1 Deɣya ɣar ṣṣbeḥ zic mcawaren imeqqranen n ikehhanen d imɣaren n řgens d imseřmaden n idlisen d marra Lmeḥkama Tameqqrant n Wudayen, qqaren as ‘Sunhidrin’. Nitni carfen Yeccu, iwyen t uca sellmen t i Pilaṭus. ^■   2 Isseqsa i-t Pilaṭus: “Ma Cek d Ajeǧid n Wudayen?” Yarra-dd xas, inna as: “Cek tennid t simant nnek.” ^■   3 Tuɣa imeqqranen n ikehhanen ttcetcan zzayes zeg waṭṭas n tmesřayin. 4 Isseqsa t Pilaṭus ɛawed, inna as: “Ma war dd-tᵉttarid s ca? Xzar, aṭṭas n yinni xak ittcetcan!” ^■   5 War dd-yarri Yeccu s walu, ařami ittebhet Pilaṭus.

6 Innum iḍeǧeq i ijj n umeḥbus di kuř řɛid, wenni ixsen nitni. ^■   7 Tuɣa din ijjen umi qqaren Bar-Abbas, ḥebbsen t ak-d imɣewwɣen inni inɣin ijjen deg uɣewweɣ. ^□  ■   8 Isɣuyy řɣaci uca nitni bdan ttᵉttarren zzayes ḥima ad igg am mammec tuɣa innum ittegg řebda i nitni. 9 Yarra-dd Pilaṭus, inna: “Ma texsem ad awem dd-arxuɣ i Ujeǧid n Wudayen?”

10 Minzi tuɣa issen belli imeqqranen n ikehhanen aqa sellmen t zi řeḥsed.

11 Maca imeqqranen n ikehhanen ɛarnen řɣaci maḥend ad ttaren ad asen dd-iḍřeq i Bar-Abbas. ^■  

12 Pilaṭus inna asen: “Min texsem ad ggeɣ s wenni umi tᵉttřaɣam Ajeǧid n Wudayen?”

13 Sɣuyyen ɛawed: “Ṣellb i-t!”

14 Inna asen Pilaṭus: “Man tuɛeffna i igga?” Xenni arnin di tɣuyyit ɛad ktar: “Ṣelleb i-t!”

15 Am tuɣa ixs Pilaṭus ad issarḍa řɣaci, iḍřeq i Bar-Abbas, maca isellem Yeccu, awarni řami ijja ad t hettken s urekkuḍ, ḥima ad t ṣellben. ^■  

16 Gewwden t iɛeskariyyen ɣar daxeř n řemraḥ n Taddart n Ccraɛ , umi qqaren ‘Prituriyum’, uca ssmunen marra řɛeskar. ^■  

17 Ssyarḍen as ijj n werruḍ d azeggʷaɣ, muden as ijj n ttaj s isennanen uca qqnen as-tt,

18 bdan ttseǧamen xas, qqaren as: “Azul xak, a Ajeǧid n Wudayen!”

19 Tuɣa ccaten t ɣar uzeǧif s yijj n weɛmud n uɣanim, ssusufen xas uca uḍaren x ifadden nsen, ɛebden t. 20 Awarni řami t sseḥqaren, kksen as aseřham azeggʷaɣ uca ssyarḍen as arruḍ nnes, xenni ssuffɣen t ḥima ad t ṣellben.

21 Ḥṣaren ijjen wenni dd-ikkin ssenni am dd-yusa zeg iyyar, Cimɛun zi Qayrawan, babas n Aliksandir d Rufus, ḥima ad as yarbu ṣṣalib. ^□  ■   22 Iwyen Yeccu ɣar wemcan umi qqaren ‘Juljuta’ min ixs ad yini ‘Taceqquft’. ^■   23 Wcin as binu ixeǧḍen s mirru ḥima ad t isuw, maca Netta war ixs ad t isuw. 24 Umi t ṣellben, bḍan arruḍ nnes, ggin xas akeccuḍ x min ɣa iksi kuř ijj zzaysen. ^■   25 Tuɣa tasaɛɛet d třata, aqa-tt d tesɛa n ṣṣbeḥ, umi t ṣellben. 26 Ssibbet n řmewt nnes aqa-tt di tira aya sennej nnes: ‘Wa d Ajeǧid n Wudayen’. ^■   27 Ṣellben akides tnayen n ixewwanen, ijjen x ufusi nnes, wenneɣni x uzeřmaḍ nnes. 28 Ammu i ttwakemmřent Tira i iqqaren: “Ittwaḥseb ak-d inni ittɛeddan.” ^■  

29 Inni ssenni dd-ittekken, tuɣa ttceqqafen dayes, tthezzan izeǧifen nsen, nnan: “A Cek wenni i ɣa ihedmen Zzawect Tameqqrant uca ad tt tebnid ɛawed di třata n wussan, ^■   30 senjem ixef nnek, hwa-dd zi ṣṣalib!” 31 Ammu i t sseḥqaren ɛawed imeqqranen n ikehhanen ak-d imseřmaden n idlisen, nnan: “Tuɣa issenjem inneɣni, maca war izemmar ad issenjem ixef nnes. 32 Ejj Lmasiḥ, Ajeǧid n Israil, ad dd-ihwa řexxu zi ṣṣalib, ḥima ad nẓar uca ad namen.” Uřa d yenni ittwaṣellben akides, kkwaren t.

33 Umi dd-tiweḍ tsaɛɛet setta, aqa-tt d ḍḍhur, tewḍa-dd taǧest x temmurt marra ař tesɛa, aqa-tt d třata n uɛecci. ^■   34 Ɣar tsaɛɛet n tesɛa isɣuyy Yeccu s tmijja tejhed, inna s yiřes n Tramit : “Il, Il, lmana cabaqtani?”, min ixs ad yini: “Ay AREBBI inu, ay AREBBI inu, mayemmi dayi tsemḥed?” ^□  ■  

35 Ca zeg inni din ibedden, umi sřin aya, nnan: “Aqa Netta ittřaɣa i Iliya!” 36 Yuzzeř-dd ɣares ijjen, issuff ict n spunxa s řxeǧ, igga i-tt x uɣanim, iwca as ḥima ad isuw. Maca nitni nnan: “Raja! Ejj aneɣ ad nẓar ma ad dd-yas Iliya ḥima ad t-i-dd-issehwa.” ^■   37 Xenni isɣuyy Yeccu s ict n tmijja tejhed aṭṭas uca ibedd asuffeɣ n nnefs. 38 Ařeḥḥaf n wadaf ɣar Zzawect Tameqqrant icarreg x tnayen zi sennej ɣar swadday. ^■   39 Umi iẓra řqebṭan n mya i din ibedden zzates, isɣuyyu ammu s jjehd uca xenni ibedd usuffeɣ n nnefs, inna: “S tidett tuɣa Bnadem-a d Mmis n AREBBI!” ^■   40 Tuɣa din ɛawed timɣarin xezzarent i-dd zi řaggʷaj, jar asent ɛawed Maryam n Majdala d Maryam yemmas n Yaɛqub, amaẓuẓ, uřa d yemmas n Yusis, d Salumi, ^■   41 tinni t-i-dd-iḍfaren, sexxarent xas umi t tuɣa di Ljalil, uřa d timɣarin nneɣnit tinni tuɣa akides i dd-igeɛɛden ɣar Urcalim. ^■  

42 Řami dd-tiweḍ tmeddit n Usewjed, tameddit nni iǧan qbeř i wass n ssebt, ^■   43 yusa-dd Yusuf zi Arimatiya, ijj n umcawar icenɛen n Lmeḥkama Tameqqrant n Wudayen, wenni tuɣa ittrajan Tageldit n AREBBI, uca netta izɛem ad yadef ɣar Pilaṭus maḥend ad as ittar řxecbet n Yeccu. ^□   44 Ittebhet Pilaṭus umi immut ammu deɣya uca iřaɣa-dd i řqebṭan n mya, isseqsa t, ma immut ma ɛad. 45 Umi ifhem man aya zi řqebṭan n mya, iwca řxecbet i Yusuf. 46 Isɣa řecfen n řeqṭen azdad iksi t zi ṣṣalib, icfen i-t di řeqṭen azdad, issars i-t deg wenḍeř i tuɣa ittwaxebcen di sseǧaḥ uca isseqnunni ict n teṣḍart x tewwart n wenḍeř. ^■   47 Tuɣa Maryam n Majdala d Maryam, yemmas n Yusi, ẓrint mani t ssarsen.