Bulus di tegzirt n Malta
28
1 Awarni man aya nefhem, belli tagzirt-a qqaren as Malta. 2 Ibarraniyyen ggin akidneɣ mliḥ aṭṭas, am ssiɣen ict n tmessi d tameqqrant uca iwyen aneɣ ɣarsen marra ḥima ad neẓɣeř minzi anẓar tuɣa ibda iccat u tuɣa tesmeḍ. 3 Umi tuɣa issmun Bulus aṭṭas n ikecwaḍ, issars i-ten x tmessi, xenni s řeḥmu nni iffeɣ-dd ijj n ufiɣar uca iqqes as deg ufus. 4 Umi ẓrin ibarraniyyen aqa yuyeř ufiɣar ɣar ufus nnes, nnan: “Ad taɣ bnadem-a d aqettař, war t tejji ‘lalla řḥeqq’ ad iddar waxxa injem-dd zi řebḥar.” 5 Maca Bulus izzerz s ufus nnes, immenḍar afiɣar di tmessi, břa ma d as temsar uřa d ict n druct. ■ 6 Maca nitni tuɣa ttrajan ad yuff řexdenni uca ad iwḍa ad immet. Maca umi ẓrin, awarni řami rajan aṭṭas, belli war d as temsar uřa d ict n řḥajjet, ibeddeř řḥarḍ nsen, nnan, aqa-t d ijj n arebbi. ■ 7 Tuɣa x jjihet nni iḥwicen nni d agřa n ijj n weryaz umi qqaren Publiyus. Netta tuɣa d azeǧif n tegzirt, issnewju aneɣ s řxar třata n wussan di taddart nnes. 8 Maca babas n Publiyus tuɣa izzeř, dayes timessi d teqqrint. Yudef Bulus ɣares, iẓẓuǧ, issars xas afus uca issgenfa i-t. 9 Umi imsar man aya, usin-dd ɣares inneɣni n tegzirt inni tuɣa ɣar iǧa imehřac uca ttwasgenfan.
10 Karmen xaneɣ ina s waṭṭas n ccan. Umi nruḥ nbeḥḥar ssenni, wcin aneɣ min tuɣa neḥwaj.
Awaḍ n Bulus ɣar Ruma
11 Awarni teřt n iyuren nruḥ, nbeḥḥar deg ijj n uɣarrabu zi Iskandariyya i isseɛdun řmecta di tegzirt, tuɣa xas arcam n ‘Tecniwin’.
12 Umi dd-niweḍ ɣar Siragusa, neqqim din třata n wussan.
13 Ssenni ndur uca niweḍ-dd ɣar Rixiyum. Awarni ijj n wass ikkar-dd usemmiḍ n tcarmin uca niweḍ-dd deg ijj n řmijař n tnayen n wussan ɣar Putiyuli, ict n tendint di Iṭalya.
14 Dinni i nufa tawmat nni zzayneɣ ittaren ad kidsen neqqim, uca neqqim akidsen sebɛa n wussan. Xenni nruḥ ɣar Ruma.
15 Umi sřin tawmat di Ruma x umeddur nneɣ, usin-dd ḥima ad kidneɣ mmeřqan deg wazzay umi qqaren ‘Apiyus Furum’ u ɣar ‘Třata n Tḥuna’. Umi ten iẓra Bulus, icekkar AREBBI uca ittwacejjeɛ.
16 Umi dd-niweḍ ɣar Ruma, iwca řqebṭan x mya ttesřiḥ i Bulus maḥend ad izdeɣ mani ixs netta, ak-d ijj n uɛessas wenni t i ɣa iḥḍan. ■
Ameřqi n Bulus ak-d Wudayen di Ruma
17 Awarni třata n wussan iřaɣa Bulus i imcennɛen n Wudayen. Ařami munen, inna asen:
“A iryazen tawmat, waxxa necc war ggiɣ uřa d ict n řḥajjet ḍidd i weydud niɣ ḍidd i Ccariɛa n řejdud inu, aqa ttwasellmeɣ d ameḥbus zi Urcalim deg ifassen n Irumaniyyen. ■
18 Awarni řami d ayi beqqcen, tuɣa xsen ad ayi arxun minzi war dayi ufin uřa d ict n řḥajjet tessdaheǧ řmewt.
19 Maca umi ɛekksen Wudayen x man aya, s uɣiř xafi ad ssgeɛɛdeɣ ddeɛwet inu ɣar qayṣar, maca břa ma ad ɣari yiři ca ḍidd i řgens inu. 20 X ssibbet-a ttareɣ ḥima ad kenniw ẓareɣ uca ad kiwem ssiwřeɣ. Minzi di ssibbet n usitem n Israil, aqa ayi carfeɣ s ssnesřet-a.” ■
21 Maca nitni nnan as: “War xak neṭṭif ca tibratin zi Yahudiyya uca uřa d ijj n tewmat war dd-yusi da wi innan niɣ issiwřen xak s ca n řɛib. 22 Maca neccin nexs ad zzayek nseř min tᵉttwařid, minzi zi jjihet n tebridt-a, aqa nessen belli ttɛekksen tt mani mma.”
23 Nitni mɛahaden akis x ijj n wass akides, uca munen. Aṭṭas i-dd-yusin ɣar wemcan mani izeddeɣ. Netta tuɣa ittfessar asen Tageldit n AREBBI, am icehhed u yarezzu ad ten isseqneɛ zi jjihet n Yeccu, zi Ccariɛa n Musa u zeg inabiyyen, zi řefjar ařami d tameddit. ■ 24 Ca ttwassqenɛen s wawařen nnes, maca inneɣni war ttwassqenɛen ca. ■ 25 Umi xas ffɣen am war dd-usin ak-d wayawya, inna asen Bulus ɛad awař-a: “S řḥeqq issiweř Arruḥ Iqeddsen x uqemmum n Icaɛya i řejdud nwem, inna:
26 ‘Ruḥ ɣar řgens-a, ini asen:
‘S useǧi ad tesřem, war ggur ad tfehmem,
s tmuɣři ad texzarem, war ggur ad tᵉttwařam, ■
27 minzi uř n řgens-a aqa idweř iqseḥ,
imezzuɣen nsen ssḍeqřen ten s useǧi,
u tiṭṭawin nsen qqnen tent,
maḥend war ggur ad ttwařan s tiṭṭawin nsen,
ad sřen s imezzuɣen nsen,
ad fehmen s wuř nsen,
uca ad dewřen ɣari
u Necc ad asen ɣfareɣ.’ ■
28 Man aya ittxeṣṣa ad tessnem: Aṣřaḥ n AREBBI aqa ittwassekk-dd i řegnus uca uřa d nitni ad ɣares sřen.” 29 Awarni řami inna man aya, ffɣen Wudayen, am tuɣa ttemcubbucen jar asen aṭṭas.