1 ⵉⵙⵙⵉⵡⴻⵍ ⵙⵉⴷⵉ ⴰⴽ-ⴷ ⵎⵓⵙⴰ, ⵉⵏⵏⴰ:

2 “ⵓⵎⵓⵔ ⴰⵢⵜ ⵏ ⵉⵙⵔⴰⵉⵍ ⵓⵛⴰ ⵉⵏⵉ ⴰⵙⴻⵏ: ‘ⵅⵎⵉ ⵉ ⵖⴰ ⵜⴰⴷⴼⴻⵎ ⵜⴰⵎⵎⵓⵔⵜ ⵏ ⴽⴻⵏⵄⴰⵏ, ⵅⴻⵏⵏⵉ ⵜⴰ ⴷ ⵜⴰⵎⵎⵓⵔⵜ ⵉ ⴷ ⴰⵡⴻⵎ ⵖⴰ ⵢⵉⵍⵉⵏ ⴷ ⵍⵡⴰⵔⵜ, ⵜⴰⵎⵎⵓⵔⵜ ⵏ ⴽⴻⵏⵄⴰⵏ ⴰⴽ-ⴷ ⵉⵢⵎⵉⵔⴻⵏ ⵏⵏⴻⵙ ⴰⴷ ⵜⵉⵍⵉ ⴰⵎⵎⵓ:

3 ⵊⵊⵉⵀⴻⵜ ⵏ ⵍⵊⴰⵏⵓⴱ ⴰⴷ ⵖⴰⵔⵡⴻⵎ ⵜⵉⵍⵉ ⵥⵉ ⵍⴻⵅⵍⴰ ⵏ ⵚⵉⵏ ⴰⵍ ⴰⵢⵎⵉⵔ ⵏ ⵉⴷⵓⵎ ⵓⵛⴰ ⴰⵢⵎⵉⵔ ⵏ ⵍⵊⴰⵏⵓⴱ ⴰⴷ ⵖⴰⵔⵡⴻⵎ ⵢⵉⵍⵉ ⵥⵉ ⵟⵟⴰⵔⴼ ⴰⵏⴻⴳⴳⴰⵔⵓ ⵏ ⵍⴻⴱⵃⴰⵔ ⴰⵎⴻⴵⴰⵃ ⴷⵉ ⵛⵛⴰⵔⵇ ^■   4 ⵓⵛⴰ ⴰⵢⵎⵉⵔ ⴰⴷ ⵉⵎⴻⵢⵢⴻⵍ ⵥⵉ ⵍⵊⴰⵏⵓⴱ ⵖⴰⵔ ⵜⵙⵓⵏⵜⴰ ⵏ ⵜⵖⴰⵔⴹⵎⵉⵡⵉⵏ ⵓⵛⴰ ⴰⴷ ⵉⵄⴷⵓ ⵖⴰⵔ ⵚⵉⵏ ⵓⵛⴰ ⵟⵟⵔⵓⴼⴰ ⵏⵏⴻⵙ ⴰⴷ ⴷⴷ-ⴰⵡⴹⴻⵏ ⵊⵊⵉⵀⴻⵜ ⵏ ⵍⵊⴰⵏⵓⴱ ⵏ ⵇⴰⴷⴰⵛ-ⴱⴰⵔⵏⵉⵄ ⵓⵛⴰ ⴰⴷ ⵉⵄⴷⵓ ⵖⴰⵔ ⵃⴰⵚⴰⵔ-ⴰⴷⴷⴰⵔ ⵓⵛⴰ ⴰⴷ ⵉⵥⵡⴰ ⵖⴰⵔ ⴰⵚⵎⵓⵏ. 5 ⴰⴷ ⵉⵏⵏⴻⴹ ⵡⴻⵢⵎⵉⵔ ⵥⵉ ⴰⵚⵎⵓⵏ ⵖⴰⵔ ⵜⴻⵖⵥⴰⵔⵜ ⵏ ⵎⵉⵚⵔⴰ ⵓⵛⴰ ⵟⵟⵔⵓⴼⴰ ⵏⵏⴻⵙ ⴰⴷ ⴰⵡⴹⴻⵏ ⴰⵍ ⵍⴻⴱⵃⴰⵔ.

6 ⵓⵛⴰ ⴰⵢⵎⵉⵔ ⵏ ⵍⵖⴰⵔⴱ ⴰⴷ ⴰⵡⴻⵎ ⵢⵉⵍⵉ ⵍⴻⴱⵃⴰⵔ ⴰⵎⴻⵇⵇⵔⴰⵏ. ⵡⴰ ⴰⴷ ⴰⵡⴻⵎ ⵢⵉⵍⵉ ⴷ ⴰⵢⵎⵉⵔ ⵏ ⵍⵖⴰⵔⴱ. ^□  

7 ⵡⴰ ⴰⴷ ⴰⵡⴻⵎ ⵢⵉⵍⵉ ⴷ ⴰⵢⵎⵉⵔ ⵏ ⵛⵛⴰⵎⴰⵍ: ⴰⴷ ⵜ ⵜⴰⵔⵛⵎⴻⵎ ⵉ ⵢⵉⵅⴻⴼ ⵏⵡⴻⵎ ⵥⴻⴳ ⵉⵍⵍ ⴰⴳⵔⴰⴽⴰⵍ ⴰⵍ ⴰⴷⵔⴰⵔ ⵏ ⵀⵓⵔ. 8 ⵣⴻⴳ ⵡⴻⴷⵔⴰⵔ ⵏ ⵀⵓⵔ ⴰⴷ ⵜ ⵜⴰⵔⵛⵎⴻⵎ ⴰⵍ ⵎⴰⵏⵉ ⵉ ⵖⴰ ⵜⴰⵡⴹⴻⴷ ⵖⴰⵔ ⵃⴰⵎⴰⵜ ⵓⵛⴰ ⵟⵟⵔⵓⴼⴰ ⵏ ⵡⴻⵢⵎⵉⵔ ⴰⴷ ⴰⵡⴹⴻⵏ ⴰⵍ ⵚⴰⴷⴰⴷ. 9 ⴰⴷ ⵢⴻⵄⴷⵓ ⵡⴻⵢⵎⵉⵔ ⴰⵍ ⵣⵉⴼⵔⵓⵏ ⵓⵛⴰ ⵟⵟⵔⵓⴼⴰ ⵏⵏⴻⵙ ⴰⴷ ⴰⵡⴹⴻⵏ ⴰⵍ ⵃⴰⵚⴰⵔ-ⵄⵉⵏⴰⵏ. ⵡⴰ ⴰⴷ ⴰⵡⴻⵎ ⵢⵉⵍⵉ ⴷ ⴰⵢⵎⵉⵔ ⵏ ⵛⵛⴰⵎⴰⵍ.

10 ⴰⴷ ⵜⴰⵔⵛⵎⴻⵎ ⴰⵢⵎⵉⵔ ⵏⵡⴻⵎ ⵏ ⵛⵛⴰⵔⵇ ⵥⵉ ⵃⴰⵚⴰⵔ-ⵄⵉⵏⴰⵏ ⵖⴰⵔ ⵛⴰⴼⴰⵎ

11 ⵓⵛⴰ ⴰⴷ ⴷⴷ-ⵉⵀⵡⴰ ⵡⴻⵢⵎⵉⵔ ⵥⵉ ⵛⴼⴰⵎ ⴰⵍ ⵔⵉⴱⵍⴰ, ⵛⵛⴰⵔⵇ ⵏ ⵄⴰⵢⵏ. ⵅⴻⵏⵏⵉ ⴰⴷ ⴷⴷ-ⵉⵀⵡⴰ ⵡⴻⵢⵎⵉⵔ ⵄⴰⴷ ⴽⵜⴰⵔ ⵓⵛⴰ ⴰⴷ ⵢⴰⵡⴻⴹ ⵖⴰⵔ ⵜⵎⴰ ⵏ ⵛⵛⴰⵔⵇ ⵏ ⵍⴻⴱⵃⴰⵔ ⵏ ⴽⵉⵏⵏⴰⵔⴰⵜ.

12 ⵓⵛⴰ ⴰⴷ ⴷⴷ-ⵉⵀⵡⴰ ⵡⴻⵢⵎⵉⵔ ⵖⴰⵔ ⵍ'ⵓⵔⴷⵓⵏ ⵓⵛⴰ ⵟⵟⵔⵓⴼⴰ ⵏⵏⴻⵙ ⴰⴷ ⴰⵡⴹⴻⵏ ⴰⵍ ⵍⴻⴱⵃⴰⵔ ⴰⵎⴻⴵⴰⵃ. ⵜⴰ ⴰⴷ ⴰⵡⴻⵎ ⵜⵉⵍⵉ ⴷ ⵜⴰⵎⵎⵓⵔⵜ ⴰⴽ-ⴷ ⵉⵢⵎⵉⵔⴻⵏ ⵏⵏⴻⵙ ⵉ ⴷ ⴰⵙ ⴷⴷ-ⵉⵏⵏⴹⴻⵏ.’ ”

13 ⵓⵛⴰ ⵎⵓⵙⴰ ⵢⵓⵎⵓⵔ ⴰⵢⵜ ⵏ ⵉⵙⵔⴰⵉⵍ, ⵉⵏⵏⴰ: “ⵜⴰ ⴷ ⵜⴰⵎⵎⵓⵔⵜ ⵏⵏⵉ ⵉ ⵖⴰ ⵜⴻⴱⴹⴰⵎ ⵊⴰⵔ ⴰⵡⴻⵎ ⵙ ⵜⵇⴻⴷⴷⵓⵃⵜ, ⵜⴻⵏⵏⵉ ⵅ ⵢⵓⵎⵓⵔ ⵙⵉⴷⵉ ⴰⴷ ⵜⴻⵎⵎⴻⵡⵛ ⵉ ⵜⴻⵙⵄⴰ ⵏ ⵜⵇⴻⴱⴱⴰⵍ ⵓ ⵄⴰⴷ ⵉ ⵡⴻⵥⵢⴻⵏ ⵏ ⵜⴻⵇⴱⵉⵞ ⵏ ⵎⴰⵏⴰⵙⵙⴰ.

14 ⵎⵉⵏⵥⵉ ⵜⴰⵇⴱⵉⵞ ⵏ ⵔⵓⴱⵉⵏ ⵜᵉⵜⵜⵡⴰⵙⴻⵜⵜⴻⴼ ⵄⵍⴰⵃⵙⴰⴱ ⵜⴰⴷⴷⴰⵔⵜ ⵏ ⵉⴱⴰⴱⴰⵜⴻⵏ ⵏⵙⴻⵏ ⵓ ⵜⴰⵇⴱⵉⵞ ⵏ ⵊⴰⴷ ⵜᵉⵜⵜⵡⴰⵙⴻⵜⵜⴻⴼ ⵄⵍⴰⵃⵚⴰⴱ ⵜⴰⴷⴷⴰⵔⵜ ⵏ ⵉⴱⴰⴱⴰⵜⴻⵏ ⵏⵙⴻⵏ, ⴰⵇⴰ ⵟⵟⴼⴻⵏ ⵜⴰⵙⵖⴰⵔⵜ ⵏⵙⴻⵏ, ⵓ ⴰⵥⵢⴻⵏ ⵏ ⵜⴻⵇⴱⵉⵞ ⵏ ⵎⴰⵏⴰⵙⵙⴰ ⵜᵉⵟⵟⴻⴼ ⵓⵍⴰ ⴷ ⵏⴻⵜⵜⴰⵜ ⵜⴰⵙⵖⴰⵔⵜ ⵏⵏⴻⵙ ⵏ ⵍⵡⴰⵔⵜ.

15 ⵜⵏⴰⵢⴻⵏ ⵏ ⵜⵇⴻⴱⴱⴰⵍ ⴷ ⵡⴻⵥⵢⴻⵏ ⴰⵇⴰ ⵟⵟⴼⴻⵏⵜ ⵍⵡⴰⵔⵜ ⵏⵙⴻⵏⵜ ⵖⴰⵔ ⵜⵎⴰ ⴰⵢⴰ ⵏ ⵍ'ⵓⵔⴷⵓⵏ, ⵥⵉ ⴰⵔⵉⵃⴰ ⵖⴰⵔ ⵛⵛⴰⵔⵇ ⵖⴰⵔ ⵎⴰⵏⵉⵙ ⴷⴷ-ⵜⵏⴻⵇⵇⴰⵔ ⵜⴼⵓⵛⵜ.”

16 ⵉⵙⵙⵉⵡⴻⵍ ⵙⵉⴷⵉ ⴰⴽ-ⴷ ⵎⵓⵙⴰ, ⵉⵏⵏⴰ:

17 “ⵉⵏⴰ ⴷ ⵉⵙⵎⴰⵡⴻⵏ ⵏ ⵢⴻⵔⵢⴰⵥⴻⵏ ⵉⵏⵏⵉ ⵉ ⵖⴰ ⵉⴱⴹⴰⵏ ⵜⴰⵎⵎⵓⵔⵜ ⵊⴰⵔ ⴰⵡⴻⵎ:

ⴰⴽⴻⵀⵀⴰⵏ ⴰⵍⵉⵄⴰⵥⴰⵔ ⴷ ⵢⴰⵛⵓⵡⴰ, ⵎⵎⵉⵙ ⵏ ⵏⵓⵏ. ^■  

18 ⴰⴷ ⵜⴻⴽⵙⵉⵎ ⵄⴰⵡⴻⴷ ⵉⵊⵊ ⵏ ⵓⵎⴻⵇⵇⵔⴰⵏ ⵥⵉ ⴽⵓⵍ ⵜⴰⵇⴱⵉⵞ ⵎⴰⵃⴻⵏⴷ ⴰⴷ ⵜⴻⴱⴹⴰⵎ ⵜⴰⵎⵎⵓⵔⵜ.

19 ⵉⵏⴰ ⴷ ⵉⵙⵎⴰⵡⴻⵏ ⵏ ⵢⴻⵔⵢⴰⵥⴻⵏ:

ⵉ ⵜⴻⵇⴱⵉⵞ ⵏ ⵢⴰⵀⵓⴷⴰ, ⴽⴰⵍⵉⴱ, ⵎⵎⵉⵙ ⵏ ⵢⴰⴼⵓⵏⵏⵉ

20 ⵉ ⵜⴻⵇⴱⵉⵞ ⵏ ⴰⵢⵜ ⵏ ⵛⵉⵎⵄⵓⵏ, ⵛⵉⵎⵓⵡⵉⵍ, ⵎⵎⵉⵙ ⵏ ⵄⴰⵎⵎⵉⵀⵓⴷ,

21 ⵉ ⵜⴻⵇⴱⵉⵞ ⵏ ⴱⵉⵏⵢⴰⵎⵉⵏ, ⵉⵍⵉⴷⴰⴷ, ⵎⵎⵉⵙ ⵏ ⴽⴰⵙⵍⵓⵏ,

22 ⵉ ⵜⴻⵇⴱⵉⵞ ⵏ ⴰⵢⵜ ⵏ ⴷⴰⵏ, ⴰⵎⴻⵇⵇⵔⴰⵏ ⴱⵓⵇⵇⵉ, ⵎⵎⵉⵙ ⵏ ⵢⵓⵊⵍⵉ,

23 ⵉ ⵜⴻⵇⴱⵉⵞ ⵏ ⴰⵢⵜ ⵏ ⵢⵓⵙⵓⴼ:

ⵉ ⵜⴻⵇⴱⵉⵞ ⵏ ⴰⵢⵜ ⵏ ⵎⴰⵏⴰⵙⵙⴰ, ⴰⵎⴻⵇⵇⵔⴰⵏ ⵃⴰⵏⵏⵉⵢⵉⵍ, ⵎⵎⵉⵙ ⵏ ⵉⴼⵓⴷ,

24 ⵉ ⵜⴻⵇⴱⵉⵞ ⵏ ⴰⵢⵜ ⵏ ⵉⴼⵔⴰⵢⵉⵎ, ⴰⵎⴻⵇⵇⵔⴰⵏ ⵇⵉⵎⵓⵢⵉⵍ, ⵎⵎⵉⵙ ⵏ ⵛⵉⴼⵟⴰⵏ,

25 ⵉ ⵜⴻⵇⴱⵉⵞ ⵏ ⴰⵢⵜ ⵏ ⵣⴰⴱⵓⵍⵓⵏ, ⴰⵎⴻⵇⵇⵔⴰⵏ ⵉⵍⵉⵚⴰⴼⴰⵏ, ⵎⵎⵉⵙ ⵏ ⴼⴰⵔⵏⴰⵅ,

26 ⵉ ⵜⴻⵇⴱⵉⵞ ⵏ ⴰⵢⵜ ⵏ ⵉⵙⵙⴰⴽⴰⵔ, ⴰⵎⴻⵇⵇⵔⴰⵏ ⴼⴰⵍⵟⵉⵢⵉⵍ, ⵎⵎⵉⵙ ⵏ ⵄⴰⵥⵥⴰⵏ,

27 ⵉ ⵜⴻⵇⴱⵉⵞ ⵏ ⴰⵢⵜ ⵏ ⴰⵛⵉⵔ, ⴰⵎⴻⵇⵇⵔⴰⵏ ⴰⵅⵉⵀⵓⴷ, ⵎⵎⵉⵙ ⵏ ⵛⴰⵍⵓⵎⵉ,

28 ⵉ ⵜⴻⵇⴱⵉⵞ ⵏ ⴰⵢⵜ ⵏ ⵏⴰⴼⵜⴰⵍⵉ, ⴰⵎⴻⵇⵇⵔⴰⵏ ⴼⴰⴷⴰⵀⵢⵉⵍ, ⵎⵎⵉⵙ ⵏ ⵄⴰⵎⵎⵉⵀⵓⴷ.”

29 ⵉⵏⴰ ⴷ ⵉⵏⵏⵉ ⵅ ⵢⵓⵎⵓⵔ ⵙⵉⴷⵉ ⴰⴷ ⴱⴹⴰⵏ ⵍⵡⴰⵔⵜ ⵉ ⴰⵢⵜ ⵏ ⵉⵙⵔⴰⵉⵍ ⴷⵉ ⵜⴻⵎⵎⵓⵔⵜ ⵏ ⴽⴻⵏⵄⴰⵏ.