1 Am tuɣa ssawařen ak-d řgens, xeccen-dd xasen ikehhanen ak-d imeqqranen x Zzawect Tameqqrant d Iṣaduqiyyen, 2 minzi tuɣa xeyyqen xasen maɣar nitni tuɣa sseřmaden řgens u ttbarrḥen tanukra zi taddart n imettinen s Lmasiḥ. 3 Ssarsen xasen ifassen uca ḥebbsen ten ař tiwecca nnes, minzi tuɣa tewḍa-dd tmeddit. 4 Aṭṭas zeg inni isřin awař-a umnen u řqedd n yeryazen yiweḍ-dd ɛřaḥař xemsa-ařef.

5 Tiwecca nnes munen imeqqranen d imɣaren d imseřmaden n idlisen di Urcalim, 6 uřa d Ḥannan, arrays n ikehhanen, d Qayafa d Yuḥanna d Aliksandir u marra inni tuɣa dd-iqqarṣen zi řaǧ n arrays n ikehhanen. 7 Umi ten ssbedden di řwest, sseqsan ten: “S man jjehd niɣ s man isem i teggim aya?” ^■   8 Řexdenni inna asen Cimɛun Buṭrus iccuren s Arruḥ Iqeddsen: “Sřem, a imeqqranen n řgens d imɣaren n taddart n Israil! 9 Mařa ass-a nettwaḥkem zzaywem x lmuɛjiza i ittwaggen i yijj n umehřuc, s min zi idweř weryaz-a iggenfa,

10 ittxeṣṣa ad tessnem kenniw d marra řgens n Israil belli aryaz wanita ibedd zzatwem iṣeḥḥ s Yisem n Yeccu Lmasiḥ Nnaṣiri, wenni tṣellbem, maca wenni dd-issnekkar AREBBI zi taddart n imettinen, wah aqa zzayes ibedd aryaz-a zzatwem iseḥḥ.

11 D wa d Aẓru nni temmenḍarem kenniw, a ibennayen, maca Netta aqa idweř d aẓru azeǧif n teɣmart. ^■  

12 Řefdiyyet war iǧi s ijjen bnadem nneɣni, minzi war din isem nneɣni sadu ujenna i zi ɣa neṭṭef Tudart.” ^■  

13 Řami sřin awařen n Cimɛun d Yuḥanna inni issiwřen nitni s bṭayṭay, uca ufin belli nitni war ǧin d imusnawen n Wedlis niɣ d iwdan inni iřemden aṭṭas, aqa tbehten uca ɛeqřen belli nitni tuɣa aten ak-d Yeccu.

14 Nitni ẓrin bnadem i tuɣa d aneɛḍab uca idweř iggenfa, ibedd akidsen, uca war ufin min ɣa inin x man aya.

15 U awarni řami umaren maḥend ad ten ssuffɣen barra i Lmeḥkama nsen, umi qqaren ‘Sunhidrin’, mcawaren ak-d wayawya, nnan:

16 “Min i ɣa negg s iryazen-a? Minzi aqa iban-dd mliḥ i marra imezdaɣ n Urcalim belli řeɛřamet temsar s ufus nsen, war nzemmar ad tt nenkar. ^■  

17 Maca ḥima war ittwabarreḥ řexbar-a ktar jar weydud, ejj aneɣ ad ten nessiggʷed ḥima war ssiwiřen ɛemmarṣ ɛawed deg Yisem-a uřa ak-d ijj n bnadem.”

18 Xas uca řaɣan-dd xasen, umuren ten maḥend war ssiwiřen war sseřmiden ɛemmarṣ ɛad deg Yisem n Yeccu.

19 Maca Cimɛun Buṭrus d Yuḥanna arrin-dd xasen, nnan asen: “Ḥekmem kenniw, ma iḥiqq zzat i AREBBI maḥend ad nseř ktar i kenniw x AREBBI, ^■   20 minzi war nzemmar ad neqqim war nessiwiř x min neẓra u x min nesřa.” 21 Maca nitni ssiggʷeden ten ɛad ktar, xenni jjin ten ad raḥen, ařami war ufin min zi ten i ɣa ɛaqben zi ssibbet n iwdan, minzi marra iwdan tuɣa ssemɣaran di AREBBI x min imsaren, ^■   22 minzi aryaz i dayes ittwagg řeɛřamet-a n ugenfi, tuɣa ɣares ktar zi arebɛin n iseggʷusa.

23 Awarni řami d asen arxun, ruḥen nitni ɣar aytmatsen uca xebbaren ten s marra min d asen nnan imeqqranen n ikehhanen d imɣaren n řgens. ^■   24 Umi sřin aya, ssgeɛɛden tmijja nsen ɣar AREBBI s dmam d ijjen, nnan: “A SIDI, Cek d AREBBI wenni iggin ajenna d temmurt d řebḥur d marra min dayes, ^■   25 Cek d Wenni innan s uqemmum n umsexxar nnek Dawud:

‘Mayemmi ɣewwɣen řegnus

u mayemmi xarrṣen řegnus di min ixwan? ^■  

26 Aqa kkaren ijeǧiden n ddunect,

uca inni ɣarsen iǧa ṣṣulṭa mmcawaren

ḍidd n SIDI u ḍidd n Lmasiḥ nnes.’ ^■  

27 Minzi s tidett aqa Hirudus d Punṭiyus Pilaṭus d řegnus d ibarruten n Israil munen x Mmic amqeddas nnek Yeccu wenni umi tmesḥed, ^■   28 ḥima ad ggen marra min tuɣa izwar ineyyec ufus nnek d ccwar nnek ad yiři. 29 Řexxu, a SIDI, xzar ɣar usiggʷed nsen uca ewc i imsexxaren nnek ḥima ad ssiwřen s wawař nnek s taryast, 30 am tesswiẓẓḍed afus nnek i usgenfi u ḥima ad tegged timegga jehdent d řeɛřamat d řeɛjayeb deg Yisem n Mmic Amqeddas Yeccu.” ^■   31 Awarni řami kemmřen taẓaǧit d tkessit s řmeɛruf, inhezz wemcan i di tuɣa munen, u marra dewřen ccuren s Arruḥ Iqeddsen, ssawařen s wawař n AREBBI s teryast. ^■  

32 Řɣaci n yinni yumnen tuɣa s řeɛmar d uxarreṣ d ijjen uca uřa d ijj war iqqar belli min tuɣa ɣares aqa i netta weḥḥdes, maca nitni carcen di kuřci jar asen. ^■   33 Tuɣa rrusul cehhden s yijj n jjehd imɣar x tnukra n Yeccu Lmasiḥ uca yiweḍ-dd arḍa imɣar x marra nitni. ^□   34 War tuɣi jar asen uřa d ijj dayes řexṣeṣ, minzi marra inni ɣar iǧa iyyaren niɣ tudrin zznuzan ten, uca ttawyen-dd ttaman n min zznuzan, 35 ssrusan t ɣar iḍaren n rrusul. Nitni bḍan zzayes i kuř ijj ɛlaḥsab min tuɣa iḥwaj. ^■  

36 Yusuf wenni umi řaɣan rrusul Bar-Nabas, min ixs ad yini ‘mmis n ufewwej’, netta zi teqbič n Lawi, ixřeq-dd di Qubrus, 37 tuɣa ɣares ijj n iyyar, izzenz i-t uca yiwi-dd tmenyat, issars i-tent ɣar iḍaren n rrusul.