1 ⵓⵛⴰ ⵉⵙⵍⴰ ⵢⴰⵄⵇⵓⴱ ⴰⵡⴰⵍⴻⵏ ⵏ ⵉⵃⴻⵏⵊⵉⵔⴻⵏ ⵏ ⵍⴰⴱⴰⵏ, ⵏⵏⴰⵏ: “ⵢⴰⵄⵇⵓⴱ ⵉⴽⵙⵉ ⵎⴰⵔⵔⴰ ⵎⵉⵏ ⵜⵓⵖⴰ ⵏ ⴱⴰⴱⴰⵜⵏⴻⵖ, ⵓ ⵙ ⵎⵉⵏ ⵜⵓⵖⴰ ⵏ ⴱⴰⴱⴰⵜⵏⴻⵖ ⴰⵇⴰ ⵉⴽⵙⴻⴱ ⵎⴰⵔⵔⴰ ⴰⵄⵓⴵⵉ ⴰⵢⴰ.” ^□   2 ⵉⵅⵥⴰⵔ ⵢⴰⵄⵇⵓⴱ ⵖⴰⵔ ⵓⵖⴻⵎⴱⵓⴱ ⵏ ⵍⴰⴱⴰⵏ. ⵅⵥⴰⵔ, ⵡⴰⵔ ⴰⴽⵉⴷⴻⵙ ⵉⴵⵉ ⴰⵎⴻⵛⵏⴰⵡ ⵉⴹⴻⵏⵏⴰⴹ ⴷ ⴼⴰⵔⵉⴹⴻⵏⵏⴰⴹ. 3 ⵉⵏⵏⴰ ⵙⵉⴷⵉ ⵉ ⵢⴰⵄⵇⵓⴱ: “ⴷⵡⴻⵍ ⵖⴰⵔ ⵜⴻⵎⵎⵓⵔⵜ ⵏ ⵍⴻⵊⴷⵓⴷ ⵏⵏⴻⴽ ⵓ ⵖⴰⵔ ⵍⴰⴵ ⵏⵏⴻⴽ. ⴰⵇⴰ ⵏⴻⵛⵛ ⴰⴷ ⵉⵍⵉⵖ ⴰⴽⵉⴷⴻⴽ.” 4 ⵉⵙⴻⴽⴽ ⵢⴰⵄⵇⵓⴱ ⵓⵛⴰ ⵉⵍⴰⵖⴰ-ⴷⴷ ⵅ ⵔⴰⵃⵉⵍ ⴷ ⵍⵉⵢⴰ ⵖⴰⵔ ⵢⴻⵢⵢⴰⵔ, ⵖⴰⵔ ⵡⵓⴵⵉ ⵏⵏⴻⵙ. 5 ⵉⵏⵏⴰ ⴰⵙⴻⵏⵜ: “ⵜⵜⵡⴰⵍⵉⵖ ⴱⴻⵍⵍⵉ ⴰⵖⴻⵎⴱⵓⴱ ⵏ ⴱⴰⴱⴰⵜⴽⴻⵏⵜ ⵡⴰⵔ ⴽⵉⴷⵉ ⵉⴵⵉ ⴰⵎⴻⵛⵏⴰⵡ ⵉⴹⴻⵏⵏⴰⴹ ⴷ ⴼⴰⵔⵉⴹⴻⵏⵏⴰⴹ. ⵎⴰⵛⴰ ⴰⵔⴻⴱⴱⵉ ⵏ ⵍⴻⵊⴷⵓⴷ ⵉⵏⵓ ⴰⵇⴰ-ⵜ ⴰⴽⵉⴷⵉ. 6 ⴽⴻⵏⵏⵉⵏⵜ ⵜⴻⵙⵙⵏⴻⵏⵜ ⴱⴻⵍⵍⵉ ⴰⵇⴰ ⵅⴻⴷⵎⴻⵖ ⵉ ⴱⴰⴱⴰⵜⴽⴻⵏⵜ ⵙ ⵎⴰⵔⵔⴰ ⵎⵉⵏ ⵖⴰⵔⵉ ⴷ ⵊⵊⴻⵀⴷ. 7 ⵎⴰⵛⴰ ⴱⴰⴱⴰⵜⴽⴻⵏⵜ ⵉⵖⴻⵛⵛ ⴰⵢⵉ, ⵉⴱⴻⴷⴷⴻⵍ ⵍⵎⵓⵏⴻⵜ ⵉⵏⵓ ⵄⴻⵛⵔⴰ ⵏ ⵜⵡⴰⵍⴰⵡⵉⵏ, ⵎⴰⵛⴰ ⴰⵔⴻⴱⴱⵉ ⵡⴰⵔ ⴷ ⴰⵙ ⵉⵙⴻⵎⵎⴻⵃ ⵃⵉⵎⴰ ⴰⴷ ⴰⵢⵉ ⵉⴳⴳ ⵍⵖⴰⵔ. 8 ⵎⴰⵍⴰ ⵏⴻⵜⵜⴰ ⵉⵏⵏⴰ: ‘ⵉⴱⴻⵇⵇⵉⴹⴻⵏ ⴰⴷ ⵉⵍⵉⵏ ⴷ ⵍⵎⵓⵏⴻⵜ ⵏⵏⴻⴽ!’, ⵍⴻⵅⴷⴻⵏⵏⵉ ⵎⴰⵔⵔⴰ ⵓⴵⵉ ⵓⵔⵡⴻⵏ-ⴷⴷ ⵓⴵⵉ ⵙ ⵉⴱⴻⵇⵇⵉⴹⴻⵏ, ⵎⴰⵍⴰ ⵉⵏⵏⴰ: ‘ⵉⵏⵏⵉ ⵙ ⵉⵛⴰⵔⵉⴹⴻⵏ ⴰⴷ ⵉⵍⵉⵏ ⴷ ⵍⵎⵓⵏⴻⵜ ⵏⵏⴻⴽ!’, ⵍⴻⵅⴷⴻⵏⵏⵉ ⵎⴰⵔⵔⴰ ⵓⴵⵉ ⵓⵔⵡⴻⵏⵜ-ⴷⴷ ⵓⴵⵉ ⵙ ⵉⵛⴰⵔⵉⴹⴻⵏ. 9 ⴰⵎⵎⵓ ⵉⴽⴽⴻⵙ ⴰⵔⴻⴱⴱⵉ ⵍⴻⴱⵀⴰⵢⴻⵎ ⵏ ⴱⴰⴱⴰⵜⴽⴻⵏⵜ ⵓⵛⴰ ⵉⵡⵛⴰ ⴰⵢⵉ ⵜⴻⵏⵜ ⵉ ⵏⴻⵛⵛ.

10 ⵉⵎⵙⴰⵔ ⵖⴰⵔ ⵍⵡⴻⵇⵜ ⵓⵎⵉ ⵡⴻⵃⵃⵎⴻⵏⵜ ⵓⴵⵉ, ⵙⵙⴳⴻⵄⵄⴷⴻⵖ ⵜⴰⵎⵓⵖⵍⵉ ⵉⵏⵓ ⵓⵛⴰ ⵥⵔⵉⵖ ⴷⵉ ⵜⴰⵔⵊⵉⵜ, ⴰⵇⴰ ⴷⴰ ⵉⵖⴰⵢⴹⴻⵏ ⵉⵏⵏⵉ ⵉⵏⴻⴳⴳⵥⴻⵏ ⵅ ⵡⵓⴵⵉ, ⵜⵓⵖⴰ ⴰⵜⴻⵏ ⵙ ⵉⵛⴰⵔⵉⴹⴻⵏ ⴷ ⵉⴱⴻⵇⵇⵉⴹⴻⵏ ⴷ ⵉⵇⴰⵔⵇⴰⵛⴻⵏ.

11 ⵉⵏⵏⴰ ⴰⵢⵉ ⵍⵎⴰⵍⴰⴽ ⵏ ⴰⵔⴻⴱⴱⵉ ⴷⵉ ⵜⴰⵔⵊⵉⵜ ‘ⵢⴰⵄⵇⵓⴱ!’ ⵏⴻⵛⵛ ⵏⵏⵉⵖ ‘ⴰⵇⴰ ⴰⵢⵉ ⴷⴰ!’

12 ⵉⵏⵏⴰ: ‘ⵏⴹⴰⵔ ⵜⵉⵟⵟⴰⵡⵉⵏ ⵏⵏⴻⴽ, ⵅⵥⴰⵔ, ⵎⴰⵔⵔⴰ ⵉⵖⴰⵢⴹⴻⵏ, ⵉⵏⵏⵉ ⵉⵏⴻⴳⴳⵥⴻⵏ ⵅ ⵡⵓⴵⵉ, ⴰⵇⴰ ⴰⵜⴻⵏ ⵙ ⵉⵛⴰⵔⵉⴹⴻⵏ ⴷ ⵉⴱⴻⵇⵇⵉⴹⴻⵏ ⴷ ⵉⵇⴰⵔⵇⴰⵛⴻⵏ, ⵎⵉⵏⵥⵉ ⵏⴻⵛⵛ ⵥⵔⵉⵖ ⵎⴰⵔⵔⴰ ⵎⵉⵏ ⴷ ⴰⵛ ⵉⵜⵜⴻⴳⴳ ⵍⴰⴱⴰⵏ.

13 ⵏⴻⵛⵛ ⴷ ⴰⵔⴻⴱⴱⵉ ⵏ ⴱⴰⵢⵜ-ⵉⵍ, ⵎⴰⵏⵉ ⵜⴷⴻⵀⵏⴻⴷ ⴰⵥⵔⵓ ⵏ ⵍⵉⴷⴰⵔⴻⵜ ⵓ ⵎⴰⵏⵉ ⴷ ⴰⵢⵉ ⵜⴻⵡⵛⵉⴷ ⴰⵡⴰⵍ. ⴽⴽⴰⵔ ⵍⴻⵅⵅⵓ, ⴼⴼⴻⵖ ⵥⵉ ⵜⴻⵎⵎⵓⵔⵜ-ⴰ, ⵄⵇⴻⴱ ⵖⴰⵔ ⵜⴻⵎⵎⵓⵔⵜ ⵎⴰⵏⵉ ⵜⵅⴻⵍⵇⴻⴷ.’ ” ^■  

14 ⵅⴻⵏⵏⵉ ⴰⵔⵔⵉⵏⵜ-ⵉ-ⴷⴷ ⵔⴰⵃⵉⵍ ⴷ ⵍⵉⵢⴰ, ⵏⵏⴰⵏⵜ ⴰⵙ: “ⵎⴰ ⴷⵉⵏ ⵄⴰⴷ ⵛⴰ ⵏ ⵜⴻⵙⵖⴰⵔⵜ ⵏⵉⵖ ⵉⵛⵜ ⵏ ⵍⵡⴰⵔⵜ ⵉ ⵏⴻⵛⵛⵉⵏ ⴷⵉ ⵜⴰⴷⴷⴰⵔⵜ ⵏ ⴱⴰⴱⴰⵜⵏⴻⵖ?

15 ⵎⴰ ⵡⴰⵔ ⵏⴻⵜⵜⵡⵉⵃⵙⵉⴱ ⴰⵎⴻⵛⵏⴰⵡ ⵜⵉⴱⴰⵔⵔⴰⵏⵉⵢⵢⵉⵏ? ⴰⵇⴰ ⵏⴻⵜⵜⴰ ⵉⵥⵥⴻⵏⵥ ⴰⵏⴻⵖ ⵓ ⵏⴻⵜⵜⴰ ⴰⵇⴰ ⵉⵇⴻⵟⵟⴰ ⵎⴰⵔⵔⴰ ⵏⵏⵓⵇⴰⵔⵜ ⵏⵏⴻⵖ.

16 ⵎⵉⵏⵥⵉ ⵎⴰⵔⵔⴰ ⴰⴳⵍⴰ ⵏⵏⵉ ⵉⴽⴽⴻⵙ ⴰⵔⴻⴱⴱⵉ ⵉ ⴱⴰⴱⴰⵜⵏⴻⵖ, ⵏⵏⴻⵖ ⵉ ⵉⴵⴰ ⵓ ⵏ ⵉⵃⴻⵏⵊⵉⵔⴻⵏ ⵏⵏⴻⵖ. ⵍⴻⵅⵅⵓ ⵄⴰⴷ, ⴻⴳⴳ ⵎⴰⵔⵔⴰ ⵎⵉⵏ ⴷ ⴰⵛ ⵉⵏⵏⴰ ⴰⵔⴻⴱⴱⵉ.”

17 ⵅⴻⵏⵏⵉ ⵉⴽⴽⴰⵔ ⵢⴰⵄⵇⵓⴱ ⵓⵛⴰ ⵉⵙⵙⴳⴻⵄⵄⴻⴷ ⵉⵃⴻⵏⵊⵉⵔⴻⵏ ⵏⵏⴻⵙ ⴷ ⵜⴻⵎⵖⴰⵔⵉⵏ ⵏⵏⴻⵙ ⵅ ⵉⵍⴻⵖⵎⴰⵏ.

18 ⵉⴳⴳⴰ ⴷⴻⴳ ⵡⴻⴱⵔⵉⴷ ⵎⴰⵔⵔⴰ ⵍⴻⴱⵀⴰⵢⴻⵎ ⵏⵏⴻⵙ ⴷ ⵎⴰⵔⵔⴰ ⴰⴳⵍⴰ ⵏⵏⴻⵙ ⵏⵏⵉ ⴷⴷ-ⵉⴽⵙⴻⴱ, ⴰⵇⴰ ⵍⴻⴱⵀⴰⵢⴻⵎ ⵏⵏⵉ ⵉⵟⵟⴻⴼ, ⵉⵏⵏⵉ ⴷⴷ-ⵉⴽⵙⴻⴱ ⴷⵉ ⴼⴰⴷⴰⵏ-ⴰⵔⴰⵎ, ⵃⵉⵎⴰ ⴰⴷ ⴷⴷ-ⵉⵄⵇⴻⴱ ⵖⴰⵔ ⵉⵙⵃⴰⵇ, ⴱⴰⴱⴰⵙ, ⴷⵉ ⵜⴻⵎⵎⵓⵔⵜ ⵏ ⴽⴻⵏⵄⴰⵏ.

19 ⵓⵎⵉ ⵉⵔⵓⵃ ⵍⴰⴱⴰⵏ ⵖⴰⵔ ⵜⵉⵍⵙⴰ ⵏ ⵡⵓⴵⵉ ⵏⵏⴻⵙ, ⵜⵓⵛⴰⵔ ⵔⴰⵃⵉⵍ ⵍⴻⵅⵢⴰⵍⴰⵜ ⵉⵎⴻⵥⵢⴰⵏⴻⵏ ⵏ ⵍ’ⴰⵚⵏⴰⵎ ⵏ ⴱⴰⴱⴰⵙ. 20 ⵢⴰⵄⵇⵓⴱ ⵉⵅⴷⴻⵄ ⵍⴰⴱⴰⵏ, ⴰⵔⴰⵎⵉⵢⵓ, ⵍⴰⵎⵉ ⵡⴰⵔ ⴷ ⴰⵙ ⵉⵄⵍⵉⵎ ⴰⵇⴰ ⴰⴷ ⵢⴰⵔⵡⴻⵍ. 21 ⵢⴰⵔⵡⴻⵍ ⵙ ⵎⴰⵔⵔⴰ ⵎⵉⵏ ⵖⴰⵔⴻⵙ. ⵉⴽⴽⴰⵔ, ⵉⵥⵡⴰ ⵉⵖⵥⴰⵔ ⵏ ⵍⴼⵓⵔⴰⵟ ⵓⵛⴰ ⵢⴰⵔⵔⴰ ⴰⵥⴻⴵⵉⴼ ⵏⵏⴻⵙ ⵖⴰⵔ ⵡⴻⴷⵔⴰⵔ ⵏ ⵊⵉⵍⵄⴰⴷ. ^□  

22 ⴷⴻⴳ ⵡⴰⵙⵙ ⵡⵉⵙⵙ ⵜⵍⴰⵜⴰ ⵅⴻⴱⴱⴰⵔⴻⵏ ⵍⴰⴱⴰⵏ, ⴰⵇⴰ ⵢⴰⵔⵡⴻⵍ ⵢⴰⵄⵇⵓⴱ. 23 ⵅⴻⵏⵏⵉ ⵢⵉⵡⵉ ⴰⵢⵜⵎⴰⵙ ⴰⴽⵉⴷⴻⵙ, ⵉⵔⵓⵃ ⴰⵡⴰⵔⵏⵉ ⴰⵙ ⵜⵉⵛⵍⵉ ⵏ ⵙⴻⴱⵄⴰ ⵏ ⵡⵓⵙⵙⴰⵏ, ⵉⵅⴻⵛⵛ ⵅⴰⵙ ⴷⴻⴳ ⵉⴷⵓⵔⴰⵔ ⵏ ⵊⵉⵍⵄⴰⴷ. 24 ⵓⵛⴰ ⵢⵓⵙⴰ-ⴷⴷ ⴰⵔⴻⴱⴱⵉ ⵖⴰⵔ ⵍⴰⴱⴰⵏ, ⴰⵔⴰⵎⵉⵢⵓ, ⴷⵉ ⵜⴰⵔⵊⵉⵜ ⴷⵉ ⴵⵉⵔⴻⵜ, ⵉⵏⵏⴰ ⴰⵙ: “ⵖⴰⵔⴻⴽ ⴰⴷ ⵜⴻⵙⵙⵉⵡⵍⴻⴷ ⵙ ⵍⵅⴰⵔ ⵏⵉⵖ ⵙ ⵍⵖⴰⵔ ⴰⴽ-ⴷ ⵢⴰⵄⵇⵓⴱ.” 25 ⵉⵔⴻⵃⵃⴻⴳ ⵅⴻⵏⵏⵉ ⵍⴰⴱⴰⵏ ⵅ ⵢⴰⵄⵇⵓⴱ. ⵢⴰⵄⵇⵓⴱ ⵜⵓⵖⴰ ⵉⵡⵜⴰ ⴰⵇⵉⴹⵓⵏ ⵏⵏⴻⵙ ⴷⴻⴳ ⵉⴷⵓⵔⴰⵔ. ⵍⴰⴱⴰⵏ ⵄⴰⵡⴻⴷ ⵉⵡⵜⴰ ⵉⵇⵉⴹⴰⵏ ⵏⵏⴻⵙ ⴰⴽ-ⴷ ⴰⵢⵜⵎⴰⵙ ⴷⴻⴳ ⵉⴷⵓⵔⴰⵔ ⵏ ⵊⵉⵍⵄⴰⴷ. 26 ⵅⴻⵏⵏⵉ ⵉⵏⵏⴰ ⵍⴰⴱⴰⵏ ⵉ ⵢⴰⵄⵇⵓⴱ: “ⵎⵉⵏ ⵜⴻⴳⴳⵉⴷ, ⵜⴻⵥⵡⵉⴷ ⴰⵢⵉ ⵓⵍ ⵓⵛⴰ ⵜⵉⵡⵢⵉⴷ-ⴷⴷ ⵢⴻⵙⵙⵉ ⴰⵎⴻⵛⵏⴰⵡ ⵜⵉⵎⴻⵃⴱⴰⵙ ⵏ ⴳⴰⵔⵔⴰ? 27 ⵎⴰⵢⴻⵎⵎⵉ ⵜⴰⵔⴻⵡⵍⴻⴷ ⵙ ⵜⵏⵓⴼⴼⵔⴰ ⵓ ⵜⵓⵛⴰⵔⴻⴷ ⴰⵢⵉ ⵓ ⵎⴰⵢⴻⵎⵎⵉ ⵡⴰⵔ ⴷ ⴰⵢⵉ ⵜⵅⴻⴱⴱⴰⵔⴻⴷ, ⵃⵉⵎⴰ ⴰⴷ ⵛⴻⴽ ⵙⵙⵇⴻⴱⴱⴹⴻⵖ ⵙ ⵍⴻⴼⵔⴰⵃⴻⵜ, ⵙ ⵍⴻⵖⵏⵓⵊ, ⵙ ⵓⴱⴻⵏⴷⵉⵔ ⵓ ⵙ ⵍⴳⴰⵎⴱⵔⵉ? 28 ⵡⴰⵔ ⴷ ⴰⵢⵉ ⵜⴻⵊⵊⵉⴷ ⴰⴷ ⵙⵙⵓⴷⵎⴻⵖ ⵉⵃⴻⵏⵊⵉⵔⴻⵏ ⵉⵏⵓ ⴷ ⵜⵃⴻⵏⵊⵉⵔⵉⵏ ⵉⵏⵓ. ⵍⴻⵅⵅⵓ ⴷ ⵜⵓⴱⴱⵓⵀⴻⵍⵢⴰ ⵉ ⵜⴻⴳⴳⵉⴷ. 29 ⵖⴰⵔⵉ ⵜⵉⵥⴻⵎⵎⴰⵔ ⴷⴻⴳ ⵉⴼⴰⵙⵙⴻⵏ ⵉⵏⵓ ⵃⵉⵎⴰ ⴰⴷ ⵛⴻⴽ ⴹⴰⵔⵔⴻⵖ, ⵎⴰⵛⴰ ⴰⵔⴻⴱⴱⵉ ⵏ ⴱⴰⴱⴰⵜⵡⴻⵎ ⵉⵙⵙⵉⵡⴻⵍ ⴰⴽⵉⴷⵉ ⴵⵉⵔⴻⵜ-ⴰ, ⵉⵏⵏⴰ: ‘ⵖⴰⵔⴻⴽ ⴰⴷ ⵜⴻⵙⵙⵉⵡⵍⴻⴷ ⵙ ⵍⵅⴰⵔ ⵏⵉⵖ ⵙ ⵍⵖⴰⵔ ⴰⴽ-ⴷ ⵢⴰⵄⵇⵓⴱ.’ 30 ⵓⵛⴰ ⵍⴻⵅⵅⵓ ⵜⵓⵢⵓⵔⴻⴷ, ⵓⵎⵉ ⵥⴻⵄⵎⴰ ⵜⵡⴻⵃⵃⵛⴻⴷ ⵜⴰⴷⴷⴰⵔⵜ ⵏ ⴱⴰⴱⴰⵛ. ⵎⴰⵛⴰ ⵎⴰⵖⴰⵔ ⵉ ⴷ ⴰⵢⵉ ⵜⵓⵛⴰⵔⴻⴷ ⵉⵔⴻⴱⴱⵉⵜⴻⵏ ⵉⵏⵓ?” 31 ⵢⴰⵄⵇⵓⴱ ⵢⴰⵔⵔⴰ, ⵉⵏⵏⴰ ⵉ ⵍⴰⴱⴰⵏ: “ⵎⵉⵏⵥⵉ ⵜⵓⵖⴰ ⴳⴳⵯⴻⴷⴻⵖ, ⵏⵏⵉⵖ ⴰⴽ-ⴷ ⵢⵉⵅⴻⴼ ⵉⵏⵓ ⴰⴷ ⵜⴰⵖ ⴰⴷ ⴰⵢⵉ ⵜⴻⴽⴽⵙⴻⴷ ⵢⴻⵙⵙⵉⵛ ⵙ ⵓⵖⵉⵍ! 32 ⵖⴰⵔ ⵡⴻⵏⵏⵉ ⵉ ⵖⴰ ⵜⴰⴼⴻⴷ ⵍ’ⴰⵚⵏⴰⵎ ⵏⵏⴻⴽ, ⵡⴰⵔ ⵉⵜⵜⴻⴷⴷⴰⵔ! ⵇⵉⴱⴰⵞ ⵉ ⵡⴰⵡⵎⴰⵜⴻⵏ ⵏⵏⴻⵖ ⴰⴷ ⵜⵎⴻⵢⵢⵥⴻⴷ ⵎⵉⵏ ⵉⴵⴰⵏ ⵏⵏⴻⴽ ⵊⴰⵔ ⵎⵉⵏ ⵉⴵⴰⵏ ⵖⴰⵔⵉ ⵓⵛⴰ ⴰⵡⵢⵉ ⵜⵜ ⴰⴽⵉⴷⴻⴽ.” ⵎⴰⵖⴰⵔ ⵢⴰⵄⵇⵓⴱ ⵡⴰⵔ ⵉⵙⵙⵉⵏ ⴱⴻⵍⵍⵉ ⵔⴰⵃⵉⵍ ⵉ ⵜⴻⵏ ⵢⵓⵛⴰⵔⴻⵏ.

33 ⵓⵛⴰ ⵢⵓⴷⴻⴼ ⵍⴰⴱⴰⵏ ⴷⴻⴳ ⵓⵇⵉⴹⵓⵏ ⵏ ⵢⴰⵄⵇⵓⴱ, ⴷⴻⴳ ⵓⵇⵉⴹⵓⵏ ⵏ ⵍⵉⵢⴰ, ⴷⴻⴳ ⵓⵇⵉⴹⵓⵏ ⵏ ⵜⵏⴰⵢⴻⵏ ⵏ ⵜⵉⵢⵢⴰ ⵓⵛⴰ ⵡⴰⵔ ⵢⵓⴼⵉ ⵡⴰⵍⵓ. ⵍⴰⵎⵉ ⴷⴷ-ⵉⴼⴼⴻⵖ ⵥⴻⴳ ⵓⵇⵉⴹⵓⵏ ⵏ ⵍⵉⵢⴰ, ⵢⵓⴷⴻⴼ ⵖⴰⵔ ⵓⵇⵉⴹⵓⵏ ⵏ ⵔⴰⵃⵉⵍ. 34 ⵎⴰⵛⴰ ⵜⴻⴽⵙⵉ ⵔⴰⵃⵉⵍ ⵍⴻⵅⵢⴰⵍⴰⵜ ⵉⵎⴻⵥⵢⴰⵏⴻⵏ ⵏ ⵍ’ⴰⵚⵏⴰⵎ, ⵜⴻⴳⴳⴰ ⵉ-ⵜⴻⵏ ⴷⴻⴳ ⵉⵖⴰⵢⵏⴻⵏ ⵏ ⵡⴻⵍⵖⴻⵎ ⵓⵛⴰ ⵜⴻⵇⵇⵉⵎ ⵅⴰⵙⴻⵏ. ⵢⴰⵔⵥⵓ ⵍⴰⴱⴰⵏ ⴷⴻⴳ ⵓⵇⵉⴹⵓⵏ ⴰⵎ ⵉⴽⵎⴻⵍ, ⵎⴰⵛⴰ ⵡⴰⵔ ⵢⵓⴼⵉ ⵡⴰⵍⵓ. 35 ⵜⴻⵏⵏⴰ ⵉ ⴱⴰⴱⴰⵙ: “ⵡⴰⵔ ⵉⵜⵜⵉⵍⵉ ⴰⵢⴰ ⴷ ⵍⵖⴰⵔ ⴷⵉ ⵜⵉⵟⵟⴰⵡⵉⵏ ⵏ ⵙⵉⴷⵉ ⵉⵏⵓ, ⵎⵉⵏⵥⵉ ⵡⴰⵔ ⵥⴻⵎⵎⴰⵔⴻⵖ ⴰⴷ ⴽⴽⴰⵔⴻⵖ ⵇⵉⴱⴰⵞ ⵏⵏⴻⴽ, ⵎⴰⵖⴰⵔ ⴰⵇⴰ ⴰⵢⵉ ⵙ ⵜⵏⴰⵎⵉⵜ ⵏ ⵜⴻⵎⵖⴰⵔⵉⵏ.” ⵓⵛⴰ ⵢⴰⵔⵥⵓ, ⵎⴰⵛⴰ ⵡⴰⵔ ⵢⵓⴼⵉ ⵍⴻⵅⵢⴰⵍⴰⵜ ⵉⵎⴻⵥⵢⴰⵏⴻⵏ ⵏ ⵍ’ⴰⵚⵏⴰⵎ. 36 ⵅⴻⵏⵏⵉ ⵉⵅⴻⵢⵢⴻⵇ ⵢⴰⵄⵇⵓⴱ ⵓⵛⴰ ⵉⵎⵛⵓⴱⴱⴻⵛ ⴰⴽ-ⴷ ⵍⴰⴱⴰⵏ. ⵢⴰⵄⵇⵓⴱ ⵉⵟⵟⴻⴼ ⴷⴻⴳ ⵡⴰⵡⴰⵍ, ⵉⵏⵏⴰ ⵉ ⵍⴰⴱⴰⵏ “ⵎⴰⵏⵉ ⵉⴵⴰ ⵓⵅⴻⵟⵟⵓ ⵉⵏⵓ, ⵎⴰⵏ ⵡⴻⵏ ⵉⴵⴰⵏ ⴷ ⴷⴷⴻⵏⴱ ⵉⵏⵓ, ⵓⵎⵉ ⴷ ⴰⵢⵉ ⴷⴷ-ⵜⴻⴹⴼⴰⵔⴻⴷ ⵙ ⵥⵥⵄⴰⴼ? 37 ⵛⴻⴽ ⵜⴱⴻⵇⵛⴻⴷ ⵎⴰⵔⵔⴰ ⵍⵇⴻⵛⵛ ⵉⵏⵓ, ⵎⵉⵏ ⵜⵓⴼⵉⴷ ⵥⵉ ⵎⴰⵔⵔⴰ ⵍⴻⵃⵡⴰⵢⴻⵊ ⵏ ⵜⴰⴷⴷⴰⵔⵜ ⵏⵏⴻⴽ? ⴻⴳⴳ ⵉ-ⵜⴻⵏ ⴷⴰ ⵥⵥⴰⵜ ⵏ ⵢⴰⵢⵜⵎⴰ ⴷ ⴰⵢⵜⵎⴰⵛ ⵓⵛⴰ ⴻⵊⵊ ⵉ-ⵜⴻⵏ ⴰⴷ ⵃⴻⴽⵎⴻⵏ ⵊⴰⵔ ⴰⵏⴻⵖ ⵙ ⵜⵏⴰⵢⴻⵏ. 38 ⵄⵉⵛⵔⵉⵏ ⵏ ⵉⵙⴻⴳⴳⵯⵓⵙⴰ ⵉ ⴽⵉⴽ ⴽⴽⵉⵖ. ⵜⵉⵅⴻⵙⵡⵉⵏ ⵏⵏⴻⴽ ⴷ ⵜⵖⴰⵢⴹⵉⵏ ⵏⵏⴻⴽ ⵄⴻⵎⵎⴰⵔⵚ ⵎⴰ ⵙⵙⵓⵜⵎⴻⵏⵜ ⵏⵉⵖ ⵏⴻⵛⵛ ⵛⵛⵉⵖ ⵉⵛⴰⵔⵔⵉⵢⴻⵏ ⵏ ⵡⵓⴵⵉ ⵏⵏⴻⴽ. 39 ⵡⴰⵔ ⴷ ⴰⵛ ⵉⵡⵢⴻⵖ ⵎⵉⵏ ⵉⵜⵜⵡⴰⵎⴻⵥⵥⵇⴻⵏ, ⵎⴰⵛⴰ ⵅⴻⵟⵚⴻⵖ ⵜ ⵙⵉⵎⴰⵏⵜ ⵉⵏⵓ. ⵎⵉⵏ ⵉⵜⵜⵡⴰⵛⴰⵔⴻⵏ ⵥⵥⴰⵢⵉ ⴷⴻⴳ ⵡⴰⵙⵙ ⵏⵉⵖ ⴷⵉ ⴵⵉⵔⴻⵜ, ⴰⵇⴰ ⵥⴻⴳ ⵉⴼⴰⵙⵙⴻⵏ ⵉⵏⵓ ⵜᵉⵜⵜⴰⵔⴻⴷ ⵜ. 40 ⵙ ⵓⵥⵉⵍ ⵉⵜⵜⴻⵜⵜ ⴰⵢⵉ ⵍⴻⵃⵎⵓ ⵢⵓⵥⵖⴻⵏ ⵜⵉⵍⵎⴻⵛⵜ ⵓ ⵙ ⴵⵉⵔⴻⵜ ⵜⵜⴻⵊⵎⵉⴷⴻⵖ ⵥⵉ ⵙⵇⵉⵄ ⵓ ⵉⴹⴻⵚ ⵢⴰⵔⵡⴻⵍ ⵥⵉ ⵖⴰⵔⵉ. 41 ⴰⵎⵎⵓ ⵉ ⴷ ⴰⵢⵉ ⵜⵓⵖⴰ ⴷⵉ ⵜⴰⴷⴷⴰⵔⵜ ⵏⵏⴻⴽ ⵄⵉⵛⵔⵉⵏ ⵏ ⵉⵙⴻⴳⴳⵯⵓⵙⴰ. ⵅⴻⴷⵎⴻⵖ ⵖⴰⵔⴻⴽ ⴰⵔⴱⴻⵄⵟⴰⵛ ⵏ ⵉⵙⴻⴳⴳⵯⵓⵙⴰ ⵅ ⵜⵏⴰⵢⴻⵏ ⵏ ⵢⴻⵙⵙⵉⵛ ⴷ ⵙⴻⵜⵜⴰ ⵏ ⵉⵙⴻⴳⴳⵯⵓⵙⴰ ⵅ ⵡⵓⴵⵉ ⵓⵛⴰ ⵜⴱⴻⴷⴷⵍⴻⴷ ⵍⵎⵓⵏⴻⵜ ⵉⵏⵓ ⵄⴻⵛⵔⴰ ⵏ ⵜⵡⴰⵍⴰⵡⵉⵏ. 42 ⵎⴰⵍⴰ ⴰⵔⴻⴱⴱⵉ ⵏ ⴱⴰⴱⴰ, ⴰⵔⴻⴱⴱⵉ ⵏ ⵉⴱⵔⴰⵀⵉⵎ ⴷ ⵜⵉⴳⴳⵯⵓⴷⵉ ⵏ ⵉⵙⵃⴰⵇ, ⵉⵍⵉ ⵡⴰⵔ ⴰⴽⵉⴷⵉ ⵉⴵⵉ, ⴷ ⵚⵚⴻⵃ ⵉⵍⵉ ⴰⴷ ⴰⵢⵉ ⵜⴻⵙⵙⵇⴰⴷⴻⴷ ⵍⴻⵅⵅⵓ ⵙ ⵉⴼⴰⵙⵙⴻⵏ ⵅⵡⴰⵏ! ⵉⵥⵔⴰ ⴰⵔⴻⴱⴱⵉ ⵜⴰⵎⴰⵔⴰ ⴷ ⵜⵓⵎⴰⵔ ⵏ ⵉⴼⴰⵙⵙⴻⵏ ⵉⵏⵓ ⵓⵛⴰ ⵉⴷⴻⵇⵎⴰⵔ ⵉ ⵛⴻⴽ ⴵⵉⵍⴻⵜ ⵏ ⵉⴹⴻⵏⵏⴰⴹ.”

43 ⵢⴰⵔⵔⴰ ⵍⴰⴱⴰⵏ ⵓⵛⴰ ⵉⵏⵏⴰ ⵉ ⵢⴰⵄⵇⵓⴱ: “ⵜⵉⵃⴻⵏⵊⵉⵔⵉⵏ-ⴰ ⴷ ⵢⴻⵙⵙⵉ ⵓ ⵉⵃⴻⵏⵊⵉⵔⴻⵏ-ⴰ ⴷ ⵉⵃⴻⵏⵊⵉⵔⴻⵏ ⵉⵏⵓ, ⵓ ⵓⴵⵉ ⴰⵢⴰ ⴷ ⵓⴵⵉ ⵉⵏⵓ, ⵓ ⵎⴰⵔⵔⴰ ⵎⵉⵏ ⵜᵉⵜⵜⵡⴰⵍⵉⴷ ⴰⵇⴰ ⵉⵏⵓ. ⵎⵉⵏ ⵥⴻⵎⵎⴰⵔⴻⵖ ⵅⴻⵏⵏⵉ ⴰⴷ ⴳⴳⴻⵖ ⵍⴻⵅⵅⵓ ⵙ ⵢⴻⵙⵙⵉ ⵏⵉⵖ ⵙ ⵉⵃⴻⵏⵊⵉⵔⴻⵏ ⵏⵙⴻⵏⵜ ⵏⵏⵉ ⵓⵔⵡⴻⵏⵜ? 44 ⵖⴰⵡⴻⵔ ⵄⴰⴷ ⵍⴻⵅⵅⵓ, ⴰⴷ ⵏⴻⴳⴳ ⵉⵊⵊ ⵏ ⵍⵄⴰⵀⴷ, ⵏⴻⵛⵛ ⴷ ⵛⴻⴽ, ⴰⴷ ⵢⵉⵍⵉ ⵏⴻⵜⵜⴰ ⴷ ⵛⵛⵀⴰⴷⴻⵜ ⵊⴰⵔ ⴰⵢⵉ ⴷ ⵛⴻⴽ!” 45 ⵓⵛⴰ ⵉⴽⵙⵉ ⵢⴰⵄⵇⵓⴱ ⴰⵥⵔⵓ, ⵉⵙⵙⴳⴻⵄⵄⴻⴷ ⵉ-ⵜ ⴰⵎⴻⵛⵏⴰⵡ ⴰⵥⵔⵓ ⵏ ⵍⵉⴷⴰⵔⴻⵜ. 46 ⵓⵛⴰ ⵉⵏⵏⴰ ⵢⴰⵄⵇⵓⴱ ⵉ ⵢⴰⵢⵜⵎⴰⵙ: “ⵙⵎⵓⵏⴻⵎ ⵉⵥⵔⴰ!” ⴽⵙⵉⵏ ⵉⵥⵔⴰ ⵓⵛⴰ ⴳⴳⵉⵏ ⵜⴰⵄⵓⵔⵔⵉⵛⵜ ⵓⵛⴰ ⵛⵛⵉⵏ ⴷⵉⵏ ⵅ ⵜⵄⵓⵔⵔⵉⵛⵜ ⵏⵏⵉ. 47 ⵓⵛⴰ ⵉⴳⴳⴰ ⵍⴰⴱⴰⵏ ⵉ ⵓⵄⵓⵔⵔⵉⵛ ⵏ ⵉⵥⵔⴰ ⵏⵏⵉ ‘ⵊⵉⴳⴰⵔ-ⵙⴰⵀⴰⴷⵓⵜⴰ’, ⵎⴰⵛⴰ ⵢⴰⵄⵇⵓⴱ ⵉⴳⴳⴰ ⴰⵙ ‘ⵊⵉⵍⵄⴰⴷ’. 48 ⵅⴻⵏⵏⵉ ⵉⵏⵏⴰ ⵍⴰⴱⴰⵏ: “ⵜⴰⵄⵓⵔⵔⵉⵛⵜ-ⴰ ⴰⴷ ⵜⵉⵍⵉ ⴷ ⵛⵛⵀⴰⴷⴻⵜ ⴰⵙⵙ-ⴰ ⵊⴰⵔ ⴰⵢⵉ ⴷ ⵛⴻⴽ!” ⵙ ⵓⵢⴰ ⵜⵓⵖⴰ ⵉⵍⴰⵖⴰ ⵉⵙⴻⵎ ⵏⵏⴻⵙ ⵊⵉⵍⵄⴰⴷ 49 ⴷ ⵎⵉⵚⴼⴰ, ⵎⵉⵏⵥⵉ ⵏⴻⵜⵜⴰ ⵉⵏⵏⴰ: “ⵉⵍⵉ ⵙⵉⴷⵉ ⴰⴷ ⵉⵃⴹⴰ ⵊⴰⵔ ⴰⵢⵉ ⴷ ⵛⴻⴽ, ⵅⵎⵉ ⵉ ⵖⴰ ⵏⴻⴷⴷⴰⵔ ⴰⵎ ⵏᵉⵏⵓⴼⴼⴰⵔ ⵉⵊⵊⴻⵏ ⵥⴻⴳ ⵡⴻⵏⵏⴻⵖⵏⵉ. ^□   50 ⵎⴰⵍⴰ ⵜⴻⵙⵙⴻⵃⵇⴰⵔⴻⴷ ⵢⴻⵙⵙⵉ ⵏⵉⵖ ⴰⴷ ⵜⵎⴻⵍⵛⴻⴷ ⵜⵉⵎⵖⴰⵔⵉⵏ ⵏⵏⴻⵖⵏⵉ ⵅ ⵢⴻⵙⵙⵉ ⵓ ⵡⴰⵔ ⴷⵉⵏ ⵉⴵⵉ ⵃⴻⴷ ⴰⴽⵉⴷⵏⴻⵖ ⵃⵉⵎⴰ ⴰⴷ ⵢⵉⵍⵉ ⴷ ⴰⵛⴻⵀⵀⴰⴷ, ⴰⵇⴰ ⴰⵔⴻⴱⴱⵉ ⴰⴷ ⵢⵉⵍⵉ ⴷ ⴰⵛⴻⵀⵀⴰⴷ ⵊⴰⵔ ⴰⵢⵉ ⴷ ⵛⴻⴽ!” 51 ⵉⵏⵏⴰ ⵄⴰⵡⴻⴷ ⵍⴰⴱⴰⵏ ⵉ ⵢⴰⵄⵇⵓⴱ: “ⵅⵥⴰⵔ, ⵜⴰⵄⵓⵔⵔⵉⵛⵜ ⵏ ⵢⴻⵥⵔⴰ, ⵅⵥⴰⵔ, ⴰⵥⵔⵓ ⵏ ⵍⵉⴷⴰⵔⴻⵜ ⵏⵏⵉ ⵙⵙⴱⴻⴷⴷⴻⵖ ⵊⴰⵔ ⴰⵢⵉ ⴷ ⵛⴻⴽ. 52 ⵜⴰⵄⵓⵔⵔⵉⵛⵜ-ⴰ ⵏ ⵢⴻⵥⵔⴰ ⴷ ⵡⴻⵥⵔⵓ ⴰⵢⴰ ⵏ ⵍⵉⴷⴰⵔⴻⵜ ⴰⴷ ⵛⴻⵀⴷⴻⵏⵜ ⴱⴻⵍⵍⵉ ⵏⴻⵛⵛ ⵡⴰⵔ ⵖⴰⵔⴻⴽ ⴷⴷ-ⵥⴻⴽⴽⵯⵉⵖ ⵛⴰ ⵅ ⵜⵄⵓⵔⵔⵉⵛⵜ-ⴰ ⵓⵛⴰ ⵓⵍⴰ ⴷ ⵛⴻⴽ ⵡⴰⵔ ⵖⴰⵔⵉ ⴷⴷ-ⵜⵥⴻⴽⴽⵯⵡⵉⴷ ⵛⴰ ⵉ ⵍⵖⴰⵔ ⵅ ⵜⵄⵓⵔⵔⵉⵛⵜ-ⴰ ⵓⵍⴰ ⵅ ⵡⴻⵥⵔⵓ ⴰⵢⴰ ⵏ ⵍⵉⴷⴰⵔⴻⵜ! 53 ⵉⵔⴻⴱⴱⵉⵜⴻⵏ ⵏ ⵉⴱⵔⴰⵀⵉⵎ ⴷ ⵉⵔⴻⴱⴱⵉⵜⴻⵏ ⵏ ⵏⴰⵃⵓⵔ, ⴰⵇⴰ ⵉⵔⴻⴱⴱⵉⵜⴻⵏ ⵏ ⵍⴻⵊⴷⵓⴷ ⵏⵙⴻⵏ, ⴻⵊⵊ ⵉ-ⵜⴻⵏ ⴰⴷ ⵃⴻⴽⵎⴻⵏ ⵊⴰⵔ ⴰⵏⴻⵖ!” ⵎⴰⵛⴰ ⵢⴰⵄⵇⵓⴱ ⵉⵊⵊⵓⴵ ⵙ ‘ⵜⵉⴳⴳⵯⵓⴷⵉ ⵏ ⵉⵙⵃⴰⵇ ⴱⴰⴱⴰⵙ’. 54 ⵅⴻⵏⵏⵉ ⵉⵖⴰⵔⵚ ⵢⴰⵄⵇⵓⴱ ⵉ ⵢⵉⵛⵜ ⵏ ⵜⵖⴰⵔⵚⵜ ⴷⴻⴳ ⵉⴷⵓⵔⴰⵔ ⵓⵛⴰ ⵉⵍⴰⵖⴰ ⵉ ⵢⴰⵢⵜⵎⴰⵙ ⴰⴷ ⵛⵛⴻⵏ ⴰⵖⵔⵓⵎ. ⵓⵛⴰ ⵛⵛⵉⵏ ⴰⵖⵔⵓⵎ, ⵙⴻⵏⵙⵙⴻⵏ ⴵⵉⵔⴻⵜ ⵏⵏⵉ ⴷⴻⴳ ⵉⴷⵓⵔⴰⵔ.