1 ⵅⴻⵏⵏⵉ ⵢⵓⵢⵓⵔ ⴷⴰⵡⵓⴷ ⵙⵙⴻⵏⵏⵉ, ⵉⵙⵙⴻⵏⵊⴻⵎ ⵉⵅⴻⴼ ⵏⵏⴻⵙ ⵖⴰⵔ ⵉⴼⵔⵉ ⵏ ⴰⴷⵓⵍⵍⴰⵎ. ⴰⵢⵜⵎⴰⵙ ⴷ ⵎⴰⵔⵔⴰ ⵜⴰⴷⴷⴰⵔⵜ ⵏ ⴱⴰⴱⴰⵙ ⵙⵍⴰⵏ ⴰⵢⴰ ⵓⵛⴰ ⵀⵡⴰⵏ ⵖⴰⵔⴻⵙ ⴷⵉⵏⵏⵉ. 2 ⵓⵛⴰ ⴽⵓⵍ ⴰⵔⵢⴰⵥ ⵡⴻⵏⵏⵉ ⵜⵓⵖⴰ ⵉⵜⵜⴻⵃⵚⴰⵔⴻⵏ ⵓ ⴽⵓⵍ ⴰⵔⵢⴰⵥ ⵉ ⴷⵉ ⵜⵓⵖⴰ ⵉⴵⴰ ⵓⵎⴰⵔⵡⴰⵙ ⵓ ⴽⵓⵍ ⴰⵔⵢⴰⵥ ⵙ ⵍⴱⴰⵍ ⴷ ⴰⵎⴻⵔⵥⴰⴳ, ⴰⵇⴰ ⴼⴼⵖⴻⵏ ⵖⴰⵔⴻⵙ ⵓⵛⴰ ⵏⴻⵜⵜⴰ ⵉⴷⵡⴻⵍ ⴷ ⴰⴽⵓⵎⴰⵏⴷⴰⵔ ⵏⵙⴻⵏ. ⵜⵓⵖⴰ ⵖⴰⵔⴻⵙ ⵍⵇⴻⴷⴷ ⵏ ⴰⵔⴻⴱⵄⴰ-ⵎⵢⴰ ⵏ ⵢⴻⵔⵢⴰⵥⴻⵏ. 3 ⵙⵙⴻⵏⵏⵉ ⵉⴼⴼⴻⵖ ⴷⴰⵡⵓⴷ ⵖⴰⵔ ⵎⵉⵚⴼⴰⵜ ⴷⵉ ⵎⵓ’ⴰⴱ. ⵉⵏⵏⴰ ⵏⴻⵜⵜⴰ ⵉ ⵓⵊⴻⴵⵉⴷ ⵏ ⵎⵓ’ⴰⴱ: “ⴻⵊⵊ ⴱⴰⴱⴰ ⴷ ⵢⴻⵎⵎⴰ ⴰⴷ ⵖⴰⵔⵡⴻⵎ ⴷⴷ-ⴰⵙⴻⵏ, ⵖⴰⵔⴻⵙ ⴰⵍ ⵖⴰ ⵙⵙⵏⴻⵖ ⵎⵉⵏ ⴽⵉⴷⵉ ⵉ ⵖⴰ ⵢⴻⴳⴳ ⵙⵉⴷⵉ.”

4 ⵏⴻⵜⵜⴰ ⵢⵉⵡⵢⵉ ⵜⴻⵏ ⵥⵥⴰⵜ ⵉ ⵡⵓⴷⴻⵎ ⵏ ⵓⵊⴻⴵⵉⴷ ⵏ ⵎⵓ’ⴰⴱ ⵓⵛⴰ ⵏⵉⵜⵏⵉ ⵇⵇⵉⵎⴻⵏ ⵖⴰⵔⴻⵙ ⵎⴰⵔⵔⴰ ⵓⵙⵙⴰⵏ ⵉ ⴷⵉ ⵉⴽⴽⴰ ⴷⴰⵡⵓⴷ ⴷⵉ ⵍⴱⵓⵔⵊ ⴷⴻⴳ ⵉⴷⵓⵔⴰⵔ. 5 ⵎⴰⵛⴰ ⴰⵏⴰⴱⵉ ⵊⴰⵜ ⵉⵏⵏⴰ ⵉ ⴷⴰⵡⵓⴷ: “ⵡⴰⵔ ⵜⵜⵖⵉⵎⵉ ⴷⵉ ⵍⴱⵓⵔⵊ ⴷⴻⴳ ⵉⴷⵓⵔⴰⵔ, ⵎⴰⵛⴰ ⴰⴳⴳⵯⴻⵊ ⵓ ⴰⴷⴻⴼ ⵖⴰⵔ ⵜⴻⵎⵎⵓⵔⵜ ⵏ ⵢⴰⵀⵓⴷⴰ!” ⵅⴻⵏⵏⵉ ⵢⵓⵢⵓⵔ ⴷⴰⵡⵓⴷ, ⵢⵉⵡⴻⴹ ⵖⴰⵔ ⵡⴻⵥⵖⴰⵔ ⵏ ⵃⴰⵔⵉⵜ. ^□  

6 ⵛⴰⵡⵓⵍ ⵉⵙⵍⴰ ⴱⴻⵍⵍⵉ ⴷⴰⵡⵓⴷ ⴷ ⵉⵔⵢⴰⵥⴻⵏ, ⵉⵏⵏⵉ ⵜⵓⵖⴰ ⵖⴰⵔⴻⵙ ⵉⴵⴰⵏ, ⵜⵜⵡⴰⴼⴻⵏ. ⵜⵓⵖⴰ ⵛⴰⵡⵓⵍ ⵉⵇⵇⵉⵎ ⴷⵉ ⵊⵉⴱⵄⴰ ⵙⴰⴷⵓ ⵉⵛⵜ ⵏ ⵜⵛⴻⵊⵊⴰⵔⵜ ⵏ ⵜⵎⴰⵔⵉⵙⵜ ⵖⴰⵔ ⵔⴰⵎⴰ ⵓ ⵜⵓⵖⴰ ⵖⴰⵔⴻⵙ ⵉⵛⵜ ⵏ ⵍⴰⵏⵙⴰ ⴷⴻⴳ ⵓⴼⵓⵙ ⵏⵏⴻⵙ ⵓ ⵎⴰⵔⵔⴰ ⵉⵎⵙⴻⵅⵅⴰⵔⴻⵏ ⵏⵏⴻⵙ ⴱⴻⴷⴷⴻⵏ-ⴷⴷ ⵖⴰⵔⴻⵙ. ^□   7 ⵓⵛⴰ ⵉⵏⵏⴰ ⵛⴰⵡⵓⵍ ⵉ ⵉⵎⵙⴻⵅⵅⴰⵔⴻⵏ ⵏⵏⴻⵙ ⵉ ⵖⴰⵔⴻⵙ ⴷⴷ-ⵉⴱⴻⴷⴷⴻⵏ: “ⵜⵜⵥⴰⵡⴳⴻⵖ ⵙⵍⴻⵎ-ⴷⴷ, ⴽⴻⵏⵏⵉⵡ ⴰⵢⵜ ⵏ ⴱⵉⵏⵢⴰⵎⵉⵏ! ⵎⴰ ⴰⴷ ⵉⵡⵛ ⵎⵎⵉⵙ ⵏ ⵢⴰⵙⵙⴰ ⵉⵢⵢⴰⵔⴻⵏ ⴷ ⵉⵎⴰⵔⵊⴰⵄⴻⵏ ⵏ ⵓⴹⵉⵍ ⵉ ⴽⴻⵏⵏⵉⵡ ⵎⴰⵔⵔⴰ? ⵎⴰ ⴰⴷ ⵢⴰⵔⵔ ⴽⴻⵏⵏⵉⵡ ⵎⴰⵔⵔⴰ ⴷ ⵉⵎⴻⵇⵇⵔⴰⵏⴻⵏ ⵅ ⴰⵍⴻⴼ ⴷ ⵉⵎⴻⵇⵇⵔⴰⵏⴻⵏ ⵅ ⵎⵢⴰ? 8 ⴰⵇⴰ ⴽⴻⵏⵏⵉⵡ ⵎⴰⵔⵔⴰ ⵜⴻⴳⴳⵉⵎ ⵅⴰⴼⵉ ⵜⴰⵎⴻⵄⵎⵓⵞ ⵓⵛⴰ ⵓⵍⴰ ⴷ ⵉⵊⵊⴻⵏ ⵡⴰⵔ ⴷ ⴰⵢⵉ ⵉⵙⵙⴰⵔⴳⴻⴱ ⴱⴻⵍⵍⵉ ⵎⵎⵉ ⵉⴳⴳⴰ ⵉⵊⵊ ⵏ ⵍⵄⴰⵀⴷ ⴰⴽ-ⴷ ⵎⵎⵉⵙ ⵏ ⵢⴰⵙⵙⴰ ⵓⵛⴰ ⵓⵍⴰ ⴷ ⵉⵊⵊ ⵥⵥⴰⵢⵡⴻⵎ ⵡⴰⵔ ⴷ ⴰⵙ ⵛⵇⵉⵖ, ⵡⴰⵔ ⴷ ⴰⵢⵉ ⵜⴻⵙⵙⴰⵔⴳⴱⴻⵎ ⴰⵇⴰ ⵎⵎⵉ ⵉⵙⵙⴰⵎⴰⵔ-ⴷⴷ ⴰⵎⵙⴻⵅⵅⴰⵔ ⵉⵏⵓ ⵅⴰⴼⵉ ⵎⴰⵃⴻⵏⴷ ⴰⴷ ⴰⵢⵉ ⵉⵥⴻⵢⵢⴰⵔ ⴰⵎ ⵎⴰⵎⵎⴻⵛ ⵉⴵⴰ ⴰⵙⵙ-ⴰ.”

9 ⵅⴻⵏⵏⵉ ⵢⴰⵔⵔⴰ-ⴷⴷ ⴷⵓⵡⴰⵄ, ⴷ ⵡⴻⵏⵏⵉ ⵥⴻⴳ ⵉⴷⵓⵎ, ⴷ ⵡⴻⵏⵏⵉ ⵜⵓⵖⴰ ⴷ ⴰⵎⴻⵃⴷⴰⵢ ⵅ ⵉⵎⵙⴻⵅⵅⴰⵔⴻⵏ ⵏ ⵛⴰⵡⵓⵍ, ⵉⵏⵏⴰ: “ⵏⴻⵛⵛ ⵥⵔⵉⵖ ⵎⵎⵉⵙ ⵏ ⵢⴰⵙⵙⴰ ⵍⴰⵎⵉ ⴷⴷ-ⵢⵓⵙⴰ ⴷⵉ ⵏⵓⴱ ⵖⴰⵔ ⴰⵅⵉⵎⴰⵍⵉⴽ, ⵎⵎⵉⵙ ⵏ ⴰⵅⵉⵟⵓⴱ.

10 ⵏⴻⵜⵜⴰ ⵉⵜⵜⴰⵔ ⵙⵉⴷⵉ ⴷⵉ ⵟⵟⵡⴻⵄ ⵏⵏⴻⵙ ⵓ ⵉⵡⵛⴰ ⴰⵙ ⵎⴰⵛⵛⴰ. ⵉⵡⵛⴰ ⴰⵙ ⵓⵍⴰ ⴷ ⵙⵙⵉⴼ ⵏ ⵊⵓⵍⵢⴰⵜ, ⴰⴼⵉⵍⵉⵙⵟⵉⵏⵉ.”

11 ⵅⴰⵙ ⵓⵛⴰ ⵉⵙⵙⴻⴽⴽ ⵓⵊⴻⴵⵉⴷ ⵉⵊⵊ ⵎⴰⵃⴻⵏⴷ ⴰⴷ ⴷⴷ-ⵉⵍⴰⵖⴰ ⵅ ⵓⴽⴻⵀⵀⴰⵏ ⴰⵅⵉⵎⴰⵍⵉⴽ, ⵎⵎⵉⵙ ⵏ ⴰⵅⵉⵟⵓⴱ, ⵊⵎⵉⵄ ⴰⴽ-ⴷ ⵎⴰⵔⵔⴰ ⵜⴰⴷⴷⴰⵔⵜ ⵏ ⴱⴰⴱⴰⵙ, ⵉⴽⴻⵀⵀⴰⵏⴻⵏ, ⵉⵏⵏⵉ ⵉⴵⴰⵏ ⴷⵉ ⵏⵓⴱ. ⵓⵛⴰ ⵎⴰⵔⵔⴰ ⵓⵙⵉⵏ-ⴷⴷ ⵖⴰⵔ ⵓⵊⴻⴵⵉⴷ.

12 ⵉⵏⵏⴰ ⵛⴰⵡⵓⵍ: “ⵙⴻⵍ, ⵛⴻⴽ, ⵎⵎⵉⵙ ⵏ ⴰⵅⵉⵟⵓⴱ!” ⵓⵛⴰ ⵉⵏⵏⴰ ⵏⴻⵜⵜⴰ: “ⵅⵥⴰⵔ, ⴰⵇⴰ ⴰⵢⵉ ⴷⴰ, ⴰ ⵙⵉⴷⵉ ⵉⵏⵓ!”

13 ⵛⴰⵡⵓⵍ ⵉⵏⵏⴰ ⴰⵙ: “ⵎⴰⵢⴻⵎⵎⵉ ⵅⴰⴼⵉ ⵜⴻⴳⴳⵉⵎ ⵜⴰⵎⴻⵄⵎⵓⵞ, ⵛⴻⴽ ⴷ ⵎⵎⵉⵙ ⵏ ⵢⴰⵙⵙⴰ, ⴰⵇⴰ ⵛⴻⴽ ⵜⴻⵡⵛⵉⴷ ⴰⵙ ⵎⴰⵛⵛⴰ ⴷ ⵙⵙⵉⴼ ⵓ ⵜᵉⵜⵜⴰⵔⴻⴷ ⴰⵔⴻⴱⴱⵉ ⴷⵉ ⵟⵟⵡⴻⵄ ⵏⵏⴻⵙ ⵃⵉⵎⴰ ⴰⴷ ⵅⴰⴼⵉ ⵉⵖⴻⵡⵡⴻⵖ ⴰⵎ ⵡⴻⵏⵏⵉ ⴷ ⴰⵢⵉ ⵉⵥⴻⵢⵢⴰⵔⴻⵏ, ⴰⵎ ⵎⴰⵎⵎⴻⵛ ⵉⴵⴰ ⴰⵙⵙ-ⴰ.”

14 ⴰⵅⵉⵎⴰⵍⵉⴽ ⵢⴰⵔⵔⴰ-ⴷⴷ ⵅ ⵓⵊⴻⴵⵉⴷ, ⵉⵏⵏⴰ: “ⵎⴰⵏ ⵡⴻⵏ ⵥⵉ ⵎⴰⵔⵔⴰ ⵉⵎⵙⴻⵅⵅⴰⵔⴻⵏ ⵏⵏⴻⴽ ⴷ ⴰⵎⵜⵉⵇⵇⵉ ⴰⵎ ⴷⴰⵡⵓⴷ, ⴰⴹⴻⴳⴳⵯⴰⵍ ⵏ ⵓⵊⴻⴵⵉⴷ, ⵓ ⵎⴰⵏ ⵡⴻⵏ ⵉ ⵖⴰ ⵢⴰⵡⴹⴻⵏ ⴰⵎⴻⵏⵏⵉ ⵖⴰⵔ ⵉⵎⵜⵉⵇⵇⴰⵏ ⵏⵏⴻⴽ ⵓ ⵡⵉ ⵖⴰⵔ ⵉⴵⴰ ⵛⵛⴰⵏ ⴰⵎⵎⵓ ⴷⵉ ⵜⴰⴷⴷⴰⵔⵜ ⵏⵏⴻⴽ?

15 ⵎⴰ ⴰⵙⵙ-ⴰ ⵡⴰⵀⴰ ⵉ ⴽⴽⴰⵔⴻⵖ ⴰⴷ ⵜⵜⴰⵔⴻⵖ ⵙⵉⴷⵉ ⴷⵉ ⵟⵟⵡⴻⵄ ⵏⵏⴻⵙ? ⴰⵇⴰ ⵎⴰⵏ ⴰⵢⴰ ⵉⴳⴳⵯⴻⵊ ⵅⴰⴼⵉ. ⴻⵊⵊ ⴰⵊⴻⴵⵉⴷ ⵡⴰⵔ ⵉⵏⴻⵟⵟⴰⵔ ⵍⴱⴰⵟⴻⵍ ⵅ ⵓⵎⵙⴻⵅⵅⴰⵔ ⵏⵏⴻⵙ ⴷ ⵎⴰⵔⵔⴰ ⵜⴰⴷⴷⴰⵔⵜ ⵏ ⴱⴰⴱⴰ ⵙ ⵛⴰ ⵏ ⵍⵃⴰⵊⵊⴻⵜ, ⵎⵉⵏⵥⵉ ⴰⵎⵙⴻⵅⵅⴰⵔ ⵏⵏⴻⴽ ⵡⴰⵔ ⵉⵙⵙⵉⵏ ⵡⴰⵍⵓ ⵅ ⵎⴰⵔⵔⴰ ⴰⵢⴰ, ⵎⴰ ⵜⴰⵎⴻⵙⵍⴰⵛⵜ ⴷ ⵜⴰⵎⴻⵥⵢⴰⵏⵜ ⵏⵉⵖ ⴷ ⵜⴰⵎⴻⵇⵇⵔⴰⵏⵜ ⵉ ⵜⴻⴵⴰ.”

16 ⵎⴰⵛⴰ ⴰⵊⴻⴵⵉⴷ ⵉⵏⵏⴰ: “ⵛⴻⴽ ⵙ ⵜⵉⴷⴻⵜⵜ ⴰⴷ ⵜⴻⵎⵎⵜⴻⴷ, ⴰ ⴰⵅⵉⵎⴰⵍⵉⴽ, ⵛⴻⴽ ⴷ ⵎⴰⵔⵔⴰ ⵜⴰⴷⴷⴰⵔⵜ ⵏ ⴱⴰⴱⴰⵛ.”

17 ⵓⵛⴰ ⴰⵊⴻⴵⵉⴷ ⵉⵏⵏⴰ ⵉ ⵉⵄⴻⵙⵙⴰⵙⴻⵏ ⵏⵏⴻⵙ ⵏ ⴰⵔⵔⵉⵎⴻⵜ ⵏⵏⵉ ⵖⴰⵔⴻⵙ-ⴷⴷ ⵉⴱⴻⴷⴷⴻⵏ: “ⵏⵇⴻⵍⴱⴻⵎ ⵓ ⵏⵖⴻⵎ ⵉⴽⴻⵀⵀⴰⵏⴻⵏ ⵏ ⵙⵉⴷⵉ, ⵎⴰⵖⴰⵔ ⵓⵍⴰ ⴷ ⵏⵉⵜⵏⵉ ⵡⵛⵉⵏ ⴰⴼⵓⵙ ⵉ ⴷⴰⵡⵓⴷ, ⵎⵉⵏⵥⵉ ⵏⵉⵜⵏⵉ ⵙⵙⵏⴻⵏ ⴰⵇⴰ ⵏⴻⵜⵜⴰ ⵜⵓⵖⴰ ⵉⵜⵜⵔⴰⴽⴽⵡⴰⵍ ⵓ ⵏⵉⵜⵏⵉ ⵡⴰⵔ ⴷ ⴰⵢⵉ ⵅⴰⵙ ⵙⵙⴰⵔⴳⴱⴻⵏ ⵛⴰ .” ⵎⴰⵛⴰ ⵉⵎⵙⴻⵅⵅⴰⵔⴻⵏ ⵏ ⵓⵊⴻⴵⵉⴷ ⵡⴰⵔ ⵅⵙⴻⵏ ⴰⴷ ⵙⵙⵡⵉⵥⵥⴹⴻⵏ ⴰⴼⵓⵙ ⵏⵙⴻⵏ ⵃⵉⵎⴰ ⴰⴷ ⵥⵥⴰⵢⴻⵙ ⵡⵜⴻⵏ ⵉⴽⴻⵀⵀⴰⵏⴻⵏ ⵏ ⵙⵉⴷⵉ.

18 ⵅⴻⵏⵏⵉ ⵉⵏⵏⴰ ⵓⵊⴻⴵⵉⴷ ⵉ ⴷⵓⵡⴰⵄ: “ⵏⴻⵇⵍⴻⴱ ⵓⵛⴰ ⵡⵡⴻⵜ ⵉⴽⴻⵀⵀⴰⵏⴻⵏ!” ⵅⴻⵏⵏⵉ ⵉⵏⵏⴻⵇⵍⴻⴱ ⴷⵓⵡⴰⵄ, ⵡⴻⵏⵏⵉ ⵥⵉ ⵉⴷⵓⵎ ⵉ ⵢⴻⴵⴰ, ⵓⵛⴰ ⵉⵡⵜⴰ ⵉⴽⴻⵀⵀⴰⵏⴻⵏ ⵓⵛⴰ ⵉⵏⵖⴰ ⴷⴻⴳ ⵡⴰⵙⵙ ⵏⵏⵉ ⵅⴻⵎⵙⴰ ⵓ-ⵜⵎⴰⵏⵢⵉⵏ ⵏ ⵢⴻⵔⵢⴰⵥⴻⵏ, ⵉⵏⵏⵉ ⵢⴰⵔⴹⴻⵏ ⴰⴱⴰⵍⵟⵓ ⵏ ⵓⴽⴻⵀⵀⴰⵏ.

19 ⵏⴻⵜⵜⴰ ⵉⵡⵜⴰ ⵓⵍⴰ ⴷ ⵏⵓⴱ, ⵜⴰⵏⴷⵉⵏⵜ ⵏ ⵉⴽⴻⵀⵀⴰⵏⴻⵏ, ⵙ ⵍⴻⵇⴹⴻⵄ ⵏ ⵙⵙⵉⴼ, ⵉⵔⵢⴰⵥⴻⵏ ⴷ ⵜⴻⵎⵖⴰⵔⵉⵏ, ⵉⵃⴻⵏⵊⵉⵔⴻⵏ ⴷ ⵉⵙⴻⵢⵎⴰⵏ. ⵉⵡⵜⴰ ⵄⴰⵡⴻⴷ ⵓⵍⴰ ⴷ ⵉⴼⵓⵏⴰⵙⴻⵏ ⴷ ⵢⴻⵖⵢⴰⵍ ⴷ ⵡⵓⴵⵉ ⵙ ⵍⴻⵇⴹⴻⵄ ⵏ ⵙⵙⵉⴼ. 20 ⵉⵊⵊ ⵥⴻⴳ ⵉⵃⴻⵏⵊⵉⵔⴻⵏ ⵏ ⴰⵅⵉⵎⴰⵍⵉⴽ, ⵎⵎⵉⵙ ⵏ ⴰⵅⵉⵟⵓⴱ, ⵉⵙⵙⴻⵏⵊⴻⵎ ⵉⵅⴻⴼ ⵏⵏⴻⵙ. ⵜⵓⵖⴰ ⵉⵙⴻⵎ ⵏⵏⴻⵙ ⴰⴱⵢⴰⵜⴰⵔ ⵓ ⵏⴻⵜⵜⴰ ⵉⵇⴻⴵⴻⵇ ⵉⵅⴻⴼ ⵏⵏⴻⵙ ⴰⵡⴰⵔⵏⵉ ⵉ ⴷⴰⵡⵓⴷ.

21 ⴰⴱⵢⴰⵜⴰⵔ ⵉⵃⴰⵊⴰ ⵉ ⴷⴰⵡⵓⴷ, ⴰⵇⴰ ⵛⴰⵡⵓⵍ ⵜⵓⵖⴰ ⵉⵏⵖⴰ ⵉⴽⴻⵀⵀⴰⵏⴻⵏ ⵏ ⵙⵉⴷⵉ. 22 ⵅⴻⵏⵏⵉ ⵉⵏⵏⴰ ⴷⴰⵡⵓⴷ ⵉ ⴰⴱⵢⴰⵜⴰⵔ: “ⴷⴻⴳ ⵡⴰⵙⵙ ⵏⵏⵉ, ⵓⵎⵉ ⵜⵓⵖⴰ ⴷⵓⵡⴰⵄ ⵥⵉ ⵉⴷⵓⵎ ⴷⵉⵏⵏⵉ, ⵙⵙⵏⴻⵖ ⴰⵇⴰ ⵏⴻⵜⵜⴰ ⴰⴷ ⵉⵃⴰⵊⴰ ⴰⵢⴰ ⵉ ⵛⴰⵡⵓⵍ. ⵏⴻⵛⵛ ⴷ ⵡⴻⵏⵏⵉ ⵅ ⵉⴵⴰⵏ ⵎⴰⵔⵔⴰ ⵍⴻⵄⵎⵓⵔ ⵏ ⵜⴰⴷⴷⴰⵔⵜ ⵏ ⴱⴰⴱⴰⵛ. 23 ⵇⵉⵎ ⵖⴰⵔⵉ, ⵡⴰⵔ ⵜⵜⴻⴳⴳⵯⴻⴷ ⵛⴰ, ⵎⴰⵖⴰⵔ ⵡⴻⵏⵏⵉ ⵢⴰⵔⴻⵥⵥⵓⵏ ⴰⴷ ⵉⵏⴻⵖ ⵍⴻⵄⵎⴰⵔ ⵉⵏⵓ, ⵢⴰⵔⴻⵥⵥⵓ ⴰⴷ ⵉⵏⴻⵖ ⵓⵍⴰ ⴷ ⵍⴻⵄⵎⴰⵔ ⵏⵏⴻⴽ. ⴰⵇⴰ ⵛⴻⴽ ⵄⴰⵡⴻⴷ ⵖⴰⵔⵉ ⵜᵉⵜⵜⵡⴰⵃⴹⵉⴷ.”