1 ⵉⵍⴰⵖⴰ ⵢⴰⵄⵇⵓⴱ ⵅ ⵉⵃⴻⵏⵊⵉⵔⴻⵏ ⵏⵏⴻⵙ, ⵉⵏⵏⴰ: “ⵙⵎⵓⵏⴻⵎ-ⴷⴷ ⵉⵅⴻⴼ ⵏⵡⴻⵎ, ⴰⴷ ⴰⵡⴻⵎ ⵉⵏⵉⵖ ⵎⵉⵏ ⴷ ⴰⵡⴻⵎ ⵖⴰ ⵉⵎⵙⴰⵔⴻⵏ ⴷⴻⴳ ⵓⵏⴻⴳⴳⴰⵔ ⵏ ⵡⵓⵙⵙⴰⵏ. 2 ⵙⵎⵓⵏⴻⵎ-ⴷⴷ ⵉⵅⴻⴼ ⵏⵡⴻⵎ ⵓⵛⴰ ⵙⵍⴻⵎ, ⴰ ⵉⵃⴻⵏⵊⵉⵔⴻⵏ ⵏ ⵢⴰⵄⵇⵓⴱ, ⵙⵍⴻⵎ ⵉ ⵉⵙⵔⴰⵉⵍ, ⴱⴰⴱⴰⵜⵡⴻⵎ.

3 ⵔⵓⴱⵉⵏ, ⵛⴻⴽ ⴷ ⴰⵎⴻⵏⵥⵓ ⵉⵏⵓ, ⵊⵊⴻⵀⴷ ⵉⵏⵓ ⴷ ⵓⵎⴻⵥⵡⴰⵔ ⵏ ⵜⴻⵔⵢⴰⵙⵜ ⵉⵏⵓ, ⴰⵇⴰ ⵛⴻⴽ ⴷ ⴰⵎⵙⴻⴹⴼⴰⵔ ⵉⵏⵓ ⴷⵉ ⵍⵓⵄⵍⴰ, ⴷ ⴰⵎⵙⴻⴹⴼⴰⵔ ⵉⵏⵓ ⴷⵉ ⵍⵄⴻⵥⵥ. ^■   4 ⵛⴻⴽ ⴰⵎⴻⵛⵏⴰⵡ ⴰⵎⴰⵏ ⵉⵜⵜⵏⴻⵇⵍⴰⴱⴻⵏ, ⵡⴰⵔ ⴳⴳⵓⵔ ⴰⴷ ⴰⵢⵉ ⴷⴷ-ⵜⴻⴹⴼⴰⵔⴻⴷ, ⴰⵇⴰ ⵛⴻⴽ ⵜⴳⴻⵄⵄⴷⴻⴷ ⵖⴰⵔ ⵍⴻⵛⵜⵓ ⵏ ⵍⴻⵎⵍⴰⵛ ⵏ ⴱⴰⴱⴰⵛ, ⵍⴻⵅⴷⴻⵏⵏⵉ ⵜⴻⵙⵙⴼⴻⴹⵃⴻⴷ ⵜⵜ, ⴰⵇⴰ ⵖⴰⵔ ⵔⴻⵛⵜⵓ ⵉⵏⵓ ⵖⴰⵔ ⵉⴳⴻⵄⵄⴻⴷ. ^■  

5 ⵛⵉⵎⵄⵓⵏ ⴷ ⵍⴰⵡⵉ ⴷ ⴰⵡⵎⴰⵜⴻⵏ! ⵍⴻⵎⵡⴰⵙ ⵏⵙⴻⵏ ⴷ ⵍⴻⵙⵏⴰⵃ ⵏ ⵍⵄⵓⵏⴼ. 6 ⴷⵉ ⵜⵎⴻⵄⵎⵓⵞ ⵏⵙⴻⵏ ⵡⴰⵔ ⵉⵜⵜⵉⴷⴻⴼ ⵍⴻⵄⵎⴰⵔ ⵉⵏⵓ, ⴷⴻⴳ ⵡⴻⴳⵔⴰⵡ ⵏⵙⴻⵏ ⵡⴰⵔ ⵉⵛⴰⵔⵔⴻⵛ ⵡⵓⵍ ⵉⵏⵓ. ⴰⵇⴰ ⴷⴻⴳ ⵓⵅⴻⵢⵢⴻⵇ ⵏⵙⴻⵏ ⵏⵖⵉⵏ ⵉⵊⵊ ⵏ ⵡⴻⵔⵢⴰⵥ ⵓⵛⴰ ⵉⵄⵊⴻⴱ ⴰⵙⴻⵏ ⴰⴷ ⵇⴻⵙⵙⴻⵏ ⵉⴹⴰⵔⴻⵏ ⵏ ⵓⴼⵓⵏⴰⵙ. ^■   7 ⴷ ⴰⵎⴻⵏⵄⵓⵍ ⴰⵅⴻⵢⵢⴻⵇ ⵏⵙⴻⵏ ⵎⵉⵏⵥⵉ ⵜⵓⵖⴰ ⵉⵊⵀⴻⴷ ⴰⵟⵟⴰⵙ, ⵓⵍⴰ ⴷ ⴰⴷⵓⵇⵇⴻⵥ ⵏ ⵓⴼⵓⴳⴻⵎ ⵏⵙⴻⵏ ⵎⵉⵏⵥⵉ ⵉⵇⵙⴻⵃ. ⵏⴻⵛⵛ ⴰⴷ ⵜⴻⵏ ⴱⴹⵉⵖ ⵅ ⵢⴰⵄⵇⵓⴱ, ⴰⴷ ⵜⴻⵏ ⵉⵥⵓⵥⵥⴰⵔ ⴷⵉ ⵉⵙⵔⴰⵉⵍ. ^■  

8 ⵢⴰⵀⵓⴷⴰ, ⴰⵢⵜⵎⴰⵛ ⴰⴷ ⵛⴻⴽ ⵙⵙⴻⵎⵖⴰⵔⴻⵏ. ⴰⴼⵓⵙ ⵏⵏⴻⴽ ⴰⴷ ⵢⵉⵍⵉ ⵅ ⵢⵉⵔⵉ ⵏ ⵍⵄⴻⴷⵢⴰⵏ ⵏⵏⴻⴽ ⵓ ⵉⵃⴻⵏⵊⵉⵔⴻⵏ ⵏ ⴱⴰⴱⴰⵛ ⴰⴷ ⴰⵛ ⴰⴹⴰⵔⴻⵏ. 9 ⵢⴰⵀⵓⴷⴰ ⴷ ⵉⵊⵊ ⵏ ⵎⵎⵉⵙ ⵏ ⵡⴰⵢⵔⴰⴷ. ⵣⵉ ⵥⵥⴰⵔⴷⴻⵜ ⵉ ⵜⵓⵍⵢⴻⴷ, ⴰ ⵎⵎⵉ ⵉⵏⵓ. ⵉⵇⵡⴻⵙ ⴰⵎⴻⵛⵏⴰⵡ ⴰⵢⵔⴰⴷ ⵓ ⴰⵎⴻⵛⵎⴰⵡ ⵜⴰⵢⵔⴰⴷⵜ. ⵡⵉ ⵉⵥⴻⵎⵎⴰⵔⴻⵏ ⴰⴷ ⵜⴻⵏ-ⴷⴷ-ⵉⵙⵙⴼⴰⵇ? ^■  

10 ⴰⵥⴻⴵⴰⴹ ⵏ ⵚⵚⵓⵍⵟⴰ ⵡⴰⵔ ⵉⵜⵜⵡⴰⴽⴽⴻⵙ ⵅ ⵢⴰⵀⵓⴷⴰ ⵓⵍⴰ ⴷ ⵜⴰⵎⴳⴻⵡⵡⴰⴷⵜ ⵥⵉ ⵊⴰⵔ ⵉⴹⴰⵔⴻⵏ ⵏⵏⴻⵙ, ⴰⵍ ⴷⴷ ⵖⴰ ⵢⴰⵙ ⵡⴻⵏⵏⵉ ⵉ ⵖⴰ ⵉⵡⵛⴻⵏ ⴰⵔⵔⴰⵃⴻⵜ ⵓⵛⴰ ⴰⴷ ⴰⵙ ⵟⴰⵄⴻⵏ ⵍⴻⴳⵏⵓⵙ. ^■  

11 ⵉⵇⵇⴻⵏ ⵖⴰⵔ ⵜⵥⴰⵢⴰⵔⵜ ⴰⵙⵏⵓⵙ ⵏⵏⴻⵙ ⴷ ⵎⵎⵉⵙ ⵏ ⵜⴻⵖⵢⵓⵞ ⵏⵏⴻⵙ ⵖⴰⵔ ⵜⵥⴰⵢⴰⵔⵜ ⵉⵛⴻⵏⵄⴻⵏ ⴰⵟⵟⴰⵙ, ⵉⵙⵙⵉⵔⴷ ⴰⵔⵔⵓⴹ ⵏⵏⴻⵙ ⴷⵉ ⴱⵉⵏⵓ ⵓ ⴰⵔⵔⵓⴹ ⵏⵏⴻⵙ ⴷⴻⴳ ⵉⴷⴰⵎⵎⴻⵏ ⵏ ⵓⴹⵉⵍ.

12 ⵜⵉⵟⵟⴰⵡⵉⵏ ⵏⵏⴻⵙ ⴷ ⵜⵉⴱⴰⵔⵛⴰⵏⵉⵏ ⵙ ⴱⵉⵏⵓ ⵓ ⵜⵉⵖⵎⴰⵙ ⵏⵏⴻⵙ ⴷ ⵜⵉⵛⴻⵎⵍⴰⵍⵉⵏ ⵙ ⵓⵖⵉ.

13 ⵣⴰⴱⵓⵍⵓⵏ ⴰⴷ ⵉⵥⴷⴻⵖ ⵖⴰⵔ ⵜⵎⴰ ⵏ ⵍⴻⴱⵃⴰⵔ, ⴰⴷ ⵢⵉⵍⵉ ⴷ ⵍⵎⵓⵢⵢⵉ ⵉ ⵉⵖⴰⵔⵔⵓⴱⴰ. ⴰⵖⴻⵥⴷⵉⵙ ⵏⵏⴻⵙ ⴰⴷ ⵢⴰⵔⴻⵢⵢⴻⵃ ⵅ ⵚⵉⴷⵓⵏ. ^■  

14 ⵉⵙⵙⴰⴽⴰⵔ ⴷ ⵉⵊⵊ ⵏ ⵡⴻⵖⵢⵓⵍ ⵉⵇⵙⴻⵃ, ⵉⵥⵥⴻⵍ ⵊⴰⵔ ⵜⵏⴰⵢⴻⵏ ⵏ ⵍⵎⴻⴷⵡⴰⵜ.

15 ⵓⵎⵉ ⵉⵥⵔⴰ ⴰⵔⵔⴰⵃⴻⵜ ⴷ ⵍⴻⵎⵍⵉⵃ ⵓ ⵜⴰⵎⵎⵓⵔⵜ ⴰⵇⴰ ⵜⴰⵔⴻⵛⵛⴻⵇ, ⵉⵄⴰⵔⵔⴰ ⵅ ⵉⴼⴰⵙⵙⴻⵏ ⵎⴰⵃⴻⵏⴷ ⴰⴷ ⵢⴰⵔⴱⵓ ⴰⵔⵔⵎⴻⵃ ⵓⵛⴰ ⵉⴷⵡⴻⵍ ⵙⴰⴷⵓ ⴰⵥⴰⵢⵍⵓ ⵏ ⵉⵙⵎⴻⵖ.

16 ⴷⴰⵏ ⴰⴷ ⵉⵃⴽⴻⵎ ⵍⴳⴻⵏⵙ ⵏⵏⴻⵙ ⵙ ⵓⵥⴻⵔⴼ, ⴰⵎ ⵉⵛⵜ ⵥⵉ ⵜⵇⴻⴱⴱⴰⵍ ⵏ ⵉⵙⵔⴰⵉⵍ.

17 ⴰⴷ ⵢⵉⵍⵉ ⴷⴰⵏ ⴷ ⴰⴼⵉⵖⴰⵔ ⴷⴻⴳ ⵡⴻⴱⵔⵉⴷ, ⵜⴰⵍⴻⴼⵙⴰ ⴷⴻⴳ ⵓⵎⴻⵙⵔⵓⵇ, ⵡⴻⵏⵏⵉ ⵉⵥⴻⵄⵄⴼⴻⵏ ⴷⴻⴳ ⵉⵏⵉⵔⵥⴰⵡⴻⵏ ⵏ ⵓⵢⵉⵙ, ⴰⵍ ⵖⴰ ⵉⵡⴹⴰ ⵡⴻⵏⵏⵉ ⵅⴰⵙ ⵉⵏⵢⵉⵏ ⵖⴰⵔ ⴹⴻⴼⴼⴰⵔ.

18 ⴰⵙⴻⵏⵊⴻⵎ ⵏⵏⴻⴽ ⵉ ⵜⵜⵔⴰⵊⵉⵖ, ⴰ ⵙⵉⴷⵉ!

19 ⵊⴰⴷ, ⴰⴷ ⵅⴰⵙ ⵃⴻⵊⵎⴻⵏⵜ ⴱⴰⵏⴷⵉⵢⵢⴰⵜ, ⵎⴰⵛⴰ ⴰⴷ ⵅⴰⵙⴻⵏ ⵉⴷⴰⵔⵔⴻⵛ.

20 ⴰⵛⵉⵔ, ⴰⵖⵔⵓⵎ ⵏⵏⴻⵙ ⴰⴷ ⵢⵉⵍⵉ ⴷ ⴰⵖⵔⵓⵎ ⵉⵙⵎⴻⵏ, ⵏⴻⵜⵜⴰ ⴰⴷ ⵉⵇⴻⴷⴷⴻⵎ ⵎⴰⵛⵛⴰ ⵢⵉⵥⵉⴷⴻⵏ ⵉⴳⴻⵍⵍⴷⴻⵏ.

21 ⵏⴰⴼⵜⴰⵍⵉ ⴷ ⵉⵛⵜ ⵏ ⵜⵓⴷⴰⴷⵜ ⵉⵜⵜⵡⴰⴹⴻⵍⵇⴻⵏ, ⵉⵙⵙⵓⴼⴼⵓⵖ ⴰⵡⴰⵍⴻⵏ ⵛⵏⴰⵏ.

22 ⵢⵓⵙⵓⴼ ⴷ ⵎⵎⵉⵙ ⵏ ⵜⵛⴻⵊⵊⴰⵔⵜ ⵉⵜⵜⵉⵛⴻⵏ ⵍⵖⵉⴵⴻⵜ, ⵎⵎⵉⵙ ⵏ ⵜⵛⴻⵊⵊⴰⵔⵜ ⵉⵜⵜⵉⵛⴻⵏ ⵍⵖⵉⴵⴻⵜ ⵖⴰⵔ ⵜⴰⵍⴰ. ⵢⴻⵙⵙⵉⵙ ⴳⴳⵓⵔⴻⵏⵜ ⵅ ⵡⴻⵖⴱⴰⵔ. ^■   23 ⵏⵉⵜⵏⵉ ⵙⵙⴰⵔⴻⵥⴳⴻⵏ ⵅⴰⵙ ⵜⵓⴷⴰⵔⵜ, ⵜⵓⵖⴰ ⴰⵜⴻⵏ ⵙ ⵡⴰⵟⵟⴰⵙ ⵓⵛⴰ ⵉⵎⵊⴻⴱⴱⴰⴷⴻⵏ ⵏ ⵍⵇⴻⵡⵙ ⵎⴰⵔⵔⵜⴻⵏ ⵜ, ^■   24 ⵎⴰⵛⴰ ⵍⵇⴻⵡⵙ ⵏⵏⴻⵙ ⵉⵇⵇⵉⵎ ⵉⵎⵃⴻⴹ ⵓ ⵉⵖⴰⴵⴻⵏ ⵏ ⵉⴼⴰⵙⵙⴻⵏ ⵏⵏⴻⵙ ⵇⵇⵉⵎⴻⵏ ⴰⵔⵅⵓⵏ ⵙ ⵉⴼⴰⵙⵙⴻⵏ ⵏ ⵓⵎⵥⴻⵎⵎⴰⵔ ⵏ ⵢⴰⵄⵇⵓⴱ - ⵅ ⵓⵢⴰ ⵏⴻⵜⵜⴰ ⴷ ⴰⵎⴻⴽⵙⴰ ⴷ ⵜⴰⵚⴹⴰⵔⵜ ⵏ ⵉⵙⵔⴰⵉⵍ - 25 ⵙ ⴰⵔⴻⴱⴱⵉ ⵏ ⴱⴰⴱⴰⵛ ⵡⴻⵏⵏⵉ ⵛⴻⴽ ⵉ ⵖⴰ ⵉⵄⴰⵡⵏⴻⵏ, ⴰⵎⵥⴻⵎⵎⴰⵔ ⵅ ⴽⵓⵍⵛⵉ, ⵡⴻⵏⵏⵉ ⵛⴻⴽ ⵉ ⵖⴰ ⵉⴱⴰⵔⴽⴻⵏ ⵙ ⵍⴱⴰⵔⴰⴽⴰⵜ ⵏ ⵓⵊⴻⵏⵏⴰ ⵙⴻⵏⵏⴻⵊ, ⵙ ⵍⴱⴰⵔⴰⴽⴰⵜ ⵏ ⵡⴰⵎⴰⵏ ⵢⵓⴵⵖⴻⵏ ⵉ ⴷⵉⵏ ⵉⴵⴰⵏ ⵙⵡⴰⴷⴷⴰⵢ, ⵙ ⵍⴱⴰⵔⴰⴽⴰⵜ ⵏ ⵜⵓⴱⴱⴻⵛⵜ ⴷ ⵍⴻⵎⵍⴰⵡⵍⴻⵜ. 26 ⵍⴱⴰⵔⴰⴽⴰⵜ ⵏ ⴱⴰⴱⴰⵛ ⴷ ⵜⵉⵎⴻⵇⵇⵔⴰⵏⵉⵏ ⵓⵄⵍⴰⵏⵜ ⵅ ⵍⴱⴰⵔⴰⴽⴰⵜ ⵏ ⵢⵉⵏⵏⵉ ⴷ ⴰⵢⵉ ⴷⴷ-ⵢⴻⵊⵊⵉⵏ ⵓⵛⴰ ⵜⵜⴰⴽⴽⵡⴰⴹⴻⵏⵜ ⵖⴰⵔ ⵜⵇⵉⵛⵛⴰⵜⵉⵏ ⵏ ⵜⴻⵡⵔⵉⵔⵉⵏ ⵏ ⵍⴻⴱⴷⴰ. ⴰⴷ ⵉⵍⵉⵏⵜ ⵅ ⵓⵥⴻⴵⵉⴼ ⵏ ⵢⵓⵙⵓⴼ, ⵅ ⵜⵓⵛⵛⴻⵏⵜ ⵏ ⵓⵛⴻⵡⵡⴰⴼ ⵏ ⵡⴻⵏⵏⵉ ⵉⵜⵜⵡⴰⵄⴻⵥⵍⴻⵏ ⵅ ⴰⵢⵜⵎⴰⵙ ⵙ ⵜⴻⵎⵔⵉⵙⵜ. ^■  

27 ⴱⵉⵏⵢⴰⵎⵉⵏ ⴷ ⵉⵊⵊ ⵏ ⵡⵓⵛⵛⴻⵏ ⵉⵜⵜⵎⴻⵥⵥⴰⵇ. ⵖⴰⵔ ⵚⵚⴱⴻⵃ ⴰⴷ ⵉⵚⴰⵔⴹ ⵥⵥⴰⵔⴷⴻⵜ ⵓ ⵙ ⴵⵉⵍⴻⵜ ⵉⴱⴻⵟⵟⴰ ⵜⴰⴽⴻⵛⵛⴰⴹⵜ.”

28 ⵎⴰⵔⵔⴰ ⵉⵏⴰ ⴷ ⵜⴻⵏⵄⴰⵛ ⵏ ⵜⵇⴻⴱⴱⴰⵍ ⵏ ⵉⵙⵔⴰⵉⵍ. ⴷ ⵎⴰⵏ ⴰⵢⴰ ⵎⵉⵏ ⴷ ⴰⵙⴻⵏ ⵉⵏⵏⴰ ⴱⴰⴱⴰⵜⵙⴻⵏ ⵓⵛⴰ ⵉⴱⴰⵔⴽ ⵉ-ⵜⴻⵏ. ⵉⴱⴰⵔⴽ ⵉ-ⵜⴻⵏ, ⴽⵓⵍ ⵉⵊⵊ ⵙ ⵍⴱⴰⵔⴰⴽⴰ ⵏⵏⴻⵙ. 29 ⵢⵓⵎⵓⵔ ⵉ-ⵜⴻⵏ, ⵉⵏⵏⴰ ⴰⵙⴻⵏ: “ⴰⴷ ⵎⵓⵏⴻⵖ ⴰⴽ-ⴷ ⵍⴳⴻⵏⵙ ⵉⵏⵓ. ⵏⴻⴹⵍⴻⵎ ⴰⵢⵉ ⴰⴽ-ⴷ ⵍⴻⵊⴷⵓⴷ ⵉⵏⵓ ⴷⴻⴳ ⵉⴼⵔⵉ ⵡⴻⵏⵏⵉ ⵉⴵⴰⵏ ⴷⴻⴳ ⵉⵢⵢⴰⵔ ⵏ ⵉⴼⵔⵓⵏ, ⴰⵃⵉⵜⵜⵉ, 30 ⴷⴻⴳ ⵉⴼⵔⵉ ⵡⴻⵏⵏⵉ ⵉⴵⴰⵏ ⴷⴻⴳ ⵉⵢⵢⴰⵔ ⵏ ⵎⴰⴽⴼⵉⵍⴰ ⵉ ⵉⴵⴰⵏ ⵥⵥⴰⵜ ⵉ ⵎⴰⵎⵔⵉ ⴷⵉ ⵜⴻⵎⵎⵓⵔⵜ ⵏ ⴽⴻⵏⵄⴰⵏ, ⵜⴻⵏⵏⵉ ⵉⵙⵖⴰ ⵉⴱⵔⴰⵀⵉⵎ ⴰⴽ-ⴷ ⵢⴻⵢⵢⴰⵔ ⵥⵉ ⵉⴼⵔⵓⵏ, ⴰⵃⵉⵜⵜⵉ, ⴰⵎⴻⵛⵏⴰⵡ ⴰⵏⴹⴻⵍ ⵏⵏⴻⵙ. ^■   31 ⴷⵉⵏⵏⵉ ⵉ ⵏⴻⴹⵍⴻⵏ ⵉⴱⵔⴰⵀⵉⵎ ⴷ ⵙⴰⵔⴰ ⵜⴰⵎⵖⴰⵔⵜ ⵏⵏⴻⵙ. ⴷⵉⵏⵏⵉ ⵉ ⵏⴻⴹⵍⴻⵏ ⵉⵙⵃⴰⵇ ⴷ ⵜⴻⵎⵖⴰⵔⵜ ⵏⵏⴻⵙ ⵔⵉⴼⵇⴰ. ⵓ ⵏⴻⵛⵛ ⵏⴻⴹⵍⴻⵖ ⴷⵉⵏ ⵍⵉⵢⴰ. ^■   32 ⵉⵢⵢⴰⵔ ⵙ ⵉⴼⵔⵉ ⵉ ⵜⵓⵖⴰ ⴷⴰⵢⴻⵙ ⵉⴵⴰⵏ ⵉⵎⵎⵙⴻⵖ ⵅ ⵉⵃⴻⵏⵊⵉⵔⴻⵏ ⵏ ⵃⵉⵜ.”

33 ⵓⵎⵉ ⵉⴽⴻⵎⵎⴻⵍ ⵢⴰⵄⵇⵓⴱ ⴰⴷ ⵉⵡⴻⵚⵚⴰ ⵉⵃⴻⵏⵊⵉⵔⴻⵏ ⵏⵏⴻⵙ, ⵉⴽⴻⵎⵎⴻⵛ ⵉⴹⴰⵔⴻⵏ ⵏⵏⴻⵙ ⴷⵉ ⵇⴰⵎⴰ ⵓⵛⴰ ⵉⴼⴼⴻⵖ ⵉ-ⵜ ⴱⵓⵃⴱⴻⵍ ⵓⵛⴰ ⵉⵜⵜⵡⴰⵙⵙⵎⵓⵏ ⴷⴻⴳ ⵡⴻⵏⴹⴻⵍ ⴰⴽ-ⴷ ⵍⴻⵊⴷⵓⴷ ⵏⵏⴻⵙ. ^□  ■