1 Deg useggʷas amezwaru n Balcaṣṣar, ajeǧid n Babil, iẓra Daniyal ict n tarjit d tmeẓra deg uzeǧif nnes umi t tuɣa di tassut. Xenni yura tarjit nni uca iḥaja zzayes timesřayin timezwura.

2 Issiweř Daniyal, inna: “Twařiɣ s ǧiřet ict n tmeẓriwt, u xzar, aqa din arebɛa n isemmiḍen n ujenna sshewřen řebḥar ameqqran, 3 uca arebɛa n imuddaren imeqqranen, inni war yarewsen ca deg wayawya, geɛɛden-dd zi řebḥar.

4 Tuɣa amezwaru am weyrad, ɣares afriwen am ugider. Necc qqimeɣ xezzareɣ ařami ttwaqeřɛen wafriwen nnes. Ittwasgeɛɛed-dd zi temmurt uca ittwassars x iḍaren nnes am yijj n bnadem uca immewc as ijj n wuř n bnadem.

5 U xzar, ijjen nneɣni, wiss tnayen, yarwes di ddub u issgeɛɛed ixef nnes ɣar ijj n uɣezdis u deg uqemmum nnes jar teɣmas nnes aqa din třata n yexsan n tɣezdist zeg idmaren uca nnan as: ‘Kkar, ecc aṭṭas n weysum!’

6 Awarni as ẓriɣ, u xzar, ijj nneɣni am uɣiřas. Ɣares x weɛrur nnes arebɛa n wafriwen n ijj n wejḍiḍ u amuddar nni tuɣa ɣares arebɛa n izeǧifen uca temmewc as ṣṣulṭa.

7 Awarni as xzareɣ di tmeẓra di ǧiřet, u xzar, amuddar wiss arebɛa issaggʷad u issnexřaɛ u ɣares aṭṭas n jjehd. Ɣares tiɣmas n wuzzař, icca, iřbez u min iqqimen iɛfes xas s iḍaren nnes. Tuɣa immsebḍa x imuddaren nneɣni nni tuɣa qbeř nnes u ɣares ɛecra n waccawen. 8 Necc ḥḍiɣ x waccawen, u xzar, ijj n waccaw d ameẓyan igeɛɛed jar asen u ttwaqeřɛen-dd třata n waccawen imezwura uca ttwakksen-dd zeg wemcan nsen. U xzar, deg waccaw nni tuɣa axmi dayes tiṭṭawin n bnadem d yijj n uqemmum iccur s řefḍayeḥ timeqqranin.

9 Necc qqimeɣ ttwařiɣ ařami mmarsen řekrasi igellden uca iqqim Uwessar n wussan. Arruḍ nnes d acemřař am wedfeř u acewwaf nnes am taḍuft teṣfa. Řkursi igellden nnes d iḥudaq n tmessi d tjarrarin nnes d tmessi itteḥduduqen.

10 Iffeɣ-dd zzayes ijj n yeɣzar n tmessi. Ařef x řuřuf tuɣa ttsexxaran as u ɛecra n řuřuf x ɛecra n řuřuf bedden zzates. Agraw n ccreɛ iṭṭef deg uɣimi uca nnurzmen idlisen. ^■  

11 Necc qqimeɣ xezzareɣ zi ssibbet n řḥess n wawařen imeqqranen nni issiweř yicc nni. Necc qqimeɣ xezzareɣ ařami ittwaneɣ umuddar u tᵉttwahellek arrimet nnes u ittwasellem i tmessi itteḥduduqen.

12 Uřa d imuddaren inneɣni tᵉttwakkes asen ṣṣulṭa nsen u immewc asen tazzuggart n tudart ař ict n tsaɛɛet u ař ijj n řmijař ittwaggen.

13 Necc qqimeɣ ttwařiɣ di tmeẓra n ǧiřet, u xzar, ijjen igga am yijj n Mmis n bnadem yusa-dd u Netta yuyur ɣar Uwessar n wussan uca ssqarrben t zzates.

14 Temmewc as ṣṣulṭa d ccan d tgelda, u marra ccuɛub d řegnus d iřsawen tuɣa ttsexxaren as. Ṣṣulṭa nnes d ict n ṣṣulṭa i řebda i war ifennin u tagelda nnes war izemmar ad tt ḍarren. ^■  

15 Necc, Daniyal, aqa ittwasḥissef buḥbeř inu daxeř di arrimet inu u timeẓra deg uzeǧif inu ssenxeřɛent ayi.

16 Necc uyureɣ ɣar yijjen zeg yenni din ibedden u sseqsiɣ t x min ixs ad yini man aya marra u netta issiweř-dd akidi, icarreḥ ayi timesřayin-a.

17 Imuddaren-a imeqqranen, arebɛa nni, aqa aten arebɛa n ijeǧiden nni dd ɣa igeɛɛden zi temmurt.

18 Awarni aya imqeddasen n Umɛuǧi x kuřci ad ṭṭfen tagelda u tagelda ad ɣarsen tiři i řebda, wah i řebda n řebdayat.

19 Xenni xseɣ ad ssneɣ řmeɛna d tidett n umuddar wiss arebɛa, wenni tuɣa immsebḍa aṭṭas x marra inneɣni, issaggʷad břa řḥed, ɣares tiɣmas n wuzzař d waccaren n nnḥas, uca icca, iřbez u min iqqimen iɛfes xas s iḍaren nnes. 20 U x ɛecra nni n waccawen x uzeǧif nnes, u x wenneɣni i dd-igeɛɛden u i umi dd-wḍan třata zzates, icc nni ɣares tiṭṭawin d ijj n uqemmum iccur s wawařen imɣaren, d wenni iban-dd d ameqqran x waccawen nneɣni, 21 necc ẓriɣ aqa icc nni ittmenɣa ak-d imqeddasen u iɣelleb xasen, 22 ɣares ařami dd-yusa Umɣar n wussan u yuɣa tasɣart i imqeddasen n Umɛuǧi x kuřci uca tusa-dd tsaɛɛet ittwaggen uca ṭṭfen imqeddasen tagelda.

23 Netta inna ammu: “Amuddar wiss arebɛa ad yiři d tageldit wiss arebɛa x temmurt nni i ɣa tiři temsebḍa x marra tigeldiwin nni. Ad yecc tammurt marra, ad xas iɛfes u ad tt iřbez. 24 U x ɛecra n waccawen, aqa zi tgeldit nni ad kkaren ɛecra n ijeǧiden u awarni asen ad ikkar wenneɣni u wanita ad yiři immsebḍa x imezwura u netta ad ideǧ třata n ijeǧiden. 25 Netta ad ittɛeffar s wawařen nnes x Umɛuǧi n kuřci u ad yareddeǧ imqeddasen n Umɛuǧi x kuřci u ad yarzu maḥend ad ibeddeř ikuden ittwaggen d Ccariɛa u nitni ad mmewcen deg ufus nnes ɣares ař ijj n ukud d ikuden d wezyen n ukud. ^■   26 Xenni ad iṭṭef wegraw n ccreɛ deg uɣimi, uca ad zzayes ttwakksen ṣṣulṭa nnes maḥend ad ittwareddeǧ u ad ittwateḥḥa ař aneggaru. 27 Maca tagelda d ṣṣulṭa d řemɣaret n marra tigeldiwin sadu ujenna ad mmewcent i řgens n imqeddasen n Umɛuǧi x kuřci. Tageldit nnes d ict n Tgeldit i řebda u marra tigeldiwin ad t weqqaren u ad as ṭaɛen i Netta.”

28 Wanita d awař aneggaru. Xafi necc, Daniyal, aqa ixarriṣen inu ssenxeřɛen ayi u tissiqt truḥ zeg wudem inu, maca necc ḥḍiɣ awař nni deg wuř inu.

Ař danita i tiweḍ tira s yiřes n Tramit.