Mixa iẓra tuɛeffna i iǧan di řgens
7
1 “Uct inu, maɣar necc aqa ayi amecnaw ɣar tmeyra n tini n unebdu,
amecnaw ɣar twařa wiss tnayen n weřqaḍ n uḍiř .
War din uřa d ijj n uzekkun n uḍiř i macca.
Řeɛmar inu dayes meẓri n řbacur qbeř řweqt.
2 Tamexsiwt icewwaren war teqqim di temmurt,
uca war din uřa d ijj n uṣebḥan jar iwdan.
Nitni marra ttḥaman x idammen,
ijjen iyemmar wenneɣni s tracca. ■
3 Ifassen nsen wejden s tnayen maḥend ad ggen řɣar.
Řḥakem ittar u řqaḍi ittegg i-tt di ṭṭweɛ n uxeǧeṣ,
u wenni ameqqran issawař ɛlaḥsab meẓri aɛeffan n řeɛmar nnes
u ammu i ssfarɣen nitni tamesřact. ■
4 Wenni zzaysen d aṣebḥan aṭṭas aqa-t am ijj n cbarq n isennanen,
wenni d aṣdiq n wuř qaɛ zzaysen aqa-t mahu x ijj n wefray n cbarq ak-d isennanen.
Ass n iɛessasen nnek, ass n uxeǧeṣ, yusa-dd.
Řexxu ad nxeřɛen.”
Mixa ad iraja asenjem n SIDI
5 “War tumined deg ijj n umeddukkeř,
war tᵉttecřed x umeddukkeř nnek iɛizzen.
Ḥḍa tiwwura n uqemmum nnek
zi tenni iǧan ɣar weḥsin nnek.
6 Maɣar mmis isseḥqara babas,
yeǧis tᵉttḍadda yemmas,
tasřit x lallas,
řɛedyan n ijj n weryaz aqa d aytbab n taddart nnes.” ■
7 “Maca necc ad xzareɣ ɣar SIDI,
ad rajiɣ AREBBI n usenjem inu.
AREBBI inu ad ɣari dd-iseř.”
8 “War d ayi sfarreḥ, a tamɣart nni d řeɛdu inu!
Maɣar mařa wḍiɣ, ad kkareɣ ɛawed,
mařa qqimeɣ di taǧest,
ad yiři SIDI d tafawt i necc.
9 Necc ad ksiɣ asxeḍ n SIDI,
minzi necc xḍiɣ akides,
ɣares ař xafi i ɣa iwwet Netta x ddeɛwet inu
u ad ayi yaɣ tasɣart inu.
Netta ad ayi issuffeɣ ɣar tfawt,
necc ad ẓareɣ tasegda nnes. ■
10 Tamɣart tenni d řeɛdu inu ad tẓar aya.
Mři d as i ɣa tdeř řeḥya i tenni d ayi iqqaren:
‘Mani iǧa SIDI, AREBBI nnek?’
Tiṭṭawin inu ad ɣares xzarent!
Řexxu ad tᵉttwaddez nettat,
am ubeǧaɛ di zznaqi.” ■
11 “Deg wass i di i ɣa ibna Netta řeḥyuḍ nnek ɛawed,
deg wass nni ad ttraḥ tewṣeyyet ɣar řaggʷaj aṭṭas.
12 Deg wass nni ad dd-asen,
zi Accur d tneddam n Miṣra,
u zi Miṣra ař iɣzar n Lfuraṭ,
u zi řebḥar ař řebḥar u zeg wedrar ař wedrar nneɣni.
13 Maca ddunect ad tedweř d řxarbet,
zi ssibbet n imezdaɣ nnes,
zi ssibbet n řɣiǧet n tmegga nsen.” ■
14 “Arwes řgens nnek s teɣɣarct nnek,
uǧi n tesɣart nnek,
tenni iǧan weḥḥdes deg wezɣar,
di řwest n Karmil.
Ejj i-tent ad arewsen di Bacan d Jilɛad,
am deg wussan n wecḥař uya. ■
15 Necc ad as sseccneɣ lmuɛjizat,
am deg wussan řami dd-teffɣed zi temmurt n Miṣra. ■
16 Řegnus ggur ad t twařin,
u ad sseḍḥan zi ssibbet n marra tizemmar nsen,
nitni ad ssarsen afus x uqemmum,
imezzuɣen nsen ggur ad dduhcaren.
17 Nitni ad řesḥen taɛejjajt am ufiɣar,
ad dd-ffɣen zi lburjat nsen am imuddar n temmurt ittbuɛen.
ad dd asen ttarjijen ɣar SIDI, AREBBI nneɣ,
u ad zzayek ggʷeden.” ■
Tayri n Arebbi d arreḥmet nnes
18 “Man wen iǧan d Arebbi am Cek, wenni iɣeffaren řmuɛṣiyyet,
wenni iɛeddun x uxeṭṭu n min iqqimen zi tesɣart nnes?
Netta war imenneɛ i řebda deg weɣḍab nnes,
maɣar yarḍa as tamexsiwt icewwaren. ■
19 Netta ad xaneɣ yarḥem ɛawed,
Netta ad iɛfes x řmuɛṣiyyet nneɣ,
wah, Cek ad tenḍared marra ddnub nsen
di řaǧaɣ n řebḥar.
20 Iři Cek ad tessecned řaman i Yaɛqub
u tamexsiwt icewwaren i Ibrahim,
am mammec tejjuǧed i ibabaten nneɣ
zeg wussan n mecḥař uya.”