⵎ ⵡⵉⵙⵙ ⴰⵔⴻⴱⵄⴰ.

20 ⵣⴻⴳ ⵉⵃⴻⵏⵊⵉⵔⴻⵏ ⵏ ⵄⵓⵥⵥⵉⵢⵉⵍ ⵜⵓⵖⴰ ⵎⵉⵅⴰ ⴷ ⴰⵥⴻⴵⵉⴼ, ⵓ ⵢⴰⵛⵉⵢⴰ ⵡⵉⵙⵙ ⵜⵏⴰⵢⴻⵏ.

21 ⵜⴰⵔⵡⴰ ⵏ ⵎⴰⵔⴰⵔⵉ ⵜⵓⵖⴰ ⴰⵜⴻⵏ ⴷ ⵎⴰⵃⵍⵉ ⴷ ⵎⵓⵛⵉ.

ⵜⴰⵔⵡⴰ ⵏ ⵎⴰⵃⵍⵉ ⵜⵓⵖⴰ ⴰⵜⴻⵏ ⴷ ⴰⵍⵉⵄⴰⵥⴰⵔ ⴷ ⵇⵉⵙ. 22 ⴰⵍⵉⵄⴰⵥⴰⵔ ⵉⵎⵎⵓⵜ ⵓ ⵏⴻⵜⵜⴰ ⵡⴰⵔ ⵖⴰⵔⴻⵙ ⵜⵓⵖⵉ ⴱⵓ ⵉⵃⴻⵏⵊⵉⵔⴻⵏ, ⵎⴰⵛⴰ ⵢⴻⵙⵙⵉⵙ ⵡⴰⵀ. ⵜⴰⵔⵡⴰ ⵏ ⵇⵉⵙ, ⴰⵢⵜⵎⴰⵜⵙⴻⵏ, ⵉⵡⵢⴻⵏ ⵜⴻⵏⵜ ⴷ ⵜⴰⵎⵖⴰⵔⵜ.

23 ⵜⴰⵔⵡⴰ ⵏ ⵎⵓⵛⵉ ⵜⵓⵖⴰ ⴰⵜⴻⵏ ⴷ ⵎⴰⵃⵍⵉ ⴷ ⵄⴰⴷⵉⵔ ⴷ ⵢⴰⵔⵉⵎⵓⵜ, ⵜⵍⴰⵜⴰ ⵏ ⵢⴻⵔⵢⴰⵥⴻⵏ.

24 ⵉⵏⴰ ⵜⵓⵖⴰ ⴰⵜⴻⵏ ⴷ ⵉⵃⴻⵏⵊⵉⵔⴻⵏ ⵏ ⵍⴰⵡⵉ, ⵉⵏⵏⵉ ⵉⵜⵜⵡⴰⵙⴻⵜⵜⴼⴻⵏ ⵄⵍⴰⵃⵙⴰⴱ ⵍⴰⴵⴰⵜ ⵏⵙⴻⵏ, ⵄⵍⴰⵃⵙⴰⴱ ⵉⵥⴻⴵⵉⴼⴻⵏ ⵏ ⵍⴰⴵⴰⵜ, ⵉⵏⵏⵉ ⵉⵜⵜⵡⴰⵥⴻⵎⵎⴻⵏ ⵖⴰⵔ ⵍⴻⵃⵙⴰⴱ ⵏⵙⴻⵏ ⵙ ⵍⵇⴻⴷⴷ ⵏ ⵉⵙⵎⴰⵡⴻⵏ ⵏⵙⴻⵏ ⴰⵥⴻⴵⵉⴼ ⴰⵥⴻⴵⵉⴼ, ⵉⵏⵏⵉ ⵉⴳⴳⵉⵏ ⵜⴰⵙⴻⵅⵅⴰⵔⵜ ⵉ ⵜⴰⴷⴷⴰⵔⵜ ⵏ ⵙⵉⴷⵉ, ⵥⵉ ⵄⵉⵛⵔⵉⵏ ⵉⵙⴻⴳⴳⵯⵓⵙⴰ ⵙⴻⵏⵏⴻⵊ. 25 ⵎⴰⵖⴰⵔ ⴷⴰⵡⵓⴷ ⵜⵓⵖⴰ ⵉⵏⵏⴰ: “ⵙⵉⴷⵉ, ⴰⵔⴻⴱⴱⵉ ⵏ ⵉⵙⵔⴰⵉⵍ, ⵉⵡⵛⴰ ⵍⵀⵓⴷⵏⴻⵜ ⵉ ⵍⴳⴻⵏⵙ ⵏⵏⴻⵙ ⵓ ⵏⴻⵜⵜⴰ ⴰⴷ ⵉⵥⴷⴻⵖ ⴷⵉ ⵓⵔⵛⴰⵍⵉⵎ ⵉ ⵍⴻⴱⴷⴰ.” 26 ⵏⴻⵜⵜⴰ ⵉⵏⵏⴰ ⵄⴰⵡⴻⴷ ⵅ ⵉⵍⴰⵡⵉⵢⵢⴻⵏ: “ⵏⵉⵜⵏⵉ ⵡⴰⵔ ⵃⴷⵉⵊⴻⵏ ⵄⴰⴷ ⴰⴷ ⴰⵔⴱⵓⵏ ⵜⴰⵥⴻⴷⴷⵉⵖⵜ ⴷ ⵎⴰⵔⵔⴰ ⵍⴻⵇⵛⵓⵄ ⵏⵏⵉ ⴷⴷ ⵉⵜⵜⴰⵙⴻⵏ ⴰⴽ-ⴷ ⵜⵙⴻⵅⵅⴰⵔⵜ.” 27 ⵎⵉⵏⵥⵉ ⵄⵍⴰⵃⵙⴰⴱ ⴰⵡⴰⵍⴻⵏ ⵉⵏⴻⴳⴳⵓⵔⴰ ⵏ ⴷⴰⵡⵓⴷ, ⵜⵓⵖⴰ ⵍⵇⴻⴷⴷ ⵏ ⵉⵃⴻⵏⵊⵉⵔⴻⵏ ⵏ ⵍⴰⵡⵉ ⴷ ⵉⵏⵏⵉ ⵉⴵⴰⵏ ⵥⵉ ⵄⵉⵛⵔⵉⵏ ⵉⵙⴻⴳⴳⵯⵓⵙⴰ ⵙⴻⵏⵏⴻⵊ. 28 ⵏⵉⵜⵏⵉ ⴱⴻⴷⴷⴻⵏ ⴰⴽ-ⴷ ⵉⵃⴻⵏⵊⵉⵔⴻⵏ ⵏ ⵀⴰⵔⵓⵏ ⴷⵉ ⵜⵙⴻⵅⵅⴰⵔⵜ ⴷⵉ ⵜⴰⴷⴷⴰⵔⵜ ⵏ ⵙⵉⴷⵉ, ⵖⴰⵔ ⵓⵃⴻⵟⵟⵓ ⵅ ⵍⴻⵎⵔⴰⵃⴰⵜ ⴱⴰⵔⵔⴰ ⵓ ⵅ ⵉⵅⵅⴰⵎⴻⵏ ⵏ ⵍⴻⵅⵥⴻⵏ ⵓ ⵅ ⵓⵙⵉⵥⴷⴻⴳ ⵏ ⵎⴰⵔⵔⴰ ⵍⴻⵇⵛⵓⵄ ⵉⵇⴻⴷⴷⵙⴻⵏ ⴷ ⵍⵅⴻⴷⵎⴻⵜ ⵏ ⵜⵙⴻⵅⵅⴰⵔⵜ ⴷⵉ ⵜⴰⴷⴷⴰⵔⵜ ⵏ ⴰⵔⴻⴱⴱⵉ, 29 ⵓⵎⵉ ⵙⵙⵡⴻⵊⴷⴻⵏ ⵏⵉⵜⵏⵉ ⴰⵖⵔⵓⵎ ⵏ ⵡⴻⵙⵛⴰⵏ ⴷ ⵡⴰⵔⴻⵏ ⵏ ⵙⵙⵎⵉⴷ ⵉ ⵜⴻⵡⵀⵉⴱⵜ ⵏ ⵍⵖⵉⴵⴻⵜ ⴷ ⵜⴻⵍⴼⴰⴼ ⴱⵍⴰ ⴰⵏⵜⵓⵏ, ⵓⵎⵉ ⵙⵙⵅⴻⴷⵎⴻⵏ ⴰⵅⴷⵉⵎ ⵓ ⴳⴳⵯⵉⵏ ⴰⵔⴻⵛⵜⵉ ⵓ ⵎⴰⵏ ⴰⵢⴰ ⵉ ⵎⴰⵔⵔⴰ ⵍⵇⴻⴷⴷ ⴷ ⵎⴰⵔⵔⴰ ⵍⴻⵇⵢⴰⵙ. 30 ⵜⵓⵖⴰ ⵉⵜⵜⵅⴻⵚⵚⴰ ⴰⴷ ⴱⴻⴷⴷⴻⵏ ⵡⴻⵊⴷⴻⵏ ⴷⵉ ⴽⵓⵍ ⵜⵓⴼⴼⵓⵜ ⵃⵉⵎⴰ ⴰⴷ ⵚⴻⴱⴱⵃⴻⵏ ⵓ ⴰⴷ ⵙⵙⴻⵎⵖⴰⵔⴻⵏ ⵙⵉⴷⵉ, ⴰⵎⵎⵓ ⵓⵍⴰ ⵖⴰⵔ ⵜⵎⴻⴷⴷⵉⵜ, 31 ⵓⵍⴰ ⵍⴰⵎⵉ ⴷⴷ-ⵢⵉⵡⵢⴻⵏ ⵎⴰⵔⵔⴰ ⵜⵉⵖⴰⵔⵚⴰ ⵏ ⵡⴻⵛⵎⴰⴹ ⵉ ⵙⵉⴷⵉ, ⴷⴻⴳ ⵡⵓⵙⵙⴰⵏ ⵏ ⵙⵙⴻⴱⵜ, ⴷⴻⴳ ⵡⵓⵙⵙⴰⵏ ⵏ ⵓⵢⵓⵔ ⵏ ⵊⴷⵉⴷ ⵓ ⴷⵉ ⵍⴻⵄⵢⵓⴷⴰⵜ ⵉⵜⵜⵡⴰⴳⴳⴻⵏ, ⵄⵍⴰⵃⵙⴰⴱ ⵍⵇⴻⴷⴷ ⵉ ⵢⴻⴵⴰ ⴷⵉ ⵍⴼⴰⵔⵉⴹⴰ ⵉ ⴷ ⴰⵙ ⵉⵜⵜⵍⵉⵇⴰⵏ, ⴱⵍⴰ ⴰⵇⴻⵟⵟⵓ ⵥⵥⴰⵜ ⵉ ⵡⵓⴷⴻⵎ ⵏ ⵙⵉⴷⵉ. 32 ⵉⵜⵜⵅⴻⵚⵚⴰ ⴰⵙⴻⵏ ⴰⴷ ⵃⴹⴰⵏ ⵜⴰⵡⴻⵇⵇⴰⴼⵜ ⵏⵙⴻⵏ ⵉ ⵓⵇⵉⴹⵓⵏ ⵏ ⵓⵎⵙⴰⴳⴰⵔ ⴷ ⵜⵡⴻⵇⵇⴰⴼⵜ ⵏⵙⴻⵏ ⵉ ⵣⵥⴰⵡⴻⵛⵜ ⵉⵇⴻⴷⴷⵙⴻⵏ ⴷ ⵜⵡⴻⵇⵇⴰⴼⵜ ⵏⵙⴻⵏ ⵖⴰⵔ ⵓⵖⴻⵥⴷⵉⵙ ⵏ ⵉⵃⴻⵏⵊⵉⵔⴻⵏ ⵏ ⵀⴰⵔⵓⵏ, ⴰⵢⵜⵎⴰⵜⵙⴻⵏ, ⵖⴰⵔ ⵜⵙⴻⵅⵅⴰⵔⵜ ⵏ ⵜⴰⴷⴷⴰⵔⵜ ⵏ ⵙⵉⴷⵉ.