1 ⵓⵛⴰ ⵉⵏⵏⴰ ⴰⵔⴻⴱⴱⵉ ⵉ ⵢⴰⵄⵇⵓⴱ: “ⴽⴽⴰⵔ, ⴳⴻⵄⵄⴻⴷ ⵖⴰⵔ ⴱⴰⵢⵜ-ⵉⵍ ⵓⵛⴰ ⵇⵇⵉⵎ ⴷⵉⵏ. ⴻⴳⴳ ⴷⵉⵏ ⵉⵊⵊ ⵏ ⵓⵄⴰⵍⵟⴰⵔ ⵎⵉⵏ ⵅⴻⴼ ⵉ ⵖⴰ ⵜⴻⵙⵙⴰⵔⵙⴻⴷ ⵜⴰⵖⴰⵔⵚⵜ ⵉ ⴰⵔⴻⴱⴱⵉ, ⵡⴻⵏⵏⵉ ⴷ ⴰⵛ ⴷⴷ-ⵉⴱⴰⵏⴻⵏ ⵓⵎⵉ ⴷⴷ-ⵜⴰⵔⴻⵡⵍⴻⴷ ⵥⴻⴳ ⵓⵖⴻⵎⴱⵓⴱ ⵏ ⵓⵎⴰⵛ ⵄⵉⵙⵓ.” ^■   2 ⵅⴻⵏⵏⵉ ⵉⵏⵏⴰ ⵢⴰⵄⵇⵓⴱ ⵉ ⵍⵡⴰⵛⵓⵏ ⵏ ⵜⴰⴷⴷⴰⵔⵜ ⵏⵏⴻⵙ ⵓ ⵉ ⵎⴰⵔⵔⴰ ⵉⵏⵏⵉ ⵜⵓⵖⴰ ⴰⴽⵉⴷⴻⵙ: “ⴽⴽⵙⴻⵎ ⵉⵔⴻⴱⴱⵉⵜⴻⵏ ⵉⵖⵔⵉⴱⴻⵏ ⵏⵏⵉ ⵉⴵⴰⵏ ⵊⴰⵔ ⴰⵡⴻⵎ, ⵙⵉⵥⴻⴷⴳⴻⵎ ⵉⵅⴻⴼ ⵏⵡⴻⵎ ⵓⵛⴰ ⴱⴻⴷⴷⵍⴻⵎ ⴰⵔⵔⵓⴹ ⵏⵡⴻⵎ. ^□   3 ⴰⴷ ⵏⴻⴽⴽⴰⵔ, ⴰⴷ ⵏⴳⴻⵄⵄⴻⴷ ⵖⴰⵔ ⴱⴰⵢⵜ-ⵉⵍ. ⵏⴻⵛⵛ ⴰⴷ ⴳⴳⴻⵖ ⴷⵉⵏ ⵉⵊⵊ ⵏ ⵓⵄⴰⵍⵟⴰⵔ ⵉ ⴰⵔⴻⴱⴱⵉ ⵏⵏⵉ ⵅⴰⴼⵉ ⴷⴷ-ⵢⴰⵔⵔⵉⵏ ⴷⴻⴳ ⵡⴰⵙⵙ ⵏ ⵍⴻⵃⵚⴰⵔⴻⵜ ⵉⵏⵓ, ⴷ ⵡⴻⵏⵏⵉ ⵜⵓⵖⴰ ⴰⴽⵉⴷⵉ ⴷⴻⴳ ⵡⴻⴱⵔⵉⴷ ⵏⵏⵉ ⵓⵢⵓⵔⴻⵖ.” 4 ⵓⵛⴰ ⵡⵛⵉⵏ ⵉ ⵢⴰⵄⵇⵓⴱ ⵎⴰⵔⵔⴰ ⵉⵔⴻⴱⴱⵉⵜⴻⵏ ⵉⵖⵔⵉⴱⴻⵏ ⵏⵏⵉ ⵜⵓⵖⴰ ⵖⴰⵔⵙⴻⵏ ⵓⵍⴰ ⴷ ⵜⵉⵅⵔⴰⵥⵉⵏ ⴷⴻⴳ ⵉⵎⴻⵥⵥⵓⵖⴻⵏ ⵏⵙⴻⵏ ⵓⵛⴰ ⵉⴼⴼⴰⵔ ⵉ-ⵜⴻⵏ ⵢⴰⵄⵇⵓⴱ ⵙⴰⴷⵓ ⵜⵛⴻⵊⵊⴰⵔⵜ ⵏ ⵢⵉⴳⴳ ⵉ ⵜⵓⵖⴰ ⵥⵥⴰⵜ ⵉ ⵛⴰⴽⵉⵎ. ^□   5 ⵍⴰⵎⵉ ⴼⴻⵙⵢⴻⵏ ⵉⵇⵉⴹⴰⵏ, ⵓⵢⵓⵔⴻⵏ ⵙⵙⴻⵏⵏⵉ, ⵜⵓⵖⴰ ⵜⵉⴳⴳⵯⵓⴷⵉ ⵏ ⴰⵔⴻⴱⴱⵉ ⵅ ⵜⵏⴻⴷⴷⴰⵎ ⵏⵏⵉ ⵜⵓⵖⴰ ⴷⵉ ⵊⵊⵡⴰⵢⴻⵀ ⵉ ⴷ ⴰⵙⴻⵏ ⴷⴷ-ⵉⵏⵏⴹⴻⵏ ⴰⵍⴰⵎⵉ ⵏⵉⵜⵏⵉ ⵡⴰⵔ ⴹⴻⴼⴼⴰⵔⴻⵏ ⵉⵃⴻⵏⵊⵉⵔⴻⵏ ⵏ ⵢⴰⵄⵇⵓⴱ. 6 ⴰⵎⵎⵓ ⵉ ⵢⵉⵡⴻⴹ ⵢⴰⵄⵇⵓⴱ ⵖⴰⵔ ⵍⵓⵥ ⴷⵉ ⵜⴻⵎⵎⵓⵔⵜ ⵏ ⴽⴻⵏⵄⴰⵏ, ⴰⵇⴰ-ⵜⵜ ⴷ ⴱⴰⵢⵜ-ⵉⵍ, ⵏⴻⵜⵜⴰ ⴷ ⵎⴰⵔⵔⴰ ⵍⴳⴻⵏⵙ ⵉ ⵜⵓⵖⴰ ⴰⴽⵉⴷⴻⵙ. 7 ⵓⵛⴰ ⵉⴱⵏⴰ ⴷⵉⵏ ⵉⵊⵊ ⵏ ⵓⵄⴰⵍⵟⴰⵔ ⵓⵛⴰ ⵉⵍⴰⵖⴰ ⵉ ⵡⴻⵎⵛⴰⵏ ⵏⵏⵉ ⵉⵍ-ⴱⴰⵢⵜ-ⵉⵍ, ⵎⵉⵏⵥⵉ ⴷⵉⵏⵏⵉ ⵉ ⴷ ⴰⵙ ⴷⴷ-ⵉⴹⵀⴰⵔ ⴰⵔⴻⴱⴱⵉ, ⵓⵎⵉ ⴷⴷ-ⵢⴰⵔⵡⴻⵍ ⵥⴻⴳ ⵓⵖⴻⵎⴱⵓⴱ ⵏ ⵓⵎⴰⵙ. ^■  

8 ⵜⴻⵎⵎⵓⵜ ⴷⵉⴱⵓⵔⴰ, ⵜⴰⵎⴻⵙⵙⴻⵟⵟⴰⴹⵜ ⵏ ⵔⵉⴼⵇⴰ ⵓⵛⴰ ⵏⴻⴹⵍⴻⵏ ⵙⵡⴰⴷⴷⴰⵢ ⵉ ⴱⴰⵢⵜ-ⵉⵍ, ⵙⴰⴷⵓ ⵜⴰⴱⴻⴵⵓⴹⵜ ⵓⵛⴰ ⵉⵍⴰⵖⴰ ⵉⵙⴻⵎ ⵏⵏⴻⵙ ‘ⴰⵍⵍⵓⵏ-ⴱⴰⴽⵓⵜ’, ⴰⵇⴰ-ⵜⵜ ⴷ ‘ⵜⴰⴱⴻⴵⵓⴹⵜ ⵏ ⵉⵎⴻⵟⵟⴰⵡⴻⵏ’. 9 ⵉⴹⵀⴰⵔ ⴰⵙ-ⴷⴷ ⵄⴰⵡⴻⴷ ⴰⵔⴻⴱⴱⵉ ⵉ ⵢⴰⵄⵇⵓⴱ ⵓⵎⵉ ⴷⴷ-ⵉⴷⵡⴻⵍ ⵥⵉ ⴼⴰⴷⴰⵏ-ⴰⵔⴰⵎ ⵓⵛⴰ ⵉⴱⴰⵔⴽ ⵉ-ⵜ. ^■  

10 ⵉⵏⵏⴰ ⴰⵙ ⴰⵔⴻⴱⴱⵉ: “ⵉⵙⴻⵎ ⵏⵏⴻⴽ ⴷ ⵢⴰⵄⵇⵓⴱ. ⵣⵉ ⵙⵙⴰ ⴷ ⵜⵙⴰⵡⴻⵏⵜ ⵡⴰⵔ ⵜⵜⴻⴳⴳⴻⵏ ⵄⴰⴷ ⵉⵙⴻⵎ ⵏⵏⴻⴽ ⵢⴰⵄⵇⵓⴱ, ⵎⴰⵛⴰ ⵉⵙⵔⴰⵉⵍ, ⴷ ⵡⴰ ⵉ ⵖⴰ ⵢⵉⵍⵉⵏ ⴷ ⵉⵙⴻⵎ ⵏⵏⴻⴽ.” ⵓⵛⴰ ⵉⵙⴻⵎⵎⴰ ⵜ ⵉⵙⵔⴰⵉⵍ. ^■  

11 ⵉⵏⵏⴰ ⴰⵙ ⴰⵔⴻⴱⴱⵉ: “ⵏⴻⵛⵛ ⴷ ⴰⵔⴻⴱⴱⵉ, ⴰⵎⵥⴻⵎⵎⴰⵔ ⵅ ⴽⵓⵍⵛⵉ! ⴳⴳⴻⵎ ⵍⵖⵉⴵⴻⵜ, ⵜⴻⵎⵎⴰⵔⵏⵢⴻⵎ! ⵣⵥⴰⵢⴻⴽ ⵉ ⵖⴰ ⵉⴼⴼⴻⵖ ⵉⵊⵊ ⵏ ⵍⴳⴻⵏⵙ, ⵡⴰⵀ, ⴷ ⵉⵊⵊ ⵏ ⵡⴻⴳⵔⴰⵡ ⵏ ⵍⴻⴳⵏⵓⵙ ⴰⴷ ⴼⴼⵖⴻⵏ ⵥⵥⴰⵢⴻⴽ ⵓ ⵉⵊⴻⴵⵉⴷⴻⵏ ⴰⴷ ⴼⴼⵖⴻⵏ ⵥⵉ ⵜⴻⵊⵄⵉⵏⵏⴰ ⵏⵏⴻⴽ. ^■  

12 ⴷ ⵜⴻⵎⵎⵓⵔⵜ-ⴰ ⵉ ⵡⵛⵉⵖ ⵉ ⵉⴱⵔⴰⵀⵉⵎ ⴷ ⵉⵙⵃⴰⵇ, ⵉ ⵛⴻⴽ ⵓⵎⵉ ⵜⵜ ⵉ ⵖⴰ ⵡⵛⴻⵖ ⵓⵍⴰ ⵉ ⵥⵥⴰⵔⵉⵄⴻⵜ ⵏⵏⴻⴽ ⴰⵡⴰⵔⵏⵉ ⴰⵛ ⴰⴷ ⵡⵛⴻⵖ ⵜⴰⵎⵎⵓⵔⵜ.”

13 ⵅⴰⵙ ⵓⵛⴰ ⵉⴳⴻⵄⵄⴻⴷ ⴰⵔⴻⴱⴱⵉ ⵙⴻⵏⵏⴻⵊ ⵥⴻⴳ ⵡⴻⵎⵛⴰⵏ ⵎⴰⵏⵉ ⴽⵉⴷⴻⵙ ⵉⵙⵙⵉⵡⴻⵍ.

14 ⵢⴰⵄⵇⵓⴱ ⵉⵙⵙⴳⴻⵄⵄⴻⴷ ⵉⵊⵊ ⵏ ⵡⴻⵥⵔⵓ ⵏ ⵍⵉⴷⴰⵔⴻⵜ ⴷⴻⴳ ⵡⴻⵎⵛⴰⵏ ⵎⴰⵏⵉ ⴽⵉⵙ ⵉⵙⵙⵉⵡⴻⵍ, ⵉⵊⵊ ⵏ ⵡⴻⵥⵔⵓ ⵏ ⵍⵉⴷⴰⵔⴻⵜ. ⵉⵙⴻⵢⵢⴻⴱ ⵅⴰⵙ ⵉⵛⵜ ⵏ ⵜⴻⵡⵀⵉⴱⵜ ⵏ ⵓⵙⴻⵢⵢⴻⴱ ⵓⵛⴰ ⵉⴼⴰⵔⵔⴻⵖ ⵥⵥⴻⵛⵜ ⵅ ⵓⵥⴻⴵⵉⴼ ⵏⵏⴻⵙ. ^■  

15 ⵉⴳⴳⴰ ⵢⴰⵄⵇⵓⴱ ⵉⵙⴻⵎ ⵏ ⵡⴻⵎⵛⴰⵏ ⵎⴰⵏⵉ ⴽⵉⴷⴻⵙ ⵉⵙⵙⵉⵡⴻⵍ ⴰⵔⴻⴱⴱⵉ ‘ⴱⴰⵢⵜ-ⵉⵍ!’

16 ⴼⴻⵙⵢⴻⵏ ⵏⵉⵜⵏⵉ ⵉⵇⵉⴹⴰⵏ ⵏⵙⴻⵏ, ⴼⴼⵖⴻⵏ ⵥⵉ ⴱⴰⵢⵜ-ⵉⵍ ⵓⵛⴰ ⵓⵎⵉ ⵜⵓⵖⴰ ⴳⴳⵓⵔ ⴰⴷ ⴰⵡⴹⴻⵏ ⵖⴰⵔ ⵉⴼⵔⴰⵜⴰ, ⵅⴻⵏⵏⵉ ⵜⵓⵔⵓⵡ-ⴷⴷ ⵔⴰⵃⵉⵍ ⵓ ⵜⴻⵄⴷⵓ ⵅⴰⵙ ⵜⴰⵔⵡⴰ ⵜⴻⵇⵙⴻⵃ. ^□  

17 ⵉⵎⵙⴰⵔ, ⵓⵎⵉ ⵜⴻⵖⵖⵓⴹⴻⴷ ⴷⵉ ⵜⴰⵔⵡⴰ ⵏⵏⴻⵙ, ⵜⴻⵏⵏⴰ ⴰⵙ ⵍⵇⴰⴱⵍⴰ: “ⵡⴰⵔ ⵜⵜⴻⴳⴳⵯⴻⴷ, ⴰⵇⴰ ⵡⴰ ⵄⴰⵡⴻⴷ ⴰⴷ ⵢⵉⵍⵉ ⴷ ⵎⵎⵉⵎ!”

18 ⵍⴰⵎⵉ ⵜⴻⴹⵍⴻⵇ ⵉ ⴱⵓⵃⴱⴻⵍ, ⵎⵉⵏⵥⵉ ⵜⴻⵎⵎⵓⵜ ⴷⵉⵏ, ⴰⵇⴰ ⵜⵍⴰⵖⴰ ⴰⵙ ⴱⵉⵏ-ⵓⵏⵉ, ⵎⴰⵛⴰ ⴱⴰⴱⴰⵙ ⵉⵍⴰⵖⴰ ⴰⵙ ⴱⵉⵏⵢⴰⵎⵉⵏ. ^□  

19 ⴰⵎⵎⵓ ⵉ ⵜⴻⵎⵎⵓⵜ ⵔⴰⵃⵉⵍ ⵓⵛⴰ ⵏⴻⴹⵍⴻⵏⵜ ⵜⵜ ⴷⴻⴳ ⵡⴻⴱⵔⵉⴷ ⵖⴰⵔ ⵉⴼⵔⴰⵜⴰ, ⵉⵅⵙ ⴰⴷ ⵢⵉⵏⵉ ⴱⴰⵢⵜ-ⵍⴰⵃⵎ. ^■   20 ⵓⵛⴰ ⵉⴳⴳⴰ ⵢⴰⵄⵇⵓⴱ ⵉⵊⵊ ⵏ ⵡⴻⵥⵔⵓ ⵏ ⵍⵉⴷⴰⵔⴻⵜ ⵅ ⵡⴻⵏⴹⴻⵍ ⵏⵏⴻⵙ. ⴷ ⵡⴰ ⴷ ⴰⵥⵔⵓ ⵏ ⵍⵉⴷⴰⵔⴻⵜ ⵏ ⵔⴰⵃⵉⵍ ⵅ ⵡⴻⵏⴹⴻⵍ ⵏ ⵔⴰⵃⵉⵍ ⴰⵍ ⴰⵙⵙ-ⴰ.

21 ⵅⴰⵙ ⵓⵛⴰ ⵉⴼⵙⵉ ⵉⵙⵔⴰⵉⵍ ⵉⵇⵉⴹⴰⵏ ⵓⵛⴰ ⵉⵡⵜⴰ ⵉⵇⵉⴹⴰⵏ ⵏⵏⴻⵙ ⵅ ⵓⵄⴻⴷⴷⵓ ⵏ ⵎⴰⵊⴷⴰⵍ-ⵄⵉⴷⵔ.

22 ⵓⵎⵉ ⵉⵥⴷⴻⵖ ⵉⵙⵔⴰⵉⵍ ⴷⵉ ⵜⴻⵎⵎⵓⵔⵜ ⵏⵏⵉ, ⵉⵎⵙⴰⵔ ⴱⴻⵍⵍⵉ ⵔⵓⴱⵉⵏ ⵉⵔⵓⵃ ⵉⵟⵟⴻⵚ ⴰⴽ-ⴷ ⴱⵉⵍⵀⴰ, ⵜⴰⵢⵢⴰ ⵏ ⴱⴰⴱⴰⵙ, ⵓⵛⴰ ⵢⵉⵡⴻⴹ ⴰⴷ ⵜ ⵉⴼⵀⴻⵎ ⵉⵙⵔⴰⵉⵍ. ⴰⵇⴰ ⴷⵉ ⵍⵡⴻⵇⵜ ⵏⵏⵉ ⴰⵢⵜ ⵏ ⵢⴰⵄⵇⵓⴱ ⵉⵡⴹⴻⵏ ⵜⴻⵏⵄⴰⵛ. ^■   23 ⵜⴰⵔⵡⴰ ⵏ ⵍⵉⵢⴰ ⵜⵓⵖⴰ ⴰⵜⴻⵏ: ⵔⵓⴱⵉⵏ, ⴰⵎⴻⵏⵥⵓ ⵏ ⵢⴰⵄⵇⵓⴱ ⴷ ⵛⵉⵎⵄⵓⵏ ⴷ ⵍⴰⵡⵉ ⴷ ⵢⴰⵀⵓⴷⴰ ⴷ ⵉⵙⵙⴰⴽⴰⵔ ⴷ ⵣⴰⴱⵓⵍⵓⵏ. ^■   24 ⵜⴰⵔⵡⴰ ⵏ ⵔⴰⵃⵉⵍ ⵜⵓⵖⴰ ⴰⵜⴻⵏ: ⵢⵓⵙⵓⴼ ⴷ ⴱⵉⵏⵢⴰⵎⵉⵏ. 25 ⵜⴰⵔⵡⴰ ⵏ ⴱⵉⵍⵀⴰ, ⵜⴰⵢⵢⴰ ⵏ ⵔⴰⵃⵉⵍ, ⵜⵓⵖⴰ ⴰⵜⴻⵏ: ⴷⴰⵏ ⴷ ⵏⴰⴼⵜⴰⵍⵉ. 26 ⵜⴰⵔⵡⴰ ⵏ ⵣⵉⵍⴱⴰ, ⵜⴰⵢⵢⴰ ⵏ ⵍⵉⵢⴰ, ⵜⵓⵖⴰ ⴰⵜⴻⵏ: ⵊⴰⴷ ⴷ ⴰⵛⵉⵔ. ⵉⵏⴰ ⵜⵓⵖⴰ ⴰⵜⴻⵏ ⴷ ⵉⵃⴻⵏⵊⵉⵔⴻⵏ ⵏ ⵢⴰⵄⵇⵓⴱ ⵉⵏⵏⵉ ⴷ ⴰⵙ ⴷⴷ-ⵉⵜⵜⵡⴰⵅⴻⵍⵇⴻⵏ ⴷⵉ ⴼⴰⴷⴰⵏ-ⴰⵔⴰⵎ.

27 ⵓⵛⴰ ⵢⵓⵙⴰ-ⴷⴷ ⵢⴰⵄⵇⵓⴱ ⵖⴰⵔ ⴱⴰⴱⴰⵙ ⵉⵙⵃⴰⵇ ⴷⵉ ⵎⴰⵎⵔⵉ, ⴷⵉ ⵜⴻⵏⴷⵉⵏⵜ ⵏ ⴰⵔⴱⴰⵄ, ⵜⴻⵏⵏⵉ ⵉⴵⴰⵏ ⴷ ⵜⴰⵏⴷⵉⵏⵜ ⵏ ⵃⴰⴱⵔⵓⵏ, ⵎⴰⵏⵉ ⵜⵓⵖⴰ ⵉⴱⵔⴰⵀⵉⵎ ⵉⵥⴻⴷⴷⴻⵖ ⴰⵎ ⵓⴱⴰⵔⵔⴰⵏⵉ, ⵓⵛⴰ ⵉⵙⵃⴰⵇ ⴰⵎⴻⵏⵏⵉ ⵍⴻⵅⵅⵓ. ^□   28 ⵉⴷⴷⴰⵔ ⵉⵙⵃⴰⵇ ⵎⵢⴰ ⵓ-ⵜⵎⴰⵏⵢⵉⵏ ⵏ ⵉⵙⴻⴳⴳⵯⵓⵙⴰ. ^□   29 ⵉⴹⵍⴻⵇ ⵉⵙⵃⴰⵇ ⵉ ⴱⵓⵃⴱⴻⵍ, ⵉⵎⵎⵓⵜ ⵓⵛⴰ ⵉⵎⵓⵏ ⴰⴽ-ⴷ ⵍⴻⵊⴷⵓⴷ ⵏⵏⴻⵙ, ⵉⵡⵙⴰⵔ, ⵉⵊⵊⵉⵡⴻⵏ ⵥⵉ ⵜⵓⴷⴰⵔⵜ ⵓⵛⴰ ⵄⵉⵙⵓ ⴷ ⵢⴰⵄⵇⵓⴱ, ⵉⵃⴻⵏⵊⵉⵔⴻⵏ ⵏⵏⴻⵙ, ⵏⴻⴹⵍⴻⵏ ⵜ. ^■