1 ⵉⵔⵢⴰⵥⴻⵏ ⵏ ⵉⴼⵔⴰⵢⵉⵎ ⵜⵜⵡⴰⵙⵎⵓⵏⴻⵏ ⵉ ⵓⵎⴻⵏⵖⵉ ⵓ ⵏⵉⵜⵏⵉ ⵥⵡⴰⵏ ⵖⴰⵔ ⵣⴰⴼⵓⵏ. ⵏⵏⴰⵏ ⵉ ⵢⴰⴼⵜⴰⵃ: “ⵎⴰⵢⴻⵎⵎⵉ ⵜⴻⵥⵡⵉⴷ ⵃⵉⵎⴰ ⴰⴷ ⵜⴻⵎⵎⴻⵏⵖⴻⴷ ⴰⴽ-ⴷ ⴰⵢⵜ ⵏ ⵄⴰⵎⵎⵓⵏ ⵓ ⵡⴰⵔ ⴷ ⴰⵏⴻⵖ ⵜⵍⵉⵖⵉⴷ ⵃⵉⵎⴰ ⴰⴷ ⵏⵓⵢⵓⵔ ⴰⴽⵉⴷⴻⴽ? ⵏⴻⵛⵛⵉⵏ ⴰⴷ ⴰⵛ ⵏⴻⵇⵇⴻⴷ ⵜⵉⵎⴻⵙⵙⵉ ⵉ ⵜⴰⴷⴷⴰⵔⵜ ⵏⵏⴻⴽ ⵜⵉⵡⴰ ⵉ ⵓⵥⴻⴵⵉⴼ ⵏⵏⴻⴽ ⴷ ⵛⴻⴽ ⴰⴽⵉⴷⴻⵙ.” ^■   2 ⵢⴰⴼⵜⴰⵃ ⵉⵏⵏⴰ ⴰⵙⴻⵏ: “ⵏⴻⵛⵛ ⴷ ⵍⴳⴻⵏⵙ ⵉⵏⵓ ⵜⵓⵖⴰ ⴰⵏⴻⵖ ⴷⴻⴳ ⵉⵊⵊ ⵏ ⵓⵎⵛⵓⴱⴱⴻⵛ ⴷ ⴰⵎⴻⵇⵇⵔⴰⵏ ⴰⴽ-ⴷ ⴰⵢⵜ ⵏ ⵄⴰⵎⵎⵓⵏ. ⵍⴰⵖⵉⵖ-ⴷⴷ ⵅⴰⵡⴻⵎ, ⵎⴰⵛⴰ ⴽⴻⵏⵏⵉⵡ ⵡⴰⵔ ⴷⴷ-ⵜⵓⵙⵉⵎ ⵃⵉⵎⴰ ⴰⴷ ⴰⵢⵉ ⵜⴼⴻⴽⴽⴻⵎ ⵥⴻⴳ ⵓⴼⵓⵙ ⵏⵙⴻⵏ. 3 ⵓⵎⵉ ⵥⵔⵉⵖ, ⴱⴻⵍⵍⵉ ⴽⴻⵏⵏⵉⵡ ⵡⴰⵔ ⴷⴷ-ⵜⵓⵙⵉⵎ ⵉ ⵓⴼⴻⴽⴽⵉ, ⵙⴻⴱⴱⵍⴻⵖ ⵜⵓⴷⴰⵔⵜ ⵉⵏⵓ ⵓⵛⴰ ⵥⵡⵉⵖ ⵍ’ⵓⵔⴷⵓⵏ ⵖⴰⵔ ⴰⵢⵜ ⵏ ⵄⴰⵎⵎⵓⵏ ⵓ ⵙⵉⴷⵉ ⵉⴳⴳⴰ ⴰⵢⵉ ⵜⴻⵏ ⴷⴻⴳ ⵓⴼⵓⵙ. ⵎⴰⵢⴻⵎⵎⵉ ⵉ ⴷⴷ ⵖⴰⵔⵉ ⵜⴳⴻⵄⵄⴷⴻⵎ ⴰⵙⵙ-ⴰ ⵃⵉⵎⴰ ⴰⴽⵉⴷⵉ ⵜⴻⵎⵎⴻⵏⵖⴻⵎ?” 4 ⵅⴰⵙ ⵓⵛⴰ ⵉⵙⵙⵎⵓⵏ ⵢⴰⴼⵜⴰⵃ ⵎⴰⵔⵔⴰ ⵉⵔⵢⴰⵥⴻⵏ ⵥⵉ ⵊⵉⵍⵄⴰⴷ ⵓⵛⴰ ⵉⵎⵏⴻⵖ ⴰⴽ-ⴷ ⵉⴼⵔⴰⵢⵉⵎ ⵓ ⵉⵔⵢⴰⵥⴻⵏ ⵏ ⵊⵉⵍⵄⴰⴷ ⵖⴻⵍⴱⴻⵏ ⵅ ⵉⴼⵔⴰⵢⵉⵎ ⵎⵉⵏⵥⵉ ⵏⵉⵜⵏⵉ ⵏⵏⴰⵏ: “ⴽⴻⵏⵏⵉⵡ ⴷ ⵉⵏⵏⵉ ⵢⴰⵔⴻⵡⵍⴻⵏ ⵥⴻⴳ ⵉⴼⵔⴰⵢⵉⵎ!”, ⴰⵇⴰ ⵊⵉⵍⵄⴰⴷ ⵢⵓⵙⴰ-ⴷⴷ ⵊⴰⵔ ⵉⴼⵔⴰⵢⵉⵎ ⴷ ⵎⴰⵏⴰⵙⵙⴰ. 5 ⵊⵉⵍⵄⴰⴷ ⵉⵃⴻⵡⵡⴻⵙ ⵉⵎⵓⵛⴰⵏ ⵏ ⵓⵥⴻⴽⴽⵡⵓ ⵏ ⵍ'ⵓⵔⴷⵓⵏ ⵉⵏⵏⵉ ⵉⴵⴰⵏ ⵏ ⵉⴼⵔⴰⵢⵉⵎ. ⴷ ⵎⴰⵔⵔⴰ ⵉⵏⵏⵉ ⵢⴰⵔⴻⵡⵍⴻⵏ ⵥⵉ ⵉⴼⵔⴰⵢⵉⵎ ⵏⵏⴰⵏ: “ⴻⵊⵊ ⴰⵢⵉ ⴰⴷ ⵥⵡⵉⵖ”, ⵅⴻⵏⵏⵉ ⵙⵙⴻⵇⵙⴰⵏ ⵜ ⵉⵔⵢⴰⵥⴻⵏ ⵥⵉ ⵊⵉⵍⵄⴰⴷ: “ⵎⴰ ⵛⴻⴽ ⵥⵉ ⵉⴼⵔⴰⵢⵉⵎ?” ⵎⴰⵍⴰ ⵏⴻⵜⵜⴰ ⵉⵏⵏⴰ: “ⵍⵍⴰ!”, 6 ⵅⴻⵏⵏⵉ ⵏⵏⴰⵏ ⴰⵙ: “ⵉⵏⵉ ‘ⵛⵉⴱⴱⵓⵍⵉⵜ!’ ” ⵉⵏⵏⴰ ⵏⴻⵜⵜⴰ ⵅⴻⵏⵏⵉ: ‘ⵙⵉⴱⴱⵓⵍⵉⵜ!’ ⵓ ⵉⴱⴰⵏ-ⴷⴷ ⵏⴻⵜⵜⴰ ⵡⴰⵔ ⵉⵥⵎⵉⵔ ⴰⴷ ⵜ ⵉⵏⵟⴻⵇ ⵎⵍⵉⵃ, ⵅⴻⵏⵏⵉ ⵟⵟⴼⴻⵏ ⵜ ⵓⵛⴰ ⵏⵖⵉⵏ ⵜ ⵖⴰⵔ ⵉⵎⵓⵛⴰⵏ ⵏ ⵓⵥⴻⴽⴽⵡⵓ ⵏ ⵍ'ⵓⵔⴷⵓⵏ. ⴰⵎⵎⵓ ⵉ ⵡⴹⴰⵏ ⵜⵏⴰⵢⴻⵏ ⵓ-ⵔⴻⴱⵄⵉⵏ-ⴰⵍⴻⴼ ⵏ ⵢⴻⵔⵢⴰⵥⴻⵏ ⵏ ⵉⴼⵔⴰⵢⵉⵎ ⴷⵉ ⵍⵡⴻⵇⵜ ⵏⵏⵉ. 7 ⵜⵓⵖⴰ ⵢⴰⴼⵜⴰⵃ ⵉⵃⴻⴽⴽⴻⵎ ⵉⵙⵔⴰⵉⵍ ⵙⴻⵜⵜⴰ ⵏ ⵉⵙⴻⴳⴳⵯⵓⵙⴰ. ⵅⴻⵏⵏⵉ ⵉⵎⵎⵓⵜ ⵢⴰⴼⵜⴰⵃ, ⴰⵊⵉⵍⵄⴰⴷⵉ, ⵓ ⵏⴻⵜⵜⴰ ⵉⵜⵜⵡⴰⵏⴹⴻⵍ ⴷⴻⴳ ⵉⵛⵜ ⵥⵉ ⵜⵏⴻⴷⴷⴰⵎ ⵏ ⵊⵉⵍⵄⴰⴷ.

8 ⴰⵡⴰⵔⵏⵉ ⴰⵙ ⵜⵓⵖⴰ ⵉⴱⵚⴰⵏ ⵥⵉ ⴱⴰⵢⵜ-ⵍⴰⵃⵎ ⴷ ⵍⵇⴰⴹⵉ ⵅ ⵉⵙⵔⴰⵉⵍ. 9 ⵏⴻⵜⵜⴰ ⵜⵓⵖⴰ ⵖⴰⵔⴻⵙ ⵜⵍⴰⵜⵉⵏ ⵏ ⵉⵃⴻⵏⵊⵉⵔⴻⵏ ⵓ ⵉⵙⵙⵎⴻⴵⴻⵛ ⵜⵍⴰⵜⵉⵏ ⵏ ⵢⴻⵙⵙⵉⵙ ⵖⴰⵔ ⴱⴰⵔⵔⴰ ⵓ ⵉ ⵜⵍⴰⵜⵉⵏ ⵏ ⵉⵃⴻⵏⵊⵉⵔⴻⵏ ⵏⵏⴻⵙ ⵉⵊⵊⴰ ⵉ-ⵜⴻⵏ ⴰⴷ ⴰⵡⵢⴻⵏ ⵜⵍⴰⵜⵉⵏ ⵏ ⵢⴻⵙⵙⵉⵙ ⵥⵉ ⴱⴰⵔⵔⴰ. ⵜⵓⵖⴰ ⵏⴻⵜⵜⴰ ⵉⵃⴻⴽⴽⴻⵎ ⵅ ⵉⵙⵔⴰⵉⵍ ⵙⴻⴱⵄⴰ ⵏ ⵉⵙⴻⴳⴳⵯⵓⵙⴰ.

10 ⵅⴻⵏⵏⵉ ⵉⵎⵎⵓⵜ ⵉⴱⵚⴰⵏ ⵓⵛⴰ ⵉⵜⵜⵡⴰⵏⴹⴻⵍ ⴷⵉ ⴱⴰⵢⵜ-ⵍⴰⵃⵎ.

11 ⴰⵡⴰⵔⵏⵉ ⴰⵙ ⵜⵓⵖⴰ ⵉⵍⵓⵏ, ⴰⵥⴰⴱⵓⵍⵓⵏⵉ, ⴷ ⵍⵇⴰⴹⵉ ⵅ ⵉⵙⵔⴰⵉⵍ. ⵏⴻⵜⵜⴰ ⵉⵃⴽⴻⵎ ⵅ ⵉⵙⵔⴰⵉⵍ ⵄⴻⵛⵔⴰ ⵏ ⵉⵙⴻⴳⴳⵯⵓⵙⴰ. ^□  

12 ⵅⴻⵏⵏⵉ ⵉⵎⵎⵓⵜ ⵉⵍⵓⵏ, ⴰⵥⴰⴱⵓⵍⵓⵏⵉ, ⵓⵛⴰ ⵉⵜⵜⵡⴰⵏⴹⴻⵍ ⴷⵉ ⴰⵢⴰⵍⵓⵏ ⴷⵉ ⵜⴻⵎⵎⵓⵔⵜ ⵏ ⵣⴰⴱⵓⵍⵓⵏ.

13 ⴰⵡⴰⵔⵏⵉ ⴰⵙ ⵜⵓⵖⴰ ⵄⴰⴱⴷⵓⵏ, ⵎⵎⵉⵙ ⵏ ⵀⵉⵍⵍⴰⵍ, ⵥⵉ ⴼⵉⵔⵄⴰⵜⵓⵏ, ⴷ ⵍⵇⴰⴹⵉ ⵅ ⵉⵙⵔⴰⵉⵍ.

14 ⵏⴻⵜⵜⴰ ⵜⵓⵖⴰ ⵖⴰⵔⴻⵙ ⴰⵔⴻⴱⵄⵉⵏ ⵏ ⵉⵃⴻⵏⵊⵉⵔⴻⵏ ⴷ ⵜⵍⴰⵜⵉⵏ ⵏ ⵡⴰⵢⵢⴰⵡⴻⵏ, ⵉⵏⵏⵉ ⵉⵏⵏⴰⵢⴻⵏ ⵅ ⵙⴻⴱⵄⵉⵏ ⵏ ⵉⵖⵢⴰⵍ. ⵏⴻⵜⵜⴰ ⵜⵓⵖⴰ ⴷ ⵍⵇⴰⴹⵉ ⵅ ⵉⵙⵔⴰⵉⵍ ⵜⵎⴻⵏⵢⴰ ⵏ ⵉⵙⴻⴳⴳⵯⵓⵙⴰ. ^■  

15 ⵅⴻⵏⵏⵉ ⵉⵎⵎⵓⵜ ⵄⴰⴱⴷⵓⵏ, ⵎⵎⵉⵙ ⵏ ⵀⵉⵍⵍⴻⵍ, ⵥⵉ ⴼⵉⵔⵄⴰⵜⵓⵏ, ⵓⵛⴰ ⵉⵜⵜⵡⴰⵏⴹⴻⵍ ⴷⵉ ⴼⵉⵔⵄⴰⵜⵓⵏ, ⴷⵉ ⵜⴻⵎⵎⵓⵔⵜ ⵏ ⵉⴼⵔⴰⵢⵉⵎ, ⵅ ⵡⴻⴷⵔⴰⵔ ⵏ ⵓⵄⴰⵎⴰⵍⵉⵇⵉ. ^□