ⵜⴰⵙⵖⴰⵔⵜ ⵏ ⵍⵡⴰⵔⵜ ⵉ ⵢⴻⵙⵙⵉⵙ ⵏ ⵚⴰⵍⵓⴼⵃⴰⴷ
36
1 ⵣⵉ ⵍⴰⴵⴰⵜ ⵏ ⵉⵃⴻⵏⵊⵉⵔⴻⵏ ⵏ ⵢⵓⵙⵓⴼ ⵇⴰⵔⵔⴱⴻⵏ-ⴷⴷ ⵉⵥⴻⴵⵉⴼⴻⵏ ⵊⴰⵔ ⵉⴱⴰⴱⴰⵜⴻⵏ ⵏ ⵍⴰⴵ ⵏ ⵉⵃⴻⵏⵊⵉⵔⴻⵏ ⵏ ⵊⵉⵍⵄⴰⴷ, ⵎⵎⵉⵙ ⵏ ⵎⴰⴽⵉⵔ, ⵎⵎⵉⵙ ⵏ ⵎⴰⵏⴰⵙⵙⴰ ⵓⵛⴰ ⵏⵉⵜⵏⵉ ⵙⵙⵉⵡⵍⴻⵏ ⵥⵥⴰⵜ ⵉ ⵡⵓⴷⴻⵎ ⵏ ⵎⵓⵙⴰ ⵓ ⵥⵥⴰⵜ ⵉ ⵡⵓⴷⴻⵎ ⵏ ⵉⵎⴻⵇⵇⵔⴰⵏⴻⵏ, ⵉⵥⴻⴵⵉⴼⴻⵏ ⵉⵏⵏⴻⵖⵏⵉ ⵏ ⵉⴱⴰⴱⴰⵜⴻⵏ ⵏ ⴰⵢⵜ ⵏ ⵉⵙⵔⴰⵉⵍ 2 ⵓⵛⴰ ⵏⵉⵜⵏⵉ ⵏⵏⴰⵏ: “ⵙⵉⴷⵉ ⵢⵓⵎⵓⵔ ⵙⵉⴷⵉ ⵉⵏⵓ ⵎⴰⵃⴻⵏⴷ ⴰⴷ ⵉⵡⵛ ⵜⴰⵎⵎⵓⵔⵜ ⵙ ⵜⵇⴻⴷⴷⵓⵃⵜ ⵉ ⴰⵢⵜ ⵏ ⵉⵙⵔⴰⵉⵍ ⴷ ⵍⵡⴰⵔⵜ. ⵓⵛⴰ ⵢⵓⵎⵓⵔ ⵙⵉⴷⵉ ⵉ ⵙⵉⴷⵉ ⵉⵏⵓ ⴰⴷ ⵉⵡⵛ ⵜⴰⵙⵖⴰⵔⵜ ⵏ ⵍⵡⴰⵔⵜ ⵏ ⵓⵎⴰⵜⵏⴻⵖ ⵚⴰⵍⵓⴼⵃⴰⴷ ⵉ ⵢⴻⵙⵙⵉⵙ. ■ 3 ⵎⴰⵍⴰ ⴷⴻⵡⵍⴻⵏⵜ ⵏⵉⵜⴻⵏⵜⵉ ⴷ ⵜⵉⵏⴻⵎⵍⴰⵞ ⴰⴽ-ⴷ ⵉⵊⵊⴻⵏ ⵥⴻⴳ ⵉⵃⴻⵏⵊⵉⵔⴻⵏ ⵏ ⵜⵇⴻⴱⴱⴰⵍ ⵏⵏⴻⵖⵏⵉ ⵏ ⴰⵢⵜ ⵏ ⵉⵙⵔⴰⵉⵍ, ⵅⴻⵏⵏⵉ ⴰⴷ ⵉⵜⵜⵡⴰⵙⴻⵎⵥⵉ ⵜⴻⵙⵖⴰⵔⵜ ⵏⵙⴻⵏⵜ ⴷⵉ ⵍⵡⴰⵔⵜ ⵏ ⵉⴱⴰⴱⴰⵜⴻⵏ ⵏⵏⴻⵖ ⵓⵛⴰ ⴰⴷ ⵜᵉⵜⵜⵡⴰⵔⵏⵉ ⵜⴰⵙⵖⴰⵔⵜ ⵏⵙⴻⵏⵜ ⵉ ⵜⴻⵙⵖⴰⵔⵜ ⵏ ⵜⴻⵇⴱⵉⵞ ⵉ ⵖⴰⵔ ⵉ ⵖⴰ ⵎⵓⵏⴻⵏⵜ ⵓⵛⴰ ⴰⵎⵎⵓ ⴰⴷ ⵉⵜⵜⵡⴰⵙⴻⵎⵥⵉ ⵎⵉⵏ ⵉⴵⴰⵏ ⴷ ⵜⴰⵙⵖⴰⵔⵜ ⵏⵏⴻⵖ ⵙ ⵜⵇⴻⴷⴷⵓⵃⵜ. 4 ⵎⴻⵍⵎⵉ ⵅⴻⵏⵏⵉ ⴷⴷ ⵖⴰ ⵢⴰⵙ ⵓⵙⴻⴳⴳⵯⴰⵙ ⵏ ⵓⵙⵍⵉⵡⵍⴻⵡ ⵉ ⴰⵢⵜ ⵏ ⵉⵙⵔⴰⵉⵍ, ⵅⴻⵏⵏⵉ ⴰⴷ ⵜᵉⵜⵜⵡⴰⵎⴰⵔⵏⵉ ⵜⴻⵙⵖⴰⵔⵜ ⵏⵙⴻⵏⵜ ⵉ ⵜⴻⵙⵖⴰⵔⵜ ⵏ ⵜⴻⵇⴱⵉⵞ ⴰⴽ-ⴷ ⵡⵉ ⵉ ⵖⴰ ⵎⵓⵏⴻⵏⵜ. ⴰⵎⵎⵓ ⵉ ⵖⴰ ⵜᵉⵜⵜⵡⴰⴽⴽⴻⵙ ⵅⴻⵏⵏⵉ ⵜⴻⵙⵖⴰⵔⵜ ⵏⵙⴻⵏⵜ ⴷⵉ ⵍⵡⴰⵔⵜ ⵏ ⵜⴻⵇⴱⵉⵞ ⵏ ⵉⴱⴰⴱⴰⵜⴻⵏ ⵏⵏⴻⵖ.” 5 ⵅⴻⵏⵏⵉ ⵢⵓⵎⵓⵔ ⵎⵓⵙⴰ ⵉ ⴰⵢⵜ ⵏ ⵉⵙⵔⴰⵉⵍ ⵄⵍⴰⵃⵙⴰⴱ ⵍⵓⵎⵓⵔ ⵏ ⵙⵉⴷⵉ, ⵉⵏⵏⴰ: “ⴰⵇⴰ ⴷ ⵜⵉⴷⴻⵜⵜ ⴰⵎ ⵎⴰⵎⵎⴻⵛ ⵜⴻⵙⵙⵉⵡⴻⵍ ⵜⴻⵇⴱⵉⵞ ⵏ ⴰⵢⵜ ⵏ ⵢⵓⵙⵓⴼ. 6 ⵡⴰ ⴷ ⴰⵡⴰⵍ ⵉ ⵥⵉ ⵢⵓⵎⵓⵔ ⵙⵉⴷⵉ ⵅ ⵢⴻⵙⵙⵉⵙ ⵏ ⵚⴰⵍⵓⴼⵃⴰⴷ, ⵉⵇⵇⴰⵔ: ‘ⴻⵊⵊ ⵉ-ⵜⴻⵏⵜ ⴰⴷ ⵎⴻⵍⵛⴻⵏⵜ ⴰⴽ-ⴷ ⵡⴻⵏⵏⵉ ⴷ ⴰⵙⴻⵏⵜ ⵢⴰⵔⴻⵛⵇⴻⵏ. ⵉⵜⵜⵅⴻⵚⵚⴰ ⵎⵖⵉⵔ ⴰⴷ ⵎⴻⵍⵛⴻⵏⵜ ⴷⵉ ⵍⴰⴵ ⵏ ⵜⴻⵇⴱⵉⵞ ⵏ ⴱⴰⴱⴰⵜⵙⴻⵏⵜ. 7 ⵡⴰⵔ ⵉⵄⴻⴷⴷⴻⵍ ⴰⴷ ⵜⵔⴰⵃ ⵜⴻⵙⵖⴰⵔⵜ ⵏ ⴰⵢⵜ ⵏ ⵉⵙⵔⴰⵉⵍ ⵥⵉ ⵜⴻⵇⴱⵉⵞ ⵖⴰⵔ ⵜⴻⵇⴱⵉⵞ ⵏⵏⴻⵖⵏⵉ, ⵎⵉⵏⵥⵉ ⴽⵓⵍ ⴰⵔⵢⴰⵥ ⵏ ⴰⵢⵜ ⵏ ⵉⵙⵔⴰⵉⵍ ⴰⴷ ⵉⵇⵇⵉⵎ ⵉⵟⵟⴻⴼ ⴷⵉ ⵜⴻⵙⵖⴰⵔⵜ ⵏ ⵜⴻⵇⴱⵉⵞ ⵏ ⵉⴱⴰⴱⴰⵜⴻⵏ ⵏⵏⴻⵙ. 8 ⴽⵓⵍ ⵜⴰⵢⴻⴵⵉⵜ ⵏⵏⵉ ⵉ ⵖⴰ ⵉⵟⵟⴼⴻⵏ ⵉⵛⵜ ⵏ ⵜⴻⵙⵖⴰⵔⵜ ⵥⴻⴳ ⴰⵢⵜ ⵏ ⵉⵙⵔⴰⵉⵍ, ⵉⵜⵜⵅⴻⵚⵚⴰ ⴰⵙ ⴰⴷ ⵜⴻⵎⵍⴻⵛ ⴰⴽ-ⴷ ⵉⵊⵊ ⵥⴻⴳ ⵉⵊⵊ ⵏ ⵍⴰⴵ ⵥⵉ ⵜⴻⵇⴱⵉⵞ ⵏ ⴱⴰⴱⴰⵙ, ⵃⵉⵎⴰ ⴽⵓⵍ ⵉⵊⵊ ⵥⴻⴳ ⴰⵢⵜ ⵏ ⵉⵙⵔⴰⵉⵍ ⴰⴷ ⵉⵡⴰⵔⵜ ⵜⴰⵙⵖⴰⵔⵜ ⵏ ⵉⴱⴰⴱⴰⵜⴻⵏ ⵏⵏⴻⵙ. □ 9 ⵡⴰⵔ ⵉⵄⴻⴷⴷⴻⵍ ⴰⴷ ⵜⵔⴰⵃ ⵜⴰⵙⵖⴰⵔⵜ ⵏ ⵉⵛⵜ ⵏ ⵜⴻⵇⴱⵉⵞ ⵖⴰⵔ ⵜⴻⵇⴱⵉⵞ ⵏⵏⴻⵖⵏⵉ, ⵎⵉⵏⵥⵉ ⵉⵜⵜⵅⴻⵚⵚⴰ ⵉ ⴽⵓⵍ ⵉⵛⵜ ⵥⵉ ⵜⵇⴻⴱⴱⴰⵍ ⵏ ⴰⵢⵜ ⵏ ⵉⵙⵔⴰⵉⵍ ⴰⴷ ⵉⵟⵟⴻⴼ ⴷⵉ ⵜⴻⵙⵖⴰⵔⵜ ⵏⵏⴻⵙ.’ ”
10 ⵢⴻⵙⵙⵉⵙ ⵏ ⵚⴰⵍⵓⴼⵃⴰⴷ ⴳⴳⵉⵏⵜ ⴰⵎ ⵎⴰⵎⵎⴻⵛ ⵜ ⵢⵓⵎⵓⵔ ⵙⵉⴷⵉ ⵉ ⵎⵓⵙⴰ.
11 ⵎⴰⵃⵍⴰ, ⵜⵉⵔⵚⴰ, ⵃⵓⵊⵍⴰ, ⵎⵉⵍⴽⴰ ⴷ ⵏⵓⵄⴰ, ⵢⴻⵙⵙⵉⵙ ⵏ ⵚⴰⵍⵓⴼⵃⴰⴷ, ⴷⴻⵡⵍⴻⵏⵜ ⴷ ⵜⵉⵏⴻⵎⵍⴰⵞ ⴰⴽ-ⴷ ⵉⵃⴻⵏⵊⵉⵔⴻⵏ ⵏ ⵄⴻⵎⵎⵉⵜⵙⴻⵏⵜ. ■
12 ⴷⴻⵡⵍⴻⵏⵜ ⴷ ⵜⵉⵏⴻⵎⵍⴰⵞ ⴷⵉ ⵍⴰⴵⴰⵜ ⵏ ⴰⵢⵜ ⵏ ⵎⴰⵏⴰⵙⵙⴰ, ⵎⵎⵉⵙ ⵏ ⵢⵓⵙⵓⴼ. ⴰⵎⵎⵓ ⵜⴻⵇⵇⵉⵎ ⵜⴻⵙⵖⴰⵔⵜ ⵏⵙⴻⵏⵜ ⴷⵉ ⵜⴻⵇⴱⵉⵞ ⵏ ⴱⴰⴱⴰⵜⵙⴻⵏⵜ.
13 ⵜⵉⵏⴰ ⴷ ⵜⵉⵡⴻⵚⵚⴰ ⴷ ⵍⴼⴰⵔⴰⵢⵉⴹ ⵏⵏⵉ ⵢⵓⵎⵓⵔ ⵙⵉⴷⵉ ⵅ ⵓⴼⵓⵙ ⵏ ⵎⵓⵙⴰ ⵉ ⴰⵢⵜ ⵏ ⵉⵙⵔⴰⵉⵍ ⴷⵉ ⵍⴻⵡⴹⴰⵜ ⵏ ⵎⵓ’ⴰⴱ, ⵖⴰⵔ ⵍ'ⵓⵔⴷⵓⵏ ⴰⵔⴻⵏⴷⴰⴷ ⵏ ⴰⵔⵉⵃⴰ.