1 ⴷⴻⴳ ⵓⵢⵓⵔ ⴰⵎⴻⵥⵡⴰⵔⵓ ⵜⵉⵡⴻⴹ ⵎⴰⵔⵔⴰ ⵜⴰⵎⴻⵙⵎⵓⵏⵜ ⵏ ⴰⵢⵜ ⵏ ⵉⵙⵔⴰⵉⵍ ⵖⴰⵔ ⵍⴻⵅⵍⴰ ⵏ ⵚⵉⵏ. ⵍⴳⴻⵏⵙ ⵉⵇⵇⵉⵎ ⴷⵉ ⵇⴰⴷⴰⵛ. ⴷⵉⵏ ⵉ ⵜⴻⵎⵎⵓⵜ ⵎⴰⵔⵢⴰⵎ ⵓⵛⴰ ⵏⴻⴹⵍⴻⵏ ⵜⵜ ⴷⵉⵏ.

2 ⵡⴰⵔ ⵜⵓⵖⵉ ⴷⵉⵏ ⴰⵎⴰⵏ ⵉ ⵜⵎⴻⵙⵎⵓⵏⵜ. ⵅⴻⵏⵏⵉ ⵎⵓⵏⴻⵏ ⴹⵉⴷⴷ ⵉ ⵎⵓⵙⴰ ⴷ ⵀⴰⵔⵓⵏ. 3 ⵜⵓⵖⴰ ⵍⴳⴻⵏⵙ ⵉⵎⵛⵓⴱⴱⴻⵛ ⴰⴽ-ⴷ ⵎⵓⵙⴰ, ⵏⵏⴰⵏ: “ⵎⵍⵉ ⵜⵓⵖⴰ ⵥⵥⴰⵢⵏⴻⵖ ⵉⴼⴼⴻⵖ ⴱⵓⵃⴱⴻⵍ ⵓⵎⵉ ⵜⵓⵖⴰ ⵉⴼⴼⴻⵖ ⴱⵓⵃⴱⴻⵍ ⵥⴻⴳ ⴰⵢⵜⵎⴰⵜⵏⴻⵖ ⵥⵥⴰⵜ ⵉ ⵡⵓⴷⴻⵎ ⵏ ⵙⵉⴷⵉ! ^■   4 ⵎⴰⵢⴻⵎⵎⵉ ⵜⴻⵙⵙⵉⴷⴼⴻⵎ ⵡⴻⴳⵔⴰⵡ ⵏ ⵍⴳⴻⵏⵙ ⵏ ⵙⵉⴷⵉ ⴷⵉ ⵍⴻⵅⵍⴰ ⴰⵢⴰ ⵎⴰⵃⴻⵏⴷ ⴰⴷ ⵎⵎⵜⴻⵏ ⴷⵉⵏ, ⵏⴻⵛⵛⵉⵏ ⴷ ⵍⴻⴱⵀⴰⵢⴻⵎ ⵏⵏⴻⵖ? 5 ⵓ ⵎⴰⵢⴻⵎⵎⵉ ⴷ ⴰⵏⴻⵖ ⴷⴷ-ⵜⴻⵙⵙⵉⵍⵢⴻⵎ ⵥⵉ ⵎⵉⵚⵔⴰ ⵃⵉⵎⴰ ⴰⴷ ⴰⵏⴻⵖ ⵜⴻⵙⵙⵉⵡⴹⴻⵎ ⵖⴰⵔ ⵡⴻⵎⵛⴰⵏ-ⴰ ⴰⵄⴻⴼⴼⴰⵏ? ⴷⴻⴳ ⵡⴻⵎⵛⴰⵏ-ⴰ ⵡⴰⵔ ⴷⵉⵏ ⵥⵥⴰⵔⵉⵄⴻⵜ ⵏⵉⵖ ⵜⴰⵥⴰⵔⵜ ⵏⵉⵖ ⵜⵥⴰⵢⴰⵔⵜ ⵏⵉⵖ ⴰⵔⴻⵎⵎⴰⵎ ⵓ ⵡⴰⵔ ⴷⵉⵏ ⵄⴰⴷ ⴰⵎⴰⵏ ⵃⵉⵎⴰ ⴰⴷ ⵏⵙⵓ.”

6 ⵅⴻⵏⵏⵉ ⵢⵉⵡⴻⴹ ⵎⵓⵙⴰ ⴰⴽ-ⴷ ⵀⴰⵔⵓⵏ ⵥⵉ ⵥⵥⴰⵜ ⵏ ⵡⵓⴷⴻⵎ ⵏ ⵡⴻⴳⵔⴰⵡ ⵏ ⵍⴳⴻⵏⵙ ⵖⴰⵔ ⵡⴰⴷⴰⴼ ⵏ ⵓⵇⵉⴹⵓⵏ ⵏ ⵓⵎⵙⴰⴳⴰⵔ ⵓⵛⴰ ⵡⴹⴰⵏ ⵅ ⵡⵓⴷⵎⴰⵡⴻⵏ ⵏⵙⴻⵏ ⵓⵛⴰ ⵉⴱⴰⵏ ⴰⵙⴻⵏ-ⴷⴷ ⵓⵄⵓⴵⵉ ⵏ ⵙⵉⴷⵉ. 7 ⵉⵙⵙⵉⵡⴻⵍ ⵙⵉⴷⵉ ⴰⴽ-ⴷ ⵎⵓⵙⴰ, ⵉⵏⵏⴰ:

8 “ⴽⵙⵉ ⵜⴰⵖⵖⴰⵔⵛⵜ ⵓⵛⴰ ⵙⵎⵓⵏ ⵜⴰⵎⴻⵙⵎⵓⵏⵜ, ⵛⴻⴽ ⴷ ⵀⴰⵔⵓⵏ, ⵓⵎⴰⵛ. ⵉⵜⵜⵅⴻⵚⵚⴰ ⴰⴷ ⵜⴻⵙⵙⵉⵡⵍⴻⵎ ⴰⴽ-ⴷ ⵜⴻⵚⴹⴰⵔⵜ ⵥⵥⴰⵜ ⵉ ⵜⵉⵟⵟⴰⵡⵉⵏ ⵏⵙⴻⵏ ⵓⵛⴰ ⵅⴻⵏⵏⵉ ⴰⴷ ⵜⴻⵡⵛ ⴰⵎⴰⵏ ⵏⵏⴻⵙ. ⴰⵎⵎⵓ ⵉ ⴳⴳⵓⵔ ⴰⴷ ⵜⴻⵙⵙⵓⴼⴼⵖⴻⵎ ⵉ ⵏⵉⵜⵏⵉ ⴰⵎⴰⵏ ⵥⵉ ⵜⴻⵚⴹⴰⵔⵜ ⵓⵛⴰ ⴰⴷ ⵜⴻⵙⵙⴻⵙⵙⵓⴷ ⵜⴰⵎⴻⵙⵎⵓⵏⵜ ⴷ ⵍⴻⴱⵀⴰⵢⴻⵎ.” ^■  

9 ⵅⴻⵏⵏⵉ ⵉⴽⵙⵉ ⵎⵓⵙⴰ ⵜⴰⵖⵖⴰⵔⵛⵜ ⵥⵉ ⵥⵥⴰⵜ ⵏ ⵡⵓⴷⴻⵎ ⵏ ⵙⵉⴷⵉ ⴰⵎ ⵎⴰⵎⵎⴻⵛ ⵉ ⴷ ⴰⵙ ⵢⵓⵎⵓⵔ ⵏⴻⵜⵜⴰ

10 ⵓⵛⴰ ⵉⵙⵙⵎⵓⵏ ⵎⵓⵙⴰ ⴷ ⵀⴰⵔⵓⵏ ⴰⴳⵔⴰⵡ ⵏ ⵍⴳⴻⵏⵙ ⵥⵥⴰⵜ ⵉ ⵡⵓⴷⴻⵎ ⵏ ⵜⴻⵚⴹⴰⵔⵜ. ⵏⴻⵜⵜⴰ ⵉⵏⵏⴰ ⴰⵙⴻⵏ: “ⵙⵍⴻⵎ ⵍⴻⵅⵅⵓ, ⴰ ⴽⴻⵏⵏⵉⵡ ⵉⵏⵏⵉ ⵉⵖⴻⵡⵡⵖⴻⵏ, ⵎⴰ ⵉⵜⵜⵅⴻⵚⵚⴰ ⴰⵏⴻⵖ ⴰⴷ ⴷⴷ-ⵏⴻⵙⵙⵓⴼⴼⴻⵖ ⴰⵎⴰⵏ ⵥⵉ ⵜⴻⵚⴹⴰⵔⵜ-ⴰ?” ^■  

11 ⵓⵛⴰ ⵉⵙⵙⴳⴻⵄⵄⴻⴷ ⵎⵓⵙⴰ ⴰⴼⵓⵙ ⵏⵏⴻⵙ ⵓⵛⴰ ⵉⵡⵜⴰ ⵜⴰⵚⴹⴰⵔⵜ ⵜⵏⴰⵢⴻⵏ ⵏ ⵜⵡⴰⵍⴰⵡⵉⵏ ⵙ ⵜⴰⵖⵖⴰⵔⵛⵜ ⵏⵏⴻⵙ ⵓⵛⴰ ⴼⴼⵖⴻⵏ-ⴷⴷ ⵥⵥⴰⵢⴻⵙ ⴰⵟⵟⴰⵙ ⵏ ⵡⴰⵎⴰⵏ ⵓⵛⴰ ⵜⴻⵙⵡⴰ ⵜⵎⴻⵙⵎⵓⵏⵜ ⴷ ⵍⴻⴱⵀⴰⵢⴻⵎ ⵏⵙⴻⵏ. ^■  

12 ⵅⴻⵏⵏⵉ ⵉⵏⵏⴰ ⵙⵉⴷⵉ ⵉ ⵎⵓⵙⴰ ⴷ ⵀⴰⵔⵓⵏ: “ⵎⵉⵏⵥⵉ ⴽⴻⵏⵏⵉⵡ ⵡⴰⵔ ⴷ ⴰⵢⵉ ⵜᵉⵜⵜⵉⵇⵇⴻⵎ ⴰⵍ ⴷ ⴰⵢⵉ ⵖⴰ ⵜⵡⴻⵇⵇⴰⵔⴻⵎ ⵙ ⵓⵡⴻⵇⵇⴰⵔ ⵉⵇⴻⴷⴷⵙⴻⵏ ⵥⵥⴰⵜ ⵉ ⵜⵉⵟⵟⴰⵡⵉⵏ ⵏ ⴰⵢⵜ ⵏ ⵉⵙⵔⴰⵉⵍ, ⵅ ⵓⵢⴰ ⵡⴰⵔ ⵜⴻⵙⵙⵉⴷⵉⴼⴻⵎ ⴰⴳⵔⴰⵡ-ⴰ ⵏ ⵍⴳⴻⵏⵙ ⴷⵉ ⵜⴻⵎⵎⵓⵔⵜ ⵏⵏⵉ ⴷ ⴰⵙⴻⵏ ⵡⵛⵉⵖ.” ^■  

13 ⵉⵏⴰ ⴰⵇⴰ ⴷ ⴰⵎⴰⵏ ⵏ ⵎⴰⵔⵉⴱⴰ ⵅ ⵎⵉⵏ ⵅⴻⴼ ⵎⵛⵓⴱⴱⵛⴻⵏ ⴰⵢⵜ ⵏ ⵉⵙⵔⴰⵉⵍ ⴰⴽ-ⴷ ⵙⵉⴷⵉ ⵓ ⵎⴰⵏⵉ ⵏⴻⵜⵜⴰ ⵉⵙⵙⵛⴻⵏ ⵉⵅⴻⴼ ⵏⵏⴻⵙ ⴷ ⴰⵎⵇⴻⴷⴷⴻⵙ ⵊⴰⵔ ⴰⵙⴻⵏ.

14 ⵉⵙⵙⴻⴽⴽ ⵎⵓⵙⴰ ⵉⵔⴻⵇⵇⴰⵙⴻⵏ ⵥⵉ ⵇⴰⴷⴰⵛ ⵖⴰⵔ ⵓⵊⴻⴵⵉⴷ ⵏ ⵉⴷⵓⵎ, ⵏⵏⴰⵏ: “ⴰⵎⵎⵓ ⵉ ⵉⵇⵇⴰⵔ ⵉⵙⵔⴰⵉⵍ, ⵓⵎⴰⵛ: ‘ⵛⴻⴽ ⵜⴻⵙⵙⵏⴻⴷ ⵎⴰⵔⵔⴰ ⵜⴰⵎⴰⵔⴰ ⵏⵏⵉ ⵅⴰⵏⴻⵖ ⵉⴽⴽⵉⵏ, ^■  

15 ⴰⵇⴰ ⵉⴱⴰⴱⴰⵜⴻⵏ ⵏⵏⴻⵖ ⵀⵡⴰⵏ-ⴷⴷ ⵖⴰⵔ ⵎⵉⵚⵔⴰ ⵓ ⵜⵓⵖⴰ ⵏⵥⴻⴷⴷⴻⵖ ⴰⵟⵟⴰⵙ ⵏ ⵉⵙⴻⴳⴳⵯⵓⵙⴰ ⴷⵉ ⵎⵉⵚⵔⴰ ⵓ ⵉⵎⵉⵚⵔⵉⵢⵢⴻⵏ ⴳⴳⵉⵏ ⴷⴰⵢⵏⴻⵖ ⵓ ⴷⵉ ⵉⴱⴰⴱⴰⵜⴻⵏ ⵏⵏⴻⵖ ⴰⵟⵟⴰⵙ ⵏ ⵍⵖⴰⵔ.

16 ⵏⵍⴰⵖⴰ ⵅ ⵙⵉⴷⵉ ⵓⵛⴰ ⵏⴻⵜⵜⴰ ⵉⵙⵍⴰ ⵜⵎⵉⵊⵊⴰ ⵏⵏⴻⵖ ⵓⵛⴰ ⵉⵙⵙⴻⴽⴽ-ⴷⴷ ⵍⵎⴰⵍⴰⴽ ⵓⵛⴰ ⵉⵙⵙⵓⴼⴼⴻⵖ ⴰⵏⴻⵖ-ⴷⴷ ⵥⵉ ⵎⵉⵚⵔⴰ. ⵅⵥⴰⵔ, ⴰⵇⴰ ⴰⵏⴻⵖ ⴷⵉ ⵇⴰⴷⴰⵛ, ⵉⵛⵜ ⵏ ⵜⴻⵏⴷⵉⵏⵜ ⵖⴰⵔ ⵟⵟⴰⵔⴼ ⵏ ⵊⵊⵉⵀⴻⵜ ⵏⵏⴻⴽ. ^■  

17 ⴻⵊⵊ ⴰⵏⴻⵖ, ⵎⴰⵍⴰ ⵜⴻⵅⵙⴻⴷ, ⴰⴷ ⵏⴻⵥⵡⴰ ⵅ ⵜⴻⵎⵎⵓⵔⵜ ⵏⵏⴻⴽ. ⵡⴰⵔ ⵏⵥⴻⴽⴽⵡⵉ ⵅ ⵉⵢⵢⴰⵔⴻⵏ ⵏⵉⵖ ⵅ ⵉⵎⴰⵔⵊⴰⵄⴻⵏ ⵏ ⵓⴹⵉⵍ ⵏⵏⴻⴽ ⵓ ⵡⴰⵔ ⵏⵙⴻⵙⵙ ⴰⵎⴰⵏ ⵥⴻⴳ ⵡⴰⵏⵓⵜⴻⵏ. ⵅ ⵡⴻⴱⵔⵉⴷ ⵉⴳⴻⵍⵍⴷⴻⵏ ⴰⴷ ⵏⴻⵄⴷⵓ ⴱⵍⴰ ⵎⴰ ⴰⴷ ⵏⵃⴻⵢⵢⴻⴷ ⵖⴰⵔ ⵢⴻⴼⴼⵓⵙ ⵓⵍⴰ ⵖⴰⵔ ⵓⵥⴻⵍⵎⴰⴹ, ⴰⵍ ⵖⴰ ⵏⴻⵄⴷⵓ ⵄⴰⵡⴻⴷ ⵉⵢⵎⵉⵔⴻⵏ ⵏ ⵜⴻⵎⵎⵓⵔⵜ ⵏⵏⴻⴽ.’ ”

18 ⵉⵏⵏⴰ ⴰⵙ ⵉⴷⵓⵎ: “ⵡⴰⵔ ⵜⵜⵥⴻⴽⴽⵯⵉⵎ ⵅⴰⴼⵉ, ⵏⵉⵖ ⴰⴽ ⴽⵉⵛ ⵎⵎⵙⴰⴳⴰⵔⴻⵖ ⵙ ⵙⵙⵉⴼ ⴱⴰⵍⴰⴽ!”

19 ⵅⴻⵏⵏⵉ ⵏⵏⴰⵏ ⴰⵙ ⴰⵢⵜ ⵏ ⵉⵙⵔⴰⵉⵍ: “ⴰⴷ ⵏⴻⴹⴼⴰⵔ ⴰⴱⵔⵉⴷ ⴰⵎⴻⵇⵇⵔⴰⵏ ⵓ ⵎⴰⵍⴰ ⴰⴷ ⵙⵡⴻⵖ ⴰⵎⴰⵏ ⵏⵏⴻⴽ, ⵏⴻⵛⵛ ⴷ ⵍⴻⴱⵀⴰⵢⴻⵎ ⵉⵏⵓ, ⴰⴷ ⵜⴻⵏ ⵅⴻⴵⵚⴻⵖ. ⴰⴷ ⵜⵜ ⵥⵡⵉⵖ ⵅ ⵉⴹⴰⵔⴻⵏ ⴷ ⵡⴻⵏⵏⵉ ⵏⴻⵜⵜⴰ ⵡⴰⵀⴰ.”

20 ⵎⴰⵛⴰ ⵏⴻⵜⵜⴰ ⵉⵏⵏⴰ: “ⵡⴰⵔ ⵅⴰⵙ ⵜⵥⴻⴽⴽⵯⵉⴷ!” ⵓⵛⴰ ⵉⴼⴼⴻⵖ ⵉⴷⵓⵎ ⵎⴰⵃⴻⵏⴷ ⴰⴷ ⴽⵉⵙ ⵉⵎⵙⴰⴳⴰⵔ ⵙ ⵢⵉⵊⵊ ⵏ ⵓⴱⴰⵔⵔⵓ ⴷ ⴰⵎⴻⵇⵇⵔⴰⵏ ⴷ ⵓⴼⵓⵙ ⵉⵊⴻⵀⴷⴻⵏ. 21 ⴰⵎⵎⵓ ⵢⵓⴳⵉ ⵉⴷⵓⵎ ⴰⴷ ⵉⵡⵛ ⵜⵜⴻⵙⵔⵉⵃ ⵉ ⵉⵙⵔⴰⵉⵍ ⵎⴰⵃⴻⵏⴷ ⴰⴷ ⵉⵥⵡⴰ ⴰⵢⵎⵉⵔ ⵏⵏⴻⵙ. ⵙ ⵓⵢⴻⵏⵏⵉ ⵉ ⵉⵊⵊⴰ ⵉⵙⵔⴰⵉⵍ ⴰⴱⵔⵉⴷ ⴷⵉ ⵙⵙⵉⴱⴱⴻⵜ ⵏⵏⴻⵙ. ^■  

22 ⴼⴻⵙⵢⴻⵏ ⵉⵇⵉⴹⴰⵏ ⵏⵙⴻⵏ, ⴼⴼⵖⴻⵏ ⵥⵉ ⵇⴰⴷⴰⵛ ⵓⵛⴰ ⵉⵡⴹⴻⵏ ⴰⵢⵜ ⵏ ⵉⵙⵔⴰⵉⵍ ⵖⴰⵔ ⵡⴻⴷⵔⴰⵔ ⵏ ⵀⵓⵔ, ⵜⴰⵎⴻⵙⵎⵓⵏⵜ ⵎⴰⵔⵔⴰ. ^■   23 ⵉⵙⵙⵉⵡⴻⵍ ⵙⵉⴷⵉ ⴰⴽ-ⴷ ⵎⵓⵙⴰ ⴷ ⵀⴰⵔⵓⵏ ⵖⴰⵔ ⵡⴻⴷⵔⴰⵔ ⵏ ⵀⵓⵔ, ⵖⴰⵔ ⵡⴻⵢⵎⵉⵔ ⵏ ⵜⴻⵎⵎⵓⵔⵜ ⵏ ⵉⴷⵓⵎ, ⵉⵏⵏⴰ:

24 “ⴰⴷ ⵉⵜⵜⵡⴰⵙⵎⵓⵏ ⵀⴰⵔⵓⵏ ⴰⴽ-ⴷ ⵍⴻⵊⴷⵓⴷ ⵏⵏⴻⵙ, ⵎⵉⵏⵥⵉ ⵡⴰⵔ ⵉⵜⵜⵉⴷⴻⴼ ⵖⴰⵔ ⵜⴻⵎⵎⵓⵔⵜ ⵏⵏⵉ ⵡⵛⵉⵖ ⵉ ⴰⵢⵜ ⵏ ⵉⵙⵔⴰⵉⵍ, ⵎⵉⵏⵥⵉ ⴽⴻⵏⵏⵉⵡ ⵜⵖⴻⵏⵏⴰⵏⴻⵎ ⵅ ⵍⵓⵎⵓⵔ ⵉⵏⵓ ⵖⴰⵔ ⵡⴰⵎⴰⵏ ⵏ ⵎⴰⵔⵉⴱⴰ. 25 ⴽⵙⵉ ⵀⴰⵔⵓⵏ ⴷ ⴰⵍⵉⵄⴰⵥⴰⵔ, ⵎⵎⵉⵙ, ⵓⵛⴰ ⴰⵔⵔ ⵉ-ⵜⴻⵏ ⴰⴷ ⴳⴻⵄⵄⴷⴻⵏ ⵅ ⵡⴻⴷⵔⴰⵔ ⵏ ⵀⵓⵔ. ^■   26 ⵄⴰⵔⵔⴰ ⵀⴰⵔⵓⵏ ⵥⴻⴳ ⵡⴰⵔⵔⵓⴹ ⵏⵏⴻⵙ ⵓⵛⴰ ⵙⵢⴰⵔⴹ ⵉ-ⵜⴻⵏ ⵉ ⴰⵍⵉⵄⴰⵥⴰⵔ, ⵎⵎⵉⵙ. ⵅⴻⵏⵏⵉ ⴰⴷ ⵉⵜⵜⵡⴰⴽⵙⵉ ⵀⴰⵔⵓⵏ ⵓⵛⴰ ⴰⴷ ⵉⵎⵎⴻⵜ ⴷⵉⵏ.”

27 ⵎⵓⵙⴰ ⵉⴳⴳⴰ ⴰⵎ ⵎⴰⵎⵎⴻⵛ ⵉ ⴷ ⴰⵙ ⵢⵓⵎⵓⵔ ⵙⵉⴷⵉ. ⵓⵍⵢⴻⵏ ⴰⴷⵔⴰⵔ ⵏ ⵀⵓⵔ ⵥⵥⴰⵜ ⵉ ⵜⵉⵟⵟⴰⵡⵉⵏ ⵏ ⵎⴰⵔⵔⴰ ⵜⴰⵎⴻⵙⵎⵓⵏⵜ. 28 ⵎⵓⵙⴰ ⵉⵄⴰⵔⵔⴰ ⵀⴰⵔⵓⵏ ⵥⴻⴳ ⵡⴰⵔⵔⵓⴹ ⵏⵏⴻⵙ ⵓⵛⴰ ⵉⵙⵙⵢⴰⵔⴹ ⵉ-ⵜ ⵉ ⴰⵍⵉⵄⴰⵥⴰⵔ, ⵎⵎⵉⵙ. ⵓⵛⴰ ⵉⵎⵎⵓⵜ ⵀⴰⵔⵓⵏ ⴷⵉⵏ ⵅ ⵜⵇⵉⵛⵛⴰⵜ ⵏ ⵡⴻⴷⵔⴰⵔ. ⵅⴻⵏⵏⵉ ⵉⵀⵡⴰ-ⴷⴷ ⵎⵓⵙⴰ ⵥⴻⴳ ⵡⴻⴷⵔⴰⵔ ⴰⴽ-ⴷ ⴰⵍⵉⵄⴰⵥⴰⵔ. ^■   29 ⵎⴰⵔⵔⴰ ⵜⴰⵎⴻⵙⵎⵓⵏⵜ ⵜⴻⵥⵔⴰ ⴱⴻⵍⵍⵉ ⵀⴰⵔⵓⵏ ⵉⴹⵍⴻⵇ ⵉ ⴱⵓⵃⴱⴻⵍ ⵏⵏⴻⵙ ⵓⵛⴰ ⵔⵓⵏ ⵜⵍⴰⵜⵉⵏ ⵏ ⵡⵓⵙⵙⴰⵏ ⴷⵉ ⵙⵙⵉⴱⴱⴻⵜ ⵏ ⵀⴰⵔⵓⵏ, ⵎⴰⵔⵔⴰ ⵜⴰⴷⴷⴰⵔⵜ ⵏ ⵉⵙⵔⴰⵉⵍ.