ⵍⵄⴰⵀⴷ ⵊⴰⵔ ⵉⵙⵃⴰⵇ ⴷ ⴰⴱⵉⵎⴰⵍⵉⴽ
26
1 ⵜⵓⵖⴰ ⵉⴵⴰ ⵍⴰⵥ ⴷⵉ ⵜⴻⵎⵎⵓⵔⵜ, ⵉⵊⵊ ⵏ ⵍⴰⵥ ⵏⵏⴻⵖⵏⵉ ⵖⴰⵔ ⵓⵎⴻⵥⵡⴰⵔ ⵏⵏⵉ ⵜⵓⵖⴰ ⵉⴵⴰⵏ ⴷⴻⴳ ⵡⵓⵙⵙⴰⵏ ⵏ ⵉⴱⵔⴰⵀⵉⵎ. ⵙ ⵓⵢⴰ ⵉⵔⵓⵃ ⵉⵙⵃⴰⵇ ⵖⴰⵔ ⴰⴱⵉⵎⴰⵍⵉⴽ, ⴰⵊⴻⴵⵉⴷ ⵏ ⵉⴼⵉⵍⵉⵙⵟⵉⵏⵉⵢⵢⴻⵏ, ⵖⴰⵔ ⵊⵊⵡⴰⵢⴻⵀ ⵏ ⵊⵉⵔⴰⵔ. 2 ⴷⵉⵏⵏⵉ ⵉⴱⴰⵏ ⴰⵙ-ⴷⴷ ⵙⵉⴷⵉ, ⵉⵏⵏⴰ: “ⵡⴰⵔ ⵀⴻⴽⴽⵡⵉ ⵛⴰ ⵖⴰⵔ ⵎⵉⵚⵔⴰ. ⵣⴷⴻⵖ ⴷⵉ ⵜⴻⵎⵎⵓⵔⵜ ⵉ ⴷ ⴰⵛ ⵖⴰ ⵉⵏⵉⵖ. 3 ⵣⴷⴻⵖ ⴷⵉ ⵜⴻⵎⵎⵓⵔⵜ-ⴰ ⴰⵎ ⵓⴱⴰⵔⵔⴰⵏⵉ ⵓ ⵏⴻⵛⵛ ⴰⴷ ⴽⵉⴽ ⵉⵍⵉⵖ, ⴰⴷ ⵛⴻⴽ ⴱⴰⵔⴽⴻⵖ, ⵎⵉⵏⵥⵉ ⵉ ⵛⴻⴽ ⵓ ⵉ ⵥⵥⴰⵔⵉⵄⴻⵜ ⵏⵏⴻⴽ ⵓⵎⵉ ⵖⴰ ⵡⵛⴻⵖ ⵎⴰⵔⵔⴰ ⵜⵉⵎⵎⵓⵔⴰ ⴰⵢⴰ ⵓⵛⴰ ⴰⴷ ⴽⴻⵎⵎⵍⴻⵖ ⵜⵊⴰⴵⵉⵜ ⵉ ⵊⵊⵓⴵⴻⵖ ⵉ ⵉⴱⵔⴰⵀⵉⵎ ⴱⴰⴱⴰⵛ. ■ 4 ⴰⴷ ⴽⴻⵜⵜⴰⵔⴻⵖ ⵥⵥⴰⵔⵉⵄⴻⵜ ⵏⵏⴻⴽ ⴰⵎⴻⵛⵏⴰⵡ ⵉⵜⵔⴰⵏ ⵏ ⵓⵊⴻⵏⵏⴰ ⵓⵛⴰ ⴰⴷ ⵡⵛⴻⵖ ⵉ ⵥⵥⴰⵔⵉⵄⴻⵜ ⵏⵏⴻⴽ ⵎⴰⵔⵔⴰ ⵜⵉⵎⵎⵓⵔⴰ ⴰⵢⴰ. ⵎⴰⵔⵔⴰ ⵍⴻⴳⵏⵓⵙ ⵏ ⴷⴷⵓⵏⴻⵛⵜ ⴰⴷ ⵜⵜⵡⴰⴱⴰⵔⴽⴻⵏ ⴷⵉ ⵥⵥⴰⵔⵉⵄⴻⵜ ⵏⵏⴻⴽ, ■ 5 ⵎⵉⵏⵥⵉ ⵉⵙⵍⴰ ⵉⴱⵔⴰⵀⵉⵎ ⵉ ⵡⴰⵡⴰⵍ ⵉⵏⵓ ⵓⵛⴰ ⵉⵃⴹⴰ ⵎⵉⵏ ⴷ ⴰⵙ ⵡⵛⵉⵖ ⵎⴰⵃⴻⵏⴷ ⴰⴷ ⵉⵃⴹⴰ: ⵍⵓⵎⵓⵔⴰⵜ ⵉⵏⵓ, ⵜⵉⵡⴻⵚⵚⴰ ⵉⵏⵓ ⴷ ⵉⵥⴻⵔⴼⴰⵏ ⵉⵏⵓ.” 6 ⴰⵎⵎⵓ ⵉ ⵉⵥⴷⴻⵖ ⵉⵙⵃⴰⵇ ⴷⵉ ⵊⵉⵔⴰⵔ. 7 ⵍⴰⵎⵉ ⵜ ⵙⵙⴻⵇⵙⴰⵏ ⵉⵔⵢⴰⵥⴻⵏ ⵏ ⵡⴻⵎⵛⴰⵏ ⵏⵏⵉ ⵅ ⵜⴻⵎⵖⴰⵔⵜ ⵏⵏⴻⵙ, ⵉⵏⵏⴰ ⴰⵙⴻⵏ: “ⵏⴻⵜⵜⴰⵜ ⴷ ⵓⵞⵎⴰ”, ⵎⵉⵏⵥⵉ ⵉⴳⴳⵯⴻⴷ ⴰⴷ ⵢⵉⵏⵉ: “ⴷ ⵜⴰⵎⵖⴰⵔⵜ ⵉⵏⵓ”. ⵎⴰⵖⴰⵔ ⵉⵏⵏⴰ ⴷⴻⴳ ⵢⵉⵅⴻⴼ ⵏⵏⴻⵙ: “ⵎⴰⵍⴰ ⵡⴰⵔ ⵏⵏⵉⵖ ⴰⵎⴻⵏⵏⵉ ⴰⴷ ⴰⵢⵉ ⵏⵖⴻⵏ ⵉⵔⵢⴰⵥⴻⵏ ⵏ ⵡⴻⵎⵛⴰⵏ-ⴰ ⴷⵉ ⵟⵟⵡⴻⵄ ⵏ ⵔⵉⴼⵇⴰ, ⵎⵉⵏⵥⵉ ⴰⵇⴰ ⴷⴰⵢⴻⵙ ⴰⵥⵔⵉ.” 8 ⵍⴰⵎⵉ ⴷⵉⵏ ⵉⵥⴷⴻⵖ ⴰⵟⵟⴰⵙ ⵏ ⵡⵓⵙⵙⴰⵏ, ⵉⵎⵙⴰⵔ ⴱⴻⵍⵍⵉ ⴰⴱⵉⵎⴰⵍⵉⴽ, ⴰⵊⴻⴵⵉⴷ ⵏ ⵉⴼⵉⵍⵉⵙⵟⵉⵏⵉⵢⵢⴻⵏ, ⵉⵅⵥⴰⵔ-ⴷⴷ ⵥⵉ ⵍⴽⴰⵥⵉ, ⵉⵥⵔⴰ ⵉⵙⵃⴰⵇ ⵉⵜⵜⵄⴰⵜⴰⴱ ⵔⵉⴼⵇⴰ, ⵜⴰⵎⵖⴰⵔⵜ ⵏⵏⴻⵙ. 9 ⵓⵛⴰ ⵉⵍⴰⵖⴰ ⴰⴱⵉⵎⴰⵍⵉⴽ ⵅ ⵉⵙⵃⴰⵇ, ⵉⵏⵏⴰ ⴰⵙ: “ⵅⵥⴰⵔ, ⵜⴰ ⵙ ⵜⵉⴷⴻⵜⵜ ⴷ ⵜⴰⵎⵖⴰⵔⵜ ⵏⵏⴻⴽ! ⵎⴰⵎⵎⴻⵛ ⵜⴻⴳⴳⵉⴷ ⵜⴻⵏⵏⵉⴷ ⴰⵏⴻⵖ ⴷ ⵓⵞⵎⴰ?” ⵉⵙⵃⴰⵇ ⵉⵏⵏⴰ ⴰⵙ: “ⵙ ⵎⵉⵏⵥⵉ ⵏⵏⵉⵖ ⵉ ⵢⵉⵅⴻⴼ ⵉⵏⵓ: ‘ⴰⵇⴰ ⵜⵉⵍⵉ ⴰⴷ ⴰⵢⵉ ⵏⵖⴻⵏ ⵅ ⵙⵙⵉⴱⴱⴻⵜ ⵏⵏⴻⵙ.’ ”
10 ⴰⴱⵉⵎⴰⵍⵉⴽ ⵉⵏⵏⴰ: “ⵎⴰⵖⴰⵔ ⴷ ⴰⵏⴻⵖ ⵜⴻⴳⴳⵉⴷ ⴰⵢⴰ? ⵅ ⴷⵔⵓⵙ ⴰⴷ ⵢⵉⵍⵉ ⵉⵟⵟⴻⵚ ⵛⴰ ⵏ ⵉⵊⵊ ⵥⵉ ⵍⴳⴻⵏⵙ ⴰⴽ-ⴷ ⵜⴻⵎⵖⴰⵔⵜ ⵏⵏⴻⴽ ⵓⵛⴰ ⴰⴷ ⵜⵉⵍⵉ ⵜⴻⴳⴳⵉⴷ ⴷⴷⴻⵏⴱ ⵏⵏⴻⴽ ⵅ ⵢⵉⵍⵉ ⵏⵏⴻⵖ.”
11 ⵢⵓⵎⵓⵔ ⴰⴱⵉⵎⴰⵍⵉⴽ ⵎⴰⵔⵔⴰ ⵍⴳⴻⵏⵙ, ⵉⵏⵏⴰ: “ⵡⴻⵏⵏⵉ ⵉ ⵖⴰ ⵉⵃⴰⴷⴰⵏ ⴰⵔⵢⴰⵥ-ⴰ ⵏⵉⵖ ⵜⴰⵎⵖⴰⵔⵜ ⵏⵏⴻⵙ, ⴰⴷ ⵜ ⵏⵖⴻⵏ ⵏⵉⵛⴰⵏ!”
12 ⵉⵥⴰⵔⵄ ⵉⵙⵃⴰⵇ ⴷⵉ ⵜⴻⵎⵎⵓⵔⵜ ⵏⵏⵉ ⵓⵛⴰ ⵉⴽⵙⵉ ⴰⵙⴻⴳⴳⵯⴰⵙ ⵏⵏⵉ ⵎⵢⴰ ⵏ ⵉⵎⵓⵔⴻⵏ ⵏ ⵥⵥⵢⴰⴷⴰ, ⵎⵉⵏⵥⵉ ⵉⴱⴰⵔⴽ ⵉ-ⵜ ⵙⵉⴷⵉ.
13 ⵜⴻⵎⵎⴰⵔⵏⵉ ⵛⵛⴻⵏⵄⴻⵜ ⵏ ⵡⴻⵔⵢⴰⵥ ⵏⵏⵉ ⵓⵛⴰ ⵏⴻⵜⵜⴰ ⵉⵇⵇⵉⵎ ⵉⵎⴻⵇⵇⴰⵔ ⴰⵍⴰⵎⵉ ⵜⴻⴷⵡⴻⵍ ⵛⵛⴻⵏⵄⴻⵜ ⵏⵏⴻⵙ ⴷ ⵜⴰⵎⴻⵇⵇⵔⴰⵏⵜ ⴰⵟⵟⴰⵙ.
14 ⵜⵓⵖⴰ ⵖⴰⵔⴻⵙ ⵓⴵⵉ ⵓ ⵖⴰⵔⴻⵙ ⵄⴰⵡⴻⴷ ⵉⴼⵓⵏⴰⵙⴻⵏ ⴷ ⵜⴼⵓⵏⴰⵙⵉⵏ ⴷ ⵡⴰⵟⵟⴰⵙ ⵏ ⵉⵙⴻⵎⵖⴰⵏ, ⴰⵍⴰⵎⵉ ⵥⵥⴰⵢⴻⵙ ⵓⵙⵎⴻⵏ ⵉⴼⵉⵍⵉⵙⵟⵉⵏⵉⵢⵢⴻⵏ.
15 ⵎⴰⵔⵔⴰ ⴰⵏⵓⵜⴻⵏ ⵏⵏⵉ ⵉⵖⵥⴰⵏ ⵉⵎⵙⴻⵅⵅⴰⵔⴻⵏ ⴷⴻⴳ ⵡⵓⵙⵙⴰⵏ ⵏ ⵉⴱⵔⴰⵀⵉⵎ ⴱⴰⴱⴰⵙ, ⵏⴻⵜⵢⴻⵏ ⵜⴻⵏ ⵉⴼⵉⵍⵉⵙⵟⵉⵏⵉⵢⵢⴻⵏ ⵓⵛⴰ ⵛⵛⵓⵔⴻⵏ ⵜⴻⵏ ⵙ ⵓⵛⴰⵍ.
16 ⵅⴻⵏⵏⵉ ⵉⵏⵏⴰ ⴰⴱⵉⵎⴰⵍⵉⴽ ⵉ ⵉⵙⵃⴰⵇ: “ⴱⴻⵄⵄⴻⴷ ⵅⴰⵏⴻⵖ, ⵎⵉⵏⵥⵉ ⵜⴷⴻⵡⵍⴻⴷ ⵜⵊⴻⵀⴷⴻⴷ ⵅⴰⵏⴻⵖ ⵙ ⵡⴰⵟⵟⴰⵙ.”
17 ⵉⵙⵃⴰⵇ ⵉⵔⵓⵃ ⵙⵙⴻⵏⵏⵉ, ⵉⵡⵜⴰ ⵉⵇⵉⴹⴰⵏ ⵏⵏⴻⵙ ⴷⵉ ⵜⴻⵖⵥⵓⵔⵜ ⵏ ⵊⵉⵔⴰⵔ ⵓⵛⴰ ⵉⵥⴷⴻⵖ ⴷⵉⵏⵏⵉ.
18 ⵓⵛⴰ ⵉⴷⵡⴻⵍ ⵉⵙⵃⴰⵇ ⵉⵖⵥⴰ ⴰⵏⵓⵜⴻⵏ ⵏ ⵡⴰⵎⴰⵏ ⵉⵏⵏⵉ ⵜⵓⵖⴰ ⵖⵥⵉⵏ ⴷⴻⴳ ⵡⵓⵙⵙⴰⵏ ⵏ ⵉⴱⵔⴰⵀⵉⵎ ⴱⴰⴱⴰⵙ, ⵉⵏⵏⵉ ⵏⴻⵜⵢⴻⵏ ⵉⴼⵉⵍⵉⵙⵟⵉⵏⵉⵢⵢⴻⵏ ⴰⵡⴰⵔⵏⵉ ⵍⵎⴻⵡⵜ ⵏ ⵉⴱⵔⴰⵀⵉⵎ. ⵉⵙⴻⵎⵎⴰ ⵜⴻⵏ ⵙ ⵉⵙⵎⴰⵡⴻⵏ ⵉⵏⵏⵉ ⴷ ⴰⵙⴻⵏ ⵉⵍⴰⵖⴰ ⴱⴰⴱⴰⵙ.
19 ⵓⵛⴰ ⵉⵎⵙⴻⵅⵅⴰⵔⴻⵏ ⵏ ⵉⵙⵃⴰⵇ ⵖⵥⴰⵏ ⴷⵉ ⵜⴻⵖⵥⵓⵔⵜ ⵏⵏⵉ ⵓⵛⴰ ⵓⴼⵉⵏ ⴷⵉⵏ ⵍⵄⵓⵏⵚⴰⵔ ⵏ ⵡⴰⵎⴰⵏ ⴷⴷⴰⵔⴻⵏ. 20 ⵅⴻⵏⵏⵉ ⵇⴰⵛⵃⴻⵏ ⵉⵎⴻⴽⵙⴰⵡⴻⵏ ⵏ ⵊⵉⵔⴰⵔ ⴰⴽ-ⴷ ⵉⵎⴻⴽⵙⴰⵡⴻⵏ ⵏ ⵉⵙⵃⴰⵇ, ⵏⵏⴰⵏ: “ⴰⵎⴰⵏ ⵏⵏⴻⵖ!” ⵙ ⵓⵢⴻⵏⵏⵉ ⵍⴰⵖⴰⵏ ⵉⵙⴻⵎ ⵏ ⵍⵄⵓⵏⵚⴰⵔ ⵏⵏⵉ ‘ⵄⵉⵙⵉⵇ’, ⵎⵉⵏⵥⵉ ⵜⵓⵖⴰ ⵜⵜⵇⴰⵛⴰⵃⴻⵏ ⵅⴰⵙ. □ 21 ⵅⴻⵏⵏⵉ ⵖⵥⴰⵏ ⵉⵊⵊ ⵏ ⵍⵄⵓⵏⵚⴰⵔ ⵏⵏⴻⵖⵏⵉ ⵓⵛⴰ ⵎⵎⴻⵏⵏⵖⴻⵏ ⵅⴰⵙ ⵄⴰⵡⴻⴷ. ⵙ ⵓⵢⴻⵏⵏⵉ ⴷ ⴰⵙ ⵉⴳⴳⴰ ⵉⵙⴻⵎ ⵏ ⵙⵉⵜⵏⴰ. 22 ⵓⵛⴰ ⵉⴱⴻⵄⵄⴻⴷ ⵙⵙⴻⵏⵏⵉ, ⵉⵖⵥⴰ ⵉⵊⵊ ⵏ ⵍⵄⵓⵏⵚⴰⵔ ⵏⵏⴻⵖⵏⵉ, ⵡⴰⵔ ⵅⴰⵙ ⵇⵉⵛⵃⴻⵏ ⵛⴰ ⵓⵛⴰ ⴳⴳⵉⵏ ⴰⵙ ⵉⵙⴻⵎ ⵏⵏⴻⵙ ⵔⴰⵃⵓⴱⵓⵜ, ⵉⵏⵏⴰ: “ⵍⴻⵅⵅⵓ ⵙⵉⴷⵉ ⵉⵡⵛⴰ ⴰⵏⴻⵖ ⵜⵜⴰⵙⵉⵄ ⵓⵛⴰ ⴰⴷ ⵖⴰⵔⵏⴻⵖ ⵜⵉⵍⵉ ⵍⵖⵉⴵⴻⵜ ⴷⵉ ⵜⴻⵎⵎⵓⵔⵜ.” 23 ⵓⵛⴰ ⵉⴳⴻⵄⵄⴻⴷ ⵙⵙⴻⵏⵏⵉ ⵖⴰⵔ ⴱⵉ’ⵔ-ⵙⴻⴱⵄⴰ.
24 ⵉⴱⴰⵏ ⴰⵙ-ⴷⴷ ⵙⵉⴷⵉ ⴷⵉ ⴵⵉⵔⴻⵜ ⵏⵏⵉ, ⵉⵏⵏⴰ ⴰⵙ: “ⵏⴻⵛⵛ ⴷ ⴰⵔⴻⴱⴱⵉ ⵏ ⵉⴱⵔⴰⵀⵉⵎ ⴱⴰⴱⴰⵛ! ⵡⴰⵔ ⵜⵜⴻⴳⴳⵯⴻⴷ ⵛⴰ, ⴰⵇⴰ ⵏⴻⵛⵛ ⴰⴽⵉⴷⴻⴽ ⵓ ⵏⴻⵛⵛ ⴰⴷ ⵛⴻⴽ ⴱⴰⵔⴽⴻⵖ, ⴰⴷ ⴽⴻⵜⵜⴰⵔⴻⵖ ⵥⵥⴰⵔⵉⵄⴻⵜ ⵏⵏⴻⴽ ⴷⵉ ⵟⵟⵡⴻⵄ ⵏ ⵓⵎⵙⴻⵅⵅⴰⵔ ⵉⵏⵓ ⵉⴱⵔⴰⵀⵉⵎ.” 25 ⵅⴻⵏⵏⵉ ⵉⴱⵏⴰ ⴷⵉⵏ ⵉⵊⵊ ⵏ ⵓⵄⴰⵍⵟⴰⵔ ⵎⵉⵏ ⵅⴻⴼ ⵉⴳⴳⴰ ⵜⴰⵖⴰⵔⵚⵜ, ⵓⵛⴰ ⵉⵍⴰⵖⴰ ⵉⵙⴻⵎ ⵏ ⵙⵉⴷⵉ. ⵉⵡⵜⴰ ⴷⵉⵏ ⴰⵇⵉⴹⵓⵏ ⵏⵏⴻⵙ ⵓⵛⴰ ⵖⵥⵉⵏ ⴷⵉⵏ ⵉⵎⵙⴻⵅⵅⴰⵔⴻⵏ ⵏ ⵉⵙⵃⴰⵇ ⵉⵊⵊ ⵏ ⵡⴰⵏⵓ. 26 ⴰⴱⵉⵎⴰⵍⵉⴽ ⵢⵓⵙⴰ-ⴷⴷ ⵖⴰⵔⴻⵙ ⵥⵉ ⵊⵉⵔⴰⵔ, ⴰⴽ-ⴷ ⴰⵀⵓⵥⵥⴰⵜ, ⴰⵎⴻⴷⴷⵓⴽⴽⴻⵍ ⵏⵏⴻⵙ, ⴷ ⴼⵉⴽⵓⵍ, ⴰⴽⵓⵎⴰⵏⴷⴰⵔ ⴰⵎⴻⵇⵇⵔⴰⵏ ⵏ ⵍⵄⴻⵙⴽⴰⵔ ⵏⵏⴻⵙ. 27 ⵉⵏⵏⴰ ⴰⵙⴻⵏ ⵉⵙⵃⴰⵇ: “ⵎⴰⵖⴰⵔ ⵖⴰⵔⵉ ⴷⴷ-ⵜⵓⵙⵉⵎ, ⵡⴰⵅⵅⴰ ⴽⴻⵏⵏⵉⵡ ⵜⵛⴰⵔⵔⵀⴻⵎ ⴰⵢⵉ ⵓⵛⴰ ⵜⴻⵙⵙⵓⴼⴼⵖⴻⵎ ⴰⵢⵉ ⵅⴰⵡⴻⵎ?” 28 ⵏⵉⵜⵏⵉ ⵏⵏⴰⵏ: “ⴰⵇⴰ ⵏⴻⵥⵔⴰ ⴱⴻⵍⵍⵉ ⵙⵉⴷⵉ ⴰⴽⵉⴷⴻⴽ. ⵙ ⵓⵢⴰ ⵏⴻⵏⵏⴰ, ⴰⴷ ⴷⵉⵏ ⵜⵉⵍⵉ ⵍⴻⵅⵅⵓ ⵉⵛⵜ ⵏ ⵜⵊⴰⴵⵉⵜ ⵊⴰⵔ ⴰⵏⴻⵖ ⴷ ⵛⴻⴽ, ⵓⵛⴰ ⴻⵊⵊ ⴰⵏⴻⵖ ⴰⴷ ⴽⵉⴽ ⵏⴻⴳⴳ ⵉⵊⵊ ⵏ ⵍⵄⴰⵀⴷ 29 ⵃⵉⵎⴰ ⵛⴻⴽ ⵡⴰⵔ ⴷ ⴰⵏⴻⵖ ⵜᵉⵜⵜⴻⴳⴳⴻⴷ ⵍⵖⴰⵔ, ⴰⵎ ⵎⴰⵎⵎⴻⵛ ⵓⵍⴰ ⴷ ⵏⴻⵛⵛⵉⵏ ⵡⴰⵔ ⵛⴻⴽ ⵏⴻⵜⵜⵃⵉⴷⵉ ⵛⴰ ⵓⵛⴰ ⴰⵇⴰ ⵏⴻⵎⵎⵚⵓⵔⵔⴻⴼ ⴰⴽⵉⴷⴻⴽ ⵎⵍⵉⵃ ⵓⵛⴰ ⵏⴻⵙⵙⴻⴽⴽ ⵉ ⵛⴻⴽ ⴷⵉ ⵍⴰⵎⴰⵏ. ⴰⵇⴰ ⵛⴻⴽ ⵍⴻⵅⵅⵓ ⴷ ⴰⵎⵉⵎⵓⵏ ⵏ ⵙⵉⴷⵉ!” 30 ⵅⴻⵏⵏⵉ ⵉⴳⴳⴰ ⴰⵙⴻⵏ ⴰⵎⴻⵏⵙⵉ ⵓⵛⴰ ⵛⵛⵉⵏ, ⵙⵡⵉⵏ. 31 ⴽⴽⴰⵔⴻⵏ ⵥⵉⵛ ⵓⵛⴰ ⵊⵊⵓⴵⴻⵏ ⵉⵊⵊⴻⵏ ⵉ ⵡⴻⵏⵏⴻⵖⵏⵉ. ⵅⴰⵙ ⵓⵛⴰ ⵉⵙⵙⵇⴻⴱⴱⴻⴹ ⵉ-ⵜⴻⵏ ⵉⵙⵃⴰⵇ ⵓⵛⴰ ⵔⵓⵃⴻⵏ ⵏⵉⵜⵏⵉ ⵥⵉ ⵖⴰⵔⴻⵙ ⴷⵉ ⵍⴻⵀⵏⴰ.
32 ⴷⴻⴳ ⵡⴰⵙⵙ ⴷ ⵉⵊⵊ ⵓⵙⵉⵏ-ⴷⴷ ⵉⵎⵙⴻⵅⵅⴰⵔⴻⵏ ⵏ ⵉⵙⵃⴰⵇ, ⵅⴻⴱⴱⴰⵔⴻⵏ ⵜ ⵅ ⵡⴰⵏⵓ ⵉ ⵉⵖⵥⴰⵏ ⵓⵛⴰ ⵏⵏⴰⵏ ⴰⵙ: “ⴷ ⴰⵎⴰⵏ ⵉ ⵏⵓⴼⴰ.” 33 ⵉⵙⴻⵎⵎⴰ ⵜⴰⵏⵓⵜ-ⴰ ⵙⴻⴱⵄⴰ. ⵙ ⵓⵢⴰ ⵉ ⵉⴵⴰ ⵢⵉⵙⴻⵎ ⵏ ⵜⴻⵏⴷⵉⵏⵜ ⵏⵏⵉ ⴱⵉ’ⵔ-ⵙⴻⴱⵄⴰ, ⴰⵍ ⴰⵙⵙ-ⴰ.
ⵜⵉⵎⵖⴰⵔⵉⵏ ⵏ ⵄⵉⵙⵓ
34 ⵓⵎⵉ ⵜⵓⵖⴰ ⵖⴰⵔ ⵄⵉⵙⵓ ⴰⵔⴻⴱⵄⵉⵏ ⵏ ⵉⵙⴻⴳⴳⵯⵓⵙⴰ, ⵢⵉⵡⵉ ⵢⵓⴷⵉⵜ, ⵢⴻⴵⵉⵙ ⵏ ⴱⵉⵔⵉ, ⴰⵃⵉⵜⵜⵉ, ⴷ ⵜⴰⵎⵖⴰⵔⵜ, ⵓⵍⴰ ⴷ ⴱⴰⵙⵎⴰⵜ, ⵢⴻⴵⵉⵙ ⵏ ⵉⵍⵓⵏ, ⴰⵃⵉⵜⵜⵉ. □ 35 ⵜⵓⵖⴰ ⴰⵜⴻⵏⵜ ⴷ ⵜⴰⵔⵥⵓⴳⵉ ⵏ ⵡⵓⵍ ⵉ ⵉⵙⵃⴰⵇ ⴷ ⵔⵉⴼⵇⴰ. ■