1 “ⴽⴻⵏⵏⵉⵡ ⴷ ⵉⵃⴻⵏⵊⵉⵔⴻⵏ ⵏ ⵙⵉⴷⵉ, ⴰⵔⴻⴱⴱⵉ ⵏⵡⴻⵎ. ⵡⴰⵔ ⵅⴻⴱⴱⵛⴻⵎ ⵛⴰ ⵅ ⴰⵔⵔⵉⵎⴻⵜ ⵏⵡⴻⵎ, ⵡⴰⵔ ⵜⵇⴻⵛⵛⴰⵔⴻⵎ ⵛⴰ ⵊⴰⵔ ⵜⵉⵟⵟⴰⵡⵉⵏ ⵏⵡⴻⵎ ⴷⵉ ⵙⵙⵉⴱⴱⴻⵜ ⵏ ⵉⵊⵊ ⵏ ⵓⵎⴻⵜⵜⵉⵏ. ^■  

2 ⵎⵉⵏⵥⵉ ⴰⵇⴰ ⵛⴻⴽ ⴷ ⵉⵊⵊ ⵏ ⵍⴳⴻⵏⵙ ⵉⵇⴻⴷⴷⴻⵙ ⵖⴰⵔ ⵙⵉⴷⵉ, ⴰⵔⴻⴱⴱⵉ ⵏⵏⴻⴽ, ⵓⵛⴰ ⵙⵉⴷⵉ ⵉⴼⴰⵔⵥ ⵛⴻⴽ ⵃⵉⵎⴰ ⴰⴷ ⴰⵙ ⵜⵉⵍⵉⴷ ⴷ ⵍⴳⴻⵏⵙ ⵉⵖⵍⴰⵏ ⵥⵉ ⵎⴰⵔⵔⴰ ⵍⴻⴳⵏⵓⵙ ⵉ ⵉⴵⴰⵏ ⵅ ⵜⴻⵎⵎⵓⵔⵜ. ^■  

3 ⵡⴰⵔ ⵜⵜⴻⵜⵜ ⵥⵉ ⵎⴰⵔⵔⴰ ⵎⵉⵏ ⵉⴵⴰⵏ ⴷ ⵊⵊⵄⵉⴼⴻⵛⵜ.

4 ⴰⵇⴰ ⴷ ⵉⵏⴰ ⴷ ⵉⵎⵓⴷⴷⴰⵔⴻⵏ ⵉ ⵉⵄⴻⴷⴷⴻⵍ ⴰⴷ ⵜⴻⵏ ⵜⴻⵛⵛⴻⵎ: ⴰⴼⵓⵏⴰⵙ, ⵉⵊⵊⴻⵏ ⵥⴻⴳ ⵉⵃⵓⵍⵉⵢⵢⴻⵏ, ⵉⵊⵊⴻⵏ ⵥⴻⴳ ⵉⵖⴰⵢⴹⴻⵏ, ^□  ■   5 ⵓⴷⴰⴷ, ⵉⵖⴰⵢⴹ ⵏ ⵡⴻⵥⵖⴰⵔ, ⵉⵥⴻⵔⵥⴻⵔ, ⵉⵖⴰⵢⴹ ⴰⴽ-ⴷ ⵡⴰⵛⵛⴰⵡⴻⵏ ⵉⵎⴻⵇⵇⵔⴰⵏⴻⵏ, ⴰⵎⴻⵍⵍⴰⵍ, ⴰⴼⵓⵏⴰⵙ ⵏ ⵍⴻⵅⵍⴰ ⴷ ⵉⵖⴰⵢⴹ ⵏ ⵉⴷⵓⵔⴰⵔ. ^□   6 ⵉⵄⴻⴷⴷⴻⵍ ⴰⴷ ⵜⴻⵛⵛⴻⵎ ⵎⴰⵔⵔⴰ ⵍⵎⴰⵍ ⵉ ⵖⴰⵔ ⵉⴵⴰ ⵜⵍⴻⵇⵇⴰ ⵏ ⵜⴻⵛⴹⴻⵛⵜ ⵉⵎⵎⵙⴻⴱⴹⴰⵏ, ⵜⴰⵛⴹⴻⵛⵜ ⵉⵎⵎⵙⴻⴱⴹⴰⵏ ⵅ ⵜⵏⴰⵢⴻⵏ, ⵓ ⵙⴻⵏⵏⴻⵊ ⵉ ⵎⴰⵏ ⴰⵢⴰ ⵜⵜⴰⵔⵔⴰⵏ ⵉⴼⴻⵥ ⵊⴰⵔ ⵍⵎⴰⵍ.

7 ⵎⴰⵛⴰ ⵥⴻⴳ ⵉⵏⵏⵉ ⵉⵜⵜⴰⵔⵔⴰⵏ ⵉⴼⴻⵥ ⴷ ⵢⴻⵏⵏⵉ ⵉ ⵖⴰⵔ ⵜⴻⴵⴰ ⵜⴻⵛⴹⴻⵛⵜ ⵉⵎⵎⵙⴻⴱⴹⴰⵏ ⵇⴰⵄ ⵅ ⵜⵏⴰⵢⴻⵏ, ⵡⴰⵔ ⵉⵄⴻⴷⴷⴻⵍ ⴰⴷ ⵜⴻⵛⵛⴻⵎ ⵉⵏⴰ: ⴰⵍⵖⴻⵎ, ⴷ ⵓⵢⴰⵔⵥⵉⵥ ⴷ ⵓⴽⴰⵡⴽⴰ ⵏ ⵜⴻⵚⴹⴰⵔⵜ ⵎⵉⵏⵥⵉ ⵜⵜⴻⴼⴼⵥⴻⵏ, ⵎⴰⵛⴰ ⵡⴰⵔ ⵖⴰⵔⵙⴻⵏ ⴱⵓ ⵜⴻⵛⴹⴻⵛⵜ ⵉⵎⵎⵙⴻⴱⴹⴰⵏ, ⵓ ⵅⴻⵏⵏⵉ ⴰⴷ ⵖⴰⵔⵡⴻⵎ ⵉⵍⵉⵏ ⵅⴻⵎⵊⴻⵏ. 8 ⴰⵎⵎⵓ ⵓⵍⴰ ⴷ ⵉⵍⴻⴼ, ⵡⴰⵅⵅⴰ ⵖⴰⵔⴻⵙ ⵜⴰⵛⴹⴻⵛⵜ ⵉⵎⵎⵙⴻⴱⴹⴰⵏ, ⵡⴰⵔ ⵉⵜⵜⴰⵔⵔⵉ ⵉⴼⴻⵥ, ⵙ ⵓⵢⴻⵏⵏⵉ ⴰⴷ ⵖⴰⵔⵡⴻⵎ ⵢⵉⵍⵉ ⵉⵅⵎⴻⵊ. ⵡⴰⵔ ⵜⵜᵉⵜⵜⴻⵎ ⵛⴰ ⵥⴻⴳ ⵡⴻⵢⵙⵓⵎ ⵏⵏⴻⵙ, ⵡⴰⵔ ⵜⵜⵃⴰⴷⴰⵎ ⵛⴰ ⵍⵅⴻⵛⴱⴰⵜ ⵏⵙⴻⵏ.

9 ⵉⵄⴻⴷⴷⴻⵍ ⴰⴷ ⵜⴻⵛⵛⴻⵎ ⵉⵏⴰ ⵥⵉ ⵎⴰⵔⵔⴰ ⵎⵉⵏ ⵉⴵⴰⵏ ⴷⴻⴳ ⵡⴰⵎⴰⵏ: ⵎⴰⵔⵔⴰ ⵡⵉ ⵖⴰⵔ ⵉⴵⴰ ⵡⴰⴼⵔⵉⵡⴻⵏ ⴷ ⵜⴻⵇⵛⵓⵔⵜ ⵉⵄⴻⴷⴷⴻⵍ ⴰⴷ ⵜⴻⵏ ⵜⴻⵛⵛⴻⵎ.

10 ⵎⴰⵛⴰ ⵎⴰⵔⵔⴰ ⵎⵉⵏ ⵡⴰⵔ ⵖⴰⵔ ⴵⵉⵏ ⵡⴰⴼⵔⵉⵡⴻⵏ ⵏⵉⵖ ⵜⴰⵇⵛⵓⵔⵜ, ⵡⴰⵔ ⵉⵄⴻⴷⴷⴻⵍ ⴰⴷ ⵜⴻⵏ ⵜⴻⵛⵛⴻⵎ, ⴰⴷ ⵖⴰⵔⵡⴻⵏ ⵉⵍⵉⵏ ⵅⴻⵎⵊⴻⵏ.

11 ⵎⴰⵔⵔⴰ ⵉⵊⴹⴰⴹ ⵉⵥⴷⵉⴳⴻⵏ ⵉⵄⴻⴷⴷⴻⵍ ⴰⴷ ⵜⴻⵏ ⵜⴻⵛⵛⴻⵎ,

12 ⵎⴰⵛⴰ ⵡⴰⵔ ⵉⵄⴻⴷⴷⴻⵍ ⴰⴷ ⵥⵥⴰⵢⵙⴻⵏ ⵜⴻⵛⵛⴻⵎ ⵉⵏⴰ: ⴰⴳⵉⴷⴻⵔ, ⵉⵙⵖⵉ, ⴰⴳⵉⴷⴻⵔ ⵏ ⵍⴻⴱⵃⴰⵔ,

13 ⴱⵓ-ⵍⵅⴻⵥⵔⴰⵜ ⴷ ⴰⵎⴻⵙⵖⵓⵢ ⴰⵎⵓⵇⴹⵉⵄ ⵏ ⵜⵉⵟⵟⴰⵡⵉⵏ ⴷ ⴱⵓ-ⵓⵎⴻⵟⵟⴰⵡ ⵙ ⵜⴰⵥⵍⴰ ⴰⴽ-ⴷ ⵎⴰⵔⵔⴰ ⵎⴰⵔⴽⴰⵜ ⵏⵏⴻⵙ,

14 ⵎⴰⵔⵔⴰ ⵎⴰⵔⴽⴰⵜ ⵏ ⵓⴱⴰⵖⴻⵍ,

15 ⵢⴻⴵⵉⵙ ⵏ ⴱⵓⵀⴻⵢⵢⴰⴼ, ⴰⵄⴻⵏⵏⴰⴼ, ⴰⵊⴹⵉⴹ ⵏ ⵍⴻⴱⵃⴰⵔ, ⵍⴱⴰⵥ ⴰⴽ-ⴷ ⵎⴰⵔⴽⴰⵜ ⵏⵏⴻⵙ,

16 ⴰⵃⴻⵎⵎⴰⵍ ⵏ ⵍⴽⴰⵙ, ⴱⵓ-ⵓⵚⵓⴹⵉ ⵏ ⵍⵎⴻⵡⵜ, ⴱⵓ-ⵢⵓⵏⵜⴰⵃ,

17 ⴱⵓ-ⵓⵄⵓⵇⵇⵉ, ⴱⵓ-ⵓⵃⴰⵡⴰⵍ, ⴱⵓ-ⵜⵛⴰⵔⴰⵔⵔⵓⵜ,

18 ⴰⴱⴻⵍⵍⴰⵔⵊ, ⴱⵓ-ⵓⵚⵓⴹⵉ ⵉⵄⴻⴼⴼⵏⴻⵏ ⴰⴽ-ⴷ ⵎⴰⵔⴽⴰⵜ ⵏⵏⴻⵙ, ⴷⵓⵏⴷⵓⵏ ⴷ ⵍⵡⴻⴹⵡⴰⴹ.

19 ⵎⴰⵔⵔⴰ ⵎⵉⵏ ⵖⴰⵔ ⵉⴵⴰ ⵡⴰⴼⵔⵉⵡⴻⵏ ⵏⵏⵉ ⵉⵜⵜⴱⵓⵄⴻⵏ ⴰⴷ ⵖⴰⵔⵡⴻⵎ ⵢⵉⵍⵉ ⵉⵅⵎⴻⵊ. ⵡⴰⵔ ⵉⵄⴻⴷⴷⴻⵍ ⴰⴷ ⵜⵜⵡⴰⵛⵛⴻⵏ.

20 ⵎⴰⵔⵔⴰ ⵉⵊⴹⴰⴹ ⵉⵥⴷⵉⴳⴻⵏ ⵉⵄⴻⴷⴷⴻⵍ ⴰⴷ ⵜⴻⵏ ⵜⴻⵛⵛⴻⵎ.

21 ⵡⴰⵔ ⵉⵄⴻⴷⴷⴻⵍ ⴰⴷ ⵜⴻⵛⵛⴻⵎ ⵓⵍⴰ ⵥⴻⴳ ⵉⵛⵜ ⵏ ⵍⵅⴻⵛⴱⴻⵜ. ⴰⴷ ⵜⵜ ⵜⴻⵡⵛⴻⴷ ⵉ ⵓⴱⴰⵔⵔⴰⵏⵉ ⵏⵏⵉ ⵉⴵⴰⵏ ⴷⴰⵅⴻⵍ ⵉ ⵜⴻⵡⵡⵓⵔⴰ ⵏⵏⴻⴽ, ⵃⵉⵎⴰ ⴰⴷ ⵥⵥⴰⵢⴻⵙ ⵢⴻⵛⵛ ⵏⵉⵖ ⴰⴷ ⵜⵜ ⵉⵥⵥⴻⵏⵥ ⵉ ⵓⴱⴰⵔⵔⴰⵏⵉ, ⵎⵉⵏⵥⵉ ⵛⴻⴽ ⴷ ⵉⵊⵊ ⵏ ⵍⴳⴻⵏⵙ ⴷ ⴰⵎⵇⴻⴷⴷⴰⵙ ⵉ ⵙⵉⴷⵉ, ⴰⵔⴻⴱⴱⵉ ⵏⵏⴻⴽ.

ⵡⴰⵔ ⵜⴻⵙⵙⵏⴻⵏⵏⵉⴷ ⵉⵖⴰⵢⴹ ⴷ ⴰⵎⴻⵥⵢⴰⵏ ⴷⴻⴳ ⵓⵖⵉ ⵏ ⵢⴻⵎⵎⴰⵙ. ^■  

22 ⴰⴷ ⵜⵄⴻⵛⵛⴰⵔⴻⴷ ⵏⵉⵛⴰⵏ ⵎⴰⵔⵔⴰ ⵍⵖⵉⴵⴻⵜ ⵏ ⵥⵥⴰⵔⵉⵄⴻⵜ ⵏⵏⵉ ⵉⵜⵜⴻⵊⵊⵓ ⵉⵢⵢⴰⵔ ⵏⵏⴻⴽ ⵥⴻⴳ ⵓⵙⴻⴳⴳⵯⴰⵙ ⵖⴰⵔ ⵓⵙⴻⴳⴳⵯⴰⵙ ⵏⵏⴻⵖⵏⵉ. 23 ⴰⴷ ⵜⴻⵛⵛⴻⴷ ⵍⴻⵄⵛⵓⵔ ⵏ ⵉⵔⴷⴻⵏ ⵏⵏⴻⴽ, ⵏ ⴱⵉⵏⵓ ⵏⵏⴻⴽ ⵏ ⵊⴷⵉⴷ, ⵏ ⵥⵥⴻⵛⵜ ⵏⵏⴻⴽ ⵏ ⵟⵟⵔⵉ, ⵓⵍⴰ ⵏ ⵉⵎⴻⵏⵥⴰ ⵏ ⵍⴻⴱⵀⴰⵢⴻⵎ ⵏⵏⴻⴽ ⵓ ⵏ ⵡⵓⴵⵉ ⵏⵏⴻⴽ ⵥⵥⴰⵜ ⵉ ⵡⵓⴷⴻⵎ ⵏ ⵙⵉⴷⵉ, ⴰⵔⴻⴱⴱⵉ ⵏⵏⴻⴽ, ⴷⴻⴳ ⵡⴻⵎⵛⴰⵏ ⵉ ⵖⴰ ⵉⵅⴹⴰⵔ ⵏⴻⵜⵜⴰ ⵎⴰⵃⴻⵏⴷ ⴰⴷ ⴷⵉⵏ ⵉⵥⴻⵎⵎⴻⵎ ⵉⵙⴻⵎ ⵏⵏⴻⵙ, ⵃⵉⵎⴰ ⴰⴷ ⵜⵍⴻⵎⴷⴻⴷ ⴰⴷ ⵜⴻⴳⴳⵯⴻⴷⴻⴷ ⵙⵉⴷⵉ, ⴰⵔⴻⴱⴱⵉ ⵏⵏⴻⴽ ⴽⵓⵍ ⴰⵙⵙ. ^■   24 ⵎⴰⵍⴰ ⴰⴱⵔⵉⴷ ⵉⵥⵥⵓⴳⴳⴰⵔⵜ ⵅⴰⴽ ⴰⵟⵟⴰⵙ, ⴰⵍ ⵖⴰ ⵜⴰⴼⴻⴷ ⵡⴰⵔ ⵜⵥⴻⵎⵎⴰⵔⴻⴷ ⴰⴷ ⵜⴻⵏ ⵜⴰⵡⵢⴻⴷ ⴷⵉⵏ, ⵎⵉⵏⵥⵉ ⴰⵎⵛⴰⵏ ⵏⵏⵉ ⵉⵅⴹⴰⵔ ⵙⵉⴷⵉ, ⴰⵔⴻⴱⴱⵉ ⵏⵏⴻⴽ, ⵃⵉⵎⴰ ⴰⴷ ⴷⵉⵏ ⵉⵥⴻⵎⵎ ⵉⵙⴻⵎ ⵏⵏⴻⵙ, ⵉⴵⴰⵏ ⵉⴳⴳⵯⴻⵊ ⵅⴰⴽ ⴰⵟⵟⴰⵙ, ⵓⵛⴰ ⵎⴰⵍⴰ ⵅⴻⵏⵏⵉ ⵙⵉⴷⵉ, ⴰⵔⴻⴱⴱⵉ ⵏⵏⴻⴽ ⵉⴱⴰⵔⴻⴽ ⵉ ⵛⴻⴽ, 25 ⵇⵍⴻⴱ ⵉ-ⵜⴻⵏ ⵅⴻⵏⵏⵉ ⴷ ⵜⵎⴻⵏⵢⴰⵜ ⵏ ⵏⵏⵓⵇⴰⵔⵜ ⵓⵛⴰ ⵓⵢⵓⵔ ⵙ ⵜⴽⴻⵎⵎⵓⵙⵜ ⵏ ⵜⵎⴻⵏⵢⴰⵜ ⴷⴻⴳ ⵓⴼⵓⵙ ⵏⵏⴻⴽ ⵖⴰⵔ ⵡⴻⵎⵛⴰⵏ ⵏⵏⵉ ⵉ ⵖⴰ ⵉⵅⴹⴰⵔ ⵙⵉⴷⵉ, ⴰⵔⴻⴱⴱⵉ ⵏⵏⴻⴽ, ^□   26 ⴰⴷ ⵜⵚⴰⵔⴼⴻⴷ ⵜⵎⴻⵏⵢⴰⵜ ⵏⵏⵉ ⵅ ⵎⴰⵔⵔⴰ ⵎⵉⵏ ⴷⵉ ⵉⵎⵎⴻⵥⵔⵉ ⵡⵓⵍ ⵏⵏⴻⴽ, ⵅ ⵉⴼⵓⵏⴰⵙⴻⵏ ⴷ ⵜⴼⵓⵏⴰⵙⵉⵏ, ⵅ ⵡⵓⴵⵉ, ⵅ ⴱⵉⵏⵓ, ⵅ ⵛⵛⵔⴰⴱ ⵏⵉⵖ ⵅ ⵎⵉⵏ ⵎⴰ ⵉⵅⵙ ⵡⵓⵍ ⵏⵏⴻⴽ ⵓⵛⴰ ⴰⴷ ⵜⴻⵛⵛⴻⴷ ⴷⵉⵏ ⵥⵥⴰⵜ ⵉ ⵡⵓⴷⴻⵎ ⵏ ⵙⵉⴷⵉ, ⴰⵔⴻⴱⴱⵉ, ⴰⴷ ⵜⴼⴰⵔⵃⴻⴷ, ⵛⴻⴽ ⴷ ⵍⴰⴵ ⵏ ⵜⴰⴷⴷⴰⵔⵜ ⵏⵏⴻⴽ. ^■  

27 ⵡⴰⵔ ⵙⴻⵎⵎⴻⵃ ⵛⴰ ⴷⵉ ⴰⵍⴰⵡⵉ ⵏⵏⵉ ⵉⵥⴻⴷⴷⵖⴻⵏ ⵖⴰⵔ ⴷⴰⵅⴻⵍ ⵉ ⵜⴻⵡⵡⵓⵔⴰ ⵏⵏⴻⴽ, ⵎⵉⵏⵥⵉ ⵡⴰⵔ ⵖⴰⵔⴻⵙ ⴱⵓ ⴷⵉⵏ ⵜⴰⵙⵖⴰⵔⵜ ⵏⵉⵖ ⵍⵡⴰⵔⵜ ⴰⴽⵉⴷⴻⴽ. ^■   28 ⵖⴰⵔ ⵓⵏⴻⴳⴳⴰⵔ ⵏ ⵜⵍⴰⵜⴰ ⵏ ⵉⵙⴻⴳⴳⵯⵓⵙⴰ ⴰⴷ ⵜⴻⵙⵙⵓⴼⴼⵖⴻⴷ ⵎⴰⵔⵔⴰ ⵍⴻⵄⵛⵓⵔ ⵏ ⵍⵖⵉⴵⴻⵜ ⴷⴻⴳ ⵓⵙⴻⴳⴳⵯⴰⵙ ⵏⵏⵉ ⵓⵛⴰ ⴰⴷ ⵜⴻⵏ ⵜⵅⴻⵥⵏⴻⴷ ⵊⴰⵔ ⴷⴰⵅⴻⵍ ⵏ ⵜⴻⵡⵡⵓⵔⴰ ⵏⵏⴻⴽ. 29 ⵅⴻⵏⵏⵉ ⴰⵍⴰⵡⵉ ⴰⴷ ⴷⴷ-ⵢⴰⵙ, ⵎⵉⵏⵥⵉ ⵡⴰⵔ ⵖⴰⵔⴻⵙ ⵜⴻⴵⵉ ⵜⴻⵙⵖⴰⵔⵜ ⵏⵉⵖ ⵍⵡⴰⵔⵜ ⴰⴽⵉⴷⴻⴽ, ⵓⵍⴰ ⴷ ⴰⴱⴰⵔⵔⴰⵏⵉ ⴷ ⵓⵢⵓⵊⵉⵍ ⴷ ⵜⴰⵊⵊⴰⵞ ⵏⵏⵉ ⵉⴵⴰⵏ ⵖⴰⵔ ⴷⴰⵅⴻⵍ ⵉ ⵜⴻⵡⵡⵓⵔⴰ ⵏⵏⴻⴽ ⵓⵛⴰ ⴰⴷ ⵛⵛⴻⵏ, ⴰⴷ ⵊⵊⵉⵡⵏⴻⵏ, ⵃⵉⵎⴰ ⵅⴻⵏⵏⵉ ⵙⵉⴷⵉ, ⴰⵔⴻⴱⴱⵉ ⵏⵏⴻⴽ, ⴰⴷ ⴰⵛ ⵉⴱⴰⵔⴻⴽ ⴷⵉ ⵎⴰⵔⵔⴰ ⵍⵅⴻⴷⵎⴻⵜ ⵉ ⵖⴰ ⵜⴻⴳⴳⴻⴷ ⵙ ⵓⴼⵓⵙ ⵏⵏⴻⴽ.”