ⵉⵥⵍⵉ ⵏ ⴷⴰⵡⵓⴷ
22
1 ⴷⴰⵡⵓⴷ ⵉⵙⵙⵉⵡⴻⵍ ⴰⵡⴰⵍⴻⵏ ⵏ ⵉⵥⵍⵉ ⴰⵢⴰ ⵉ ⵙⵉⴷⵉ ⴷⴻⴳ ⵡⴰⵙⵙ ⵓⵎⵉ ⵜ ⵉⴼⴻⴽⴽ ⵙⵉⴷⵉ ⵥⴻⴳ ⵓⴼⵓⵙ ⵏ ⵎⴰⵔⵔⴰ ⵍⵄⴻⴷⵢⴰⵏ ⵏⵏⴻⵙ ⵓ ⵥⴻⴳ ⵓⴼⵓⵙ ⵏ ⵛⴰⵡⵓⵍ. 2 ⵏⴻⵜⵜⴰ ⵉⵏⵏⴰ: “ⵙⵉⴷⵉ ⴷ ⵜⴰⵚⴹⴰⵔⵜ ⵉⵏⵓ ⴷ ⵍⴱⵓⵔⵊ ⵉⵏⵓ ⴷ ⴰⵎⵙⴻⵏⵊⴻⵎ ⵉⵏⵓ.
3 ⵙⵉⴷⵉ ⵏ ⵜⴻⵚⴹⴰⵔⵜ ⵉⵏⵓ, ⵏⴻⵛⵛ ⵖⴰⵔⴻⵙ ⵉ ⵖⴰ ⴰⵔⴻⵡⵍⴻⵖ.
ⵛⴻⴽ ⴷ ⴰⵙⴻⵍⵇⵉ ⵉⵏⵓ ⴷ ⵢⵉⵛⵛ ⵏ ⵓⵙⴻⵏⵊⴻⵎ ⵉⵏⵓ,
ⵍⴱⵓⵔⵊ ⵉⵏⵓ ⵢⵓⵄⵍⴰⵏ, ⴰⵎⵛⴰⵏ ⵉⵏⵓ ⵏ ⵜⴰⵔⴻⵡⵍⴰ ⴷ ⴰⵎⵙⴻⵏⵊⴰⵎ ⵉⵏⵓ.
ⵛⴻⴽ ⵜⴼⴻⴽⴽⴻⴷ ⴰⵢⵉ ⵥⵉ ⵍⵄⵓⵏⴼ. ■
4 ⵏⴻⵛⵛ ⵍⴰⵖⵉⵖ-ⴷⴷ: ‘ⴰⵙⴻⵎⵖⴰⵔ ⵉ ⵙⵉⴷⵉ’,
ⵓ ⴰⵇⴰ ⵜⵜⵡⴰⵙⵏⴻⵊⵎⴻⵖ ⵥⵉ ⵍⵄⴻⴷⵢⴰⵏ ⵉⵏⵓ.
5 ⵎⴰⵖⴰⵔ ⵏⵏⴹⴻⵏ ⴰⵢⵉ-ⴷⴷ ⵍⴻⵎⵡⴰⵊ ⵏ ⵍⵎⴻⵡⵜ,
ⵙⵙⵉⴳⴳⵯⴻⴷⴻⵏⵜ ⴰⵢⵉ ⵍⵃⴻⵎⵍⴰⵜ ⵏ ⵡⴰⵎⴰⵏ ⵉⵀⴰⵊⴻⵏ.
6 ⵉⵙⴻⵖⵡⴰⵏ ⵏ ⵍⴰⵅⴰⵔⵜ ⵛⴰⵔⴼⴻⵏ ⴰⵢⵉ,
ⵜⵉⵅⴻⵛⴼⵉⵏ ⵏ ⵍⵎⴻⵡⵜ ⵃⵚⴰⵔⴻⵏⵜ ⴰⵢⵉ.
7 ⴷⵉ ⵍⴻⵃⵚⴰⵔⴻⵜ ⵉⵏⵓ ⵍⴰⵖⵉⵖ-ⴷⴷ ⵅ ⵙⵉⴷⵉ ⵓ ⵅ ⴰⵔⴻⴱⴱⵉ ⵉⵏⵓ ⵉ ⵅ ⴷⴷ-ⵍⴰⵖⵉⵖ.
ⵣⵉ ⵣⵥⴰⵡⴻⵛⵜ ⵜⴰⵎⴻⵇⵇⵔⴰⵏⵜ ⵏⵏⴻⵙ ⵉⵙⵍⴰ ⵏⴻⵜⵜⴰ ⵉ ⵜⵎⵉⵊⵊⴰ ⵉⵏⵓ
ⵓⵛⴰ ⵉⵖⵓⵢⵢⴰⵏ ⵉⵏⵓ ⵓⴷⴼⴻⵏ ⵖⴰⵔ ⵉⵎⴻⵥⵥⵓⵖⴻⵏ ⵏⵏⴻⵙ.
8 ⵅⴻⵏⵏⵉ ⵜⴻⵏⵀⴻⵥⵥ ⵓ ⵜⴰⵔⵊⵉⵊ ⵜⴻⵎⵎⵓⵔⵜ,
ⴷⵙⵓⵙⴰ ⵏ ⵓⵊⴻⵏⵏⴰ ⵜⵜⵔⴰⵃⴻⵏ-ⴷⴷ ⵜⵜⴰⵙⴻⵏ-ⴷⴷ ⵓ ⵏⵀⴻⵥⵥⴻⵏ,
ⵎⴰⵖⴰⵔ ⴰⵖⴹⴰⴱ ⵏⵏⴻⵙ ⵜⵓⵖⴰ ⵉⵜⵜⵡⴰⵙⴰⵔⵖ.
9 ⴷⴷⴻⵅⵅⴰⵏ ⵉⴳⴻⵄⵄⴻⴷ-ⴷⴷ ⵥⴻⴳ ⵡⴻⵏⵥⴰⵔⴻⵏ ⵏⵏⴻⵙ
ⵓ ⵜⵉⵎⴻⵙⵙⵉ ⵥⴻⴳ ⵓⵇⴻⵎⵎⵓⵎ ⵏⵏⴻⵙ ⵜⵚⴰⵔⴹ,
ⵍⴻⴼⵃⴻⵎ ⵉⵜⵜⴻⵃⴷⵓⴷⵓⵇⴻⵏ ⵉⵜⵜⵡⴰⵙⴰⵔⵖ ⵥⵥⴰⵢⴻⵙ.
10 ⵏⴻⵜⵜⴰ ⵉⴳⴳⴰ ⴰⵊⴻⵏⵏⴰ ⴰⴷ ⵢⴰⴹⴰⵔ ⵓⵛⴰ ⵉⵀⵡⴰ-ⴷⴷ ⵏⴻⵜⵜⴰ,
ⴰⵇⴰ ⴷⵉⵏ ⵉⵊⵊ ⵏ ⵓⵙⴻⵢⵏⵓ ⵉⴱⴱⵓⵎⴱⴻⵙ ⵙⴰⴷⵓ ⵉⴹⴰⵔⴻⵏ ⵏⵏⴻⵙ.
11 ⵏⴻⵜⵜⴰ ⵉⵏⴷⴻⵀ ⵅ ⵉⵊⵊ ⵏ ⵓⴽⵉⵔⵓⴱ ⵓⵛⴰ ⵉⴹⵡⴰ,
ⵓ ⵏⴻⵜⵜⴰ ⵉⵜⵜⵡⴰⵥⴰⵔ ⵅ ⵡⴰⴼⵔⵉⵡⴻⵏ ⵏ ⵓⵚⴻⵎⵎⵉⴹ. □
12 ⵏⴻⵜⵜⴰ ⵉⴳⴳⴰ ⵜⴰⴵⴻⵙⵜ ⴰⴷ ⴰⵙ ⵜⴻⵏⵏⴻⴹ,
ⴰⵎ ⵉⵄⵓⵛⵛⵓⵜⴻⵏ, ⵉⵊⵊ ⵏ ⵡⴻⴳⵔⴰⵡ ⵏ ⵡⴰⵎⴰⵏ,
ⵉⵙⴻⵢⵏⵓⵜⴻⵏ ⵉⵇⴻⵍⵍⵊⴻⵏ ⵉⴱⴱⴰⵔⴻⵛⵏⴻⵏ.
13 ⵣⵉ ⵜⵉⵙⵙⵉⵇⵜ ⵇⵉⴱⴰⵞ ⵏⵏⴻⵙ ⵜⵜⵡⴰⵙⴰⵔⵖⴻⵏ ⵍⴻⴼⵃⴻⵎ ⵉⵜⵜⴻⵃⴷⵓⴷⵓⵇⴻⵏ.
14 ⵓⵛⴰ ⵉⵊⵊⴰ ⵙⵉⴷⵉ ⴰⵊⵊⴰⵊ ⴰⴷ ⵉⴷⴷⵓⵇⵇⴻⵥ ⵥⴻⴳ ⵓⵊⴻⵏⵏⴰ,
ⵓⵛⴰ ⴰⵎⵄⵓⴵⵉ ⵅ ⴽⵓⵍⵛⵉ ⵉⴳⴳⴰ ⵜⵎⵉⵊⵊⴰ ⵏⵏⴻⵙ ⵜⵜⵏⴻⴼⵔⴰⵔⴰ.
15 ⵏⴻⵜⵜⴰ ⵉⵙⵙⴻⴽⴽ ⴼⵍⵉⵜⵛⴰⵜ ⵏ ⵍⵇⴻⵡⵙ ⵏⵏⴻⵙ ⵓⵛⴰ ⵉⴱⴻⵥⵥⴻⵄ ⵉ-ⵜⴻⵏ,
ⵉⵥⵥⴰⵔⵢⴻⴹ ⴰⵙⵙⴰⵎⴻⵏ ⵓⵛⴰ ⵉⵙⵙⵉⴳⴳⵯⴻⴷ ⵉ-ⵜⴻⵏ.
16 ⵜⵉⵙⵉⵡⵉⵏ ⵏ ⵍⴻⴱⵃⴰⵔ ⴷⴻⵡⵍⴻⵏⵜ ⵜⵜⴱⴰⵏⴻⵏⵜ,
ⴷⵙⵓⵙⴰ ⵏ ⴷⴷⵓⵏⴻⵛⵜ ⴷⴻⵡⵍⴻⵏ ⵄⴰⵔⵔⴰⵏ ⵥⴻⴳ ⵓⵡⴻⴷⴷⴻⴱ ⵏ ⵙⵉⴷⵉ,
ⵥⴻⴳ ⵓⵚⵓⴹⵉ ⵏ ⵍⴻⵄⵡⵉⵏ ⵥⴻⴳ ⵡⴻⵏⵥⴰⵔⴻⵏ ⵏⵏⴻⵙ.
17 ⵣⵉ ⵙⴻⵏⵏⴻⵊ ⵉⵙⵙⵡⵉⵥⵥⴻⴹ-ⴷⴷ ⴰⴼⵓⵙ ⵏⵏⴻⵙ,
ⵢⵉⵡⵉ ⴰⵢⵉ, ⵉⵊⴱⴻⴷ ⴰⵢⵉ-ⴷⴷ ⵥⴻⴳ ⵡⴰⵎⴰⵏ ⵎⵖⴰⵔⴻⵏ.
18 ⵏⴻⵜⵜⴰ ⵉⴼⴻⴽⴽ ⴰⵢⵉ-ⴷⴷ ⵥⵉ ⵍⴻⵄⴷⵓ ⵉⵏⵓ ⵉⵊⴻⵀⴷⴻⵏ,
ⵥⴻⴳ ⵉⵏⵏⵉ ⴷ ⴰⵢⵉ ⵉⵛⴰⵔⵔⵀⴻⵏ,
ⵎⵉⵏⵥⵉ ⵏⵉⵜⵏⵉ ⵜⵓⵖⴰ ⵊⴻⵀⴷⴻⵏ ⵅⴰⴼⵉ.
19 ⵏⵉⵜⵏⵉ ⵃⵚⴰⵔⴻⵏ ⴰⵢⵉ ⴷⴻⴳ ⵡⴰⵙⵙ ⵏ ⴰⵔⵥⵉⵢⵢⴻⵜ ⵉⵏⵓ,
ⵎⴰⵛⴰ ⵙⵉⴷⵉ ⵜⵓⵖⴰ ⴷ ⴰⵎⵄⴻⵎⵎⴻⴷ ⵉⵏⵓ.
20 ⵏⴻⵜⵜⴰ ⵉⵏⴷⴻⵀ ⴰⵢⵉ ⵖⴰⵔ ⵜⵜⴰⵙⵉⵄ ⵓⵛⴰ ⵉⵙⵙⴻⵏⵊⴻⵎ ⴰⵢⵉ,
ⵎⴰⵖⴰⵔ ⵏⴻⵜⵜⴰ ⵜⵓⵖⴰ ⵉⵙⵙⵄⵉⵥⵥⴰ ⴰⵢⵉ.
21 ⵙⵉⴷⵉ ⵉⵅⵍⴻⴼ ⴰⵢⵉ ⵄⵍⴰⵃⵙⴰⴱ ⵜⴰⵙⴻⴳⴷⴰ ⵉⵏⵓ,
ⵄⵍⴰⵃⵙⴰⴱ ⵜⴰⵥⴷⵓⴳⵉ ⵏ ⵉⴼⴰⵙⵙⴻⵏ ⵉⵏⵓ ⵉⵅⴻⴵⴻⵚ ⴰⵢⵉ.
22 ⵎⴰⵖⴰⵔ ⵏⴻⵛⵛ ⵃⴹⵉⵖ ⵉⴱⵔⵉⴷⴻⵏ ⵏ ⵙⵉⴷⵉ,
ⵡⴰⵔ ⵀⴻⵢⵢⴹⴻⵖ ⵛⴰ ⵅ ⴰⵔⴻⴱⴱⵉ ⵉⵏⵓ ⵙ ⵓⵅⴻⵢⵢⴻⴱ.
23 ⵎⴰⵖⴰⵔ ⵎⴰⵔⵔⴰ ⵍⵃⴻⵇⵇ ⵏⵏⴻⵙ ⵜⵓⵖⴰ ⵥⵥⴰⵜ ⵉ ⵜⵉⵟⵟⴰⵡⵉⵏ ⵉⵏⵓ,
ⵡⴰⵔ ⵃⴻⵢⵢⵉⴷⴻⵖ ⵛⴰ ⵅ ⵜⵡⴻⵚⵚⴰ ⵏⵏⴻⵙ.
24 ⴷⴻⵡⵍⴻⵖ ⵜⵜⵡⴰⴽⴻⵎⵎⵍⴻⵖ ⴰⴽⵉⴷⴻⵙ,
ⵃⴹⵉⵖ ⵉⵅⴻⴼ ⵉⵏⵓ ⵥⵉ ⵍⵎⵓⵄⵚⵉⵢⵢⴻⵜ ⵉⵏⵓ.
25 ⵙⵉⴷⵉ ⵉⵅⵍⴻⴼ ⴰⵢⵉ ⴰⵏⴻⵛⵜ ⵏ ⵜⴰⵙⴻⴳⴷⴰ ⵉⵏⵓ,
ⴰⵏⴻⵛⵜ ⵏ ⵜⴰⵥⴷⵓⴳⵉ ⵉⵏⵓ ⵥⵥⴰⵜ ⵉ ⵜⵉⵟⵟⴰⵡⵉⵏ ⵏⵏⴻⵙ.
26 ⵉ ⵓⵎⴻⴷⴷⵓⴽⴽⴻⵍ ⴰⵎⵜⵉⵇⵇⵉ ⵉ ⵜⴻⴵⵉⴷ ⵛⴻⴽ ⴷ ⴰⵎⴻⴷⴷⵓⴽⴽⴻⵍ ⴷ ⴰⵎⵜⵉⵇⵇⵉ,
ⵉ ⴱⵓ-ⵜⴻⵖⵔⵓⴹⵜ ⵉⴽⴻⵎⵎⵍⴻⵏ ⵉ ⵜⴻⴵⵉⴷ ⵛⴻⴽ ⵜⴽⴻⵎⵎⵍⴻⴷ.
27 ⵉ ⵡⴻⵏⵏⵉ ⵉⵜⵜⵡⴰⵙⵉⵥⴻⴷⴳⴻⵏ ⴰⵇⴰ ⵛⴻⴽ ⴷ ⴰⵎⴻⵥⴷⴰⴳ,
ⴰⴽ-ⴷ ⵡⴻⵏⵏⵉ ⵉⴼⴰⵔⵖⴻⵏ, ⴰⵇⴰ ⵜⴼⴰⵔⵖⴻⴷ.
28 ⵛⴻⴽ ⵜⴻⵙⵙⵏⴻⵊⵎⴻⴷ ⵍⴳⴻⵏⵙ ⵉⵜⵜⵡⴰⵃⵚⴰⵔ,
ⵎⴰⵛⴰ ⵜⵉⵟⵟⴰⵡⵉⵏ ⵏⵏⴻⴽ ⴹⵉⴷⴷ ⵉ ⵉⵎⵄⴻⴼⴼⴰⵔⴻⵏ, ⵛⴻⴽ ⴰⴷ ⵜⴻⵏ ⵜⴻⵙⵙⴻⵀⵡⵉⴷ. □
29 ⵎⵉⵏⵥⵉ ⵛⴻⴽ ⴷ ⵍⴻⴼⵏⴰⵔ ⵉⵏⵓ, ⴰ ⵙⵉⴷⵉ!
ⵙⵉⴷⵉ ⵉⴳⴳⴰ ⵜⴰⴼⴰⵡⵜ ⴷⵉ ⵜⴰⴵⴻⵙⵜ ⵉⵏⵓ.
30 ⵎⵉⵏⵥⵉ ⴰⴽⵉⴷⴻⴽ ⴰⴷ ⴰⵥⵥⵍⴻⵖ ⵅ ⵉⵛⵜ ⵏ ⴱⴰⵏⴷⵉⵢⵢⴰ,
ⴰⴽ-ⴷ ⴰⵔⴻⴱⴱⵉ ⵉⵏⵓ ⴰⴷ ⵏⴻⴳⴳⵥⴻⵖ ⵅ ⵉⵊⵊ ⵏ ⵍⵃⵉⴹ.
31 ⴰⴱⵔⵉⴷ ⵏ ⴰⵔⴻⴱⴱⵉ ⵉⴽⵎⴻⵍ, ⵎⵉⵏ ⵉⵇⵇⴰⵔ ⵙⵉⴷⵉ ⴰⵇⴰ ⵉⵜⵜⵡⴰⵚⴻⴼⴼⴰ ⴷⵉ ⵜⵎⴻⵙⵙⵉ.
ⵏⴻⵜⵜⴰ ⴷ ⴰⵙⴻⵍⵇⵉ ⵉ ⵎⴰⵔⵔⴰ ⵉⵏⵏⵉ ⵖⴰⵔⴻⵙ ⵢⴰⵔⴻⵡⵍⴻⵏ. ■
32 ⵎⴰⵖⴰⵔ ⵎⴰⵏ ⵡⴻⵏ ⵉ ⵉⴵⴰⵏ ⴷ ⴰⵔⴻⴱⴱⵉ, ⵎⵖⵉⵔ ⵙⵉⴷⵉ,
ⵓ ⵎⴰⵏ ⵡⴻⵏ ⵉ ⵉⴵⴰⵏ ⴷ ⵜⴰⵚⴹⴰⵔⵜ, ⵎⵖⵉⵔ ⴰⵔⴻⴱⴱⵉ ⵏⵏⴻⵖ? ■
33 ⴰⵔⴻⴱⴱⵉ ⴷ ⵍⴱⵓⵔⵊ ⵉⵏⵓ ⵉⵊⵀⴻⴷ,
ⵏⴻⵜⵜⴰ ⵉⵙⵙⴰⵔⵅⵓ ⴰⴱⵔⵉⴷ ⵏⵏⴻⵙ ⵏⵉⵛⴰⵏ.
34 ⵏⴻⵜⵜⴰ ⵉⴳⴳⴰ ⵉⴹⴰⵔⴻⵏ ⵉⵏⵓ ⴰⵎ ⵢⴻⵏⵏⵉ ⵏ ⵜⵓⴷⴰⴷⵉⵏ,
ⵓ ⵢⴰⵔⵔⴰ ⴰⵢⵉ ⴰⴷ ⴱⴻⴷⴷⴻⵖ ⵅ ⵍⴻⴳⵄⵓⴷⵉ ⵉⵏⵓ.
35 ⵏⴻⵜⵜⴰ ⵉⵙⵙⴻⵍⵎⴻⴷ ⵉⴼⴰⵙⵙⴻⵏ ⵉⵏⵓ ⵉ ⵓⵎⴻⵏⵖⵉ,
ⵉⵖⴰⴵⴻⵏ ⵉⵏⵓ ⴰⴷ ⵎⴻⵃⴹⴻⵏ ⵉⵊⵊ ⵏ ⵍⵇⴻⵡⵙ ⵏ ⵏⵏⵃⴰⵙ.
36 ⵛⴻⴽ ⵜⴻⵡⵛⵉⴷ ⴰⵢⵉ ⴰⵙⴻⵍⵇⵉ ⵏ ⵓⵙⴻⵏⵊⴻⵎ ⵏⵏⴻⴽ,
ⵓ ⵙ ⵓⵡⴰⴹⴻⵄ ⵏⵏⴻⴽ ⵜⴻⵙⵙⴻⵎⵖⴰⵔⴻⴷ ⴰⵢⵉ.
37 ⴰⵇⴰ ⵜⴻⴳⴳⴻⴷ ⵜⵜⴰⵙⵉⵄ ⵉ ⵓⵚⵓⵔⵉⴼ ⵙⴰⴷⵓ ⵉⵏⵓ,
ⵓⵛⴰ ⵜⵉⵛⴻⵄⴱⵉⵏ ⵉⵏⵓ ⵡⴰⵔ ⵎⴻⵢⵢⵍⴻⵏⵜ.
38 ⵏⴻⵛⵛ ⴹⴼⴰⵔⴻⵖ ⵍⵄⴻⴷⵢⴰⵏ ⵉⵏⵓ ⵓⵛⴰ ⵜⴻⵃⵃⵉⵖ ⵜⴻⵏ,
ⵓ ⵡⴰⵔ ⴷⴷ ⵜⵜⵄⵉⵇⵇⵉⴱⴻⵖ ⴰⵍ ⵜⴻⵏ ⵇⴹⵉⵖ.
39 ⵏⴻⵛⵛ ⵇⴹⵉⵖ ⵜⴻⵏ ⵓ ⵙⵙⵏⵓⵇⵇⴱⴻⵖ ⵜⴻⵏ ⴰⵍⴰⵎⵉ ⵡⴰⵔ ⴽⴽⴰⵔⴻⵏ ⵄⴰⵡⴻⴷ.
ⵏⵉⵜⵏⵉ ⵡⴹⴰⵏ ⵙⴰⴷⵓ ⵉⴹⴰⵔⴻⵏ ⵉⵏⵓ.
40 ⵛⴻⴽ ⵜⴱⴻⵢⵙⴻⴷ ⴰⵢⵉ ⵙ ⵊⵊⴻⵀⴷ ⵉ ⵓⵎⴻⵏⵖⵉ,
ⵜⴰⵔⵔⵉⴷ-ⴷⴷ ⵉⵏⵏⵉ ⵖⴰⵔⵉ ⴷⴷ-ⵉⴽⴽⴰⵔⴻⵏ ⴰⴷ ⴰⴹⴰⵔⴻⵏ ⵙⴰⴷⵓ ⵉⵏⵓ.
41 ⵛⴻⴽ ⵜⴻⵡⵛⵉⴷ ⴰⵢⵉ ⵜⵉⵎⴻⵊⵊⴰⵔⵜ ⵏ ⵍⵄⴻⴷⵢⴰⵏ ⵉⵏⵓ, ⵏ ⵢⵉⵏⵏⵉ ⴷ ⴰⵢⵉ ⵉⵄⵉⴼⴼⴻⵏ,
ⵓ ⵏⴻⵛⵛ ⴰⵔⴻⴷⴷⴵⴻⵖ ⵜⴻⵏ.
42 ⵏⵉⵜⵏⵉ ⵅⴻⵥⵥⴰⵔⴻⵏ, ⵎⴰⵛⴰ ⵡⴰⵔ ⴷⵉⵏ ⵜⵓⵖⵉ ⴰⵎⵙⴻⵏⵊⴻⵎ,
ⵅⴻⵥⵥⴰⵔⴻⵏ ⵖⴰⵔ ⵙⵉⴷⵉ, ⵎⴰⵛⴰ ⵏⴻⵜⵜⴰ ⵡⴰⵔ ⵅⴰⵙⴻⵏ ⴷⴷ-ⵢⴰⵔⵔⵉ.
43 ⵏⴻⵛⵛ ⵡⴻⴷⴷⴰⵔⴻⵖ ⵜⴻⵏ ⴰⵎ ⵜⵄⴻⵊⵊⴰⵊⵜ ⵏ ⵜⴻⵎⵎⵓⵔⵜ,
ⴰⵎ ⵓⵛⴰⵍ ⵅ ⵉⴱⵔⵉⴷⴻⵏ ⵄⴻⵊⵏⴻⵖ ⵅⴰⵙⴻⵏ ⵓ ⵍⴻⴱⵥⴻⵖ ⵜⴻⵏ.
44 ⵛⴻⴽ ⵜⴼⴻⴽⴽⵉⴷ ⴰⵢⵉ ⵥⴻⴳ ⵉⵎⵛⵓⴱⴱⴻⵛⴻⵏ ⵏ ⵍⴳⴻⵏⵙ ⵉⵏⵓ,
ⵜⴻⵃⴹⵉⴷ ⴰⵢⵉ ⴷ ⴰⵥⴻⴵⵉⴼ ⵏ ⵍⴻⴳⵏⵓⵙ,
ⵉⵊⵊ ⵏ ⵍⴳⴻⵏⵙ ⵡⴰⵔ ⵜ ⵙⵙⵉⵏⴻⵖ, ⴰⴷ ⴰⵢⵉ ⵉⵙⴻⵅⵅⴰⵔ.
45 ⵜⴰⵔⵡⴰ ⵏ ⵉⵊⵊ ⵏ ⵓⴱⴰⵔⵔⴰⵏⵉ ⵙⵙⵏⵉⵄⵎⵉⵍⴻⵏ ⵙⵙⵡⴰⴹⵄⴻⵏ ⴰⵢⵉ.
ⵎⵖⵉⵔ ⵍⴰⵎⵉ ⵉⵙⵍⴰ ⵓⵎⴻⵥⵥⵓⵖ ⵡⴰⵀⴰ, ⵙⵍⵉⵏ-ⴷⴷ ⵖⴰⵔⵉ.
46 ⵜⴰⵔⵡⴰ ⵏ ⵉⵊⵊ ⵏ ⵓⴱⴰⵔⵔⴰⵏⵉ ⴼⴻⵛⵍⴻⵏ,
ⵡⴰⵅⵅⴰ ⵏⵉⵜⵏⵉ ⵜⵓⵖⴰ ⵜⵜⵡⴰⵏⵏⴹⴻⵏ ⵙ ⵍⴱⴰⵔⴰⵊⴰⵜ ⵏⵙⴻⵏ.
47 ⵜⵓⴷⴰⵔⵜ ⵉ ⵙⵉⴷⵉ. ⴰⴷ ⵜᵉⵜⵜⵡⴰⴱⴰⵔⴻⴽ ⵜⴻⵚⴹⴰⵔⵜ ⵉⵏⵓ.
ⴻⵊⵊ ⴰⴷ ⵢⵉⵍⵉ ⴰⵔⴻⴱⴱⵉ ⵏ ⵜⴻⵚⴹⴰⵔⵜ ⵏ ⵓⵙⴻⵏⵊⴻⵎ ⵉⵏⵓ ⴰⴷ ⵉⵜⵜⵡⴰⵙⴳⴻⵄⵄⴻⴷ ⵖⴰⵔ ⵓⵊⴻⵏⵏⴰ!.
48 ⴰⵔⴻⴱⴱⵉ ⵡⴻⵏⵏⵉ ⵉ ⵅⴰⴼⵉ ⵉⵜⵜⴻⵏⵜⴰⵇⴰⵎⴻⵏ
ⴷ ⵡⴻⵏⵏⵉ ⵉ ⴷ ⴰⵢⵉ ⵉⵜⵜⴻⴳⴳⴻⵏ ⵍⴻⴳⵏⵓⵙ ⵙⴰⴷⵓ ⵓⴼⵓⵙ ⵉⵏⵓ,
49 ⵡⴻⵏⵏⵉ ⴷ ⴰⵢⵉ ⵉⵙⵙⵓⴼⴼⵓⵖⴻⵏ ⵥⴻⴳ ⵓⴼⵓⵙ ⵏ ⵍⵄⴻⴷⵢⴰⵏ ⵉⵏⵓ,
ⵡⴰⵀ, ⵛⴻⴽ ⵜⴻⵙⵙⴳⴻⵄⵄⴰⴷⴻⴷ ⴰⵢⵉ ⵜⵉⵡⴰ ⵏ ⵢⵉⵏⵏⵉ ⴷ ⴰⵢⵉ ⵉⵜⵜⴹⴰⴷⴷⴰⵏ,
ⵛⴻⴽ ⵜⴻⵙⵙⴻⵏⵊⴰⵎⴻⴷ ⴰⵢⵉ ⵥⴻⴳ ⵡⴻⵔⵢⴰⵥ ⵏ ⵍⴻⵅⵛⵓⵏⴻⵛⵜ.
50 ⵅ ⵓⵢⴻⵏⵏⵉ, ⵙⵉⴷⵉ, ⵏⴻⵛⵛ ⵅⵙⴻⵖ ⴰⴷ ⵛⴻⴽ ⵇⴰⴷⵉⵖ
ⵓ ⴰⴷ ⵥⴻⵀⵀⴷⴻⵖ ⵉⵙⴻⵎ ⵏⵏⴻⴽ. ■
51 ⵉⴳⴳⴰ ⵉⵙⴻⵏⵊⵉⵎⴻⵏ ⵏ ⵓⵊⴻⴵⵉⴷ ⵏⵏⴻⵙ ⵎⵖⴰⵔⴻⵏ
ⵓⵛⴰ ⵉⵙⵙⵛⴻⵏ ⵜⴰⵎⴻⵅⵙⵉⵡⵜ ⵏⵏⴻⵙ ⵉⵛⴻⵡⵡⴰⵔⴻⵏ ⵉ ⵓⵎⴻⴷⵀⵓⵏ ⵏⵏⴻⵙ,
ⵉ ⴷⴰⵡⵓⴷ ⵓ ⵉ ⵥⵥⴰⵔⵉⵄⴻⵜ ⵏⵏⴻⵙ ⵉ ⵍⴻⴱⴷⴰ.”