1 ⴰⵡⴰⵔⵏⵉ ⵎⴰⵏ ⴰⵢⴰ ⵜⴻⵎⵙⴰⵔ, ⴰⵇⴰ ⵉⵊⴰⵔⵔⴻⴱ ⴰⵔⴻⴱⴱⵉ ⵉⴱⵔⴰⵀⵉⵎ, ⵉⵏⵏⴰ ⴰⵙ: “ⵉⴱⵔⴰⵀⵉⵎ!” ⵓⵛⴰ ⵉⵏⵏⴰ ⴰⵙ: “ⵅⵥⴰⵔ, ⵏⴻⵛⵛ ⴰⵇⴰ ⴰⵢⵉ ⴷⴰ!” 2 ⵉⵏⵏⴰ ⴰⵙ ⵏⴻⵜⵜⴰ: “ⴽⵙⵉ ⴰⵢⴻⵏⵏⵉ ⵏ ⵎⵎⵉⵛ, ⵡⴻⵏⵏⵉ ⵜⴻⵅⵙⴻⴷ, ⵉⵙⵃⴰⵇ, ⵓⵛⴰ ⵔⵓⵃ ⵖⴰⵔ ⵜⴻⵎⵎⵓⵔⵜ ⵏ ⵎⵓⵔⵉⵢⴰ ⵓⵛⴰ ⵜⵇⴻⴷⴷⵎⴻⴷ ⵜ ⴷⵉⵏ ⴷ ⵜⴰⵖⵔⴰⵚⵜ ⵅ ⵢⵉⵊⵊ ⵏ ⵡⴻⴷⵔⴰⵔ ⵊⴰⵔ ⵉⴷⵓⵔⴰⵔ ⵉ ⴷ ⴰⵛ ⵖⴰ ⵉⵏⵉⵖ.” ^■   3 ⵉⴽⴽⴰⵔ ⵉⴱⵔⴰⵀⵉⵎ ⵥⵉⵛ, ⵉⵃⴻⵥⵥⴻⵎ ⵉ ⵡⴻⵖⵢⵓⵍ ⵏⵏⴻⵙ ⵓⵛⴰ ⵉⴽⵙⵉ ⴰⴽⵉⴷⴻⵙ ⵜⵏⴰⵢⴻⵏ ⵏ ⵉⵃⵓⴷⵔⵉⵢⵢⴻⵏ ⵏⵏⴻⵙ ⴷ ⵎⵎⵉⵙ ⵉⵙⵃⴰⵇ. ⵉⵇⴻⵙⵙ ⴰⴽⴻⵛⵛⵓⴹ ⵉ ⵜⴻⵡⵀⵉⴱⵜ ⵏ ⵜⵖⴰⵔⵚⵜ, ⵉⴽⴽⴰⵔ, ⵉⵔⵓⵃ ⴷⴻⴳ ⵡⴻⴱⵔⵉⴷ ⵖⴰⵔ ⵡⴻⵎⵛⴰⵏ ⵉ ⴷ ⴰⵙ ⵉⵏⵏⴰ ⴰⵔⴻⴱⴱⵉ. 4 ⴷⴻⴳ ⵡⴰⵙⵙ ⵡⵉⵙⵙ ⵜⵍⴰⵜⴰ ⵉⵙⵙⴳⴻⵄⵄⴻⴷ ⵉⴱⵔⴰⵀⵉⵎ ⵜⴰⵎⵓⵖⵍⵉ ⵏⵏⴻⵙ ⵓⵛⴰ ⵉⵥⵔⴰ ⴰⵎⵛⴰⵏ ⵥⵉ ⵍⴰⴳⴳⵯⴰⵊ. 5 ⵉⵏⵏⴰ ⵉⴱⵔⴰⵀⵉⵎ ⵉ ⵉⵃⵓⴷⵔⵉⵢⵢⴻⵏ ⵏⵏⴻⵙ: “ⵔⴰⵊⴰⵎ ⴷⴰ ⴰⴽ-ⴷ ⵡⴻⵖⵢⵓⵍ, ⵏⴻⵛⵛ ⴷ ⵓⵃⴻⵏⵊⵉⵔ ⴰⴷ ⵏⵔⴰⵃ ⴷⵉⵀⴰ, ⴰⴷ ⵏⴻⵙⵊⴻⴷ ⵓⵛⴰ ⴰⴷ ⵖⴰⵔⵡⴻⵎ ⴷⴷ-ⵏⴻⵄⵇⴻⴱ.” 6 ⵉⴽⵙⵉ ⵉⴱⵔⴰⵀⵉⵎ ⴰⴽⴻⵛⵛⵓⴹ ⵉ ⵡⴻⵛⵎⴰⴹ ⵏ ⵜⵖⴰⵔⵚⵜ, ⵉⵙⵙⴰⵔⵙ ⵉ-ⵜ ⵅ ⵎⵎⵉⵙ ⵉⵙⵃⴰⵇ ⵓ ⵏⴻⵜⵜⴰ ⵙ ⵢⵉⵅⴻⴼ ⵏⵏⴻⵙ ⵉⴽⵙⵉ ⵙ ⵓⴼⵓⵙ ⵏⵏⴻⵙ ⵜⵉⵎⴻⵙⵙⵉ ⴷ ⵜⵅⴻⴷⵎⴻⵛⵜ ⵓⵛⴰ ⴰⵎⵎⵓ ⵉ ⵔⵓⵃⴻⵏ ⵙ ⵜⵏⴰⵢⴻⵏ ⵉⴷⵙⴻⵏ. 7 ⵅⴻⵏⵏⵉ ⵉⵙⵙⵉⵡⴻⵍ ⵉⵙⵃⴰⵇ ⴰⴽ-ⴷ ⵉⴱⵔⴰⵀⵉⵎ ⴱⴰⴱⴰⵙ, ⵉⵏⵏⴰ: “ⴱⴰⴱⴰ ⵉⵏⵓ!” ⵉⵏⵏⴰ ⵏⴻⵜⵜⴰ: “ⵅⵥⴰⵔ, ⵏⴻⵛⵛ ⴰⵇⴰ ⴰⵢⵉ ⴷⴰ, ⵎⵎⵉ!” ⵓⵛⴰ ⵉⵏⵏⴰ ⵏⴻⵜⵜⴰ: “ⵅⵥⴰⵔ, ⴰⵇⴰ ⴷⴰ ⵜⵉⵎⴻⵙⵙⵉ ⴷ ⵓⴽⴻⵛⵛⵓⴹ, ⵎⴰⵛⴰ ⵎⴰⵏⵉ ⵉⴵⴰ ⵉⵥⵎⴰⵔ ⵉ ⵜⵖⴰⵔⵚⵜ?” 8 ⵉⵏⵏⴰ ⵉⴱⵔⴰⵀⵉⵎ: “ⴰⵔⴻⴱⴱⵉ ⵙⵉⵎⴰⵏⵜ ⵏⵏⴻⵙ ⴰⴷ ⵉⵙⵙⴰⵔⵥⴻⵇ ⵙ ⵢⴻⵥⵎⴰⵔ ⵉ ⵜⵖⴰⵔⵚⵜ, ⵎⵎⵉ!” ⵓⵛⴰ ⴰⵎⵎⵓ ⵉ ⵔⵓⵃⴻⵏ ⵙ ⵜⵏⴰⵢⴻⵏ ⵉⴷⵙⴻⵏ 9 ⵓⵛⴰ ⵉⵡⴹⴻⵏ ⵖⴰⵔ ⵡⴻⵎⵛⴰⵏ ⵏⵏⵉ ⵉ ⴷ ⴰⵙ ⵉⵏⵏⴰ ⴰⵔⴻⴱⴱⵉ. ⴷⵉⵏ ⵉ ⵉⴱⵏⴰ ⵉⴱⵔⴰⵀⵉⵎ ⵉⵊⵊ ⵏ ⵓⵄⴰⵍⵟⴰⵔ ⵓⵛⴰ ⵉⵄⴷⴻⵍ ⴰⴽⴻⵛⵛⵓⴹ, ⵉⵛⴰⵔⴼ ⵎⵎⵉⵙ ⵉⵙⵃⴰⵇ ⵓⵛⴰ ⵉⵙⵙⴰⵔⵙ ⵉ-ⵜ ⵅ ⵓⵄⴰⵍⵟⴰⵔ ⵅ ⵉⴽⴻⵛⵡⴰⴹ. ^■  

10 ⵅⴰⵙ ⵓⵛⴰ ⵉⵙⵙⵡⵉⵥⵥⴻⴹ ⵉⴱⵔⴰⵀⵉⵎ ⴰⴼⵓⵙ ⵏⵏⴻⵙ ⵓⵛⴰ ⵉⴽⵙⵉ-ⴷⴷ ⵜⴰⵅⴻⴷⵎⴻⵛⵜ ⵃⵉⵎⴰ ⴰⴷ ⵉⵖⴰⵔⵚ ⵉ ⵎⵎⵉⵙ.

11 ⵎⴰⵛⴰ ⵍⵎⴰⵍⴰⴽ ⵏ ⵙⵉⴷⵉ ⵉⵍⴰⵖⴰ ⴰⵙ-ⴷⴷ ⵥⴻⴳ ⵓⵊⴻⵏⵏⴰ, ⵉⵏⵏⴰ ⴰⵙ: “ⵉⴱⵔⴰⵀⵉⵎ, ⵉⴱⵔⴰⵀⵉⵎ!” ⵏⴻⵜⵜⴰ ⵉⵏⵏⴰ: “ⵏⴻⵛⵛ ⴰⵇⴰ ⴰⵢⵉ ⴷⴰ!”

12 ⵅⴻⵏⵏⵉ ⵉⵏⵏⴰ ⴰⵙ: “ⵡⴰⵔ ⵙⵡⵉⵥⵥⵉⴹ ⴰⴼⵓⵙ ⵏⵏⴻⴽ ⵖⴰⵔ ⵓⵃⴻⵏⵊⵉⵔ ⵏⵉⵖ ⴰⴷ ⴰⵙ ⵜⴻⴳⴳⴻⴷ ⵛⴰ, ⵎⵉⵏⵥⵉ ⵍⴻⵅⵅⵓ ⴰⵇⴰ ⵙⵙⵏⴻⵖ ⴱⴻⵍⵍⵉ ⵜᵉⵜⵜⴻⴳⴳⵯⴻⴷⴻⴷ ⴰⵔⴻⴱⴱⵉ ⵓ ⵡⴰⵔ ⵅⴰⴼⵉ ⵜⴻⵙⵙⵄⵉⵥⵥⴻⴷ ⴰⵢⴻⵏⵏⵉ ⵏ ⵎⵎⵉⵛ.”

13 ⵉⵙⵙⴳⴻⵄⵄⴻⴷ ⵉⴱⵔⴰⵀⵉⵎ ⵜⵉⵟⵟⴰⵡⵉⵏ ⵏⵏⴻⵙ, ⵓ ⵅⵥⴰⵔ, ⴰⵇⴰ ⴰⵡⴰⵔⵏⵉ ⴰⵙ ⵜⵓⵖⴰ ⵉⵊⵊ ⵏ ⵉⵛⴰⵔⵔⵉ ⵉⵇⵇⴻⵏ ⵖⴰⵔ ⵛⴱⴰⵔⵇ ⵥⴻⴳ ⵡⴰⵛⵛⴰⵡⴻⵏ ⵏⵏⴻⵙ. ⵢⵓⵢⵓⵔ ⵉⴱⵔⴰⵀⵉⵎ ⴷⵉⵏⵏⵉ, ⵉⵟⵟⴻⴼ ⵉⵛⴰⵔⵔⵉ ⵓⵛⴰ ⵉⵥⴰⵔⴼ ⵉ-ⵜ ⴷ ⵜⴰⵖⴰⵔⵚⵜ ⴷⴻⴳ ⵡⴻⵎⵛⴰⵏ ⵏ ⵎⵎⵉⵙ. ^□  

14 ⵉⵍⴰⵖⴰ ⵉⴱⵔⴰⵀⵉⵎ ⵉⵙⴻⵎ ⵏ ⵡⴻⵎⵛⴰⵏ ⵏⵏⵉ: “ⵙⵉⴷⵉ ⴰⴷ ⵉⵙⵙⴰⵔⵥⴻⵇ!” ⵙ ⵓⵢⴻⵏⵏⵉ ⵉⵇⵇⴰⵔ ⴱⵏⴰⴷⴻⵎ ⴰⵍ ⴰⵙⵙ-ⴰ: “ⴷⴻⴳ ⵡⴻⴷⵔⴰⵔ ⵏ ⵙⵉⴷⵉ ⴰⴷ ⵢⵉⵍⵉ ⵢⴰⵔⵥⴻⵇ!” ^□  

15 ⵉⵍⴰⵖⴰ-ⴷⴷ ⵍⵎⴰⵍⴰⴽ ⵏ ⵙⵉⴷⵉ ⵡⵉⵙⵙ ⵎⴰⵔⵜⴰⵢⴻⵏ ⵥⴻⴳ ⵓⵊⴻⵏⵏⴰ ⵅ ⵉⴱⵔⴰⵀⵉⵎ,

16 ⵉⵏⵏⴰ: “ⵎⵉⵏⵥⵉ ⵜⴻⴳⴳⵉⴷ ⵎⴰⵏ ⴰⵢⴰ ⵓⵛⴰ ⵡⴰⵔ ⵅⴰⴼⵉ ⵜᵉⵟⵟⵉⴼⴻⴷ ⴰⵢⴻⵏⵏⵉ ⵏ ⵎⵎⵉⵛ, ⴰⴷ ⵊⵊⴰⴵⴻⵖ ⵅ ⵙⵉⵎⴰⵏⵜ ⵉⵏⵓ, ⵉⵏⵏⴰ ⵙⵉⴷⵉ, ^■  

17 ⴰⵇⴰ ⴰⴷ ⵛⴻⴽ ⴱⴰⵔⴽⴻⵖ ⴰⵟⵟⴰⵙ ⵓⵛⴰ ⴰⴷ ⴽⴻⵜⵜⴰⵔⴻⵖ ⵥⵥⴰⵔⵉⵄⴻⵜ ⵏⵏⴻⴽ ⴰⵟⵟⴰⵙ ⴰⵎⴻⵛⵏⴰⵡ ⵉⵜⵔⴰⵏ ⵏ ⵓⵊⴻⵏⵏⴰ ⵓ ⴰⵎⴻⵛⵏⴰⵡ ⵉⵊⴷⵉ ⵅ ⵜⵎⴰ ⵏ ⵍⴻⴱⵃⴰⵔ. ⵣⵥⴰⵔⵉⵄⴻⵜ ⵏⵏⴻⴽ ⴰⴷ ⵜᵉⵟⵟⴻⴼ ⵜⴰⵡⵡⴰⵔⵜ ⵏ ⵍⵄⴻⴷⵢⴰⵏ ⵏⵏⴻⵙ ⴷ ⵍⵡⴰⵔⵜ ^■  

18 ⵓ ⴷⵉ ⵥⵥⴰⵔⵉⵄⴻⵜ ⵏⵏⴻⴽ ⴰⴷ ⵜⵜⵡⴰⴱⴰⵔⴽⴻⵏ ⵎⴰⵔⵔⴰ ⵍⴻⴳⵏⵓⵙ ⵏ ⵜⴻⵎⵎⵓⵔⵜ, ⵎⵉⵏⵥⵉ ⵜⴻⵙⵍⵉⴷ ⵉ ⵜⵎⵉⵊⵊⴰ ⵉⵏⵓ.” ^■  

19 ⵅⴻⵏⵏⵉ ⵉⵄⵇⴻⴱ-ⴷⴷ ⵉⴱⵔⴰⵀⵉⵎ ⵖⴰⵔ ⵉⵃⵓⴷⵔⵉⵢⵢⴻⵏ ⵏⵏⴻⵙ. ⵏⵉⵜⵏⵉ ⴽⴽⴰⵔⴻⵏ ⵓⵛⴰ ⵔⵓⵃⴻⵏ ⵊⵎⵉⵄ ⴷⴻⴳ ⵡⴻⴱⵔⵉⴷ ⵖⴰⵔ ⴱⵉ’ⵔ-ⵙⴻⴱⵄⴰ ⵓⵛⴰ ⵉⵥⴷⴻⵖ ⵉⴱⵔⴰⵀⵉⵎ ⴷⵉ ⴱⵉ’ⵔ-ⵙⴻⴱⵄⴰ.

20 ⴰⵡⴰⵔⵏⵉ ⵎⴰⵏ ⴰⵢⴰ ⵉⵎⵙⴰⵔ ⴰⵇⴰ ⵅⴻⴱⴱⴰⵔⴻⵏ ⵉⴱⵔⴰⵀⵉⵎ, ⵏⵏⴰⵏ ⴰⵙ: “ⵅⵥⴰⵔ, ⵄⴰⵡⴻⴷ ⵎⵉⵍⴽⴰ ⵜⵓⵔⵓⵡ-ⴷⴷ ⵉⵃⴻⵏⵊⵉⵔⴻⵏ ⵉ ⵏⴰⵃⵓⵔ ⵓⵎⴰⵛ: 21 ⵄⵓⵚ, ⴰⵎⴻⵏⵥⵓ ⵏⵏⴻⵙ, ⴷ ⴱⵓⵥ ⵓⵎⴰⵙ, ⴷ ⵇⴰⵎⵓⵡⵉⵍ ⵡⴻⵏⵏⵉ ⴷ ⴱⴰⴱⴰⵙ ⵏ ⴰⵔⴰⵎ, 22 ⴷ ⴽⴰⵙⴰⴷ ⴷ ⵃⴰⵥⵓ ⴷ ⴼⵉⵍⴷⴰⵛ ⴷ ⵢⵉⴷⵍⴰⴼ ⴷ ⴱⵉⵜⵓⵡⵉⵍ.” 23 ⴱⵉⵜⵓⵡⵉⵍ ⵉⵊⵊⴰ-ⴷⴷ ⵔⵉⴼⵇⴰ. ⵜⵎⴻⵏⵢⴰ ⴰⵢⴰ ⵉ ⴷⴷ-ⵜⵓⵔⵓⵡ ⵎⵉⵍⴽⴰ ⵉ ⵏⴰⵃⵓⵔ, ⵓⵎⴰⵙ ⵏ ⵉⴱⵔⴰⵀⵉⵎ. 24 ⵓ ⵜⴰⵢⵢⴰ ⵏⵏⴻⵙ, ⵜⴻⵏⵏⵉ ⵓⵎⵉ ⵇⵇⴰⵔⴻⵏ ⵔⵉⵄⵓⵎⴰ, ⵜⵓⵔⵓⵡ ⴰⵙ-ⴷⴷ ⵄⴰⵡⴻⴷ ⵟⴰⴱⴰⵃ ⴷ ⵊⴰⵃⴰⵎ ⴷ ⵜⴰⵃⴰⵛ ⴷ ⵎⴰⵄⴽⴰ. ^□