Iɛřamen i Israil u i řḥukkam nnes
2
1 “Uct x yenni ittxemmamen di řmuɛṣiyyet u x yenni ittxemmamen di řɣar di qamat nsen.
Ɣar teffut ad t ggen,
maɣar afus nsen dayes aṭṭas n tzemmar.
2 Nitni mmeẓřen deg iyyaren
uca ttkeccḍen ten ɛawed,
uřa d tudrin, uca ttᵉṭṭfen tent.
Ammu i ggin nitni s řexcunect i weryaz u i taddart nnes,
wah, i kuř aryaz u i tesɣart nnes.” ■
3 “S uyenni, inna SIDI:
Xzar, Necc twenniɣ ijj n řɣar x řaǧ-a,
i zi war tzemmarem ad tjebdem irawen nwem,
u i zi war tzemmaren ad tuyurem ɛad s uɛeffar,
maɣar ad tiři d ict n řweqt taɛeffant.■
4 Deg wass nni ad xawem ssgeɛɛden ijj n lmatal
u ad ɣennjen ijj n yeẓri n wecḍan am ttcetcan,
u ad inin: Neccin nettwareddeǧ qaɛ!
Netta yarra tasɣart n řgens inu ɣar wenneɣni.
Mammec tt iksi zzayi.
Netta iwca iyyaren nneɣ i wenni dd-iffɣen zeg webrid!
5 S uyenni war ɣarek ittiři uřa d ijjen
wenni i ɣa inḍaren afiřu n řeqyas ɛlaḥsab taqedduḥt
deg wegraw n řgens n SIDI.” ■
6 “ ‘War ssuffuɣem awař ammu s ukuffu!’,
ammu i ssawařen nitni am ssuffuɣen kuffu.
‘X man aya war zemmaren nitni ad ssuffɣen awař s ukuffu!’
Ammu i ɣa tiři řefḍiḥet war tᵉttwakkess! ■
7 A kenniw, taddart n Yaɛqub, ma izemmar ad ittwanna aya?
‘Ma ijja ca Arruh n SIDI war t iggi?’
niɣ: ‘Ma tina d timegga nnes?’
Ma war tteggen wawařen inu řxar
i yenni igguren s tsegda?
8 Maca ɛad idennaḍ ikkar řgens inu am yijj n řeɛdu.
Teksim arruḍ d upartessu
zeg imsebriden iqefřen,
inni ittɛiffen umenɣi.
9 Kenniw tessuffuɣem timɣarin n řgens inu
zi taddart nsent iɛizzen.
Iḥenjiren nnes tekksem asen kenniw talwizt inu i řebda.
10 Kkarem u aggʷejem,
minzi wa war iǧi d amcan n arraḥet!
Maɣar aqa tammurt tᵉttwasexmej, ad tawi areddeǧ,
wah ijj n umeddur war icnin.
11 Mařa ca n ijj iḍeffar asemmiḍ u iqqar ixarriqen, uca iqqar:
‘Necc ad ac ssuffɣeɣ awařen s ukuffu di ṭṭweɛ n binu d ccrab!’
aqa netta xenni d unabi n řgens nni issuffuɣen awařen s ukuffu.”
12 “S tidett, a Yaɛqub, Necc ad cek ksiɣ ɣari qaɛ,
nican Necc ad ssmuneɣ min iqqimen zi Israil.
Ad ten ssmuneɣ am wuǧi n Bucra,
am ict n tḥimart di řwest n trekkwast.
Ad din yiři ijj n uɛurric n iwdan.
13 Amfeǧeq ad izwar zzat i wudem nsen,
nitni ad feǧqen u ad ɛdun x tewwart,
u ad zzayes dd-ffɣen.
Ajeǧid nsen ad izwar zzat i uɣembub nsen,
u SIDI ɣar uzeǧif nsen.”