ⵊⵊⵔⵉⵃⴻⵛⵜ ⵉⵏⴻⵇⵇⴻⵏ
17
1 ⵉⵙⵙⵉⵡⴻⵍ ⵙⵉⴷⵉ ⴰⴽ-ⴷ ⵎⵓⵙⴰ, ⵉⵏⵏⴰ: 2 “ⵉⵏⵉ ⵉ ⴰⵍⵉⵄⴰⵥⴰⵔ, ⵎⵎⵉⵙ ⵏ ⵓⴽⴻⵀⵀⴰⵏ ⵀⴰⵔⵓⵏ, ⴱⴻⵍⵍⵉ ⴰⴷ ⵉⴽⵙⵉ ⵜⵉⵎⴻⵊⵎⴰⵔⵉⵏ ⵥⴻⴳ ⵓⵃⴰⴷⵓⵇ ⵏ ⵜⵎⴻⵙⵙⵉ ⵓⵛⴰ ⴰⴷ ⵉⵙⵙⵓⵢⴻⵙ ⵍⴻⴼⵃⴻⵎ ⵉⵜⵜⴻⵃⴷⵓⴷⵓⵇⴻⵏ ⴷⵉ ⵍⴰⴳⴳⵯⴰⵊ, ⵎⵉⵏⵥⵉ ⴰⵇⴰ ⵏⵉⵜⴻⵏⵜⵉ ⵇⴻⴷⴷⵙⴻⵏⵜ ⵉ ⴵⴰⵏⵜ! 3 ⵊⵊⴻⵎ ⴰⵙⴻⵏ ⴰⴷ ⵜⴽⴻⵜⴽⴻⵏ ⵜⵉⵎⴻⵊⵎⴰⵔⵉⵏ ⵏ ⵢⴻⵔⵢⴰⵥⴻⵏ ⵏⵏⵉ ⵜⵓⵖⴰ ⵉⵅⴻⵟⵟⴰⵏ ⴹⵉⴷⴷ ⵉ ⵍⴻⵄⵎⵓⵔ ⵏⵙⴻⵏ, ⵜⵉⵍⵡⵉⵃⵉⵏ ⴷ ⵜⵉⵥⵉⵔⴰⵔⵉⵏ ⵉ ⴷⴷⵓⵔⵉ ⵉ ⵓⵄⴰⵍⵟⴰⵔ, ⵎⵉⵏⵥⵉ ⵙⵙⵇⴰⵔⵔⴱⴻⵏ-ⴷⴷ ⵜⴻⵏⵜ ⵥⵥⴰⵜ ⵉ ⵡⵓⴷⴻⵎ ⵏ ⵙⵉⴷⵉ, ⵙ ⵓⵢⴰ ⵉ ⵥⵉ ⵜⵜⵡⴰⵇⴻⴷⴷⵙⴻⵏⵜ. ⴰⴷ ⵉⵍⵉⵏⵜ ⴷ ⵉⵊⵊ ⵏ ⵓⵛⴻⵢⵢⴰⵔ ⵉ ⴰⵢⵜ ⵏ ⵉⵙⵔⴰⵉⵍ. 4 ⵅⴻⵏⵏⵉ ⵉⴽⵙⵉ ⵓⴽⴻⵀⵀⴰⵏ ⴰⵍⵉⵄⴰⵥⴰⵔ ⵜⵉⵎⴻⵊⵎⴰⵔⵉⵏ ⵏ ⵏⵏⵃⴰⵙ ⵏⵏⵉ ⴷⴷ-ⵙⵙⵇⴰⵔⵔⴱⴻⵏ ⵉⵏⵏⵉ ⵉⵜⵜⵡⴰⵛⴻⵎⴹⴻⵏ ⴰⵎ ⵜⴻⵡⵀⵉⴱⵜ, ⵓⵛⴰ ⵜⴽⴻⵜⴽⴻⵏ ⵜⴻⵏⵜ ⵃⵉⵎⴰ ⴰⴷ ⵥⵥⴰⵢⵙⴻⵏⵜ ⴷⵍⴻⵏⵜ ⴰⵄⴰⵍⵟⴰⵔ, 5 ⵉ ⵍⵉⴷⴰⵔⴻⵜ ⵉ ⴰⵢⵜ ⵏ ⵉⵙⵔⴰⵉⵍ, ⵃⵉⵎⴰ ⵓⵍⴰ ⴷ ⵉⵊⵊ ⵏ ⵡⴻⵔⵢⴰⵥ ⵏⵏⵉ ⵡⴰⵔ ⵉⴵⵉⵏ ⵥⵉ ⵥⵥⴰⵔⵉⵄⴻⵜ ⵏ ⵀⴰⵔⵓⵏ, ⵡⴰⵔ ⴷⴷ-ⵉⵜⵜⵇⴰⵔⵔⵉⴱ ⵛⴰ ⴱⵍⴰ ⵜⵜⴻⵙⵔⵉⵃ ⵥⵥⴰⵜ ⵉ ⵡⵓⴷⴻⵎ ⵏ ⵙⵉⴷⵉ, ⵃⵉⵎⴰ ⴰⴷ ⵉⵙⵙⴱⴻⵅⵅⴰⵔ ⵍⴻⴱⵅⵓⵔ ⵎⴰⵃⴻⵏⴷ ⵡⴰⵔ ⴷ ⴰⵙ ⵉⵍⵇⴻⴼ ⵎⵉⵏ ⵉⵍⴻⵇⴼⴻⵏ ⵇⵓⵔⴰⵃ ⴷ ⵓⴱⴰⵔⵔⵓ ⵏⵏⴻⵙ, ⴰⵎ ⵎⴰⵎⵎⴻⵛ ⵜⵓⵖⴰ ⵉⵙⵙⵉⵡⴻⵍ ⵙⵉⴷⵉ ⵙ ⵓⵇⴻⵎⵎⵓⵎ ⵏ ⵎⵓⵙⴰ.
6 ⵜⵉⵡⴻⵛⵛⴰ ⵏⵏⴻⵙ ⵜⵓⵖⴰ ⵎⴰⵔⵔⴰ ⵜⴰⵎⴻⵙⵎⵓⵏⵜ ⵏ ⴰⵢⵜ ⵏ ⵉⵙⵔⴰⵉⵍ ⵜᵉⵜⵜⵏⴻⴷⵇⴰⵎ ⴹⵉⴷⴷ ⵉ ⵎⵓⵙⴰ ⴷ ⵀⴰⵔⵓⵏ, ⵏⵏⴰⵏ: “ⴽⴻⵏⵏⵉⵡ ⵜⴻⵏⵖⵉⵎ ⵍⴳⴻⵏⵙ ⵏ ⵙⵉⴷⵉ!” 7 ⵓⵛⴰ ⵓⵎⵉ ⵜⵎⵓⵏ ⵜⵎⴻⵙⵎⵓⵏⵜ ⴹⵉⴷⴷ ⵉ ⵎⵓⵙⴰ ⴷ ⵀⴰⵔⵓⵏ ⵓⵛⴰ ⴱⴷⴰⵏ ⵓⵢⵓⵔⴻⵏ ⵖⴰⵔ ⵓⵇⵉⴹⵓⵏ ⵏ ⵓⵎⵙⴰⴳⴰⵔ, ⵅⵥⴰⵔ, ⴰⵇⴰ ⴰⵙⴻⵢⵏⵓ ⵡⴻⵏⵏⵉ ⵜ ⵉⴷⵍⵉⵏ ⵓⵛⴰ ⵉⴱⴰⵏ-ⴷⴷ ⵓⵄⵓⴵⵉ ⵏ ⵙⵉⴷⵉ. 8 ⵢⵓⵙⴰ-ⴷⴷ ⵎⵓⵙⴰ ⴰⴽ-ⴷ ⵀⴰⵔⵓⵏ, ⴱⴻⴷⴷⴻⵏ ⵥⵥⴰⵜ ⵉ ⵓⵇⵉⴹⵓⵏ ⵏ ⵓⵎⵙⴰⴳⴰⵔ.
9 ⵉⵙⵙⵉⵡⴻⵍ ⵙⵉⴷⵉ ⴰⴽ-ⴷ ⵎⵓⵙⴰ, ⵉⵏⵏⴰ:
10 “ⴽⴽⴰⵔⴻⵎ, ⴰⴳⴳⵯⴻⵊⴻⵎ ⵥⵉ ⵍⵡⴻⵙⵜ ⵏ ⵜⵎⴻⵙⵎⵓⵏⵜ ⵓ ⵏⴻⵛⵛ ⴰⴷ ⵜⴻⵏ ⵎⵃⵉⵖ ⴷⴻⴳ ⵉⵊⵊ ⵏ ⵡⴻⵔⵎⴰⵛ ⵏ ⵡⴰⴱⵍⵉⵡⴻⵏ!” ⵅⴻⵏⵏⵉ ⵡⴹⴰⵏ ⵅ ⵡⵓⴷⴻⵎ ⵏⵙⴻⵏ.
11 ⵉⵏⵏⴰ ⵎⵓⵙⴰ ⵉ ⵀⴰⵔⵓⵏ: “ⴽⵙⵉ ⴷⴻⵖⵢⴰ ⵉⵊⵊ ⵏ ⵍⵎⴻⵊⵎⴰⵔ, ⴻⴳⴳ ⵅⴰⵙ ⵜⵉⵎⴻⵙⵙⵉ ⵏ ⵓⵄⴰⵍⵟⴰⵔ ⵓⵛⴰ ⵙⴰⵔⵙ ⵅⴰⵙ ⵍⴻⴱⵅⵓⵔ. ⴰⵥⵥⴻⵍ ⵖⴰⵔ ⵜⵎⴻⵙⵎⵓⵏⵜ ⵓⵛⴰ ⴼⴷⵉ ⵅⴰⵙⴻⵏ, ⵎⵉⵏⵥⵉ ⵉⴼⴼⴻⵖ-ⴷⴷ ⵓⴷⵓⵇⵇⴻⵥ ⵏ ⵡⴻⵖⴹⴰⴱ ⵥⵉ ⵥⵥⴰⵜ ⵉ ⵡⵓⴷⴻⵎ ⵏ ⵙⵉⴷⵉ, ⴰⵇⴰ ⴷⴰ ⵊⵊⵔⵉⵃⴻⵛⵜ ⴰⵎ ⵜⴻⴱⴷⴰ ⵄⴰⴷ.”
12 ⵉⴽⵙⵉ ⵀⴰⵔⵓⵏ ⵍⵎⴻⵊⵎⴰⵔ, ⴰⵎ ⵎⴰⵎⵎⴻⵛ ⵉⵏⵏⴰ ⵎⵓⵙⴰ, ⵓⵛⴰ ⵢⵓⵥⵥⴻⵍ ⵖⴰⵔ ⵍⵡⴻⵙⵜ ⵏ ⵡⴻⴳⵔⴰⵡ ⵏ ⵍⴳⴻⵏⵙ, ⵓⵛⴰ ⵅⵥⴰⵔ, ⵊⵊⵔⵉⵃⴻⵛⵜ ⵜⵓⵖⴰ ⴰⵎ ⵜⴻⴱⴷⴰ ⵄⴰⴷ ⵊⴰⵔ ⵍⴳⴻⵏⵙ ⵓⵛⴰ ⵏⴻⵜⵜⴰ ⵉⵙⵙⴰⵔⵙ ⴷⴰⵢⴻⵙ ⵍⴻⴱⵅⵓⵔ ⵓⵛⴰ ⵉⴼⴷⵉ ⵅ ⵍⴳⴻⵏⵙ. □
13 ⵜⵓⵖⴰ ⵉⴱⴻⴷⴷ ⵊⴰⵔ ⵉⵎⴻⵜⵜⴰⵏ ⴷ ⵉⵎⴻⴷⴷⴰⵔⴻⵏ ⵓⵛⴰ ⵜᵉⵜⵜⵡⴰⵙⴱⴻⴷⴷ ⵊⵊⵔⵉⵃⴻⵛⵜ.
14 ⵡⵉ ⵉⵎⵎⵓⵜⴻⵏ ⵥⵉ ⵊⵊⵔⵉⵃⴻⵛⵜ ⵜⵓⵖⴰ ⴰⵜⴻⵏ ⴷⵉ ⴰⵔⴱⴻⵄⵟⴰⵛ-ⴰⵍⴻⴼ ⵓ-ⵙⴻⴱⵄⴰ-ⵎⵢⴰ, ⴱⵍⴰ ⵉⵏⵏⵉ ⵉⵎⵎⵓⵜⴻⵏ ⴷⵉ ⵙⵙⵉⴱⴱⴻⵜ ⵏ ⵇⵓⵔⴰⵃ.
15 ⵉⴷⵡⴻⵍ ⵀⴰⵔⵓⵏ ⵖⴰⵔ ⵎⵓⵙⴰ ⵖⴰⵔ ⵡⴰⴷⴰⴼ ⵏ ⵓⵇⵉⴹⵓⵏ ⵏ ⵓⵎⵙⴰⴳⴰⵔ. ⴰⵇⴰ ⵜᵉⵜⵜⵡⴰⵙⴱⴻⴷⴷ ⵊⵊⵔⵉⵃⴻⵛⵜ.
ⴰⵄⵎⵓⴷ ⵉⵥⵥⴻⵢⵥⵓⵢⴻⵏ ⵏ ⵀⴰⵔⵓⵏ
16 ⵉⵙⵙⵉⵡⴻⵍ ⵙⵉⴷⵉ ⴰⴽ-ⴷ ⵎⵓⵙⴰ, ⵉⵏⵏⴰ:
17 “ⵙⵉⵡⴻⵍ ⴰⴽ-ⴷ ⴰⵢⵜ ⵏ ⵉⵙⵔⴰⵉⵍ ⵓⵛⴰ ⴽⵙⵉ ⵥⵥⴰⵢⵙⴻⵏ ⵉⵊⵊ ⵏ ⵡⴻⵄⵎⵓⴷ ⵉ ⴽⵓⵍ ⵜⴰⴷⴷⴰⵔⵜ ⵏ ⵉⴱⴰⴱⴰⵜⴻⵏ ⵏⵙⴻⵏ, ⵥⵉ ⵎⴰⵔⵔⴰ ⵉⵎⵖⴰⵔⴻⵏ ⵏⵙⴻⵏ, ⵄⵍⴰⵃⵙⴰⴱ ⵍⵄⴰⴷⴰⴷ ⵏ ⵜⵓⴷⵔⵉⵏ ⵏ ⵉⴱⴰⴱⴰⵜⴻⵏ ⵏⵙⴻⵏ, ⵜⴻⵏⵄⴰⵛ ⵏ ⵉⵄⵓⵎⴰⴷ. ⵉⵜⵜⵅⴻⵚⵚⴰ ⴰⴷ ⵜⴰⵔⵉⴷ ⵉⵙⴻⵎ ⵏ ⴽⵓⵍ ⵉⵊⵊ ⵥⵥⴰⵢⵙⴻⵏ ⵅ ⵡⴻⵄⵎⵓⴷ ⵏⵏⴻⵙ.
18 ⴰⴷ ⵜⴰⵔⵉⴷ ⵉⵙⴻⵎ ⵏ ⵀⴰⵔⵓⵏ ⵅ ⵡⴻⵄⵎⵓⴷ ⵏ ⵍⴰⵡⵉ, ⵎⵉⵏⵥⵉ ⴰⴷ ⴷⵉⵏ ⵢⵉⵍⵉ ⵉⵊⵊ ⵏ ⵡⴻⵄⵎⵓⴷ ⵉ ⵢⵉⵊⵊ ⵏ ⵓⵥⴻⴵⵉⴼ ⵏ ⵜⴰⴷⴷⴰⵔⵜ ⵏ ⵉⴱⴰⴱⴰⵜⴻⵏ ⵏⵙⴻⵏ.
19 ⴰⴷ ⵜⴻⵏ ⵜⴻⴳⴳⴻⴷ ⴷⴻⴳ ⵓⵇⵉⴹⵓⵏ ⵏ ⵓⵎⵙⴰⴳⴰⵔ, ⵥⵥⴰⵜ ⵉ ⵛⵛⵀⴰⴷⴻⵜ, ⵎⴰⵏⵉ ⴽⵉⴷⵡⴻⵎ ⵉ ⵖⴰ ⵎⵙⴰⴳⴰⵔⴻⵖ. ■ 20 ⵅⴻⵏⵏⵉ ⴳⴳⵓⵔ ⴰⴷ ⵉⵎⵙⴰⵔ, ⴰⵇⴰ ⴰⴷ ⵉⵏⵓⵡⵡⴰⵔ ⵡⴻⵄⵎⵓⴷ ⵏ ⵡⴻⵔⵢⴰⵥ ⵏⵏⵉ ⵉⵅⴹⴰⵔⴻⵖ ⵏⴻⵛⵛ ⵓⵛⴰ ⴰⴷ ⵙⵙⴱⴻⴷⴷⴻⵖ ⴰⵏⴻⴷⵇⴻⵎ ⴹⵉⴷⴷ ⵉⵏⵓ ⵉ ⵥⵉ ⵅⴰⵡⴻⵎ ⵏⵏⴷⴻⵇⵎⴻⵏ ⴰⵢⵜ ⵏ ⵉⵙⵔⴰⵉⵍ.”
21 ⵉⵙⵙⵉⵡⴻⵍ ⵎⵓⵙⴰ ⴰⴽ-ⴷ ⴰⵢⵜ ⵏ ⵉⵙⵔⴰⵉⵍ ⵓⵛⴰ ⵎⴰⵔⵔⴰ ⵉⵎⵖⴰⵔⴻⵏ ⵏⵙⴻⵏ ⵡⵛⵉⵏ ⵉⵊⵊ ⵏ ⵡⴻⵄⵎⵓⴷ ⵉ ⵎⴽⵓⵍ ⵉⵊⵊ ⵏ ⵓⵎⵖⴰⵔ, ⵄⵍⴰⵃⵙⴰⴱ ⵍⵇⴻⴷⴷ ⵏ ⵜⵓⴷⵔⵉⵏ ⵏ ⵉⴱⴰⴱⴰⵜⴻⵏ ⵏⵙⴻⵏ, ⵜⴻⵏⵄⴰⵛ ⵏ ⵉⵄⵓⵎⴰⴷ. ⵓⵛⴰ ⴰⵄⵎⵓⴷ ⵏ ⵀⴰⵔⵓⵏ ⵜⵓⵖⴰ-ⵜ ⵊⴰⵔ ⵉⵄⵓⵎⴰⴷ ⵏⵙⴻⵏ. 22 ⵎⵓⵙⴰ ⵉⵙⵙⴰⵔⵙ ⵉⵄⵓⵎⴰⴷ ⵏⵏⵉ ⵥⵥⴰⵜ ⵉ ⵡⵓⴷⴻⵎ ⵏ ⵙⵉⴷⵉ ⴷⴻⴳ ⵓⵇⵉⴹⵓⵏ ⵏ ⵛⵛⵀⴰⴷⴻⵜ. 23 ⵜⵉⵡⴻⵛⵛⴰ ⵏⵏⴻⵙ ⵉⵎⵙⴰⵔ ⴱⴻⵍⵍⵉ ⵢⵓⴷⴻⴼ ⵎⵓⵙⴰ ⵖⴰⵔ ⵓⵇⵉⴹⵓⵏ ⵏ ⵛⵛⵀⴰⴷⴻⵜ, ⵓⵛⴰ ⵅⵥⴰⵔ, ⴰⵄⵎⵓⴷ ⵏ ⵀⴰⵔⵓⵏ ⴷⵉ ⵟⵟⵡⴻⵄ ⵏ ⵜⴰⴷⴷⴰⵔⵜ ⵏ ⵍⴰⵡⵉ ⵜⵓⵖⴰ ⵉⴳⴳⴰ ⵜⴰⵎⵔⵉⵙⵜ ⵏ ⵓⵖⴻⵎⵎⵓⵢ ⵓⵛⴰ ⵜⴰⵎⵔⵉⵙⵜ ⵜⴻⵙⵙⵓⴼⴼⴻⵖ-ⴷⴷ ⵓⵛⴰ ⵏⵏⵓⵡⵡⴰⵔ ⵏⵏⴻⵙ ⵢⴰⵔⵥⴻⵎ ⵓⵛⴰ ⵢⵉⵡⵉ-ⴷⴷ ⴵⵓⵥ ⵢⵉⵡⴹⴻⵏ. 24 ⵅⴻⵏⵏⵉ ⵉⵙⵙⵓⴼⴼⴻⵖ ⵎⵓⵙⴰ ⵎⴰⵔⵔⴰ ⵉⵄⵓⵎⴰⴷ ⵥⵉ ⵥⵥⴰⵜ ⵉ ⵡⵓⴷⴻⵎ ⵏ ⵙⵉⴷⵉ ⵖⴰⵔ ⵎⴰⵔⵔⴰ ⴰⵢⵜ ⵏ ⵉⵙⵔⴰⵉⵍ. ⵥⵔⵉⵏ ⴰⵢⴰ ⵓⵛⴰ ⵟⵟⴼⴻⵏ ⴽⵓⵍ ⵉⵊⵊ ⴰⵄⵎⵓⴷ ⵏⵏⴻⵙ.
25 ⵅⴻⵏⵏⵉ ⵉⵏⵏⴰ ⵙⵉⴷⵉ ⵉ ⵎⵓⵙⴰ: “ⴰⵔⵔ ⴰⵄⵎⵓⴷ ⵏ ⵀⴰⵔⵓⵏ ⵥⵥⴰⵜ ⵉ ⵛⵛⵀⴰⴷⴻⵜ, ⴰⴷ ⵜ ⵜⴻⵃⴹⵉⴷ ⴰⵎ ⵉⵊⵊ ⵏ ⵓⵛⴻⵢⵢⴰⵔ ⴹⵉⴷⴷ ⵉ ⵢⴻⵏⵏⵉ ⵉⵖⴻⵡⵡⵖⴻⵏ. ⴰⵎⵎⵓ ⵉ ⵖⴰ ⵜⴻⵙⵙⴱⴻⴷⴷⴻⴷ ⴰⵏⴻⴷⵇⴻⵎ ⵏⵙⴻⵏ ⴹⵉⴷⴷ ⵉⵏⵓ ⵎⴰⵃⴻⵏⴷ ⵏⵉⵜⵏⵉ ⵡⴰⵔ ⵜⵜⵎⴻⵜⵜⵉⵏ ⵛⴰ.” ■ 26 ⵓⵛⴰ ⵉⴳⴳⴰ ⵎⵓⵙⴰ ⴰⵎ ⵎⴰⵎⵎⴻⵛ ⴷ ⴰⵙ ⵢⵓⵎⵓⵔ ⵙⵉⴷⵉ, ⴰⵎⵎⵓ ⵉⴳⴳⴰ ⵏⴻⵜⵜⴰ. 27 ⵅⴻⵏⵏⵉ ⵙⵙⵉⵡⵍⴻⵏ ⴰⵢⵜ ⵏ ⵉⵙⵔⴰⵉⵍ ⴰⴽ-ⴷ ⵎⵓⵙⴰ, ⵏⵏⴰⵏ: “ⵅⵥⴰⵔ, ⴰⴷ ⵥⵥⴰⵢⵏⴻⵖ ⵉⴼⴼⴻⵖ ⴱⵓⵃⴱⴻⵍ, ⴰⴷ ⵏⴻⵜⵜⵡⴰⵀⴻⵍⵍⴻⴽ, ⴰⴷ ⵏⴻⵜⵜⵡⴰⵀⴻⵍⵍⴻⴽ ⵎⴰⵔⵔⴰ ⵏⴻⵛⵛⵉⵏ! 28 ⵎⴰⵏ ⵡⴻⵏ ⵎⴰ ⵉ ⴷⴷ ⵖⴰ ⵉⵇⴰⵔⵔⴱⴻⵏ ⵖⴰⵔ ⵓⵇⵉⴹⵓⵏ ⵏ ⵙⵉⴷⵉ, ⴰⴷ ⵉⵎⵎⴻⵜ. ⵎⴰ ⴰⴷ ⵏⴻⵜⵜⵡⴰⵜⴻⵃⵃⴰ ⴰⵍ ⵥⵥⴰⵢⵏⴻⵖ ⵉⴼⴼⴻⵖ ⴱⵓⵃⴱⴻⵍ?”