1 Cawul yarḍa x řmewt nnes. Deg wussan nni imsar ijj n umarret imɣar x tmesmunt di Urcalim u marra ttwazuzzaren ɣar jjwayeh n Yahudiyya d Samarya, mɣir rrusul lla. ^□  ■   2 Ca n yeryazen idiyaniyyen arbun Stifanus ɣar wenḍeř uca ggin xas ijj n wecḍan ameqqran. ^■   3 Maca Cawul tuɣa ittdarrec tamesmunt xmi ittadef ɣar tudrin, ittjarra iryazen d temɣarin, ineddeh i-ten ɣar řeḥbes. ^■  

4 Inni ittwazuzzaren tuɣa gguren, ttennḍen, ttbarrḥen s Wawař n AREBBI. ^■   5 Amu ihwa-dd Filippus ɛawed ɣar tendint n Samarya, ibarreḥ i-ten s Lmasiḥ. 6 Umi sřin i wawař nnes, ttwassqenɛen iwdan i tuɣa ittesřan s marra min ittwannan zi Filippus, maɣar ẓrin řeɛřamat i igga. 7 Minzi zeg waṭṭas n yinni di iǧa řaryaḥ imengas ffɣen zzaysen yina, am sɣuyyun s tmijja ijehden. Inneɣni i tuɣa d ineɛḍaben d iqejdaḥen, ttwasgenfan. ^■   8 Tuɣa din ict n řefraḥet temɣar di tendint nni.

9 Tuɣa din ijj n weryaz, qqaren as Cimɛun, tuɣa izeddeɣ di tendint nni aṭṭas zeg wami. Netta tuɣa issɣekkwa řgens n Isamiriyyen s tseḥḥart nnes, ittbarren x yixef nnes, inna: “Necc d wenni imɣaren!” ^■  

10 Marra sřin ɣares, am umeẓyan, am umeqqran, nnan: “Wanita d jjehd imɣaren n AREBBI.”

11 Isseqneɛ i-ten marra s minzi tuɣa issarjef i-ten s ssḥur nnes aṭṭas zeg wami.

12 Maca umi yumnen di Filippus wenni tuɣa ittbarreḥ s Řexbar Aṣebḥan n Tgeldit n AREBBI u s Yisem n Yeccu Lmasiḥ, ttwasɣeḍṣen nitni, am yeryazen am temɣarin.

13 Cimɛun s yixef nnes ɛawed yumen u awarni řami ittwasseɣḍeṣ, iqqim iḍeffar Filippus. Řami iẓra lmuɛjizat d řeɛřamat imɣaren i imsaren s ufus nnes, ittebhet, yarjef.

14 Umi sřin rrusul inni iǧan di Urcalim belli Samarya teqbeř Awař n AREBBI, ssekken ɣarsen Cimɛun Buṭrus d Yuḥanna.

15 Nitni hwan-dd ɣarsen, ẓẓuǧen asen ḥima ad ṭṭfen Arruḥ Iqeddsen,

16 minzi Netta tuɣa ɛad war dd-yusi x uřa d ijj zzaysen, tuɣa ttwassɣeḍṣen waha s Yisem n Sidi Yeccu.

17 Xenni ssarsen xasen ifassen uca nitni ṭṭfen Arruḥ Iqeddsen. ^■  

18 Umi iẓra Cimɛun belli s usarsi n ifassen n rrusul immewc asen Arruḥ Iqeddsen, xenni ixs ad dd-asen iwc tmenyat,

19 inna: “Ewc ayi ɛawed ṣṣulṭa aya ḥima, man wen ma x i ɣa ssarseɣ afus inu, ad iqbeř Arruḥ Iqeddsen.” 20 Inna as Cimɛun Buṭrus: “Ad tᵉteḥḥa nnuqart nnek akidek, minzi ittɣiř ac ad tkesbed tawhibt n AREBBI s wagřa n ddunect. ^■   21 War ɣarek bu tesɣart uřa d ca di l’iman wanita, minzi uř nnek war iǧi isegged zzat i AREBBI. 22 Tub zi tuɛeffna nnek uca ttar zi AREBBI maḥend ad xak ittwaɣfar uxarraṣ-a n wuř nnek, 23 Minzi ttwařiɣ aqa cek tewḍid-dd deg ijj n uḥrir d amerzag u deg ijj n uceddi n tuɛeffna.” 24 Yarra-dd Cimɛun, inna: “Ttarem i AREBBI xafi ḥima war dd-ittis xafi ca zi min tennam.”

25 Awarni řami cehden Cimɛun d Yuḥanna u ssřemden Awař n AREBBI, ɛeqben ɣar Urcalim, barrḥen s Řexbar Aṣebḥan deg waṭṭas n ředcur n Isamariyyen.

26 Uca Lmalak n SIDI issiweř ak-d Filippus, inna: “Kkar, truḥed ɣar ljanub deg webrid n řexřa i dd-ihwan zi Urcalim ɣar Ɣazza.” 27 Ikkar iruḥ, uca immeřqa ak-d ijj n řewzir zi temmurt n Kuc, ijj n řewzir n Kandaki, tajeǧidt n ayt n Kuc. Tuɣa-t x marra řeknuz nnes, yusa-dd ɣar Urcalim ḥima ad din iɛbed. ^□   28 Umi dd-iɛqeb, iqqim x ijj n ukarru, iqqar deg wedlis n unabi Icaɛya.

29 Xenni inna Arruḥ i Filippus: “Zid, tmuned ak-d ukarru aya.” 30 Iqarreb-dd ɣares Filippus, isřa as min iqqar zeg wedlis n unabi Icaɛya, inna as: “Ma tfehmed min teqqared?” 31 Inna as: “Mammec zemmareɣ ad fehmeɣ mařa war din ḥed i d ayi ɣa issefhemen?” Uca ittar zi Filippus maḥend ad yenya uca ad kis iqqim. 32 Udem i tuɣa iqqar zeg Wedlis d wa:

“Amecnaw izmar ittwandeh ɣar řgurnet i tɣarṣt,

amecnaw texsi tegnu qibač i wenni tt iǧasen,

war yarzim Netta aqemmum nnes.

33 Deg useḥqar nnes ittwakkes zi tmeḥbast u zi řḥukm.

Wi i ɣa iɛawden x dduriyet nnes?

Minzi tudart nnes tᵉttwakkes zi temmurt.” ^■  

34 Yarra-dd řewzir x Filippus, inna: “Ad cek sseqsiɣ, x wi xef issawař unabi man aya, ma x yixef nnes niɣ x ijjen nneɣni?” 35 Yarzem Filippus aqemmum nnes, uca ibda ittbarreḥ as s wawař-a x Siditneɣ Yeccu. ^■  

36 Am tuɣa gguren nitni deg webrid, iwḍen ɣar ijj n wemcan mani tuɣa ǧan waman. Inna řewzir: “Xzar, aqa din aman. Min war d ayi ittejjin ad ttwasɣeḍṣeɣ?” ^■   37 Inna Filippus: “Mařa tumned s wuř nnek marra, tḥeǧeř!” Uca netta yarra-dd, inna: “Umneɣ aqa Yeccu Lmasiḥ d Mmis n AREBBI.” 38 Yumur ad ibedd ukarru, hwan tnayen idsen deg waman uca Filippus isseɣḍeṣ řewziř. 39 Ařami dd-geɛɛden zeg waman, ixḍef Arruḥ n SIDI Filippus. Uca řewzir war t iẓri ɛad, maca iruḥ deg webrid nnes s řefraḥet. 40 Maca Filippus ittwaf di Acdud u ssenni ittcuqqa di temmurt, ittbarreḥ s Řexbar Aṣebḥan di marra tineddam ařami dd-yiweḍ ɣar Qayṣariya.