1 “Uct x Ariyil, Ariyil, tandint n řmargeḥ n řɛeskar n Dawud. Arnim ɛad ijj n useggʷas ɣar useggʷas-a, jjem řeɛyudat n useggʷas ad ɛdun, 2 xenni ad ḥṣareɣ Ariyil, uca ad din yiři uweḥweḥ d wecḍan u nettat ad tiři i Necc amecnaw ‘Ariyil, am řkuccet n tmessi. 3 Ad am qewwareɣ u ad cem ḥṣareɣ s ijj n řɛeskar i uḥeṭṭu uca ad xam ssbeddeɣ lbarajat. ^■   4 Ad tᵉttwasehwid, ad tessiwřed zi temmurt uca awařen nnem ad ten tremremem zi tɛejjajt. Tmijja nnem ad teffɣed zi temmurt am tmijja n wenni issawařan ak-d imettan uca awařen nnem ad iřin am ucewcew waha zeg ucař. ^■   5 Abarru n iɣrimen nnem ad yiři am tɛejjajt tazdadt, uca abarru n ayt n bu-řexcunet am uřum iɛeddun, ittawy i-t usemmiḍ. Ad imsar deg wermac n wabřiwen, deg ict n tecti! ^■  

6 SIDI n řɛeskarat ad ɣarek innewju s wajjaj d wenhezzi n temmurt, s řḥess ijehden n tmijja nnes, s usemmiḍ n tḥaryaḍt u s uceɛɛař n tmessi ittetten. 7 Am tarjit, ict n tmeẓriwt di ǧiřet, ammu i ɣa yiři ubarru n marra řegnus nni i ɣa immenɣen ak-d Ariyil, wah marra inni i ɣa immenɣen akides u ak-d lburj nnes d inni tt i ɣa iḥṣaren ad iřin ammu. 8 Ad yiři amecnaw ijjen yurja umi dayes yeǧa řaẓ. Xzar, netta ittett, xenni maca ad dd-ifaq, yufa aqa řeɛmar nnes war ijjiwen ɛad. Niɣ ad yiři amecnaw ijjen yurja am iffud, u xzar, netta issess, xenni maca ad dd-ifaq, yufa aqa netta ifna, uca řeɛmar nnes ittmeẓri ɛad ad isu. Ammu i ɣa tiři tmesřact i marra řegnus nni i ɣa immenɣen ak-d wedrar n Ṣihyun.”

9 “Jɛarem u tbehtem, smesḥem tiṭṭawin ař ɣa ttwabellɛent, iřim d idarɣařen! Nitni skaren, maca war iǧi zi binu, ttemraywan, maca war iǧi zi ccrab.

10 Maɣar SIDI izeǧeɛ xawem buḥbeř n yiḍeṣ yuǧɣen. Ibelleɛ tiṭṭawin nwem, inabiyyen, uca izeǧifen nwem, imwařawen n tmeẓriwin, iřeḥḥef i-ten. ^■  

11 Ammu i d awem tedweř tmeẓriwt n marra aya am wawařen n ijj n wedlis ittwannḍen nni immewcen i wenni issnen tiɣri, qqaren: ‘Ɣar i-t-i-d xafi!’, uca xenni ad yarr: ‘Necc war zemmareɣ ad t ɣareɣ, maɣar icemmeɛ.’

12 Niɣ immewc wedlis i wenni war issnen ad iɣar, umi qqaren: ‘Ɣar i-t-i-d xafi!’, uca xenni ad yarr netta: ‘Necc war ssineɣ ad ɣareɣ.’ ”

13 “Inna ayi Sidi inu: ‘Minzi řgens-a yudes ayi-dd mɣir s wawařen waha u minzi nitni tteggen ayi ccan mɣir s iyencicen nsen, am iggʷej xafi uř nsen, u minzi aweqqar i zi d ayi weqqaren itteffeɣ zi tweṣṣa nni řemden zeg iwdan waha, ^■  

14 s uya, xzar, Necc arenniɣ ad ggeɣ di řgens-a s řeɛjeb, s řeɛjeb d ustebhet. Tiɣit n imiɣisen ad tefna u řefhamet n ifehhamen ad tweddar. ^■  

15 Uct x yenni issnuffaran zzat i SIDI, inni issduřuyen axarriṣ nsen, uca tteggen timegga nsen di ṭṭřam, umi qqaren: ‘Wi d aneɣ iẓrin d wi d aneɣ issnen?’ ^■  

16 Kenniw tessenqeřbem tamesřact! Axmi zeɛma izemmar ad ittwaḥseb bu-třaxt am třaxt, ařami min ittwaggen ad yini x wenni t iggin: ‘Netta war d ayi iggi!’, uca řqecɛet n třaxt ad tini x uqeddar nnes: ‘Netta war ittḥiki walu!’?” ^■  

17 “Ma war iǧi drus i iqqimen ař ɣa idweř Lubnan d řɛarset iṣebḥen u ad tᵉttwaḥseb řɛarset iṣebḥen d azɣar? ^□  

18 Deg wass nni ad sřen idehcuren awařen n wedlis-a ittwannḍen, uca ad twařant tiṭṭawin n iḍarɣařen zi taǧest u zi ṭṭřam. ^■  

19 Ad arnin imwaḍɛen di řefraḥet di SIDI, uca ad farḥen imezřaḍ jar iwdan deg Umqeddas n Israil.

20 Maɣar bu-řexcunet ad iqḍa, wenni isthezan ad ifna, u marra inni yarezzun řɣecc ad nnqeḍɛen, 21 inni itteggen řɛib di bnadem zi ssibbet n ijj n wawař waha, inni issrusan tixecfin i yenni ideffɛen řḥeqq di tewwart n tendint uca ɛarrnen amsegged ɣar uɣezdis x walu.”

22 “S uyenni, ammu i iqqar SIDI, wenni isseṣřaḥen Ibrahim, i taddart n Yaɛqub: ‘Yaɛqub war ittseḍḥi ɛad uca aɣembub nnes war ittewriɣ ɛad. 23 Maɣar xmi i ɣa iẓar tarwa nnes, inni d řxedmet n ifassen inu, di řwest nnes, ad ssqeddsen nitni Isem inu, ad ssqeddsen Amqeddas n Yaɛqub u ad ggʷeden AREBBI n Israil. 24 Inni iweddaren di buḥbeř ad ɣarsen tiři tussna n řefhamet uca inni ittnedqamen, ad arzmen tawwart ad řemden.’ ”