1 ⴷⴻⴳ ⵡⵓⵙⵙⴰⵏ ⵏ ⴷⴰⵡⵓⴷ ⵜⵓⵖⴰ ⴷⵉⵏ ⵉⵊⵊ ⵍⴰⵥ, ⵜⵍⴰⵜⴰ ⵏ ⵉⵙⴻⴳⴳⵯⵓⵙⴰ, ⴰⵙⴻⴳⴳⵯⴰⵙ ⴰⵡⴰⵔⵏⵉ ⵓⵙⴻⴳⴳⵯⴰⵙ. ⵓ ⴷⴰⵡⵓⴷ ⵢⴰⵔⵥⵓ ⵓⴷⴻⵎ ⵏ ⵙⵉⴷⵉ ⵓ ⵙⵉⴷⵉ ⵉⵏⵏⴰ: “ⴷ ⵎⴰⵏ ⴰⵢⴰ ⵅ ⵛⴰⵡⵓⵍ ⵓ ⵅ ⵉⴷⴰⵎⵎⴻⵏ ⵉ ⵉⵍⴻⵚⵇⴻⵏ ⴷⵉ ⵜⴰⴷⴷⴰⵔⵜ ⵏⵏⴻⵙ, ⵎⵉⵏⵥⵉ ⵏⴻⵜⵜⴰ ⵉⵏⵖⴰ ⴰⵢⵜ ⵏ ⵊⵉⴱⵄⵓⵏ.” 2 ⵅⴻⵏⵏⵉ ⵉⵍⴰⵖⴰ-ⴷⴷ ⵓⵊⴻⴵⵉⴷ ⵅ ⵉⵊⵉⴱⵄⵓⵏⵉⵢⵢⴻⵏ, ⵉⵙⵙⵉⵡⴻⵍ ⴰⴽⵉⴷⵙⴻⵏ. ⴰⵢⵜ ⵏ ⵊⵉⴱⵄⵓⵏ ⵎⴰⵛⴰ ⵡⴰⵔ ⴷⴷ-ⵇⵇⴰⵔⵚⴻⵏ ⵛⴰ ⵥⴻⴳ ⴰⵢⵜ ⵏ ⵉⵙⵔⴰⵉⵍ, ⵎⴰⵛⴰ ⵥⵉ ⵎⵉⵏ ⵉⵇⵇⵉⵎⴻⵏ ⵥⴻⴳ ⵉⵎⵓⵔⵉⵢⵢⴻⵏ. ⴰⵢⵜ ⵏ ⵉⵙⵔⴰⵉⵍ ⵜⵓⵖⴰ ⵊⵊⵓⴵⴻⵏ ⴰⵙⴻⵏ, ⵎⴰⵛⴰ ⵛⴰⵡⵓⵍ ⵜⵓⵖⴰ ⵢⴰⵔⴻⵥⵥⵓ ⴰⴷ ⵜⴻⵏ ⵉⵡⵡⴻⵜ ⴷⴻⴳ ⵡⴻⵛⴹⴰⵔ ⵏⵏⴻⵙ ⵉ ⴰⵢⵜ ⵏ ⵉⵙⵔⴰⵉⵍ ⴷ ⵢⴰⵀⵓⴷⴰ. ^■   3 ⴷⴰⵡⵓⴷ ⵉⵏⵏⴰ ⵉ ⴰⵢⵜ ⵏ ⵊⵉⴱⵄⵓⵏ: “ⵎⵉⵏ ⴷ ⴰⵡⴻⵎ ⵉ ⵖⴰ ⴳⴳⴻⵖ ⵓ ⵙ ⵎⵉⵏ ⵥⵉ ⵖⴰ ⴳⴳⴻⵖ ⴰⵚⵍⴰⵃ ⵎⴰⵃⴻⵏⴷ ⴰⴷ ⵜⴱⴰⵔⴽⴻⵎ ⵍⵡⴰⵔⵜ ⵏ ⵙⵉⴷⵉ?” 4 ⴰⵢⵜ ⵏ ⵊⵉⴱⵄⵓⵏ ⵏⵏⴰⵏ ⴰⵙ: “ⵡⴰⵔ ⴷ ⴰⵏⴻⵖ ⵉⵛⵇⵉ ⵏⵏⵓⵇⴰⵔⵜ ⵏⵉⵖ ⴷ ⵡⵓⵔⴻⵖ ⵥⵉ ⵛⴰⵡⵓⵍ ⵏⵉⵖ ⵥⵉ ⵜⴰⴷⴷⴰⵔⵜ ⵏⵏⴻⵙ. ⵄⴰⵡⴻⴷ ⵡⴰⵔ ⴷ ⴰⵏⴻⵖ-ⴷⴷ ⵉⴽⴽⴰⵔ ⴰⴷ ⵏⴻⵏⴻⵖ ⵛⴰ ⵏ ⵉⵊⵊ ⴷⵉ ⵉⵙⵔⴰⵉⵍ.” ⵓ ⵏⴻⵜⵜⴰ ⵉⵏⵏⴰ: “ⵎⵉⵏ ⵉ ⵖⴰ ⵜⵉⵏⵉⵎ, ⴰⴷ ⴰⵡⴻⵎ ⵜ ⴳⴳⴻⵖ.” 5 ⵏⵉⵜⵏⵉ ⵏⵏⴰⵏ ⵉ ⵓⵊⴻⴵⵉⴷ: “ⵉⵛⵇⴰ ⴰⵏⴻⵖ ⵡⴻⵔⵢⴰⵥ ⵏⵏⵉ ⵉⵅⵙⴻⵏ ⴰⴷ ⵅⴰⵏⴻⵖ ⵉⵇⴹⴰ ⵓ ⵜⵓⵖⴰ ⵉⵏⵡⴰ ⴰⴷ ⵉⵎⵃⴰ ⴰⵖⵉⵎⵉ ⵏⵏⴻⵖ ⴷⵉ ⵎⴰⵔⵔⴰ ⵜⴰⵎⵎⵓⵔⵜ ⵏ ⵉⵙⵔⴰⵉⵍ. 6 ⴰⴷ ⴰⵏⴻⵖ ⵎⵎⴻⵡⵛⴻⵏ ⵙⴻⴱⵄⴰ ⵏ ⵢⴻⵔⵢⴰⵥⴻⵏ ⵥⴻⴳ ⵉⵃⴻⵏⵊⵉⵔⴻⵏ ⵏⵏⴻⵙ ⵃⵉⵎⴰ ⴰⴷ ⵜⴻⵏ ⴰⵢⵍⴻⵏ ⵥⵥⴰⵜ ⵉ ⵙⵉⴷⵉ ⴷⵉ ⵊⵉⴱⵄⴰ ⵏ ⵛⴰⵡⵓⵍ, ⵡⴻⵏⵏⵉ ⵉⵜⵜⵡⴰⴼⴰⵔⵥⴻⵏ ⵥⵉ ⵙⵉⴷⵉ!” ⵓⵛⴰ ⴰⵊⴻⴵⵉⴷ ⵉⵏⵏⴰ: “ⵏⴻⵛⵛ ⴰⴷ ⵜⴻⵏ ⵡⵛⴻⵖ.” 7 ⵎⴰⵛⴰ ⴰⵊⴻⴵⵉⴷ ⵉⵙⵙⵄⵉⵥⵥ ⵅ ⵎⴰⴼⵉⴱⵓⵛⴰⵜ, ⵎⵎⵉⵙ ⵏ ⵢⵓⵏⴰⵜⴰⵏ, ⵎⵎⵉⵙ ⵏ ⵛⴰⵡⵓⵍ, ⴷⵉ ⵟⵟⵡⴻⵄ ⵏ ⵜⵊⴰⴵⵉⵜ ⵉ ⵙⵉⴷⵉ, ⵜⴻⵏⵏⵉ ⵜᵉⵜⵜⵡⴰⴳⴳ ⵊⴰⵔ ⴰⵙⴻⵏ, ⵊⴰⵔ ⴷⴰⵡⵓⴷ ⴷ ⵢⵓⵏⴰⵜⴰⵏ, ⵎⵎⵉⵙ ⵏ ⵛⴰⵡⵓⵍ. ^■  

8 ⴰⵊⴻⴵⵉⴷ ⵉⴽⵙⵉ ⵜⵏⴰⵢⴻⵏ ⵏ ⵉⵃⴻⵏⵊⵉⵔⴻⵏ ⵏ ⵔⵉⵚⴼⴰ, ⵢⴻⴵⵉⵙ ⵏ ⴰⵢⴰ, ⵉ ⴷⴷ-ⵜⵓⵔⵓⵡ ⵉ ⵛⴰⵡⵓⵍ, ⴰⵔⵎⵓⵏⵉ ⴷ ⵎⴰⴼⵉⴱⵓⵛⴰⵜ, ⴷ ⵅⴻⵎⵙⴰ ⵏ ⵉⵃⴻⵏⵊⵉⵔⴻⵏ ⵏ ⵓⵞⵎⴰⵙ ⵏ ⵎⵉⵅⴰⵍ, ⵢⴻⴵⵉⵙ ⵏ ⵛⴰⵡⵓⵍ, ⵉ ⴷⴷ-ⵜⵓⵔⵓⵡ ⵉ ⵄⴰⴷⵔⵉⵢⵉⵍ, ⵎⵎⵉⵙ ⵏ ⴱⴰⵔⵥⵉⵍⵍⴰⵢ ⵥⵉ ⵎⴰⵃⵓⵍⴰⵢ. 9 ⵏⴻⵜⵜⴰ ⵉⵡⵛⴰ ⵉ-ⵜⴻⵏ ⴷⴻⴳ ⵉⴼⴰⵙⵙⴻⵏ ⵏ ⴰⵢⵜ ⵏ ⵊⵉⴱⵄⵓⵏ ⵉⵏⵏⵉ ⵜⴻⵏ ⴰⵢⵍⴻⵏ ⵅ ⵡⴻⴷⵔⴰⵔ ⵥⵥⴰⵜ ⵉ ⵡⵓⴷⴻⵎ ⵏ ⵙⵉⴷⵉ. ⵙⴻⴱⵄⴰ ⵏⵏⵉ ⵡⴹⴰⵏ ⴷⴻⴳ ⵉⵛⵜ ⵏ ⵜⵡⴰⵍⴰ. ⵏⵉⵜⵏⵉ ⵜⵜⵡⴰⵏⵖⴻⵏ ⴷⴻⴳ ⵡⵓⵙⵙⴰⵏ ⵏ ⵜⵎⴻⵢⵔⴰ, ⴷⴻⴳ ⵡⵓⵙⵙⴰⵏ ⵉⵎⴻⵥⵡⵓⵔⴰ, ⵖⴰⵔ ⴱⴻⴷⴷⵓ ⵏ ⵜⵎⴻⵢⵔⴰ ⵏ ⵉⵎⴻⵏⴷⵉ.

10 ⵅⴻⵏⵏⵉ ⵜⴻⴽⵙⵉ ⵔⵉⵚⴼⴰ, ⵢⴻⴵⵉⵙ ⵏ ⴰⵢⴰ, ⵉⵛⵜ ⵏ ⵜⵅⴰⵏⵛⴻⵜ ⵜⴻⵙⵙⵓ ⵜⵜ ⵥⵥⴰⵜ ⵉ ⵉⵅⴻⴼ ⵏⵏⴻⵙ ⵅ ⵉⵊⵊ ⵏ ⵊⵊⴰⵔⴼ. ⵣⵉ ⴱⴻⴷⴷⵓ ⵏ ⵜⵎⴻⵢⵔⴰ ⵖⴰⵔⴻⵙ ⴰⵍⴰⵎⵉ ⵉ ⵅⴰⵙⴻⵏ-ⴷⴷ ⵥⴻⴵⵄⴻⵏ ⵡⴰⵎⴰⵏ ⵥⴻⴳ ⵓⵊⴻⵏⵏⴰ. ⵏⴻⵜⵜⴰⵜ ⵡⴰⵔ ⵜⴻⵊⵊⵉ ⵉⵊⴹⴰⴹ ⵏ ⵓⵊⴻⵏⵏⴰ ⴰⴷ ⵅⴰⵙⴻⵏ ⴰⵔⴻⵢⵢⵃⴻⵏ ⵙ ⵓⵥⵉⵍ ⵓⵍⴰ ⴷ ⵍⴻⵡⵃⵓⵛ ⵏ ⵍⴻⵅⵍⴰ ⵙ ⴵⵉⵍⴻⵜ.

11 ⵃⴰⵊⴰⵏ ⴰⵙ ⵉ ⴷⴰⵡⵓⴷ ⵎⵉⵏ ⵜⵓⵖⴰ ⵜⴻⴳⴳⴰ ⵔⵉⵚⴼⴰ, ⵢⴻⴵⵉⵙ ⵏ ⴰⵢⴰ, ⵜⴰⵢⵢⴰ ⵏ ⵛⴰⵡⵓⵍ.

12 ⵉⵟⵟⴻⴼ ⴷⴰⵡⵓⴷ ⴰⴱⵔⵉⴷ ⵎⴰⵃⴻⵏⴷ ⴰⴷ ⵉⴽⵙⵉ ⵥⴻⴳ ⵉⵎⴻⵥⴷⴰⵖ ⵏ ⵢⴰⴱⵉⵛ ⴷⵉ ⵊⵉⵍⵄⴰⴷ ⵉⵖⵓⵙⵙⴰⵏ ⵏ ⵛⴰⵡⵓⵍ ⴷ ⵉⵖⵓⵙⵙⴰⵏ ⵏ ⵎⵎⵉⵙ ⵢⵓⵏⴰⵜⴰⵏ ⵏⵏⵉ ⴷⴷ-ⴽⴽⵙⴻⵏ ⵏⵉⵜⵏⵉ ⵥⴻⴳ ⵡⴰⵥⵥⴰⵖ ⵏ ⴱⴰⵢⵜ-ⵙⴰⵏ, ⵎⴰⵏⵉ ⵜⴻⵏ ⵢⵓⵢⵍⴻⵏ ⵉⴼⵉⵍⵉⵙⵟⵉⵏⵉⵢⵢⴻⵏ ⴷⴻⴳ ⵡⴰⵙⵙ ⵉ ⴷⵉ ⵖⴻⵍⴱⴻⵏ ⵉⴼⵉⵍⵉⵙⵟⵉⵏⵉⵢⵢⴻⵏ ⵛⴰⵡⵓⵍ ⵅ ⵉⴷⵓⵔⴰⵔ ⵏ ⵊⵉⵍⴱⵓⵄⴰ. ^■  

13 ⵏⴻⵜⵜⴰ ⵉⵙⵙⴳⴻⵄⵄⴻⴷ ⵙⵙⴻⵏⵏⵉ ⵉⵅⵙⴰⵏ ⵏ ⵛⴰⵡⵓⵍ ⴷ ⵉⵅⵙⴰⵏ ⵏ ⵎⵎⵉⵙ ⵢⵓⵏⴰⵜⴰⵏ. ⵏⵉⵜⵏⵉ ⵙⵙⵎⵓⵏⴻⵏ ⵄⴰⵡⴻⴷ ⵉⵅⵙⴰⵏ ⵏ ⵢⵉⵏⵏⵉ ⵉⵜⵜⵡⴰⵢⵍⴻⵏ.

14 ⵏⴻⴹⵍⴻⵏ ⵉⵅⵙⴰⵏ ⵏ ⵛⴰⵡⵓⵍ ⴷ ⵎⵎⵉⵙ ⵢⵓⵏⴰⵜⴰⵏ ⴷⵉ ⵜⴻⵎⵎⵓⵔⵜ ⵏ ⴱⵉⵏⵢⴰⵎⵉⵏ ⴷⵉ ⵚⴰⵢⵍⴰⵄ ⴷⴻⴳ ⵡⴻⵏⴹⴻⵍ ⵏ ⴱⴰⴱⴰⵙ ⵇⵉⵙ ⵓ ⵏⵉⵜⵏⵉ ⴳⴳⵉⵏ ⵎⴰⵔⵔⴰ ⵎⵉⵏ ⴷ ⴰⵙⴻⵏ ⵢⵓⵎⵓⵔ ⵓⵊⴻⴵⵉⴷ. ⴰⵡⴰⵔⵏⵉ ⵎⴰⵏ ⴰⵢⴰ ⵉⵊⵊⴰ ⴰⵔⴻⴱⴱⵉ ⴰⴷ ⵉⵜⵜⵡⴰⵙⴻⵚⵍⴻⵃ ⵉⵅⴻⴼ ⵏⵏⴻⵙ ⴷⵉ ⵟⵟⵡⴻⵄ ⵏ ⵜⴻⵎⵎⵓⵔⵜ ⵙ ⵜⵥⴰⴵⵉⵜ ⵏⵙⴻⵏ ⵢⵓⴵⵖⴻⵏ.

15 ⵉⴼⵉⵍⵉⵙⵟⵉⵏⵉⵢⵢⴻⵏ ⵎⵎⴻⵏⵖⴻⵏ ⵄⴰⵡⴻⴷ ⴰⴽ-ⴷ ⵉⵙⵔⴰⵉⵍ. ⴷⴰⵡⵓⴷ ⵉⵀⵡⴰ ⴷ ⵉⵎⵙⴻⵅⵅⴰⵔⴻⵏ ⵏⵏⴻⵙ ⴰⴽⵉⴷⴻⵙ. ⵏⵉⵜⵏⵉ ⵎⴻⵏⵖⴻⵏ ⴰⴽ-ⴷ ⵉⴼⵉⵍⵉⵙⵟⵉⵏⵉⵢⵢⴻⵏ ⵓⵛⴰ ⵉⴷⵡⴻⵍ ⴷⴰⵡⵓⴷ ⵢⵓⵃⴻⵍ ⴰⵟⵟⴰⵙ.

16 ⵢⵉⵛⴱⵉ-ⴱⴰⵏⵓⴱ, ⵉⵊⵊ ⵥⴻⴳ ⴰⵢⵜ ⵏ ⵔⴰⴼⴰ, ⵡⴻⵏⵏⵉ ⵍⴰⵏⵙⴰ ⵏⵏⴻⵙ ⵜⴻⵡⵥⴻⵏ ⵜⴻⵍⵜ-ⵎⵢⴰ ⵏ ⵉⵛⵉⵇⵍⴻⵏ ⵏ ⵏⵏⵃⴰⵙ ⵓ ⵡⴻⵏⵏⵉ ⵜⵓⵖⴰ ⵉⴱⵢⴻⵙ ⵙ ⵢⵉⵊⵊ ⵏ ⵙⵙⵉⴼ ⴷ ⴰⵎⴰⵢⵏⵓ, ⵉⵟⵟⵖⵉⵍ ⴰⵙ ⴰⴷ ⵉⵡⵡⴻⵜ ⴷⴰⵡⵓⴷ.

17 ⵎⴰⵛⴰ ⴰⴱⵉⵛⴰⵢ, ⵎⵎⵉⵙ ⵏ ⵚⴰⵔⵓⵢⴰ, ⵉⵡⵛⴰ ⴰⵙ ⴰⴼⵓⵙ ⵓ ⵉⵡⵜⴰ ⴰⴼⵉⵍⵉⵙⵟⵉⵏⵉ, ⵉⵏⵖⴰ ⵉ-ⵜ. ⵅⴻⵏⵏⵉ ⵊⵊⵓⴵⴻⵏ ⴰⵙ ⵢⴻⵔⵢⴰⵥⴻⵏ ⵏ ⴷⴰⵡⵓⴷ, ⵏⵏⴰⵏ: “ⵛⴻⴽ ⵡⴰⵔ ⴰⴽⵉⴷⵏⴻⵖ ⵜⴻⴼⴼⵖⴻⴷ ⵄⴰⴷ ⵖⴰⵔ ⵓⵎⴻⵏⵖⵉ, ⵎⴰⵃⴻⵏⴷ ⵡⴰⵔ ⵜⵅⴻⵙⵙⵢⵉⴷ ⵍⴻⴼⵏⴰⵔ ⵏ ⵉⵙⵔⴰⵉⵍ.”

18 ⴰⵡⴰⵔⵏⵉ ⴰⵙ ⵉⵎⵙⴰⵔ, ⴰⵇⴰ ⵉⴽⴽⴰⵔ ⵄⴰⵡⴻⴷ ⵓⵎⴻⵏⵖⵉ ⴰⴽ-ⴷ ⵉⴼⵉⵍⵉⵙⵟⵉⵏⵉⵢⵢⴻⵏ ⴷⵉ ⵊⵓⴱ. ⵍⴻⵅⴷⴻⵏⵏⵉ ⵙⴰⴱⴽⴰⵢ, ⴰⵃⵓⵛⴰⵢⵉ, ⵉⵡⵜⴰ ⵙⴰⴼ, ⵡⴻⵏⵏⵉ ⴷ ⵉⵊⵊ ⵥⴻⴳ ⴰⵢⵜ ⵏ ⵔⴰⴼⴰ. ^■  

19 ⵓⵛⴰ ⵄⴰⵡⴻⴷ ⵜⵓⵖⴰ ⴷⵉⵏ ⵓⵎⴻⵏⵖⵉ ⴰⴽ-ⴷ ⵉⴼⵉⵍⵉⵙⵟⵉⵏⵉⵢⵢⴻⵏ ⴷⵉ ⵊⵓⴱ. ⵉⵍⵃⴰⵏⴰⵏ, ⵎⵎⵉⵙ ⵏ ⵢⴰⵄⵔⵉ-ⴰⵔⵊⵉⵎ, ⵥⵉ ⴱⴰⵢⵜ-ⵍⴰⵃⵎ, ⵉⵖⵍⴻⴱ ⵅ ⵓⵞⵎⴰⵙ ⵏ ⵊⵓⵍⵢⴰⵜ ⵥⵉ ⵊⴰⵜ. ⴰⴽⴻⵛⵛⵓⴹ ⵏ ⵍⴰⵏⵙⴰ ⵉⴳⴳⴰ ⴰⵎ ⵉⵊⵊ ⵏ ⵡⴻⵄⵎⵓⴷ ⵏ ⵓⴽⴻⵛⵛⵓⴹ ⵏ ⵓⵅⴻⵢⵢⴻⴹ.

20 ⵓⵛⴰ ⵉⴽⴽⴰⵔ ⵄⴰⵡⴻⴷ ⵓⵎⴻⵏⵖⵉ ⴷⵉ ⵊⴰⵜ. ⵜⵓⵖⴰ ⴷⵉⵏ ⵉⵊⵊ ⵏ ⵡⴻⵔⵢⴰⵥ ⴷ ⴰⵥⵉⵔⴰⵔ, ⵙ ⵙⴻⵜⵜⴰ ⵏ ⵉⴹⴻⵡⴹⴰⵏ ⵖⴰⵔ ⵉⴼⴰⵙⵙⴻⵏ ⵏⵏⴻⵙ ⵓ ⵙⴻⵜⵜⴰ ⵏ ⵜⴼⴻⴷⵏⵉⵏ ⵖⴰⵔ ⵉⴹⴰⵔⴻⵏ ⵏⵏⴻⵙ, ⵎⴰⵔⵔⴰ ⵍⵇⴻⴷⴷ ⵏⵙⴻⵏ ⴰⵔⴻⴱⵄⴰ ⵓ ⵄⵉⵛⵔⵉⵏ. ⵓⵍⴰ ⴷ ⵏⴻⵜⵜⴰ ⵉⵜⵜⵡⴰⵅⵍⴻⵇ-ⴷⴷ ⴷⵉ ⵔⴰⴼⴰ. 21 ⵏⴻⵜⵜⴰ ⵉⵙⵙⵜⴻⵀⵥⴰ ⵥⵉ ⵉⵙⵔⴰⵉⵍ, ⵎⴰⵛⴰ ⵢⵓⵏⴰⵜⴰⵏ, ⵎⵎⵉⵙ ⵏ ⵛⵉⵎⵄⴰ, ⵓⵎⴰⵙ ⵏ ⴷⴰⵡⵓⴷ, ⵉⵖⵍⴻⴱ ⵅⴰⵙ.

22 ⴰⵔⴻⴱⵄⴰ ⴰⵢⴰ ⵜⵜⵡⴰⵅⴻⵍⵇⴻⵏ-ⴷⴷ ⴷⵉ ⵔⴰⴼⴰ ⴷⵉ ⵊⴰⵜ ⵓ ⵏⵉⵜⵏⵉ ⵡⴹⴰⵏ ⵙ ⵓⴼⵓⵙ ⵏ ⴷⴰⵡⵓⴷ ⵓ ⵙ ⵓⴼⵓⵙ ⵏ ⵉⵎⵙⴻⵅⵅⴰⵔⴻⵏ ⵏⵏⴻⵙ.