1 ⵉⵙⵙⵉⵡⴻⵍ ⵙⵉⴷⵉ ⴰⴽ-ⴷ ⵎⵓⵙⴰ ⴷⵉ ⵍⴻⵅⵍⴰ ⵏ ⵙⵉⵏⴰ ⴷⴻⴳ ⵓⵙⴻⴳⴳⵯⴰⵙ ⵡⵉⵙⵙ ⵜⵏⴰⵢⴻⵏ ⴰⵡⴰⵔⵏⵉ ⵍⴰⵎⵉ ⴼⴼⵖⴻⵏ ⵥⵉ ⵜⴻⵎⵎⵓⵔⵜ ⵏ ⵎⵉⵚⵔⴰ, ⴷⴻⴳ ⵓⵢⵓⵔ ⴰⵎⴻⵥⵡⴰⵔⵓ, ⵉⵏⵏⴰ:

2 “ⵊⵊⴻⵎ ⴰⵢⵜ ⵏ ⵉⵙⵔⴰⵉⵍ ⴰⴷ ⵙⵙⵡⴻⵊⴷⴻⵏ ⵜⴰⵖⴰⵔⵚⵜ ⵏ ⵓⵙⴻⵄⴷⵓ ⴷⵉ ⵍⵡⴻⵇⵜ ⵏⵏⴻⵙ ⵉⵜⵜⵡⴰⴳⴳⴻⵏ. ^■   3 ⴷⴻⴳ ⵡⴰⵙⵙ ⵡⵉⵙⵙ ⴰⵔⴱⴻⵄⵟⴰⵛ ⵏ ⵓⵢⵓⵔ-ⴰ, ⵊⴰⵔ ⴱⴻⴷⴷⵓ ⵏ ⵡⴻⵥⵢⴻⵏ ⵏ ⵡⴰⵙⵙ ⴰⵍ ⴷⴷ-ⵜⴻⵡⴹⴰ ⵜⵎⴻⴷⴷⵉⵜ, ⵉⵜⵜⵅⴻⵚⵚⴰ ⴰⴷ ⵜⵜ ⵜⴻⵙⵙⵡⴻⵊⴷⴻⵎ ⴷⵉ ⵍⵡⴻⵇⵜ ⵏⵏⴻⵙ ⵉⵜⵜⵡⴰⴳⴳⴻⵏ. ⵉⵜⵜⵅⴻⵚⵚⴰ ⴰⴷ ⵜⵜ ⵜⴻⵙⵙⵡⴻⵊⴷⴻⵎ ⵄⵍⴰⵃⵙⴰⴱ ⵎⴰⵔⵔⴰ ⵜⵉⵡⴻⵚⵚⴰ ⴷ ⵍⴼⴰⵔⴰⵢⵉⴹ ⵏⵏⴻⵙ.”

4 ⵉⵙⵙⵉⵡⴻⵍ ⵎⵓⵙⴰ ⴰⴽ-ⴷ ⴰⵢⵜ ⵏ ⵉⵙⵔⴰⵉⵍ, ⵉⵏⵏⴰ ⵉⵜⵜⵅⴻⵚⵚⴰ ⴰⵙⴻⵏ ⴰⴷ ⵙⵙⵡⴻⵊⴷⴻⵏ ⵜⴰⵖⴰⵔⵚⵜ ⵏ ⵓⵙⴻⵄⴷⵓ. 5 ⵓⵛⴰ ⵏⵉⵜⵏⵉ ⵙⵙⵡⴻⵊⴷⴻⵏ ⵜⴰⵖⴰⵔⵚⵜ ⵏ ⵓⵙⴻⵄⴷⵓ ⴷⴻⴳ ⵡⴰⵙⵙ ⵡⵉⵙⵙ ⴰⵔⴱⴻⵄⵟⴰⵛ ⵏ ⵓⵢⵓⵔ ⴰⵎⴻⵥⵡⴰⵔⵓ ⴷⵉ ⵍⴻⵅⵍⴰ ⵏ ⵙⵉⵏⴰ, ⵊⴰⵔ ⴱⴻⴷⴷⵓ ⵏ ⵡⴻⵥⵢⴻⵏ ⵏ ⵡⴰⵙⵙ ⴰⵍ ⴷⴷ-ⵜⴻⵡⴹⴰ ⵜⵎⴻⴷⴷⵉⵜ, ⵄⵍⴰⵃⵙⴰⴱ ⵎⴰⵔⵔⴰ ⵎⵉⵏ ⴷ ⴰⵙ ⵢⵓⵎⵓⵔ ⵙⵉⴷⵉ ⵉ ⵎⵓⵙⴰ, ⴰⵎⵎⵓ ⵉ ⵜⵜ ⵙⵙⵡⴻⵊⴷⴻⵏ ⴰⵢⵜ ⵏ ⵉⵙⵔⴰⵉⵍ.

6 ⵛⴰ ⵏ ⵢⴻⵔⵢⴰⵥⴻⵏ ⵜⵜⵡⴰⵙⵅⴻⵎⵊⴻⵏ ⵙ ⵍⵅⴻⵛⴱⴻⵜ ⵏ ⵉⵊⵊ ⵏ ⴱⵏⴰⴷⴻⵎ ⵉⵎⵎⵓⵜⴻⵏ ⵓⵛⴰ ⵡⴰⵔ ⵥⴻⵎⵎⴰⵔⴻⵏ ⴰⴷ ⵙⵙⵡⴻⵊⴷⴻⵏ ⵜⴰⵖⴰⵔⵚⵜ ⵏ ⵓⵙⴻⵄⴷⵓ. ⴷⴻⴳ ⵡⴰⵙⵙ ⵏⵏⵉ ⵇⴰⵔⵔⴱⴻⵏ-ⴷⴷ ⵏⵉⵜⵏⵉ ⵥⵥⴰⵜ ⵉ ⵡⵓⴷⴻⵎ ⵏ ⵎⵓⵙⴰ ⵓ ⵥⵥⴰⵜ ⵉ ⵡⵓⴷⴻⵎ ⵏ ⵀⴰⵔⵓⵏ 7 ⵓⵛⴰ ⵏⵏⴰⵏ ⴰⵙ ⵢⴻⵔⵢⴰⵥⴻⵏ ⵏⵏⵉ: “ⵏⴻⵛⵛⵉⵏ ⵏⴻⵅⵎⴻⵊ ⵙ ⵍⵅⴻⵛⴱⴻⵜ ⵏ ⵉⵊⵊ ⵏ ⴱⵏⴰⴷⴻⵎ ⵉⵎⵎⵓⵜⴻⵏ. ⵎⴰⵢⴻⵎⵎⵉ ⵉ ⵏⴻⵜⵜⵡⴰⵙⴱⴻⴷⴷ ⴰⵍⴰⵎⵉ ⵡⴰⵔ ⵏⵥⴻⵎⵎⴰⵔ ⴰⴷ ⴷⴷ-ⵏⴻⵙⵙⵇⴰⵔⵔⴻⴱ ⵜⴰⵡⵀⵉⴱⵜ ⵏ ⵙⵉⴷⵉ ⴷⴻⴳ ⵡⴰⵙⵙ ⵏⵏⴻⵙ ⵉⵜⵜⵡⴰⴳⴳⴻⵏ ⴷⵉ ⵍⵡⴻⵙⵜ ⵏ ⴰⵢⵜ ⵏ ⵉⵙⵔⴰⵉⵍ?” 8 ⵎⵓⵙⴰ ⵉⵏⵏⴰ ⴰⵙⴻⵏ: “ⵇⵇⵉⵎⴻⵎ ⵜⴱⴻⴷⴷⴻⵎ, ⵃⵉⵎⴰ ⴰⴷ ⵙⵍⴻⵖ ⵎⵉⵏ ⴷ ⴰⵡⴻⵎ ⵖⴰ ⵢⵓⵎⵓⵔ ⵙⵉⴷⵉ.”

9 ⵉⵙⵙⵉⵡⴻⵍ ⵙⵉⴷⵉ ⴰⴽ-ⴷ ⵎⵓⵙⴰ, ⵉⵏⵏⴰ:

10 “ⵙⵉⵡⴻⵍ ⴰⴽ-ⴷ ⴰⵢⵜ ⵏ ⵉⵙⵔⴰⵉⵍ ⵓⵛⴰ ⵉⵏⵉ: ‘ⵎⴰⵍⴰ ⵃⴻⴷ ⵥⵥⴰⵢⵡⴻⵎ ⵏⵉⵖ ⵥⵉ ⵊⵊⵉⵍⴰⵜ ⵏⵡⴻⵎ ⵉ ⴷⴷ ⵖⴰ ⵢⴰⵙⴻⵏ ⵉⵜⵜⵡⴰⵙⵙⴻⵅⵎⴻⵊ ⵥⵉ ⵍⵅⴻⵛⴱⴻⵜ ⵏ ⵢⵉⵊⵊ ⵏ ⵓⵎⴻⵜⵜⵉⵏ, ⵏⵉⵖ ⵏⴻⵜⵜⴰ ⴷⴻⴳ ⵡⴻⴱⵔⵉⴷ ⴷ ⴰⵥⵉⵔⴰⵔ, ⵅⴻⵏⵏⵉ ⴰⴷ ⵉⵙⵙⴻⵡⵊⴻⴷ ⵄⴰⴷ ⵜⴰⵖⴰⵔⵚⵜ ⵏ ⵓⵙⴻⵄⴷⵓ ⵉ ⵙⵉⴷⵉ.

11 ⴷⴻⴳ ⵓⵢⵓⵔ ⵡⵉⵙⵙ ⵜⵏⴰⵢⴻⵏ, ⴷⴻⴳ ⵡⴰⵙⵙ ⵡⵉⵙⵙ ⴰⵔⴱⴻⵄⵟⴰⵛ, ⵊⴰⵔ ⴱⴻⴷⴷⵓ ⵏ ⵡⴻⵥⵢⴻⵏ ⵏ ⵡⴰⵙⵙ ⴰⵍ ⴷⴷ-ⵜⴻⵡⴹⴰ ⵜⵎⴻⴷⴷⵉⵜ, ⴰⴷ ⵜⵜ ⵙⵙⵡⴻⵊⴷⴻⵏ. ⵅⴻⵏⵏⵉ ⴰⴷ ⵜⵜ ⵛⵛⴻⵏ ⴰⴽ-ⴷ ⵡⴻⵖⵔⵓⵎ ⴱⵍⴰ ⴰⵏⵜⵓⵏ ⵓ ⴰⴽ-ⴷ ⵍⴻⴱⵥⴰⵔ ⵢⴰⵔⴻⵥⴳⴻⵏ.

12 ⵡⴰⵔ ⵜⵜⴻⵊⵊⵉⵏ ⵥⵥⴰⵢⴻⵙ ⵡⴰⵍⵓ ⴰⵍ ⵚⵚⴱⴻⵃ ⵓⵛⴰ ⵡⴰⵔ ⵥⵥⴰⵢⴻⵙ ⵜⵜⴰⵔⴻⵥⵥⴰⵏ ⵉⵖⴻⵙ. ⵉⵜⵜⵅⴻⵚⵚⴰ ⴰⴷ ⵜⵜ ⵙⵙⵡⴻⵊⴷⴻⵏ ⵄⵍⴰⵃⵙⴰⴱ ⵎⴰⵔⵔⴰ ⵜⵉⵡⴻⵚⵚⴰ ⵏ ⵜⵖⴰⵔⵚⵜ ⵏ ⵓⵙⴻⵄⴷⵓ. ^■  

13 ⵎⴰⵍⴰ ⵉⵊⵊ ⵏ ⵡⴻⵔⵢⴰⵥ ⴷ ⴰⵎⴻⵥⴷⴰⴳ ⵏⵏⵉ ⵡⴰⵔ ⵉⴵⵉⵏ ⴷⴻⴳ ⵡⴻⴱⵔⵉⴷ, ⴰⴷ ⵢⴻⵊⵊ ⴰⴷ ⵉⵙⵙⴻⵡⵊⴻⴷ ⵜⴰⵖⴰⵔⵚⵜ ⵏ ⵓⵙⴻⵄⴷⵓ, ⵅⴻⵏⵏⵉ ⴰⴷ ⵉⵜⵜⵡⴰⵇⴻⵙⵙ ⵍⴻⵄⵎⴰⵔ ⵏⵏⵉ ⵥⵉ ⵍⴳⴻⵏⵙ ⵏⵏⴻⵙ, ⵎⵉⵏⵥⵉ ⵏⴻⵜⵜⴰ ⵡⴰⵔ ⴷⴷ-ⵉⵙⵙⵇⴰⵔⵔⴻⴱ ⵛⴰ ⵜⴰⵡⵀⵉⴱⵜ ⵏ ⵙⵉⴷⵉ ⴷⵉ ⵍⵡⴻⵇⵜ ⵏⵏⴻⵙ ⵉⵜⵜⵡⴰⴳⴳⴻⵏ ⵓⵛⴰ ⴰⵔⵢⴰⵥ ⵏⵏⵉ ⴰⴷ ⵢⴰⵔⴱⵓ ⴷⴷⴻⵏⴱ ⵏⵏⴻⵙ.

14 ⵎⴰⵍⴰ ⵉⵥⴷⴻⵖ ⴰⴽⵉⴷⵡⴻⵎ ⵉⵊⵊ ⵏ ⵓⴱⴰⵔⵔⴰⵏⵉ ⵡⴻⵏⵏⵉ ⵉ ⵖⴰ ⵉⵙⵙⵡⴻⵊⴷⴻⵏ ⵜⴰⵖⴰⵔⵚⵜ ⵏ ⵓⵙⴻⵄⴷⵓ ⵏ ⵙⵉⴷⵉ, ⵅⴻⵏⵏⵉ ⴰⴷ ⵉⵙⵙⴻⵡⵊⴻⴷ ⵜⴰⵖⴰⵔⵚⵜ ⵏ ⵓⵙⴻⵄⴷⵓ ⵄⵍⴰⵃⵙⴰⴱ ⵜⴰⵡⵚⴻⵢⵢⴻⵜ ⵏ ⵜⴰⵖⴰⵔⵚⵜ ⵏ ⵓⵙⴻⵄⴷⵓ ⵓ ⵄⵍⴰⵃⵙⴰⴱ ⵍⴼⴰⵔⵉⴹⴰ ⵏⵏⴻⵙ. ⴰⴷ ⴷⵉⵏ ⵜⵉⵍⵉ ⵉⵛⵜ ⵏ ⵜⴻⵡⵚⴻⵢⵢⴻⵜ ⵉ ⴽⴻⵏⵏⵉⵡ, ⵉ ⵓⴱⴰⵔⵔⴰⵏⵉ ⴰⵎⵎⵓ ⵉ ⵡⴻⵏⵏⵉ ⴷⴷ-ⵉⵅⴻⵍⵇⴻⵏ ⴷⵉ ⵜⴻⵎⵎⵓⵔⵜ. ^■  

15 ⴷⴻⴳ ⵡⴰⵙⵙ ⵎⵉⵏ ⴷⵉ ⵜᵉⵜⵜⵡⴰⵙⴳⴻⵄⵄⴻⴷ ⵜⵥⴻⴷⴷⵉⵖⵜ, ⵉⴷⵍⴰ ⵓⵙⴻⵢⵏⵓ ⵜⴰⵥⴻⴷⴷⵉⵖⵜ ⴰⴽ-ⴷ ⵓⵇⵉⴹⵓⵏ ⵏ ⵛⵛⵀⴰⴷⴻⵜ ⵓ ⴷⵉ ⴵⵉⵍⴻⵜ ⵉⴹⵀⴰⵔ-ⴷⴷ ⵅ ⵜⵥⴻⴷⴷⵉⵖⵜ ⴰⵎⴻⵛⵏⴰⵡ ⵜⵉⵎⴻⵙⵙⵉ ⴰⵍ ⵚⵚⴱⴻⵃ. ^■  

16 ⴰⵎⵎⵓ ⵉ ⵜⵓⵖⴰ ⵍⴻⴱⴷⴰ, ⴰⵙⴻⵢⵏⵓ ⵉⴷⵍⴰ ⵉ-ⵜⵜ ⵓ ⴷⵉ ⴵⵉⵍⴻⵜ ⵉⴹⵀⴰⵔ-ⴷⴷ ⴰⵎ ⵜⵎⴻⵙⵙⵉ.

17 ⵍⴰⵎⵉ ⴷⴷ-ⵉⴳⴻⵄⵄⴻⴷ ⵓⵙⴻⵢⵏⵓ ⵥⵉ ⵙⴻⵏⵏⴻⵊ ⵏ ⵓⵇⵉⴹⵓⵏ, ⵅⴻⵏⵏⵉ ⴰⵡⴰⵔⵏⵉ ⴰⵢⴰ ⴼⴻⵙⵢⴻⵏ ⴰⵢⵜ ⵏ ⵉⵙⵔⴰⵉⵍ ⵉⵇⵉⴹⴰⵏ ⵏⵙⴻⵏ ⵓ ⴷⴻⴳ ⵡⴻⵎⵛⴰⵏ ⵎⴰⵏⵉ ⵜⵓⵖⴰ ⴷⴷ-ⵉⴱⴻⴷⴷ ⵓⵙⴻⵢⵏⵓ, ⴷⵉⵏ ⵉ ⵡⵜⵉⵏ ⴰⵢⵜ ⵏ ⵉⵙⵔⴰⵉⵍ ⵉⵇⵉⴹⴰⵏ ⵏⵙⴻⵏ.

18 ⴼⴻⵙⵢⴻⵏ ⴰⵢⵜ ⵏ ⵉⵙⵔⴰⵉⵍ ⵉⵇⵉⴹⴰⵏ ⵏⵙⴻⵏ ⵄⵍⴰⵃⵙⴰⴱ ⵍⵓⵎⵓⵔ ⵏ ⵙⵉⴷⵉ ⵓⵛⴰ ⵅ ⵍⵓⵎⵓⵔ ⵏ ⵙⵉⴷⵉ ⵡⵜⵉⵏ ⵉⵇⵉⴹⴰⵏ ⵏⵙⴻⵏ. ⵎⴰⵔⵔⴰ ⵓⵙⵙⴰⵏ ⵜⵓⵖⴰ ⴰⵙⴻⵢⵏⵓ ⵉⵇⵇⵉⵎ ⵙⴻⵏⵏⴻⵊ ⵉ ⵜⵥⴻⴷⴷⵉⵖⵜ, ⵇⵇⵉⵎⴻⵏ ⵏⵉⵜⵏⵉ ⵥⴻⴷⴷⵖⴻⵏ ⴷⵉⵏ. ^■  

19 ⵍⴰⵎⵉ ⴷⴷ-ⵉⴱⴻⴷⴷ ⵓⵙⴻⵢⵏⵓ ⴰⵟⵟⴰⵙ ⵏ ⵡⵓⵙⵙⴰⵏ ⵙⴻⵏⵏⴻⵊ ⵉ ⵜⵥⴻⴷⴷⵉⵖⵜ, ⵃⴹⴰⵏ ⴰⵢⵜ ⵏ ⵉⵙⵔⴰⵉⵍ ⵎⵉⵏ ⴷ ⴰⵙⴻⵏ ⵢⵓⵎⵓⵔ ⵙⵉⴷⵉ ⵓⵛⴰ ⵡⴰⵔ ⴼⴻⵙⵢⴻⵏ ⵛⴰ ⵉⵇⵉⴹⴰⵏ ⵏⵙⴻⵏ.

20 ⵓⵎⵉ ⵉⵇⵇⵉⵎ ⵓⵙⴻⵢⵏⵓ ⵛⵡⴰⵢⵜ ⵏ ⵡⵓⵙⵙⴰⵏ ⵙⴻⵏⵏⴻⵊ ⵉ ⵜⵥⴻⴷⴷⵉⵖⵜ, ⵅⴻⵏⵏⵉ ⵡⵜⵉⵏ ⵏⵉⵜⵏⵉ ⵉⵇⵉⴹⴰⵏ ⵏⵙⴻⵏ ⵄⵍⴰⵃⵙⴰⴱ ⵍⵓⵎⵓⵔ ⵏ ⵙⵉⴷⵉ ⵓ ⵅ ⵍⵓⵎⵓⵔ ⵏ ⵙⵉⴷⵉ ⴼⴻⵙⵢⴻⵏ ⵉⵇⵉⴹⴰⵏ ⵏⵙⴻⵏ ⵄⴰⵡⴻⴷ. 21 ⵎⴰⵍⴰ ⵉⵎⵙⴰⵔ ⴱⴻⵍⵍⵉ ⴰⵙⴻⵢⵏⵓ ⵉⴱⴻⴷⴷ ⴷⵉⵏ ⵥⵉ ⴵⵉⵍⴻⵜ ⴰⵍ ⵚⵚⴱⴻⵃ ⵓⵛⴰ ⵉⵜⵜⵡⴰⵙⴳⴻⵄⵄⴻⴷ ⵅⴻⵏⵏⵉ ⵓⵙⴻⵢⵏⵓ ⴷⵉ ⵚⵚⴱⴻⵃ, ⵅⴻⵏⵏⵉ ⴼⴻⵙⵢⴻⵏ ⵏⵉⵜⵏⵉ ⵉⵇⵉⴹⴰⵏ ⵏⵙⴻⵏ. ⵎⴰ ⴷⴻⴳ ⵡⴰⵙⵙ ⵉ ⵉⴵⴰ ⵏⵉⵖ ⴷⵉ ⴵⵉⵍⴻⵜ, ⵅⵎⵉ ⴷⴷ-ⵉⴳⴻⵄⵄⴻⴷ ⵓⵙⴻⵢⵏⵓ, ⴼⴻⵙⵢⴻⵏ ⵏⵉⵜⵏⵉ ⵉⵇⵉⴹⴰⵏ ⵏⵙⴻⵏ. 22 ⵓⵛⴰ ⵎⴰⵍⴰ ⵉⵇⵇⵉⵎ ⵓⵙⴻⵢⵏⵓ ⵉⴱⴻⴷⴷ ⵙⴻⵏⵏⴻⵊ ⵉ ⵜⵥⴻⴷⴷⵉⵖⵜ ⵜⵏⴰⵢⴻⵏ ⵏ ⵡⵓⵙⵙⴰⵏ, ⵏⵉⵖ ⵉⵊⵊ ⵏ ⵓⵢⵓⵔ, ⵏⵉⵖ ⴰⵟⵟⴰⵙ ⵏ ⵡⵓⵙⵙⴰⵏ, ⴰⵍⴰⵎⵉ ⵉ ⵖⴰ ⵢⴰⵔⵙⴰ ⵅⴰⵙ, ⵅⴻⵏⵏⵉ ⵇⵇⵉⵎⴻⵏ ⴰⵢⵜ ⵏ ⵉⵙⵔⴰⵉⵍ, ⵡⵜⵉⵏ ⵉⵇⵉⴹⴰⵏ ⵏⵙⴻⵏ, ⵡⴰⵔ ⴼⴻⵙⵢⴻⵏ ⵛⴰ ⵉⵇⵉⴹⴰⵏ ⵏⵙⴻⵏ. ⵎⴰⵍⴰ ⵉⵜⵜⵡⴰⵙⴳⴻⵄⵄⴻⴷ ⵓⵙⴻⵢⵏⵓ, ⵅⴻⵏⵏⵉ ⴼⴻⵙⵢⴻⵏ ⵏⵉⵜⵏⵉ ⵉⵇⵉⴹⴰⵏ ⵏⵙⴻⵏ. ^■   23 ⵅ ⵍⵓⵎⵓⵔ ⵏ ⵙⵉⴷⵉ ⵡⵜⵉⵏ ⵉⵇⵉⴹⴰⵏ ⵏⵙⴻⵏ ⵓ ⵅ ⵍⵓⵎⵓⵔ ⵏ ⵙⵉⴷⵉ ⴼⴻⵙⵢⴻⵏ ⵉⵇⵉⴹⴰⵏ ⵏⵙⴻⵏ. ⴰⵇⴰ ⵃⴹⴰⵏ ⵎⵉⵏ ⴷ ⴰⵙⴻⵏ ⵢⵓⵎⵓⵔ ⵙⵉⴷⵉ, ⵅ ⵍⵓⵎⵓⵔ ⵏ ⵙⵉⴷⵉ, ⵙ ⵓⴼⵓⵙ ⵏ ⵎⵓⵙⴰ.