1 ⵉⵙⵙⵉⵡⴻⵍ ⵙⵉⴷⵉ ⴰⴽ-ⴷ ⵎⵓⵙⴰ, ⵉⵏⵏⴰ:

2 “ⵙⴻⴽⴽ ⵉⵔⵢⴰⵥⴻⵏ ⵥⵥⴰⵜⴻⴽ ⵃⵉⵎⴰ ⴰⴷ ⴱⴻⵔⴳⴳⴻⵏ ⵜⴰⵎⵎⵓⵔⵜ ⵏ ⴽⴻⵏⵄⴰⵏ, ⵜⴻⵏⵏⵉ ⵉ ⵖⴰ ⵡⵛⴻⵖ ⵉ ⴰⵢⵜ ⵏ ⵉⵙⵔⴰⵉⵍ. ⵣⵉ ⴽⵓⵍ ⵜⴰⵇⴱⵉⵞ ⵏ ⵉⴱⴰⴱⴰⵜⴻⵏ ⴰⴷ ⵜⴻⵙⵙⴻⴽⴽⴻⵎ ⵉⵊⵊ ⵏ ⵡⴻⵔⵢⴰⵥ, ⴽⵓⵍ ⵉⵊⵊ ⴰⴷ ⵢⵉⵍⵉ ⴷ ⴰⵎⵖⴰⵔ ⵊⴰⵔ ⴰⵙⴻⵏ. ^□   3 ⵎⵓⵙⴰ ⵉⵙⵙⴻⴽⴽ ⵉ-ⵜⴻⵏ ⴷⵉ ⵍⴻⵅⵍⴰ ⵏ ⴼⴰⵔⴰⵏ, ⵅ ⵍⵓⵎⵓⵔ ⵏ ⵙⵉⴷⵉ. ⵜⵓⵖⴰ ⵎⴰⵔⵔⴰ ⵉⵔⵢⴰⵥⴻⵏ ⴷ ⵉⵥⴻⴵⵉⴼⴻⵏ ⵏ ⴰⵢⵜ ⵏ ⵉⵙⵔⴰⵉⵍ. 4 ⴰⵇⴰ ⴷ ⵉⵏⴰ ⴷ ⵉⵙⵎⴰⵡⴻⵏ ⵏⵙⴻⵏ:

ⵣⵉ ⵜⴻⵇⴱⵉⵞ ⵏ ⵔⵓⴱⵉⵏ, ⵛⴰⵎⵎⵓⵄ, ⵎⵎⵉⵙ ⵏ ⵣⴰⴽⴽⵓⵔ.

5 ⵣⵉ ⵜⴻⵇⴱⵉⵞ ⵏ ⵛⵉⵎⵄⵓⵏ, ⵛⴰⴼⴰⵜ, ⵎⵎⵉⵙ ⵏ ⵃⵓⵔⵉ.

6 ⵣⵉ ⵜⴻⵇⴱⵉⵞ ⵏ ⵢⴰⵀⵓⴷⴰ, ⴽⴰⵍⵉⴱ, ⵎⵎⵉⵙ ⵏ ⵢⴰⴼⵓⵏⵏⵉ.

7 ⵣⵉ ⵜⴻⵇⴱⵉⵞ ⵏ ⵉⵙⵙⴰⴽⴰⵔ, ⵢⵉⵊⵄⴰⵍ, ⵎⵎⵉⵙ ⵏ ⵢⵓⵙⵓⴼ.

8 ⵣⵉ ⵜⴻⵇⴱⵉⵞ ⵏ ⵉⴼⵔⴰⵢⵉⵎ, ⵀⵓⵛⴰⵄ, ⵎⵎⵉⵙ ⵏ ⵏⵓⵏ. ^□  

9 ⵣⵉ ⵜⴻⵇⴱⵉⵞ ⵏ ⴱⵉⵏⵢⴰⵎⵉⵏ, ⴼⴰⵍⵟⵉ, ⵎⵎⵉⵙ ⵏ ⵔⴰⴼⵓ.

10 ⵣⵉ ⵜⴻⵇⴱⵉⵞ ⵏ ⵣⴰⴱⵓⵍⵓⵏ, ⵊⴰⴷⴷⵉⵢⵉⵍ, ⵎⵎⵉⵙ ⵏ ⵙⵓⴷⵉ.

11 ⵣⵉ ⵜⴻⵇⴱⵉⵞ ⵏ ⵢⵓⵙⵓⴼ, ⵉ ⵜⴻⵇⴱⵉⵞ ⵏ ⵎⴰⵏⴰⵙⵙⴰ, ⵊⴰⴷⴷⵉ, ⵎⵎⵉⵙ ⵏ ⵙⵓⵙⵉ.

12 ⵣⵉ ⵜⴻⵇⴱⵉⵞ ⵏ ⴷⴰⵏ, ⵄⴰⵎⵎⵉⵢⵉⵍ, ⵎⵎⵉⵙ ⵏ ⵊⴰⵎⴰⵍⵍⵉ.

13 ⵣⵉ ⵜⴻⵇⴱⵉⵞ ⵏ ⴰⵛⵉⵔ, ⵙⴰⵜⵓⵔ, ⵎⵎⵉⵙ ⵏ ⵎⵉⵅⴰⵢⵉⵍ.

14 ⵣⵉ ⵜⴻⵇⴱⵉⵞ ⵏ ⵏⴰⴼⵜⴰⵍⵉ, ⵏⴰⵀⴱⵉ, ⵎⵎⵉⵙ ⵏ ⵡⴰⴼⵙⵉ.

15 ⵣⵉ ⵜⴻⵇⴱⵉⵞ ⵊⴰⴷ, ⵊⴰ’ⵓⵢⵉⵍ, ⵎⵎⵉⵙ ⵏ ⵎⴰⴽⵉ.

16 ⴰⵇⴰ ⵉⵏⴰ ⴷ ⵉⵙⵎⴰⵡⴻⵏ ⵏ ⵢⴻⵔⵢⴰⵥⴻⵏ ⵏⵏⵉ ⵉⵙⵙⴻⴽⴽ ⵎⵓⵙⴰ ⵃⵉⵎⴰ ⴰⴷ ⴱⴻⵔⴳⴰⴳⴻⵏ ⵜⴰⵎⵎⵓⵔⵜ ⵓⵛⴰ ⵎⵓⵙⴰ ⵉⵍⴰⵖⴰ ⵉ ⵀⵓⵛⵉⵄⴰ, ⵎⵎⵉⵙ ⵏ ⵏⵓⵏ, ⵙ ⵢⵉⵙⴻⵎ ⵏ ⵢⴰⵛⵓⵡⴰ.

17 ⵉⵙⵙⴻⴽⴽ ⵉ-ⵜⴻⵏ ⵎⵓⵙⴰ ⵃⵉⵎⴰ ⴰⴷ ⴱⴻⵔⴳⴰⴳⴻⵏ ⵜⴰⵎⵎⵓⵔⵜ ⵏ ⴽⴻⵏⵄⴰⵏ, ⵉⵏⵏⴰ ⴰⵙⴻⵏ: “ⴰⵍⵢⴻⵎ ⵙⵙⵉⵀⴰ ⴰⵍ ⵜⴰⵎⵎⵓⵔⵜ ⵏ ⵍⵊⴰⵏⵓⴱ ⵓⵛⴰ ⴰⵍⵢⴻⵎ ⵅⴻⵏⵏⵉ ⵖⴰⵔ ⵉⴷⵓⵔⴰⵔ

18 ⵓⵛⴰ ⵅⵥⴰⵔⴻⵎ ⵎⴰⵎⵎⴻⵛ ⵜⴻⴵⴰ ⵜⴻⵎⵎⵓⵔⵜ ⴷ ⵍⴳⴻⵏⵙ ⵉ ⴷⴰⵢⴻⵙ ⵉⵥⴻⴷⴷⵖⴻⵏ, ⵎⴰ ⵉⵊⵀⴻⴷ ⵏⵉⵖ ⵉⴹⵄⴻⴼ ⵉ ⵢⴻⴵⴰ, ⵎⴰ ⴰⵇⴰ ⴷⵉⵏ ⴷⵔⵓⵙ ⵏⵉⵖ ⴰⵟⵟⴰⵙ.

19 ⵅⵥⴰⵔⴻⵎ ⵎⴰⵎⵎⴻⵛ ⵜⴻⴵⴰ ⵜⴰⵎⵎⵓⵔⵜ ⵉ ⴷⵉ ⵉⵥⴻⴷⴷⴻⵖ ⵍⴳⴻⵏⵙ, ⵎⴰ ⵜⴰⵎⵎⵓⵔⵜ ⴷ ⵜⴰⵚⴻⴱⵃⴰⵏⵜ ⵏⵉⵖ ⴷ ⵜⴰⵄⴻⴼⴼⴰⵏⵜ ⵉ ⵜⴻⴵⴰ, ⵓ ⵎⴰⵎⵎⴻⵛ ⴵⴰⵏⵜ ⵜⵏⴻⴷⴷⴰⵎ ⵉ ⴷⵉ ⵉⵥⴻⴷⴷⴻⵖ ⵍⴳⴻⵏⵙ, ⵎⴰ ⵥⴻⴷⴷⵖⴻⵏ ⴷⵉ ⵍⴻⵎⵔⴰⴳⴻⵃ ⵏ ⵉⵇⵉⴹⴰⵏ ⵏⵉⵖ ⴷⵉ ⵜⵏⴻⴷⴷⴰⵎ ⵉⴼⴰⵔⵢⴻⵏ ⵙ ⵉⵖⴻⴱⵍⴰⵡⴻⵏ. 20 ⵓ ⵄⴰⵡⴻⴷ ⵎⴰⵎⵎⴻⵛ ⵜⴻⴵⴰ ⵜⴻⵎⵎⵓⵔⵜ, ⵎⴰ ⵜⴻⵙⵙⵖⴻⵎⵎⵉ ⵏⵉⵖ ⵜⵓⵥⴻⵖ, ⵎⴰ ⴰⵇⴰ ⴷⵉⵏ ⵜⵉⵛⴻⵊⵊⵓⵔⴰ ⵏⵉⵖ ⵍⵍⴰ. ⴳⴳⴻⵎ ⵜⴰⵔⵢⴰⵙⵜ ⵓⵛⴰ ⴽⵙⵉⵎ ⵛⴰ ⵥⵉ ⵍⵖⵉⴵⴻⵜ ⵏ ⵜⴻⵎⵎⵓⵔⵜ. ⵓⵙⵙⴰⵏ ⵏⵏⵉ ⵜⵓⵖⴰ ⴰⵜⴻⵏ ⴷ ⵓⵙⵙⴰⵏ ⵏ ⵜⵎⴻⵏⵥⵓⵜ ⵏ ⵓⴹⵉⵍ. 21 ⵓⵛⴰ ⵏⵉⵜⵏⵉ ⴳⴻⵄⵄⴷⴻⵏ ⵓⵛⴰ ⴱⴻⵔⴳⴰⴳⴻⵏ ⵜⴰⵎⵎⵓⵔⵜ ⵥⵉ ⵍⴻⵅⵍⴰ ⵏ ⵚⵉⵏ ⴰⵍ ⵔⴰⵃⵓⴱ, ⵎⴰⵏⵉ ⵉ ⵖⴰ ⵜⵉⵡⴹⴻⴷ ⵖⴰⵔ ⵃⴰⵎⴰⵜ. 22 ⴳⴰⵄⵄⴷⴻⵏ ⵄⴰⴷ ⴽⵜⴰⵔ ⵖⴰⵔ ⵜⴻⵎⵎⵓⵔⵜ ⵏ ⵍⵊⴰⵏⵓⴱ ⵓⵛⴰ ⵉⵡⴹⴻⵏ ⵖⴰⵔ ⵃⴰⴱⵔⵓⵏ. ⴷⵉⵏⵏⵉ ⵉ ⵜⵓⵖⴰ ⴰⵅⵉⵎⴰⵏ, ⵛⵉⵛⴰⵢ ⴷ ⵜⴰⵍⵎⴰⵢ, ⵏⵉⵜⵏⵉ ⴷ ⵉⵃⴻⵏⵊⵉⵔⴻⵏ ⵏ ⵄⴰⵏⴰⵇ. ⵃⴰⴱⵔⵓⵏ ⵜⵓⵖⴰ ⵜᵉⵜⵜⵡⴰⴱⵏⴰ ⵙⴻⴱⵄⴰ ⵏ ⵉⵙⴻⴳⴳⵯⵓⵙⴰ ⵇⴱⴻⵍ ⵚⵓⵄⴰⵏ ⴷⵉ ⵎⵉⵚⵔⴰ. 23 ⵅⴻⵏⵏⵉ ⵉⵡⴹⴻⵏ ⴰⵍ ⵜⴰⵖⵥⵓⵔⵜ ⵏ ⴰⵛⴽⵓⵍ ⵓⵛⴰ ⵙⵙⴻⵏⵏⵉ ⴽⴽⵙⴻⵏ ⵉⵛⵜ ⵏ ⵜⴻⵥⵔⴻⵎⵜ ⵙ ⵢⵉⵊⵊ ⵏ ⵓⵥⴻⴽⴽⵓⵏ ⵏ ⵓⴹⵉⵍ ⵡⴻⵏⵏⵉ ⴷⴷ-ⵉⵡⵢⴻⵏ ⵙ ⵜⵏⴰⵢⴻⵏ ⵙ ⵢⵉⵊⵊ ⵏ ⵓⵥⴻⴵⴰⴹ ⵏ ⵜⵔⴻⴱⴱⵓⵜ. ⴽⴽⵙⴻⵏ ⵄⴰⵡⴻⴷ ⵥⴻⴳ ⴰⵔⴻⵎⵎⴰⵎ ⵓ ⵥⵉ ⵜⴰⵥⴰⵔⵜ. ^□   24 ⵇⵇⴰⵔⴻⵏ ⴰⵙ ⵉ ⵡⴻⵎⵛⴰⵏ ⵏⵏⵉ ‘ⵜⴰⵖⵥⵓⵔⵜ ⵏ ⵜⴻⵖⵥⴰⵔⵜ ⵏ ⵉⵛⴽⵓⵍ’, ⵉⵙⴻⵎ ⵡⴰⵏⵉⵜⴰ ⵉⵅⵙ ⴰⴷ ⵢⵉⵏⵉ ‘ⵜⴰⵖⵥⵓⵔⵜ ⵏ ⵓⵥⴻⴽⴽⵓⵏ’, ⴷⵉ ⵙⵙⵉⴱⴱⴻⵜ ⵏ ⵓⵥⴻⴽⴽⵓⵏ ⵏ ⵓⴹⵉⵍ ⵏⵏⵉ ⵇⴻⵙⵙⴻⵏ ⴰⵢⵜ ⵏ ⵉⵙⵔⴰⵉⵍ ⴷⵉⵏ.

25 ⵓⵎⵉ ⴽⴻⵎⵎⵍⴻⵏ ⴰⵔⴻⴱⵄⵉⵏ ⵏ ⵡⵓⵙⵙⴰⵏ, ⴷⴻⵡⵍⴻⵏ-ⴷⴷ ⵥⴻⴳ ⵓⴱⴻⵔⴳⴰⴳ ⵏ ⵜⴻⵎⵎⵓⵔⵜ. 26 ⵄⴻⵇⴱⴻⵏ ⵏⵉⵜⵏⵉ ⵓⵛⴰ ⵓⵙⵉⵏ-ⴷⴷ ⵖⴰⵔ ⵎⵓⵙⴰ ⴷ ⵀⴰⵔⵓⵏ ⵓ ⵖⴰⵔ ⵎⴰⵔⵔⴰ ⵜⴰⵎⴻⵙⵎⵓⵏⵜ ⵏ ⴰⵢⵜ ⵏ ⵉⵙⵔⴰⵉⵍ ⴷⵉ ⵍⴻⵅⵍⴰ ⵏ ⴼⴰⵔⴰⵏ, ⵖⴰⵔ ⵇⴰⴷⴰⵛ, ⵓⵛⴰ ⵡⵛⵉⵏ ⵍⴻⵅⴱⴰⵔ ⵉ ⵎⴰⵔⵔⴰ ⵜⴰⵎⴻⵙⵎⵓⵏⵜ ⵓⵛⴰ ⵙⵙⴻⵛⵏⴻⵏ ⴰⵙⴻⵏ ⵍⵖⵉⴵⴻⵜ ⵏ ⵜⴻⵎⵎⵓⵔⵜ. ^□   27 ⵃⴰⵊⴰⵏ ⴰⵙ ⵓⵛⴰ ⵏⵏⴰⵏ: “ⴰⵇⴰ ⵏⵓⴷⴻⴼ ⵖⴰⵔ ⵜⴻⵎⵎⵓⵔⵜ ⵏⵏⵉ ⵎⴰⵏⵉ ⴷⴷ ⴰⵏⴻⵖ ⵜⴻⵙⵙⴻⴽⴽⴻⴷ. ⵙ ⵜⵉⴷⴻⵜⵜ ⵜⴼⴻⵢⵢⴻⴹ ⵙ ⵓⵖⵉ ⴷ ⵜⴰⵎⵎⴻⵏⵜ ⵓ ⵜⴰⵏⵉⵜⴰ ⴷ ⵍⵖⵉⴵⴻⵜ ⵏⵏⴻⵙ. ^■   28 ⵎⴰⵛⴰ ⵍⴳⴻⵏⵙ, ⵏⵏⵉ ⵉⵥⴻⴷⴷⵖⴻⵏ ⴷⵉ ⵜⴻⵎⵎⵓⵔⵜ, ⵉⵊⵀⴻⴷ ⵓ ⵜⵉⵏⴻⴷⴷⴰⵎ ⵖⴰⵔⵙⴻⵏⵜ ⵉⵖⴻⴱⵔⴰⵡⴻⵏ ⵓ ⵎⵖⴰⵔⴻⵏⵜ ⴰⵟⵟⴰⵙ ⵓ ⵏⴻⵥⵔⴰ ⵄⴰⵡⴻⴷ ⴷⵉⵏ ⴰⵔⵔⴰⵡ ⵏ ⵄⴰⵏⴰⵇ. 29 ⵉⵄⴰⵎⴰⵍⵉⵇⵉⵢⵢⴻⵏ ⵥⴻⴷⴷⵖⴻⵏ ⴷⵉ ⵜⴻⵎⵎⵓⵔⵜ ⵏ ⵍⵊⴰⵏⵓⴱ ⵏ ⵜⴻⵎⵎⵓⵔⵜ ⵓ ⵉⵃⵉⵜⵜⵉⵢⵢⴻⵏ ⴷ ⵉⵢⴰⴱⵓⵙⵉⵢⵢⴻⵏ ⴷ ⵉⵎⵓⵔⵉⵢⵢⴻⵏ ⵥⴻⴷⴷⵖⴻⵏ ⴷⴻⴳ ⵉⴷⵓⵔⴰⵔ ⵓ ⵉⴽⴻⵏⵄⴰⵏⵉⵢⵢⴻⵏ ⵥⴻⴷⴷⵖⴻⵏ ⵖⴰⵔ ⵍⴻⴱⵃⴰⵔ ⵓ ⵅ ⵜⵎⴰ ⵏ ⵍ'ⵓⵔⴷⵓⵏ. 30 ⵅⴻⵏⵏⵉ ⵉⵙⵙⴻⵙⵇⴰⵔ ⴽⴰⵍⵉⴱ ⵍⴳⴻⵏⵙ ⵥⵥⴰⵜ ⵉ ⵎⵓⵙⴰ, ⵉⵏⵏⴰ: “ⴻⵊⵊ ⴰⵏⴻⵖ ⴰⴷ ⵏⴳⴻⵄⵄⴻⴷ ⵙ ⵊⵊⴻⵀⴷ ⵓⵛⴰ ⴰⴷ ⵜⵜ ⵏⴻⵟⵟⴻⴼ ⴷ ⵍⵡⴰⵔⵜ, ⵎⵉⵏⵥⵉ ⵏⵥⴻⵎⵎⴰⵔ ⴰⵙ ⵏⴻⵛⵛⵉⵏ!” 31 ⵉⵔⵢⴰⵥⴻⵏ ⵏⵏⵉ ⴳⴻⵄⵄⴷⴻⵏ ⴰⴽⵉⴷⴻⵙ, ⵏⵏⴰⵏ: “ⵡⴰⵔ ⵏⵥⴻⵎⵎⴰⵔ ⴰⴷ ⵏⴳⴻⵄⵄⴻⴷ ⴹⵉⴷⴷ ⵉ ⵍⴳⴻⵏⵙ ⵏⵏⵉ, ⵎⵉⵏⵥⵉ ⴰⵇⴰ ⵉⵊⵀⴻⴷ ⵅⴰⵏⴻⵖ ⴰⵟⵟⴰⵙ.” 32 ⴰⵎⵎⵓ ⵉ ⴷⴷ-ⵉⵡⵢⴻⵏ ⵉⵊⵊ ⵏ ⵍⴻⵅⴱⴰⵔ ⵡⴰⵔ ⵉⵃⵍⵉⵏ ⵉ ⴰⵢⵜ ⵏ ⵉⵙⵔⴰⵉⵍ ⵅ ⵜⴻⵎⵎⵓⵔⵜ ⵏⵏⵉ ⵅ ⵜⵓⵖⴰ ⵜⵜⴱⴻⵔⴳⴰⴳⴻⵏ, ⵏⵏⴰⵏ: “ⵜⴰⵎⵎⵓⵔⵜ ⵅ ⵎⴰⵏⵉⵙ ⵏⴻⴽⴽⴰ ⵃⵉⵎⴰ ⴰⴷ ⵜⵜ ⵏⴱⴻⵔⴳⴻⴳ, ⴰⵇⴰ ⴷ ⵉⵛⵜ ⵏ ⵜⴻⵎⵎⵓⵔⵜ ⵏⵏⵉ ⵜⵙⴰⵔⵔⴻⴹ ⵉⵎⴻⵥⴷⴰⵖ ⵏⵏⴻⵙ ⵓⵛⴰ ⵎⴰⵔⵔⴰ ⵉⵡⴷⴰⵏ ⵏⵏⵉ ⵏⴻⵥⵔⴰ, ⴰⵇⴰ ⴰⵜⴻⵏ ⴷ ⵉⵔⵢⴰⵥⴻⵏ ⵏ ⵡⴰⴷⴷⴰⴷ ⵉⵎⵖⴰⵔ. 33 ⴰⵇⴰ ⵏⴻⵥⵔⴰ ⴷⵉⵏ ‘ⵏⵉⴼⵉⵍⵉⵎ’, ⵉⵅⵙ ⴰⴷ ⵢⵉⵏⵉ ‘ⵊⵊⵡⴰⵀⴻⵍ ⵉⵡⴹⴰⵏ’, ⴰⵢⵜ ⵏ ⵄⴰⵏⴰⵇ, ⴰⵔⵔⴰⵙⴰ ⵏ ⵊⵊⵡⴰⵀⴻⵍ ⵉⵡⴹⴰⵏ, ⵓⵛⴰ ⵜⵓⵖⴰ ⵏⴻⵛⵛⵉⵏ ⴷⵉ ⵜⵉⵟⵟⴰⵡⵉⵏ ⵏⵏⴻⵖ ⴰⵎⴻⵛⵏⴰⵡ ⵜⴰⵎⵓⵔⵖⵉ, ⵓⵛⴰ ⴰⵎⵎⵓ ⵉ ⴷⴷ ⴰⵙⴻⵏ ⵏⴻⵜⵜⴱⴰⵏ ⴷⵉ ⵜⵉⵟⵟⴰⵡⵉⵏ ⵏⵙⴻⵏ.” ^□