1 ⵉⵊⵊ ⵏ ⵡⴻⵔⵢⴰⵥ ⵜⵓⵖⴰ ⵉⵥⴻⴷⴷⴻⵖ ⵅ ⵉⴷⵓⵔⴰⵔ ⵏ ⵉⴼⵔⴰⵢⵉⵎ, ⵇⵇⴰⵔⴻⵏ ⴰⵙ ⵎⵉⵅⴰ. 2 ⵏⴻⵜⵜⴰ ⵉⵏⵏⴰ ⵉ ⵢⴻⵎⵎⴰⵙ: “ⴰⵍⴻⴼ ⵓ-ⵎⵢⴰ ⵏ ⵓⵇⵉⵢⵢⴰⵜ ⵏ ⵏⵏⵓⵇⴰⵔⵜ ⵉ ⴷ ⴰⵎ ⵉⵜⵜⵡⴰⴽⴽⵙⴻⵏ ⵓ ⵅⴰⵙⴻⵏⵜ ⵜⴻⵏⵏⵉⴷ ⵉⵛⵜ ⵏ ⵏⵏⴻⵄⵍⴻⵜ ⵜⴻⵏⵏⵉ ⵉ ⵥⵉ ⵜⵏⴻⵟⵇⴻⴷ ⴷⴻⴳ ⵉⵎⴻⵥⵥⵓⵖⴻⵏ ⵉⵏⵓ, ⵅⵥⴰⵔ, ⵏⵏⵓⵇⴰⵔⵜ ⵏⵏⵉ ⴰⵇⴰ-ⵜⵜ ⵖⴰⵔⵉ, ⵏⴻⵛⵛ ⴽⵙⵉⵖ ⵜⵜ.” ⵢⴻⵎⵎⴰⵙ ⵜⴻⵏⵏⴰ: “ⴰⴷ ⵉⵜⵜⵡⴰⴱⴰⵔⴻⴽ ⵎⵎⵉ ⵥⵉ ⵙⵉⴷⵉ!” 3 ⵏⴻⵜⵜⴰ ⵢⴰⵔⵔⴰ ⴰⵍⴻⴼ ⵓ-ⵎⵢⴰ ⵏ ⵓⵇⵉⵢⵢⴰⵜ ⵏ ⵏⵏⵓⵇⴰⵔⵜ ⵉ ⵢⴻⵎⵎⴰⵙ ⵓⵛⴰ ⵢⴻⵎⵎⴰⵙ ⵜⴻⵏⵏⴰ ⴰⵙ: “ⵏⵏⵓⵇⴰⵔⵜ ⵙⵙⵇⴻⴷⴷⵙⴻⵖ ⵜⵜ ⵉ ⵙⵉⴷⵉ ⵥⴻⴳ ⵓⴼⵓⵙ ⵉⵏⵓ ⵉ ⵎⵎⵉ ⵃⵉⵎⴰ ⴰⴷ ⵥⵥⴰⵢⴻⵙ ⵉⴳⴳ ⵉⵊⵊ ⵏ ⵍⴻⵅⵢⴰⵍ ⵉⵏⴻⵇⵛⴻⵏ ⴷ ⵉⵊⵊ ⵏ ⵍⴻⵅⵢⴰⵍ ⵉⴼⴻⵙⵢⴻⵏ. ⵅⴻⵏⵏⵉ ⵍⴻⵅⵅⵓ ⴰⴷ ⴰⵛ ⵜⵜ ⴰⵔⵔⴻⵖ.” 4 ⵏⴻⵜⵜⴰ ⵎⴰⵛⴰ ⵢⴰⵔⵔⴰ ⵏⵏⵓⵇⴰⵔⵜ ⵄⴰⵡⴻⴷ ⵉ ⵢⴻⵎⵎⴰⵙ. ⵅⴻⵏⵏⵉ ⵜⴻⴽⵙⵉ ⵢⴻⵎⵎⴰⵙ ⵎⵉⵜⴰⵢⴻⵏ ⵏ ⵓⵇⵉⵢⵢⴰⵜ ⵏ ⵏⵏⵓⵇⴰⵔⵜ ⵓ ⵜⴻⵡⵛⴰ ⵉ-ⵜⴻⵏⵜ ⵉ ⵢⵉⵊⵊ ⵏ ⵡⴻⵎⵥⵉⵍ ⵏ ⵡⵓⵔⴻⵖ, ⵡⴻⵏⵏⵉ ⵥⵥⴰⵢⴻⵙ ⵉⴳⴳⵉⵏ ⵉⵊⵊ ⵏ ⵍⴻⵅⵢⴰⵍ ⵉⵏⴻⵇⵛⴻⵏ ⴷ ⵢⵉⵊⵊ ⵏ ⵍⴻⵅⵢⴰⵍ ⵉⴼⴻⵙⵢⴻⵏ ⵓⵛⴰ ⴳⴳⵉⵏ ⵜⴻⵏⵜ ⴷⵉ ⵜⴰⴷⴷⴰⵔⵜ ⵏ ⵎⵉⵅⴰ. 5 ⵜⵓⵖⴰ ⵎⵉⵅⴰ ⵖⴰⵔⴻⵙ ⵉⵛⵜ ⵏ ⵜⴰⴷⴷⴰⵔⵜ ⵏ ⴰⵔⴻⴱⴱⵉ ⵓ ⵏⴻⵜⵜⴰ ⵉⴳⴳⴰ ⵉⵊⵊ ⵏ ⵓⴱⴰⵍⵟⵓ ⵏ ⵓⴽⴻⵀⵀⴰⵏ ⴷ ⵍⴻⵅⵢⴰⵍⴰⵜ ⵉⵎⴻⵥⵢⴰⵏⴻⵏ ⵏ ⵍ’ⴰⵚⵏⴰⵎ ⵓ ⵉⵍⴻⵇⵇⴻⵎ ⵉⵊⵊⴻⵏ ⵥⴻⴳ ⵉⵃⴻⵏⵊⵉⵔⴻⵏ ⵏⵏⴻⵙ ⴰⴷ ⵖⴰⵔⴻⵙ ⵢⵉⵍⵉ ⴷ ⴰⴽⴻⵀⵀⴰⵏ.

6 ⴷⴻⴳ ⵡⵓⵙⵙⴰⵏ ⵏⵏⵉ ⵡⴰⵔ ⴷⵉⵏ ⵜⵓⵖⵉ ⴰⵊⴻⴵⵉⴷ ⴷⵉ ⵉⵙⵔⴰⵉⵍ. ⴽⵓⵍ ⵉⵊⵊ ⵉⵜⵜⴻⴳⴳ ⵎⵉⵏ ⵉⴵⴰⵏ ⵏⵉⵛⴰⵏ ⴷⵉ ⵜⵉⵟⵟⴰⵡⵉⵏ ⵏⵏⴻⵙ. ^■   7 ⴷⵉ ⴱⴰⵢⵜ-ⵍⴰⵃⵎ ⴷⵉ ⵢⴰⵀⵓⴷⴰ ⵜⵓⵖⴰ ⴷⵉⵏ ⵉⵊⵊ ⵏ ⵡⴻⴱⵍⵉⵖ ⵥⵉ ⵍⵡⴰⵛⵓⵏ ⵏ ⵢⴰⵀⵓⴷⴰ. ⵏⴻⵜⵜⴰ ⵜⵓⵖⴰ ⴷ ⵉⵊⵊ ⵏ ⵓⵍⴰⵡⵉ, ⵜⵓⵖⴰ ⵉⵥⴻⴷⴷⴻⵖ ⴷⵉⵏⵏⵉ ⴷ ⴰⴱⴰⵔⵔⴰⵏⵉ. 8 ⴰⵔⵢⴰⵥ-ⴰ ⵉⴼⴼⴻⵖ ⵥⵉ ⵜⴻⵏⴷⵉⵏⵜ ⵏⵏⵉ, ⵥⵉ ⴱⴰⵢⵜ-ⵍⴰⵃⵎ ⴷⵉ ⵢⴰⵀⵓⴷⴰ, ⵃⵉⵎⴰ ⴰⴷ ⵉⵥⴷⴻⵖ ⴰⵎ ⵓⴱⴰⵔⵔⴰⵏⵉ ⵎⴰⵏⵉ ⵎⴰ ⵉⵥⴻⵎⵎⴰⵔ ⴰⴷ ⵢⴰⴼ ⴰⵎⵛⴰⵏ. ⵅ ⵡⴻⴱⵔⵉⴷ ⵏⵏⴻⵙ ⵢⵉⵡⴻⴹ ⵖⴰⵔ ⵉⴷⵓⵔⴰⵔ ⵏ ⵉⴼⵔⴰⵢⵉⵎ ⵖⴰⵔ ⵜⴰⴷⴷⴰⵔⵜ ⵏ ⵎⵉⵅⴰ. 9 ⵎⵉⵅⴰ ⵉⵙⵙⴻⵇⵙⴰ ⵜ: “ⵎⴰⵏⵉⵙ ⵉ ⴷⴷ-ⵜⵓⵙⵉⴷ ⵛⴻⴽ?” ⵏⴻⵜⵜⴰ ⵢⴰⵔⵔⴰ-ⴷⴷ ⵅⴰⵙ: “ⵏⴻⵛⵛ ⴷ ⴰⵍⴰⵡⵉ ⵥⵉ ⴱⴰⵢⵜ-ⵍⴰⵃⵎ ⴷⵉ ⵢⴰⵀⵓⴷⴰ, ⵓ ⵏⴻⵛⵛ ⴳⴳⵓⵔⴻⵖ, ⵃⵉⵎⴰ ⴰⴷ ⵥⴻⴷⵖⴻⵖ ⵎⴰⵏⵉ ⵎⴰ ⵉ ⵖⴰ ⵢⴰⴼⴻⵖ ⴰⵎⵛⴰⵏ.”

10 ⵅⴻⵏⵏⵉ ⵉⵏⵏⴰ ⴰⵙ ⵎⵉⵅⴰ: “ⵇⵇⵉⵎ ⵖⴰⵔⵉ ⵓⵛⴰ ⵜⵉⵍⵉⴷ ⴰⵢⵉ ⴷ ⴱⴰⴱⴰ ⴷ ⴰⴽⴻⵀⵀⴰⵏ! ⵏⴻⵛⵛ ⴰⴷ ⴰⵛ ⵡⵛⴻⵖ ⵄⴻⵛⵔⴰ ⵏ ⵓⵇⵉⵢⵢⴰⵜ ⵏ ⵏⵏⵓⵇⴰⵔⵜ ⴷ ⵛⴰ ⵏ ⵡⴻⵔⵔⵓⴹ ⴷ ⵍⴻⵄⵡⴻⵞ.” ⵓⵛⴰ ⴰⵍⴰⵡⵉ ⵢⵓⵢⵓⵔ ⴰⴽⵉⴷⴻⵙ.

11 ⴰⵍⴰⵡⵉ ⵢⴰⵔⴹⴰ ⵅⴰⵙ ⴷⴻⴳ ⵡⴰⵡⴰⵍ ⵃⵉⵎⴰ ⴰⴷ ⵉⵇⵇⵉⵎ ⴰⴽ-ⴷ ⵡⴻⵔⵢⴰⵥ ⵓ ⴰⴱⵍⵉⵖ ⵜⵓⵖⴰ ⵉ ⵎⵉⵅⴰ ⴰⵎ ⵉⵊⵊⴻⵏ ⵥⴻⴳ ⵉⵃⴻⵏⵊⵉⵔⴻⵏ ⵏⵏⴻⵙ.

12 ⵎⵉⵅⴰ ⵉⵛⵛⵓⵔ ⴰⵍⴰⵡⵉ ⵓⵛⴰ ⵉⴷⵡⴻⵍ ⵡⴻⴱⵍⵉⵖ ⴷ ⴰⴽⴻⵀⵀⴰⵏ ⵉ ⵏⴻⵜⵜⴰ ⵓⵛⴰ ⵉⵇⵇⵉⵎ ⴷⵉ ⵜⴰⴷⴷⴰⵔⵜ ⵏ ⵎⵉⵅⴰ.

13 ⵓⵛⴰ ⵉⵏⵏⴰ ⵎⵉⵅⴰ: “ⵍⴻⵅⵅⵓ ⵙⵙⵏⴻⵖ ⵏⴻⵛⵛ, ⴰⵇⴰ ⵙⵉⴷⵉ ⴰⴷ ⴰⵢⵉ ⵉⴳⴳ ⵍⵅⴰⵔ, ⵎⴰⵖⴰⵔ ⵏⴻⵛⵛ ⵖⴰⵔⵉ ⴰⵍⴰⵡⵉ ⵡⴰⵏⵉⵜⴰ ⴷ ⴰⴽⴻⵀⵀⴰⵏ.”