1 Awarni as isscen ayi Yahucaɛ, arrays n ikehhanen. Netta tuɣa ibedd zzat i wudem n Lmalak n SIDI. Cciṭan ibedd-dd ɣar ufus afusi n Yacuɛa ḥima ad zzayes isscetca. 2 SIDI inna i cciṭan: “Ad yiři ad cek iɛaqeb SIDI, a cciṭan! Ad cek iɛaqeb SIDI, wenni ifarzen Urcalim! Ma war iǧi Yahucaɛ wanita d ijj n ukeccuḍ qeřɛen t-dd zi tmessi?” ^■   3 Yahucaɛ tuɣa yarḍ arruḍ iwessxen am ibedd zzat i wudem n Lmalak.

4 Xenni iṭṭef Netta deg wawař uca issiweř ak-d yenni ibedden zzat i wudem nnes, inna: “Kksem as arruḍ iwessxen i wanita!” U Netta inna as: “Xzar, Necc kkseɣ zzayek řmuɛṣiyyet nnek u ad cek ssyarḍeɣ s ijj n warruḍ icuwwaren.” ^■   5 Necc nniɣ: “Ad as qqnen ijj n areẓẓet tamezdagt x uzeǧif nnes!” U nitni qqnen as areẓẓet tamezdagt x uzeǧif nnes uca ssyarḍen as arruḍ icuwwaren u Lmalak n SIDI ibedd din.

6 Xas uca iched Lmalak n SIDI i Yahucaɛ, inna:

7 “Ammu i iqqar SIDI n řɛeskarat:

Mařa cek tuyured x ibriden inu,

u mařa cek ad teḥḍid tasexxart inu,

xenni ad tessuyured uřa d Taddart inu s řḥeqq

u ad tiřid d ameḥḍay n řemraḥat inu,

u Necc ad ac wceɣ ad tzemmared ad traḥed ad tadfed

jar inni da ibedden.

8 Xenni seř, Yahucaɛ, cek, arrays n ikehhanen,

cek d imeddukkař nnek, inni iqqimen zzatek,

maɣar nitni d ict n řeɛřamet n utebhet,

maɣar xzar, Necc ad dd-awyeɣ Amsexxar inu, ‘AƔEDDU’. ^■  

9 Maɣar xzar, aẓru,

wenni din ssarseɣ zzat i Yahucaɛ,

x weẓřu nni xezzarent sebɛa n tiṭṭawin.

Xzar, Necc ad neqceɣ taneqqact nnes,

ammu i iqqar SIDI n řɛeskarat,

u Necc ad kkseɣ řmuɛṣiyyet n temmurt-a deg ijj n wass.

10 Deg wass nni, iqqar SIDI n řɛeskarat,

ad tɛarḍem ijj i wenneɣni sadu tzayart u sadu wartu.”