1 “Sfewwej, sfewwej řgens inu, ammu i iqqar AREBBI nwem! 2 Siwřem ɣar wuř n Urcalim uca barrḥem as aqa amenɣi nnes iqḍa, aqa řmuɛṣiyyet nnes teṣřeḥ, aqa teksi s uḍeffus zeg ufus n SIDI i marra ddnub nnes. 3 Tmijja n wenni isɣuyyun di řexřa: ‘Swejdem abrid i SIDI, sarrḥem di řexřa abrid i AREBBI nneɣ!’ ^■   4 Marra tiɣzurin ad ttwasgeɛɛdent, marra idurar d tewririn ad ttwassehwan. Min ifarɣen, ad idweř iseggem uca tiṣuḍar iwɛaren ad dewřent d řewḍa iwaṭan. 5 Ad ittwassargeb uɛuǧi n SIDI uca marra ddat ad tẓar aqa aqemmum n SIDI issiweř.” ^■  

6 “Tmijja tenna: ‘Barreḥ!’ U netta inna: ‘Min i ɣa barrḥeɣ?’ ‘Marra ddat am arrbiɛ d marra tamexsiwt nnes icewwaren am tnewwact deg iyyar. ^■   7 Arrbiɛ ittaẓeɣ, tanewwact tesřaw xmi xas ittṣuḍ Arruḥ n SIDI. D tidett, řgens d arrbiɛ. 8 Arrbiɛ ittaẓeɣ, tanewwact tesřaw, maca awař n AREBBI nneɣ ittɣima i řebda.’ ” ^■  

9 “geɛɛed x ijj n wedrar d ameqqran, a Ṣihyun, a cem tambeccart n řexbar aṣebḥan, sgeɛɛed tmijja nnem s jjehd, a Urcalim, a cem tambeccart n řexbar aṣebḥan, sgeɛɛed tmijja nnem, war teggʷed, ini i tneddam n Yahuda: ‘Xzar, AREBBI nkent!’

10 Xzar, ad dd-yas Sidi inu, SIDI, Netta ijhed uca aɣiř nnes ad iḥkem. Xzar, řmunet nnes ɣares uca axeǧeṣ nnes izwar as. ^■  

11 Ad yarwes taḥimart nnes am umeksaw, ad issmun izmaren ɣar uɣiř nnes uca ad ten yarbu deg weḥsin nnes. Ad indeh inni issuṭṭuḍen s řeɛqeř.” ^■  

12 “Man wen iɛbaren aman n řebḥar s wuru n ufus nnes u man wen iksin řeqyas n ijenwan s ccbar? U man wen iṭṭfen ucař n temmurt s ijj n řmud? Man wen iwezznen idurar s ijj n řbasku u tiwririn s řmizan?

13 Man wen ibeqqcen x Arruḥ n SIDI u man wen t issɣaren am umcawar nnes? ^■  

14 Wi t iseqsan Netta x ccwar d man wen i d as isscnen řefhamet u wi d as issřemden abrid n řḥeqq uca yarni as tussna? Wi d as issargben abrid iccuren s řefhamet?

15 Xzar, řegnus ttwaḥesben am ict n tuddint zeg ubuqař u am cwayt n tneɣda x řmizan. Aqa da, Netta issgeɛɛed tigzirin am tɛejjajt ifsusen.

16 Lubnan war ittqiddi i ukeccuḍ n tmessi uca řmař nnes war ttqiddin i tɣarṣt n wecmaḍ.

17 Marra řegnus aqa aten am walu i Netta uca iḥesseb i-ten aqa sekkwan qell x walu u xwan.” ^■  

18 “Wi ak-d i ɣa tessemquddem Arebbi niɣ man arwas i zi t ɣa txeřfem? ^■  

19 Aḥrayfi ittkebba řexyař ineqcen u amziř n wureɣ ittɣeǧef i-t s wureɣ u ifessi as tiseddyin n nnuqart. 20 Wenni iǧan d amezřuḍ i tewhibt n usgeɛɛed ad ixḍar ijj n ukeccuḍ war yarecci. Netta yarezzu ijj n bu-ṣṣenɛet maḥend ad igg řexyař ineqcen nni war ittenhezzin.”

21 “Ma war tt tessinem? Ma war tt ttesřim? Ma war tt tuɣa ɣarwem ittwassen zeg umezwaru? Ma war tuɣa tḥeṭṭam dsusa n temmurt? 22 Netta d wenni iqqimen x tqurart n tayyut i dd-innḍen i marra tammurt, tammurt mani imezdaɣ nnes ttbanen-dd am iburexsen, d wenni imeḥḥḍen ijenwan am arwaq, ittbezzeɛ i-ten am uqiḍun i wezdaɣ, ^■   23 Netta d wenni ittarran ayt n jjehd d walu, u issbeṭṭeř řquḍat n temmurt. ^■   24 Ɛad cwayt waha ttwaẓẓun, ɛad cwayt waha ttwazarɛen, ɛad cwayt waha iwta jjdeɛ n tcejjart nsen aẓwar di temmurt, aqa iṣuḍ Netta xasen ařami uẓɣen uca taḥaryaḍt teksi ten am uřum.”

25 “Ak-d man wen texsem kenniw ad ayi tessemquddem, man wen i di arewseɣ?, iqqar Umqeddas. 26 Sgeɛɛdem tiṭṭawin nwem u xzar, man wen iggin man aya? D Netta wenni issuffuɣen řɛeskar nsen marra, wenni d asen ittřaɣan marra s isem nsen s řemɣaret n tzemmar nnes u s řɛezz nnes ijehden, war ibeṭṭeř uřa d ijj!”

27 “Mayemmi teqqared xenni, a Yaɛqub, u tessawařed ammu, a Israil: ‘Abrid inu innuffar x SIDI u tasɣart inu tᵉttekk x AREBBI inu?’ 28 Ma war tt tessined? Ma war tt tesřid aqa AREBBI n řebda, SIDI, wenni dd-ixeřqen ṭṭrufa n temmurt, war ittiḥeř u war yarexxu? War izemmar bnadem ad ifhem řeɛqeř nnes. ^■   29 Netta ittic jjehd i wenni yuḥřen u wenni war ɣar teǧi tzemmar ɛad, yarenni as jjehd s waṭṭas. 30 Iḥenjiren ttaḥřen u arexxun, iḥudriyyen ttenqraḍen uca weṭṭan, 31 maca inni ittrajan SIDI, ttaymen jjehd n jdid. Nitni ttᵉṭṭfen afriwen am ugider, ttazzřen, maca war ttiḥřen, gguren maca war arexxun.”