ⵢⵓⵙⵓⴼ ⵉⴼⴻⵙⵙⴰⵔ ⵜⵏⴰⵢⴻⵏ ⵏ ⵜⵉⵔⵊⴰ
40
1 ⵉⵎⵙⴰⵔ ⴰⵡⴰⵔⵏⵉ ⵎⴰⵏ ⴰⵢⴰ ⴱⴻⵍⵍⵉ ⴰⵡⴰⵔⵔⴰⴷ ⵏ ⵓⵊⴻⴵⵉⴷ ⵏ ⵎⵉⵚⵔⴰ ⴷ ⵓⵅⴻⴱⴱⴰⵥ ⴷⴻⵏⵏⴱⴻⵏ ⴹⵉⴷⴷ ⵉ ⵙⵉⴷⵉⵜⵙⴻⵏ, ⴰⵊⴻⴵⵉⴷ ⵏ ⵎⵉⵚⵔⴰ. □ 2 ⵉⴼⴼⵓⴳⴻⵎ ⴼⵉⵔⵄⵓⵏ ⵅ ⵜⵏⴰⵢⴻⵏ ⵏ ⵉⵎⵙⴻⵅⵅⴰⵔⴻⵏ ⵉⵛⴻⵏⵄⴻⵏ ⵏⵏⴻⵙ, ⵅ ⵓⵎⴻⵇⵇⵔⴰⵏ ⵏ ⵉⵡⴰⵔⵔⴰⴷⴻⵏ ⵓ ⵅ ⵓⵎⴻⵇⵇⵔⴰⵏ ⵏ ⵉⵅⴻⴱⴱⴰⵥⴻⵏ. 3 ⵉⴳⴳⴰ ⵉ-ⵜⴻⵏ ⴷⵉ ⵍⴻⵃⴱⴻⵙ ⴷⵉ ⵜⴰⴷⴷⴰⵔⵜ ⵏ ⵍⵇⴻⴱⵟⴰⵏ ⵏ ⵉⵄⴻⵙⵙⴰⵙⴻⵏ ⵏ ⴰⵔⵔⵉⵎⴻⵜ ⴷⵉ ⵜⴰⴷⴷⴰⵔⵜ ⵏ ⵍⴻⵃⴱⴻⵙ ⵎⴰⵏⵉ ⵉⵃⴻⴱⴱⴻⵙ ⵢⵓⵙⵓⴼ. 4 ⵍⵇⴻⴱⵟⴰⵏ ⵏ ⵉⵄⴻⵙⵙⴰⵙⴻⵏ ⵏ ⴰⵔⵔⵉⵎⴻⵜ ⵉⴳⴳⴰ ⵢⵓⵙⵓⴼ ⴷ ⴰⵎⴻⵃⴷⴰⵢ ⵏⵙⴻⵏ, ⵓⵛⴰ ⵏⴻⵜⵜⴰ ⵜⵓⵖⴰ ⵉⵜⵜⵙⴻⵅⵅⴰⵔ ⵅⴰⵙⴻⵏ. ⴰⵎⵎⵓ ⵜⵓⵖⴰ ⵓⵙⵙⴰⵏ ⴷ ⵉⵥⵉⵔⴰⵔⴻⵏ ⴷⵉ ⵍⴻⵃⴱⴻⵙ. 5 ⵓⵔⵊⵉⵏ ⵜⴰⵔⵊⵉⵜ, ⴽⵓⵍ ⵉⵊⵊⴻⵏ ⵥⵥⴰⵢⵙⴻⵏ ⵢⵓⵔⵊⴰ ⴷⵉ ⴵⵉⵍⴻⵜ ⵏⵏⵉ ⵜⴰⵔⵊⵉⵜ ⵏⵏⴻⵙ ⵙ ⵍⵎⴻⵄⵏⴰ ⵏⵏⴻⵙ, ⴰⵎⵎⵓ ⴰⵡⴰⵔⵔⴰⴷ ⵓⵍⴰ ⴷ ⴰⵅⴻⴱⴱⴰⵥ ⵏ ⵓⵊⴻⴵⵉⴷ ⵏ ⵎⵉⵚⵔⴰ, ⵉⵏⵏⵉ ⵜⵓⵖⴰ ⵉⵜⵜⵡⴰⵃⴻⴱⴱⵙⴻⵏ ⴷⵉ ⵜⴰⴷⴷⴰⵔⵜ ⵏ ⵜⵄⴻⵙⵙⴰⵙⵜ. 6 ⵓⵛⴰ ⵢⵓⵙⴰ-ⴷⴷ ⵖⴰⵔⵙⴻⵏ ⵢⵓⵙⵓⴼ ⵅ ⵚⵚⴱⴻⵃ, ⵉⵅⵥⴰⵔ ⴷⴰⵢⵙⴻⵏ ⵓⵛⴰ ⵉⵥⵔⴰ ⵉ-ⵜⴻⵏ ⵜⵜⵇⴻⵍⵍⵇⴻⵏ. 7 ⵏⴻⵜⵜⴰ ⵉⵙⵙⴻⵇⵙⴰ ⵉⵎⵙⴻⵅⵅⴰⵔⴻⵏ ⵉⵛⴻⵏⵄⴻⵏ ⵏ ⴼⵉⵔⵄⵓⵏ, ⵉⵏⵏⵉ ⵜⵓⵖⴰ ⴰⴽⵉⴷⴻⵙ ⴷⵉ ⵍⴻⵃⴱⴻⵙ ⴷⵉ ⵜⴰⴷⴷⴰⵔⵜ ⵏ ⵙⵉⴷⵉⵙ, ⵉⵏⵏⴰ: “ⵎⴰⵖⴰⵔ ⴱⴰⵔⴻⵛⵏⴻⵏ ⵓⴷⵎⴰⵡⴻⵏ ⵏⵡⴻⵎ ⴰⵙⵙ-ⴰ ⵇⴰⵄ ⴰⵎⵎⵓ?” 8 ⵏⵉⵜⵏⵉ ⵏⵏⴰⵏ: “ⴰⵇⴰ ⵏⵓⵔⵊⴰ ⵜⴰⵔⵊⵉⵜ, ⵡⴰⵔ ⴷⴰ ⵡⵉ ⵜⵜ ⵖⴰ ⵉⴼⴻⴽⴽⴻⵏ.” ⵉⵏⵏⴰ ⴰⵙⴻⵏ ⵢⵓⵙⵓⴼ: “ⵎⴰ ⵡⴰⵔ ⴵⵉⵏ ⵛⴰ ⵉⴼⴻⵙⵙⴰⵔⴻⵏ ⵥⵉ ⴰⵔⴻⴱⴱⵉ? ⵉⵡⴰ, ⵄⴰⵡⴷⴻⵎ ⴰⵢⵉ ⵜⴻⵏⵜ ⵍⴻⵅⵅⵓ!”
9 ⵅⴻⵏⵏⵉ ⵉⵄⴰⵡⴻⴷ ⵓⵎⴻⵇⵇⵔⴰⵏ ⵏ ⵉⵡⴰⵔⵔⴰⴷⴻⵏ ⵜⴰⵔⵊⵉⵜ ⵏⵏⴻⵙ ⵉ ⵢⵓⵙⵓⴼ, ⵉⵏⵏⴰ ⴰⵙ: “ⵏⴻⵛⵛ ⴷⵉ ⵜⴰⵔⵊⵉⵜ ⵉⵏⵓ ⵥⵔⵉⵖ ⵜⴰⵥⴰⵢⴰⵔⵜ ⵥⵥⴰⵜⵉ ⵜⴱⴻⴷⴷ.
10 ⵜⴰⵥⴰⵢⴰⵔⵜ ⵏⵏⵉ ⵖⴰⵔⴻⵙ ⵜⵍⴰⵜⴰ ⵏ ⵜⵙⴻⴹⵡⵉⵏ. ⵅⵎⵉ ⵜⴻⵙⵙⴻⵏⴷⵉⵢ, ⵉⵜⵜⴳⴻⵄⵄⴰⴷ ⵏⵏⵓⵡⵡⴰⵔ ⵏⵏⴻⵙ ⵓ ⵖⴰⵔ ⵉⵥⴻⴽⴽⵓⵏⴻⵏ ⵏⵏⴻⵙ ⵉⴱⴰⵏ-ⴷⴷ ⵍⵃⴻⴱⴱ ⵏ ⵓⴹⵉⵍ ⵢⵉⵡⴻⴹ.
11 ⵓⵛⴰ ⵍⴽⴰⵙ ⵏ ⴼⵉⵔⵄⵓⵏ ⵜⵓⵖⴰ-ⵜ ⵖⴰⵔⵉ ⴷⴻⴳ ⵓⴼⵓⵙ ⵉⵏⵓ ⵓⵛⴰ ⴽⵙⵉⵖ ⴰⴹⵉⵍ ⵏⵏⵉ ⵓⵛⴰ ⵄⴻⵙⵙⴰⵔⴻⵖ ⵜ ⴷⵉ ⵍⴽⴰⵙ ⵏ ⴼⵉⵔⵄⵓⵏ ⵓⵛⴰ ⵙⵙⴻⵄⴷⵓⵖ ⵍⴽⴰⵙ ⵖⴰⵔ ⵓⴼⵓⵙ ⵏ ⴼⵉⵔⵄⵓⵏ.”
12 ⵉⵏⵏⴰ ⴰⵙ ⵢⵓⵙⵓⴼ: “ⴷ ⵡⴰ ⴷ ⴰⴼⴻⵙⵙⴰⵔ ⵏⵏⴻⵙ: ⵜⵍⴰⵜⴰ ⵏ ⵜⵉⵙⴻⴹⵡⵉⵏ ⴰⵇⴰ ⴷ ⵜⵍⴰⵜⴰ ⵏ ⵡⵓⵙⵙⴰⵏ.
13 ⵄⴰⴷ ⵜⵍⴰⵜⴰ ⵏ ⵡⵓⵙⵙⴰⵏ ⵅⴻⵏⵏⵉ ⴰⴷ ⴰⵛ ⵉⵙⵙⴳⴻⵄⵄⴻⴷ ⴼⵉⵔⵄⵓⵏ ⴰⵥⴻⴵⵉⴼ ⵏⵏⴻⴽ ⵓⵛⴰ ⴰⴷ ⵛⴻⴽ ⵢⴰⵔⵔ ⵖⴰⵔ ⵜⵙⴻⵅⵅⴰⵔⵜ ⵏⵏⴻⴽ, ⴰⴷ ⵜⴻⵙⵙⴻⵄⴷⵓⴷ ⵍⴽⴰⵙ ⵉ ⴼⵉⵔⵄⵓⵏ ⴷⴻⴳ ⵓⴼⵓⵙ ⵏⵏⴻⵙ, ⴰⵎ ⵎⴰⵎⵎⴻⵛ ⵜⵓⵖⴰ ⵜⴰⵙⵖⴰⵔⵜ ⵏⵏⴻⴽ ⵥⵉⵛ ⵍⴰⵎⵉ ⵛⴻⴽ ⵜⵓⵖⴰ ⴷ ⴰⵡⴰⵔⵔⴰⴷ ⵏⵏⴻⵙ.
14 ⵎⴰⵛⴰ ⵄⵇⴻⵍ ⵅⴰⴼⵉ ⵅⵎⵉ ⵉ ⴷ ⴰⵛ ⴷⴷ ⵖⴰ ⵢⴰⵙ ⵍⵅⴰⵔ, ⵜⵜⵥⴰⵡⴳⴻⵖ ⵛⴻⴽ ⴰⴷ ⴰⴽⵉⴷⵉ ⵜⴻⴳⴳⴻⴷ ⵙ ⵜⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ ⵓⵛⴰ ⴻⵊⵊ ⴼⵉⵔⵄⵓⵏ ⴰⴷ ⵅⴰⴼⵉ ⵉⵄⵇⴻⵍ ⵓⵛⴰ ⴼⴻⴽⴽ ⴰⵢⵉ-ⴷⴷ ⵥⵉ ⵜⴰⴷⴷⴰⵔⵜ-ⴰ.
15 ⵎⵉⵏⵥⵉ ⵓⵛⴰⵔⴻⵏ ⴰⵢⵉ ⵥⵉ ⵜⴻⵎⵎⵓⵔⵜ ⵏ ⵉⵄⵉⴱⵔⴰⵏⵉⵢⵢⴻⵏ ⵓ ⴷⴰ ⵡⴰⵔ ⴳⴳⵉⵖ ⵅ ⵎⵉⵏ ⵅⴻⴼ ⴷⴰⵢⵉ ⵉ ⵖⴰ ⴳⴳⴻⵏ ⴷⴻⴳ ⵡⴻⵃⴼⵓⵔ ⵏ ⵉⵎⴻⵃⴱⴰⵙ.”
16 ⵍⴰⵎⵉ ⵉⵥⵔⴰ ⵓⵎⴻⵇⵇⵔⴰⵏ ⵏ ⵉⵅⴻⴱⴱⴰⵥⴻⵏ ⴱⴻⵍⵍⵉ ⵉⴼⴻⵙⵙⴰⵔ ⴰⵙ ⵎⵍⵉⵃ, ⵉⵏⵏⴰ ⵉ ⵢⵓⵙⵓⴼ: “ⵓⵍⴰ ⴷ ⵏⴻⵛⵛ ⵥⵔⵉⵖ ⴷⵉ ⵜⴰⵔⵊⵉⵜ ⵉⵏⵓ ⵜⵍⴰⵜⴰ ⵏ ⵜⵙⵓⴵⴰⵜⵉⵏ ⵙ ⵡⴻⵖⵔⵓⵎ ⴷ ⴰⵛⴻⵎⵍⴰⵍ ⵅ ⵓⵥⴻⴵⵉⴼ ⵉⵏⵓ.
17 ⴷⵉ ⵜⵙⵓⴵⴻⵜ ⵏ ⵙⴻⵏⵏⴻⵊ ⵜⵓⵖⴰ ⴷⴰⵢⴻⵙ ⴰⵟⵟⴰⵙ ⵏ ⵎⴰⵛⵛⴰ ⵉ ⴼⵉⵔⵄⵓⵏ ⵉ ⵉⴳⴳⴰ ⵓⵅⴻⴱⴱⴰⵥ ⵓ ⵉⵊⴹⴰⴹ ⵜⵜᵉⵜⵜⴻⵏ ⵥⵉ ⵜⵙⵓⴵⴻⵜ ⵉ ⵉⴵⴰⵏ ⵅ ⵓⵥⴻⴵⵉⴼ ⵉⵏⵓ.”
18 ⵢⴰⵔⵔⴰ-ⴷⴷ ⵅⴰⵙ ⵢⵓⵙⵓⴼ, ⵉⵏⵏⴰ: “ⴷ ⵡⴰ ⴷ ⴰⴼⴻⵙⵙⴰⵔ ⵏⵏⴻⵙ. ⵜⵍⴰⵜⴰ ⵏ ⵜⵙⵓⴵⴰⵜⵉⵏ ⴷ ⵜⵍⴰⵜⴰ ⵏ ⵡⵓⵙⵙⴰⵏ.
19 ⵄⴰⴷ ⵜⵍⴰⵜⴰ ⵏ ⵡⵓⵙⵙⴰⵏ ⵅⴻⵏⵏⵉ ⴰⴷ ⵅⴰⴽ ⵉⵙⵙⴳⴻⵄⵄⴻⴷ ⴼⵉⵔⵄⵓⵏ ⴰⵥⴻⴵⵉⴼ ⵏⵏⴻⴽ ⵓⵛⴰ ⴰⴷ ⵛⴻⴽ ⵢⴰⵢⴻⵍ ⵅ ⵉⵛⵜ ⵏ ⵜⵛⴻⵊⵊⴰⵔⵜ ⵓ ⵉⵊⴹⴰⴹ ⴰⴷ ⵛⵛⴻⵏ ⴰⵢⵙⵓⵎ ⵏⵏⴻⴽ.” □
20 ⴷⴻⴳ ⵡⴰⵙⵙ ⵡⵉⵙⵙ ⵜⵍⴰⵜⴰ, ⴰⵙⵙ ⵏ ⵡⴻⵅⵍⴰⵇ ⵏ ⴼⵉⵔⵄⵓⵏ, ⵉⵎⵙⴰⵔ ⴱⴻⵍⵍⵉ ⵉⵙⵙⴻⵡⵊⴻⴷ ⵉⵊⵊ ⵏ ⵓⵎⴻⵏⵙⵉ ⵉ ⵎⴰⵔⵔⴰ ⵉⵎⵙⴻⵅⵅⴰⵔⴻⵏ ⵏⵏⴻⵙ ⵓⵛⴰ ⵉⵙⵙⴳⴻⵄⵄⴻⴷ ⴰⵥⴻⴵⵉⴼ ⵏ ⵓⵎⴻⵇⵇⵔⴰⵏ ⵏ ⵉⵡⴰⵔⵔⴰⴷⴻⵏ ⵓ ⴰⵥⴻⴵⵉⴼ ⵏ ⵓⵎⴻⵇⵇⵔⴰⵏ ⵏ ⵉⵅⴻⴱⴱⴰⵥⴻⵏ ⵜⵓⵖⴰ-ⵜ ⵊⴰⵔ ⵉⵎⵙⴻⵅⵅⴰⵔⴻⵏ ⵏⵏⴻⵙ. 21 ⵓⵛⴰ ⵏⴻⵜⵜⴰ ⵢⴰⵔⵔⴰ ⴰⵎⴻⵇⵇⵔⴰⵏ ⵏ ⵉⵡⴰⵔⵔⴰⴷⴻⵏ ⵖⴰⵔ ⵍⵅⴻⴷⵎⴻⵜ ⵏⵏⴻⵙ ⵏ ⵓⵡⴰⵔⵔⴰⴷ, ⵓ ⵡⴰⵏⵉⵜⴰ ⵉⵡⵛⴰ ⵄⴰⵡⴻⴷ ⴰⵖⴰⵔⵔⴰⴼ ⴷⴻⴳ ⵓⴼⵓⵙ ⵏ ⴼⵉⵔⵄⵓⵏ. 22 ⵎⴰⵛⴰ ⴰⵎⴻⵇⵇⵔⴰⵏ ⵏ ⵉⵅⴻⴱⴱⴰⵥⴻⵏ ⵢⵓⵢⴻⵍ ⵉ-ⵜ, ⴰⵎ ⵎⴰⵎⵎⴻⵛ ⴷ ⴰⵙ ⵉⴼⴻⵙⵙⴰⵔ ⵢⵓⵙⵓⴼ. 23 ⵎⴰⵛⴰ ⴰⵎⴻⵇⵇⵔⴰⵏ ⵏ ⵉⵡⴰⵔⵔⴰⴷⴻⵏ ⵡⴰⵔ ⵉⴼⴻⴽⴽⴰⵔ ⵛⴰ ⴷⵉ ⵢⵓⵙⵓⴼ, ⵉⵜⵜⵓ ⵜ.