Řḥukm x Urcalim d řegnus
3
1 Uct xam, tenni iɣewwɣen u tᵉttwafsed, tandint n ddeǧ!
2 Nettat war tᵉttesři ɣar tmijja,
War tqebbeř aweddeb,
nettat war tᵉttciř x SIDI,
nettat war tᵉttqarrab ca ɣar AREBBI nnes.
3 Řḥukkam nnes di řwest nnes
d ayraden ittarrujduden,
řquḍat nnes d uccanen n ǧiřet,
inni war ittejjin walu ař tuffut. ■
4 Inabiyyen nnes daysen řefcuc,
nitni d iryazen ixeddaɛen!
Ikehhanen nnes ssfesden Zzawect Iqeddsen,
nitni xalfen Ccariɛa. ■
5 SIDI amsegged aqa-t di řwest nnes.
Netta war ittegg ca min war iseggden.
Kuř tuffut ittarra řḥeqq nnes ɣar tfawt,
ɛemmarṣ war tneqqes!
Wenni itteggen min war iseggden, war issin ca aseḍḥi. ■
6 Necc qḍiɣ řegnus,
areddǧeɣ ṣṣumɛat nsen n tɣemmura.
Necc xřiɣ i tbridin nnes,
ařami uřa d ijjen war iqqim ɛad ittsara dinni.
Tineddam nsen ttwareddǧent,
war iqqim ḥed,
uřa d ijj n umezduɣ.
7 Necc nniɣ: Ittxeṣṣa cem ad ayi teggʷeded, ad teksid aweddeb!,
ḥima war tᵉttwakkes tzeddiɣt nnes,
s marra min d as ɣa ggeɣ.
S tidett, nitni ɣewwɣen zic
maḥend ad ssfeḍḥen timegga nsen.
8 S uya, rajam ayi, issawař SIDI,
ass i di dd ɣa kkareɣ i tkeccaḍt.
Minzi aya d řḥukm inu iseggden aqa ad jarweɣ řegnus,
ad ssmuneɣ tigeldin,
ḥima ad xasen ssfesyeɣ asxeḍ inu,
marra řḥaduq n weɣḍab inu,
maɣar s tmessi n wassam inu
ad tᵉttwacc marra tammurt.
Ttubet n řegnus
9 Minzi xenni Necc ad beddřeɣ řḥard n řegnus
iyencicen imezdagen ad ten wceɣ,
ařami i ɣa řaɣan x Yisem n SIDI,
ḥima ad t ɛebbden am s yict n teɣruḍt.
10 Zeg ujemmaḍ n iɣezran n Kuc,
inni xafi ittẓaǧan s wuř,
yeǧis n immṭarrcen inu,
ad awyen tawhibt inu.
11 Deg wass nni war tesseḍḥid ca ɛad,
x marra timegga i zi xafi tɣewwɣed,
minzi ad kkseɣ zi řwest nnem
inni ittfeyycen di nnfaxet,
u kenniw war tessgeɛɛadem ɛad ixef nwem
x wedrar n Zzawect inu Iqeddsen.
12 Necc ad jjeɣ di řwest nnem ijj n řgens ittwaḥṣar, iẓeřḍ.
Nitni ad ttecřen x Yisem n SIDI.
13 Min iqqimen n Israil war ittegg min war iseggden,
nitni war ssxarriqen ca,
u deg uqemmum nsen war ittᵉttwifi yiřes issxarriqen,
maca nitni ad heddan ad zzřen,
u uřa d ijjen ad ten issnexřiɛ.
Řefraḥet n Israil d uɛeddeř nnes
14 Ɣennej, a tayeǧit Ṣihyun,
sřiwřew, a Israil.
Farḥ u tfaǧid s marra uř nnem,
a, tayeǧit Urcalim! ■
15 SIDI ikkes řeḥkamat nnem,
Netta aqa imḥa řeɛdu nnem.
Ajeǧid n Israil, SIDI, aqa-t di řwest nnem!
War tẓarred ɛad řɣar.
16 Deg wass nni ad inin i Urcalim:
War tteggʷed ca, Ṣihyun!
War ttejji ifassen nnem ad arxun ɛemmarṣ ɛad!
17 SIDI, AREBBI nnem, aqa-t di řwest nnem,
ijj n bu-teɣruḍt nni i dd ɣa yawyen asenjem
Netta ad zzayem ifarḥ s waṭṭas,
Netta ad iseɣḍ di tayri nnes,
Netta ad xam isřiwřew s uɣennej.’
18 Necc ad ssmuneɣ inni iceṭṭnen
umi war zemmaren ad carcen di tmesmunt ittwaggen i řɛid.
Aqa nitni zzayem!
Ddqeř n řḥegra aqa-t xas.
19 Xzar, necc ad ceɣřeɣ ixef inu ak-d yenni cem iḥṣaren.
Necc ad ssnejmeɣ iqejdaḥen
u yinni ittwassuffɣen ad ten ssmuneɣ.
Necc ad asen wceɣ řɛezz d yijj n isem icenɛen,
di marra tammurt nni ten tuɣa issfeṭṭḥen.
20 Di řweqt nni ad kenniw dd-arreɣ,
u di řweqt nni ad kenniw ssmuneɣ,
Necc ad awem wceɣ ijj n yisem icennɛen d řɛezz
jar marra řegnus n ddunect,
xmi i zzaywem ɣa ssenqeřbeɣ tameḥbast nwem
zzat i tiṭṭawin nwem,
inna SIDI.