1 Man aya tuɣa d ict n tmesřact taɛeffant ař ṭṭarf i Yunus uca thaj tefqeḥt nnes. 2 Iẓẓuǧ i SIDI, inna: “A SIDI, ma war nniɣ ammu umi d ayi tuɣa di temmurt inu? X man aya nwiɣ ad arewřeɣ ɣar Tarcic minzi necc ssneɣ belli Cek d ijj n AREBBI d aḥnin d arḥim, ɣarek ttasiɛ n řxaḍar d tmexsiwt icewwaren tameqqrant uca tnedmed ad tegged řɣar. ^■   3 Xenni řexxu, a SIDI, kkes zzayi řeɛmar inu, minzi ittban ayi belli řmewt inu ḥsen zi tudart inu.” 4 Inna SIDI: “Ma tecna umi txeyyqed ammu?”

5 Iffeɣ Yunus zi tendint uca iruḥ iqqim di jjihet n ccarq n tendint mani igga i yixef nnes taseqqaft n ifetwan uca iqqim swadday nnes di tiři maḥend ad iẓar min ɣa imsaren i tendint. 6 Tuɣa SIDI AREBBI issewjed ict n tcejjart n utebhet uca ijja-i-tt ad teyma tuɛřa x Yunus ḥima ad tiři d tiři x uzeǧif nnes u ḥima ad ikkes uxeyyeq nnes. Ifarḥ Yunus aṭṭas x tcejjart-a n řeɛjeb. 7 Maca ɣar řefjar n twecca issewjed AREBBI ict n tkecca nni tesseḥřec tacejjart n utebhet nni uca tuẓeɣ. 8 Ařami dd-tenqar tfuct, imsar belli AREBBI issekk ijj n usemmiḍ n ccarq iḥarren uca tewta tfuct azeǧif n Yunus ařami idewwex uca netta yarzu ad immet, inna: “Ittban ayi belli řmewt inu ḥsen zi tudart inu.” 9 Xenni inna as AREBBI i Yunus: “Ma tecna umi txeyyqed ammu x tcejjart-a n utebhet?” Inna: “Aqa d ṣṣeḥ aqa xeyyqeɣ, ařami zemmareɣ ad mmteɣ!”

10 Inna as SIDI: “Cek tezziǧez ac tcejjart n utebhet i umi war txedmed u i umi war tesseymed, d tenni dd-yusin deg ict n ǧiřet uca tᵉttwahellek deg ict n ǧiřet.

11 Ma Necc war d ayi tezziǧez tendint n Ninwa tameqqrant tenni i di iǧa ktar zi mya u-ɛicrin-ařef n iwdan inni war issinen řfarq jar ufus nsen afusi d ufus nsen azeřmaḍ u sennej i uya aqa din aṭṭas n řebhayem?”