1 ⵓⵎⵉ ⵉ ⴷⴷ-ⵓⴷⵙⴻⵏ ⵡⵓⵙⵙⴰⵏ ⵏ ⴷⴰⵡⵓⴷ ⴰⴷ ⵉⵎⵎⴻⵜ, ⵉⵄⵍⴻⵎ ⵏⴻⵜⵜⴰ ⵉ ⵎⵎⵉⵙ ⵙⵓⵍⵉⵎⴰⵏ, ⵉⵏⵏⴰ: 2 “ⵏⴻⵛⵛ ⴰⴷ ⵓⵢⵓⵔⴻⵖ ⴰⴱⵔⵉⴷ ⵏ ⵎⴰⵔⵔⴰ ⵜⴰⵎⵎⵓⵔⵜ. ⵉⵍⵉ ⵜⵎⴻⵃⴹⴻⴷ ⵓ ⵉⵍⵉ ⴷ ⴰⵔⵢⴰⵥ! 3 ⵃⴹⴰ ⴰⵡⴻⴽⴽⴻⵍ ⵏ ⵙⵉⴷⵉ, ⴰⵔⴻⴱⴱⵉ ⵏⵏⴻⴽ, ⵃⵉⵎⴰ ⴰⴷ ⵜⵓⵢⵓⵔⴻⴷ ⴷⵉ ⵜⴻⴱⵔⵉⴷⵉⵏ ⵏⵏⴻⵙ, ⵎⴰⵃⴻⵏⴷ ⴰⴷ ⵜᵉⵟⵟⴼⴻⴷ ⴷⵉ ⵜⵡⴻⵚⵚⴰ ⵏⵏⴻⵙ ⴷ ⵍⵓⵎⵓⵔⴰⵜ ⵏⵏⴻⵙ ⴷ ⵍⴼⴰⵔⴰⵢⵉⴹ ⵏⵏⴻⵙ ⴷ ⵛⵛⵀⴰⴷⴰⵜ ⵏⵏⴻⵙ ⴰⵎ ⵎⴰⵎⵎⴻⵛ ⵜ ⵢⵓⵔⴰ ⴷⵉ ⵛⵛⴰⵔⵉⵄⴰ ⵏ ⵎⵓⵙⴰ, ⵃⵉⵎⴰ ⴰⴷ ⵜⴻⴳⴳⴻⴷ ⵙ ⵍⴻⵄⵇⴻⵍ ⴷⵉ ⵎⴰⵔⵔⴰ ⵎⵉⵏ ⵖⴰ ⵜⴻⴳⴳⴻⴷ ⴷ ⵎⴰⵏⵉ ⵎⴰ ⵉ ⵖⴰ ⵜⵔⴰⵃⴻⴷ, ^■   4 ⵃⵉⵎⴰ ⴰⴷ ⵉⴽⴻⵎⵎⴻⵍ ⵙⵉⴷⵉ ⴰⵡⴰⵍ ⵏⵏⴻⵙ ⵉ ⵅⴰⴼⵉ ⵉⵙⵙⵉⵡⴻⵍ, ⵓⵎⵉ ⵉⵏⵏⴰ: ‘ⵎⴰⵍⴰ ⵉⵃⴻⵏⵊⵉⵔⴻⵏ ⵏⵏⴻⴽ ⴰⴷ ⵃⴹⴰⵏ ⴰⴱⵔⵉⴷ ⵏⵙⴻⵏ ⵙ ⵡⵓⵍ ⵏⵙⴻⵏ ⵎⴰⵔⵔⴰ ⵓ ⵙ ⵍⴻⵄⵎⴰⵔ ⵏⵙⴻⵏ ⵎⴰⵔⵔⴰ ⵃⵉⵎⴰ ⴰⴷ ⵓⵢⵓⵔⴻⵏ ⵙ ⵍⴰⵎⴰⵏ ⵥⵥⴰⵜ ⵉ ⵡⵓⴷⴻⵎ ⵉⵏⵓ, ⵅⴻⵏⵏⵉ ⵡⴰⵔ ⵛⴻⴽ ⵉⵜⵜⵅⴻⵚⵚⵉ ⵡⴻⵔⵢⴰⵥ ⵅ ⵍⵄⴰⵔⵛ ⵏ ⵉⵙⵔⴰⵉⵍ. ^■  

5 ⵛⴻⴽ ⵜⴻⵙⵙⵏⴻⴷ ⵄⴰⵡⴻⴷ ⵎⵉⵏ ⵉ ⴷ ⴰⵢⵉ ⵉⴳⴳⴰ ⵢⵓⵡⴰⴱ, ⵎⵎⵉⵙ ⵏ ⵚⴰⵔⵓⵢⴰ, ⵎⵉⵏ ⵉⴳⴳⴰ ⵏⴻⵜⵜⴰ ⵉ ⵜⵏⴰⵢⴻⵏ ⵏ ⵉⴽⵓⵎⴰⵏⴷⴰⵔⴻⵏ ⵏ ⵍⵄⴻⵙⴽⴰⵔ ⵏ ⵉⵙⵔⴰⵉⵍ, ⵉ ⴰⴱⵏⵉⵔ, ⵎⵎⵉⵙ ⵏ ⵏⵉⵔ, ⵓ ⵉ ⵄⴰⵎⴰⵙⴰ, ⵎⵎⵉⵙ ⵏ ⵢⴰⵜⵉⵔ. ⵏⴻⵜⵜⴰ ⵉⵏⵖⴰ ⵉ-ⵜⴻⵏ. ⴷⵉ ⵍⵡⴻⵇⵜ ⵏ ⵍⴻⵀⵏⴰ ⵉⵙⵙⵉⵥⵥⴻⵍ ⵉⴷⴰⵎⵎⴻⵏ ⴰⵎ ⴷⵉ ⵍⵡⴻⵇⵜ ⵏ ⵓⵎⴻⵏⵖⵉ ⵓⵛⴰ ⴰⵎ ⴷⵉ ⵍⵡⴻⵇⵜ ⵏ ⵓⵎⴻⵏⵖⵉ ⵉⴳⴳⴰ ⵉⴷⴰⵎⵎⴻⵏ ⵖⴰⵔ ⵡⴻⴱⵢⴰⵙ ⵏⵏⴻⵙ ⵉ ⵖⴰⵔⴻⵙ ⵖⴰⵔ ⵜⴻⵊⵄⵉⵏⵏⴰ ⵏⵏⴻⵙ ⵓⵍⴰ ⵖⴰⵔ ⵙⴰⵏⴷⴰⵍⵉⵢⴰⵜ ⵏⵏⴻⵙ ⵏⵏⵉ ⵅ ⵉⴹⴰⵔⴻⵏ ⵏⵏⴻⵙ. ^■   6 ⴻⴳⴳ ⵄⵍⴰⵃⵙⴰⴱ ⵜⵉⵖⵉⵜ ⵏⵏⴻⴽ ⵓ ⵡⴰⵔ ⵜⵜⴻⵊⵊⵉ ⴰⵛⴻⵡⵡⴰⴼ ⵏⵏⴻⵙ ⵉⵛⴰⴱⴻⵏ ⴰⴷ ⵉⵀⵡⴰ ⵖⴰⵔ ⵍⴰⵅⴰⵔⵜ ⴷⵉ ⵍⴻⵀⵏⴰ.

7 ⵙⵛⴻⵏ ⵜⴰⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ ⵉ ⴰⵢⵜ ⵏ ⴱⴰⵔⵥⵉⵍⵍⴰⵢ, ⴰⵊⵉⵍⵄⴰⴷⵉ. ⵏⵉⵜⵏⵉ ⴰⴷ ⵉⵍⵉⵏ ⵊⴰⵔ ⵉⵏⵏⵉ ⵉ ⵖⴰ ⵉⵛⵛⴻⵏ ⵥⵉ ⵟⵟⴰⴱⵍⴰ ⵏⵏⴻⴽ, ⵎⴰⵖⴰⵔ ⴰⵎⵎⵓ ⵉ ⴷⴷ-ⵢⵓⵙⵉⵏ ⵖⴰⵔⵉ ⵓⵎⵉ ⴰⵔⴻⵡⵍⴻⵖ ⵥⵥⴰⵜ ⵉ ⵡⵓⴷⴻⵎ ⵏ ⵓⵎⴰⵛ ⴰⴱⵛⴰⵍⵓⵎ. ^■   8 ⵅⵥⴰⵔ ⵛⵉⵎⵄⵉ, ⵎⵎⵉⵙ ⵏ ⵊⵉⵔⴰ, ⴰⴱⵉⵏⵢⴰⵎⵉⵏⵉ, ⵥⵉ ⴱⴰⵃⵓⵔⵉⵎ. ⵓⵍⴰ ⴷ ⵏⴻⵜⵜⴰ ⴰⴽⵉⴷⴻⴽ. ⵏⴻⵜⵜⴰ ⵉⵏⵄⴻⵍ ⴰⵢⵉ ⵙ ⵉⵛⵜ ⵏ ⵏⵏⴻⵄⵍⴻⵜ ⵉⵇⴻⵙⵃⴻⵏ ⴷⴻⴳ ⵡⴰⵙⵙ ⵓⵎⵉ ⵏⴻⵛⵛ ⴰⵔⴻⵡⵍⴻⵖ ⵖⴰⵔ ⵎⴰⵃⴰⵏⴰⵢⵉⵎ, ⵎⴰⵛⴰ ⵉⵎⵎⵙⴻⵍⵇⴰ ⴰⴽⵉⴷⵉ ⵖⴰⵔ ⵍ'ⵓⵔⴷⵓⵏ ⵓ ⵏⴻⵛⵛ ⵊⵊⵓⴵⴻⵖ ⴰⵙ ⵖⴰⵔ ⵙⵉⴷⵉ, ⵏⵏⵉⵖ: ‘ⵖⴰⵔⵉ ⵎⴰⵍⴰ ⴰⴷ ⵛⴻⴽ ⵏⵖⴻⵖ ⵙ ⵙⵙⵉⴼ!’ ^■   9 ⵅⴻⵏⵏⵉ ⵍⴻⵅⵅⵓ, ⵡⴰⵔ ⵜ ⵃⴻⵚⵚⴻⴱ ⴷ ⴰⵎⴻⵥⴷⴰⴳ, ⵎⴰⵖⴰⵔ ⵛⴻⴽ ⴷ ⵉⵊⵊ ⵏ ⵡⴻⵔⵢⴰⵥ ⴷ ⴰⵎⵉⵖⵉⵙ ⵓ ⵜⴻⵙⵙⵏⴻⴷ ⵎⵉⵏ ⴷ ⴰⵙ ⵖⴰ ⵜⴻⴳⴳⴻⴷ ⵃⵉⵎⴰ ⴰⵛⴻⵡⵡⴰⴼ ⵏⵏⴻⵙ ⵉⵛⴰⴱⴻⵏ ⴰⴷ ⵉⵀⵡⴰ ⵖⴰⵔ ⵍⴰⵅⴰⵔⵜ ⵙ ⵉⴷⴰⵎⵎⴻⵏ.”

10 ⴷⴰⵡⵓⴷ ⵉⵜⵜⵡⴰⵙⵙⴰⵔⵙ ⴷⴻⴳ ⵡⴻⵏⴹⴻⵍ ⵊⴰⵔ ⵍⴻⵊⴷⵓⴷ ⵏⵏⴻⵙ. ⵏⴻⵜⵜⴰ ⵉⵜⵜⵡⴰⵏⴹⴻⵍ ⴷⵉ ⵜⴻⵏⴷⵉⵏⵜ ⵏ ⴷⴰⵡⵓⴷ. ^■  

11 ⵓⵙⵙⴰⵏ ⵉ ⴷⵉ ⵜⵓⵖⴰ ⵉⵃⴻⴽⴽⴻⵎ ⴷⴰⵡⵓⴷ ⵅ ⵉⵙⵔⴰⵉⵍ, ⵜⵓⵖⴰ ⴰⵜⴻⵏ ⴰⵔⴻⴱⵄⵉⵏ ⵏ ⵉⵙⴻⴳⴳⵯⵓⵙⴰ. ⵙⴻⴱⵄⴰ ⵏ ⵉⵙⴻⴳⴳⵯⵓⵙⴰ ⵉⵃⴽⴻⵎ ⴷⵉ ⵃⴰⴱⵔⵓⵏ ⵓ ⴷⵉ ⵓⵔⵛⴰⵍⵉⵎ ⵉⵃⴽⴻⵎ ⵜⵍⴰⵜⴰ ⵓ-ⵜⵍⴰⵜⵉⵏ ⵏ ⵉⵙⴻⴳⴳⵯⵓⵙⴰ. ^■  

12 ⵙⵓⵍⵉⵎⴰⵏ ⵉⵇⵇⵉⵎ ⵅ ⵍⵄⴰⵔⵛ ⵏ ⴱⴰⴱⴰⵙ ⴷⴰⵡⵓⴷ ⵓ ⵜⴰⴳⴻⵍⴷⵉⵜ ⵏⵏⴻⵙ ⵜⴻⴷⵡⴻⵍ ⵜⴰⵔⴻⵏⵏⵉ ⴷⵉ ⵍⴻⵎⵜⴻⵏ ⴰⵟⵟⴰⵙ. ^■  

13 ⵅⴻⵏⵏⵉ ⴰⴷⵓⵏⵉⵢⴰ, ⵎⵎⵉⵙ ⵏ ⵀⴰⵊⵊⵉⵜ, ⵢⵓⵙⴰ-ⴷⴷ ⵖⴰⵔ ⴱⴰⵜⵛⴰⴱⴰⵄ, ⵢⴻⵎⵎⴰⵙ ⵏ ⵙⵓⵍⵉⵎⴰⵏ, ⵏⴻⵜⵜⴰⵜ ⵜⴻⵏⵏⴰ: “ⵎⴰ ⵜⵡⴰⵙⵉⵜ ⵏⵏⴻⴽ ⵙ ⵍⴻⵀⵏⴰ?” ⵏⴻⵜⵜⴰ ⵉⵏⵏⴰ: “ⵍⴻⵀⵏⴰ!”

14 ⵏⴻⵜⵜⴰ ⵉⵏⵏⴰ: “ⵏⴻⵛⵛ ⵖⴰⵔⵉ ⴽⵉⵎ ⵉⵊⵊ ⵏ ⵡⴰⵡⴰⵍ.” ⵏⴻⵜⵜⴰⵜ ⵜⴻⵏⵏⴰ ⴰⵙ: “ⵙⵉⵡⴻⵍ!”

15 ⵉⵏⵏⴰ ⵏⴻⵜⵜⴰ: “ⵛⴻⵎ ⵜⴻⵙⵙⵏⴻⴷ, ⴰⵇⴰ ⵜⴰⴳⴻⵍⴷⵉⵜ ⵜⵓⵙⴰ ⴰⵢⵉ-ⴷⴷ ⵓ ⵎⴰⵔⵔⴰ ⵉⵙⵔⴰⵉⵍ ⵉⴳⴳⴰ ⴷⴰⵢⵉ ⵜⵉⵟⵟⴰⵡⵉⵏ ⵃⵉⵎⴰ ⴰⴷ ⴷⴻⵡⵍⴻⵖ ⴷ ⴰⵊⴻⴵⵉⴷ. ⵎⴰⵛⴰ ⵜⴰⴳⴻⵍⴷⵉⵜ ⵜⴻⵏⵏⴻⵇⵍⴻⴱ ⵓⵛⴰ ⵜⴻⴷⵡⴻⵍ ⵉ ⵓⵎⴰ, ⵎⵉⵏⵥⵉ ⵜⵓⵖⴰ ⵜⵓⵙⴰ ⴰⵙ-ⴷⴷ ⵥⵉ ⵙⵉⴷⵉ. ^■  

16 ⵍⴻⵅⵅⵓ ⵎⴰⵛⴰ ⵏⴻⵛⵛ ⵅⵙⴻⵖ ⴰⴷ ⵖⴰⵔⴻⵎ ⵜⵜⴰⵔⴻⵖ ⵉⵛⵜ ⵏ ⵍⵃⴰⵊⵊⴻⵜ ⵡⴰⵀⴰ. ⵡⴰⵔ ⴷ ⴰⵢⵉ ⵜⴰⴳⵉ!” ⵏⴻⵜⵜⴰⵜ ⵜⴻⵏⵏⴰ: ⴰⵙ: “ⵙⵉⵡⴻⵍ!”

17 ⵏⴻⵜⵜⴰ ⵉⵏⵏⴰ: “ⵙⵉⵡⴻⵍ ⴰⴽ-ⴷ ⵓⵊⴻⴵⵉⴷ ⵙⵓⵍⵉⵎⴰⵏ, ⵎⴰⵖⴰⵔ ⵏⴻⵜⵜⴰ ⵡⴰⵔ ⵛⴻⵎ ⵉⵜⵜⴰⵔⵔⵉ, ⵃⵉⵎⴰ ⵏⴻⵜⵜⴰ ⴰⴷ ⴰⵢⵉ ⵉⵡⵛ ⴰⴱⵉⵛⴰⵊ, ⵜⴰⵙⵓⵏⴰⵎⵉⵜ, ⴷ ⵜⴰⵎⵖⴰⵔⵜ.”

18 ⴱⴰⵜⵛⴰⴱⴰⵄ ⵜⴻⵏⵏⴰ: “ⵎⵍⵉⵃ, ⵏⴻⵛⵛ ⴰⴷ ⵙⵙⵉⵡⵍⴻⵖ ⴰⴽ-ⴷ ⵓⵊⴻⴵⵉⴷ ⴷⵉ ⵟⵟⵡⴻⵄ ⵏⵏⴻⴽ.”

19 ⵅⴻⵏⵏⵉ ⵜⵓⵙⴰ-ⴷⴷ ⴱⴰⵜⵛⴰⴱⴰⵄ ⵖⴰⵔ ⵓⵊⴻⴵⵉⴷ ⵙⵓⵍⵉⵎⴰⵏ, ⵃⵉⵎⴰ ⴰⴽⵉⴷⴻⵙ ⵜⴻⵙⵙⵉⵡⴻⵍ ⵅ ⴰⴷⵓⵏⵉⵢⴰ. ⴰⵊⴻⴵⵉⴷ ⵉⴽⴽⴰⵔ ⵉ ⵓⵎⵙⴰⴳⴰⵔ ⴰⴽⵉⴷⴻⵙ ⵓ ⵢⵓⴹⴰⵔ ⵥⵥⴰⵜⴻⵙ. ⴰⵡⴰⵔⵏⵉ ⵎⴰⵏ ⴰⵢⴰ ⵉⵇⵇⵉⵎ ⵅ ⵍⵄⴰⵔⵛ, ⵉⵊⵊⴰ ⴰⴷ ⴷⵉⵏ ⵙⵙⴰⵔⵙⴻⵏ ⵉⵊⵊ ⵏ ⵍⴽⵓⵔⵙⵉ ⵉ ⵢⴻⵎⵎⴰⵙ ⵏ ⵓⵊⴻⴵⵉⴷ ⵓ ⵏⴻⵜⵜⴰⵜ ⵜⴻⵇⵇⵉⵎ ⵖⴰⵔ ⵓⴼⵓⵙ ⴰⴼⵓⵙⵉ ⵏⵏⴻⵙ. 20 ⵅⴻⵏⵏⵉ ⵜⴻⵏⵏⴰ ⴰⵙ ⵏⴻⵜⵜⴰⵜ: “ⵏⴻⵛⵛ ⵅⵙⴻⵖ ⴰⴷ ⴰⵛ ⵜⵜⴰⵔⴻⵖ ⵉⵛⵜ ⵏ ⵍⵃⴰⵊⵊⴻⵜ ⵡⴰⵀⴰ. ⵡⴰⵔ ⴷ ⴰⵢⵉ ⵜⴰⴳⵉ!” ⵉⵏⵏⴰ ⴰⵙ ⵓⵊⴻⴵⵉⴷ: “ⵙⴻⵇⵙⴰ, ⵢⴻⵎⵎⴰ, ⵏⴻⵛⵛ ⵡⴰⵔ ⵛⴻⵎ ⵜⵜⴰⵔⵔⵉⵖ ⵛⴰ.” 21 ⵏⴻⵜⵜⴰⵜ ⵜⴻⵏⵏⴰ ⴰⵙ: “ⵜⵜⵥⴰⵡⴳⴻⵖ ⵛⴻⴽ ⵃⵉⵎⴰ ⴰⴷ ⵜⴻⵎⵎⴻⵡⵛ ⴰⴱⵉⵛⴰⵊ, ⵜⴰⵙⵓⵏⴰⵎⵉⵜ, ⵉ ⵓⵎⴰⵛ ⴰⴷⵓⵏⵉⵢⴰ ⴷ ⵜⴰⵎⵖⴰⵔⵜ.” 22 ⴰⵊⴻⴵⵉⴷ ⵙⵓⵍⵉⵎⴰⵏ ⵢⴰⵔⵔⴰ-ⴷⴷ ⵅⴰⵙ, ⵉⵏⵏⴰ ⵉ ⵢⴻⵎⵎⴰⵙ: “ⵎⴰⵢⴻⵎⵎⵉ ⵜᵉⵜⵜⴰⵔⴻⴷ ⵛⴻⵎ ⵉ ⴰⴷⵓⵏⵉⵢⴰ ⴰⴱⵉⵛⴰⵊ, ⵜⴰⵙⵓⵏⴰⵎⵉⵜ? ⵜⵜⴰⵔ ⵅⴻⵏⵏⵉ ⵓⵍⴰ ⴷ ⵜⴰⴳⴻⵍⴷⵉⵜ, ⵎⴰⵖⴰⵔ ⵏⴻⵜⵜⴰ ⴷ ⵓⵎⴰ ⵡⴻⵏⵏⵉ ⴷ ⴰⵎⴻⵇⵇⵔⴰⵏ ⵅⴰⴼⵉ, ⵡⴰⵀ ⵜⵜⴰⵔ ⵉ-ⵜⵜ ⵉ ⵏⴻⵜⵜⴰ ⵓ ⵉ ⵓⴽⴻⵀⵀⴰⵏ ⴰⴱⵢⴰⵜⴰⵔ ⴷ ⵢⵓⵡⴰⴱ, ⵎⵎⵉⵙ ⵏ ⵚⴰⵔⵓⵢⴰ.”

23 ⴰⵊⴻⴵⵉⴷ ⵙⵓⵍⵉⵎⴰⵏ ⵉⵊⵊⵓⴵ ⵖⴰⵔ ⵙⵉⴷⵉ, ⵉⵏⵏⴰ: “ⵙⵉⴷⵉ ⴰⴷ ⴰⵢⵉ ⵉⴳⴳ ⵜⴰ ⴷ ⵜⴰ ⵓ ⵄⴰⴷ ⴽⵜⴰⵔ ⵥⵉ ⵎⴰⵏ ⴰⵢⴰ, ⵎⴰⵖⴰⵔ ⴰⴷⵓⵏⵉⵢⴰ ⵉⵙⵙⵉⵡⴻⵍ ⴰⵡⴰⵍ-ⴰ ⴹⵉⴷⴷ ⵉ ⵜⵓⴷⴰⵔⵜ ⵏⵏⴻⵙ! 24 ⵅⴻⵏⵏⵉ ⵍⴻⵅⵅⵓ, ⵙ ⵜⵉⴷⴻⵜⵜ ⴰⵎ ⵉⴷⴷⴰⵔ ⵙⵉⴷⵉ, ⵡⴻⵏⵏⵉ ⴷ ⴰⵢⵉ ⵉⵙⵙⴻⵎⵜⵏⴻⵏ ⵓ ⵡⴻⵏⵏⵉ ⴷ ⴰⵢⵉ ⵉⵙⵙⵖⵉⵎⴰⵏ ⵅ ⵍⵄⴰⵔⵛ ⵏ ⵜⴳⴻⵍⴷⵉⵜ ⵏ ⴱⴰⴱⴰ ⴷⴰⵡⵓⴷ ⵓ ⵡⴻⵏⵏⵉ ⴷ ⴰⵢⵉ ⵉⴳⴳⵉⵏ ⵉⵛⵜ ⵏ ⵜⴰⴷⴷⴰⵔⵜ ⴰⵎ ⵎⴰⵎⵎⴻⵛ ⵜⵓⵖⴰ ⵉⵏⵏⴰ. ⵙ ⵜⵉⴷⴻⵜⵜ, ⴰⴷⵓⵏⵉⵢⴰ ⴰⴷ ⵉⵜⵜⵡⴰⵏⴻⵖ ⴰⵙⵙ-ⴰ!” ^■   25 ⵅⴰⵙ ⵓⵛⴰ ⵉⵙⵙⴻⴽⴽ ⵓⵊⴻⴵⵉⴷ ⵙⵓⵍⵉⵎⴰⵏ ⵍⵓⵎⵓⵔ-ⴰ ⵙ ⵓⴼⵓⵙ ⵏ ⴱⴰⵏⴰⵢⴰ, ⵎⵎⵉⵙ ⵏ ⵢⴰⵀⵓⵢⴰⴷⴰⵄ. ⵡⴰⵏⵉⵜⴰ ⵉⵡⵜⴰ ⵉ-ⵜ ⵓⵛⴰ ⵉⵎⵎⵓⵜ ⴰⴷⵓⵏⵉⵢⴰ.

26 ⵉⵏⵏⴰ ⵓⵊⴻⴵⵉⴷ ⵉ ⵓⴽⴻⵀⵀⴰⵏ ⴰⴱⵢⴰⵜⴰⵔ: “ⵓⵢⵓⵔ ⵖⴰⵔ ⵄⴰⵏⴰⵜⵓⵜ, ⵖⴰⵔ ⵜⴻⵎⵎⵓⵔⵜ ⵏⵏⴻⴽ, ⵎⴰⵖⴰⵔ ⵛⴻⴽ ⴷ ⵉⵊⵊ ⵏ ⵡⴻⵔⵢⴰⵥ ⵉⵙⵙⴷⴰⵃⴻⴵ ⵍⵎⴻⵡⵜ. ⴰⵙⵙ-ⴰ ⵎⴰⵛⴰ ⵡⴰⵔ ⵛⴻⴽ ⵏⴻⵇⵇⴻⵖ ⵛⴰ, ⵎⵉⵏⵥⵉ ⵛⴻⴽ ⵜⴰⵔⴱⵓⴷ ⵜⵜⴰⴱⵓⵜ ⵏ ⵙⵉⴷⵉ ⵉⵏⵓ, ⵙⵉⴷⵉ, ⵥⵥⴰⵜ ⵉ ⵡⵓⴷⴻⵎ ⵏ ⴱⴰⴱⴰ ⴷⴰⵡⵓⴷ ⵓ ⵎⵉⵏⵥⵉ ⵛⴻⴽ ⵜⵡⴻⴷⴷⴱⴻⴷ ⵓⵍⴰ ⵙ ⵎⴰⵔⵔⴰ ⵉ ⵥⵉ ⵉⵡⴻⴷⴷⴻⴱ ⴱⴰⴱⴰ.” ^■   27 ⵙⵓⵍⵉⵎⴰⵏ ⵢⵓⵥⵥⴻⵍ ⵅ ⴰⴱⵢⴰⵜⴰⵔ ⴰⵍⴰⵎⵉ ⵏⴻⵜⵜⴰ ⵡⴰⵔ ⵜⵓⵖⵉ ⵄⴰⴷ ⴷ ⴰⴽⴻⵀⵀⴰⵏ ⵉ ⵙⵉⴷⵉ, ⵃⵉⵎⴰ ⴰⴷ ⵉⵜⵜⵡⴰⴽⴻⵎⵎⴻⵍ ⵡⴰⵡⴰⵍ ⵏ ⵙⵉⴷⵉ ⵉ ⵜⵓⵖⴰ ⵉⵙⵙⵉⵡⴻⵍ ⵥⵉ ⵊⵊⵉⵀⴻⵜ ⵏ ⵜⴰⴷⴷⴰⵔⵜ ⵏ ⵄⴰⵍⵉ ⴷⵉ ⵛⵉⵍⵓ. ^■  

28 ⵓⵎⵉ ⵢⵉⵡⴻⴹ ⵍⴻⵅⴱⴰⵔ ⵖⴰⵔ ⵢⵓⵡⴰⴱ - ⴰⵇⴰ ⵢⵓⵡⴰⴱ ⵉⴼⴼⴻⵖ, ⵉⴹⴼⴰⵔ ⴰⴷⵓⵏⵉⵢⴰ, ⵡⴰⵅⵅⴰ ⵏⴻⵜⵜⴰ ⵡⴰⵔ ⴷⴷ-ⵉⴼⴼⵉⵖ ⵛⴰ ⵃⵉⵎⴰ ⴰⴷ ⵉⴹⴼⴰⵔ ⴰⴱⵛⴰⵍⵓⵎ - ⵢⴰⵔⵡⴻⵍ ⵢⵓⵡⴰⴱ ⵖⴰⵔ ⵓⵇⵉⴹⵓⵏ ⵏ ⵙⵉⴷⵉ ⵓⵛⴰ ⵉⵟⵟⴻⴼ ⴰⵛⵛⴰⵡⴻⵏ ⵏ ⵓⵄⴰⵍⵟⴰⵔ. ^■   29 ⵅⴻⴱⴱⴰⵔⴻⵏ ⴰⵊⴻⴵⵉⴷ ⵙⵓⵍⵉⵎⴰⵏ ⴰⵇⴰ ⵢⵓⵡⴰⴱ ⵢⴰⵔⵡⴻⵍ ⵖⴰⵔ ⵓⵇⵉⴹⵓⵏ ⵏ ⵙⵉⴷⵉ. ⵓ ⵅⵥⴰⵔ, ⵉⴱⴻⴷⴷ ⴷⵉⵏ ⵖⴰⵔ ⵓⵄⴰⵍⵟⴰⵔ. ⵙⵓⵍⵉⵎⴰⵏ ⵉⵙⵙⴻⴽⴽ ⵖⴰⵔⴻⵙ ⴱⴰⵏⴰⵢⴰ, ⵎⵎⵉⵙ ⵏ ⵢⴰⵀⵓⵢⴰⴷⴰⵄ, ⵉⵏⵏⴰ: “ⵔⵓⵃ ⴷⵉⵏ, ⵏⴻⵖ ⵉ-ⵜ!” 30 ⴱⴰⵏⴰⵢⴰ ⵢⵓⵙⴰ-ⴷⴷ ⵖⴰⵔ ⵓⵇⵉⴹⵓⵏ ⵏ ⵙⵉⴷⵉ ⵓⵛⴰ ⵉⵏⵏⴰ ⴰⵙ: “ⴰⵎⵎⵓ ⵉ ⵉⵇⵇⴰⵔ ⵓⵊⴻⴵⵉⴷ: ‘ⴼⴼⴻⵖ-ⴷⴷ ⵖⴰⵔ ⴱⴰⵔⵔⴰ!’ ” ⵏⴻⵜⵜⴰ ⵉⵏⵏⴰ: “ⵍⵍⴰ, ⵏⴻⵛⵛ ⵅⵙⴻⵖ ⴰⴷ ⵎⵎⵜⴻⵖ ⴷⴰ!” ⴱⴰⵏⴰⵢⴰ ⵉⵙⵙⵉⵡⴻⴹ ⵜⴰⵎⵡⴰⵔⵔⵉⵜ ⵖⴰⵔ ⵓⵊⴻⴵⵉⴷ, ⵉⵏⵏⴰ: “ⴰⵎⵎⵓ ⵉ ⵉⵙⵙⵉⵡⴻⵍ ⵢⵓⵡⴰⴱ ⵓ ⴰⵎⵎⵓ ⵅⴰⴼⵉ ⴷⴷ-ⵢⴰⵔⵔⴰ.” 31 ⵉⵏⵏⴰ ⴰⵙ ⵓⵊⴻⴵⵉⴷ: “ⴻⴳⴳ ⵎⵉⵏ ⵉ ⴷ ⴰⵛ ⵉⵏⵏⴰ ⵏⴻⵜⵜⴰ, ⵖⴻⴹⵍ ⵉ-ⵜ ⵓⵛⴰ ⵏⴻⴹⵍ ⵉ-ⵜ, ⵃⵉⵎⴰ ⴰⴷ ⵜⴰⴳⴳⵯⴻⵊⴻⴷ ⵅ ⵉⴷⴰⵎⵎⴻⵏ ⵉ ⵉⵙⵙⵉⵥⵥⴻⵍ ⵢⵓⵡⴰⴱ ⵅ ⴱⴰⵟⴻⵍ, ⵅⴰⴼⵉ ⵓ ⵅ ⵜⴰⴷⴷⴰⵔⵜ ⵏ ⴱⴰⴱⴰ. 32 ⴰⵎⵎⵓ ⵉ ⵖⴰ ⵢⴰⵔⵔ ⵙⵉⴷⵉ ⵉⴷⴰⵎⵎⴻⵏ ⵉⵙⵙⵉⵥⵥⴻⵍ ⵏⴻⵜⵜⴰ ⵅ ⵓⵥⴻⴵⵉⴼ ⵏⵏⴻⵙ, ⵎⵉⵏⵥⵉ ⵏⴻⵜⵜⴰ ⵉⵙⵙⵃⴻⵢⵢⴻⴷ ⵜⵏⴰⵢⴻⵏ ⵏ ⵢⴻⵔⵢⴰⵥⴻⵏ, ⵉⵏⵏⵉ ⵉⵙⴻⴳⴳⴷⴻⵏ ⵓ ⵉⵃⵍⴰ ⵅⴰⵙ, ⵓⵛⴰ ⵉⵏⵖⴰ ⵉ-ⵜⴻⵏ ⵙ ⵙⵙⵉⴼ ⵓⵎⵉ ⴱⴰⴱⴰ ⴷⴰⵡⵓⴷ ⵡⴰⵔ ⵜ ⵉⵙⵙⵉⵏ: ⴰⴱⵏⵉⵔ, ⵎⵎⵉⵙ ⵏ ⵏⵉⵔ, ⴰⴽⵓⵎⴰⵏⴷⴰⵔ ⵏ ⵍⵄⴻⵙⴽⴰⵔ ⵏ ⵉⵙⵔⴰⵉⵍ, ⵓ ⵄⴰⵎⴰⵙⴰ, ⵎⵎⵉⵙ ⵏ ⵢⴰⵜⵉⵔ, ⴰⴽⵓⵎⴰⵏⴷⴰⵔ ⵏ ⵍⵄⴻⵙⴽⴰⵔ ⵏ ⵢⴰⵀⵓⴷⴰ. 33 ⴰⵎⵎⵓ ⵉ ⵖⴰ ⵄⴻⵇⴱⴻⵏ ⵉⴷⴰⵎⵎⴻⵏ ⵏⵙⴻⵏ ⵅ ⵓⵥⴻⴵⵉⴼ ⵏ ⵢⵓⵡⴰⴱ ⵓ ⵅ ⵓⵥⴻⴵⵉⴼ ⵏ ⵜⴰⵔⵡⴰ ⵏⵏⴻⵙ ⵉ ⵍⴻⴱⴷⴰ. ⵎⴰⵛⴰ ⴷⴰⵡⵓⴷ ⴷ ⵜⴰⵔⵡⴰ ⵏⵏⴻⵙ ⴷ ⵜⴰⴷⴷⴰⵔⵜ ⵏⵏⴻⵙ ⴷ ⵍⵄⴰⵔⵛ ⵏⵏⴻⵙ, ⴰⴷ ⵖⴰⵔⵙⴻⵏ ⵢⵉⵍⵉ ⵍⴻⵀⵏⴰ ⵥⵉ ⵙⵉⴷⵉ ⵉ ⵍⴻⴱⴷⴰ.” 34 ⴱⴰⵏⴰⵢⴰ, ⵎⵎⵉⵙ ⵏ ⵢⴰⵀⵓⵢⴰⴷⴰⵄ, ⵢⵓⵢⵓⵔ ⴷⵉⵏ, ⵉⵡⵜⴰ ⵉ-ⵜ ⵓⵛⴰ ⵉⵏⵖⴰ ⵉ-ⵜ. ⵏⴻⵜⵜⴰ ⵉⵜⵜⵡⴰⵏⴹⴻⵍ ⴷⵉ ⵜⴰⴷⴷⴰⵔⵜ ⵏⵏⴻⵙ ⴷⵉ ⵍⴻⵅⵍⴰ. 35 ⴰⵊⴻⴵⵉⴷ ⵉⴳⴳⴰ ⵅⴻⵏⵏⵉ ⴱⴰⵏⴰⵢⴰ, ⵎⵎⵉⵙ ⵏ ⵢⴰⵀⵓⵢⴰⴷⴰⵄ, ⴷⴻⴳ ⵡⴻⵎⵛⴰⵏ ⵏⵏⴻⵙ ⵅ ⵍⵄⴻⵙⴽⴰⵔ ⵓⵛⴰ ⴰⵊⴻⴵⵉⴷ ⵉⴳⴳⴰ ⵚⴰⴷⵓⵇ, ⴰⴽⴻⵀⵀⴰⵏ, ⴷⴻⴳ ⵡⴻⵎⵛⴰⵏ ⵏ ⴰⴱⵢⴰⵜⴰⵔ. ^■  

36 ⵅⴻⵏⵏⵉ ⵉⵊⵊⴰ ⵓⵊⴻⴵⵉⴷ ⴰⴷ ⵍⴰⵖⴰⵏ ⵉ ⵛⵉⵎⵄⵉ, ⵉⵏⵏⴰ ⴰⵙ: “ⴱⵏⴰ ⵉ ⵢⵉⵅⴻⴼ ⵏⵏⴻⴽ ⵉⵛⵜ ⵏ ⵜⴰⴷⴷⴰⵔⵜ ⴷⵉ ⵓⵔⵛⴰⵍⵉⵎ ⵓⵛⴰ ⵥⴷⴻⵖ ⴷⵉⵏ, ⵡⴰⵔ ⵜⵜⴻⴼⴼⴻⵖ ⵖⴰⵔ ⴷⴰ ⵓⵍⴰ ⵖⴰⵔ ⴷⵉⵀⴰ! 37 ⴰⴷ ⵉⵎⵙⴰⵔ ⴷⴻⴳ ⵡⴰⵙⵙ ⵉ ⴷⵉ ⵉ ⵖⴰ ⵜⴻⴼⴼⵖⴻⴷ, ⴰⴷ ⵜⴻⵥⵡⵉⴷ ⵜⵉⵖⵥⴰⵔⵜ ⵏ ⵇⵉⴷⵔⵓⵏ, ⴰⵇⴰ ⴰⴷ ⵜⴻⵙⵙⵏⴻⴷ ⵏⵉⵛⴰⵏ ⴰⴷ ⵜⴻⵎⵎⵜⴻⴷ ⵏⵀⵍⴰ ⵎⵎⴰ. ⵉⴷⴰⵎⵎⴻⵏ ⵏⵏⴻⴽ ⴰⴷ ⵉⵍⵉⵏ ⵅ ⵓⵥⴻⴵⵉⴼ ⵏⵏⴻⴽ.” 38 ⵛⵉⵎⵄⵉ ⵢⴰⵔⵔⴰ-ⴷⴷ ⵅ ⵓⵊⴻⴵⵉⴷ: “ⴰⵡⴰⵍ-ⴰ ⴷ ⵍⴻⵎⵍⵉⵃ. ⴰⵎ ⵎⴰⵎⵎⴻⵛ ⵉⵙⵙⵉⵡⴻⵍ ⵙⵉⴷⵉ ⵉⵏⵓ, ⴰⵊⴻⴵⵉⴷ, ⴰⵎⵎⵓ ⵉ ⵖⴰ ⵉⴳⴳ ⵓⵍⴰ ⴷ ⵓⵎⵙⴻⵅⵅⴰⵔ ⵏⵏⴻⴽ.” ⵓ ⵛⵉⵎⵄⵉ ⵜⵓⵖⴰ ⵉⵥⴻⴷⴷⴻⵖ ⴰⵟⵟⴰⵙ ⵏ ⵡⵓⵙⵙⴰⵏ ⴷⵉ ⵓⵔⵛⴰⵍⵉⵎ.

39 ⵎⴰⵛⴰ ⴰⵡⴰⵔⵏⵉ ⵉ ⵜⵍⴰⵜⴰ ⵏ ⵉⵙⴻⴳⴳⵯⵓⵙⴰ, ⵉⵎⵙⴰⵔ, ⴰⵇⴰ ⵜⵏⴰⵢⴻⵏ ⵏ ⵉⵎⵙⴻⵅⵅⴰⵔⴻⵏ ⵏ ⵛⵉⵎⵄⵉ ⴰⵔⴻⵡⵍⴻⵏ ⵖⴰⵔ ⴰⵅⵉⵛ, ⵎⵎⵉⵙ ⵏ ⵎⴰⵄⴽⴰ, ⴰⵊⴻⴵⵉⴷ ⵏ ⵊⴰⵜ. ⵅⴻⴱⴱⴰⵔⴻⵏ ⴰⵢⴰ ⵉ ⵛⵉⵎⵄⵉ, ⵏⵏⴰⵏ: “ⵅⵥⴰⵔ, ⵉⵎⵙⴻⵅⵅⴰⵔⴻⵏ ⵏⵏⴻⴽ ⴰⵇⴰ ⴰⵜⴻⵏ ⴷⵉ ⵊⴰⵜ.” 40 ⵅⴻⵏⵏⵉ ⵉⴽⴽⴰⵔ ⵛⵉⵎⵄⵉ, ⵉⴱⴰⵔⴷⴻⵄ ⵉ ⵡⴻⵖⵢⵓⵍ ⵏⵏⴻⵙ ⵓⵛⴰ ⵢⵓⵢⵓⵔ ⵖⴰⵔ ⴰⵅⵉⵛ ⵖⴰⵔ ⵊⴰⵜ, ⵃⵉⵎⴰ ⴰⴷ ⵢⴰⵔⵥⵓ ⵅ ⵉⵎⵙⴻⵅⵅⴰⵔⴻⵏ ⵏⵏⴻⵙ. ⵛⵉⵎⵄⵉ ⵢⵓⵢⵓⵔ ⴷⵉⵏ ⵓ ⵢⴰⵔⵔⴰ ⵉ-ⵜⴻⵏ-ⴷⴷ ⵥⵉ ⵊⴰⵜ. 41 ⵅⴻⴱⴱⴰⵔⴻⵏ ⴰⵢⴰ ⵉ ⵙⵓⵍⵉⵎⴰⵏ ⴰⵇⴰ ⵛⵉⵎⵄⵉ ⵉⴼⴼⴻⵖ ⵥⵉ ⵓⵔⵛⴰⵍⵉⵎ ⵖⴰⵔ ⵊⴰⵜ ⵓⵛⴰ ⵉⵄⵇⴻⴱ-ⴷⴷ ⵄⴰⵡⴻⴷ. 42 ⴰⵊⴻⴵⵉⴷ ⵉⵙⵙⴻⴽⴽ ⴰⴷ ⵍⴰⵖⴰⵏ ⵉ ⵛⵉⵎⵄⵉ ⵓⵛⴰ ⵉⵏⵏⴰ ⴰⵙ: “ⵎⴰ ⵡⴰⵔ ⵛⴻⴽ ⵊⵊⵉⵖ ⴰⴷ ⵜⴻⵊⵊⴰⴵⴻⴷ ⵖⴰⵔ ⵙⵉⴷⵉ ⵓ ⵄⴻⵍⵎⴻⵖ ⴰⵛ, ⵏⵏⵉⵖ: ‘ⴷⴻⴳ ⵡⴰⵙⵙ ⵉ ⴷⵉ ⵉ ⵖⴰ ⵜⴻⴼⴼⵖⴻⴷ ⴷⵉⵀⴰ ⵏⵉⵖ ⵖⴰⵔ ⴷⵉⵏⵏⵉ, ⴰⴷ ⵜⴻⵙⵙⵏⴻⴷ ⵏⵉⵛⴰⵏ, ⴰⴷ ⵜⴻⵎⵎⵜⴻⴷ ⵏⵃⵍⴰ ⵎⵎⴰ!’? ⵓ ⵛⴻⴽ ⵜⴻⵏⵏⵉⴷ ⴰⵢⵉ: ‘ⴰⵡⴰⵍ-ⴰ ⵉ ⵙⵍⵉⵖ, ⴰⵇⴰ-ⵜ ⵎⵍⵉⵃ.’ 43 ⵎⴰⵢⴻⵎⵎⵉ ⵅⴻⵏⵏⵉ ⵡⴰⵔ ⵜⴻⵃⴹⵉⴷ ⵛⴰ ⵜⴰⵊⴰⴵⵉⵜ ⵏ ⵙⵉⴷⵉ ⴷ ⵍⵓⵎⵓⵔ ⵉ ⴷ ⴰⵛ ⴳⴳⵉⵖ?” 44 ⵉⵏⵏⴰ ⵓⵊⴻⴵⵉⴷ ⵄⴰⵡⴻⴷ ⵉ ⵛⵉⵎⵄⵉ: “ⵛⴻⴽ ⵜⴻⵙⵙⵏⴻⴷ ⴷⴻⴳ ⵡⵓⵍ ⵏⵏⴻⴽ ⵎⴰⵔⵔⴰ ⵜⵓⵄⴻⴼⴼⵏⴰ ⵉ ⵜⴻⴳⴳⵉⴷ ⵉ ⴱⴰⴱⴰ ⴷⴰⵡⵓⴷ. ⵙ ⵓⵢⴻⵏⵏⵉ ⵙⵉⴷⵉ ⴰⴷ ⴷⴷ-ⵢⴰⵔⵔ ⵜⵓⵄⴻⴼⴼⵏⴰ ⵏⵏⴻⴽ ⵅ ⵓⵥⴻⴵⵉⴼ ⵏⵏⴻⴽ. ^■   45 ⵎⴰⵛⴰ ⴰⴷ ⵉⵜⵜⵡⴰⴱⴰⵔⴻⴽ ⵓⵊⴻⴵⵉⴷ ⵙⵓⵍⵉⵎⴰⵏ ⵓ ⵍⵄⴰⵔⵛ ⵏ ⴷⴰⵡⵓⴷ ⴰⴷ ⵉⵜⵜⵡⴰⵙⵙⴻⵎⵜⴻⵏ ⵉ ⵍⴻⴱⴷⴰ ⵥⵥⴰⵜ ⵉ ⵡⵓⴷⴻⵎ ⵏ ⵙⵉⴷⵉ.” 46 ⵅⴰⵙ ⵓⵛⴰ ⵉⴷⴻⴱⴱⴰⵔ ⵓⵊⴻⴵⵉⴷ ⵅ ⴱⴰⵏⴰⵢⴰ, ⵎⵎⵉⵙ ⵏ ⵢⴰⵀⵓⵢⴰⴷⴰⵄ, ⵓ ⵡⴰⵏⵉⵜⴰ ⵢⵓⵢⵓⵔ ⵖⴰⵔ ⴱⴰⵔⵔⴰ, ⵉⵡⵜⴰ ⵛⵉⵎⵄⵉ ⴰⵍⴰⵎⵉ ⵉⵎⵎⵓⵜ ⵡⴰⵏⵉⵜⴰ. ⴰⵎⵎⵓ ⵉ ⵜᵉⵜⵜⵡⴰⵛⴻⴷⴷ ⵜⴳⴻⵍⴷⵉⵜ ⴷⴻⴳ ⵓⴼⵓⵙ ⵏ ⵙⵓⵍⵉⵎⴰⵏ. ^■