1 ⵃⴰⵊⴰⵏ ⵉ ⴷⴰⵡⵓⴷ, ⵏⵏⴰⵏ: “ⴰⵇⴰ ⵉⴼⵉⵍⵉⵙⵟⵉⵏⵉⵢⵢⴻⵏ ⵜⵜⵎⴻⵏⵖⴰⵏ ⴰⴽ-ⴷ ⵇⴰⵄⵉⵍⴰ ⵓⵛⴰ ⵜⵜⴽⴻⵛⵛⴰⴹⴻⵏ ⵉⵏⴻⴷⵔⴰⵔ.” 2 ⵉⵙⵙⴻⵇⵙⴰ ⴷⴰⵡⵓⴷ ⵙⵉⴷⵉ, ⵉⵏⵏⴰ: “ⵎⴰ ⴰⴷ ⴼⴼⵖⴻⵖ ⴷⵉⵏ, ⴰⴷ ⵡⵜⴻⵖ ⵉⴼⵉⵍⵉⵙⵟⵉⵏⵉⵢⵢⴻⵏ?” ⵙⵉⴷⵉ ⵢⴰⵔⵔⴰ-ⴷⴷ ⵅ ⴷⴰⵡⵓⴷ: “ⴼⴼⴻⵖ, ⵡⵡⴻⵜ ⵉⴼⵉⵍⵉⵙⵟⵉⵏⵉⵢⵢⴻⵏ ⵓⵛⴰ ⴼⴻⴽⴽ ⵇⴰⵄⵉⵍⴰ!” 3 ⵏⵏⴰⵏ ⴰⵙ ⵢⴻⵔⵢⴰⵥⴻⵏ ⵏ ⴷⴰⵡⵓⴷ: “ⵅⵥⴰⵔ, ⵏⴻⵛⵛⵉⵏ ⵏⴻⵜⵜⴻⴳⴳⵯⴻⴷ ⴷⴻⵖⵢⴰ ⴷⴰ ⴷⵉ ⵢⴰⵀⵓⴷⴰ, ⵎⴰⵎⵎⴻⵛ ⵄⴰⴷ ⵅⴻⵏⵏⵉ ⵎⴰⵍⴰ ⵏⴻⵛⵛⵉⵏ ⵏⴻⴼⴼⴻⵖ ⵖⴰⵔ ⵇⴰⵄⵉⵍⴰ ⵖⴰⵔ ⵉⵙⴻⴷⴷⵉⵢⵢⴻⵏ ⵏ ⵍⵄⴻⵙⴽⴰⵔ ⵏ ⵉⴼⵉⵍⵉⵙⵟⵉⵏⵉⵢⵢⴻⵏ.” 4 ⵓⵛⴰ ⴷⴰⵡⵓⴷ ⵉⵙⵙⴻⵇⵙⴰ ⵙⵉⴷⵉ ⵜⵡⴰⵍⴰ ⵏⵏⴻⵖⵏⵉⵜ ⵓ ⵙⵉⴷⵉ ⵢⴰⵔⵔⴰ-ⴷⴷ ⵅⴰⵙ, ⵉⵏⵏⴰ: “ⴽⴽⴰⵔ, ⵀⵡⴰ ⵖⴰⵔ ⵇⴰⵄⵉⵍⴰ, ⵎⵉⵏⵥⵉ ⵏⴻⵛⵛ ⴰⴷ ⴰⵛ ⵡⵛⴻⵖ ⵉⴼⵉⵍⵉⵙⵟⵉⵏⵉⵢⵢⴻⵏ ⴷⴻⴳ ⵉⴼⴰⵙⵙⴻⵏ ⵏⵏⴻⴽ.” 5 ⵅⴰⵙ ⵓⵛⴰ ⵉⴼⴼⴻⵖ ⴷⴰⵡⵓⴷ ⴰⴽ-ⴷ ⵢⴻⵔⵢⴰⵥⴻⵏ ⵏⵏⴻⵙ ⵖⴰⵔ ⵇⴰⵄⵉⵍⴰ, ⵉⵎⵏⴻⵖ ⴰⴽ-ⴷ ⵉⴼⵉⵍⵉⵙⵟⵉⵏⵉⵢⵢⴻⵏ. ⵏⴻⵜⵜⴰ ⵢⵓⵥⵥⴻⵍ ⵅ ⵜⵃⵉⵎⴰⵔⵉⵏ ⵏⵙⴻⵏ ⵓⵛⴰ ⵉⵡⵜⴰ ⵜⴻⵏ ⵙ ⵉⵛⵜ ⵏ ⵜⴻⵛⵜⵉ ⴷ ⵜⴰⵎⴻⵇⵇⵔⴰⵏⵜ. ⴰⵎⵎⵓ ⵉ ⵉⴼⴻⴽⴽ ⴷⴰⵡⵓⴷ ⵉⵎⴻⵥⴷⴰⵖ ⵏ ⵇⴰⵄⵉⵍⴰ.

6 ⵓⵎⵉ ⴰⴱⵢⴰⵜⴰⵔ, ⵎⵎⵉⵙ ⵏ ⴰⵅⵉⵎⴰⵍⵉⴽ, ⵢⴰⵔⵡⴻⵍ ⵖⴰⵔ ⴷⴰⵡⵓⴷ ⵖⴰⵔ ⵇⴰⵄⵉⵍⴰ, ⵉⵎⵙⴰⵔ, ⵏⴻⵜⵜⴰ ⴰⵇⴰ ⵉⵀⵡⴰ ⴰⴽ-ⴷ ⵓⴱⴰⵍⵟⵓ ⵏ ⵓⴽⴻⵀⵀⴰⵏ ⴷⴻⴳ ⵉⴼⴰⵙⵙⴻⵏ ⵏⵏⴻⵙ. ^■  

7 ⵃⴰⵊⴰⵏ ⴰⵙ ⵉ ⵛⴰⵡⵓⵍ, ⴰⵇⴰ ⴷⴰⵡⵓⴷ ⵢⵉⵡⴻⴹ ⵖⴰⵔ ⵇⴰⵄⵉⵍⴰ. ⵅⴻⵏⵏⵉ ⵉⵏⵏⴰ ⵛⴰⵡⵓⵍ: “ⴰⵔⴻⴱⴱⵉ ⵉⴳⴳⴰ ⴰⵢⵉ ⵉ-ⵜ ⴷⴻⴳ ⵓⴼⵓⵙ ⵉⵏⵓ, ⵎⵉⵏⵥⵉ ⵏⴻⵜⵜⴰ ⵉⵜⵜⵡⴰⵃⴻⴱⴱⴻⵙ ⴰⵍⴰⵎⵉ ⵢⵓⴷⴻⴼ ⵖⴰⵔ ⵉⵛⵜ ⵏ ⵜⴻⵏⴷⵉⵏⵜ ⵙ ⵜⴻⵡⵡⵓⵔⴰ ⴷ ⵥⵥⴻⴽⵔⵓⵏⴰⵜ.” 8 ⵉⵊⵊⴰ ⵛⴰⵡⵓⵍ ⴰⴷ ⴷⴷ-ⵍⴰⵖⴰⵏ ⵅ ⵎⴰⵔⵔⴰ ⵍⴳⴻⵏⵙ ⵖⴰⵔ ⵓⵎⴻⵏⵖⵉ, ⵃⵉⵎⴰ ⴰⴷ ⵀⵡⴰⵏ ⵖⴰⵔ ⵇⴰⵄⵉⵍⴰ ⵎⴰⵃⴻⵏⴷ ⴰⴷ ⵏⵏⴹⴻⵏ ⵉ ⴷⴰⵡⵓⴷ ⴷ ⵢⴻⵔⵢⴰⵥⴻⵏ ⵏⵏⴻⵙ.

9 ⵍⴰⵎⵉ ⵢⴰⵔⴳⴻⴱ ⴷⴰⵡⵓⴷ ⴱⴻⵍⵍⵉ ⵛⴰⵡⵓⵍ ⵉⴳⴳⴰ ⴷⴰⵢⴻⵙ ⵜⵓⵄⴻⴼⴼⵏⴰ ⴰⵢⴰ ⵙ ⵜⵏⵓⴼⴼⵔⴰ, ⵉⵏⵏⴰ ⵏⴻⵜⵜⴰ ⵉ ⵓⴽⴻⵀⵀⴰⵏ ⴰⴱⵢⴰⵜⴰⵔ: “ⴰⵡⵉ-ⴷⴷ ⴰⴱⴰⵍⵟⵓ ⵏ ⵓⴽⴻⵀⵀⴰⵏ ⴷⴰ!”

10 ⵉⵏⵏⴰ ⴷⴰⵡⵓⴷ: “ⴰ ⵙⵉⴷⵉ, ⴰⵔⴻⴱⴱⵉ ⵏ ⵉⵙⵔⴰⵉⵍ, ⴰⵎⵙⴻⵅⵅⴰⵔ ⵏⵏⴻⴽ ⵉⵙⵍⴰ ⵏⵉⵛⴰⵏ, ⴰⵇⴰ ⵛⴰⵡⵓⵍ ⵉⵄⴻⵎⵎⴻⴷ ⴰⴷ ⴷⴷ-ⵢⴰⵙ ⵖⴰⵔ ⵇⴰⵄⵉⵍⴰ ⵃⵉⵎⴰ ⴰⴷ ⵉⵅⴰⵔⵔⴻⴱ ⵜⴰⵏⴷⵉⵏⵜ ⴷⵉ ⵟⵟⵡⴻⵄ ⵉⵏⵓ.

11 ⵎⴰ ⴰⴷ ⴰⵢⵉ ⵙⵙⴻⵄⴷⵓⵏ ⵉⵎⴻⵥⴷⴰⵖ ⵏ ⵇⴰⵄⵉⵍⴰ ⴷⵉ ⵟⵟⵡⴻⵄ ⵏⵏⴻⵙ? ⵎⴰ ⴰⴷ ⵉⵀⵡⴰ ⵛⴰⵡⵓⵍ ⴰⵎ ⵎⴰⵎⵎⴻⵛ ⵉⵙⵍⴰ ⵓⵎⵙⴻⵅⵅⴰⵔ ⵏⵏⴻⴽ? ⴰ ⵙⵉⴷⵉ, ⴰⵔⴻⴱⴱⵉ ⵏ ⵉⵙⵔⴰⵉⵍ, ⵉⵏⵉ ⵜ ⵉ ⵓⵎⵙⴻⵅⵅⴰⵔ ⵏⵏⴻⴽ!” ⵙⵉⴷⵉ ⵢⴰⵔⵔⴰ-ⴷⴷ: “ⵏⴻⵜⵜⴰ ⴰⴷ ⵉⵀⵡⴰ.”

12 ⵅⴰⵙ ⵓⵛⴰ ⵉⵏⵏⴰ ⴷⴰⵡⵓⴷ: “ⵎⴰ ⵉⵎⴻⵥⴷⴰⵖ ⵏ ⵇⴰⵄⵉⵍⴰ ⴰⴷ ⵙⵙⴻⵄⴷⵓⵏ ⵏⴻⵛⵛ ⴷ ⵢⴻⵔⵢⴰⵥⴻⵏ ⵉⵏⵓ ⵉ ⵛⴰⵡⵓⵍ?” ⵉⵏⵏⴰ ⵙⵉⴷⵉ “ⵏⵉⵜⵏⵉ ⴰⴷ ⵛⴻⴽ ⵙⵙⴻⵄⴷⵓⵏ.”

13 ⵅⴰⵙ ⵓⵛⴰ ⵉⴽⴽⴰⵔ ⴷⴰⵡⵓⴷ ⴰⴽ-ⴷ ⵢⴻⵔⵢⴰⵥⴻⵏ ⵏⵏⴻⵙ, ⴰⵎⴻⵏⵏⵉ ⵙⴻⵜⵜⴰ ⵎⵢⴰ ⵏ ⵢⴻⵔⵢⴰⵥⴻⵏ, ⵓⵛⴰ ⴼⴼⵖⴻⵏ ⵏⵉⵜⵏⵉ ⵥⵉ ⵇⴰⵄⵉⵍⴰ ⵓⵛⴰ ⴷⴻⵡⵍⴻⵏ ⴳⴳⵓⵔⴻⵏ ⵎⴰⵏⵉ ⵎⴰ ⵥⴻⵎⵎⴰⵔⴻⵏ ⴰⴷ ⵓⵢⵓⵔⴻⵏ. ⵓⵎⵉ ⵉⵜⵜⵡⴰⵏⵏⴰ ⵉ ⵛⴰⵡⵓⵍ, ⴰⵇⴰ ⵉⵏⵊⴻⵎ-ⴷⴷ ⴷⴰⵡⵓⴷ ⵥⵉ ⵇⴰⵄⵉⵍⴰ, ⵉⵊⵊⴰ ⵥⴻⴳ ⵡⴻⴱⵔⵉⴷ ⵏⵏⴻⵙ, ⵡⴰⵔ ⵉⴼⴼⵉⵖ ⵛⴰ.

14 ⴷⴰⵡⵓⴷ ⵉⵇⵇⵉⵎ ⴷⵉ ⵍⴻⵅⵍⴰ ⴷⵉ ⵍⵇⴻⵍⵄⴰⵜ ⵏ ⵉⴷⵓⵔⴰⵔ ⵓⵛⴰ ⵉⵇⵇⵉⵎ ⵅ ⵉⴷⵓⵔⴰⵔ ⴷⵉ ⵍⴻⵅⵍⴰ ⵏ ⵣⵉⴼ. ⵛⴰⵡⵓⵍ ⵢⴰⵔⵥⵓ ⵅⴰⵙ ⵎⴰⵔⵔⴰ ⵓⵙⵙⴰⵏ, ⵎⴰⵛⴰ ⴰⵔⴻⴱⴱⵉ ⵡⴰⵔ ⵜ ⵉⴳⴳⵉ ⴷⴻⴳ ⵓⴼⵓⵙ ⵏⵏⴻⵙ.

15 ⵓⵎⵉ ⵉⵥⵔⴰ ⴷⴰⵡⵓⴷ, ⴰⵇⴰ ⵛⴰⵡⵓⵍ ⵜⵓⵖⴰ ⵉⴼⴼⴻⵖ ⵃⵉⵎⴰ ⴰⴷ ⵅⴰⵙ ⵢⴰⵔⵥⵓ, ⵜⵓⵖⴰ ⴷⴰⵡⵓⴷ ⴷⵉ ⵍⴻⵅⵍⴰ ⵏ ⵣⵉⴼ ⴷⵉ ⵅⵓⵔⵉⵙⴰ. ^□  

16 ⵅⴻⵏⵏⵉ ⵉⴽⴽⴰⵔ ⵢⵓⵏⴰⵜⴰⵏ, ⵎⵎⵉⵙ ⵏ ⵛⴰⵡⵓⵍ, ⵓⵛⴰ ⵢⵓⵢⵓⵔ ⵖⴰⵔ ⴷⴰⵡⵓⴷ ⴷⵉ ⵅⵓⵔⵉⵙⴰ ⵓ ⵏⴻⵜⵜⴰ ⵉⵙⵙⴻⵊⵀⴻⴷ ⴰⴼⵓⵙ ⵏⵏⴻⵙ ⴷⵉ ⴰⵔⴻⴱⴱⵉ.

17 ⵏⴻⵜⵜⴰ ⵉⵏⵏⴰ ⴰⵙ: “ⵡⴰⵔ ⵜⵜⴻⴳⴳⵯⴻⴷ ⵛⴰ, ⵎⵉⵏⵥⵉ ⴰⴼⵓⵙ ⵏ ⴱⴰⴱⴰ ⵛⴰⵡⵓⵍ ⵡⴰⵔ ⵛⴻⴽ ⴷⴷ-ⵉⵜⵜⵉⴽⴽⵯⵉⴹ ⵓ ⵛⴻⴽ ⴰⴷ ⵜⴷⴻⵡⵍⴻⴷ ⴷ ⴰⵊⴻⴵⵉⴷ ⵅ ⵉⵙⵔⴰⵉⵍ ⵓ ⵏⴻⵛⵛ ⴰⴷ ⴷⴻⵡⵍⴻⵖ ⴷ ⵡⵉⵙⵙ ⵜⵏⴰⵢⴻⵏ ⵖⴰⵔⴻⴽ. ⵓⵍⴰ ⴷ ⴱⴰⴱⴰ ⵛⴰⵡⵓⵍ ⵉⵙⵙⴻⵏ ⴰⵢⴰ.”

18 ⵓ ⵏⵉⵜⵏⵉ ⵙ ⵜⵏⴰⵢⴻⵏ ⵉⴷⵙⴻⵏ ⴳⴳⵉⵏ ⵉⵊⵊ ⵏ ⵍⵄⴰⵀⴷ ⵥⵥⴰⵜ ⵉ ⵡⵓⴷⴻⵎ ⵏ ⵙⵉⴷⵉ. ⴷⴰⵡⵓⴷ ⵉⵇⵇⵉⵎ ⴷⵉ ⵅⵓⵔⵉⵙⴰ ⵓ ⵢⵓⵏⴰⵜⴰⵏ ⵢⴰⵔⴻⴳⴳⵯⴻⵃ ⵖⴰⵔ ⵜⴰⴷⴷⴰⵔⵜ ⵏⵏⴻⵙ.

19 ⵅⴰⵙ ⵓⵛⴰ ⴳⴻⵄⵄⴷⴻⵏ ⵉⵥⵉⴼⵉⵢⵢⴻⵏ ⵖⴰⵔ ⵛⴰⵡⵓⵍ ⴷⵉ ⵊⵉⴱⵄⴰ, ⵏⵏⴰⵏ: “ⵎⴰ ⵡⴰⵔ ⵉⵏⵏⵓⴼⴼⴰⵔ ⴷⴰⵡⵓⴷ ⵖⴰⵔⵏⴻⵖ ⴷⵉ ⵍⵇⴻⵍⵄⴰⵜ ⴷⴻⴳ ⵉⴷⵓⵔⴰⵔ ⴷⵉ ⵅⵓⵔⵉⵙⴰ, ⵅ ⵜⴻⵡⵔⵉⵔⵜ ⵏ ⵃⴰⵅⵉⵍⴰ, ⵖⴰⵔ ⵍⵊⴰⵏⵓⴱ ⵏ ⵜⵏⴻⵥⵔⵓⴼⵜ? ^□   20 ⵅⴻⵏⵏⵉ ⵍⴻⵅⵅⵓ, ⴰ ⴰⵊⴻⴵⵉⴷ, ⵀⵡⴰ-ⴷⴷ ⵄⵍⴰⵃⵙⴰⴱ ⵎⴻⵥⵔⵉ ⵏ ⵡⵓⵍ ⵏⵏⴻⴽ. ⴰⴷ ⵜⵉⵍⵉ ⵅⴻⵏⵏⵉ ⵜⵎⴻⵙⵍⴰⵛⵜ ⵏⵏⴻⵖ ⵃⵉⵎⴰ ⴰⴷ ⵜ ⵏⴻⵙⵙⴻⵄⴷⵓ ⵖⴰⵔ ⵓⴼⵓⵙ ⵏ ⵓⵊⴻⴵⵉⴷ.” 21 ⵛⴰⵡⵓⵍ ⵉⵏⵏⴰ: “ⴰⴷ ⵜᵉⵜⵜⵡⴰⴱⴰⵔⴽⴻⵎ ⵥⵉ ⵙⵉⴷⵉ, ⵎⵉⵏⵥⵉ ⵛⵇⵉⵖ ⴰⵡⴻⵎ. 22 ⵓⵢⵓⵔⴻⵎ ⵓ ⵡⴻⵊⴷⴻⵎ ⵄⴰⴷ ⴽⵜⴰⵔ ⵓ ⵃⴹⴰⵎ ⵓ ⵙⵏⴻⵎ ⴰⵎⵛⴰⵏ ⵎⴰⵏⵉ ⵉⴵⴰ ⵓⴹⴰⵔ ⵏⵏⴻⵙ ⵓ ⵎⴰⵏ ⵡⴻⵏ ⵉ ⵜ ⴷⵉⵏⵏⵉ ⵉⵥⵔⵉⵏ, ⵎⴰⵖⴰⵔ ⵉⵜⵜⵡⴰⵏⵏⴰ ⴰⵢⵉ, ⴰⵇⴰ ⵏⴻⵜⵜⴰ ⴷ ⴰⵃⵔⴰⵢⵎⵉ ⴰⵟⵟⴰⵙ. 23 ⵃⴹⴰⵎ ⵓ ⵙⵙⵏⴻⵎ ⵎⴰⵔⵔⴰ ⵉⵎⵓⵛⴰⵏ ⵏ ⵜⵏⵓⴼⴼⵔⴰ ⵎⴰⵏⵉ ⵉⵙⵙⵏⵓⴼⴼⴰⵔ ⵉⵅⴻⴼ ⵏⵏⴻⵙ ⵓ ⵄⴻⵇⴱⴻⵎ ⵎⴰⵍⴰ ⵜⴽⴻⵎⵎⵍⴻⵎ. ⵅⴻⵏⵏⵉ ⴰⴷ ⴽⵉⴷⵡⴻⵎ ⵓⵢⵓⵔⴻⵖ ⵓ ⵎⴰⵍⴰ ⵏⴻⵜⵜⴰ ⴷⵉ ⵜⴻⵎⵎⵓⵔⵜ, ⴰⴷ ⵉⵎⵙⴰⵔ, ⵏⴻⵛⵛ ⴰⴷ ⵅⴰⵙ ⴰⵔⵥⵓⵖ ⵊⴰⵔ ⵎⴰⵔⵔⴰ ⵍⵓⵍⵓⴼ ⵏ ⵢⴰⵀⵓⴷⴰ.” 24 ⴽⴽⴰⵔⴻⵏ ⵏⵉⵜⵏⵉ ⵓ ⵉⵥⵥⴰⵔⴻⵏ ⵥⵥⴰⵜ ⵉ ⵡⵓⴷⴻⵎ ⵏ ⵛⴰⵡⵓⵍ ⵖⴰⵔ ⵣⵉⴼ. ⴷⴰⵡⵓⴷ ⴷ ⵢⴻⵔⵢⴰⵥⴻⵏ ⵏⵏⴻⵙ ⵜⵓⵖⴰ ⴰⵜⴻⵏ ⴷⵉ ⵍⴻⵅⵍⴰ ⵏ ⵎⴰⵄⵓⵏ, ⴷⵉ ⵍⴻⵡⴹⴰ ⵖⴰⵔ ⵍⵊⴰⵏⵓⴱ ⵏ ⵜⵏⴻⵥⵔⵓⴼⵜ.

25 ⵛⴰⵡⵓⵍ ⴷ ⵢⴻⵔⵢⴰⵥⴻⵏ ⵏⵏⴻⵙ ⴼⴼⵖⴻⵏ ⵃⵉⵎⴰ ⴰⴷ ⵅⴰⵙ ⴰⵔⵥⵓⵏ. ⵉⵜⵜⵡⴰⵏⵏⴰ ⴰⵢⴰ ⵉ ⴷⴰⵡⵓⴷ ⵓ ⵏⴻⵜⵜⴰ ⵉⵀⵡⴰ-ⴷⴷ ⵥⵉ ⵍⴻⵊⵔⵓⴼ ⴷⵉ ⵍⴻⵅⵍⴰ ⵏ ⵎⴰⵄⵓⵏ. ⵓⵎⵉ ⵜ ⵉⵙⵍⴰ ⵛⴰⵡⵓⵍ, ⵍⴻⵅⴷⴻⵏⵏⵉ ⵉⴹⴼⴰⵔ ⵏⴻⵜⵜⴰ ⴷⴰⵡⵓⴷ ⴷⵉ ⵍⴻⵅⵍⴰ ⵏ ⵎⴰⵄⵓⵏ. 26 ⵛⴰⵡⵓⵍ ⵉⴽⴽⴰ ⵅ ⵉⵊⵊ ⵏ ⵓⵖⴻⵥⴷⵉⵙ ⵏ ⵡⴻⴷⵔⴰⵔ ⵓ ⴷⴰⵡⵓⴷ ⴷ ⵢⴻⵔⵢⴰⵥⴻⵏ ⵏⵏⴻⵙ ⵅ ⵓⵖⴻⵥⴷⵉⵙ ⵏⵏⴻⵖⵏⵉ ⵏ ⵡⴻⴷⵔⴰⵔ. ⵍⴰⵎⵉ ⵉⵇⴻⴵⴻⵇ ⴷⴰⵡⵓⴷ ⵎⴰⵃⴻⵏⴷ ⴰⴷ ⵢⴰⴳⴳⵯⴻⵊ ⵅ ⵡⵓⴷⴻⵎ ⵏ ⵛⴰⵡⵓⵍ, ⵉⵎⵙⴰⵔ, ⴰⵇⴰ ⵛⴰⵡⵓⵍ ⴷ ⵢⴻⵔⵢⴰⵥⴻⵏ ⵏⵏⴻⵙ ⵏⵏⴹⴻⵏ-ⴷⴷ ⵉ ⴷⴰⵡⵓⴷ ⴷ ⵢⴻⵔⵢⴰⵥⴻⵏ ⵏⵏⴻⵙ ⵃⵉⵎⴰ ⴰⴷ ⵜⴻⵏ ⵟⵟⴼⴻⵏ. 27 ⵎⴰⵛⴰ ⵢⵓⵙⴰ-ⴷⴷ ⵉⵊⵊ ⵏ ⵓⵔⴻⵇⵇⴰⵙ ⵖⴰⵔ ⵛⴰⵡⵓⵍ ⵉⵏⵏⴰ: “ⴷⴻⵖⵢⴰ, ⴰⵙ-ⴷⴷ, ⵎⵉⵏⵥⵉ ⵉⴼⵉⵍⵉⵙⵟⵉⵏⵉⵢⵢⴻⵏ ⵀⴻⵊⵎⴻⵏ ⵅ ⵜⴻⵎⵎⵓⵔⵜ!” 28 ⵅⴻⵏⵏⵉ ⵉⵄⵇⴻⴱ-ⴷⴷ ⵛⴰⵡⵓⵍ ⵥⴻⴳ ⵡⴻⴹⴼⴰⵔ ⵏ ⴷⴰⵡⵓⴷ ⵓⵛⴰ ⵉⴼⴼⴻⵖ ⵖⴰⵔ ⵓⵎⵙⴰⴳⴰⵔ ⴰⴽ-ⴷ ⵉⴼⵉⵍⵉⵙⵟⵉⵏⵉⵢⵢⴻⵏ. ⵙ ⵓⵢⴻⵏⵏⵉ ⵇⵇⴰⵔⴻⵏ ⴰⵙ ⵉ ⵡⴻⵎⵛⴰⵏ ⵏⵏⵉ ⵙⴰⵍⴰⵄ-ⵀⴰⵎⴰⵅⵍⵉⴽⵓⵜ. ^□