1 “ⵙⵍⴻⵎ, ⴰ ⵉⵊⴻⵏⵡⴰⵏ, ⴰⴷ ⵙⵙⵉⵡⵍⴻⵖ!

ⴻⵊⵊ ⵜⴰⵎⵎⵓⵔⵜ ⴰⴷ ⵜⵙⴻⵍ ⵉ ⵡⴰⵡⴰⵍⴻⵏ ⵏ ⵓⵇⴻⵎⵎⵓⵎ ⵉⵏⵓ!

2 ⴻⵊⵊ ⵜⴰⵖⵓⵔⵉ ⵉⵏⵓ ⴰⴷ ⵜⵓⴷⴻⵎ ⴰⵎⴻⵛⵏⴰⵡ ⴰⵏⵥⴰⵔ,

ⴰⴷ ⵀⵡⴰⵏⵜ ⵜⵉⵡⴰⵍⵉⵏ ⵉⵏⵓ ⴰⵎⴻⵛⵏⴰⵡ ⵏⵏⴷⴰ,

ⴰⵎⴻⵛⵏⴰⵡ ⵉⵛⵜ ⵏ ⵜⵀⵉⴹⵓⵔⵜ ⵅ ⵓⵖⴻⵎⵎⵓⵢ ⴰⵥⵉⵥⴰ

ⵓ ⴰⵎⴻⵛⵏⴰⵡ ⵜⵉⵏⴻⵛⵏⴰⵛⵉⵏ ⵅ ⵡⴻⴼⵙⵓ,

3 ⵎⵉⵏⵥⵉ ⵏⴻⵛⵛ ⴰⴷ ⴱⴰⵔⵔⵃⴻⵖ ⵉⵙⴻⵎ ⵏ ⵙⵉⴷⵉ,

ⴰⵔⵔⴻⵎ-ⴷⴷ ⵍⴻⵎⵖⴰⵔⴻⵜ ⵉ ⴰⵔⴻⴱⴱⵉ ⵏⵏⴻⵖ!

4 ⵏⴻⵜⵜⴰ ⴷ ⵜⴰⵚⴹⴰⵔⵜ, ⵍⵅⴻⴷⵎⴻⵜ ⵏⵏⴻⵙ ⵏⵉⵛⴰⵏ,

ⵎⵉⵏⵥⵉ ⵎⴰⵔⵔⴰ ⵉⴱⵔⵉⴷⴻⵏ ⵏⵏⴻⵙ ⵜⵜⵡⴰⵙⴻⴳⴳⴷⴻⵏ,

ⵉⵊⵊ ⵏ ⴰⵔⴻⴱⴱⵉ ⴷ ⴰⵎⵜⵉⵇⵇⵉ ⴱⵍⴰ ⵍⵖⴻⵛⵛ,

ⴰⵇⴰ-ⵜ ⴷ ⴰⵎⵙⴻⴳⴳⴻⴷ ⴷ ⵏⵉⵛⴰⵏ ⵉ ⵢⴻⴵⴰ.

5 ⵍⴳⴻⵏⵙ ⴰⵇⴰ ⵉⵙⵙⴻⴼⵙⴻⴷ ⵉⵅⴻⴼ ⵏⵏⴻⵙ,

ⵏⵉⵜⵏⵉ ⵡⴰⵔ ⴵⵉⵏ ⵛⴰ ⴷ ⵉⵃⴻⵏⵊⵉⵔⴻⵏ ⵏⵏⴻⵙ,

ⵍⵄⵉⴱ ⴰⵇⴰ-ⵜ ⵅⴰⵙⴻⵏ,

ⴰⵇⴰ-ⵜ ⴷ ⵉⵊⵊ ⵏ ⵊⵊⵉⵍ ⵉⴼⴰⵔⵖ ⵓ ⵉⵅⵏⵓⵏⵏⴻⵙ.

6 ⵎⴰ ⵜⴻⵅⵙⴻⵎ ⴰⴷ ⵜⴻⴳⴳⴻⵎ ⴰⵢⴰ ⵉ ⵙⵉⴷⵉ,

ⴰ ⵍⴳⴻⵏⵙ ⴰⴱⵓⵀⴰⵍⵉ ⴷ ⵡⴻⴼⵖⵓⵔ!

ⵎⴰ ⵡⴰⵔ ⵉⴵⵉ ⵏⴻⵜⵜⴰ ⴷ ⴱⴰⴱⴰⵛ ⵏⵏⵉ ⵛⴻⴽ ⵉⵙⵖⵉⵏ,

ⴷ ⵡⴻⵏⵏⵉ ⵛⴻⴽ ⵉⴳⴳⵉⵏ ⵓ ⴷ ⵡⴻⵏⵏⵉ ⵛⴻⴽ ⵉⴽⴻⵡⵡⵏⴻⵏ?

7 ⵉⴷⴰⵔⴻⵎ ⵓⵙⵙⴰⵏ ⵉⵄⴷⵓⵏ,

ⵅⴻⵎⵎⴻⵎ ⵉⵙⴻⴳⴳⵯⵓⵙⴰ ⵏ ⵊⵊⵉⵍ ⴰⵍ ⵊⵊⵉⵍ ⵏⵏⴻⵖⵏⵉ,

ⵙⴻⵇⵙⴰ ⴱⴰⴱⴰⵛ ⵓ ⵏⴻⵜⵜⴰ ⴰⴷ ⴰⵛ ⵜ ⵉⵄⴰⵡⴻⴷ

ⵓ ⵙⴻⵇⵙⴰ ⵉⵎⵖⴰⵔⴻⵏ ⵓ ⵏⵉⵜⵏⵉ ⴰⴷ ⴰⵛ ⵜ ⵉⵏⵉⵏ.

8 ⵓⵎⵉ ⵉⵡⵛⴰ ⵓⵎⵄⵓⴵⵉ ⵅ ⴽⵓⵍⵛⵉ ⵜⴰⵙⵖⴰⵔⵜ ⵏⵏⴻⵙ ⵉ ⵎⴰⵔⵔⴰ ⵍⴻⴳⵏⵓⵙ,

ⵓⵎⵉ ⵉⴱⴹⴰ ⵉⵃⴻⵏⵊⵉⵔⴻⵏ ⵏ ⴰⴷⴰⵎ, ⵉⵙⵙⴳⴻⵄⵄⴻⴷ ⵉⵢⵎⵉⵔⴻⵏ ⵏ ⵍⴻⴳⵏⵓⵙ

ⵄⵍⴰⵃⵙⴰⴱ ⵍⵇⴻⴷⴷ ⵏ ⴰⵢⵜ ⵏ ⵉⵙⵔⴰⵉⵍ.

9 ⵎⵉⵏⵥⵉ ⵜⴰⵙⵖⴰⵔⵜ ⵏ ⵙⵉⴷⵉ ⴷ ⵍⴳⴻⵏⵙ ⵏⵏⴻⵙ,

ⵢⴰⵄⵇⵓⴱ ⴷ ⴰⴼⵉⵍⵓ ⵏ ⵍⴻⵄⴱⴰⵔ ⵏ ⵜⴻⵙⵖⴰⵔⵜ ⵏⵏⴻⵙ.

10 ⵢⵓⴼⴰ ⵉ-ⵜ ⴷⵉ ⵜⴻⵎⵎⵓⵔⵜ ⵏ ⵍⴻⵅⵍⴰ,

ⴷⵉ ⵜⵏⴻⵥⵔⵓⴼⵜ ⵉⵅⵍⴰⵏ ⴰⴽ-ⴷ ⵍⴻⵡⵃⵓⵛ ⵉ ⵉⵜⵜⵥⵓⵏ,

ⵉⵏⵏⴻⴹ ⴰⵙ-ⴷⴷ, ⵉⵙⵙⴻⵍⵎⴻⴷ ⵉ-ⵜ,

ⵉⵃⴹⴰ ⵉ-ⵜ ⴰⵎⴻⵛⵏⴰⵡ ⵎⵓⵎⵎⵓ ⵏ ⵜⵉⵟⵟ ⵏⵏⴻⵙ.

11 ⴰⵎⴻⵛⵏⴰⵡ ⴰⴳⵉⴷⴻⵔ ⵏⵏⵉ ⵉⵙⵙⴼⴰⵇⴻⵏ ⵍⵄⵓⵛⵛ ⵏⵏⴻⵙ,

ⵉⵟⵟⴰⵡ ⵙⴻⵏⵏⴻⵊ ⵉ ⵡⴰⵔⵔⵓⴷ ⵏⵏⴻⵙ ⵥⵉ ⵙⵙⴰ ⵖⴰⵔ ⴷⴰ,

ⵉⵜⵜⴱⴻⵥⵥⴻⵄ ⴰⴼⵔⵉⵡⴻⵏ ⵏⵏⴻⵙ,

ⵉⴽⵙⵉ ⵉ-ⵜ ⵓⵛⴰ ⵢⴰⵔⴻⴱⴱⵓ ⵜ ⵅ ⵡⴰⴼⵔⵉⵡⴻⵏ ⵏⵏⴻⵙ,

12 ⴰⵎⵎⵓ ⵉⵏⴷⴻⵀ ⵉ-ⵜ ⵙⵉⴷⵉ ⵡⴰⵀⴰ

ⵓⵛⴰ ⵡⴰⵔ ⵜⵓⵖⵉ ⴷⵉⵏ ⴰⴽⵉⴷⴻⵙ ⵛⴰ ⵏ ⴰⵔⴻⴱⴱⵉ ⴷ ⴰⵖⵔⵉⴱ.

13 ⵉⵙⵙⴻⵏⵢⴰ ⵉ-ⵜ ⵅ ⵜⵄⵓⵍⴰⵍ ⵏ ⵜⴻⵎⵎⵓⵔⵜ

ⵓⵛⴰ ⵉⵛⵛⴰ ⵍⵖⵉⴵⴻⵜ ⵏ ⵢⴻⵢⵢⴰⵔ.

ⵉⵊⵊⴰ ⵉ-ⵜ ⴰⴷ ⵉⵥⴻⵎⵎ ⵜⴰⵎⵎⴻⵏⵜ ⵥⵉ ⵊⵊⴰⵔⴼ,

ⴷ ⵥⵥⴻⵛⵜ ⵥⴻⴳ ⵡⴻⵥⵔⵓ ⵏ ⵜⴻⵚⴹⴰⵔⵜ, ^■  

14 ⵜⵍⵓⵙⵙⵉ ⵏ ⵜⴼⵓⵏⴰⵙⵉⵏ ⴷ ⵓⵖⵉ ⵏ ⵡⵓⴵⵉ,

ⵙ ⵜⴰⴷⵓⵏⵜ ⵏ ⵉⵥⵎⴰⵔⴻⵏ ⴷ ⵉⵛⴰⵔⵔⵉⵢⵢⴻⵏ,

ⵉⵏⵏⵉ ⵉⴵⴰⵏ ⴰⵎⴻⵛⵏⴰⵡ ⵜⴰⵔⵡⴰ ⵏ ⴱⴰⵛⴰⵏ, ⴷ ⵉⵖⴰⵢⴹⴻⵏ,

ⵙ ⵎⵓⵎⵎⵓ ⵏ ⵡⴰⵔⴻⵏ ⵏ ⵉⵔⴷⴻⵏ.

ⵄⴰⵡⴻⴷ ⵛⴻⴽ ⵜⴻⵙⵡⵉⴷ ⵥⴻⴳ ⵉⴷⴰⵎⵎⴻⵏ ⵏ ⵓⴹⵉⵍ, ⴱⵉⵏⵓ ⵉⵚⴼⴰⵏ.

15 ⵉⴷⵡⴻⵍ ⵢⴰⵛⵓⵔⵓⵏ ⵉⵇⴱⵓⴱⴱⴻⵥ ⵓⵛⴰ ⵉⵥⵥⴻⵄⴱⴻⴹ

- ‘ⴰⵇⴰ ⵜⵎⴻⵙⵍⴻⴷ ⵓ ⵜⴻⵇⴱⵓⴱⴱⵥⴻⴷ, ⵡⴰⵀ, ⵙ ⵜⴰⴷⵓⵏⵜ ⵜᵉⵜⵜⵡⴰⴷⵍⴻⴷ!’ -

ⵓⵛⴰ ⵉⵙⵎⴻⵃ ⴷⵉ ⴰⵔⴻⴱⴱⵉ ⵏⵏⵉ ⵜ ⴷⴷ-ⵉⵅⴻⵍⵇⴻⵏ

ⵓⵛⴰ ⵉⵙⵙⴻⵃⵇⴰⵔ ⵜⴰⵚⴹⴰⵔⵜ ⵏ ⵓⵙⴻⵏⵊⴻⵎ ⵏⵏⴻⵙ.

16 ⵙ ⵉⵔⴻⴱⴱⵉⵜⴻⵏ ⵉⵖⵔⵉⴱⴻⵏ ⵙⵙⴻⴽⴽⴰⵔⴻⵏ ⵜⵓⵙⵎⵉ ⵏⵏⴻⵙ,

ⵙ ⵊⵊⵄⴰⵢⴻⴼ ⵙⵄⴰⵔⴻⵏ ⵜ.

17 ⵏⵉⵜⵏⵉ ⵇⴻⴷⴷⵎⴻⵏ ⵜⵉⵖⴰⵔⵚⴰ ⵉ ⵛⵛⵡⴰⵟⴻⵏ, ⵡⴰⵔ ⵉⴵⵉ ⵉ ⴰⵔⴻⴱⴱⵉ,

ⵉ ⵉⵔⴻⴱⴱⵉⵜⴻⵏ ⵏⵏⵉ ⵡⴰⵔ ⵙⵙⵉⵏⴻⵏ,

ⵉⵔⴻⴱⴱⵉⵜⴻⵏ ⵏ ⵊⴷⵉⴷ, ⵉⵏⵏⵉ ⴷⴷ-ⵢⵓⵙⵉⵏ ⵄⴰⴷ ⵎⴰⵎⵎⴻⵛ,

ⵡⴰⵔ ⵥⵥⴰⵢⵙⴻⵏ ⵜⵜⴰⵔⵊⵉⵊⵊⴻⵏ ⵉⴱⴰⴱⴰⵜⴻⵏ ⵏⵡⴻⵎ.

18 ⵜⴰⵚⴹⴰⵔⵜ ⵏⵏⵉ ⵛⴻⴽ ⴷⴷ-ⵢⴻⵊⵊⵉⵏ, ⵜⵙⴻⵎⵃⴻⴷ ⴷⴰⵢⴻⵙ

ⵓ ⵜᵉⵜⵜⵓⴷ ⴰⵔⴻⴱⴱⵉ ⵏⵏⵉ ⵉ ⵛⴻⴽ ⴷⴷ-ⵢⵓⵔⵡⴻⵏ ⵙ ⵍⴻⵡⵊⴻⵄ.

19 ⵉⵥⵔⴰ ⵙⵉⴷⵉ ⵎⴰⵏ ⴰⵢⴰ ⵓⵛⴰ ⵉⵙⵙⴻⵀⵇⴰⵔ ⵉ-ⵜⴻⵏ,

ⵥⵉ ⵙⵙⵉⴱⴱⴻⵜ ⵏ ⵓⵙⴷⵓⵇⵇⴻⵥ ⵏ ⵉⵃⴻⵏⵊⵉⵔⴻⵏ ⵏⵏⴻⵙ ⴷ ⵢⴻⵙⵙⵉⵙ.

20 ⵏⴻⵜⵜⴰ ⵉⵏⵏⴰ: ‘ⴰⴷ ⵥⵥⴰⵢⵙⴻⵏ ⴼⴼⴰⵔⴻⵖ ⵓⴷⴻⵎ ⵉⵏⵓ,

ⴰⴷ ⵥⴰⵔⴻⵖ ⵎⴰⵎⵎⴻⵛ ⵉ ⵖⴰ ⵢⵉⵍⵉ ⵥⵎⴰⵏ ⵓⵏⴻⴳⴳⴰⵔⵓ ⵏⵙⴻⵏ,

ⵎⵉⵏⵥⵉ ⵏⵉⵜⵏⵉ ⴷ ⵉⵊⵊ ⵏ ⵊⵊⵉⵍ ⵉⵜⵜⵏⴻⵇⵍⴰⴱ,

ⴷ ⵜⴰⵔⵡⴰ ⵉ ⴷⵉ ⵡⴰⵔ ⵉⴵⵉ ⵍⵎⴰⵏⴻⵜ.

21 ⵏⵉⵜⵏⵉ ⵙⵙⴻⴽⴽⴰⵔⴻⵏ ⵜⵓⵙⵎⵉ ⵉⵏⵓ ⵙ ⵎⵉⵏ ⵡⴰⵔ ⵉⴵⵉⵏ ⴷ ⴰⵔⴻⴱⴱⵉ,

ⵙⵄⴰⵔⴻⵏ ⴰⵢⵉ ⵙ ⵍⴻⵅⵢⴰⵍⴰⵜ ⵏⵙⴻⵏ ⵉⴱⴻⵟⵟⵉⵍⴻⵏ.

ⵏⴻⵛⵛ ⴰⴷ ⵙⵙⴻⴽⴽⴰⵔⴻⵖ ⵜⵓⵙⵎⵉ ⵏⵙⴻⵏ ⵙ ⵎⵉⵏ ⵡⴰⵔ ⵉⴵⵉⵏ ⴷ ⵍⴳⴻⵏⵙ,

ⵙ ⵢⵉⵊⵊ ⵏ ⵍⴳⴻⵏⵙ ⴷ ⴰⴱⵓⵀⴰⵍⵉ ⴰⴷ ⵜⴻⵏ ⵙⵄⴰⵔⴻⵖ. ^■  

22 ⵎⵉⵏⵥⵉ ⵙ ⵡⴻⵖⴹⴰⴱ ⵉⵏⵓ ⵜⴻⴽⴽⴰⵔ ⵜⵎⴻⵙⵙⵉ,

ⴰⴷ ⵜⴻⵛⵎⴻⴹ ⴰⵍ ⵍⴰⵅⴰⵔⵜ ⴷⵉⵏ ⵙⵡⴰⴷⴷⴰⵢ

ⵓⵛⴰ ⴰⴷ ⵜⴻⵛⵛ ⵜⴰⵎⵎⵓⵔⵜ ⴷ ⵍⵖⵉⴵⴻⵜ ⵏⵏⴻⵙ

ⵓ ⴰⴷ ⵜⴻⵙⵙⴻⵛⵎⴻⴹ ⵜⵉⵙⵉ ⵏ ⵉⴷⵓⵔⴰⵔ. ^■  

23 ⵏⴻⵛⵛ ⴰⴷ ⴰⵙⴻⵏ ⴰⵔⵏⵉⵖ ⵉⵛⴻⵍⵡⴰⵡⴻⵏ,

ⴰⴷ ⵅⴰⵙⴻⵏ ⵏⴻⵢⵢⵛⴻⵖ ⴼⵍⵉⵜⵛⴰⵜ ⵉⵏⵓ.

24 ⴰⴷ ⵜⵜⵡⴰⵀⴻⵢⵢⴼⴻⵏ ⵙ ⵍⴰⵥ

ⵓⵛⴰ ⴰⴷ ⵜⵜⵡⴰⵚⴰⵔⴹⴻⵏ ⵙ ⵟⵟⴰⵄⵓⵏ ⵓ ⵙ ⵡⴰⵔⴻⴷⴷⴻⴵ ⴰⵎⴻⵔⵥⴰⴳ

ⵓ ⵏⴻⵛⵛ ⴰⴷ ⴷⴰⵢⵙⴻⵏ ⵙⵙⴻⴽⴽⴻⵖ ⵜⵉⵖⵎⴰⵙ ⵏ ⵍⵎⴰⵍ

ⵙ ⵙⵙⴻⵎ ⵉⵏⴻⵇⵇⴻⵏ ⵏ ⵉⴼⵉⵖⵔⴰⵏ ⵉⵏⵏⵉ ⵉⵜⵜⵎⵓⴵⵓⵖⴻⵏ ⴷⵉ ⵜⵄⴻⵊⵊⴰⵊⵜ.

25 ⵣⵉ ⴱⴰⵔⵔⴰ ⴰⴷ ⵉⴽⴽⴻⵙ ⵙⵙⵉⴼ ⵜⴰⵔⵔⴰⵡⵜ

ⵓ ⵥⴻⴳ ⵡⴻⵅⵅⴰⵎ ⵏ ⴷⴰⵅⴻⵍ ⴰⴷ ⵜⴻⵍⵇⴻⴼ ⵜⵉⴳⴳⵯⵓⴷⵉ:

ⴰⵎ ⵓⴱⵍⵉⵖ ⴰⵎ ⵜⴰⵄⵥⴰⵔⴻⵛⵜ, ⴰⵙⴻⵢⵎⵉ ⴰⴽ-ⴷ ⵓⵎⴻⵛⵛⴰⵢⴱⵓ.

26 ⵜⵓⵖⴰ ⵅⵙⴻⵖ ⴰⴷ ⵉⵏⵉⵖ: ‘ⴰⵎ ⵓⵙⴻⵎⵎⵉⴹ ⴰⴷ ⵜⴻⵏ ⴼⴰⵔⴻⵜⴽⴻⵖ,

ⴳⴳⵓⵔ ⴰⴷ ⵙⵙⴱⴻⴷⴷⴻⵖ ⵍⵉⴷⴰⵔⴻⵜ ⵏⵙⴻⵏ ⵊⴰⵔ ⵉⵡⴷⴰⵏ’,

27 ⵎⵍⵉ ⵡⴰⵔ ⴳⴳⵯⵉⴷⴻⵖ ⵥⴻⴳ ⵡⴻⵙⵄⴰⵔ ⵏ ⵍⴻⵄⴷⵓ,

ⵃⵉⵎⴰ ⵉⵖⵔⵉⵎⴻⵏ ⵏⵙⴻⵏ ⵡⴰⵔ ⵜ ⵏⴻⴽⴽⴰⵔⴻⵏ ⵓⵛⴰ ⴰⴷ ⵉⵏⵉⵏ:

‘ⵉⴼⴰⵙⵙⴻⵏ ⵏⵏⴻⵖ, ⵉⵏⵏⵉ ⵉⵜⵜⵡⴰⵙⴳⴻⵄⵄⴷⴻⵏ ⴰⵎⵎⵓ ⵙ ⵊⵊⴻⵀⴷ,

ⴳⴳⵉⵏ ⴰⵢⴰ ⵎⴰⵔⵔⴰ, ⵡⴰⵔ ⵉⴵⵉ ⴷ ⵙⵉⴷⵉ.’

28 ⵎⵉⵏⵥⵉ ⵏⵉⵜⵏⵉ ⴷ ⵉⵊⵊ ⵏ ⵍⴳⴻⵏⵙ ⴱⵍⴰ ⴰⵔⵔⴰⵢ

ⵓ ⵡⴰⵔ ⴷⴰⵢⵙⴻⵏ ⴷ ⵍⴻⴼⵀⴰⵎⴻⵜ.

29 ⵎⵍⵉ ⴳⴳⵉⵏ ⵜⵉⵖⵉⵜ, ⵅⴻⵏⵏⵉ ⵉⴳⴳⵓⵔ ⴰⴷ ⴼⴻⵀⵎⴻⵏ ⴰⵢⴰ

ⵓ ⴰⴷ ⵡⵛⴻⵏ ⵜⴰⵢⵏⵉⵜ ⵉ ⵓⵏⴻⴳⴳⴰⵔ ⵏⵙⴻⵏ.

30 ⵎⴰⵎⵎⴻⵛ ⵉⵥⴻⵎⵎⴰⵔ ⴰⴷ ⵉⴹⴼⴰⵔ ⵉⵊⵊ ⵏ ⴱⵏⴰⴷⴻⵎ ⴰⵍⴻⴼ ⵏ ⵉⵡⴷⴰⵏ

ⵓ ⵎⴰⵎⵎⴻⵛ ⵥⴻⵎⵎⴰⵔⴻⵏ ⵜⵏⴰⵢⴻⵏ ⴰⴷ ⴰⵔⵔⴻⵏ ⵄⴻⵛⵔⴰ-ⴰⵍⴻⴼ ⴰⴷ ⴰⵔⴻⵡⵍⴻⵏ

ⵎⴰⵍⴰ ⵡⴰⵔ ⴷ ⴰⵙⴻⵏ ⵜⴻⵎⵎⴻⵏⵥ ⵜⴻⵚⴹⴰⵔⵜ ⵏⵙⴻⵏ

ⵓⵛⴰ ⵡⴰⵔ ⴷ ⴰⵙⴻⵏ ⵉⵙⴻⵍⵍⴻⵎ ⵙⵉⴷⵉ ⵉ ⵏⵉⵜⵏⵉ?

31 ⵎⵉⵏⵥⵉ ⵜⴰⵚⴹⴰⵔⵜ ⵏⵙⴻⵏ ⵎⴰⵛⵉ ⴰⵎⴻⵛⵏⴰⵡ ⵜⴰⵚⴹⴰⵔⵜ ⵏⵏⴻⵖ.

ⴻⵊⵊ ⴰⴷ ⵃⴻⴽⵎⴻⵏ ⵍⵄⴻⴷⵢⴰⵏ ⵏⵏⴻⵖ ⵙ ⵉⵅⴻⴼ ⵏⵙⴻⵏ.

32 ⵎⵉⵏⵥⵉ ⵜⴰⵥⴰⵢⴰⵔⵜ ⵏⵙⴻⵏ ⵜⴻⴵⴰ ⵥⵉ ⵜⵥⴰⵢⴰⵔⵜ ⵏ ⵙⴰⴷⵓⵎ

ⵓ ⵥⴻⴳ ⵉⵢⵢⴰⵔⴻⵏ ⵏ ⵄⴰⵎⵓⵔⵔⴰ

ⵓ ⴰⴹⵉⵍ ⵏⵙⴻⵏ ⴷ ⴰⴹⵉⵍ ⵏ ⵙⵙⴻⵎ

ⵓ ⵖⴰⵔⵙⴻⵏ ⵉⵥⴻⴽⴽⵓⵏⴻⵏ ⵛⵛⵓⵔⴻⵏ ⵙ ⵜⴰⵔⵥⵓⴳⵉ. ^□  

33 ⴱⵉⵏⵓ ⵏⵙⴻⵏ ⴰⵎⴻⵛⵏⴰⵡ ⴰⵚⵓⴷⵉ ⵏ ⵜⵎⴻⵙⵙⵉ ⵏ ⵍⵀⴰⵢⵛⴰⵜ

ⵓ ⴰⵎⴻⵛⵏⴰⵡ ⵙⵙⴻⵎ ⵉⵏⴻⵇⵇⴻⵏ ⵏ ⵜⵍⴻⴼⵙⵉⵡⵉⵏ.

34 ⵎⴰ ⵎⴰⵔⵔⴰ ⴰⵢⴰ ⵡⴰⵔ ⵖⴰⵔⵉ ⵉⵜⵜⵡⴰⵅⵥⴻⵏ,

ⵉⵜⵜⵡⴰⵛⴻⵎⵎⴻⵄ ⴷⴻⴳ ⵉⵅⵅⴰⵎⴻⵏ ⵏ ⵜⵅⵓⴱⴰⵢ ⵉⵏⵓ?

35 ⴷ ⵏⴻⵛⵛ ⵉ ⵢⴻⴵⴰⵏ ⵅ ⵏⵏⴻⵇⵎⴻⵜ ⴷ ⵍⴻⵅⵍⴰⵚ,

ⵅⵎⵉ ⵉ ⵖⴰ ⵉⵃⵍⵓⴵⴻⴹ ⵓⴹⴰⵔ ⵏⵙⴻⵏ.

ⴰⵙⵙ ⵏ ⵓⴹⴻⵢⵢⴻⵄ ⵏⵙⴻⵏ ⴰⵇⴰ ⵢⵓⴷⴻⵙ

ⵓⵛⴰ ⵎⵉⵏ ⵉⴳⴳⵓⵔⴻⵏ ⴰⴷ ⵅⴰⵙⴻⵏ ⴷⴷ-ⵢⵉⵍⵉ, ⴰⴷ ⵉⵎⵙⴰⵔ ⴷⴻⵖⵢⴰ. ^■  

36 ⵎⵉⵏⵥⵉ ⵙⵉⴷⵉ ⴰⴷ ⵉⴳⴳ ⵜⴰⵙⴻⴳⴷⴰ ⵉ ⵍⴳⴻⵏⵙ ⵏⵏⴻⵙ,

ⵓⵛⴰ ⴰⴷ ⵉⵃⴻⵏⵏ ⵅ ⵉⵎⵙⴻⵅⵅⴰⵔⴻⵏ ⵏⵏⴻⵙ ⵅⵎⵉ ⵉ ⵖⴰ ⵉⵥⴰⵔ ⴱⴻⵍⵍⵉ ⵊⵊⴻⵀⴷ ⵉⵎⵎⴻⴽⵙⵉ

ⵓⵛⴰ ⵡⴰⵔ ⴷⵉⵏ ⵉⵇⵇⵉⵎ ⵄⴰⴷ ⵡⴻⵏⵏⵉ ⵉⵜⵜⵡⴰⵟⵟⴼⴻⵏ ⴷ ⵡⴻⵏⵏⵉ ⵉⵊⵊⵉⵏ. ^□  

37 ⵅⴻⵏⵏⵉ ⴰⴷ ⵢⵉⵏⵉ: ‘ⵎⴰⵏⵉ ⵉⴵⴰⵏ ⵉⵔⴻⴱⴱⵉⵜⴻⵏ ⵏⵙⴻⵏ,

ⵜⴰⵚⴹⴰⵔⵜ ⵏⵏⵉ ⴷⵉ ⵏⵏⵓⴼⴰⵔⴻⵏ,

38 ⵉⵔⴻⴱⴱⵉⵜⴻⵏ ⵏⵏⵉ ⵥⵉ ⵛⵛⵉⵏ ⵜⴰⴷⵓⵏⵜ ⵏ ⵜⵖⴰⵔⵚⴰ ⵏⵙⴻⵏ,

ⵉⵏⵏⵉ ⵥⵉ ⵙⴻⵙⵙⴻⵏ ⴱⵉⵏⵓ ⵏ ⵜⴻⵡⵀⵉⴱⵉⵏ ⵏ ⵓⵙⴻⵢⵢⴻⴱ ⵏⵙⴻⵏ? ⴻⵊⵊ ⵉ-ⵜⴻⵏ ⴰⴷ ⴽⴽⴰⵔⴻⵏ, ⴰⴷ ⵛⴻⴽ ⵄⴰⵡⵏⴻⵏ

ⵓ ⴻⵊⵊ ⵉ-ⵜ ⴰⴷ ⵅⴰⵡⴻⵎ ⵉⵙⵙⴷⵓⵍⵉ.’

39 ⵅⵥⴰⵔⴻⵎ ⵍⴻⵅⵅⵓ, ⴱⴻⵍⵍⵉ ⵏⴻⵛⵛ ⴷ ⵏⴻⵛⵛ ⵉ ⴵⵉⵖ,

ⵓ ⵡⴰⵔ ⴷⵉⵏ ⵛⴰ ⵓⵍⴰ ⴷ ⵉⵊⵊ ⵏ ⴰⵔⴻⴱⴱⵉ ⴰⴽⵉⴷⵉ.

ⵏⴻⵛⵛ ⵏⴻⵇⵇⴻⵖ ⵓ ⵏⴻⵛⵛ ⵙⵙⴻⴷⴷⴰⵔⴻⵖ,

ⵏⴻⵛⵛ ⵜⵜⴻⵃⵃⵉⵖ ⵓ ⵙⵙⴳⴻⵏⴼⵉⵖ

ⵓ ⵡⴰⵔ ⴷⵉⵏ ⵡⵉ ⵉ ⵖⴰ ⵉⵏⴻⵊⵎⴻⵏ ⵥⴻⴳ ⵓⴼⵓⵙ ⵉⵏⵓ. ^■  

40 ⵎⵉⵏⵥⵉ ⵏⴻⵛⵛ ⴰⴷ ⵙⵙⵡⵉⵥⵥⴹⴻⵖ ⴰⴼⵓⵙ ⵉⵏⵓ ⵖⴰⵔ ⵓⵊⴻⵏⵏⴰ,

ⴰⴷ ⵉⵏⵉⵖ: ‘ⵏⴻⵛⵛ ⴰⵇⴰ ⴷⴷⴰⵔⴻⵖ ⵉ ⵍⴻⴱⴷⴰ!’

41 ⵎⴰⵍⴰ ⵙⵙⵇⴻⴹⵄⴻⵖ ⵙⵙⵉⴼ ⵉⵏⵓ ⵉⵜⵜⵡⴻⵙⵙⴳⴻⵏ

ⵓⵛⴰ ⴰⴼⵓⵙ ⵉⵏⵓ ⴰⴷ ⵉⵟⵟⴻⴼ ⴷⵉ ⵍⵃⵓⴽⵎ,

ⵅⴻⵏⵏⵉ ⵏⴻⵛⵛ ⴰⴷ ⵏⵜⴰⵇⵎⴻⵖ ⵥⵉ ⵍⵄⴻⴷⵢⴰⵏ ⵉⵏⵓ

ⵓ ⵥⴻⴳ ⵉⵏⵏⵉ ⴷ ⴰⵢⵉ ⵉⵛⴰⵔⵔⵀⴻⵏ.

42 ⴰⴷ ⵙⵙⵛⴰⵔⴻⵖ ⴼⵍⵉⵜⵛⴰⵜ ⵏ ⵍⵇⴻⵡⵙ ⵉⵏⵓ ⵙ ⵉⴷⴰⵎⵎⴻⵏ

ⵓⵛⴰ ⵙⵙⵉⴼ ⵉⵏⵓ ⴰⴷ ⵉⵚⴰⵔⴹ ⴰⵢⵙⵓⵎ

ⵏ ⵉⴷⴰⵎⵎⴻⵏ ⵏ ⵡⴻⵏⵏⵉ ⵉⵜⵜⵡⴰⵏⵖⴻⵏ ⵓ ⵏ ⵡⴻⵏⵏⵉ ⵉⵜⵜⵡⴰⵃⴻⴱⴱⵙⴻⵏ

ⵓ ⵥⴻⴳ ⵓⵥⴻⴵⵉⴼ ⵏ ⵍⴻⵄⴷⵓ ⴰⴽ-ⴷ ⵉⵊⴻⵟⵟⴰⵢⴻⵏ ⵏ ⵓⵛⴻⵡⵡⴰⴼ ⵏⵏⴻⵙ. ^□  ■  

43 ⵙⵍⵉⵡⵍⴻⵡⴻⵎ, ⴰ ⵍⴻⴳⵏⵓⵙ!, ⴰⴽ-ⴷ ⵍⴳⴻⵏⵙ ⵏⵏⴻⵙ,

ⵎⵉⵏⵥⵉ ⵏⴻⵜⵜⴰ ⴰⴷ ⵉⵏⵜⴰⵇⴻⵎ ⵉ ⵉⴷⴰⵎⵎⴻⵏ ⵏ ⵉⵎⵙⴻⵅⵅⴰⵔⴻⵏ ⵏⵏⴻⵙ

ⵓⵛⴰ ⴰⴷ ⴷⴷ-ⵉⵜⵜⴰⵔⵔⵉ ⵏⵏⴻⵇⵎⴻⵜ ⵅ ⵍⴻⵄⴷⵓ ⵏⵏⴻⵙ

ⵓⵛⴰ ⴰⴷ ⵉⴼⴷⵉ ⵅ ⵜⴻⵎⵎⵓⵔⵜ ⵏⵏⴻⵙ ⴷ ⵍⴳⴻⵏⵙ ⵏⵏⴻⵙ.” ^□  ■  

44 ⵢⵓⵙⴰ-ⴷⴷ ⵎⵓⵙⴰ ⵓⵛⴰ ⵉⵙⵙⵉⵡⴻⵍ ⵎⴰⵔⵔⴰ ⴰⵡⴰⵍⴻⵏ ⵏ ⵜⵉⵥⵍⵉⵜ-ⴰ ⵅ ⵉⵎⴻⵥⵥⵓⵖⴻⵏ ⵏ ⵍⴳⴻⵏⵙ, ⵏⴻⵜⵜⴰ ⴷ ⵀⵓⵛⵉⵄⴰ, ⵎⵎⵉⵙ ⵏ ⵏⵓⵏ. ^□   45 ⵓⵎⵉ ⵉⴽⴻⵎⵎⴻⵍ ⵎⵓⵙⴰ ⵎⴰⵔⵔⴰ ⴰⵡⴰⵍⴻⵏ-ⴰ ⵉ ⵥⵉ ⵉⵙⵙⵉⵡⴻⵍ ⵖⴰⵔ ⵎⴰⵔⵔⴰ ⵉⵙⵔⴰⵉⵍ, 46 ⵉⵏⵏⴰ ⴰⵙⴻⵏ: “ⴰⵔⵔⴻⵎ ⵎⴰⵔⵔⴰ ⴰⵡⴰⵍⴻⵏ-ⴰ ⵏⵏⵉ ⵅ ⴷ ⴰⵡⴻⵎ ⵏⵏⵉⵖ ⴰⵙⵙ-ⴰ ⵖⴰⵔ ⵡⵓⵍ ⵏⵡⴻⵎ, ⵃⵉⵎⴰ ⴰⴷ ⵜⴻⵏ ⵜⵓⵎⵓⵔⴻⵎ ⵉ ⵉⵃⴻⵏⵊⵉⵔⴻⵏ ⵏⵡⴻⵎ ⵎⴰⵃⴻⵏⴷ ⴰⴷ ⵃⴹⴰⵏ ⵎⴰⵔⵔⴰ ⴰⵡⴰⵍⴻⵏ ⵏ ⵛⵛⴰⵔⵉⵄⴰ ⴰⵢⴰ ⴰⴷ ⵥⵥⴰⵢⵙⴻⵏ ⴳⴳⴻⵏ, 47 ⵎⵉⵏⵥⵉ ⵡⴰⵔ ⵉⴵⵉ ⴷ ⴰⵡⴰⵍ ⵏ ⴱⴰⵟⴻⵍ ⵉ ⴽⴻⵏⵏⵉⵡ, ⵎⴰⵛⴰ ⴷ ⵜⵓⴷⴰⵔⵜ ⵏⵡⴻⵎ. ⵙ ⵡⴰⵡⴰⵍ-ⴰ ⴰⴷ ⵜⴻⵥⵥⵓⴳⴳⴰⵔⵜⴻⵎ ⵓⵙⵙⴰⵏ ⵏⵡⴻⵎ ⵅ ⵜⴻⵎⵎⵓⵔⵜ ⵉ ⵖⴰⵔ ⵉ ⵖⴰ ⵜⴻⵥⵡⵉⵎ ⵅ ⵍ'ⵓⵔⴷⵓⵏ ⵎⴰⵃⴻⵏⴷ ⴰⴷ ⵜⵜ ⵜᵉⵟⵟⴼⴻⵎ ⴷ ⵍⵡⴰⵔⵜ.”

48 ⵉⵙⵙⵉⵡⴻⵍ ⵙⵉⴷⵉ ⴰⴽ-ⴷ ⵎⵓⵙⴰ ⴷⴻⴳ ⵡⴰⵙⵙ ⵏⵏⵉ, ⵉⵏⵏⴰ:

49 “ⴳⴰⵄⵄⴻⴷ ⴰⴷⵔⴰⵔ ⵏ ⴰⴱⴰⵔⵉⵎ, ⴰⵇⴰ-ⵜ ⴷ ⴰⴷⵔⴰⵔ ⵏ ⵏⴰⴱⵓ ⵏⵏⵉ ⵉⴵⴰⵏ ⴷⵉ ⵜⴻⵎⵎⵓⵔⵜ ⵏ ⵎⵓ’ⴰⴱ ⴰⵔⴻⵏⴷⴰⴷ ⵏ ⴰⵔⵉⵃⴰ, ⵓⵛⴰ ⵅⵥⴰⵔ ⵜⴰⵎⵎⵓⵔⵜ ⵏ ⴽⴻⵏⵄⴰⵏ ⵏⵏⵉ ⵉ ⵖⴰ ⵡⵛⴻⵖ ⴷ ⵍⵡⴰⵔⵜ ⵉ ⴰⵢⵜ ⵏ ⵉⵙⵔⴰⵉⵍ, ^■   50 ⵓⵛⴰ ⵎⵎⴻⵜ ⵅ ⵡⴻⴷⵔⴰⵔ ⵏⵏⵉ ⵖⴰⵔ ⵉ ⵖⴰ ⵜⴳⴻⵄⵄⴷⴻⴷ, ⵜⵜⵡⴰⵙⵎⵓⵏ ⵖⴰⵔ ⵍⴻⵊⴷⵓⴷ ⵏⵏⴻⴽ, ⴰⵎ ⵎⴰⵎⵎⴻⵛ ⵉⵎⵎⵓⵜ ⵓⵎⴰⵛ ⵀⴰⵔⵓⵏ ⵅ ⵡⴻⴷⵔⴰⵔ ⵏ ⵀⵓⵔ ⵓⵛⴰ ⵉⵜⵜⵡⴰⵙⵎⵓⵏ ⵖⴰⵔ ⵍⴻⵊⴷⵓⴷ ⵏⵏⴻⵙ, ^■   51 ⵎⵉⵏⵥⵉ ⴽⴻⵏⵏⵉⵡ ⵜⴻⵖⴷⴰⵍⴻⵎ ⵥⵥⴰⵢⵉ ⴷⵉ ⵍⵡⴻⵙⵜ ⵏ ⴰⵢⵜ ⵏ ⵉⵙⵔⴰⵉⵍ ⵖⴰⵔ ⵡⴰⵎⴰⵏ ⵏ ⵎⴰⵔⵉⴱⴰ-ⵇⴰⴷⴰⵛ ⴷⵉ ⵍⴻⵅⵍⴰ ⵏ ⵚⵉⵏ, ⵎⵉⵏⵥⵉ ⴽⴻⵏⵏⵉⵡ ⵡⴰⵔ ⴷ ⴰⵢⵉ ⵜⴻⵙⵙⵇⴻⴷⴷⵙⴻⵎ ⴷⵉ ⵍⵡⴻⵙⵜ ⵏ ⴰⵢⵜ ⵏ ⵉⵙⵔⴰⵉⵍ. ^■   52 ⵅⴻⵏⵏⵉ ⵍⴻⵅⵅⵓ ⴰⴷ ⵟⵥⴰⵔⴻⴷ ⵜⴰⵎⵎⵓⵔⵜ ⵥⵥⴰⵜⴻⴽ, ⵎⴰⵛⴰ ⵡⴰⵔ ⵜⵜⵉⴷⴼⴻⴷ ⵛⴰ ⵖⴰⵔ ⵜⴻⵎⵎⵓⵔⵜ ⵏⵏⵉ ⵉ ⵖⴰ ⵡⵛⴻⵖ ⵉ ⴰⵢⵜ ⵏ ⵉⵙⵔⴰⵉⵍ.”