ⴰⵎⴻⵏⵖⵉ ⵏ ⵢⵓⵔⴰⵎ, ⴰⵊⴻⴵⵉⴷ ⵏ ⵉⵙⵔⴰⵉⵍ, ⴹⵉⴷⴷ ⵉ ⵎⵓ’ⴰⴱ
3
1 ⴷⴻⴳ ⵓⵙⴻⴳⴳⵯⴰⵙ ⵡⵉⵙⵙ ⵜⵎⴻⵏⵟⴰⵛ ⵏ ⵢⴰⵀⵓⵛⴰⴼⴰⵟ, ⴰⵊⴻⴵⵉⴷ ⵏ ⵢⴰⵀⵓⴷⴰ, ⵉⴷⵡⴻⵍ ⵢⵓⵔⴰⵎ, ⵎⵎⵉⵙ ⵏ ⴰⵅⴰⴱ, ⴷ ⴰⵊⴻⴵⵉⴷ ⵅ ⵉⵙⵔⴰⵉⵍ ⴷⵉ ⵙⴰⵎⴰⵔⵢⴰ. ⵏⴻⵜⵜⴰ ⵉⵃⴽⴻⵎ ⵜⴻⵏⵄⴰⵛ ⵏ ⵉⵙⴻⴳⴳⵯⵓⵙⴰ. 2 ⵏⴻⵜⵜⴰ ⵉⴳⴳⴰ ⵎⵉⵏ ⵉⴵⴰⵏ ⴷ ⴰⵄⴻⴼⴼⴰⵏ ⴷⵉ ⵜⵉⵟⵟⴰⵡⵉⵏ ⵏ ⵙⵉⴷⵉ, ⵎⴰⵛⴰ ⵡⴰⵔ ⵜ ⵉⴳⴳⵉ ⴰⵎⵎⵓ ⴷ ⵜⴰⵄⴻⴼⴼⴰⵏⵜ ⴰⵎ ⴱⴰⴱⴰⵙ ⴷ ⵢⴻⵎⵎⴰⵙ, ⵎⴰⵖⴰⵔ ⵉⴽⴽⴻⵙ ⴰⵎⴰⵢⴹⵓ ⵉⵇⴻⴷⴷⵙⴻⵏ ⵏ ⴱⴰⵄⴰⵍ ⵡⴻⵏⵏⵉ ⵉⴳⴳⴰ ⴱⴰⴱⴰⵙ. ■ 3 ⵎⴰⵛⴰ ⵏⴻⵜⵜⴰ ⵉⵇⵇⵉⵎ ⵉⵎⴻⵏⵏⴻⵄ ⴷⵉ ⴷⴷⵏⵓⴱ ⵏ ⵢⴰⵔⵓⴱⵄⴰⵎ, ⵎⵎⵉⵙ ⵏ ⵏⴰⴱⴰⵟ, ⵡⴻⵏⵏⵉ ⵢⴰⵔⵔⵉⵏ ⵉⵙⵔⴰⵉⵍ ⴰⴷ ⵉⵅⴹⴰ, ⵏⴻⵜⵜⴰ ⵡⴰⵔ ⵉⵃⴻⵢⵢⴻⴷ ⵅ ⴷⴷⵏⵓⴱ ⵏ ⵢⴰⵔⵓⴱⵄⴰⵎ. 4 ⵎⵉⵛⴰⵄ, ⴰⵊⴻⴵⵉⴷ ⵏ ⵎⵓ’ⴰⴱ, ⵜⵓⵖⴰ ⴷ ⴰⵎⴻⴽⵙⴰⵡ ⵓ ⵜⵓⵖⴰ ⵉⵜⵜⵉⵛ ⵉ ⵓⵊⴻⴵⵉⴷ ⵏ ⵉⵙⵔⴰⵉⵍ ⵎⵢⴰⵜ-ⴰⵍⴻⴼ ⵏ ⵉⵥⵎⴰⵔⴻⵏ ⴷ ⵜⴰⴹⵓⴼⵜ ⵏ ⵎⵢⴰⵜ-ⴰⵍⴻⴼ ⵏ ⵉⵛⴰⵔⵔⵉⵢⵢⴻⵏ. □ 5 ⵍⴰⵎⵉ ⵉⵎⵎⵓⵜ ⴰⵅⴰⴱ, ⵉⵎⵙⴰⵔ, ⴰⵇⴰ ⵉⵖⴻⵡⵡⴻⵖ ⵓⵊⴻⴵⵉⴷ ⵏ ⵎⵓ’ⴰⴱ ⵅ ⵓⵊⴻⴵⵉⴷ ⵏ ⵉⵙⵔⴰⵉⵍ. ■ 6 ⴷⴻⴳ ⵡⴰⵙⵙ ⵏⵏⵉ ⵉⴼⴼⴻⵖ-ⴷⴷ ⵓⵊⴻⴵⵉⴷ ⵢⵓⵔⴰⵎ ⵥⵉ ⵙⴰⵎⴰⵔⵢⴰ ⵓⵛⴰ ⵉⵙⴻⴷⴷ ⵎⴰⵔⵔⴰ ⵉⵙⵔⴰⵉⵍ. 7 ⵉⵟⵟⴻⴼ ⴰⴱⵔⵉⴷ ⵓⵛⴰ ⵉⵙⵙⴻⴽⴽ ⵉⵊⵊ ⵏ ⵓⵔⴻⵇⵇⴰⵙ ⵖⴰⵔ ⵢⴰⵀⵓⵛⴰⴼⴰⵟ, ⴰⵊⴻⴵⵉⴷ ⵏ ⵢⴰⵀⵓⴷⴰ, ⵉⵏⵏⴰ: “ⴰⵊⴻⴵⵉⴷ ⵏ ⵎⵓ’ⴰⴱ ⵉⵖⴻⵡⵡⴻⵖ ⵅⴰⴼⵉ. ⵎⵎⴰ ⵛⴻⴽ ⴰⴷ ⴽⵉⴷⵉ ⵜⴻⴼⴼⵖⴻⴷ ⴷⴻⴳ ⵓⵎⴻⵏⵖⵉ ⴰⴽ-ⴷ ⵎⵓ’ⴰⴱ?” ⵓⵛⴰ ⵏⴻⵜⵜⴰ ⵉⵏⵏⴰ: “ⵏⴻⵛⵛ ⴰⴷ ⴼⴼⵖⴻⵖ ⴰⴽⵉⴷⴻⴽ. ⵏⴻⵛⵛ ⴰⴷ ⵉⵍⵉⵖ ⴰⵎ ⵛⴻⴽ, ⵍⴳⴻⵏⵙ ⵉⵏⵓ ⴰⵎ ⵍⴳⴻⵏⵙ ⵏⵏⴻⴽ ⴷ ⵉⵢⵙⴰⵏ ⵉⵏⵓ ⴰⵎ ⵉⵢⵙⴰⵏ ⵏⵏⴻⴽ.” ■ 8 ⵉⵏⵏⴰ: “ⵅ ⵎⴰⵏ ⴰⴱⵔⵉⴷ ⵉ ⵖⴰ ⵏⴳⴻⵄⵄⴻⴷ?” ⵏⴻⵜⵜⴰ ⵉⵏⵏⴰ: “ⵅ ⵡⴻⴱⵔⵉⴷ ⵏ ⵍⴻⵅⵍⴰ ⵏ ⵉⴷⵓⵎ.”
9 ⵍⴻⵅⴷⴻⵏⵏⵉ ⵢⵓⵢⵓⵔ ⵓⵊⴻⴵⵉⴷ ⵏ ⵉⵙⵔⴰⵉⵍ ⴷ ⵓⵊⴻⴵⵉⴷ ⵏ ⵢⴰⵀⵓⴷⴰ ⴷ ⵓⵊⴻⴵⵉⴷ ⵏ ⵉⴷⵓⵎ. ⵏⵉⵜⵏⵉ ⵏⵏⴹⴻⵏ ⵉⵊⵊ ⵏ ⵡⴻⴱⵔⵉⴷ ⵏ ⵙⴻⴱⵄⴰ ⵏ ⵡⵓⵙⵙⴰⵏ ⵓⵛⴰ ⵡⴰⵔ ⵜⵓⵖⵉ ⴷⵉⵏ ⴰⵎⴰⵏ ⵉ ⵍⵄⴻⵙⴽⴰⵔ ⵓ ⵉ ⵍⴻⴱⵀⴰⵢⴻⵎ ⵏⵏⵉ ⵜⴻⵏ ⵉⴹⴼⴰⵔⴻⵏ.
10 ⵅⴻⵏⵏⵉ ⵉⵏⵏⴰ ⵓⵊⴻⴵⵉⴷ ⵏ ⵉⵙⵔⴰⵉⵍ: “ⴰⵅⴻⵢⵢⴻⴱ ⵉ ⵏⴻⵛⵛⵉⵏ ⵓⵎⵉ ⴷⴷ-ⵉⵍⴰⵖⴰ ⵙⵉⴷⵉ ⵜⵍⴰⵜⴰ ⵏ ⵉⵊⴻⴵⵉⴷⴻⵏ-ⴰ ⵃⵉⵎⴰ ⴰⴷ ⵜⴻⵏ ⵉⵡⵛ ⴷⴻⴳ ⵓⴼⵓⵙ ⵏ ⵎⵓ’ⴰⴱ!”
11 ⵓⵛⴰ ⵢⴰⵀⵓⵛⴰⴼⴰⵟ ⵉⵏⵏⴰ: “ⵎⴰ ⵡⴰⵔ ⴷⴰ ⵉⴵⵉ ⵉⵊⵊ ⵏ ⵓⵏⴰⴱⵉ ⵏ ⵙⵉⴷⵉ ⵡⴻⵏⵏⵉ ⵉ ⵥⵉ ⵖⴰ ⵏⴻⵙⵙⴻⵇⵙⴰ ⵙⵉⴷⵉ?” ⵅⴻⵏⵏⵉ ⵢⴰⵔⵔⴰ-ⴷⴷ ⵉⵊⵊⴻⵏ ⵥⴻⴳ ⵉⵎⵙⴻⵅⵅⴰⵔⴻⵏ ⵏ ⵓⵊⴻⴵⵉⴷ ⵏ ⵉⵙⵔⴰⵉⵍ, ⵉⵏⵏⴰ: “ⵉⵍⵉⵛⴰⵄ, ⵎⵎⵉⵙ ⵏ ⵛⴰⴼⴰⵜ, ⵡⴻⵏⵏⵉ ⵉⵥⴻⴵⵄⴻⵏ ⴰⵎⴰⵏ ⵅ ⵉⴼⴰⵙⵙⴻⵏ ⵏ ⵉⵍⵉⵢⴰ, ⴰⵇⴰ-ⵜ ⴷⴰⵏⵉⵜⴰ!” ■
12 ⵓⵛⴰ ⵉⵏⵏⴰ ⵢⴰⵀⵓⵛⴰⴼⴰⵟ: “ⵖⴰⵔⴻⵙ ⵏⴻⵜⵜⴰ ⴰⵡⴰⵍ ⵏ ⵙⵉⴷⵉ.” ⵓⵛⴰ ⴰⵊⴻⴵⵉⴷ ⵏ ⵉⵙⵔⴰⵉⵍ ⴷ ⵢⴰⵀⵓⵛⴰⴼⴰⵟ ⴷ ⵓⵊⴻⴵⵉⴷ ⵏ ⵉⴷⵓⵎ ⵀⵡⴰⵏ-ⴷⴷ ⵖⴰⵔⴻⵙ.
13 ⵉⵍⵉⵛⴰⵄ ⵉⵏⵏⴰ ⵉ ⵓⵊⴻⴵⵉⴷ ⵏ ⵉⵙⵔⴰⵉⵍ: “ⵎⵉⵏ ⴷⵉⵏⵏⵉ ⵊⴰⵔ ⴰⵢⵉ-ⴷⴷ ⴷ ⵛⴻⴽ? ⵓⵢⵓⵔ ⵖⴰⵔ ⵉⵏⴰⴱⵉⵢⵢⴻⵏ ⵏ ⴱⴰⴱⴰⵛ ⵓ ⵖⴰⵔ ⵉⵏⴰⴱⵉⵢⵢⴻⵏ ⵏ ⵢⴻⵎⵎⴰⵛ!” ⵎⴰⵛⴰ ⴰⵊⴻⴵⵉⴷ ⵏ ⵉⵙⵔⴰⵉⵍ ⵢⴰⵔⵔⴰ-ⴷⴷ ⵅⴰⵙ: “ⵍⵍⴰ, ⵎⴰⵖⴰⵔ ⵙⵉⴷⵉ ⵉⵍⴰⵖⴰ-ⴷⴷ ⵉ ⵜⵍⴰⵜⴰ ⴰⵢⴰ ⵏ ⵉⵊⴻⴵⵉⴷⴻⵏ ⵖⴰⵔ ⴷⴰ, ⵃⵉⵎⴰ ⴰⴷ ⵜⴻⵏ ⵉⵡⵛ ⴷⴻⴳ ⵓⴼⵓⵙ ⵏ ⵎⵓ’ⴰⴱ.” ■
14 ⵉⵍⵉⵛⴰⵄ ⵢⴰⵔⵔⴰ-ⴷⴷ ⵅⴰⵙ: “ⵙ ⵜⵉⴷⴻⵜⵜ ⴰⵎ ⵉⴷⴷⴰⵔ ⵙⵉⴷⵉ ⵏ ⵍⵄⴻⵙⴽⴰⵔⴰⵜ ⵏⵏⵉ ⵓⵎⵉ ⴱⴻⴷⴷⴻⵖ ⵥⵥⴰⵜ ⵉ ⵡⵓⴷⴻⵎ ⵏⵏⴻⵙ, ⵎⵍⵉ ⵏⴻⵛⵛ ⵡⴰⵔ ⵖⴰⵔⵉ ⴱⵓ ⵓⵡⴻⵇⵇⴰⵔ ⵉ ⵢⴰⵀⵓⵛⴰⴼⴰⵟ, ⴰⵊⴻⴵⵉⴷ ⵏ ⵢⴰⵀⵓⴷⴰ, ⴰⴷ ⵢⵉⵍⵉ ⵏⴻⵛⵛ ⵡⴰⵔ ⵛⴻⴽ ⵃⴻⵙⵙⴱⴻⵖ ⵓ ⵡⴰⵔ ⴷⴰⵢⴻⴽ ⵅⴻⵥⵥⴰⵔⴻⵖ. ■
15 ⵍⴻⵅⵅⵓ ⵎⴰⵛⴰ ⴰⵡⵉ ⴰⵢⵉ-ⴷⴷ ⵉⵊⵊ ⵉⵛⵛⴰⵜ ⵅ ⵉⴼⵉⵍⴰⵏ. ⵍⴰⵎⵉ ⵜⵓⵖⴰ ⵉⵜⵜⵉⵔⴰⵔ ⵡⴻⵏⵏⵉ ⵉⵛⵛⴰⵜⴻⵏ ⵅ ⵉⴼⵉⵍⴰⵏ, ⵉⵎⵙⴰⵔ ⴰⵇⴰ ⴰⴼⵓⵙ ⵏ ⵙⵉⴷⵉ ⵢⴰⵔⵙⴰ-ⴷⴷ ⵅⴰⵙ.
16 ⵉⵏⵏⴰ ⵏⴻⵜⵜⴰ: “ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ: ‘ⴳⴳⴻⵎ ⴷⵉ ⵜⴻⵖⵥⵓⵔⵜ-ⴰ ⵜⴰⵍⵢⵉⵡⵉⵏ ⴷ ⵜⴻⵍⵢⵉⵡⵉⵏ ⴽⵜⴰⵔ!’
17 ⵎⴰⵖⴰⵔ ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ: ‘ⴽⴻⵏⵏⵉⵡ ⵡⴰⵔ ⵜⵥⴰⵔⵔⴻⵎ ⴰⵙⴻⵎⵎⵉⴹ ⵓⵍⴰ ⴷ ⴰⵏⵥⴰⵔ, ⵄⴰⴷ ⵎⴰⵛⴰ ⵜⴰⵖⵥⵓⵔⵜ-ⴰ ⴰⴷ ⵜⴻⵛⵛⵓⵔ ⵙ ⵡⴰⵎⴰⵏ ⵓⵛⴰ ⴽⴻⵏⵏⵉⵡ ⴰⴷ ⵜⴻⵙⵙⵡⴻⵎ, ⴽⴻⵏⵏⵉⵡ ⵓⵍⴰ ⴷ ⵍⴻⴱⵀⴰⵢⴻⵎ ⵏⵡⴻⵎ ⴷ ⵍⵎⴰⵍ ⵏⵡⴻⵎ.’
18 ⵎⴰⵏ ⴰⵢⴰ ⵄⴰⴷ ⴷⵔⵓⵙ ⴷⵉ ⵜⵉⵟⵟⴰⵡⵉⵏ ⵏ ⵙⵉⴷⵉ, ⵏⴻⵜⵜⴰ ⴰⴷ ⴰⵡⴻⵎ ⵉⵡⵛ ⵓⵍⴰ ⴷ ⵎⵓ’ⴰⴱ ⴷⴻⴳ ⵉⴼⴰⵙⵙⴻⵏ ⵏⵡⴻⵎ.
19 ⴽⴻⵏⵏⵉⵡ ⴰⴷ ⵜⴻⵡⵜⴻⵎ ⴽⵓⵍ ⵜⴰⵏⴷⵉⵏⵜ ⵉⴼⴰⵔⵢⴻⵏ ⵙ ⵉⵖⴻⴱⵔⴰⵡⴻⵏ ⵓ ⴽⵓⵍ ⵜⴰⵏⴷⵉⵏⵜ ⵉⵛⴻⵏⵄⴻⵏ ⵓⵛⴰ ⴰⴷ ⵜⵇⴻⴹⵄⴻⵎ ⴽⵓⵍ ⵜⴰⵛⴻⵊⵊⴰⵔⵜ ⵉⵚⴻⴱⵃⴻⵏ ⵓ ⴰⴷ ⵜⴱⴻⵍⵍⵄⴻⵎ ⵎⴰⵔⵔⴰ ⵍⵄⵓⵏⵚⴰⵔⴰⵜ ⵏ ⵡⴰⵎⴰⵏ ⵓ ⴰⴷ ⵜⴹⴻⵢⵢⵄⴻⵎ ⴽⵓⵍ ⵉⵢⵢⴰⵔ ⵉⵚⴻⴱⵃⴻⵏ ⵏ ⵜⴻⵎⵎⵓⵔⵜ ⵙ ⵢⴻⵥⵔⴰ.”
20 ⵓⵛⴰ ⴷⵉ ⵜⵉⵡⴻⵛⵛⴰ ⵖⴰⵔ ⵜⵙⴰⵄⵄⴻⵜ ⵉ ⵖⴰⵔ ⴷⴷ-ⵜⵜⴰⵡⵢⴻⵏ ⵜⴰⵡⵀⵉⴱⵜ ⵏ ⵍⵖⵉⴵⴻⵜ, ⵉⵎⵙⴰⵔ, ⴰⵇⴰ ⵓⵙⵉⵏ-ⴷⴷ ⵡⴰⵎⴰⵏ ⵥⵉ ⵉⴷⵓⵎ ⵓⵛⴰ ⵜⵖⴻⴱⴱⴰ ⵜⴻⵎⵎⵓⵔⵜ ⵙ ⵡⴰⵎⴰⵏ. 21 ⵎⵓ’ⴰⴱ ⴰⵎ ⵉⴽⵎⴻⵍ ⵉⵙⵍⴰ ⴱⴻⵍⵍⵉ ⵉⵊⴻⴵⵉⴷⴻⵏ ⴼⴼⵖⴻⵏ-ⴷⴷ ⵉ ⵓⵎⴻⵏⵖⵉ ⴰⴽⵉⴷⵙⴻⵏ ⵓⵛⴰ ⵅⴻⵏⵏⵉ ⵍⴰⵖⴰⵏ-ⴷⴷ ⵅ ⵎⴰⵔⵔⴰ ⵢⴻⵏⵏⵉ ⵉⵥⴻⵎⵎⴰⵔⴻⵏ ⴰⴷ ⵙⴻⵏⵏⵃⴻⵏ ⵙ ⵡⴻⴱⵢⴰⵙ ⵏ ⵍⴻⵙⵏⴰⵃ ⵓⵍⴰ ⴷ ⴽⵓⵍ ⵉⵊⵊ ⵙⴻⵏⵏⴻⵊ ⵉ ⵓⵢⴰ, ⵓⵛⴰ ⵏⵉⵜⵏⵉ ⵙⴻⵜⵜⴼⴻⵏ ⵉⵅⴻⴼ ⵏⵙⴻⵏ ⵖⴰⵔ ⵡⴻⵢⵎⵉⵔ. 22 ⵏⵉⵜⵏⵉ ⴽⴽⴰⵔⴻⵏ ⵖⴰⵔ ⵜⵓⴼⴼⵓⵜ ⵏ ⵚⵚⴱⴻⵃ ⵓ ⵓⵎⵉ ⴷⴷ-ⵜⴻⵏⵇⴰⵔ ⵜⴼⵓⵛⵜ ⵅ ⵡⴰⵎⴰⵏ, ⵥⵔⵉⵏ ⵉⵎⵓ’ⴰⴱⵉⵢⵢⴻⵏ ⵉⵏⵏⵉ ⵅ ⵓⵊⴻⵎⵎⴰⴹⵉⵏ ⴰⵇⴰ ⴰⵎⴰⵏ ⴷ ⵉⵥⴻⴳⴳⵯⴰⵖⴻⵏ, ⴰⵎ ⵉⴷⴰⵎⵎⴻⵏ. 23 ⵏⵉⵜⵏⵉ ⵏⵏⴰⵏ: “ⵉⵏⴰ ⴷ ⵉⴷⴰⵎⵎⴻⵏ. ⵉⵊⴻⴵⵉⴷⴻⵏ ⵏⵖⵉⵏ ⵉⵅⴻⴼ ⵏⵙⴻⵏ ⴰⵎ ⵎⵎⴻⵏⵖⴻⵏ ⵊⴰⵔ ⴰⵙⴻⵏ ⵙ ⵙⵙⵉⴼ ⵓⵛⴰ ⵉⵊⵊ ⵉⵡⵜⴰ ⵡⴻⵏⵏⴻⵖⵏⵉ. ⵉⵡⴰ ⴰⵢⵜ ⵏ ⵎⵓ’ⴰⴱ, ⵟⵟⴼⴻⵎ ⵜⴰⴽⴻⵛⵛⴰⴹⵜ!” □ 24 ⵎⴰⵛⴰ ⵓⵎⵉ ⵉⵡⴹⴻⵏ ⵏⵉⵜⵏⵉ ⵖⴰⵔ ⵍⵎⴰⵔⴳⴻⵃ ⵏ ⵍⵄⴻⵙⴽⴰⵔ ⵏ ⵉⵙⵔⴰⵉⵍ, ⴽⴽⴰⵔⴻⵏ-ⴷⴷ ⴰⵢⵜ ⵏ ⵉⵙⵔⴰⵉⵍ ⵓⵛⴰ ⵡⵜⵉⵏ ⴰⵢⵜ ⵏ ⵎⵓ’ⴰⴱ. ⴰⵔⴻⵡⵍⴻⵏ ⴰⵢⵜ ⵏ ⵎⵓ’ⴰⴱ ⵥⵥⴰⵜ ⵉ ⵡⵓⴷⴻⵎ ⵏⵙⴻⵏ ⵓⵛⴰ ⵅⴻⵏⵏⵉ ⵓⴷⴼⴻⵏ ⵏⵉⵜⵏⵉ ⵖⴰⵔ ⵜⴻⵎⵎⵓⵔⵜ, ⵡⵜⵉⵏ ⵎⵓ’ⴰⴱ. 25 ⵏⵉⵜⵏⵉ ⵀⴻⴷⵎⴻⵏ ⵜⵉⵏⴻⴷⴷⴰⵎ ⵓ ⴽⵓⵍ ⴰⵔⵢⴰⵥ ⵉⵏⴹⴰⵔ ⴰⵥⵔⵓ ⵏⵏⴻⵙ ⵅ ⴽⵓⵍ ⵉⵢⵢⴰⵔ ⵉⵚⴻⴱⵃⴻⵏ ⵓⵛⴰ ⴷⵍⵉⵏ ⵜ. ⵄⴰⵡⴻⴷ ⵏⴻⵜⵢⴻⵏ ⵏⵉⵜⵏⵉ ⵎⴰⵔⵔⴰ ⵍⵄⵓⵏⵚⴰⵔⴰⵜ ⵏ ⵡⴰⵎⴰⵏ ⵓⵛⴰ ⵇⴻⴹⵄⴻⵏ ⴽⵓⵍ ⵜⴰⵛⴻⵊⵊⴰⵔⵜ ⵉⵚⴻⴱⵃⴻⵏ ⴰⵍⴰⵎⵉ ⵛⴻⵟⵟⴻⵏ ⵎⵖⵉⵔ ⵉⵥⵔⴰ ⵏ ⵇⵉⵔ-ⵃⴰⵔⵉⵙⴰⵜ. ⴰⵢⵜ ⴱⵓ-ⵉⴵⴰⵢⴻⵏ ⵏⵏⴹⴻⵏ ⴰⵙ ⵓⵛⴰ ⵖⴻⴹⵍⴻⵏ ⵜⵜ. 26 ⵓⵎⵉ ⵉⵥⵔⴰ ⵓⵊⴻⴵⵉⴷ ⵏ ⵎⵓ’ⴰⴱ ⴱⴻⵍⵍⵉ ⴰⵎⴻⵏⵖⵉ ⵉⵡⵄⴰⵔ ⵅⴰⵙ ⴰⵟⵟⴰⵙ, ⵉⵙⵙⵎⵓⵏ-ⴷⴷ ⵖⴰⵔⴻⵙ ⵙⴻⴱⵄⴰ ⵎⵢⴰ ⵏ ⵢⴻⵔⵢⴰⵥⴻⵏ ⵏⵏⵉ ⵉⵥⴻⵎⵎⴰⵔⴻⵏ ⴰⴷ ⵊⴻⴱⴷⴻⵏ ⵙⵙⵉⴼ ⵃⵉⵎⴰ ⴰⴷ ⵉⵛⵓⵇⵇ ⵉⵙⴻⴷⴷⵉⵢⵢⴻⵏ ⵏ ⵍⵄⴻⵙⴽⴰⵔ ⵖⴰⵔ ⵓⵊⴻⴵⵉⴷ ⵏ ⵉⴷⵓⵎ, ⵎⴰⵛⴰ ⵏⵉⵜⵏⵉ ⵡⴰⵔ ⵥⴻⵎⵎⴰⵔⴻⵏ. 27 ⵅⴻⵏⵏⵉ ⵉⴽⵙⵉ ⵏⴻⵜⵜⴰ ⵎⵎⵉⵙ ⵏⵏⴻⵙ ⴰⵎⴻⵏⵥⵓ ⵡⴻⵏⵏⵉ ⵉ ⵖⴰ ⵉⴷⴻⵡⵍⴻⵏ ⴷ ⴰⵊⴻⴵⵉⴷ ⴰⵡⴰⵔⵏⵉ ⴰⵙ ⵓⵛⴰ ⵢⵉⵡⵢⵉ ⵜ ⵅ ⵍⵃⵉⴹ ⴷ ⵜⴰⵖⴰⵔⵚⵜ ⵏ ⵡⴻⵛⵎⴰⴹ. ⵓⵛⴰ ⵢⵓⵙⴰ-ⴷⴷ ⵓⴷⵓⵇⵇⴻⵥ ⴷ ⴰⵎⴻⵇⵇⵔⴰⵏ ⵏ ⵡⴻⵖⴹⴰⴱ ⵅ ⵉⵙⵔⴰⵉⵍ. ⵏⵉⵜⵏⵉ ⴼⴼⵖⴻⵏ ⵥⵥⴰⵢⴻⵙ ⵓⵛⴰ ⵄⴻⵇⴱⴻⵏ ⵖⴰⵔ ⵜⴻⵎⵎⵓⵔⵜ ⵏⵙⴻⵏ.