1 ⵉⵎⵙⴰⵔ ⵖⴰⵔ ⵜⵎⴻⴽⵙⵉⵜ ⵏ ⵉⵍⵉⵢⴰ ⵙ ⵓⴼⵓⵙ ⵏ ⵏ ⵙⵉⴷⵉ ⴷⴻⴳ ⵉⵛⵜ ⵏ ⵜⵃⴰⵔⵢⴰⴹⵜ ⵖⴰⵔ ⵓⵊⴻⵏⵏⴰ, ⴰⵇⴰ ⵉⴼⴼⴻⵖ ⵉⵍⵉⵢⴰ ⴰⴽ-ⴷ ⵉⵍⵉⵛⴰⵄ ⵥⵉ ⵊⵉⵍⵊⴰⵍ. 2 ⵉⵏⵏⴰ ⵉⵍⵉⵢⴰ ⵉ ⵉⵍⵉⵛⴰⵄ: “ⵇⵇⵉⵎ ⴷⴰ, ⵎⴰⵖⴰⵔ ⵙⵉⴷⵉ ⵉⵙⵙⴻⴽⴽ ⴰⵢⵉ ⵖⴰⵔ ⴱⴰⵢⵜ-ⵉⵍ.” ⵎⴰⵛⴰ ⵉⵍⵉⵛⴰⵄ ⵉⵏⵏⴰ “ⵙ ⵜⵉⴷⴻⵜⵜ ⴰⵎ ⵉⴷⴷⴰⵔ ⵙⵉⴷⵉ ⵓ ⵉⴷⴷⴰⵔ ⵍⴻⵄⵎⴰⵔ ⵏⵏⴻⴽ, ⵏⴻⵛⵛ ⵡⴰⵔ ⵛⴻⴽ ⵜⵜⴻⵊⵊⵉⵖ.” ⴰⵎⵎⵓ ⵉ ⵀⵡⴰⵏ ⵏⵉⵜⵏⵉ ⵙ ⵜⵏⴰⵢⴻⵏ ⵖⴰⵔ ⴱⴰⵢⵜ-ⵉⵍ. 3 ⴼⴼⵖⴻⵏ-ⴷⴷ ⵉⵎⴻⵃⴹⴰⵔⴻⵏ ⵏ ⵉⵏⴰⴱⵉⵢⵢⴻⵏ, ⵉⵏⵏⵉ ⵜⵓⵖⴰ ⵉⴵⴰⵏ ⴷⵉ ⴱⴰⵢⵜ-ⵉⵍ, ⵖⴰⵔ ⵉⵍⵉⵛⴰⵄ, ⵏⵏⴰⵏ ⴰⵙ: “ⵎⴰ ⵜⴻⵙⵙⵏⴻⴷ, ⴰⵇⴰ ⵙⵉⴷⵉ ⴰⵙⵙ-ⴰ ⴰⴷ ⵉⴽⴽⴻⵙ ⴱⴰⴱ ⵏⵏⴻⴽ ⵜⵉⵡⴰ ⵉ ⵓⵥⴻⴵⵉⴼ ⵏⵏⴻⴽ?” ⵏⴻⵜⵜⴰ ⵢⴰⵔⵔⴰ-ⴷⴷ: “ⵓⵍⴰ ⴷ ⵏⴻⵛⵛ ⴰⵇⴰ ⵙⵙⵏⴻⵖ ⵜ. ⵙⵇⴰⵔⴻⵎ!”

4 ⵉⵍⵉⵢⴰ ⵉⵏⵏⴰ ⴰⵙ: “ⵇⵇⵉⵎ ⴷⴰ, ⵉⵍⵉⵛⴰⵄ, ⵎⴰⵖⴰⵔ ⵙⵉⴷⵉ ⵉⵙⵙⴻⴽⴽ ⴰⵢⵉ ⵖⴰⵔ ⴰⵔⵉⵃⴰ.” ⵎⴰⵛⴰ ⵏⴻⵜⵜⴰ ⵉⵏⵏⴰ: “ⵙ ⵜⵉⴷⴻⵜⵜ ⴰⵎ ⵉⴷⴷⴰⵔ ⵙⵉⴷⵉ ⵓ ⵉⴷⴷⴰⵔ ⵍⴻⵄⵎⴰⵔ ⵏⵏⴻⴽ, ⵏⴻⵛⵛ ⵡⴰⵔ ⵛⴻⴽ ⵜⵜⴻⵊⵊⵉⵖ ⵛⴰ!” ⴰⵎⵎⵓ ⴷⴷ-ⵓⵙⵉⵏ ⵏⵉⵜⵏⵉ ⵖⴰⵔ ⴰⵔⵉⵃⴰ. 5 ⵅⴻⵏⵏⵉ ⵓⵙⵉⵏ-ⴷⴷ ⴰⵢⵜ ⵏ ⵉⵏⴰⴱⵉⵢⵢⴻⵏ ⵏⵏⵉ ⵉⴵⴰⵏ ⴷⵉ ⴰⵔⵉⵃⴰ ⵖⴰⵔ ⵉⵍⵉⵛⴰⵄ, ⵏⵏⴰⵏ ⴰⵙ: “ⵎⴰ ⵜⴻⵙⵙⵏⴻⴷ, ⴰⵇⴰ ⵙⵉⴷⵉ ⴰⵙⵙ-ⴰ ⴰⴷ ⵉⴽⴽⴻⵙ ⴱⴰⴱ ⵏⵏⴻⴽ ⵜⵉⵡⴰ ⵉ ⵓⵥⴻⴵⵉⴼ ⵏⵏⴻⴽ?” ⵏⴻⵜⵜⴰ ⵢⴰⵔⵔⴰ-ⴷⴷ: “ⵓⵍⴰ ⴷ ⵏⴻⵛⵛ ⴰⵇⴰ ⵙⵙⵏⴻⵖ ⵜ. ⵙⵇⴰⵔⴻⵎ!”

6 ⵉⵍⵉⵢⴰ ⵎⴰⵛⴰ ⵉⵏⵏⴰ ⴰⵙ: “ⵇⵇⵉⵎ ⴷⴰ, ⵎⴰⵖⴰⵔ ⵙⵉⴷⵉ ⵉⵙⵙⴻⴽⴽ ⴰⵢⵉ ⵖⴰⵔ ⵍ'ⵓⵔⴷⵓⵏ.” ⵎⴰⵛⴰ ⵏⴻⵜⵜⴰ ⵉⵏⵏⴰ: “ⵙ ⵜⵉⴷⴻⵜⵜ ⴰⵎ ⵉⴷⴷⴰⵔ ⵙⵉⴷⵉ ⵓ ⴰⵎ ⵉⴷⴷⴰⵔ ⵍⴻⵄⵎⴰⵔ ⵉⵏⵓ, ⵏⴻⵛⵛ ⵡⴰⵔ ⵛⴻⴽ ⵜⵜⴻⵊⵊⵉⵖ ⵛⴰ!” ⵓⵛⴰ ⵏⵉⵜⵏⵉ ⵓⵢⵓⵔⴻⵏ ⵙ ⵜⵏⴰⵢⴻⵏ ⵉⴷⵙⴻⵏ. 7 ⵓⵍⴰ ⴷ ⵅⴻⵎⵙⵉⵏ ⵏ ⵢⴻⵔⵢⴰⵥⴻⵏ ⵥⴻⴳ ⴰⵢⵜ ⵏ ⵉⵏⴰⴱⵉⵢⵢⴻⵏ ⵓⵢⵓⵔⴻⵏ ⵓⵛⴰ ⵇⵇⵉⵎⴻⵏ ⴱⴻⴷⴷⴻⵏ ⴰⵔⴻⵏⴷⴰⴷ ⵏⵙⴻⵏ ⵖⴰⵔ ⵍⴰⴳⴳⵯⴰⵊ, ⴰⵎ ⴱⴻⴷⴷⴻⵏ ⵏⵉⵜⵏⵉ ⵙ ⵜⵏⴰⵢⴻⵏ ⵉⴷⵙⴻⵏ ⵖⴰⵔ ⵍ'ⵓⵔⴷⵓⵏ. 8 ⵅⴻⵏⵏⵉ ⵉⴽⵙⵉ ⵉⵍⵉⵢⴰ ⴰⵙⴻⵍⵀⴰⵎ ⵏⵏⴻⵙ, ⵉⵙⵙⵓⵏⵏⴻⴹ ⵉ-ⵜ ⵓⵛⴰ ⵉⵡⵜⴰ ⵥⵥⴰⵢⴻⵙ ⵅ ⵡⴰⵎⴰⵏ ⵏⵏⵉ ⵜⵜⵡⴰⴱⴹⴰⵏ ⵅ ⵜⵏⴰⵢⴻⵏ ⵏ ⵉⵖⴻⵥⴷⵉⵙⴻⵏ ⵓ ⵏⵉⵜⵏⵉ ⵥⵡⴰⵏ ⵙ ⵜⵏⴰⵢⴻⵏ ⵉⴷⵙⴻⵏ ⵅ ⵍⴰⵥⴰⵖ. 9 ⵍⴰⵎⵉ ⵥⵡⴰⵏ ⵏⵉⵜⵏⵉ, ⵉⵎⵙⴰⵔ, ⴰⵇⴰ ⵉⵍⵉⵢⴰ ⵉⵏⵏⴰ ⵉ ⵉⵍⵉⵛⴰⵄ: “ⵜⵜⴰⵔ ⵉⵛⵜ ⵏ ⵍⵃⴰⵊⵊⴻⵜ ⵉ ⴷ ⴰⵛ ⵖⴰ ⴳⴳⴻⵖ, ⵇⴱⴻⵍ ⵎⵎⴰ ⵅⴰⴽ ⵉ ⵖⴰ ⵎⵎⴻⴽⵙⵉⵖ!” ⵉⵍⵉⵛⴰⵄ ⵢⴰⵔⵔⴰ-ⴷⴷ: “ⴰⴷ ⵅⴰⴼⵉ ⴷⴷ-ⵀⵡⴰⵏⵜ ⵜⵏⴰⵢⴻⵏ ⵏ ⵜⵙⴻⵇⵇⴰⵔ ⵏ ⴱⵓⵃⴱⴻⵍ ⵏⵏⴻⴽ!”

10 ⵉⵍⵉⵢⴰ ⵉⵏⵏⴰ: “ⵛⴻⴽ ⵜᵉⵜⵜⴰⵔⴻⴷ ⵉⵛⵜ ⵏ ⵜⵎⴻⵙⵍⴰⵛⵜ ⵜⴻⵡⵄⴰⵔ. ⵎⴰⵍⴰ ⵛⴻⴽ ⵜⴻⵥⵔⵉⴷ ⴰⵢⵉ ⵍⴰⵎⵉ ⵅⴰⴽ ⵉ ⵖⴰ ⵎⵎⴻⴽⵙⵉⵖ, ⴰⴷ ⴰⵛ ⵉⵎⵙⴰⵔ ⴰⵎⵎⵓ, ⵎⴰⵛⴰ ⵎⴰⵍⴰ ⵡⴰⵔ ⵉⴵⵉ ⴰⵎⴻⵏⵏⵉ, ⵡⴰⵔ ⵉⵜⵜⴻⵎⵙⴰⵔ ⵛⴰ.”

11 ⵓⵛⴰ ⵉⵎⵙⴰⵔ ⴰⵎ ⵏⵉⵜⵏⵉ ⴳⴳⵓⵔⴻⵏ ⵓ ⵙⵙⴰⵡⴰⵍⴻⵏ ⴰⴽ-ⴷ ⵡⴰⵢⴰⵡⵢⴰ, ⵅⵥⴰⵔ, ⴰⵇⴰ ⴷⵉⵏ ⵉⵛⵜ ⵏ ⵜⴽⴰⵔⵔⵓⵜ ⵏ ⵜⵎⴻⵙⵙⵉ ⴰⴽ-ⴷ ⵉⵢⵙⴰⵏ ⵏ ⵜⵎⴻⵙⵙⵉ ⵜⴻⵏⵏⵉ ⵜⴻⴱⴹⴰ ⵉ-ⵜⴻⵏ ⵉⵊⵊ ⵅ ⵡⴻⵏⵏⴻⵖⵏⵉ. ⴰⵎⵎⵓ ⵉⴳⴻⵄⵄⴻⴷ ⵉⵍⵉⵢⴰ ⴷⵉ ⵜⵃⴰⵔⵢⴰⴹⵜ ⵖⴰⵔ ⵓⵊⴻⵏⵏⴰ.

12 ⵉⵍⵉⵛⴰⵄ ⵉⵥⵔⴰ ⵉ-ⵜ ⵓⵛⴰ ⵉⵍⴰⵖⴰ ⵅⴰⵙ: “ⴱⴰⴱⴰ ⵉⵏⵓ, ⴱⴰⴱⴰ ⵉⵏⵓ! ⴰⴽⴰⵔⵔⵓ ⵏ ⵓⵎⴻⵏⵖⵉ ⵏ ⵉⵙⵔⴰⵉⵍ ⴷ ⵉⵎⵏⴰⵢⴻⵏ ⵏⵏⴻⵙ!” ⵅⴻⵏⵏⵉ ⵏⴻⵜⵜⴰ ⵡⴰⵔ ⵜ ⵉⵜⵡⵉⵍⵉ ⵄⴰⴷ ⵓⵛⴰ ⵉⴽⵙⵉ ⴰⵔⵔⵓⴹ ⵏⵏⴻⵙ, ⵉⵛⴰⵔⵔⴻⴳ ⵉ-ⵜ ⵅ ⵜⵏⴰⵢⴻⵏ. ^■  

13 ⵅⴻⵏⵏⵉ ⵉⵙⵙⵎⵓⵏ-ⴷⴷ ⴰⵙⴻⵍⵀⴰⵎ ⵉ ⵥⵥⴰⵢⴻⵙ ⴷⴷ-ⵢⴻⵡⴹⴰⵏ ⵓⵛⴰ ⵉⵄⵇⴻⴱ, ⵉⴱⴻⴷⴷ ⵖⴰⵔ ⵜⵎⴰ ⵏ ⵍ'ⵓⵔⴷⵓⵏ.

14 ⵏⴻⵜⵜⴰ ⵉⴽⵙⵉ ⴰⵙⴻⵍⵀⴰⵎ ⵏ ⵉⵍⵉⵢⴰ ⵉ ⵜⵓⵖⴰ ⵅⴰⵙ ⵉⵡⴹⴰⵏ, ⵉⵡⵜⴰ ⵥⵥⴰⵢⴻⵙ ⵅ ⵡⴰⵎⴰⵏ, ⵉⵏⵏⴰ: “ⵎⴰⵏⵉ ⵉⴵⴰ ⵙⵉⴷⵉ ⴰⵔⴻⴱⴱⵉ ⵏ ⵉⵍⵉⵢⴰ? ⵡⴰⵀ, ⵏⴻⵜⵜⴰ!” ⵓⵛⴰ ⵏⴻⵜⵜⴰ ⵉⵡⵜⴰ ⵅ ⵡⴰⵎⴰⵏ ⵓⵛⴰ ⵎⵎⵙⴻⴱⴹⴰⵏ ⵏⵉⵜⵏⵉ ⵅ ⵜⵏⴰⵢⴻⵏ ⵏ ⵉⵖⴻⵥⴷⵉⵙⴻⵏ ⵓⵛⴰ ⵉⵥⵡⴰ ⵉⵍⵉⵛⴰⵄ.

15 ⵓⵎⵉ ⴰⵢⵜ ⵏ ⵉⵏⴰⴱⵉⵢⵢⴻⵏ ⵏⵏⵉ ⴷⵉⵏ ⵉⴱⴻⴷⴷⴻⵏ ⴰⵔⴻⵏⴷⴰⴷ ⵏ ⴰⵔⵉⵃⴰ, ⵥⵔⵉⵏ ⵜ, ⵏⵏⴰⵏ: “ⴱⵓⵃⴱⴻⵍ ⵏ ⵉⵍⵉⵢⴰ ⵢⴰⵔⵙⴰ ⵅ ⵉⵍⵉⵛⴰⵄ.” ⵏⵉⵜⵏⵉ ⵓⵙⵉⵏ-ⴷⴷ ⵖⴰⵔⴻⵙ ⵓⵛⴰ ⵓⴹⴰⵔⴻⵏ ⵥⵥⴰⵜⴻⵙ ⵖⴰⵔ ⵜⴻⵎⵎⵓⵔⵜ.

16 ⵅⴻⵏⵏⵉ ⵏⵉⵜⵏⵉ ⵏⵏⴰⵏ ⴰⵙ: “ⵅⵥⴰⵔ ⵅⴻⵏⵏⵉ, ⵊⴰⵔ ⵉⵎⵙⴻⵅⵅⴰⵔⴻⵏ ⵏⵏⴻⴽ ⴰⵇⴰ ⴷⵉⵏ ⵅⴻⵎⵙⵉⵏ ⵏ ⵢⴻⵔⵢⴰⵥⴻⵏ, ⴰⵢⵜ ⵏ ⵓⵎⴻⵏⵖⵉ. ⴻⵊⵊ ⵉ-ⵜⴻⵏ ⴰⴷ ⵓⵢⵓⵔⴻⵏ, ⴰⴷ ⴰⵔⵥⵓⵏ ⵅ ⵙⵉⴷⵉ ⵏⵏⴻⴽ, ⴰⴷ ⵜⴰⵖ ⵙⵉⴷⵉ ⵉⴽⵙⵉ ⵜ ⵓⵛⴰ ⵉⵏⴹⴰⵔ ⵉ-ⵜ ⵅ ⵉⵊⵊ ⵏ ⵡⴻⴷⵔⴰⵔ ⵏⵉⵖ ⴷⴻⴳ ⵉⵛⵜ ⵥⵉ ⵜⴻⵖⵥⵓⵔⵉⵏ.” ⵎⴰⵛⴰ ⵏⴻⵜⵜⴰ ⵉⵏⵏⴰ: “ⵡⴰⵔ ⵙⵙⴻⴽⴽⵉⵎ ⵓⵍⴰ ⴷ ⵉⵊⵊ!”

17 ⵓⵎⵉ ⵅⴰⵙ ⵄⴻⵎⵎⴷⴻⵏ ⵏⵉⵜⵏⵉ ⴰⵍⴰⵎⵉ ⴷ ⴰⵙ ⵉⵡⴻⴷⴷⴰⵔ ⵎⵉⵏ ⵖⴰ ⵢⴻⴳⴳ ⵓⵛⴰ ⵉⵏⵏⴰ: “ⵉⵡⴰ ⵙⴻⴽⴽⴻⵎ ⵜⴻⵏ ⴷⵉⵏ!” ⵏⵉⵜⵏⵉ ⵙⵙⴻⴽⴽⴻⵏ ⵅⴻⵎⵙⵉⵏ ⵏ ⵢⴻⵔⵢⴰⵥⴻⵏ ⴷ ⵉⵏⴰ ⴰⵔⵥⵓⵏ ⵜⵍⴰⵜⴰ ⵏ ⵡⵓⵙⵙⴰⵏ, ⵎⴰⵛⴰ ⵏⵉⵜⵏⵉ ⵡⴰⵔ ⵜ ⵓⴼⵉⵏ.

18 ⵓⵛⴰ ⵄⴻⵇⴱⴻⵏ-ⴷⴷ ⵏⵉⵜⵏⵉ ⵖⴰⵔⴻⵙ, ⵎⵉⵏⵥⵉ ⵜⵓⵖⴰ ⵉⵇⵇⵉⵎ ⴷⵉ ⴰⵔⵉⵃⴰ. ⵏⴻⵜⵜⴰ ⵉⵏⵏⴰ ⴰⵙⴻⵏ: “ⵎⴰ ⵡⴰⵔ ⴷ ⴰⵡⴻⵎ ⵏⵏⵉⵖ: ‘ⵡⴰⵔ ⵜⵜⵔⵉⵃⴻⵎ ⵛⴰ!’?”

19 ⵉⵔⵢⴰⵥⴻⵏ ⵏ ⵜⴻⵏⴷⵉⵏⵜ ⵏⵏⴰⵏ ⵉ ⵉⵍⵉⵛⴰⵄ: “ⵅⵥⴰⵔ ⵅⴻⵏⵏⵉ, ⴰⴷⴷⵓⴷ ⵏ ⵜⴻⵏⴷⵉⵏⵜ ⵎⵍⵉⵃ, ⴰⵎ ⵎⴰⵎⵎⴻⵛ ⵉⵜⵜⵡⴰⵍⴰ ⵙⵉⴷⵉ ⵉⵏⵓ ⵙⵉⵎⴰⵏⵜ ⵏⵏⴻⵙ, ⵎⴰⵛⴰ ⴰⵎⴰⵏ ⵡⴰⵔ ⵉⵃⵍⵉⵏ ⵓ ⵜⴰⵎⵎⵓⵔⵜ ⵜⵉⵡⵉ-ⴷⴷ ⴰⴳⵔⴰⵢ.” 20 ⵏⴻⵜⵜⴰ ⵉⵏⵏⴰ: “ⴰⵡⵢⴻⵎ ⴰⵢⵉ-ⴷⴷ ⵉⵊⵊ ⵏ ⵟⵟⴻⴱⵙⵉ ⴷ ⴰⵎⴰⵢⵏⵓ ⵓ ⴳⴳⴻⵎ ⴷⴰⵢⴻⵙ ⵜⴰⵎⴻⴵⴰⵃⵜ!” ⵓⵛⴰ ⵏⵉⵜⵏⵉ ⵉⵡⵢⴻⵏ ⴰⵙ ⵜ-ⵉ-ⴷⴷ. 21 ⵅⴻⵏⵏⵉ ⵉⴼⴼⴻⵖ ⵥⵉ ⵜⴻⵏⴷⵉⵏⵜ ⵖⴰⵔ ⵜⴰⵍⴰ ⵏ ⵡⴰⵎⴰⵏ ⵓⵛⴰ ⵉⵏⴹⴰⵔ ⴷⴰⵢⴻⵙ ⵜⴰⵎⴻⴵⴰⵃⵜ ⵏⵏⵉ, ⵉⵏⵏⴰ: “ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ: ‘ⵏⴻⵛⵛ ⴰⵔⵔⵉⵖ ⴰⵎⴰⵏ-ⴰ ⵚⴻⴱⵃⴻⵏ. ⵡⴰⵔ ⴷⴷ-ⵜⵜⵉⵡⵢⴻⵏ ⵍⵎⴻⵡⵜ ⵏⵉⵖ ⴷ ⴰⴳⵔⴰⵢ ⵄⴰⴷ.’ ” 22 ⴰⵎⴰⵏ ⴷⴻⵡⵍⴻⵏ ⵚⴻⴱⵃⴻⵏ ⵄⴰⵡⴻⴷ ⵖⴰⵔⴻⵙ ⴰⵍ ⴰⵙⵙ-ⴰ ⵄⵍⴰⵃⵙⴰⴱ ⴰⵡⴰⵍ ⵏ ⵉⵍⵉⵛⴰⵄ ⵉ ⵉⵙⵙⵉⵡⴻⵍ.

23 ⵙⵙⴻⵏⵏⵉ ⵉⴳⴻⵄⵄⴻⴷ ⵖⴰⵔ ⴱⴰⵢⵜ-ⵉⵍ. ⴰⵎ ⵉⵜⵜⴳⴻⵄⵄⴻⴷ ⴰⴱⵔⵉⴷ, ⴼⴼⵖⴻⵏ-ⴷⴷ ⵉⵃⵓⴷⵔⵉⵢⵢⴻⵏ ⵥⵉ ⵜⴻⵏⴷⵉⵏⵜ ⵉⵏⵏⵉ ⵜ ⵉ ⵉⴽⴽⵯⴰⵔⴻⵏ, ⵏⵏⴰⵏ ⴰⵙ: “ⴰⵇⴻⵛⵛⴰⵔ, ⴳⴻⵄⵄⴻⴷ! ⴰⵇⴻⵛⵛⴰⵔ, ⴳⴻⵄⵄⴻⴷ!” 24 ⵏⴻⵜⵜⴰ ⵉⵏⵏⴻⵇⵍⴻⴱ-ⴷⴷ ⴰⵡⴰⵔⵏⵉ ⴰⵙ, ⵉⵅⵥⴰⵔ ⴷⴰⵢⵙⴻⵏ ⵓⵛⴰ ⵉⵅⵥⴰ ⵉ-ⵜⴻⵏ ⴷⴻⴳ ⵢⵉⵙⴻⵎ ⵏ ⵙⵉⴷⵉ. ⵍⴻⵅⴷⴻⵏⵏⵉ ⵓⵙⵉⵏ-ⴷⴷ ⵜⵏⴰⵢⴻⵏ ⵏ ⴷⴷⵓⴱⴰⵜ ⵥⴻⴳ ⵡⴻⵥⵖⴰⵔ ⵓ ⵎⴻⵥⵥⵇⴻⵏ ⵜⵏⴰⵢⴻⵏ-ⵓ-ⵔⴻⴱⵄⵉⵏ ⵏ ⵉⵃⵓⴷⵔⵉⵢⵢⴻⵏ. ^□   25 ⵙⵙⴻⵏⵏⵉ ⵢⵓⵢⵓⵔ ⵏⴻⵜⵜⴰ ⵖⴰⵔ ⵡⴻⴷⵔⴰⵔ ⵏ ⴽⴰⵔⵎⵉⵍ ⵓⵛⴰ ⵙⵙⴻⵏⵏⵉ ⵉⵄⵇⴻⴱ ⵖⴰⵔ ⵙⴰⵎⴰⵔⵢⴰ.